ལོ་གསར་ལ་བཀྲ་ཤིས་བདེ་ལེགས།

འོད་ཟེར་གྱིས་བརྩམས། དགེ་རབ་ཀྱིས་བསྒྱུར།

དེ་རིང་ནི་ ༼ ཕྱི་ཟླ་གཉིས་པའི་ཚེས་ ༢༣ ༽ བོད་རྒྱལ་ལོ་ ༢༡༣༩ ཆུ་འབྲུག་ལོའི་ལོ་སར་ཚེས་པ་གཉིས་རེད། ངས་བོད་མི་ཁྲི་གཅིག་ཙམ་དང་ལྷག་པར་དེའི་ཁྲོད་ཀྱི་རྒན་རྒོན་ནང་པའི་གནས་བསྐོར་ལ་ཕེབས་པའི་རྒྱུ་རྐྱེན་གྱིས་ཉེས་ཅན་པ་ཆགས་པ་རྣམས་ལ་ “ལོ་སར་བཀྲ་ཤིས་བདེ་ལེགས་”ཞེས་བརྗོད་འདོད་སྐྱེས། འོན་ཀྱང་བོད་མི་ཞིག་གིས་འདི་ལྟར། “ད་ང་ཚོས་ཕན་ཚུན་འཚམས་འདྲི་བྱེད་དུས། ང་ཚོས་ “ལོ་སར་བཀྲ་ཤིས་བདེ་ལེགས་”ཞེས་ལབ་རྒྱུ་མི་འདུག ང་ཚོ་ལ་ “བཀྲ་ཤིས་”མི་འདུག་ལ། ང་ཚོ་ལ་ “བདེ་ལེགས་”ཀྱང་མི་འདུག ང་ཚོས་ཕན་ཚུན་ལ་ “གཟབ་གཟབ་བྱོས་”ཞེས་ཕན་ཚུན་ལ་ལྟ་རྟོག་བྱེད།”ཅེས་འགྲེལ་བརྗོད་ཧ་ཅང་ཡག་པོ་བྱས་འདུག་པ་ཇི་བཞིན་རེད།

ལོ་འདིའི་སྤྱི་ཟླ་དང་པོའི་ཚེས་པ་ ༡ ནས་ ༡༠ བར་དུ་རྒྱ་གར་གྱི་ནང་པའི་གནས་ཆེན་ སངས་རྒྱས་བཅོམ་ལྡན་འདས་སངས་རྒྱས་སའི་གནས་མཆོག་རྡོ་རྗེ་གདན་དུ་༧རྒྱལ་བ་རིན་པོ་ཆེས་དུས་འཁོར་དབང་ཆེན་ཐེངས་ ༣༢ པ་དེ་བསྩལ་པ་རེད། འཛམ་གླིང་ཁྱོན་ནས་ཧ་ལམ་ནང་པ་འབུམ་ ༥ ཙམ་གསུང་ཆོས་ཞུ་བར་བཅར་ཡོད་ལ། བོད་ཀྱི་ས་ཁུལ་གང་ས་ནས་བོད་མི་ཆོས་ཞུ་བ་ཁྲི་གཅིག་མ་ཟིན་ཙམ་དང་། རྒྱ་ནག་ནང་ཁུལ་གྱི་ས་ཆ་གང་ནས་རྒྱ་མིའམ་དེ་མིན་གྱི་ཆོས་ཞུ་བ་སྟོང་གཅིག་མ་ཟིན་ཙམ་ཆོས་ཞུར་བཅར་ཡོད། རྒྱུན་ལྡན་ནས་བོད་ཀྱི་ས་ཁུལ་ཏུ་ཕྱིར་བསྐྱོད་ལག་འཁྱེར་ཞུ་རྒྱུ་ནི་ཧ་ཅང་དཀའ་བ་ཞིག་ཡིན་ལ། ༢༠༠༨ ལོར་བོད་ཀྱི་ས་ཁུལ་ཁག་ཏུ་ངོ་རྒོལ་བྱུང་བའི་རྐྱེན་བྱས་ཏེ། ཕྱིར་བསྐྱོད་ལག་འཁྱེར་ཞུ་སྟེར་བྱེད་པ་ནི་ཧ་ལམ་མཚམས་འཇོག་བྱས་པའི་ཚོད་ལ་སླེབས་ཡོད།

འདས་པའི་ལོ་ངོ་གཉིས་ཙམ་ལྷག་གི་རིང་ལ་ལྷ་སའི་ནང་བྱུང་བ་ཇི་བཞིན་གཞུང་འཛིན་པ་དག་གིས་ལོ་ན་ ༦༠ དང་དེ་ཡན་གྱི་རྒན་རྒོན་རྣམས་ལ་བཟང་པོའི་རྣམ་འགྱུར་བསྟན་ནས་ཕྱིར་བསྐྱོད་ལག་འཁྱེར་སྟེར་རྒྱུའི་མོས་མཐུན་བྱས་པ་རེད། དེར་བརྟེན་བོད་ནང་ནས་རྡོ་རྗེ་གདན་དུ་དུས་འཁོར་དབང་ཆེན་ཞུ་བར་ཕེབས་མཁན་གྱི་ཁྲོད་དུ་རྒན་རྒོན་ཧ་ཅང་མང་པོ་ཡོད་རེད་ལ། དེ་ཚོ་ཚང་མ་ཡང་རང་རང་གི་ཚེའི་ལྷག་མ་འདིའི་རིང་ལ་རང་གི་རྩ་བའི་བླ་མའི་ཞལ་རས་འཁྱུག་ཙམ་མཇལ་རྒྱུ་ལ་རེ་ལྟོས་ཆེན་པོ་བྱེད་ཀྱི་ཡོད་པ་རེད། ཁོང་ཚོའི་རྩ་བའི་བླ་མ་ནི་ལོ་ ༥༣ རིང་བཙན་བྱོལ་དུ་བཞུགས་པའི་༧རྒྱལ་བ་རིན་པོ་ཆེ་ལས་གཞན་སུ་ཡང་མ་རེད། དུས་འཁོར་དབང་ཆེན་གྲུབ་པ་དང་། བོད་ནས་ཕེབས་པའི་དད་ལྡན་མང་ཚོགས་རྣམས་དེ་ནས་གྱེས་ཏེ་སླར་རང་གི་ཕ་ཡུལ་ལ་ལོག་ཕེབས་ཡོད་པ་རེད། ཁོང་ཚོས་གནས་མཆོག་རྡོ་རྗེ་གདན་དུ་ཆོས་ཀྱི་བདུད་རྩི་མ་ཐོབ་པ་དེ་སྲིད་དུ་ ཕྱིར་བསྐྱོད་ལག་འཁྱེར་ཞུ་རྒྱུའི་དཀའ་ལས་མྱངས་པ་དང་། དེ་བཞིན་འགྲུལ་བཞུད་ཀྱི་ལམ་ཁ་དེ་ཡང་དཀའ་སྡུག་གིས་ཁེངས་ཡོད། ཁོང་ཚོས་དུས་ཡུན་གཅིག་གི་རིང་བདེ་སྐྱིད་ལ་རོལ་ཡོད་ཅིང་། ཕྱིས་སུ་ལུས་སེམས་གཉིས་ཀར་ “དཀའ་རྙོག་སྣེ་མང་”ཞིག་བརྒྱུད་ནས་མནར་གཅོད་མྱོང་དགོས་པ་དེ་སེམས་ལའང་འཁོར་གི་མེད། ཐོག་མར་ཁོང་ཚོ་བལ་ཡུལ་བརྒྱུད་ནས་གནམ་ཐང་གང་རུང་ཞིག་དང་ཡང་ན་འགྲམ་གྱི་འགག་སྒོ་བཅས་ལ་འབྱོར་སྐབས་རྒྱ་མིའི་དམག་མི་དང་ཉེན་རྟོག་པས་སྔོག་བཤེར་དང་འདྲི་བརྩད་བྱས་ཡོད། ཁོང་ཚོས་འཁྱེར་ཡོང་བའི་ནང་པའི་སྐུ་རྟེན་དཔེར་ན་སྐུ་འདྲ་ལྟ་བུ་དང་། དེ་བཞིན་ཁོང་ཚོས་ལག་རྟགས་སུ་ཉོས་པའི་ལེགས་སྐྱེས་དཔེར་ན་བོད་སྨན་ལྟ་བུ་རྣམས་ཚང་མ་གང་བྱུང་དུ་འཕྲོག་བཅོམ་བྱས་པ་རེད།

