ཏཱ་ལའི་བླ་མཐོ་སློབ་ཀྱི་དགེ་རྒན་ཨ་འཇམ།
བོད་པ་ཚོར་མཚོན་ན་དུས་ཚོད་འདི་ནི་ངེས་པར་དུ་གླེང་དགོས་པའི་ཉིན་མོ་གལ་ཆེན་ཞིག་ཡིན་ལ། དེ་རིང་ནས་ཕྱིར་ལྡོག་གིས་མི་ལོ་ང་གསུམ་པའི་དཔྱིད་ཀར་ལྷ་སའི་ནོར་བུ་གླིང་གར་ཞོགས་པ་སྔ་མོ་ནས་མི་ཚོགས་ཚོམ་བུ་ཚོམ་བུར་འདུ་བཞིན་ཡོད། བར་སྐབས་ཤིག་ཏུ་མི་མང་སུམ་ཁྲི་ཙམ་གྱིས་ནོར་གླིང་ཁོར་ཡུག་ཧྲིལ་གྱིས་བཅུམ་སོང་། འདི་ནི་མི་སེར་དཀྱུས་མས་རྒྱ་གཞུང་གི་བྱེད་སྟངས་ལ་མ་དགའ་བའི་རྣམ་འགྱུར་ཐོག་མ་དེ་བྱུང་བ་ཡིན་ལ། བོད་དུ་ཞི་བའི་ངོ་རྒོལ་གྱི་སྡེབ་ལངས་ཐོག་མ་དེ་ཡང་ཡིན། ལོ་རྒྱུས་འདི་ལས་ད་གཟོད་བཙན་བྱོལ་བ་ཞེས་པའི་འུ་ཅག་གི་བགྲོད་ལམ་དེ་ཡང་ཧི་མ་ལ་ཡའི་རི་སྒང་དུ་འཐེན་མགོ་ཚུགས་པ་དང་། ཡུལ་གྱར་བའི་གཞུང་ཞིག་ཀྱང་རྒྱུས་མེད་ཀྱི་ངྷ་སའི་རི་བོའི་སྟེང་དུ་ཨུ་ཚུགས་ཀྱིས་འཛུགས་དགོས་བྱུང་།
འདི་ལྟར་ལོ་དང་ཟླ་མཐུད་ནས་དེ་རིང་གི་དུས་ཚོད་ཉིན་མོ་བསུས་པ་རེད། གཞིས་སྡོད་བོད་པ་ཚོས་ཀྱང་གསུམ་གཅིག་ཀླད་གོར་ནི་ག་ལེར་གསལ་ནས་གསལ་དུ་ཕྱིན་ཏེ། དེ་རིང་གི་མི་རབས་གསར་བའི་ཁྲག་རྩའི་ཁྲོད་དུ་ཨང་གྲངས་འདི་ཉིད་ལོ་རྒྱུས་ཀྱི་འུར་སྒྲ་ཞིག་ཡིན་པ་ངོས་འཛིན་གསལ་བོར་བྱུང་། ད་ལྟ་བོད་ཁུལ་གང་སར་དམག་མི་བཀྲམས་ཏེ་དམ་དྲག་ཤིན་ཏུ་ཆེ་བ་བརྗོད་པས། ཕྱི་ལོགས་ནས་ཁ་པར་མ་གཏོང་རོགས། ང་ཚོར་དཀའ་ངལ་སྤྲོད་ཀྱི་འདུག་ཅེས་པ་དང་། ང་ཚོས་ཉིན་ཁ་ཤས་ལ་འབྲེལ་བ་བྱེད་ཐུབ་ཀྱི་མི་འདུག་ཅེས་པ་སོགས་གང་ལྟར་མངོན་ལྐོག་ཅི་རིགས་ཀྱིས་ཁོང་ཚོ་དཀའ་ངལ་ཞིག་ཏུ་ཚུད་ཡོད་པ་ཧ་ཅང་གསལ་བོ་ཤེས་ཐུབ། ཉེ་ཆར་སྤྱི་ཟླ་ ༢ པའི་ནང་དུ་བོད་ནང་གི་དྲ་ཚིགས་ཚད་ལྡན་རེ་ཟུང་སྒོ་བརྒྱབ་སོང་བས། གཞོན་སྐྱེས་རྩོམ་པ་པོ་མི་ཉུང་བ་ཞིག་གིས་དེ་ནི་གསུམ་གཅིག་ཀླད་གོར་གྱི་ཉིན་མོར་བྱོལ་བའི་གཡོ་ཐབས་དང་དངངས་སྐྲག་མ་བཟོད་པ་ཞིག་ཡིན་ཚུལ་བརྗོད་པ་མ་ཟད། དྲ་ཚིགས་དེ་དག་མཚམས་ལ་བཞུགས་པ་ངེས་པར་དུ་མཚམས་གྲོལ་དགོས་པའི་ཐ་ཚིག་ནན་གྱིས་བསྒྲགས་པས། གྲུབ་འབྲས་ཀྱང་མི་དམན་པ་བྱུང་ལ། དེས་ནི་བོད་ནང་གི་ན་གཞོན་ཤེས་ཡོན་པའི་བསམ་བློའི་སྟོབས་ཤུགས་དང་ཁ་ཕྱོགས་ལ་ངོས་འཛིན་གསལ་བའི་ཐིག་རིས་ཤིག་བརྒྱབ་ཟིན་པ་ཡིན།
གསུམ་བཅུ་དུས་དྲན་གྱི་ཉིན་མོར་ང་དང་ངའི་ལས་གྲོགས་སྐོར་ཞིག་བྲེལ་བ་ཅུང་ཆེ་ཙམ་ཡོད། དེ་ནི་ཐེངས་འདིའི་དུས་དྲན་དང་འབྲེལ་བའི་གཏམ་བཤད་བྱ་དགོས་པས་ཡིན། ང་རང་ཡོད་པའི་མཐོ་སློབ་འདི་ནི་གྲོང་ཁྱེར་ཞིག་གི་ཉེ་འགྲམ་དུ་ཡོད་ལ། སློབ་གྲྭའི་ཁོར་ཡུག་གི་ས་ཁྱོན་ཡང་ཆེ་ཙམ་ཡོད་པས། སྤྱིར་གུ་ཡངས་པོ་འདུག་མོད། ད་ལྟ་ས་ཆའི་སྟེང་དུ་ཡུལ་མིའི་བར་དུ་རྩོད་རྙོག་ཕྲ་མོ་ཞིག་འདུག་པས། དེ་རིང་གི་གསུམ་བཅུའི་དུས་དྲན་ཡང་འུར་སྒྲའི་རང་བཞིན་དུ་སྐད་འབོད་བྱེད་ཐབས་མ་འགྲིག་པས། ང་ཚོས་ཀྱང་ཚོགས་འདུའི་རང་བཞིན་གྱི་བྱེད་ཐབས་ཤིག་ཏུ་སྤྱད་པ་རེད། དགེ་རྒན་ཚོས་གསུམ་བཅུ་དུས་དྲན་དང་འབྲེལ་བའི་གཏམ་བཤད་མ་བྱས་གོང་དུ་བཀའ་ཤག་གི་གསུང་འཕྲིན་སྒྲོག་སྦྱངས་བྱས་པ་རེད། འདི་ནི་སྔར་ལོ་དང་མ་འདྲ་བར་༧གོང་ས་མཆོག་གི་གསུང་འཕྲིན་མ་ཡིན་པར་བཀའ་ཁྲིའི་གསུང་བཤད་ཁོ་ན་ཡིན་པས། ཆབ་སྲིད་ཀྱི་འགྱུར་འགྲོས་ཆེན་པོ་ཞིག་གི་གྲུབ་འབྲས་ཀྱང་གསལ་བོར་མཚོན་ཐུབ། དགེ་རྒན་ཚོས་དུས་དྲན་དང་འབྲེལ་བའི་བརྗོད་གཞི་རེ་རེ་ནི་ཚོགས་རྭ་འདིའི་ལྷིང་འཇགས་ཅུང་ཟད་སྒུལ་བཞིན་པའི་ཉམས་སྣང་བྱུང་ལ། དེ་རྗེས་སློབ་མ་ཚོས་རི་མོའི་སྒྱུ་རྩལ་གྱི་ལམ་ནས་དུས་དྲན་མཚོན་པའི་པར་རིས་མང་པོ་ཞིག་གློག་ཆས་བརྒྱུད་ནས་རྩིག་ལྡེབས་སུ་བསྟན་བྱུང་ལ། དེ་དག་ལ་གནས་རིམ་མི་འདྲ་བའི་བྱ་དགའ་ཞིག་ཀྱང་སྤྲད་སོང་། དེ་རྗེས་དུས་དྲན་དང་འབྲེལ་བའི་བོད་དབྱིན་གྱི་རྩོམ་ཡིག་འགའ་ཞིག་ཀྱང་སྒྲོག་སྦྱངས་བྱས་ཏེ་དུས་ཡུན་གང་འཚམ་ཤིག་ཏུ་ཚོགས་རྭ་འདི་ཉིད་ཆེས་ཚོར་ཤུགས་ཀྱིས་བརྟས་པའི་བྱ་འགུལ་རིགས་ཤིག་གི་ངོ་བོར་འཕོས་པར་གྱུར། དེ་ལྟར་ཉིན་གུང་ཡོལ་རྗེས་འཚོགས་འདུ་ཡང་གྲོལ།
ཉིན་འདིར་སྦེལ་ཀོབ་ནས་སྤྱི་ལེ་སུམ་བརྒྱ་ཉེ་བར་ཡོད་པའི་སྦེང་ལོར་གྲོང་ཁྱེར་དུ་སྐད་འབོད་བྱེད་པར་མི་སྣ་བརྒྱ་ལྷག་ཕྱིན་སོང་ལ། དེ་བཞིན་སྦེང་ལོར་གྲོང་ཁྱེར་གྱི་སློབ་ཕྲུག་སོགས་བོད་མི་བརྒྱ་མང་པོ་ཞིག་མཉམ་དུ་འཛོམས་ཏེ་སྐད་འབོད་བྱེད་བཞིན་པའི་སྒང་ཡིན། ང་རང་ལམ་སང་ལས་ཤག་ཏུ་ལོག་སྟེ་དྲ་སྒོ་ཕྱེས་པ་ཡིན། སྐབས་འདིར་རྡ་ས་རུ་མི་སྣ་ལྔ་སྟོང་འཛོམས་ཏེ་དུས་དྲན་སྲུང་བརྩི་བྱེད་བཞིན་པ་ཤེས་རྟོགས་བྱུང་ལ། ཚེ་བརྟན་རྡོ་རྗེ་མ་བུ་གསུམ་གྱིས་བོད་དུ་ལོག་པའི་ལས་འགུལ་གྱི་འགོ་བཟུང་བ་ཡང་གསལ་བོར་ཤེས་བྱུང་། ད་དུང་ཨ་རིའི་མཉམ་འབྲེལ་རྒྱལ་ཚོགས་མདུན་དུ་བོད་མི་གསུམ་གྱིས་ཟས་བཅད་ངོ་རྒོལ་བྱས་ཏེ་ཉིན་བཅོ་བརྒྱད་པ་འགྲོ་བཞིན་པ་ཡང་མཐོང་བྱུང་། དེ་བཞིན་མིག་དམར་ལགས་ཀྱིས་མིག་སྒྲིབ་རྒྱལ་དཀྲོགས་ཞེས་པའི་མིག་ལ་སེང་རས་གཡོགས་ཏེ་རྒྱ་གར་རྒྱལ་ཡོངས་སུ་སྐོར་སྐྱོད་བྱེད་བཞིན་པའི་གནས་ཚུལ་ཡང་མཐོང་བྱུང་། གཞན་ཡང་གསུམ་བཅུ་དུས་དྲན་གྱི་རི་མོ་འདྲ་མིན་དང་རྩོམ་རིག་འདྲ་མིན་མཐོང་གིན་འདུག སྔར་ཁོ་བོའི་དྲ་ལམ་དུ་ཐད་ཀར་གླེང་མོལ་གྱི་བརྡ་རྟགས་མང་ན་ཉི་ཤུ་ལས་མེད་མོད། དེ་རིང་བརྒྱ་ལ་ཉེ་བ་ཡོད་ཚུལ་ལ་བལྟས་ན་དྲ་ལམ་ནས་དུས་དྲན་སྲུང་བརྩི་དང་གསར་འགྱུར་ལྟ་ཀློག་གི་རེ་སྒུག་སྔར་ལས་ཆེ་བའི་སྣང་ཚུལ་ཞིག་ཀྱང་མཐོང་བྱུང་། སྐབས་འདིར་བོད་པ་ཞིག་ཡིན་ཚེ། དྲ་ཚིགས་སུ་བཏང་བའི་བརྩམས་ཆོས་དག་ཀྱང་ཐེངས་འདིའི་དུས་དྲན་འབྲེལ་བ་མེད་པ་ཤིན་ཏུ་དཀོན་པོ་འདུག གལ་སྲིད་འབྲེལ་མེད་ཀྱི་པར་རིས་སོགས་བཏང་ཚེ་རྒོལ་ཚིག་ཀྱང་བསྒྲག་ངེས་པ་ལྟ་བུའི་ཚོར་བའི་ཚ་རླབས་ཤིག་འཕྱུར་བཞིན་མཆིས།
