འོད་དཀར།
༢༠༠༩ ལོ་ནས་ཀིརྟིའི་གྲྭ་བཀྲ་བྷེས་རང་ལུས་མེ་མཆོད་ལ་ཕུལ་ནས་རྒྱ་གཞུང་ལ་ངོ་རྒོལ་བྱས་པ་ནས་ད་བར་བོད་ནང་ས་ཁུལ་ཁག་མ་འདྲ་བ་ནས་སྐུ་ལུས་མེ་མཆོད་དུ་ཕུལ་མཁན་དཔའ་བོ་དཔའ་མོ་ཉི་ཤུ་རྩ་གསུམ་བྱུང་ཟིན་པ་ནི་བོད་ཀྱི་ལོ་རྒྱུས་ཙམ་མ་ཡིན་པར་འཛམ་གླིང་གི་ལོ་རྒྱུས་ནང་རང་ལུས་མེ་མཆོད་ལ་ཕུལ་ནས་ངོ་རྒོལ་བྱེད་མཁན་ཆེས་མང་ཤས་ཀྱི་གྲས་སུ་ཆགས་ཡོད། སྤྱིར་ན་དཔལ་འབྱོར་ཁོ་ན་ལ་མགོ་འཁོར་པའི་དེང་སྐབས་ཀྱི་སྐྱེ་བོ་རྣམས་ཀྱིས་ཐོས་ཚེ་འདི་ནི་ཆེས་འཇིགས་སྣང་ཞིག་དང་བཟོད་དཀའ་བའི་ཐབས་སྐྱོའི་བྱེད་ཐབས་ཤིག་ཡིན་ཡང་སྲིད། འོན་ཀྱང་ཉིན་མཚན་མེད་པར་བཙན་གནོན་དང་བརྙས་བཅོས་འོག་ཏུ་ཡོད་པའི་མི་རིགས་ཤིག་གི་ངོས་ནས་བརྗོད་ན་འདི་ནི་བྱེད་འོས་པ་ཞིག་དང་དེ་བས་ཀྱང་བསམ་ཡུལ་ལས་འདས་པའི་ངོ་རྒོལ་གྱི་རྣམ་གྲངས་གཞན་ཡང་འབྱུང་སྲིད།
ཇི་ལྟར་དཀའ་ཉོག་ཆེ་བའི་གནད་དོན་འདི་ལ་རྒྱ་དམར་གཞུང་གིས་དོན་ཕན་ལྡན་པའི་ཐག་གཅོད་ཅིག་མ་བྱས་པར་དེ་ལྟར་ངོ་རྒོལ་གྱི་རྣམ་གྲངས་འདི་མུ་མཐུད་ནས་འགྲོ་ངེས་ཡིན་པ་གསལ་བོར་མཐོང་ཐུབ། གལ་སྲིད་སུ་གང་གིས་གནད་དོན་འདི་དེ་མ་ཐག་མཚམས་འཇོག་དགོས་ལུགས་བརྗོད་ཚེ་དེ་ནི་མི་སྲིད་པ་ཞིག་ཡིན། རྒྱུ་མཚན་ནི་གོང་བླ་སྤྲུལ་རྣམས་དང་དཔོན་རིགས་སུ་གཅིག་ལའང་ལས་འགུལ་འདི་ཉིད་མཚམས་ཞོག་ཅེས་བཀའ་ཁྱབ་གཏོང་རྒྱུའི་འོས་འགན་དང༌། ཡང་ན་དབང་ཆ་གང་ཡང་མེད།
གལ་སྲིད་དེ་ལྟར་བརྗོད་པའི་དབང་དུ་བཏང་ཡང་དེ་ནི་ལོ་རྒྱུས་ཀྱི་ཉེས་ཅན་དུ་གྱུར་སྲིད་ལ། ཡང་ཕྱོགས་གཞན་ཞིག་ནས་བརྗོད་ན་དེ་ནི་ཁོ་ཚོས་བརྗོད་ནས་བསྒྲུབ་ཐུབ་པ་ཞིག་ཀྱང་མིན། རྒྱ་མིའི་གཏམ་དཔེར། སྦྲུལ་གྱི་མདུད་པ་སྦྲུལ་གྱིས་བཀྲོལ་དགོས་ཞེས་པ་ལྟར་གནད་དོན་འདི་ཉིད་དོན་དངོས་ནས་ཐག་གཅོད་བྱེད་དགོས་ན་རྒྱ་དམར་གཞུང་གིས་ཐག་གཅོད་བྱ་དགོས་ལ། རྒྱ་དམར་གཞུང་ལ་དེ་ལྟར་ཐག་གཅོད་བྱེད་པའི་ནུས་པ་དང་འོས་འགན་ཆ་ཚང་ཡོད། དེའི་ཕྱིར་དེང་སྐབས་བཙན་བྱོལ་ནང་བོད་མི་ཅོལ་ཆུང་ཁ་ཤས་ཀྱིས་ལས་འགུལ་འདི་ཉིད་མཚམས་འཇོག་དགོས་པར་བརྗོད་བཞིན་པ་དང༌། དེ་བཞིན་༧གོང་ས་མཆོག་གིས་མཚམས་འཇོག་དགོས་པའི་བཀའ་སློབ་ཕེབས་དགོས་པར་བརྗོད་བཞིན་པ་དག་ལ་ཁོ་བོས་ལེགས་སོ་བརྗོད་ཐུབ་མེད་སོང༌།
རང་ཉིད་ཤི་རྒྱུ་སྐྲག་ན་ཞི་འཇམ་གྱི་གནས་ཞིག་བཙལ་ནས་སྡོད་དང་ཁྱོད་ལ་བཙན་སྐུལ་གྱིས་འཐབ་རྩོད་ནང་ཞུགས་དགོས་ཞེས་བཀའ་གཏོང་མཁན་མེད། མི་རིགས་ཀྱི་ལས་དབང་སེམས་གཏིང་ནས་འཚོས་ཤིང་རྒྱལ་ཁབ་ཀྱི་ལ་རྒྱའི་སྙིང་སྟོབས་མེ་ལ་སྦར་ཐུབ་པའི་དཔའ་བོ་ཚོར་ཁྱོད་ཚོ་ལྟ་བུའི་སྡར་མ་ཚོའི་སྐད་ཆ་བཤད་པའི་རིན་འབབ་མེད་སོང༌། སྔོན་གྱི་བཙན་པོ་རྣམས་ཀྱི་སྐབས་སུ་ཡང་དཔའ་བོར་བྱ་དགའ་དང་ནང་མི་ལ་གཟེངས་བསྟོད་གཏོང་པ་ལས་བོད་མི་རྫོགས་ཉེན་ཆེད་དམག་འཐབ་འཇོག་དགོས་བརྗོད་པའི་བཀའ་དེ་འདྲ་གཏོང་མཁན་བཙན་བློན་གང་ཡང་བྱུང་མེད་ན། དུས་ད་ལྟ་ཡང་བོད་ཀྱི་བཙན་པོའི་སྙིང་སྟོབས་ལ་ཤེས་རིག་གི་མདའ་གཞི་ཐོགས་ཡོད་པའི་སྐབས་འདིར་གླེན་པ་ཚོའི་གཏམ་སྨྲ་བའི་ངང་ཚུལ་དེ་རང་དུ་དོར་དགོས་པར་མཐོང༌། དུས་ད་ལྟའི་བར་རྒྱལ་ཁབ་སུ་ཞིག་གི་ཁྲག་གིས་འགྲོ་གྲོན་མ་བཏང་པར་བདག་དབང་ལེན་ཐུབ་མེད་པ་བཞིན་ང་ཚོ་ཡང་དེ་བཞིན་ཡིན་པ་ལོ་རྒྱུས་དང་རྒྱལ་ཁབ་སོ་སོའི་བདག་དབང་རྩོད་ལུགས་སོགས་ལ་ཞིབ་ལྟ་བྱེད་མྱོང་བ་ཞིག་ཡིན་ཚེ་གནས་ལུགས་འདི་ཉིད་རང་བཞིན་གྱིས་རྟོགས་འོང༌། ཅི་སྟེ་རྒྱལ་ཁབ་ཀྱི་འཐབ་རྩོད་རྣོ་ངར་མི་རིགས་ཀྱི་ཆགས་འཇིག་ལ་ཐུག་པའི་ཚེ་མི་རིགས་དེ་ཉིད་ཀྱི་བདག་དབང་ཐོབ་ལ་ཉེ་བ་ཡང་གནས་ལུགས་ཞིག་ཡིན།