ཁམས་དང་ཨ་མདོ་ནས་ཡིན་པའི་དད་ལྡན་ཆོས་ཞུ་བ་མང་པོ་ཞིག་སྐོར་ཁག་བྱས་ཏེ་ལྷ་སར་འཁྱེར་ཞིང་དེ་ནས་མཚོ་བོད་ལྕགས་ལམ་བརྒྱུད་ལྷན་ཅིག་ཏུ་རང་རང་གི་ཡུལ་ལ་བཏང་འདུག དེའི་རྗེས་ལ་མི་རེ་རེ་ནས་རང་རང་གི་ས་གནས་ལས་བྱེད་གཉིས་ཀྱིས་དག་སྐྱེལ་བྱས་རྗེས་གཞི་ནས་རང་རང་གི་ཁྱིམ་ལ་ལོག་བཅུག་ཡོད་པ་རེད། དེ་ཙམ་དུ་མ་ཟད། ཉེ་ཆར་རྒྱ་གར་དང་བལ་ཡུལ་ནས་ལོག་ཡོང་བའི་ཨ་མདོ་དང་ཁམས་ཀྱི་དད་ལྡན་རྣམས་སྒྲིག་ཆས་ཅན་གྱི་ལྟ་རྟོག་འོག་བཞག་ནས་གཞིས་ཀ་རྩེར་བཏང་ཞིང་། དེར་ཉིན་བདུན་རིང་ “སློབ་གསོ་”སྤྲད་ཡོད་འདུག དེའི་རྗེས་ནས་སོ་སོའི་ཁྱིམ་ལ་ལྷན་གཅིག་ཏུ་བཏང་འདུག

ལྷ་ས་རུ་དུས་འཁོར་དབང་ཆེན་ལ་བཅར་མཁན་གྱི་བོད་མི་རྣམས་ལ་དེ་ལས་ཆེ་བའི་རྙོག་དྲ་འཕྲད་འདུག འདིའི་གྲས་ཀྱི་མང་ཆེ་བ་ཞིག་ནི་རྒན་རྒོན་རེད་ལ། གཞུང་ཞབས་བགྲེས་ཡོལ་དང་དེ་བཞིན་གྲོང་ཁྱེར་ལ་སྡོད་མཁན། ཡང་གྲོང་ཁྱེར་ཉེ་འཁོར་ན་ཡོད་པའི་ཞིང་པ་རྣམས་རེད། ད་དུང་དར་མ་དང་ལོ་ཆུང་དེ་འདྲ་ཡང་འདུག ཐོག་མར་ཁོང་ཚོ་རང་རང་གི་གྲོང་སྡེ་ལས་ཁུངས་དང་ཡང་ན་འབྲེལ་ཡོད་ཉེན་རྟོག་ལས་ཁུངས་ཀྱིས་མཉམ་འབྲེལ་བྱས་པའི་ལས་དོན་རུ་ཁག་དག་གང་རུང་ཞིག་གིས་འབོད་འགུག་བྱས་ཤིང་། མི་རེ་རེ་བཞིན་ཉེན་རྟོག་ལས་ཁུངས་དང་མཉམ་འབྲེལ་བྱས་པའི་ལས་དོན་རུ་ཁག་གམ་ཡང་ན་གྲོང་སྡེ་ལས་ཁུངས་ཀྱི་ལས་བྱེད་ཅིག་གིས་འདྲི་བརྩད་བྱས། དྲི་བ་གལ་ཆེན་དེ་དག་གི་ཁྲོད་དུ། དུས་འཁོར་དབང་ཆེན་གྱི་སྐབས་སུ་སུ་མཐོང་བྱུང་། ༧རྒྱལ་བ་རིན་པོ་ཆེ་དང་ཡང་ན་ཟམ་གདོང་རིན་པོ་ཆེ། བཀའ་བློན་ཁྲི་པ་གསར་པ་བཅས་ཀྱིས་ཏག་ཏག་ག་རེ་ལབ་གི་འདུག ས་ཁུལ་འདི་ནས་ཡིན་པའི་མི་སུ་འདྲ་ཞིག་ལ་དུས་འཁོར་དབང་ཆེན་སྐབས་ཐུག་བྱུང་། ༧རྒྱལ་བ་རིན་པོ་ཆེ་དང་དེ་མིན་གྱི་བླ་མ་ཁག་ལ་མཆོད་འབུལ་མཚོན་དོད་དུ་སྒོར་མོ་ག་ཚོད་སྤྲད་པ་ཡིན། དེ་ལ་སོགས་པ་རེད།

ཐོག་མའི་སྐབས་སུ་ཁོང་ཚོ་མི་རེ་ངོ་རེ་ནས་འབོད་འགུག་བྱས་ཤིང་། དེའི་དུས་ཡུན་ཡང་དམིགས་བསལ་གྱིས་རིང་པོ་དེ་འདྲ་ཡང་མིན་པ་འདྲ། གོ་ཐོས་ལ་གྲོང་སྡེ་ལས་ཁུངས་དང་ཡང་ན་ལས་དོན་རུ་ཁག་གིས་བཏང་བའི་མི་ཁ་ཤས་ཀྱི་རྣམ་འགྱུར་ནི་འགྲིག་ཙམ་ཡིན་པ་དང་། མི་ཁག་གཅིག་གི་རྣམ་འགྱུར་ནི་ཧ་ཅང་སྐྱོ་པོ་དང་དེ་ཡང་གདོང་ལ་བལྟས་ནས་གཤེ་གཤེ་གཏོང་བ་དཔེར་ན། “ཁྱེད་རང་ཚོ་མི་འདི་དག ཁྱེད་རང་ཚོས་ང་ཚོའི་ལྟོ་ཟས། ཡིན་ན་ཡང་། ཁྱེད་རང་ཚོའི་རང་གི་མགོ་དེ་ཕྱོགས་གཞན་དེ་ལ་བསྙལ། འདིའི་རྒྱབ་ལོགས་ཀྱི་འཆར་གཞི་ག་རེ་ཡོད།” རྒྱ་གར་ལ་ནང་པའི་གནས་སྐོར་ལ་ཕྱིན་ནས་ལོག་མཁན་དང་དེ་ནས་ “གསོལ་ཇ་ལ་གདན་དྲངས་པའི་”མི་དེ་ཚོ་ཚང་མའི་ཕྱིར་བསྐྱོད་ལག་འཁྱེར་རྣམས་གཞུང་བཞེས་བཏང་ཡོད་འདུག

མི་མང་པོའི་བསམ་ཚུལ་ལ་ཕྱིར་བསྐྱོད་ལག་འཁྱེར་གཞུང་བཞེས་བཏང་རྗེས་མནར་གཅོད་རྣམས་མཇུག་སྒྲིལ་གི་རེད་དྲན་པ་རེད། ཡིན་ན་ཡང་། ཁོང་ཚོས་དེ་ལས་ཀྱང་ཆེ་བའི་འཇིགས་དངངས་ཤིག་གིས་ཁོང་ཚོ་ལ་སྒུག་བཞིན་པ་དེ་སེམས་ལ་འཁོར་ཡོད་མ་རེད། ཕྱི་ཟླ་གཉིས་པའི་ཟླ་མགོ་ཙམ་ལ་ལྷ་སར་སྡོད་མཁན་གྱི་བོད་རིགས་དུས་འཁོར་དབང་ཆེན་ལ་ཕྱིན་གྲས་ཀྱི་ཕོན་ཆེ་བ་ཞིག་གི་སྒོ་འགྲམ་དུ་ཉེན་རྟོག་པ་ཡོང་ནས། “སློབ་སྦྱོང་རུ་ཁག་”དང་ཡང་ན་ “སློབ་སྦྱོང་བྱེད་སླད་”འགྲོ་དགོས་པར་བསྙད་ནས་འཁྲིད་ཡོད་པ་རེད། ད་དུང་ཁོང་ཚོ་མུ་མཐུད་ནས་གཅིག་རྗེས་གཉིད་མཐུད་ཀྱིས་འཁྲིད་སྟབས་ཁོང་ཚོའི་མིང་དེ་ཚོ་ཡང་ “ནོར་འཁྲུལ་ངོས་ལེན་”གྱི་ཡིག་ཆའི་ནང་ཐོན་གི་འདུག་ཟེར། དེས་ཁོང་ཚོ་ལ་སྐྲག་སྣང་དང་དངངས་འཚབ་སྐྱེས་བཅུག་པ་རེད། “སློབ་སྦྱོང་རུ་ཁག་”དེའི་འཐབ་བྱུས་གང་ཞིག་ལག་བསྟར་བྱེད་བཞིན་པ་དང་། ཁོང་ཚོས་མི་ལ་ “ནོར་འཁྲུལ་ངོས་ལེན་”ཇི་ལྟར་བྱེད་བཅུག་པ་དེ་སུ་གང་གིས་ཀྱང་ཤེས་ཀྱི་ཡོད་མ་རེད།

རང་གི་ནང་མི་རྒན་གྲས་རྣམས་འཁྲིད་ཚར་བའི་བོད་མི་ཚོས་གནད་དོན་དེ་དག་ཝེ་པའོ་དྲ་རྒྱའི་སྟེང་བགྲོ་གླེང་བྱས་ཡོད་ཅིང་། གང་མྱུར་བགྲོ་གླེང་དེ་ཚོ་ཡང་ཕྱིར་འདོན་བྱས་ཡོད་པ་རེད། སྟབས་ལེགས་པ་ཞིག་ལ། གྲོགས་པོ་ཞིག་གིས་ནག་གསུབ་བཏང་ཟིན་པའི་གནས་ཚུལ་དག་ཉར་འདུག་པའི་ཁོངས་སུ་གཤམ་གསལ་འདི་འདྲ་འདུག

@木雅公主后人：ཁ་སང་གི་ལྷ་སའི་དགུན་རླུང་ནི་ཧ་ཅང་རྩུབ་ལ་ནམ་མཁའ་ནི་ཐལ་མདོག་རེད་ཅེས་ངས་སྤུན་མཆེད་རྣམས་ཀྱིས་བརྗོད་པ་ངས་གོ་བྱུང་། ཁ་སང་ཞོགས་ཀར་ཨ་མ་ལགས་འགྲོ་དགོས་པའི་བཀའ་རྒྱ་བཏང་བ་དང་། ཉིན་གུང་མོ་རང་ཉལ་ཆས་ཤིག་ལེན་དུ་སླེབས་སོང་། དེ་ནས་བཟུང་ཚུར་ལོག་མ་བྱུང་། མོ་རང་རྒྱ་གར་ལ་གནས་མཇལ་དུ་ཕྱིན་པ་དེ་ལ་ཁོང་ཚོ་དགའ་གི་མེད་པ་ང་ཚོས་ངོས་འཛིན་བྱེད་གི་ཡོད། མོ་རང་འདི་འདྲའི་དུས་ཚོད་རིང་པོ་ཞིག་ལ་སློབ་སྦྱོང་བྱེད་དགོས་པ་རེད་དམ། མཐའ་ན་མོས་རྒྱ་ཡིག་ཀྱང་ཀློག་ཤེས་ཀྱི་ཡོད་མ་རེད།

@旺秀才丹：ལྷ་ས་རུ་དགུང་ལོ་ ༨༠ ཡན་ལ་སོན་པའི་རྒན་མོ་ཞིག་ཀྱང་ཨ་མ་ལགས་དང་ལྷན་དུ་སློབ་སྦྱོང་ཁྲོད་བཞག་འདུག སྐྱིད་རིའི་(Kirey)ཉེན་རྟོག་ལས་ཁུངས་གཅིག་པུ་ནས་ཀྱང་ཁ་སང་ཉིན་རྒྱབ་སྦ་སི་ཆུང་གྲས་གསུམ་བཏང་སོང་། ཉི་མ་ཉི་ཤུ་ཙམ་ལ་རེད་ཟེར་གྱི་འདུག བོད་ནང་དུ་ལྷིང་འཇགས་ཡོང་རྒྱུ་ལ་དམིགས་པའི་གནོན་ཤུགས་དང་ཚོར་བ་དེ་ཚོ་ངས་ཤེས་ཀྱི་འདུག ཁོང་ཚོས་ནང་པའི་ཆོས་ལ་དད་པ་བྱེད་མཁན་གྱི་རྒན་རྒོན་འདི་ཚོ་ལ་གཅར་རྡུང་དང་། མནར་གཅོད། ཐུབ་ཚོད་གཏོང་བ་བཅས་མི་བྱེད་རྒྱུར་ངས་རེ་བ་བྱེད་ཀྱི་ཡོད། ཨ་མ་ལགས་ཀྱིས་དངོས་གནས་རྒྱ་སྐད་གོ་གི་མ་རེད་ལ། ཡི་གེ་ཀློག་ཐུབ་གི་མ་རེད། མོ་རང་འཛིན་གྲྭ་ལ་ཕེབས་ནས་མི་རིགས་སྲིད་ཇུས་སྐོར་གྱི་རྒྱལ་ཁབ་ཀྱི་ཁྲིམས་ཀྱི་སྡེ་ཚན་དག་ལ་སློབ་སྦྱོང་ཙམ་ཞིག་བྱེད་དགོས་པར་ངས་རེ་བ་བྱེད་ཀྱི་ཡོད།

