ཞི་བའི་འབོད་ཚིག་ལྔ་དང་ཞི་བའི་གོམ་བགྲོད་ཀྱི་དམ་བཅའ།

ད་ལྟའི་འཆར་བོད་མི་ཞིག་གི་ངོས་ནས་སེམས་ལ་གཏན་པོར་ངེས་དགོས་པ་དེ་ནི་སྐད་ཆ་སྤོམ་པོ་བཤད་དེ་བསྡོད་པའི་དུས་མ་ཡིན་པར། གཞིས་ལུས་བོད་མི་དག་གི་མངོན་འདོད་འགྲུབ་པར་ལག་ལེན་ངེས་ལ་ཞུགས་པའི་དུས་ཆགས་ཡོད། དེ་ཡི་སྟབས་ཀྱིས་རང་ཉིད་ནི་བྱིས་པ་གཉིས་ཀྱི་ཕ་རྒན་ཆགས་ཡོད་ཀྱང་། བོད་མི་རིགས་ཀྱི་འཆི་གསོན་འདི་ལས་བོད་མི་མང་རྣམས་གཉིད་ལས་སློང་བའི་ཅོང་སྒྲ་ཆུང་ཆུང་ཞིག་ཀྱང་ཉན་ན་བསམ་ནས་རང་གི་བུ་དང་བུ་མོ་གཉིས། མཛའ་མོ་བཅས་བཞག་ནས་ཕྱིར་རྒྱ་གར་དུ་ཡོང་བ་ཡིན། རྒྱ་གར་དུ་དྲིན་ཆེན་ཕ་མ་གཉིས་ཡོད། ཁོང་གཉིས་ཀྱི་བདག་གི་ག་རེ་བྱེད་མིན་ད་ལྟ་ཤེས་ཀྱི་མེད། ཤེས་པའི་སྐབས་སུ་ང་ལ་ཏན་ཏན་བཀོག་འགོག་བྱེད་སྲིད་ན་ཐང་། འོན་ཀྱང་། ངས་རང་ཉིད་བོད་མི་ཞིག་གི་ངོས་ནས་བོད་ལ་འགན་འཁུར་བའི་དུས་ཚོད་ཏན་ཏན་སླེབས་པའི་སྐོར་འབྲེལ་བཤད་རྒྱབ་ན་ཁོ་གཉིས་ཀྱིས་ཉན་སྲིད་པ་རེད་ལ། ཁོ་གཉིས་ཀྱིས་ཏན་ཏན་ང་ལ་རྒྱབ་སྐྱོར་བྱེད་པར་ཡིད་ཆེས་བྱས་ནས་འགྲོ་བཞིན་ཡོད། དེ་རིང་ནས་རང་ཉིད་ནི་བོད་མི་རིགས་ཀྱི་རང་དབང་དང་ཞི་བདེ་ཆེད་དུ་གསོན་པའི་མི་ཞིག་ལས། སྒེར་དོན་འགོ་འཁོར་ནས་སྤྱི་དོན་ལ་སེམས་འཁུར་དང་དང་ལེན་བྱེད་མི་ཐུབ་པའི་མི་ཞིག་གཏན་ནས་མིན་པ་དེ་ཡིན།

ངས་འདིར་https://tibettimes.net/blogs.php?id=55&post_id=19149ཞི་བའི་འབོད་ཚིག་ལྔ་ཞིག་བྲིས་ཡོད། འདི་འཁུར་ནས་སུམ་བཅུ་དུས་དྲན་ཉིན། ཞོགས་པའི་ཆུ་ཚོད་བཅུ་བའི་སྟེང་དུ་གཙུག་ལག་ཁང་གི་མདུན་ནས་ཞི་བའི་གོམ་བགྲོད་ལ་ལམ་དུ་ཆས་རྒྱུ་ཡིན། ངའི་དམ་བཅའ་ནི་བྱེས་ཀྱི་བོད་མི་ཚང་མ་མཉམ་བླངས་མ་བྱས་པར་དང་རྒྱ་ནག་སྲིད་གཞུང་གིས་ཞི་བའི་འབོད་ཚིག་ལྔ་ལ་ཁས་ལེན་མ་བྱས་པར་དུ་གོམ་བགྲོད་མཚམས་འཇོག་མི་བྱེད་རྒྱུ་དེ་ཡིན། འདི་ལ་སྤྱི་སྒེར་གང་གིས་ད་ལྟའི་བར་དུ་མངགས་བཀོད་དང་ཐེ་ཇུས་གང་ཡང་མེད། ཞི་བའི་འཐབ་རྩོད་འདི་ལ་མཉམ་ཞུགས་བྱེད་འདོད་ཡོད་མཁན་གྱི་བོད་རིགས་སྤུན་ཟླ་སུ་ཞིག་ཡོད་ན། སྤྱི་ཟླ་གསུམ་པའི་ཚེས་བཅུ་ཉིན་གྱི་ཞོགས་པ་གཙུག་ལག་ཁང་གི་མདུན་དུ་ཕེབས་ནས་མཉམ་ཞུགས་བྱེད་རོགས། ཞི་འབོད་ལ་སྤྱི་སྒེར་གང་རུང་ནས་རྒྱབ་སྐྱོར་གནང་མཁན་ཡོད་ན་བདག་ལ་འབྲེལ་བ་བྱེད་རོགས། བདག་གི་གློག་འཕྲིན་གྱི་ཁ་བྱང་གཤམ་དུ་ཡོད། souloflove538@gmail.com འགོ་འཛུགས་དུས་སུ་འགྲོ་སོང་རང་རང་ནས་གཏོང་གི་ཡོད། རྗེས་སུ་མཉམ་ཞུགས་བྱེད་མ་ཐུབ་པར་ཞལ་འདེབས་ཕུལ་འདོད་ཡོད་མཁན་ཚོར་དུས་དང་སྐབས་ལ་གང་དུ་བྱེད་དགོས་མིན་གསལ་ཁ་བྱེད་ཆོག ཡིན་ཡང་། ཞལ་འདེབས་སྤྲོད་རོགས་ཟེར་ནས་འབོད་སྐུལ་གཏན་ནས་ཞུ་ཡི་མེད། ངས་འདི་ནས་རང་ཉིད་བོད་མི་ཞིག་ཡིན་པའི་འགན་ཞིག་འཁུར་ནས་ལམ་དུ་འབུད་ཡོད་པ་སྤུན་ཟླ་དག་གི་སེམས་ལ་ངེས་པར་མཛོད།

ཞི་བའི་འཐབ་རྩོད་འདི་བྱེད་དགོས་དོན་གྱི་སེམས་འཚབ་གཙོ་བོ་ནི། གཞིས་ལུས་མི་མང་ཆེས་མི་ཉུང་བ་ཞིག་ད་ལྟ་མེ་རུ་སྒྲོན་ཟིན་པ་དང་མུ་མཐུད་དུ་སྒྲོན་སྲིད་པ་དང་། རེ་རེ་བཞིན་སྒྲོན་ནས་འོང་ན། ཞི་བའི་མེ་ལྕེའམ་ཤེས་རབ་ཀྱི་མེ་ལྕེ། ད་དུང་སྙིང་རྗེ་ཡི་མ་ལྕེ་འདི་དག་ཞེ་སྡང་གི་མེ་ལྕེ་རུ་མི་འགྱུར་བའི་ངེས་པ་གཏན་ནས་མེད་པ་ཡིན། དེ་དུས་བོད་དང་རྒྱ་རིགས་མི་མང་ཉེས་མེད་ཆེས་མང་བོ་ཞིག་ལ་གནོད་འཚེ་ཐེབས་རྒྱུ་ཡིན་པ་ལས། རྒྱ་ནག་སྲིད་གཞུང་གི་དཔོན་ངན་དེ་དག་ལ་གྱོང་རྒུད་དང་འགྱོད་སེམས་རེ་སྐྱེ་སྲིད་ཀྱང་། དེ་དུས་བོད་རྒྱ་མི་མང་དཀྱིས་མ་དག་གི་ཚེ་སྲོག་གི་འགྲོ་གྲོན་གྱིས་མི་རིགས་གཉིས་ཀྱི་བར་དུ་འགལ་ཟླ་ཤུགས་ཆེར་སླེབས་ནས། ལོ་ངོ་ཉི་ཤུ་ཙམ་གྱི་རྗེས་སུ་བོད་མི་དག་གི་ལག་དུ་མེ་མདའ་ཐོག་མི་སྲིད་པ་མིན། རྒྱུ་མཚན་ནི་བོད་མི་ཚང་མ་བྱང་ཆུབ་སེམས་དཔའ་མིན་ལ། སངས་རྒྱས་ཀྱང་དེ་བས་ཆགས་མེད། བོད་མི་རྣམས་འགྲོ་བ་མི་དཀྱིས་མ་ཤ་སྟག་ཡིན། ཁོང་ཚོ་ལ་བཟོད་སྒོམ་བྱེད་པའི་གོམ་གཤིས་ཤིག་ད་ལྟ་ཡོད་པ་འདི་ནི་འཚེ་མེད་ཞི་བའི་སྟོན་པ་༧རྒྱལ་བ་རིན་པོ་ཆེ་ཚང་ཞལ་གཞུགས་པ་དང་། ཁོང་གིས་དུས་རྒྱུན་དུ་རང་རེའི་འཐབ་རྩོད་ནི་བདེན་པ་དང་འཚེ་མེད་ཞི་བ་ཡིན་ཟེར་ནས་གསུང་བའི་བཀའ་དྲིན་ཉེག་གཅིག་དང་། མེས་པོ་དག་གི་སྐུ་རིང་ནས་བོད་ནི་ཆོས་ལྡན་གྱི་རྒྱལ་ཁབ་ཅིག་ཡིན་པས་རེད། འོན་ཀྱང་། ཆོས་ལྡན་རྒྱལ་ཁབ་ཀྱི་མི་རིགས་འདི་ལའང་སྐྱེ་བོ་གཞན་དག་དང་འདྲ་བར་བདེ་སྡུག་གི་ཚོར་བ་གཅིག་མཚུངས་ཡོད་དུས། ཞི་བདེ་དང་རང་དབང་མེད་པར་གསོན་ཐབས་མེད་པ་ཤེས་དགོས་ཀྱི་ཡོད། དེ་ཡི་ཆེད་དུ་འཐབ་རྩོད་བྱེད་དགོས་པ་དང་བྱེད་འོས་པ་ཡིན་དུས་ང་རང་ལམ་དུ་ཆས་པ་ཡིན་ལ། ངས་རང་རིགས་སྤུན་ཟླ་བྱེས་ཀྱི་བོད་པ་ཡོངས་ལ་གཞིས་ལུས་སྤུན་ཟླའི་རྒྱབ་དུ་བླངས་དེ་སྐྱིད་སྡུག་མཉམ་མྱོང་བྱེད་པའི་དུས་ཡིན་ཞེས་བསྒྲགས་ན་འདོད།

