ཁ་སང་ཐོ་རངས་ཙམ་ལ་ཨབ་གྷན་ནང་ཡོད་པའི་ཨ་རིའི་དམག་མི་ཞིག་གིས་མེ་མདའ་བརྒྱབ་སྟེ་བུད་མེད་དང་བྱིས་པ་ཚུད་པའི་མི་ ༡༦ དམར་གསོད་ཡོད་འདུག
ཁ་སང་ཕྱི་ཚེས་ ༡༡ ཉིན་གྱི་ཞོགས་པ་སྔ་མོ་ནམ་མ་ལངས་གོང་ཙམ་ལ་ཨབ་གྷན་གྱི་ཁཱན་ཌཱ་ཧར་(Kandahar) ས་གནས་སུ་ཡོད་པའི་ཨ་རིའི་དམག་གི་རྟེན་གཞི་ཞིག་གི་དམག་མི་ཞིག་ཉེ་འགྲམ་གྱི་གྲོང་གསེབ་གཉིས་ནང་ཕྱིན་ཏེ་བུད་མེད་དང་བྱིས་པ་ཚུད་པའི་མི་སེར་དཀྱུས་མ་ ༡༦ ཙམ་མེ་མདའ་བརྒྱབ་སྟེ་དམར་གསོད་དང་། གཞན་མང་པོ་ཞིག་ལ་རྨས་སྐྱོན་བཟོས་ཡོད་འདུག་ལ། དམར་གསོད་བཏང་པའི་ཁྲོད་ཀྱི་འགའ་ཤས་ཤིག་མེར་བསྲེགས་བཏང་སྟེ་ངོས་འཛིན་བྱ་མི་ཐུབ་པ་བཟོས་ཡོད་འདུག
ད་ལྟའི་ཆར་དམར་གསོད་གཏོང་མཁན་དེ་ཨ་རིའི་དམག་མི་ཞིག་ཡིན་པར་ར་འཕྲོད་ཡོད་པ་མ་ཟད། དོགས་གཞི་ཅན་གྱི་དམག་མི་ཞིག་བཀག་ཉར་དང་འདྲི་བཅོད་བྱེད་ཀྱི་ཡོད་ཀྱང་། དམག་མི་དེའི་ཞིབ་ཕྲའི་གནས་ཚུལ་ཕྱིར་བསྒྲགས་བྱས་མེད། གནད་དོན་དེའི་ཐད་ཨ་རིའི་བདེ་སྲུང་དྲུང་ཆེ་པཱ་ནེ་ཊཱ་(Leon Panetta)ཡིས་ཞིབ་བཤེར་འཐིལ་ཕྱིན་པ་ཞིག་བྱེད་བཞིན་ཡོད་སྐོར་བསྒྲགས་འདུག་ལ། གནས་ཚུལ་དེ་བྱུང་འཕྲད་ཨོ་བྷ་མས་ཁ་པར་བརྒྱུད་ཨབ་གྷན་སྲིད་འཛིན་ཧཱ་མེ་ཌི་(Hamid Karzai) ལ་དགོངས་སེལ་ཞུས་པར། ཧཱ་མེ་ཌི་ཡིས་དམར་གསོད་དེ་ནི་གུ་ཡངས་གཏོང་ཐབས་བྲལ་བ་ཞིག་ཡིན་པའི་ལན་འདེབས་བྱས་ཡོད་འདུག
དམག་མི་དེས་དྲག་སྤྱོད་བྱ་དགོས་པའི་རྒྱུ་རྐྱེན་སྐོར་ད་སྔ་ཁ་གསལ་བྱུང་མེད་ཀྱང་། འབྲེལ་ཡོད་ཁག་ཅིག་གིས་ཁོང་ར་བཟུ་བའམ་ཡང་ན་སེམས་ཁམས་བདེ་བོ་མེད་པར་ཆགས་པ་ཞིག་ཡིན་པར་ཚོད་དཔག་བྱེད་ཀྱི་ཡོད་འདུག ད་ཆར་ཆར་ཨ་རི་དང་ཨབ་གྷན་བར་གྱི་གནས་བབ་ཛ་དྲག་ཆེ་རུ་འགྲོ་བཞིན་པ་མ་ཟད། ཨབ་གྷན་ནང་ཡོད་པའི་ཨ་རིའི་གཞུང་ཚབ་ཀྱིས་ཨབ་གྷན་ནང་གི་ཨ་རིའི་མི་སེར་རྣམས་ལ། དོན་རྐྱེན་དེའི་དབང་གིས་ཁོང་ཚོར་དགྲ་ཤ་ལེན་སྲིད་པས་དོགས་ཟོན་བྱ་དགོས་པའི་ཉེན་བརྡ་དང་ཁྱབ་བསྒྲགས་བྱས་ཡོད་ཡོད།
གསར་འགོད་པ། བནྡེ་སྐྱབས།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
![Hungary's Laszlo Krasznahorkai poses for photographers in London [File: Matt Dunham/AP]](https://tibettimes.net/wp-content/uploads/2025/10/Screenshot-2025-10-10-at-2.23.17-PM-360x180.png)