@木雅公主后人： ཨ་མ་ལགས་ནི་ཁྱིམ་ལ་སྡོད་མཁན་གྱི་ཆུང་མ་ཞིག་རེད། མོས་རྒྱ་ཡིག་ཀློག་ཐུབ་གི་མ་རེད། མོ་རང་གི་བྱིས་པ་ཚང་མ་འཆང་ས་བརྒྱབ་ཟིན་པ་རེད། སྤྱིར་བཏང་བྱས་པ་ཡིན་ན། ཨ་མ་ལགས་ཀྱིས་རང་གི་ཕྱག་འཚལ་བ་དེ་ཚོ་འཚལ་གི་རེད། མཱ་ཇང་རྩེད་མོ་རྩེ་ཏོག་ཙམ་རྩེ་གི་རེད། དེ་ག་རེད། ངའི་གོ་ཐོས་ལ་ཁོང་ཚོ་ལྷ་སའི་ནུབ་ཁུལ་དུ་ཡོད་པའི་ས་མཚམས་བདེ་སྲུང་བཀོད་འདོམས་རུ་ཁག་གི་དམག་ཁང་དུ་བཀག་སྐྱིལ་བྱས་འདུག་ཟེར། དེ་རིང་ནི་ཉི་མ་གཉིས་པ་རེད་ལ་མོ་རང་ད་དུང་ཡང་ནང་ལ་སླེབས་མ་སོང་། མནར་གཅོད་འདི་ག་ཚོད་བར་དུ་འགྲོ་གི་རེད། རྒན་རྒོན་ཚོའི་སེམས་དང་གཟུགས་པོ་ལ་ཡང་བསྐྱར་མནར་གཅོད་མ་གཏོང་དང་།

@木雅公主后人：ངས་དོ་ནུབ་རང་གི་ཁྱིམ་དུ་གཟིམ་མི་ཐུབ་ཅིང་རང་གི་ནང་མི་དྲན་བཞིན་པའི་སྤུན་ཟླ་རྣམས་ལ་སྨོན་ལམ་རྒྱག་གི་ཡོད། དཀོན་མཆོག་གིས་ཉེས་མེད་ཀྱི་མི་ཕལ་བ་འདི་ཚོ་ལ་སྲུང་སྐྱོབ་དང་བྱིན་རླབས་གནང་རོགས། དེ་ལ་བརྟེན་ནས་ཁོང་ཚོ་རང་རང་གི་ཁྱིམ་ལ་བདེ་འཇགས་ངང་གང་མྱུར་ལོག་ཐུབ་པ་ཤོག ལྷག་པར་དུ་དགུང་ལོ་ ༨༠ ལ་ཕེབས་པའི་ང་ཚོའི་ཨ་མ་ལགས་ལ་དེ་ལྟར་གནང་རོགས། ང་ཚོ་ཚང་མས་ཁྱེད་རང་ཚོ་ཚང་མ་ལོག་ཕེབས་རྒྱུ་ལ་སྒུག་བསྡད་ཡོད། @旺秀才丹：ང་ཚོས་ཡིད་ཆེས་བྱེད་ཆོག་སའི་ཁྲིམས་ཤིག་ཡོད་རེད་དམ། ཆུ་ཚོད་ ༢༤ རིང་ལ་བཀག་སྐྱིལ་བྱས་པ་དེ་ལ་ག་རེ་ཟེར་དགོས་རེད། དེ་ལས་རིང་བ་ཞིག་འགོར་པ་ཡིན་ན་ང་ཚོས་དེ་ལ་ག་རེ་ཟེར་དགོས་པ་རེད།

@木雅公主后人：མཚན་མོ་གཉིས་པའི་ཕྱི་པོ་འདི་ལ་གནམ་གཤིས་ནི་སྐད་གོ་རྒྱུ་མེད་པའི་རླུང་བུ་ཅན་ཞིག་ཏུ་གྱུར། ཨ་མ་ལགས་ཚང་མ་ཧ་ཅང་གྲང་གི་ཡོད་ལས་ཆེ། ཁྱེད་ཅག་གི་བྱིས་པ་རྣམས་ཀྱིས་བཟོད་མི་ཐུབ་པ་འདི་བཟོད་དགོས་པ་རེད་ལ། ཁྱེད་ལ་མུ་མཐུད་ནས་སྡུག་བསྔལ་མྱང་འཇུག་དགོས་པ་རེད།

@云那边：ད་ཡང་བསྐྱར་ཅིག་བཤད། རྒྱུ་མཚན་གང་ཡང་མེད་པར་ཡལ་བར་གྱུར་པའི་ལྷ་སའི་ནང་གི་ཐག་རིང་མོ་ན་ཡོད་པའི་རྒན་རྒོན་འདི་ཚོའི་ཆེད་དུ། མི་འདི་ཚོ་ལུང་པ་བཞག་ནས་འགྲོ་སྐབས་བྱེད་སྒོ་ཚང་མ་ཁྲིམས་མཐུན་གྱི་ཐོག་ནས་ཕྱིན་ཡོད་པ་རེད། ངའི་བསམ་ཚུལ་ལ་ཁོང་ཚོ་མ་ཐོན་གོང་ལ་ཡང་འབྲེལ་ཡོད་ལས་ཁུངས་ཁག་གིས་ཁོང་ཚོའི་སྐོར་ལ་ཚང་མ་ཤེས་ཤེས་པ་རེད་དྲན། ཡིན་ན་ཡང་། ཅིའི་ཕྱིར་ཁོང་ཚོ་ཚུར་ལོག་རྗེས་ཀྱི་འདི་འདྲའི་མནར་གཅོད་སྣ་ཚོགས་དང་མི་རེ་ངོ་རེ་བྱས་ཏེ་འདྲི་བརྩད་བྱེད་པ་འདི་ལ་སྒུག་པ་རེད། ལྷིང་འཇགས་ཉར་རྒྱུ་ལ་བཀོལ་བའི་ཐབས་ཇུས་དེ་ཚོ་རྟག་པར་རེ་བཞིན་འདི་འདྲ་གཡོ་སྒྱུ་ཅན་དང་ཡིད་དུ་མི་འོང་བ་ཞིག་ཆགས་རྒྱུ་ཡིན་ནམ།

@格桑小巫：སྤྱིར་བཏང་གི་ཁྲིམས་ལ་བསྟུན་ནས་དུས་འཁོར་དབང་ཆེན་ལ་ཕྱིན་པའི་རྒན་རྒོན་འདི་དག་དང་། ངེས་ཅན་གྱི་བཀོད་འདོམས་མེད་འོག་ནས་ཉལ་ཆས་ཤིག་འཁྱེར་ཏེ་ཁྱིམ་ནས་བཏོན་དགོས་བྱུང་ཞིང་སློབ་སྦྱོང་ཆེད་འདུ་འཛོམས་བྱས་པའི་རྒན་རྒོན་འདི་ཚོ་ལ་མཚོན་ན། འབྲེལ་ཡོད་སྡེ་ཁག་དག་གིས་ཡིག་རྨོངས་མཚོན་ཆ་མེད་པའི་རྒན་རྒོན་འདི་ཚོས་རྒྱལ་ཁབ་ལ་གྱེན་ལོག་བྱེད་ཐུབ་པར་བསམས་ཡོད་དམ་ཞེས་ངས་འདྲི་འདོད་བྱུང་།

