བོད་
ཚུར་ཕྱོགས་ནས་ཤ་ཁྲག་འདུས་བྱས་ཀྱི་གཟུགས་པོ་སྣུམ་ནང་ལ་སྦངས་ནས་མེ་ལ་བསྒྲོན་ཞིང་། ཞལ་ནས་རྩ་བའི་བླ་མ་གཙུག་གི་ནོར་བུ་ཞིག་ལ་སྐྱབས་མཇུག་ཞུ་བཞིན་མི་རིགས་ཤིག་གི་འདོད་འདུན་ཤུགས་ཀྱིས་བསྒྲགས་ཏེ་འཚེ་མེད་ཞི་བའི་མེ་ལྕེ་དགུང་ལ་མཆེད། ཕར་ཕྱོགས་སུ་དམག་མིའི་སྐྱེལ་འདྲེན་རླངས་འཁོར་དང་ལྕགས་ཁྲབ་འཐབ་འཁོར་བང་བསྒྲིགས་ཏེ། དྲག་མཚོན་ཐོགས་པའི་དཔུང་ཚོགས་སྔོན་པོ་མཚར་དུ་དངར་བ་ཞིག་ཤ་རྔམ་ཞིང་ཁྲག་ལ་ཞེན་པའི་སྲེད་པའི་མེ་ལྕེ་ལྷབ་ལྷབ་འབར། དྲག་ཏུ་འབར་བའི་མེ་ལྕེ་འདི་གཉིས་ཀྱི་བར་ན་གསར་དུ་འཚར་ལོངས་འབྱུང་བཞིན་པའི་མི་རིགས་ཤིག་གི་མི་རབས་གསར་པ་ཚོའི་སྙིང་ལ་བཟོད་པར་དཀའ་བའི་ཟུག་གཟེར་ལྷོག་ལྷོག་ཏུ་མཆོང་ལྡང་བྱེད་བཞིན་ཡོད།
ང་བརྒྱད་ལོ་དང་གྱ་བརྒྱད་ལོ། ཉིས་སྟོང་བརྒྱད་ལོ་བཅས་སུ་བོད་ནང་དུ་མི་ཚོགས་འདུ་འཛོམ་གྱི་ལས་འགུལ་སྤེལ་བ་དེ་ལ་རིམ་བཞིན་འགྱུར་བ་ཐེབས་ཏེ། ད་ནི་བོད་སྤྱི་བའི་རྩ་དོན་འཐབ་རྩོད་དེ་སྒེར་བའི་ལས་དོན་འགངས་ཆེན་དུ་རྩིས་ཏེ་མི་གཅིག་རེ་གཉིས་རེ་ཁེར་རྒྱུག་གི་སྟ་གོན་བྱས། དེ་སྔ་ཁྲོམ་གཞུང་དུ་ཐོན་ཏེ་རྔམ་རྔམ་རྫིག་རྫིག་གིས་སྐད་འབོད་བྱེད་པའི་འཐབ་རྩོད་བྱེད་སྟངས་དེ་ད་ནི་ལྐོག་ལྐོག་སུད་སུད་ཀྱིས་རང་ལུས་མེར་བསྲེགས་གཏོང་བའི་ངོ་བོར་འཕེལ། འདས་པའི་མི་ལོ་ལྔ་བཅུར་རང་དབང་རང་བཙན་དང་ཐོབ་ཐང་འདྲ་མཉམ་ཀྱི་དགོས་འདུན་སྣ་མང་བཏོན་པ། ད་ནི་༧གོང་ས་མཆོག་བོད་དུ་གདན་འདྲེན་ཞུ་དགོས་པའི་འབོད་སྒྲ་གཅིག་ལ་རྡོག་ཏུ་དྲིལ་ཞིང་། སྐད་ཡིག་བེད་སྤྱོད་རང་དབང་གི་རྩ་དོན་ཞིག་ལ་དངོས་འབེབས་བྱས།