དྲ་ལམ་གྱི་གླེང་གཞི་ཆེས་ཆེ་ཤོས་ནི་ཚེ་བརྟན་རྡོ་རྗེ་མ་བུ་གསུམ་བོད་དུ་ལོག་པའི་འཐབ་རྩོད་ཀྱི་ལས་འགུལ་རྩོམ་བཞིན་པ་དེ་རེད། དེ་ཡང་ཞབས་མཆན་བརྒྱ་ལ་ཉེ་བར་བྱུང་བར་མ་ཟད། ཞབས་མཆན་དག་ཀྱང་བསམ་དོན་ཡིད་བཞིན་དུ་འགྲུབ་པའི་སྨོན་ཚིག་གམ། ཡང་ན། ལས་འགུལ་བ་གསུམ་གྱི་སྐུ་སྲོག་ལ་བར་ཆད་མེད་པར་ཤོག་ཅེས་པ་སོགས་རེད་ལ། དེ་དག་ལས་ཀྱང་ཚོར་བ་དམིགས་བསལ་བ་ཞིག་བྱུང་བ་ནི། ཁོང་ཚོ་ལས་འགུལ་མགོ་འཛུགས་ཀྱིས་སྐྱེལ་མ་བྱ་སྐབས་མི་མང་གིས་ཁོང་གསུམ་ལ་ཁ་བཏགས་ཀྱིས་གཡོགས་ཏེ། མི་མང་ཁྲོད་དུ་མིག་ཆུ་ཤམ་ཤམ་བཞུར་བཞིན་པ་ཧ་ཅང་མང་པའི་གནས་ཚུལ་དེ་རེད། དེ་ལས་ཚོར་ཤུགས་ཆེ་བ་ནི། མི་ཚོགས་ཀྱི་འུར་ཟིང་དང་མིག་ཆུའི་སྐྱེལ་མའི་ཁྲོད་དུ་རྐང་ཐང་དུ་བཞུད་པའི་ལས་འགུལ་བ་འདི་དག་གཞི་ནས་མི་མང་དང་ཁ་བྲལ་སོང་བ་དེ་རེད། སྐབས་ཤིག་ཏུ་དྲ་ལམ་ནས་ཁོང་ཚོ་ཡང་བསྐྱར་མཇལ་བྱུང་། རྒྱ་གར་གྱི་གྲོང་གསེབ་ཀྱི་ཐོག་སོ་རྙིང་བའི་ཁྱམས་རྭ་ཞིག་ཏུ་ཁུ་སིམ་ཞིང་གྲང་ཤུར་ཤུར་གྱིས་མཚན་གཞུང་སྐྱེལ་བཞིན་པ་དེ་རེད། དོ་དགོང་ངས་རང་ཉིད་ཀྱི་ངོ་དེབ་གླེང་མོལ་གྱི་བརྡ་རྟགས་ཡོད་པའི་མི་ལྔ་བཅུ་ལྷག་འདུག་པ་ལས། མི་ཉི་ཤུ་ཙམ་ལ་ཚེ་བརྟན་རྡོ་རྗེའི་ད་ལྟའི་གནས་ཚུལ་གོ་སོང་ངམ་ཞེས་དྲིས་པས། དོན་དངོས་ཀྱི་གནས་ཚུལ་གོ་བའི་ལན་གཅིག་ལས་རག་མ་བྱུང་། དེ་ནི་སྙན་སྒྲོན་པ་ཚེ་རིང་སྐྱིད་རེད། ཁོ་མོས་བརྗོད་ན། ད་ལྟ་ཁོང་ཚོ་ངྷ་ས་རྒྱང་ཐག་རིང་བོ་མེད་ཚུལ་བརྗོད་པར་མ་ཟད། ལྷ་མོ་སྐྱིད་ཀྱི་རྐང་བ་ཅུང་ཟད་ན་བཞིན་འདུག་པ་ལས། ཚེ་བརྟན་རྡོ་རྗེ་དང་ཨ་མ་གཉིས་ཀ་བདེ་ཐང་ཡོད་ཚུལ་གྱི་གསར་འགྱུར་ཐོས་བྱུང་། གནས་ཚུལ་འདི་ཡང་དྲ་ལམ་གྱི་གྲོགས་པོ་མི་ཉུང་བ་ཞིག་ལ་ཆེད་དུ་བཏང་བ་ཡིན། ཡིན་ནའང་། ཁོ་ཚོ་ཉིན་འགའི་རྗེས་ནས་མི་མང་ཚོས་རྦད་དེ་རྙེད་དཀའ་བའམ་བོར་བརླགས་ཐེབས་པར་འགྱུར་བའི་སེམས་ཁྲལ་ཞིག་ངང་གིས་བྱུང་།