@没有你的雪域：དགུང་ལོ་ ༦༠ ནང་ཡོད་པའི་ང་ཚོའི་ཨ་མ་ལགས་འཛིན་བཟུང་བྱས་སོང་། ཁོང་ཚོས་བཤད་པ་ལྟར་ན། ཨ་མ་ལགས་ཟླ་བ་གཉིས་ནས་གསུམ་བར་དུ་ལོག་གི་མ་རེད་ཟེར། དེ་རིང་རྒན་རྒོན་བརྒྱ་ཕྲག་ཁ་ཤས་བཀག་ཡོད་སའི་ཁང་པའི་ཁང་པའི་སྒོ་འགྲམ་ན་ཁྱིམ་མི་མང་པོ་ངུ་གི་འདུག ནང་ལོགས་ན་ཡོད་པའི་རྒན་རྒོན་ཚོས་ཤུགས་ཀྱིས་རང་གི་ལག་པ་གཡུགས་ཤིང་དེས་ཁོང་ཚོ་ལ་མ་ངུ་ཞེས་བརྡ་སྟོན་གི་ཡོད་པ་རེད། ཁ་ཕར་ལོག་ནས་འགྲོ་ཐུབ་མཁན་གྱི་རྒན་རྒོན་དེ་དེ་ཚོས་གཟབ་གཟབ་བྱས་ཏེ་མིག་ཆུ་ཕྱིས་གི་འདུག འདི་མཐོང་མཁན་གྱི་མི་ཚང་མ་སེམས་སྐྱོ་འདུག ང་ཚོ་ ལོ་སར་སྲུང་བརྩི་བྱེད་ཡག་མེད་པར་སེམས་སྟོང་པར་ཁྱིམ་ལ་ལོག་པ་ཡིན། བོད་ལུགས་ཀྱི་ལོ་འདིའི་ཡུན་ལ་ང་ཚོའི་ཁྱིམ་མི་གཅིག་གིས་གནས་རྩ་ཆེན་ཞིག་ལ་གནས་སྐོར་བྱེད་རྒྱུའི་ཐག་གཅོད་བྱས་པ་ཡིན།

ཝེ་པའོ་ཐོག་བཀོད་པའི་རྩོམ་ཡིག་དང་དེ་བཞིན་ཁུངས་ལྡན་གནས་ཚུལ་ཁག་ལ་གཞི་བཅོལ་ན། ལྷ་ས་གཅིག་པུའི་ནང་མ་མཐའ་ལའང་ “སློབ་སྦྱོང་གི་སྐོར་ཁག་”བདུན་ནམ་བརྒྱད་ཙམ་ཞིག་བཙུགས་ཡོད་པ་རེད། ཁག་ཅིག་ནི་དཔེར་ན་ལྷ་སའི་ནུབ་ཁུལ་དུ་ཡོད་པའི་ས་མཚམས་སྲུང་སྐྱོབ་བཀོད་འདོམས་རུ་ཁག་གི་དམག་སྒར་ལྟ་བུའི་དམག་སྒར་ཁག་ཏུ་བཙུགས་ཡོད་པ་རེད། ཁག་ཅིག་ནི་དཔེར་ན་ལྷ་སའི་ནུབ་ཁུལ་འབྲས་སྤུངས་དགོན་པའི་གཤམ་འོག་ཏུ་ཡོད་པའི་ཁྲིན་ཀོན་ཆུས་དགེ་འོས་སློབ་གྲྭ་ལྟ་བུའི་ལས་དོན་རུ་ཁག་ཏུ་བཙུགས་འདུག ཁག་གཅིག་ནི་སེ་རའི་ལམ་དང་ཅང་སུའུ་ལམ་དུ་ཡོད་པ་ལྟ་བུའི་མགྲོན་ཁང་ཁག་ཏུ་བཙུགས་འདུག ཁག་གཅིག་ནི་མཐའ་ན་ཆབ་སྲིད་ཀྱི་བཙོན་པ་བཀག་སྡོམ་བྱས་ཡོད་སའི་སྟོད་ལུང་བདེ་ཆེན་རྫོང་དང་ཆུ་ཤུལ་རྫོང་དུའང་བཙུགས་འདུག དུས་འཁོར་དབང་ཆེན་ལ་ཕེབས་པའི་བོད་མི་ཧ་ལམ་སྟོང་ཕྲག་མ་ཟིན་ཙམ་ཞིག་ད་ནི་ “སློབ་སྦྱོང་རུ་ཁག་”དག་ཏུ་ཁ་བཙུམས་ཡོད་པ་རེད། བཙན་གནོན་འདི་དག་གིས་ཁོང་ཚོའི་ཁྱིམ་མི་དང་ཁྱིམ་མཚེས་རྣམས་ལ་ཧ་ལས་པའི་གནོན་ཤུགས་སྤྲད་པ་ཙམ་དུ་མ་ཟད། ཁོང་ཚོ་ལ་ཧ་ལས་པའི་འཇིགས་སྐུལ་ཐེབས་ཡོད། འདི་ནི་ལྷ་ས་གཅིག་པུའི་གནས་ཚུལ་རེད། བོད་རང་སྐྱོང་ལྗོངས་ཀྱི་བོད་ཀྱི་ས་ཁུལ་གཞན་དག་གི་གནས་ཚུལ་ནི་ད་ཆ་གསལ་ཁ་མི་འདུག ཀན་སུའུ་དང་མཚོ་སྔོན། སི་ཁྲོན། ཡུན་ནན་བཅས་ལ་ཁྱབ་པའི་བོད་ཀྱི་ས་ཆ་དག་གི་གནས་ཚུལ་ནི་ད་ཆ་གསལ་ཁ་མི་འདུག

