བོད་ཀྱི་ཞོ་སྟོན་ཐེངས་བཅུ་བདུན་པ་དེ་བཞུགས་སྒར་ཟློས་གར་ཐང་ཆེན་དུ་ཚོགས་ཏེ། ཁ་སང་མཇུག་བསྡོམས་མཛད་སྒོའི་ཐོག་རྒྱལ་བ་ཀརྨ་པ་མཆོག་གིས་བོད་ཀྱི་ཛ་དྲག་གི་གནས་སྟངས་ཐོག་རང་དབང་ལུང་པར་ཡོད་པའི་བོད་མི་ཚོས་འབད་བརྩོན་བྱ་རྒྱུ་དང་། བོད་པའི་སྲོལ་རྒྱུན་ལྷ་མོའི་ཟློས་གར་དེ་དེང་རབས་ཀྱི་སྡིངས་ཆའི་ཐོག་འགྲོ་ཐུབ་ཆེད་གསར་གཏོད་ཐོག་བསམ་བློ་གཏོང་དགོས་སྐོར་གསུངས་སོང་།
ཟླ་འདིའི་ཕྱི་ཚེས་ ༢༠ ཉིན་ངྷ་རམ་ས་ལའི་བོད་ཀྱི་ཟློས་གར་ཚོགས་པའི་ཐང་ཆེན་དུ་བཙན་བྱོལ་བོད་མིའི་ས་གནས་ཁག་ ༦ གི་ཟློས་གར་ཚོགས་པ་ལྷན་འཛོམས་ཐོག བོད་ཀྱི་ཞོ་སྟོན་ཐེངས་ ༡༧ པ་ཚོགས་ཡོད་པ་ལྟར། ཁ་སང་ཕྱི་ཚེས་ ༢༦ ཉིན་གྱི་མཐའ་མའི་མཇུག་བསྡོམས་མཛད་སྒོའི་ཐོག་དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་དམིགས་བསལ་སྐུ་མགྲོན་དུ་གདན་འདྲེན་ཞུས་ཤིང་། གཞན། བཀའ་བློན་ཁྲི་པ་བློ་བཟང་སེང་གེ་མཆོག་གིས་གཙོས་པའི་བཀའ་བློན་རྣམ་པ། སྤྱི་འཐུས་རྒྱུན་ལས་དང་ལྷན་ཁང་ཁག་གི་དྲུང་ཆེ། ཕྱོགས་མཐའ་ཁག་ནས་ཕེབས་པའི་ཟློས་གར་ཚོགས་པའི་འཁྲབ་སྟོན་པ་དང་སེར་སྐྱ་མི་མང་བཅས་མི་ ༢༠༠༠ བརྒལ་བ་འདུ་འཛོམས་བྱུང་འདུག
ཁ་སང་ཉིན་མཐའ་མའི་སྔ་དྲོ་བོད་ཀྱི་ཟློས་གར་ཚོགས་པས་འཁྲབ་གཞུང་ ༼སྣང་ས་འོད་འབུམ༽ འཁྲབ་སྟོན་གནང་གྲུབ་རྗེས། རྒྱལ་བ་ཀརྨ་པ་མཆོག་གིས་ཕྱོགས་མཐའ་ཁག་ནས་ཕེབས་པའི་ལྷ་མོ་བ་རྣམས་ལ་བོད་ཀྱི་ལྷ་མོའི་སྒྱུ་རྩལ་མི་ཉམས་རྒྱུན་འཛིན་གྱི་ཐད་ལ་རླབས་ཆེན་གྱི་བྱས་རྗེས་བཞག་པར་བསྔགས་བརྗོད་དང་འབྲེལ། བོད་ནང་གཞོན་སྐྱེས་མང་པོ་ཞིག་གིས་བོད་མི་རིགས་ཀྱི་ཆོས་དང་རིག་གཞུང་སྲུང་སྐྱོབ་ཆེད་རང་ལུས་མེར་བསྲེགས་ཀྱི་ལས་འགུལ་སྤེལ་བཞིན་པའི་ཛ་དྲག་གི་སྐབས་འདིར། རང་དབང་ལུང་པའི་བོད་མི་ཚོས་བསྐྱར་དུ་བསམ་བློ་གཏོང་རྒྱུ་དང་སེམས་འཁུར་སྐྱེད་དགོས་པའི་དུས་ལ་བསླེབས་ཡོད་ཚུལ་དང་། མ་འོངས་པར་མི་རབས་རིམ་བརྒྱུད་ཀྱིས་བོད་སྤྱི་བའི་ལས་དོན་ཐོག་སེམས་ཁུར་དང་ཆོས་དང་རིག་གཞུང་སྲུང་སྐྱོབ་ཀྱི་ལས་འགུལ་མཚམས་མ་ཆད་པར་སྤེལ་དགོས་པའི་སྐོར་སོགས་བཀའ་སློབ་གནང་སོང་།