བོད་མིའི་གཏམ་དཔེ་ཝ་རྔ་མ་ཤ་ལེར་འབྲོ་པ་ལས་སྟག་འཛུམ་དྲུག་ཀྱིལ་ལེར་ཤི་ན་དགའ་ཞེས་པ་ནི་མེས་པོ་རྣམས་ཀྱིས་མི་རབས་ཕྱི་མ་ལ་བཞག་པའི་བསླབ་བྱ་ཡིན་སྐད། འོ་ན་ང་ཚོས་ཇི་ལྟར་བྱེད་དགོས་ཞེ་ན། བོད་ནང་རང་སྲོག་བློས་བཏང་པའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་མཛད་རྗེས་དང་ཁོ་ཚོའི་འདོད་དོན་འཛམ་གླིང་རྒྱལ་སྤྱི་དང་དེ་བཞིན་རྒྱལ་ཁབ་ཁག་གི་མི་དམངས་ནང་གསལ་བསྒྲགས་དང་ཤེས་རྟོགས་བྱེད་རྒྱུ། ས་གནས་གང་ས་ནས་རང་ནུས་གང་ཡོད་ཀྱིས་རྒྱ་གཞུང་ལ་རིགས་མི་འདྲ་པའི་ངོ་རྒོལ་བྱ་རྒྱུ། རྒྱ་མིའི་བཅའ་དངོས་ཉོ་ཚོང་མི་བྱེད་རྒྱུ། མཉམ་འབྲེལ་རྒྱལ་ཚོགས་ལ་ས་རྟགས་བསྡུ་རུབ་ཀྱི་སྙན་ཞུ་གཏོང་རྒྱུ་སོགས་ནི་ང་ཚོའི་འོས་འགན་ཉག་ཅིག་ཡིན།
སྤྱིར་ན་བོད་པ་ཞེས་པ་ནི་དཔའ་ངར་ལྡན་ཞིང་འབྲོང་གི་སྙིང་སྟོབས་དང་སྟག་གི་ངར་ཤུགས་ཡོད་པའི་སྲིད་གསུམ་དབང་དུ་བསྡུ་མྱོང་པའི་བཙན་པོ་དག་གི་མི་རབས་ཕྱི་མ་ཡིན་པས། དེ་ལྟར་སྡར་མའི་ངང་ཚུལ་འཛིན་པ་ཞིག་མ་ཡིན་པ་ཁོ་བོར་ཡིད་ཆེས་ཡོད་ཀྱང༌། སྐབས་རེར་སྤྱི་ཚོགས་ཀྱི་སྣེ་ཁྲིད་པ་ཁ་ཤས་ཀྱི་བསམ་བློ་མེད་པའི་བྱིས་པའི་སྐད་ཅོར་དང༌། ཡོང་མི་སྲིད་པ་དང་འགྲུབ་མི་སྲིད་པའི་སྡར་སྐད་ཉིན་ནས་ཟླ་དང་ལོ་མཐུད་དེ་བརྗོད་པས། ཤེས་ཡོན་གྱི་རྨང་གཞི་མེད་པའི་སྐྱེ་བོ་རྣམས་མགོ་སྐོར་འོག་ཚུད་བཞིན་པ་ནི་བློ་ཕམ་གྱི་གནས་ཞིག་རེད་ལ། དེ་བས་ཀྱང་མི་རབས་ཕྱི་མར་ལག་རྗེས་ངན་པ་བཞག་པ་ཡང་མ་ཡིན་ནམ། ༧པཎ་ཆེན་སྐུ་ཕྲེང་བཅུ་པ་མཆོག་གིས་ཁྱེད་ཚོའི་བོད་སྐད་མ་བཤད་ཀྱང་ཆོག བོད་ལྭ་མ་གྱོན་ཀྱང་ཆོག འོན་ཀྱང་ཁྱེད་ཚོའི་ཤ་དང་ཁྲག་བོད་པ་ཡིན་པས་དེ་བསྒྱུར་མི་ཐུབ་ཞེས་པ་ནི་མི་རབས་འདི་དག་ལ་བཞག་པའི་ལུང་བསྟན་ཞིག་ཀྱང་ཡིན་པར་མཐོང༌།
ང་ཚོ་ནི་ཆབ་སྲིད་ཀྱི་སྐྱབས་བཅོལ་པ་ཞིག་ཡིན་པ་ལས་ལྟོ་གོས་མེད་པའི་སྐྱབས་བཅོལ་བ་ཞིག་མིན་པ་སྐྱེ་བོ་བླུན་པོ་ཚུན་ཆད་ཀྱིས་ཤེས་ཀྱིན་ཡོད་ན་ད་དུང་ཆབ་སྲིད་ཀྱི་གནད་དོན་ལ་ཆབ་སྲིད་ཀྱིས་འཐབ་རྩོད་བྱེད་མ་ཐུབ་པ་ནི་ནམ་ཡང་ཁོ་བོའི་བློ་ཡུལ་དུ་འཁོར་མ་ཐུབ་པའི་དྲི་བ་གལ་ཆེན་ཞིག་ཡིན་སོང༌། རྒྱ་ཕྱོགས་ལ་མཚོན་ན་ང་ཚོར་ནམ་ཡང་དམའ་འབེབས་དང་བཙན་གནོན་སོགས་བཙན་པོའི་དབང་འོག་ནས་བོད་མི་རིགས་ལ་རྒྱལ་ཁབ་གཅིག་གི་འདུ་ཤེས་ཏིལ་འབྲུ་ཙམ་ཡང་འཇོག་གི་མེད་ན་ང་ཚོས་མཉམ་གནས་དང་རྒྱ་དམར་གཞུང་ལ་རྒྱབ་སྐྱོར་བྱེད་དགོས་པ་དེ་ཡང་ཁོ་བོའི་བློ་ཡུལ་དུ་ཤོང་དཀའ་ཐལ།
མཐའ་དོན། བཙན་པོའི་གདོང་རྒྱུད་གཅིག་པའི་བོད་རིགས་སྤུན་ཟླ་ཚོ་ལག་རྡང་གཅིག་ལ་སྦྲེལ་ནས་མཉམ་དུ་འཐབ་རྩོད་ནང་ལོང་ཤོགས། རི་བོ་ཞིག་གི་ཕ་རོལ་ན་ང་ཚོའི་ཕུ་ནུ་མང་སྲིང་ཚོས་རེ་བའི་སྙིང་རླུང་སྟོད་ལ་འཚང་ནས་ང་ཚོར་སྒུག་བསྡད་ཡོད། བོད་པ་ཚོ། ཕ་ཡུལ་གངས་ཅན་ལྗོངས་ན་ང་ཚོའི་ཕ་མ་དང་སྤུན་མཆེད་ཚོས་མིག་ཟུང་མཆི་མས་གང་ནས་༧གོང་ས་སྐྱབས་མགོན་མཆོག་དང་ང་ཚོར་རེ་བའི་སྒུག་བཞིན་འདུག གདོང་དམར་བོད་པ་ཚོ། ཧི་མ་ལ་ཡའི་ཕ་རོལ་ན་གདོང་དམར་དཔའ་བོ་ཚོའི་དམར་པོ་ཁྲག་དང་མེ་ཡི་ནང་ནས་ང་ཚོ་འབོད་སྒྲ་སྒྲོག་བཞིན་འདུག མ་འདུག་མ་འདུག་བོད་པ་ཚོ། ལོངས་ཤོག བཙན་པོའི་སྙིང་སྟོབས་སེམས་ལ་ཉར་ནས་ཡར་ལ་ལོངས་ཤོགས། མི་རིགས་ཤིག་གི་བདེ་སྐྱིད་ཆེད། རྒྱལ་ཁབ་ཅིག་གི་བདག་དབང་ཆེད་ཡར་ལོངས་ཤོག་བོད་པ་ཚོ།
༢༠༡༢།༠༢།༢༧ ཉིན་ཨ་རིའི་གྲོང་ཁྱེར་ནུའི་ཡོག་གི་མཉམ་འབྲེལ་རྒྱལ་ཚོགས་ཀྱི་མདུན་ནས་བྲིས།
རྩོམ་ཡིག་འདི་ཧ་ཅང་ཡག་པོ་བྲིས་འདུག་པས་སྐུ་ཉིད་ལ་རྗེས་སུ་ཡི་རངས་ཡོད། ད་དུང་དཔའ་ངར་ཞུམ་མེད་ཀྱི་བློ་སྟོབས་ལ་ཅི་བས་ཀྱང་ཡི་རངས་ཞུ།
འོད་དཀར་ལགས་ཀྱི་རྩོམ་འདི་ལ་གུས་སྐུར་ཞུ་འོས་པ་མ་ཟད། ཀློག་པ་པོ་རྣམས་ཀྱིས་ཞིབ་ཏུ་ཀློགས་ཏེ་ཉམས་སུ་ལེན་དགོས་སོ།།