བོད་ནང་དུ་འདི་ལས་ཚད་མཐོ་བའི་འཚེ་བ་མེད་པའི་ལས་འགུལ་ཞིག་སྤེལ་ཐབས་མེད་ལ། འདི་ལས་རིན་ཐང་ལྡན་པའི་རྩ་དོན་འཐབ་རྩོད་ཀྱི་རྣམ་པ་ཞིག་མངོན་སྟངས་མེད། བོད་ནང་བདེན་པའི་ཨུ་ཚུགས་ཀྱིས་མདུན་བསྐྱོད་བྱས་ན་དྲག་དམག་གི་མེ་མདས་དམར་གསོད་གཏོང་ངེས་ཡིན་ལ། མ་ཤི་བར་གྱི་ཟས་བཅད་ངོ་རྒོལ་གནང་ན་དེ་མ་ཐག་བཙོན་འཇུག་མནར་གཅོད་གཏོང་ངེས་ཡིན། འཛམ་གླིང་འདིར་ཚེ་སྲོག་གིས་བདེན་པ་བརྡར་ཞིང་ལུས་ཕུང་གིས་སྒྲོན་མེ་སྦར་མཁན་བོད་པ་དང་ཤོས་མིན་ཡང་བོད་མི་མང་ཤོས་ཡིན་སྲིད་ལ། ད་ནི་བོད་པའི་འཐབ་རྩོད་ཀྱི་ངོ་བོ་དེ་འཚེ་མེད་ཞི་བའི་སྤྱོད་པ་དང་བདག་གཞན་མཉམ་བརྗེའི་སྒོམ་པ་གཉིས་ཀྱི་དྭངས་རྩེར་སོན་ཡོད་ལ། ཐོག་མའི་ལྟ་སྟངས་དང་བར་གྱི་མཉམ་ཞགས། ཐ་མའི་རྗེས་ཐོབ་གསུམ་མངོན་དུ་བྱས་ཏེ་བཟོད་པའི་ལས་ཀྱི་ཕ་མཐར་བསླེབས་ཡོད།
རྒྱ་གཞུང་གིས་ད་དུང་ཡིད་ཚིམ་པའི་ཨ་ལན་བརྡ་ལན་གང་ཡང་མ་སྤྲད་ཚེ། འགྲོ་བ་མིའི་རིགས་ཀྱི་བཟོད་སྒོམ་ལ་ཚད་ཡོད་པ་བཞིན། ནམ་ཞིག་ཐུ་བྷོད་བཙན་པོའི་མི་རྒྱུད་འདིའི་བཟོད་སེམས་ལའང་ཚད་ཡོད་ངེས་པས། བཟོད་པ་ཆེན་པོ་འདི་ཟད་མཚམས་སུ་ཨེ་ཤ་ཡའི་ཤར་ཕྱོགས་སུ་ཡ་ང་ཞིང་སྐྱུ་གཡའ་བའི་གནས་ཚུལ་གང་འདྲ་ཞིག་འབྱུང་མིན་སུས་ཀྱང་ཚོད་དཔག་བྱེད་དཀའ་ལ། སྐབས་དེར་བོད་མི་ཚོས་བྱང་ཆུབ་སེམས་མཆོག་སྐྱོར་མཚམས་བཞག་སྟེ། ཞེ་གཏིང་ནས་ཚད་མེད་ཡོན་ཏན་ཟློས་ཏེ་རིང་ནས་སྙིང་དུ་བརྣག་པའི་འདོད་དོན། ཡོངས་རྫོགས་བོད་ལྗོངས་རང་དབང་གཙང་མའི་དཔལ་ལ། ལྷུན་འགྲུབ་ཆོས་སྲིད་ཟུང་འབྲེལ་དགའ་སྟོན་ལ་སྤྱོད་པའི་སྐལ་བཟང་རྩོད་ངེས་ཡིན་ལ་འཐོབ་ངེས་ཀྱང་ཡིན་ནོ།།