སྐབས་དེར་རྒྱལ་བ་ཀརྨ་པ་མཆོག་གི་བོད་ཀྱི་ཛ་དྲག་གནས་སྟངས་ཐད་གསུང་གནང་དོན། “ ད་ལྟའི་དུས་འདིར་བོད་ཀྱི་གནས་སྟངས་དེ་ཧ་ཅང་ཛ་དྲག་གི་སྐབས་ཤིག་ཆགས་ཡོད་པ་རེད། ང་ཚོའི་བོད་རིགས་སྤུན་ཟླ་མང་པོ་ཞིག་གིས་གཅེས་པའི་སྲོག་དང་རྩ་ཆེའི་སྐུ་གཟུགས་བློས་གཏོང་བྱས་ཏེ། བོད་མི་རིགས་དང་བོད་མི་རིགས་ཀྱི་ཆོས་དང་རིག་གཞུང་སྲུང་སྐྱོབ་ཆེད་ལས་འགུལ་མེ་འབར་བཞིན་པའི་སྐབས་ཤིག་ཆགས་ཡོད་སྟབས། འདི་འདྲའི་སྐབས་སུ་ང་ཚོ་རང་དབང་ལུང་པའི་ནང་ཡོད་པའི་བོད་པ་མི་རེ་ངོ་རེས་ཀྱང་། དུས་ཚོད་འདིར་བསམ་བློ་ཡང་བསྐྱར་གཏོང་དགོས་པ་ཞིག་དང་སེམས་ཤུགས་སྐྱེད་དགོས་པའི་དུས་ཚོད་ཅིག་བསླེབས་ཡོད་པ་རེད་བསམ་གྱི་ཡོད། ང་རང་གི་ངོས་ནས་བོད་ཀྱི་ཤི་གསོན་གྱི་དཀའ་ངལ་སེལ་ཐབས་ལ་སྐད་འབོད་ཙམ་དང་། ཉིན་ཤས་རིང་ངོ་རྒོལ་བྱས་པ་ཙམ་གྱིས་གནད་དོན་ཐག་གཅོད་ཐུབ་རྒྱུ་རེད་དྲན་གྱི་མེད། ང་ཚོ་བོད་པ་མི་རེ་ངོ་རེས་མུ་མཐུད་བོད་སྤྱི་བའི་གནད་དོན་ལ་སེམས་ཁུར་བྱ་རྒྱུ་དང་། བོད་ཀྱི་ཆོས་དང་རིག་སྲུང་སྐྱོབ་ཀྱི་ལས་འགུལ་མུ་མཐུད་སྤེལ་རྒྱུ་ཧ་ཅང་གལ་ཆེན་པོ་རེད” ཅེས་གསུངས་བྱུང་།
ཡང་རྒྱལ་བ་ཀརྨ་པ་མཆོག་གིས་མ་འོངས་པར་ཟློས་གར་སྒྱུ་རྩལ་གྱི་ལམ་ནས་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་བྱ་དགོས་པའི་སྐོར་ལ་གསུངས་དོན“ ང་ཚོའི་བོད་ཀྱི་ཆོས་དང་རིག་གཞུང་གི་མ་རྩ་སྐད་ཡིག་ལ་ཐུག་ཡོད་ལ། སྐད་ཡིག་སྲུང་སྐྱོབ་དེ་གལ་ཆེ་ཤོས་ཆགས་ཡོད། དེ་མེད་པ་ཡིན་ན་ཆོས་དང་རིག་གཞུང་སྲུང་སྐྱོབ་ཅེས་པ་དེ་ཡོང་རྒྱུ་མེད་པའི་སྐད་ཆ་ཞིག་ཡིན། སྐད་ཡིག་སྲུང་བྱེད་པ་ལ་ཕན་ཐོགས་ཆེ་ཤོས་ཟློས་གར་དང་སྒྱུ་རྩལ་དར་སྤེལ་བྱ་རྒྱུ་དང་། དེས་སོ་སོའི་མི་རིགས་ཀྱི་སྐད་ཡིག་སྲུང་སྐྱོབ་ལ་ནུས་པ་ཆེན་པོ་འཐོན་ཐུབ་ཀྱི་ཡོད་པ་མཁས་པ་ཚོས་འདོད་ཀྱི་ཡོད་པ་རེད། སོ་སོའི་མི་རིགས་ཀྱི་ཆོས་ལུགས་སྲུང་སྐྱོབ་བྱེད་མཁན་ཚོས་ཀྱང་། ཆོས་ལུགས་བརྒྱུད་དེ་མི་རིགས་ཀྱི་སྐད་ཡིག་དང་རིག་གཞུང་སྲུང་སྐྱོབ་བྱེད་ཐུབ་པའི་སྐོར་གསུང་གི་ཡོད་སྟབས། བོད་ཀྱི་སྐད་ཡིག་སྲུང་སྐྱོབ་བྱ་བར་བོད་ཀྱི་ཟློས་གར་དེ་ཧ་ཅང་གལ་ཆེན་པོ་ཆགས་ཡོད། དེ་ཡང་གནའ་སྔ་མོ་ནས་བརྒྱུད་བསྡད་པའི་སྲོལ་རྒྱུན་གྱི་ཟློས་གར་ཁོ་ན་མ་ཡིན་པར། དེང་དུས་ཀྱི་འཛམ་གླིང་སྡིངས་ཆའི་ཐོག་འགྲོ་ཐུབ་པར་མིག་དཔེ་ལྟ་ས་དང་སྣོན་འཕྲི་བྱ་རྒྱུ་ག་རེ་ཡོད་མེད་བཅས་ཀྱི་ཐོག་ཐུགས་འཁུར་བཞེས་ཏེ། གསར་གཏོད་དང་ཡར་རྒྱས་ཀྱི་རྣམ་པའི་ཐོག་བསྐྱོད་རྒྱུ་གལ་ཆེན་པོ་རེད” ཅེས་གསུངས་བྱུང་།
བཙན་བྱོལ་བོད་མིའི་ཟློས་གར་ཚོགས་པ་ཁག་ལྷན་འཛོམས་ཀྱིས་ཞོ་སྟོན་སྲུང་གཙི་བྱེད་པའི་ལམ་སྲོལ་ཏེ་ ༡༩༩༣ ལོ་ནས་མགོ་འཛུགས་གནང་ཡོད་ཅིང་། ད་ལྟའི་བར་ས་གནས་རེ་མོས་ཀྱིས་ཚོགས་བཞིན་ཡོད་འདུག་ལ། ཐེངས་འདིའི་ཞོ་སྟོན་ཐེངས་ ༡༧ པ་དེ་བཞུགས་སྒར་དུ་ཚོགས་ཏེ། ཟླ་འདིའི་ཕྱི་ཚེས་ ༢༡ ཉིན་དབུ་འཛུགས་ཀྱིས་ཀ་སྦུག་ལྷ་མོ་ཚོགས་པས་ ༼པདྨ་འོད་འབར༽འཁྲབ་སྟོན་དང་། བལ་ཡུལ་ལྷ་མོ་ཚོགས་པས་༼ དྲི་མེད་ཀུན་ལྡན༽ ཨོ་རི་ས་ལྷ་མོ་ཚོགས་པས་༼འགྲོ་བ་བཟང་མོ ༽སྦེལ་ཀོབ་ལྷ་མོ་ཚོགས་པས་༼གཟུགས་ཀྱི་ཉི་མ༽མོན་གྷོ་ལྷ་མོ་ཚོགས་པས་༼ ནོར་བཟང་༽ བོད་ཀྱི་ཟློས་གར་ཚོགས་པས་ ༼སྣང་ས་འོད་འབུམ༽་བཅས་འཁྲབ་སྟོན་གནང་ཡོད།
གསར་འགོད་པ། དོན་གོ
འགྱུར་མེད་ཅན་ཁྱོད་ལ་དོན་ངོ་མའི་གྲུབ་འབྲས་ཟེར་བ་ཅི་འདྲ་ཞིག་དགོས་ཀྱི་འདུག ཁྱོད་ཀྱི་ལག་པ་དངུལ་སྤྲད་མཁན་ཞིག་བྱུང་ན་ད་གཟོད་དོན་ངོ་མའི་གྲུབ་འབྲས་ཟེར་བ་ཨེ་ཡིན། བོད་ནང་གི་རྒྱ་ཆེ་མང་ཚོགས་ལ་༸ཡིད་བཞིན་ནོར་བུའི་བཀའ་སློབ་གནང་ཐེངས་གཅིག་གི་གྲུབ་འབྲས་ཇི་ཡོད་དང་དེའི་བཀའ་དྲིན་དྲན་ཨེ་མྱོང་། རྒྱ་ནག་གུང་ཁྲན་གྱི་བླ་སྲོག་བཅད་ཟིན་པའི་མི་རིགས་ཤིག་ལ་སླར་ཡང་རང་གི་མི་རིགས་ཆེད་ལུས་སྲོག་བློས་གཏོང་བའི་དཔའ་སྟོབས་འདི་ཇི་ལྟར་བྱས་ནས་བྱུང་བ་ཨེ་ཤེས། གོམ་པ་རིམ་སྤོས་ཀྱི་རང་གི་མི་རིགས་འདི་འགྱེལ་ས་ནས་