 མི་རིགས་ཤིག་གི་འཐབ་རྩོད་བྱེད་པ་ལ། ཐོག་མར་མི་རིགས་དེ་ཉིད་ཀྱིས་རང་ཉིད་མི་རིགས་དེ་ཉིད་ཡིན་པ་ངོ་ཤེས་དགོས་པར་ངས་རྟག་པར་འདོད་ཀྱི་ཡོད། དེ་ཡིན་དུས་བོད་མི་རིགས་ཀྱི་འཐབ་རྩོད་འདི་ནི་བདེན་པའི་འཐབ་རྩོད་ཅིག་གི་འདོད་ཀྱི་ཡོད་པ་དང་གླེང་གི་ཡོད་ན། ཐོག་མར་བོད་མི་རིགས་རང་ཉིད་གཉིད་ལས་སད་དགོས་ཀྱི་ཡོད། མི་རིགས་ཤིག་གི་འཐབ་རྩོད་བྱེད་པའི་ཆེད་དུ་གཉིད་ལས་སད་དགོས་ཀྱི་ཡོད། ད་ལྟ་ནི་བོད་མི་རིགས་ཟེར་ན་རེད། དམིགས་སུ་བཀར་ནས་བྱེས་སུ་འཚོ་བའི་བོད་མི་ཚོ་གཉིད་ལ་ཤོར་ཡོད། གཉིད་ལ་ཤོར་སྟངས་དེ་ནི་ཡིད་སྐྱོ་བའི་ངང་ཚུལ་ཞིག་ཆགས་ནས་ཡོད། ཁེ་བཟང་ཟེར་བའི་མིང་ཚིག་ཞིག་གི་ཁྱབ་ཁོངས་ནས། རང་དོན་ཟེར་བའི་མིང་འོག་ནས། དཔལ་འབྱོར་གྱི་བྲན་གཡོག་དང་དེ་ཡི་འགྲན་རྩོད་དུ་ཞུགས་པའི་ལམ་དུ་ཆས་ཡོད་པ་ལས། ང་ནི་བོད་མི་ཞིག་ཡིན། བོད་གཞིས་ལུས་མི་མང་གིས་ཚེ་སྲོག་གིས་བློས་གཏོང་ནས་བོད་མི་རིགས་ཀྱི་འཆི་གསོན་གྱི་འཐབ་རྩོད་བྱེད་ཀྱི་འདུག ང་ལ་ཡང་བོད་མི་རིགས་ལ་གདུང་སེམས་མཉམ་བསྐྱེད་དང་སྐྱིད་སྡུག་མཉམ་མྱོང་བྱེད་པའི་འགན་ཡོད་བསམ་ཐུབ་ཀྱི་མེད་པ་དེ་ཡིན། དེ་ནི་གཉིད་ལ་ཤོར་སྟངས་ཡིན་ལ། མི་རིགས་ཤིག་གི་འཐབ་རྩོད་ལ་ཞུགས་མ་ཐུབ་པའི་གོད་ཆག་དང་རང་རང་སོ་སོ་མི་རིགས་གང་གི་ཁུངས་དུ་སྐྱེ་བ་དེ་དྲན་མ་ཐུབ་པ། དྲན་ཐུབ་ཀྱང་འགན་དུ་མ་བླངས་པ་དེ་ཡིན། དེ་ཡི་རྒྱུ་མཚན་གྱིས་ངས་དེ་རིང་འདི་ནས་མི་རིགས་ཤིག་གི་བདེན་པའི་འཐབ་རྩོད་དང་ཞི་བདེ། རང་དབང་བཅས་ལ་རྩོད་ལེན་བྱེད་དགོས་ཀྱི་ཡོད་ན། ཐོག་མར་མི་རིགས་དེ་ཡིས་འགན་ལེན་དགོས་ཀྱི་ཡོད་ཅེས་བསྒྲགས་འདོད་བྱུང་།