ད་དུང་། “སློབ་སྦྱོང་”གི་དུས་ཡུན་སྐོར་གྱི་ཚིག་འབྲུ་ཡང་གཅིག་མཐུན་མི་འདུག ཁ་ཤས་ཀྱིས་ཉི་མ་ ༢༠ རིང་རེད་ཟེར་ལ། ཁ་ཤས་ཀྱིས་ཟླ་གསུམ་པའི་ཟླ་མཇུག་དང་ཟླ་བཞི་པའི་ཟླ་སྟོད་རེད་ཟེར། ཁ་ཤས་ཀྱིས་དེ་ནི་ཟླ་བ་གཉིས་ནས་གསུམ་གྱི་ཡུན་ལ་རེད་ཟེར། སློབ་སྦྱོང་གི་དུས་ཡུན་འདི་འདྲའི་རིང་པོ་ཞིག་དགོས་པ་དེ་ནི་བོད་ཀྱི་ཚོར་བ་རྣོ་བའི་དུས་ཚོད་དེ་ཟླ་བ་གསུམ་པ་འབྲེལ་བ་ཡོད་སྲིད་དམ། འོན་ཀྱང་། འདི་ནི་གང་ཞིག་འབྱུང་བཞིན་པ་དེ་ཡིན་ན། དེ་ནི་ཟླ་བ་གསུམ་པའི་ཚོར་བ་རྣོ་བའི་དུས་ཚོད་འདི་ལ་གཡོལ་ཐབས་ཤིག་ཡིན་ནམ། ཡང་ན་ དེ་ནི་ཟླ་བ་གསུམ་པའི་ནང་དོན་དག་ཅིག་འབྱུང་དུ་འཇུག་རྒྱུའི་ཆ་རྐྱེན་བཟོ་སླད་ཡིན། འདི་ནི་དྲ་རྒྱའི་སྟེང་གི་བོད་མི་གྲོགས་པོ་ཞིག་གིས་ཇི་ལྟར་བཀོད་པ་ལྟར་ཡིན་ཏེ། “བརྟན་ལྷིང་དེ་འདི་ལྟར་ཉར་བ་ཡིན་ན་དེས་ལྡོག་ཕྱོགས་ཀྱི་འབྲས་བུ་ཁོ་ན་འབྱིན་གྱི་རེད།” “སློབ་སྦྱོང་”འདི་ནི་ཁེར་རྐྱང་དུ་བྱས་ཡོད་པ་རེད་ཅེས་གནས་ཚུལ་ཐོན་འདུག

ཐོག་མའི་སྐབས་སུ་ཁྱིམ་མིའི་ཐུག་འཕྲད་བྱེད་པའང་བཀག་ཡོད་པ་རེད། གྱོན་པ་དང་ཁ་ལག་བསྐུར་བ་ཡང་བཀག་པ་རེད་ལ། ལག་འཁྱེར་ཁ་པར་ཡང་འཁྱེར་མི་ཆོག་པ་རེད། ཅང་མ་འགོར་བར་དབང་འཛིན་པ་ཚོས་གྱོན་པ་དང་ཁ་ལག་བསྐུར་རྒྱུ་ལ་མོས་མཐུན་བྱེད་མགོ་བཙུགས་པ་རེད། དེ་ནི་གཅིག་བྱས་ན་ཕྱི་ལོགས་ཀྱི་གསར་འགྱུར་ནང་ཐོན་པ་དང་དེ་མཚུངས་ཀྱི་དོ་སྣང་སྤྲད་པ་ལ་བརྟེན་ནས་ཡིན་པ་རེད། “སློབ་སྦྱོང་རུ་ཁག་”གི་སྐོར་ཅིག་ལ་ཁྱིམ་མི་རྣམས་ལ་ཐུག་འཕྲད་བྱེད་བཅུག་ཅིང་། “སློབ་སྦྱོང་རུ་ཁག་”གི་སྐོར་ཅིག་ལ་དེ་ལྟར་བྱེད་བཅུག་མི་འདུག “སློབ་སྦྱོང་རུ་ཁག་”རེ་རེ་ཡིས་སྟངས་འཛིན་བྱེད་སྟངས་མི་འདྲ་བ་རེད། “སློབ་སྦྱོང་རུ་ཁག་”འགའ་རེར་ཁང་མིག་ཅིག་ནང་ཉལ་ཁྲི་སྟེང་འོག་གཉིས་རེ་བྱས་ཏེ་མི་བཅུ་ལས་བརྒལ་བ་ཡོད་པ་རེད།

“སློབ་སྦྱོང་རུ་ཁག་”འདི་དག་གི་ “སློབ་སྦྱོང་”གི་ལེ་ཚན་ནང་ “རྒྱལ་གཅེས་ཆོས་གཅེས་”དང་ “ཁྲིམས་ཀྱི་སློབ་སྦྱོང་”། རྒྱལ་ཁབ་ཀྱི་ཆོས་ལུགས་སྲིད་ཇུས་སོགས་འདུག་ཅེས་གནས་ཚུལ་ཐོན་འདུག མཐའ་ན་ “བོད་རྙིང་པའི་”མུན་ནག་ཐེར་འདོན་དང་། “བོད་གསར་པའི་”བདེ་སྐྱིད་ལ་བསྟོད་པ་བྱེད་སླད། ༡༩༦༠ ལོའི་དྲིལ་བསྒྲགས་གློག་བརྙན་ “བྲན་གཡོག་”ཅེས་པས་མཚོན་པའི་གློག་བརྙན་གནའ་སྔ་མོའི་སྡུག་བསྔལ་དང་དེང་དུས་བདེ་སྐྱིད་དྲན་སྐུལ་བྱེད་པའི་གློག་བརྙན་ཁག་ཅིག་ཀྱང་བསྟན་ཡོད་པ་རེད། དུས་མཚུངས་སུ་མི་རྣམས་ཚད་གཞི་ངེས་ཅན་འགའ་ཚང་དགོས་པ་སྟེ། “སློབ་སྦྱོང་”བརྒྱུད་ནས་ཁོང་ཚོར་ཅི་ཞིག་ཐོབ་པ་དེ་ཡོངས་གྲགས་ཀྱིས་སྒྲོག་དགོས་པ་དང་། དེ་ལ་བརྟེན་ནས་ཁོང་ཚོའི་བསམ་བློ་ལ་འགྱུར་བ་གང་འདྲ་ཐེབས་ཡོད་པ་དེ་འགྲེལ་བཤད་བྱེད་པ། སྔོན་མ་དང་ད་ལྟ་གཉིས་བསྡུར་ནས་ “སྔོན་གྱི་སྡུག་དྲན་པ་དང་ད་ལྟའི་བདེ་སྐྱིད་ལ་བསམ་བློ་གཏོང་བ།” ཏང་གི་བཀའ་དྲིན་ལ་བསམ་ཤེས་བྱེད་པ་བཅས་ཡིན་པ་རེད། དེ་དག་ལས་གལ་ཆེ་བ་ཞིག་ནི་ཁོང་ཚོ་མུ་མཐུད་ནས་དྲི་བ་འདྲི་བའི་བརྒྱུད་རིམ་ནང་འགྲོ་དགོས་པ་དེ་རེད། དེ་ནི་ཁོང་ཚོས་ཇི་ལྟར་ “སློབ་སྦྱོང་བྱེད་པ་”དེ་རེད། དེས་ “རིག་གནས་གསར་བརྗེ་”དང་དེ་མིན་གྱི་ཆབ་སྲིད་ལས་འགུལ་བརྒྱུད་མྱོང་བའི་རྒན་རབས་མང་པོ་ཞིག་བཟོད་བསྲན་དཀའ་བའི་གནས་ལ་བསྐྱལ་ཏེ་ན་ཚ་ཕོག་པའི་མཚམས་ལ་བསྐྱལ་ཡོད་པ་རེད། རིམ་གྱིས་ན་ཚ་ཕོག་མཁན་གྱི་རྒན་རྒོན་གྲངས་ཀ་འཕར་བ་དང་། གཅིག་བྱས་ན་སྔོན་དཔག་དཀའ་བའི་གནས་ཚུལ་ཞིག་ལ་འབྱུང་བར་སྐྲག་ནས་རྒན་རྒོན་ཚོའི་ཁྲོད་ནས་བསྙུན་གཞི་ཕོག་མཁན་རྣམས་སྨན་ཁང་ལ་བསྙལ་ནས་སྨན་བཅོས་བྱེད་བཅུག་ཡོད་པ་རེད། ཡིན་ན་ཡང་། ཁོང་ཚོ་བོད་ཀྱི་དམག་མིའི་སྤྱི་དམངས་སྨན་ཁང་དང་ཡང་ན་སྤྱི་བདེ་ལས་ཁུངས་ཀྱི་སྨན་ཁང་ཁོ་ནར་སྨན་བཅོས་བྱེད་བཅུག་ཅིང་། དེར་དམག་ཆས་གོན་མེད་པའི་མི་སྣས་ཁྱམས་རྭ་ནས་ལྟ་རྟོག་བྱས་ཡོད་པ་རེད། གང་ལྟར་ཡང་། ནང་མི་དང་གྲོགས་པོ་རྣམས་ལ་ཐུག་འཕྲད་བྱེད་བཅུག་ཡོད་ཅིང་། ནང་མི་རྣམས་དེར་གནས་སྡོད་བྱེད་བཅུག་ཡོད་མ་རེད། ངས་གོ་ཐོས་ལ། ན་ཚ་ཚབས་ཆེ་བའི་རྒན་རྒོན་ཅིག་ཡིད་མུག་ཐག་ཆོད་པའི་དབང་གིས་རྐྱེན་འདས་སུ་གྱུར་ཡོད་པ་རེད་ཟེར།