དེ་བཞིན་ཨ་མདོ་རེབ་གོང་ནས་གསུམ་བཅུ་དུས་དྲན་སྲུང་བརྩི་བྱས་པའི་གནས་ཚུལ་མཐོང་བས། རང་ཉིད་ཀྱི་སེམས་ཁམས་ཀྱང་ཆ་མི་སྙོམས་པའི་ཡམ་ཡོམ་དུ་བསྒྱུར་སོང་། གང་ལྟར་ཡུ་རོབ་དང་ཨ་རི། ཐེ་ཝན། འཇར་པན་སོགས་ཤར་ནུབ་ཀྱི་བོད་མི་འདུས་སྡོད་ཀྱི་ཡུལ་གྲུ་གང་སར་རྣམ་པ་འདྲ་མིན་གྱི་སྒོ་ནས་གསུམ་བཅུ་དུས་དྲན་སྲུང་བརྩི་བྱེད་བཞིན་པའི་གསར་འགྱུར་དྲ་ལམ་ནས་གཅིག་རྗེས་གཉིས་མཐུད་དུ་མཐོང་གིན་འདུག དེ་ལྟར་དུ་གསར་འགོད་པ་དང་རྩོམ་སྒྲིག་པ། ཉམས་ཞིབ་པ་སོགས་ཀྱང་ཆེས་ཁོམ་ལོང་བྲལ་བའི་དུས་ཚོད་ཅིག་ཏུ་གཏོགས་ལ། བོད་པ་ཞེས་པའི་མི་རིགས་ཤིག་གི་ཚོར་ཤུགས་ཆེས་མཐོ་བའི་དུས་སྐབས་ཤིག་ཀྱང་ཡིན་ནོ།།
འཕྲལ་མར་སྤེལ་བས་ཡིག་ནོར་གཏགས་ནོར་ལ་དགོངས་དག་ཞུ། ༢༠༡༢ ། ༣ ། ༡༡ དགོང་མོར།
རྩོམ་སྒྲིག་པའི་མཆན། ༼ གོང་གི་རྩོམ་ཡིག་འདི་རྩོམ་པ་པོའི་ཟིན་བྲིས་ལས་བདམས་བཀོད་བྱས།༽
ང་ཚོ་བོད་ཀྱི་གནས་སྟངས་འདི་འདྲ་ཞིག་གི་སྒང་ལ་བོད་ཕྱི་ནང་གི་དོན་དངོས་གནས་ཚུལ་མང་བོ་གསར་འགྱུར་བརྒྱུད་ལམ་ནས་འཛམ་གླིང་གི་མིག་སྔར་སྟོན་རྒྱུ་ནི་ཁ་གཏད་དགོས་ཐུག་གི་ལས་ཀ་ཞིག་ཡིན་བཤད་མ་དགོས་པ་ཞིག་རེད་མོད།
ཁ་ཤས་ཞིག་གིས་གསར་འགྱུར་རྫུན་མ་དང་ཁ་ཤས་ཞིག་གིས་གསར་འགྱུར་ཡང་དག་ལ་དགག་པ་རྒྱག་པའི་སྐོར་གཉིས་འདུག ས་ཉིན་སུམ་བཅུ་དུན་དྲན་ཉིན་ཨ་མདོ་རེབ་གོང་གི་དགོན་ལག་བདེ་ཆེན་དགོན་པས་སུམ་བཅུ་དུས་དྲན་སྲུང་བརྩི་བྱས་པའི་གནས་ཚུལ་ངས་དེ་ག་ནས་བཏང་བ་ཞིག་དེར་མདའ་དཔོན་ཟེར་བ་ཞིག་གིས་གསལ་བོ་མུན་ཚུལ་ལབ་འདུག འདི་འདྲའི་རིགས་ཧ་ཅང་སྐྱོ་བོ་རེད།