 ལྷག་པར་དུ། མེ་ལྕེ་རེ་རེ་བཞིན། ཞི་བདེ་ཡི་མེ་ལྕེ། སྙིང་རྗེ་ཡི་མེ་ལྕེ། གཞན་དོན་གྱི་མེ་ལྕེ། ཤེས་རབ་ཀྱི་མེ་ལྕེ། གང་ལྟར། ཇི་ལྟར་འབར་ནའང་། འབར་ཡུལ་ནི་ཤ་ཁྲག་གི་ཕུང་བོ་ཞིག་ཡིན་དུས། དེ་ལ་ཚོར་བ་ཡོད་ལ། ན་ཟུག་ཡོད། དེ་ཡིན་དུས་ངས་ཉིན་རེའི་འཚོ་བའི་ནང་གི་མི་ཞིག་གི་ཚ་གཟེར་གྱི་སྐོར་ནས་བསམ་བློ་བཏང་། རང་གི་ལུས་ཐོག་ལ་སྣུམ་ཚ་བོ་ཐིགས་པ་གཅིག་སླེབས་དུས་ཀྱི་ཚ་གཟེར་ལ་དེ་འདྲའི་ལས་སླ་བོ་གཟོད་དུ་དཀའ་བ་ཞིག་ཆགས་ནས་ཡོད་དུས། མི་ཞིག་གི་ལུས་སུ་མེ་སྒྲོན་ནས་འོང་དུས་ཀྱི་ན་ཟུག་དང་སྡུག་བསྔལ་དེ་ནི་ཧ་ལས་པའི་ཚོད་དཔག་མི་ཐུབ་པའི་སྡུག་བསྔལ་ཞིག་ཡོད་པ་ནི་བཤད་ག་ལ་དགོས། ངས་དེ་དག་བཟོད་ཀྱི་མི་འདུག ད་དུང་། མི་རིགས་ཤིག་གི་འཐབ་རྩོད་ནི་མི་རིགས་དེ་ཉིད་ཀྱི་ཆོས་གོས་རིག་གཞུང་གོམ་གཤིས་ལ་རང་དབང་དང་ཞི་བདེ་ཡོང་ཆེད་དུ་ཡིན་དུས། མི་རིགས་དེ་ཉིད་ཅིས་ཀྱང་གསོན་ནས་འཐབ་རྩོད་བྱེད་དགོས་པ་ལས། ཤི་བ་དང་ཚེ་སྲོག་གི་ལེགས་སྐྱེས་འབུལ་ནས་བཞུད་པ་ཡིན་ན། མི་རིགས་ཀྱི་གསོན་ནས་དེ་ཙམ་གྱི་ནུས་པ་མ་ཐོན་པ་ཡིན་དུས་གསོན་ནས་འཐབ་རྩོད་བྱེད་དགོས། དེ་ཡང་ཞི་བདེའི་མགོན་པོ་ཉིད་ནས་གསུང་བ་བཞིན། ང་ཚོས་འཐབ་རྩོད་ནི་བདེན་པ་ཡིན་དུས། འཚེ་བ་མེད་པའི་སྒོ་ནས་འཐབ་རྩོད་བྱེད་དགོས་པ་རེད་ཅེས་ཡང་དང་བསྐྱར་དུ་གསུང་བ་ལྟར། ང་ཚོ་ཡང་ཁོང་གི་བཀའ་བཞིན་ཞི་བ་དང་བདེན་པ་ལ་ཁུངས་གཏུགས་ནས་མདུན་བསྐྱོད་བྱེད་དགོས་པ་དང་འཐབ་རྩོད་བྱེད་དགོས་པ་ཡིན། གལ་སྲིད། ཕར་ཕྱོགས་ནས་ཚུར་འགྲོ་བ་གཞན་དག་གི་མིག་མདུན་ནས་མེ་མདའ་བརྒྱབས་པ་དང་གསོད་བརྡུང་འཕྲོག་གསུམ་གང་བྱས་དེ་མེད་པར་བཏང་བ་ཡིན་ན། དེ་ནི་འགྲོ་བ་གཞན་དག་ལའང་འགྲོ་བ་གཞན་དག་གི་བདེ་སྐྱིད་དང་རང་དབང་ལ་འགན་འཁུར་བའི