སྨན་ཁང་དུ་བསྙལ་བའི་རྒན་རྒོན་ནད་པ་ཞིག་གིས་ཁུ་སིམ་མེར་རང་གི་ཁྱིམ་མི་ཞིག་ལ་བརྗོད་དོན། “ཁོང་ཚོས་ “སློབ་སྦྱོང་རུ་ཁག་”གི་སྐབས་སུ་ང་ཚོ་ལ་འདྲི་བརྩད་བྱེད་སྐབས། ངས་མཐའ་ན་ཁོང་ཚོས་རེ་སྐུལ་ཞུས་ནས། ང་ཚོ་ནི་ཤི་ལ་ཉེ་བའི་རྒན་རྒོན་རེད། ང་ཚོ་ལ་ “ཀླད་པ་བཀྲུ་བའི་”སློབ་གསོ་དེ་འདྲ་སྤྲོད་དགོས་ཡག་ཡོད་མ་རེད།”ཅེས་ལབ་པ་ཡིན། ཞེས་ཟེར། སྐད་ཆ་བཤད་ཞོར་མི་འདིའི་མིག་ཆུ་ནི་ཆར་པ་ནང་བཞིན་བབས་ཡོང་གི་འདུག

མཚམས་འདི་ལ་ངས་གྲགས་ཅན་གྱི་ཁྲིམས་རྩོད་པ་ཞིག་ལ་སྐད་ཆ་དྲིས་པ་ཡིན། ངས་ཁོང་ལ་ འདི་འདྲའི་ “སློབ་སྦྱོང་”ནི་འཛིན་བཟུང་དང་བཀག་ཉར་ལ་བརྩིས་ན་རུང་ངམ་ཞེས་དྲིས་པ་ཡིན། ཁྲིམས་རྩོད་པས་ལན་བརྒྱབ་དོན། “འདི་དག་ཚང་མ་ལ་ཁྲིམས་འགལ་གྱི་འཛིན་བཟུང་ལྡན་འདུག འདིས་ཁྲིམས་གང་ཡིན་ཚང་མ་ལ་གཏན་ནས་རྩིས་མེད་བྱས་པ་སྟོན་གི་འདུག” ཅེས་ཟེར། ངས་ང་ཚོས་ཅི་ཞིག་བྱེད་ཐུབ་ཀྱི་རེད་དྲིས་པ་ཡིན། ཁོང་གིས་དབུགས་རིང་ཞིག་བཏང་ནས། “ཕྱོགས་བཟང་ས་དེ་ནས་ལྟོས་དང་། ཉེན་ཁ་མེད་པའི་རྒན་རྒོན་རྣམས་འཛིན་བཟུང་བྱེད་པ་ནི་སྨྱོན་པའི་ལས་ཀ་རེད། ཁོང་ཚོ་གང་མྱུར་གློད་གྲོལ་ཡོང་བ་དང་དེ་ཡང་གོ་སྐབས་སྔ་ཤོས་དེའི་ནང་གློད་གྲོལ་ཡོང་བར་ངས་རེ་བ་བྱེད་ཀྱི་ཡོད།” ཁོང་གིས་ཡང་བསྐྱར་བསྣན་ནས། “གུང་ཁྲན་ཏང་ལ་སྤྱང་གྲུང་དང་སྙིང་སྟོབས་ཅན་གྱི་སྐད་ཆ་ཡོད་པ་རེད། ཁོང་ཚོས་མི་མང་དང་འདུམ་སྒྲིག་བྱེད་དགོས་པ་རེད་ལ། འཁོན་འཛིན་བརྗེད་དགོས་པ་རེད། ཡིན་ན་ཡང་། ཁོང་ཚོས་མི་མང་ལ་ཁག་ཐེག་ཅིག་སྤྲོད་དགོས་པ་རེད། ཏང་རང་གིས་བྲིས་པའི་རྩ་ཁྲིམས་ལ་རང་གིས་སྲུང་བརྩི་བྱེད་དགོས་པ་རེད།”ཅེས་ཟེར།

གསར་འགྱུར་གསར་ཤོས་ནི་བོད་ཀྱི་ལོ་གསར་ལ་དམིགས་ནས་ལྷ་སའི་ “སློབ་སྦྱོང་རུ་ཁག་”ཏུ་བཏང་བའི་མི་ཆིག་སྟོང་མ་ཟིན་ཙམ་གྱི་ཁྲོད་ནས་རྒན་རྒོན་རྣམས་མཐའ་མར་ “ཏང་གི་བཀའ་དྲིན་ལ་ཐུགས་རྗེ་ཆེ་ཞུ་བའི་”གོ་སྐབས་ཤིག་བྱུང་བ་རེད། ལོ་ན་ ༦༥ བརྒལ་ཟིན་པའི་རྒན་རྒོན་རྣམས་ལ་ཉི་མ་བདུན་གྱི་གུང་གསེང་བཏང་སྟེ། གནས་སྐབས་རིང་ “སློབ་སྦྱོང་རུ་ཁག་”ནས་ཐོན་ཏེ་ཁྱིམ་དུ་ལོག་པ་དང་། རང་གི་སྤུན་ཉེ་ཚོ་དང་ལྷན་དུ་བོད་ཀྱི་ལོ་གསར་གཏོང་བཅུག་ཡོད་པ་རེད། ཡིན་ན་ཡང་། འདི་ནི་གུང་ཁྲན་ཏང་ཡོན་མ་ཡིན་པ་ཁོ་ན་ལ་བྱེད་བཅུག་པ་ཞིག་རེད་ལ། གུང་ཁྲན་ཏང་ཡོན་ཡིན་པ་ཚང་མ་སློབ་སྦྱོང་གི་རུ་ཁག་ཏུ་སྡོད་བཅུག་པ་རེད། གློ་བུར་གྱི་ “བྱམས་བརྩེ་”བརྡོལ་བ་དེ་ནི་ བོད་མི་ཚོས་ “དགའ་སྐྱིད་ལྡན་པའི་ཐོག་ནས་བོད་ཀྱི་ལོ་གསར་གཏོང་གི་འདུག”ཅེས་པའི་མདུན་གྱི་གདོང་པ་རྫུན་མ་ཞིག་བཟོ་རྒྱུ་ཁོ་ནའི་ཆེད་ཡིན་པ་རེད་ལ། དེ་བཞིན་རྒྱལ་སྤྱི་དང་བོད་ནང་གི་བོད་མི་ཚོས་བོད་མི་ ༢༣ གྱིས་རང་ལུས་མེར་སྲེག་བཏང་བ་ལ་རྗེས་དྲན་ཆེད་ལོ་སར་སྲུང་བརྩི་བྱེད་རྒྱུ་མིན་པའི་འབོད་སྒྲ་སྒྲོག་པ་དེ་ལ་ལན་འདེབས་ཤིག་ཡིན་པ་རེད།

