གཟའ་ཉི་མའི་ཉིན་རྒྱ་གཞུང་གི་དམག་མིས་མཚོ་སྔོན་འབའ་རྫོང་གི་བོད་མི་ཚོར་དྲག་གནོན་བྱས་ཏེ་མི་མང་པོར་རྨས་སྐྱོན་དང་བྱིས་པ་ཞིག་རྐྱེན་ལམ་དུ་བཏང་ཡོད་འདུག་ལ། དེ་རིང་ནས་བཟུང་འབའ་རྫོང་ཐོག་ཏུ་བོད་མི་ཚོ་གང་བྱུང་དུ་འཛིན་བཟུང་བྱེད་མགོ་ཚུགས་ཡོད་འདུག
ཟླ་འདིའི་ཕྱི་ཚེ་ ༡༨ ཉིན་གྱི་སྔ་དྲོའི་བོད་ནང་གི་ཆུ་ཚོད་ ༨ པའི་ཐོག ཨ་མདོ་མཚོ་ལྷོ་འབའ་རྫོང་ཤ་སྦྲང་འཚོ་དྲུག་དང་དགོན་གོང་འོག་གི་སྐྱ་སེར་ ༣༠༠ འབའ་རྫོང་མི་དམངས་སྲིད་གཞུང་གི་ལས་ཁུང་མདུན་ཐང་དུ་འཛོམས་ཏེ། ཕྱི་ཚེས་ ༡༥ ཉིན་ཀྱི་ཞི་རྒོལ་ཁྲོད་ཤིང་ཁྲི་དགོན་པའི་དགེ་འདུན་པ་ ༥༠ ཙམ་འཛིན་བཟུང་བྱས་ཟིན་པ་དེ་དག་འཕྲལ་དུ་ཀློད་གྲོལ་གཏོང་དགོས་པའི་རེ་འདུན་ཞུས་སྐབས། འབྲེལ་ཡོད་ལས་བྱེད་ཚོས་གྲྭ་བ་ཚོ་གང་མགྱོགས་ཀློད་རྒྱུ་ཡིན་ཚུལ་བརྗོད་ཡོད་ཀྱང་། མང་ཚོགས་ཀྱིས་ཉིན་རྒྱབ་བར་བསྒུགས་ཀྱང་ཀློད་གྲོལ་བཏང་མེད་སྟབས། ཉིན་རྒྱབ་ཆུ་ཚོད་ ༢ སྟེང་མང་ཚོགས་སླར་ཡང་རྫོང་སྲིད་གཞུང་སྒོ་མདུན་དུ་འཛོམས་ཏེ་ངོ་རྒོལ་སྐད་འབོད་གནང་ཡོད་པ་དང་། སྐབས་དེར་ཉེན་རྟོག་པ་དང་དམག་མི་ཕོན་ཆེན་འབྱོར་ཏེ་མང་ཚོགས་ཁྲོད་དུག་རླངས་གཏོར་བ་དང་། འགད་རྫས་གཡུགས་ཏེ་མི་མང་པོར་རྨས་སྐྱོན་ཕོག་ཡོད་པ་མ་ཟད། དེའི་ཁྲོད་ཀྱི་མགར་རྩེ་ཞོད་ནས་ཡིན་པའི་བྱིས་པ་ལོ་ ༡༢ ཅན་ཞིག་རྐྱེན་ལམ་དུ་ཕྱིན་ཡོད་པའི་གནས་ཚུལ་ཡང་འདུག
རྨས་མ་རྣམས་རྫོང་སྨན་ཁང་དུ་བསྐྱལ་ཏེ་སྨན་བཅོས་བྱས་སྐབས་ཉེན་རྟོག་པས་སྨན་ཁང་དམ་དྲག་བྱས་ཏེ་མི་གང་བྱུང་སྨན་ཁང་དུ་འགྲོ་སྐྱོད་མི་ཆོག་པའི་བཙན་བཀའ་བཏང་ཡོད་འདུག
དེའི་རྗེས་རྫོང་གཉེན་རྟོག་ལས་ཁུངས་ནས་བཀའ་རྒྱ་ཞིག་བཏང་སྟེ། ཚེས་ ༡༨ ཉིན་ངོ་རྒོལ་ནང་ཞུགས་མཁན་ཚང་མ་འཛིན་བཟུང་བྱ་རྒྱུ་ཡིན་ཚུལ་བསྒྲགས་ཡོད་པ་ལྟར། དེ་རིང་ཚེས་ ༢༠ རྫོང་ཐོག་ཏུ་བོད་མི་མང་པོ་གང་བྱུང་དུ་འཛིན་བཟུང་བྱེད་ཀྱི་ཡོད་འདུག
འབའ་རྫོང་ཐོག་ཏུ་ཡོད་པའི་སློབ་ཆུང་དང་སློབ་འབྲིང་ཁག་ཆ་ཚང་དགོང་པ་སྤྲད་དེ་རང་རང་གི་ཁྱིམ་ཏུ་ལོག་བཅུག་འདུག
ཨོ། ཡང་རྒད་པོས་མིག་གིས་མ་ཟིན་ཐལ། བྱིས་པ་ལོ་བཅུ་གཉིས་ཅན་ཞིག་ལ་བཅོ་རྒྱུ།
རྩོམ་སྒྲིག་པ་ལགས། གནས་ཚུལ་འདིའི་ཁ་བྱང་ལ་བྱིས་པ་ལོ་གཉིས་ཅན་ཞིག་རྐྱེན་ལམ་དུ་ཕྱིན་པ་ཞེས་བཏགས་ན་འོས། འདིའི་ནང་གི་གནས་ཚུལ་གཙོ་བོའམ་ཛ་དྲག་འདི་རེད།
ཁྲིམས་དང་ལུགས་སྲོལ་མེད། ཁྲེལ་དང་ངོ་ཚ་མེད། དངོས་གནས་རྒྱ་ནག་ལ་མི་ཞིག་གི་ཆ་རྐྱེན་གང་ཡང་མི་འདུག་ལ། ད་དུང་རྒྱལ་ཁབ་གཞན་དང་འགྲན་བསྡུར་བྱེད་འདོད་ཀྱི་ཧམ་སེམས་དང་ང་རྒྱལ་གྱིས་ཁེངས་ནས། གལ་ཏེ་རྒྱལ་ཁབ་གཞན་གྱི་གནོན་ཤུགས་མེད་པར་མུ་འཐུད་འདི་ལྟར་བཞག་ན་འབྱུང་འགྱུར་རྒྱལ་ཁབ་ཚང་མས་ད་ལྟའི་བོད་ནང་བཞིན་མྱང་དགོས་ཀྱི་རེད།