་འོས་འགན་ཡོད་པ་དེ་ཕྲག་དུ་མ་བླངས་པར་བཞུགས་ཐུབ་མེད་པ་ཡིན་དུས། དེ་དག་གིས་ཀྱང་ཏན་ཏན་མི་རིགས་འདི་ལ་དངོས་ནས་ཁག་མི་འདུག་སྙམ་ནས་མདུན་དུ་སླེབས་ངེས་ཡིན། ད་ལྟ་ནི་ང་ཚོས་འཛམ་གླིང་གི་སྐྱེ་བོ་དག་གཉིད་ལས་སློང་རྒྱུ་ཕར་ཞོག ད་ལྟ་ང་ཚོ་རང་ཉིད་གཉིད་ལས་སད་མེད། ང་ཚོ་རང་ཉིད་གཉིད་ལས་སད་པ་ཡིན་ན། གཞི་ནས་འཛམ་གླིང་གི་སྐྱེ་འགྲོ་གཞན་དག་གཉིད་ལས་སློང་བའི་ནུས་པ་ཡོད་པ་ཡིན།

 ང་ལ་འདི་ལྟར་སེམས་འཚབ་དང་ཆེས་ཉེས་མེད་ཀྱི་སྐྱེ་འགྲོ་མང་བོ་ཞིག་གི་ཁྲག་གི་དོན་རྐྱེན་ཁྲོད་དུ་འདས་དགོས་པའི་ཉི་མ་ཞིག་བྱུང་བར་མཐོང་འདོད་གཏན་ནས་མེད་པ་བཞིན། འཛམ་གླིང་གི་ཤེས་ལྡན་མི་སྣ་དང་སྐྱེ་བོ་ཞི་བདེ་ལ་དགའ་བ་སུས་ཀྱང་། འགྲོ་བ་མི་རྣམས་ལ་གནོད་འཚེ་ཞིག་བྱུང་ན་གཏན་ནས་འདོད་ཀྱི་མེད་པ་ནི་སྨྲོས་མེད་ཡིན། རྒྱུ་མཚན་འདི་དག་གི་ཕྱིར་དུ། བོད་སྙིང་ཡོད་མཁན་དག་བདག་གི་རྒྱབ་དུ་བླངས་རྒྱུར་ཡིད་ཆེས་ཡོད་ལ། ཞི་བདེ་ལ་དགའ་བའི་འགྲོ་བ་མི་རྣམས་ཀྱིས་བདག་གི་ཞི་བའི་འབོད་ཚིག་ལྔ་ལ་དངོས་ཤུགས་གང་རུང་གིས་རྒྱབ་སྐྱོར་བླ་མེད་བྱེད་རྒྱུར་ཡིད་ཆེས་དང་བཅས་མདུན་དུ་ཐོན་པ་ཡིན།

ཞི་བའི་གོམ་བགྲོད་ཀྱི་ཁ་ཕྱོགས་ས་ནི་བོད་ཡིན་ལ། རྡ་ས་གཙུག་ལག་ཁང་གི་མདུན་ཐང་ནས་འགོ་འཛུགས་རྒྱུ་ཡིན། རྒྱ་གར་དང་བལ་ཡུལ་ས་མཚམས་སོགས་ནས་ཐེངས་ཅི་ཙམ་ལ་བཀག་པ་དང་བཟུང་བཙོན་སོགས་བྱས་ཀྱང་། མཐར་འཛམ་གླིང་འདིར་བདེན་པ་ཟེར་བ་ཞིག་གསོན་ནས་ཡོད་ན། བོད་མི་རིགས་ཀྱི་འཐབ་རྩོད་ནི་བདེན་པའི་འཐབ་རྩོད་ཅིག་ཡིན་དུས། འཐབ་རྩོད་འདི་ཉིད་རྒྱལ་བར་ཡིད་ཆེས་བྱེད་རྒྱུ་ཡིན་ལ། བྱེས་ཀྱི་བོད་རིགས་སྤུན་ཟླ་སྟོང་ཕྲག་མང་བོ་ཞིག་ང་དང་མཉམ་དུ་བོད་ལ་ཕྱོགས་ནས་ཞི་བའི་གོམ་བགྲོད་མཉམ་གཅིག་དུ་བྱེད་ཐུབ་པར་ཡིད་ཆེས་བྱེད་རྒྱུ་ཡིན་ལ། འབོད་སྐུལ་ཡང་བྱེད་ཀྱི་ཡོད། ཞི་བའི་འབོད་ཚིག་ལྔ་ལ་ཁས་ལེན་མ་བྱས་པར་ནམ་ཡང་ཕྱི་ནུར་མི་བྱེད། ངས་འདི་ནས་ཡིད་ཆེས་བྱེད་ཀྱི་ཡོད། བོད་པ་ཚོར་དབའ་སྤོབས་ཀྱི་བློ་སྟོབས་དང་། ཆིག་སྒྲིལ་གྱི་ནུས་པ། ༧རྒྱལ་བ་ཡིད་བཞིན་ནོར་བུའི་གདམས་པའི་ཞི་བདེ་ཡི་ལམ་ཕྲན་སྟེང་ནས་ཁ་ཞེ་གཉིས་མེད་ཀྱིས་དུས་གཅིག་དུ་ཡར་བླངས་དེ། ཁོང་ཉིད་ད་ལྟ་བར་དུ་ཁེར་རྐྱང་དུ་བཞག་པ་དེར། ལན་ཡག་པོ་ཞིག་སྤྲོད་ཐུབ་རྒྱུ་སོགས་ལ་ངས་སེམས་ཁོང་རུས་པའི་གཏིང་ནས་ཡིད་ཆེས་བྱེད་ཀྱི་ཡོད། ངས་རང་གི་མི་རིགས་འདི་ནི་བློ་གྲོས་ལྡན་པ་དང་། བདེན་པ་དང་ཞི་བདེའི་དོན་དུ། སྟག་མོ་ནགས་ནས་མཆོང་བ་བཞིན་མཆོང་ཐུབ་པ་དང་། སྔོན་བྱོན་དམ་པ་དག་གི་ཤུལ་རྗེས་སུ་ལྡོག་པའི་གནོན་ཐུབ་པར་ཡིད་ཆེས་དང་བཅས། ང་རང་ཞི་བདེ་དང་རང་དབང་མ་ཐོབ་པར་དུ། ༧རྒྱལ་བ་རིན་པོ་ཆེ་བོད་དུ་མ་ཕེབས་བར་དུ། ཞི་བའི་གོམ་བགྲོད་འདི་གཏན་ནས་ཕྱི་ནུར་མེད་པའི་དམ་བཅག་བཞག་ཡོད། དམ་བཅའ་འདི་ལ་དཀར་ཕྱོགས་སྐྱོ་བའི་ལྷ་ཀླུ་གཉན་གསུམ་དང་། དྲང་བདེན་གྱི་མིག་དང་། འགྲོ་བ་མིའི་སེམས་ཁམས་ཡོད་མཁན་གྱི་སྐྱེ་བོ་དག་གིས་རྒྱབ་སྐྱོར་བྱེད་པར་ཡིད་ཆེས་བྱེད་ཀྱི་ཡོད། འདི་ལྟར་ང་རང་འཇིགས་སྣང་མེད་པར་འགྲོ་བཞིན་ཡོད།

 དངོས་མིང་། གླིང་ཚ་ཚེ་བརྟན་རྡོ་རྗེ། ཚུལ་ཁྲིམས་རྒྱ་མཚོ། སྨྱུག་མིང་། བོད། ཤ་ཁྲག་རུས་གསུམ། བོད། ལྷ་ཀླུ་གཉན་གསུམ། མི་འགྱུར་གངས་ཕྲུག  བཅས་ཡིན། ༢༩།༢།༡༢ལ།