འོན་ཀྱང་། འདི་འདྲའི་ “བྱམས་བརྩེ་”ནི་ལག་ལེན་དང་མཐུན་པ་ཞིག་རེད་དམ། “གུང་གསེང་”གི་ཉིན་མོ་ལ་དྲ་རྒྱའི་ཐོག་གི་བོད་མི་ཞིག་གིས་བྱིའི་སྐད་བརྡ་འཕྲིན་ཐོག་འདི་ལྟར་བྲིས་འདུག “ཐེངས་འདིར་དབང་འཛིན་པ་ཚོས་མི་མང་དཀྱུས་མ་རྣམས་ལ་ཁོང་ཁྲོ་བསླངས་པ་ཙམ་ཞིག་མ་རེད། ད་དུང་རྒྱུན་དུ་ནས་དབང་འཛིན་པ་ཚོས་ཡིད་འཆེས་འཕེར་བའི་མི་མང་པོ་ལ་ཡང་དོ་ཕོག་བཏང་ཡོད་པ་རེད། དེ་རིང་ངས་ལས་བྱེད་པ་ཡིན་པ་འདྲ་བའི་མི་མང་པོ་ཞིག་རང་གི་སྤུན་མཆེད་ལེན་དུ་ཡོང་བའང་མཐོང་བྱུང་། ཧ་ཅང་གཟབ་ནན་དུ་བསྡད་ཡོད་པའི་དམག་མི་དང་ཉེན་རྟོག་པ་འདི་ན་ཡོད་པ་རྣམས་མ་གཏོགས། ནང་ལོགས་ན་ཡོད་པའི་ལས་བྱེད་རྣམས་ཧ་ཅང་དགའ་ཡོད་པ་འདྲ་པོ་འདུག” ཅེས་བྲིས་འདུག ར་སྐོར་ནང་ལོགས་ན་འཕྲེད་དར་དམར་པོ་ཞིག་གི་སྟེང་དུ་རྒྱ་བོད་སྐད་གཉིས་ཀྱི་ནང་། “སློབ་གསོ་ལ་ཤུགས་བརྒྱབ་ནས། ཤེས་ཡོན་གོང་མཐོར་གཏོང་།” ཞེས་པ་དང་། “རྒྱ་ནག་གུང་ཁྲན་ཏང་མེད་ན་་་་”སོགས་བྲིས་འདུག “བྱམས་བརྩེ་”དེ་ལོ་ཚོད་གཞི་ལ་བཞག་ནས་སྤྲད་ཡོད་སྟབས། བཟའ་ཚང་ཁ་ཤས་ཀྱི་ཁྲོད་དུ་བཟའ་ཟླ་གཉིས་ཀ་ “སློབ་སྦྱོང་རུ་ཁག་”ཏུ་བཏང་ཡོད་མོད། ཁྱོ་ག་ལ་ཁྱིམ་དུ་ལོག་པའི་ “གུང་གསེང་”ཐོབ་ཡོད་མོད་ཆུང་མ་དེ་ “སློབ་སྦྱོང་རུ་ཁག་”ཏུ་བཀག་པའི་གནད་དོན་བྱུང་ཡོད་པ་རེད། གང་ཡིན་ཟེར་ན། ཆུང་མ་དེ་གུང་ཁྲན་ཏང་ཡོན་ཡིན་པས་རེད།

བོད་ཀྱི་ལོ་སར་གྱི་ཉིན་དང་པོའི་ཉིན། སི་ནཱ་ཝེ་པའོ་སྟེང་གི་རྩོམ་ཞིག་ཏུ་འདི་ལྟར། “ཨ་མ་ལགས། ཁོང་རྡོ་རྗེ་གདན་ལ་གནས་སྐོར་ལ་ཕེབས་ནས་ཚུར་ཕེབས་པ་དང་། ཟླ་བ་གཅིག་ནས་གཉིས་བར་གྱི་སློབ་སྦྱོང་གི་ལས་རིམ་ནས་ཉིན་བདུན་གྱི་གུང་གསེང་ཐོབ་སྟེ་བོད་ཀྱི་ལོ་གསར་སྲུང་བརྩི་བྱེད་ཆེད་ཁྱིམ་དུ་ལོག་ཕེབས་ཡོད། དེར་བརྟེན་ང་ཚོས་བོད་རང་སྐྱོང་ལྗོངས་སྲིད་གཞུང་ལ་ཁོང་ཚོའི་མཁྱེན་ཡངས་ཀྱི་རྣམ་འགྱུར་ལ་ཐུགས་རྗེ་ཆེ་ཞུ་དགོས་འདུག འདི་འདྲའི་མཁྱེན་ཡངས་ཀྱི་ཚད་དང་བཀའ་དྲིན་བསམ་ཤེས་དེ་གནམ་འོག་གི་ཡོད་ཚད་ཚང་མ་ཡོང་བ་ཤོག ད་ལོའི་ལོ་གསར་འདི་ནི་དཀྱོགས་མཚམས་ཀྱི་ལོ་ཞིག་ཡིན་པ་ཤོག མི་ཚང་མས་སྡུག་བསྔལ་རྒྱབ་ཏུ་བསྐྱུར་ནས་བདེ་སྐྱིད་ཐོབ་པ་དང་། མི་ཚང་མས་སྐུ་ཁམས་བཟང་ཞིང་མཛད་འཕྲིན་རྒྱས་པ་དང་། ཁོང་ཚོས་གཏན་གྱི་བདེ་སྐྱིད་ཐོབ་པ་ཤོག་ཅེས་ངས་རེ་བ་བྱེད།”ཅེས་བྲིས་འདུག “ཁོང་ཚོའི་མཁྱེན་ཡངས་ཀྱི་རྣམ་འགྱུར་ལ་ཐུགས་རྗེ་ཆེ་”སོགས་ཀྱི་ཡི་གེ་འདི་དག་ངས་ཀློག་སྐབས། མདུན་ངོས་ཀྱི་འོག་ན་སྡུག་བསྔལ་དང་རྫུན་མ་ཡོད་པ་ཚོར་བྱུང་།

ལོ་སར་ཚེས་ ༢ སྤྱི་ལོ་ ༢༠༡༢ ལོའི་ཟླ་ ༢ ཚེས ༢༣ ལ།