གྲྭ་བཙུན་ཚོས་རིཊ་གཅིག་རྐང་འཛིན་དང་ཆེད་ལས་གནང་གལ།

འབྲོང་ངུར་ཕོ་ཉ།

སྤྱི་ཡོངས་ནས་བཤད་ན་དེང་སང་ཤེས་ལྡན་པ་ཕལ་མོ་ཆེས་ང་ཚོའི་སྤྱི་ཚོགས་འདིར་རིག་གཅིག་རྐང་འཛིན་པ་དང་ཆེད་ལས་པས་ཕོངས་ཡོད་པའི་གནས་ཚུལ་ཤུགས་ཆེར་གླེང་བཞིན་ཡོད་ལ། དེ་ཐད་འབད་རྩོད་གནང་དགོས་པའི་སྐུལ་མའང་གལ་ནན་གྱིས་གནང་བ་མཐོང་མོད། སྐབས་འདིར་སྤྱི་ལྡོག་ནས་མིན་པར་གྲྭ་པའི་གནས་སྟངས་༼ སྡོམ་ལྡན་གྲྭ་ཆས་གྱོན་ཚད་ལ་གོ་དགོས ༽ཀྱི་སྐོར་ནས་རིགས་གཅིག་རྐང་འཛིན་པ་དང་ཆེད་ལས་པའི་གནད་དོན་ཤོད་འདོད་བྱུང་།

དེ་ཡང་གནའ་སྔོན་གྱི་ཐ་སྙད་བྱས་ན་བཀའ་བབ་ཅེས་ཟེར་ལ། དེང་དུས་ཀྱི་ཐ་སྙད་བྱས་ན་ཆེད་ལས་ཞེས་ཟེར།

 ཆོས་བརྒྱུད་ཆེན་མོ་བཞིའི་གྲྭ་བཙུན་རྣམས་ཀྱིས་རང་རང་གི་ཆོས་བརྒྱུད་ལ་གང་ཞིག་བཀའ་བབ་ཡོད་པ་དང་ཆེད་ལས་གང་ཞིག་ཡིན་པ་དེ་ཐོག་མ་ཉིད་དུ་ཤེས་དགོས་པ་ནི་ཤིན་ཏུ་གལ་ཆེ་བར་མཐོང་། ཤེས་ནས་དེ་དོན་བཞིན་ལམ་ལ་ཞུགས་ཏེ་རིགས་གཅིག་རྐང་འཛིན་དང་ཆེད་ལས་པ་གནང་བ་ཡིན་ན། སངས་རྒྱས་བསྟན་པ་སྤྱིའི་འཛིན་སྐྱོང་སྤེལ་གསུམ་སྲ་བརྟན་ཡུན་གནས་ཡོང་བར་རླབས་ཆེན་གྱི་དགེ་མཚན་ལྡན་པ་ཞིག་ཡིན།

དེ་ཡང་དཔེ་མཚོན་འགའ་ཞུས་ན། དེ་ཡང་རྩོད་པའི་བཀའ་བབ་རི་བོ་དགེ་ལྡན་པ་ཞེས་ཡོངས་སུ་གྲགས་པ་ལྟར་གནའ་ནས་ད་བར་རི་བོ་དགེ་ལྡན་པ་རྣམས་ཀྱིས་རྩོད་པ་ཉིད་རྩལ་དུ་བཏོན་ནས་རིགས་གཅིག་རྐང་འཛིན་དང་ཆེད་ལས་པ་གནང་དང་གནང་བཞིན་ཡོད། དགེ་ལྡན་རྣམས་ཀྱིས་རང་གི་བཀའ་བབ་ཆེད་ལས་ངོས་འཛིན་ཐོག་དུས་དེ་རིང་ཡང་རང་གི་བཀའ་བབ་ཀྱི་ལམ་ཁ་དེའི་ཐོག་ཤར་སྐྱོད་རྐང་འཛིན་གནང་བཞིན་པ་ནི་ཆེས་གུས་བསྔགས་འོས་པ་ཞིག་རེད།

ད་དུང་མུ་མཐུད་བསྟན་པ་ནམ་གནས་བར་དེ་ལྟར་སྐྱོད་ཐུབ་པའི་རེ་སྨོན་ཡོད། དེ་ལས་གཞན། སྒྲུབ་པའི་བཀའ་བབ་རྒྱལ་བ་བཀའ་བརྒྱུད་པ་ཞེས་གངས་ལྗོངས་ལོ་རྒྱུས་ཐོག་ས་ཁྱབ་རྡོ་ཁྱབ་ཀྱི་ཚུལ་དུ་ཡོངས་སུ་གྲགས་པ་ལྟར་སྔོན་གྱི་དམ་པ་གོང་མ་རྣམས་ཀྱིས་རང་ལ་གང་ཞིག་བཀའ་བབ་ལྟར་རྣམ་ཐར་བསྐྱངས་འདུག་ནའང་། དུས་དེ་རིང་ཁ་སང་བཀའ་བརྒྱུད་པ་རྣམས་ཀྱིས་རང་གི་བཀའ་བབ་བམ་ཆེད་ལས་དེ་ཉིད་རང་ངོ་མ་ཤེས་པའམ་ཡང་ན་སྣང་མེད་དུ་བཏང་སྟེ།

 སྒྲུབ་པ་ཉམས་ལེན་རྩལ་དུ་བཏོན་ནས་རིགས་གཅིག་རྐང་འཛིན་དང་ཆེད་ལས་པ་གནང་མཁན་ཧ་ཅང་དཀོན་པར་སྣང་། སྣང་ཚུལ་དེས་སངས་རྒྱས་ཀྱི་བསྟན་པ་སྤྱི་ཡོངས་ཀྱི་གྲུབ་ཆ་གལ་ཆེན་ཞིག་ལ་ཉམས་ཉེས་འབྱུང་བཞིན་ཡོད།

འཇིག་རྟེན་པའི་རིག་གནས་ཐོག་ནས་བསམ་ན། སློབ་སྦྱོང་བྱས་དང་བྱེད་ཀྱིན་པའི་སྐབས་སུ་ཕལ་མོ་ཆེར་རིགས་གཅིག་རྐང་འཛིན་དང་གང་ཞིག་ཆེད་ལས་བྱ་དགོས་པ་སོགས་མ་ངེས་པར་མགོ་རྨོངས་གཞི་ཞིག་ཏུ་སྣང་ན་ཡང་། བོད་ཀྱི་ཆོས་བརྒྱུད་ཆེན་མོ་བཞི་ཡི་རྗེས་འཇུག་གྲྭ་བཙུན་རྣམས་ལ་ནི་དེ་ལྟར་མིན་པར་ལོ་ངོ་སྟོང་ཕྲག་མང་པོའི་ལོ་རྒྱུས་བརྒྱུད་ནས་ཡོང་བའི་རང་རང་སོ་སོའི་ཆོས་བརྒྱུད་ཀྱི་བཀའ་བབ་ཆེད་ལས་དང་། རིགས་གཅིག་རྐང་འཛིན་བྱེད་ས་མ་བསྒྲིགས་རང་འགྲིགས་སུ་ཡོད་ཡོད་པ་ཡིན།

 དེ་ཡང་སྐུ་ཉིད་ལ་གསལ་འདེབས་ཀྱི་ཆེད་དུ་འདིར་འཇམ་མགོན་མི་ཕམ་རྣམ་རྒྱལ་རྒྱ་མཚོའི་གསུང་ཞིག་དྲངས་ན་འདི་ལྟར། དེ་ལ་མདོ་ཡི་བཀའ་བབ་དགེ་ལྡན་པ། སྔགས་ཀྱི་བཀའ་བབ་རྙིང་མ་པ། བཤད་པའི་བཀའ་བབ་ས་སྐྱ་པ།

སྒྲུབ་པའི་བཀའ་བབ་བཀའ་བརྒྱུད་པ། མཁྱེན་པའི་དབང་ཕྱུག་ས་སྐྱ་པ། སྨྲ་བའི་དབང་ཕྱུག་དགེ་ལྡན་པ། རྟོགས་པའི་དབང་ཕྱུག་བཀའ་བརྒྱུད་པ། ནུས་པའི་དབང་ཕྱུག་རྙིང་མ་པ། ངོ་མཚར་ཆེའོ་བཀའ་བབ་བཞི། ལྟ་བ་མཐའ་བྲལ་རྙིང་མ་པ། སྒོམ་པ་ནན་ཏན་བཀའ་བརྒྱུད་པ།  སྤྱོད་པ་ཕུན་ཚོགས་དགེ་ལྡན་པ། བསྙེན་སྒྲུབ་ཆོས་སྤྱོད་ས་སྐྱ་པ། ཀུན་ལའང་ཐམས་ཅད་ཚང་མོད་ཀྱང་། །རང་རང་བརྟུལ་ཞུགས་རྩལ་དུ་འདོན། །རྙིང་མའི་འདོན་པ་སྣ་ནས་འདོན།།ས་སྐྱ་པ་རྣམས་མཆུ་ནས་བསྒྲགས། །དགེ་ལྡན་མགྲིན་པའི་སྒྲ་གདངས་གཙོ། །བཀའ་བརྒྱུད་གྲེ་ཕུག་བསྒྲིམས་ནས་འདོན། །དགེ་ལྡན་པ་རྣམས་གཞུང་ལམ་རྫོགས་པས་བསྟན་པའི་ལུས་དང་འདྲ། །ས་སྐྱ་པ་རྣམས་མདོ་སྔགས་ཟུང་དུ་འབྲེལ་བས་བསྟན་པའི་མིག་དང་འདྲ། །བཀའ་བརྒྱུད་པ་མོས་གུས་ཉམས་ལེན་ཆིག་དྲིལ་བྱེད་པས་བསྟན་པའི་སྙིང་དང་འདྲ། །རྙིང་མ་པ་ལ་རྒྱུད་སྡེ་དང་སྒྲུབ་སྡེའི་ཟབ་གནད་ཡོད་པས་བསྟན་པའི་སྲོག་དང་འདྲ། །ཞེས་གསུངས་འདུག་པར་བསམ་གཞིག་རེ་གནོངས་དང་། བཀའ་བརྒྱུད་པ་ཟེར་བ་དེ་གང་འདྲ་ཞིག་རེད་འདུག་མཁྱེན་ངེས་ཡིན། ཟུར་དུ་བཏོན་ན། སྒྲུབ་པའི་བཀའ་བབ་བཀའ་བརྒྱུད་པ།སྒོམ་པ་ནན་ཏན་བཀའ་བརྒྱུད་པ། བཀའ་བརྒྱུད་པ་མོས་གུས་ཉམས་ལེན་ཆིག་དྲིལ་བྱེད་པས་བསྟན་པའི་སྙིང་དང་འདྲ། །ཞེས་པ་དག་ལས་ཤེས་ཡོང་བ་ནི། བཀའ་བརྒྱུད་པའི་ཆེད་ལས་རིགས་གཅིག་རྐང་འཛིན་བྱེད་ས་དེ་གང་འདྲ་ཞིག་ཡིན་པ་མཁྱེན་ངེས་སྙམ།

ཡང་གཅིག་ཞུས་ན། སྒྲུབ་པ་ཉམས་ལེན་གྱི་བཀའ་བབ་ཟེར་དུས་ཐོས་བསམ་བྱེད་མི་དགོས་པའི་དོན་མིན། ཐོས་པ་མེད་པའི་སྒོམ་པ་དེ་ལག་རྡུམ་བྲག་ལ་འཛེག་པ་འདྲ་བ་ཡིན་པས། དེས་ཅི་ཡང་མི་ཕན། འོ་ན་ཅི་ཞེ་ན། ལོ་ངོ་དགུ་བཅུ་ཙམ་ཐོས་བསམ་སྔོན་དུ་སོང་ནས་དེ་ཕྱིན་ཆད་སྒྲུབ་པ་ཉམས་ལེན་རྩལ་དུ་བཏོན་ནས་སྒྲུབ་པ་ཉམས་ལེན་ལ་རིགས་གཅིག་རྐང་འཛིན་དང་ཆེད་ལས་པ་གནང་དགོས་པའི་དོན་ཡིན། རི་བོ་དགེ་ལྡན་པ་ལྟ་བུ་ཡིན་ན་རྩོད་པ་དང་ཐོས་བསམ་རྩལ་དུ་བཏོན་ནས་སྒྲུབ་པ་ཉམས་ལེན་ཞར་དང་ཞོར་ལ་གནང་ནའང་འོས་ཤིང་འཚམས་པ་ཞིག་རེད། དེས་རིགས་བསྒྲེས་ནས་ས་སྐྱ་དང་རྙིང་མའི་གྲྭ་བཙུན་རྣམས་ཀྱིས་ཀྱང་རང་རང་གི་བཀའ་བབ་ཆེད་ལས་ལ་འབད་བརྩོན་གནང་དགོས་པ་ཤིན་ཏུ་གལ་ཆེ་སྙམ། མདོ་དོན་ཡང་སྙིང་རང་རང་སོ་སོའི་ས་ནས་གྲྭ་བཙུན་རྣམས་ཀྱིས་ཐོས་བསམ་སློབ་གཉེར་ལེགས་པར་བྱས་ཏེ་ཤེས་ནས་རང་གི་ཆོས་བརྒྱུད་ཀྱི་བཀའ་བབ་ལྟར་རིགས་གཅིག་རྐང་འཛིན་དང་ཆེད་ལས་པ་གནང་རྒྱུ་རྩོམ་འདིའི་ཉིང་དགོས་ཡིན་ལགས།

སྤྱི་ལོ་ ༢༠༡༢ ཟླ་བ་ ༠༣ ཚེས་ ༠༣ ཉིན་སཱ་ར་མཐོ་སློབ་ཏུ་བྲིས།