སྐུ་ཞབས་ཤིང་བཟའ་རིན་པོ་ཆེ་མཆོག་གིས་འདི་བཞིན་སྐུ་ཚེགས་ལ་མ་འཛེམས་པར་མི་རིགས་དང་རིག་གཞུང་སོགས་ཀྱི་ཆེད་དུ་ཟས་བཅད་ངོ་རྒོལ་གྱི་ལས་འགུལ་སྤེལ་བར་རྗེས་སུ་ཡི་རངས་དང་། རིན་ཐང་གཞལ་དུ་དཀའ་བའི་རྩོམ་ཡིག་འདི་ཕྲན་སོགས་ཀློག་པ་པོ་དག་གི་བགོ་བསྐལ་དུ་ཕྱིན་པར་བཀའ་དྲིན་བླ་མེད་དུ་ཆེ།
རྩམ་ཡིག་ཡག་པོ་ཞིག་སྤེལ་འདུག་པར་སྙིང་དབུས་ནས་དགའ་བསུ་དང་བསྔགས་བརྗོད་ཞུ།
རང་གི་བརྩེ་བའི་མི་རིགས་དང་གཅེས་པའི་རྒྱལ་ཁབ་ཀྱི་དོན་དུ་འཐབ་རྩོད་རྣོ་ང་ར་ལྡན་པའི་ལས་འགུལ་རབ་དང་རིམ་པ་སྤེལ་མཁན་ཡོངས་ལ་དགའ་སྤྲོའི་བསུ་བ་ཆེན་པོ་ཞུ་རྒྱུ་ཡིན།
༧གངས་ཅན་ཁ་བའི་ལྗོངས་ཀྱི་བླ་ཆེན་དག་གི་དབུ་དགྱེས་་ནས་གསན་བར་མཛོད།
༧སྐྱབས་རྗེ་ཤིང་བཟའ་རིན་པོ་ཆེ་མཆོག་གི་ཐུགས་འགན་བཞེས་སྟངས་ནང་བཞིན་བོད་སྤྱི་དོན་ལ་ནུས་ཤུགས་འདོན་པའི་དུས་ལ་བབ་འདུག་པ་མཁྱེན་རྟོགས་ཡོང་བ་ཞུ། སྐུ་ན་ཕྲ་བའི་དམ་པ་ཁོང་ན་མཚོན་ན་བོད་སྤྱི་བའི་དོན་ལ་སྔ་བཞུགས་བར་གསུམ་དུ་ལས་དོན་མང་པོ་བསྒྲུབས་མྱོང་ལ། ལྷག་པར་བཙན་བྱོལ་ཁྲོད་སྔར་བྱུང་མྱོང་མེད་པའི་སྙན་ངག་གི་འགྲན་བསྡུར་སྤེལ་བ་སོགས་ལས་དོན་རླབས་པོ་ཆེ་མང་པོ་བསྒྲུབས་མྱོང་ཡོད་པས་རྗེས་སུ་ཡི་རང་དང་བསྔགས་བརྗོད་ཡོད། ད་ཐེངས་་ཀྱང་བོད་ནང་གི་རང་ལུས་མེར་གསེགས་ཀྱི་ཡ་ང་བའི་གནས་སྟངས་ལ་ཐུགས་ཀྱིས་མ་བཟོད་པར་བླ་བྲང་་དང་འབྱོར་བ་རྒྱབ་ཏུ་བཞགས་ནས་སྐུ་རྐྱང་དུ་བོད་སྤྱི་བའི་དོན་ལ་ཟས་བཅོད་ངོ་རྒོལ་གནང་བ་ནི་དོན་དངོས་སྟེངས་ནས་་བཤད་ན་བཙན་བྱོལ་ནང་མི་ལོ་ལྔ་བཅུ་ལྷག་ཟིན་པའི་ནང་བོད་ཀྱི་བླ་ཆེན་ཞིག་གིས་བོད་དོན་ཆེད་ལས་འགུལ་སྤེལ་བ་ཐོག་མ་ཆགས་ཡོད་པས། ཤ་ཁྲག་གཅིག་པའི་བོད་པའི་སྐྱེས་ཆེན་དག་གི་མིག་དཔེར་བལྟས་ན་རེད། མཐའ་དོན་སྐུ་ཉིད་ཀྱི་བཞེད་དོན་ལྷུན་གྱིས་འགྲུབ་པའི་སྨོན་འདུན་དང་ཡིད་ཆེས་བྱེད་ཀྱིན་ཡོད། བོད་རྒྱལ་ལོ།
རིགས་ཞེན་ཆེ་ཞིང་རང་ཉིད་ཀྱི་ཆབ་སྲིད་ལངས་ཕྱོགས་ལ་སྔ་ཕྱི་བར་གསུམ་དུ་རང་ཚུགས་བརྟན་པའི་རྩོམ་པ་པོ་འོད་དཀར་གྱི་ཕྱག་ལས་དང་དགོངས་འཆར་བཅས་ལ་སེམས་གཏིང་ནས་རྗེས་སུ་ཡི་རང་ཞུ། ལྷག་པར་གང་ཉིད་ཀྱིས་ < ས་གནས་གང་ས་ནས་རང་ནུས་གང་ཡོད་ཀྱིས་རྒྱ་གཞུང་ལ་རིགས་མི་འདྲ་བའི་ངོ་རྒོལ་བྱེད་དགོས། >ཞེས་པ་འདི་ནི་བོད་མི་ཀུན་གྱིས་ཤེས་དགོས་པའི་གནད་ཀྱི་དོན་པོ་ཞིག་ཏུ་སེམས།
ཤིང་བཟའ་ཚང་ལ་མཚོན་ལ་གསེར་ཁྲི་སེར་པོའི་ཡང་སྟེང་ན་བཞུགས་པའི་བླ་སྤྲུལ་ཞིག་ཡིན་ལ། སྟོང་འཚོགས་པའི་གྲྭལ་མགོར་འགྱིང་བའི་དགེ་བཤེས་ཤིག་ཀྱང་ཡིན།
བླ་སྤྲུལ་དང་དགེ་བཤེས་དག་ལ་ཐུན་མོང་གི་ལམ་བུ་ཞིག་ཡོད་པ་ནི། སྐྱིད་ཉལ་སྐྱིད་ལང་དང་རྒྱས་སྤྲོས་བྱེད་རྒྱུ་དེ་རེད། འོན་ཀྱང་ཤིང་བཟའ་ཚང་ལ་མཚོན་ན། སྔ་ཕྱིར་བོད་དུ་ཞི་བའི་གོམ་བགྲོད་ཐེངས་གཉིས་དང་། བོད་ཀྱི་རིག་གཞུང་ཉམས་གསོའི་ཆེད་དོན་ཕན་ལྡན་པའི་ལས་འགུལ་སྣ་མང་སྤེལ་མྱོང་། མཐར་གཏུགས་ན་ཁོང་གི་ཉིན་ཞག་ཕྲུག་གཅིག་གི་ནང་དུ་བོད་དོན་ཐུགས་ནས་འདོར་མྱོང་མེད། བཀྲེས་ལྟོགས་ཀྱི་མནར་གཅོད་འོག་ནས་བྲིས་པའི་<<མེ་ལྕེ་དང་བོད་དོན>>བཀླགས་དུས། སྐུ་ཉིད་ཀྱི་གཟུགས་གཞིའི་གནས་བབས་ངའི་མིག་ལམ་དུ་ཤར་བྱུང་ལ། ཉིན་ལྔའི་ནང་དུ་སྤྱི་རྒྱ་བཞི་སྟེ་རྒྱ་མ་བརྒྱད་ཙམ་མར་ཆགས་པའི་གནས་ཚུལ་གསར་ལམ་ཁག་ལས་མཐོང་བས། སྐུ་ཉིད་ཀྱིས་བཀྲེས་ལྟོགས་ཀྱི་མནར་གཅོད་འོག་ནས་ཕྱག་འདར་བཞིན་བྲིས་པའི་བརྩམ་ཆོས་འདི་ལ་དམིགས་བསལ་གྱི་བརྩེ་བ་ཞིག་སླེབས་སོང་། ད་ནི་བླ་བྲང་རེ་རེའི་ནང་དུ་ཁྱི་ལྟར་ཉལ་ཞིང་ཕག་ལྟར་ཟ་བ་དག་གིས་ཀྱང་བསམ་གཞིགས་ཤིག་བྱ་རན་རེད་སྙམ། གང་ལྟར་སྐུ་ཉིད་སྐུ་ཚེ་བརྟན་ཅིང་ཐུགས་བཞེད་འགྲུབ་པར་ཤོག །