ལངས་ཐུབ་པའི་རྨང་གཞི་གཏིང་ནས་ད་ལྟར་དཔའ་སྐད་འཐེན་ཐུབ་པ་འདི་༸ང་ཚོའི་བླ་ན་མེད་པའི་དབུ་ཁྲིད་ཁོང་གི་བླ་ན་མེད་པའི་རྣམ་དཔྱོད་ཡིན་པ་ཐའི་ཝོན་གྱི་སྲིད་འཛིན་ཟུར་པ་ལི་ཏུང་ཧོ་ཡིས་བཤད་ཡོད་ཁྱོད་ཀྱིས་ཨེ་ཤེས། དངོས་གནས་རྣམ་དཔྱོད་ཀྱིས་ཡོངས་སུ་སྟོང་བ་མ་ཡིན་ནམ།
སྐུ་སྒེར་ཡིག་ཚང་གི་ཕྱི་རྒྱལ་གཞུང་ཚབ་ཁག་ལ་འགྲོ་སོང་བཏང་བ་དང་ཀརྨ་བླ་བྲང་གིས་བཀའ་བརྒྱུད་སྨོན་ལམ་ལ་འགྲོ་སོང་བཏང་བ་དེ་ཚོས་བོད་མི་རིགས་ཆོས་རིགས་སྲུང་སྐྱོབས་ལ་ཕན་གྱི་རེད་ཟེར་ནས་བཤད་ན་ངོ་བསྟོད་ཀྱི་དབང་དུ་བྱ་ན་འགྲིག་ཀྱང་དོན་ངོ་མའི་གྲུབ་འབྲས་ཀྱི་ཐོག་ནས་བཤད་ན་ཁག་པོ་རེད།
ཀརྨ་པ་རིན་པོ་ཆེ་ནི་ང་ཚོ་བོད་ཀྱི་བླ་ཆེན་ཞིག་ཡིན་པར་མ་ཟད་རྣམ་དཔྱོད་ལྡན་པའི་བླ་མ་ཞིག་ཀྱང་། འགྱུར་མེད་བསྟན་འཛིན་ཅན་ནས་ཡིག་ཚང་དང་བླ་བྲང་ནས་རྒྱུ་གཏོང་ཤོག་ཟེར་བ་ནི་མི་ཤེས་པའི་རྟགས་རང་རེད། ད་བར་བོད་སྤྱི་མང་གཉིས་ཀ་༸གོང་ས་མཆོག་གིས་རྒྱུ་གནང་ནས་གསོ་བ་རེད། སློབ་གྲྭ་ཆེས་མང་པོ་ཇི་འདྲ་བྱུང་བ་རེད། ཚོགས་སྡེ་ཁག་ཆེས་མང་པོ་འདི་ཇི་ལྟར་བྱུང་བ་རེད། ཐ ན་ལོ་རེའི་ཕྱི་རྒྱལ་དོན་གཅོད་ཁག་ཏུ་འགྲོ་སོང་ཇི་ཙམ་ཡིན་པ་ཨེ་ཤེས། ཐའི་ཝོན་དོན་གཅོད་ཐོག་མར་འཛུགས་དུས་ཐའི་སྒོར་ས་ཡ་ཉི་ཤུ་ཐའི་གཞུང་ལ་བཞག་དགོས་པ་སུས་བཞག་འདུག ༸གོང་ས་མཆོག་ཐོག་མར་ཐའི་ཝོན་ལ་ཕེབས་སྐབས་དད་ལྡན་རྣམས་ནས་ཕུལ་བ་དེ་ཐའི་ཝོན་དུ་ནང་པའི་མཐོ་སློབ་འཛུགས་འཆར་ལ་བཞག་པ་ཨེ་ཤེས། ང་ཚོའི་གདན་སའི་སློབ་གཉེར་བ་ལག་པར་གང་ཡང་མེད་པ་དག་ལ་ཟླ་རེ་ཞལ་ལག་དོད་རྒྱ་གར་སྒོར་ཇི་ཙམ་གནང་བ་ཨེ་ཤེས། ཐ་ན་གོས་གོན་རྒྱུ་ཚད་ཆད་གནང་ནས་སློབ་གཉེར་བ་ཚོགས་བགད་པོ་གནང་། རྒྱུགས་ལེན་ནས་བདག་པོ་གནང་བ་ཨེ་ཤེས། ད་དུང་ད་དུང་་་་་་་་་་་་་་་་་་་་་་་་་་་་་་་་་་་
ལོ་གཞོན་བླ་ཆེན་གྱིས་བསམ་བློ་གཏོང་མི་ཤེས་པའི་དུས་ལ་སླེབས་འདུག
སྤྱི་འཐུས་ཚོགས་གཙོ་པན་པ་ཚེ་རིང་མཆོག་གིས་མི་ཡོད་མཁན་གྱིས་མི་གཏོང་རྒྱུ་མཁན་གྱིས་རྒྱུ་གཏོང་ནས་བོད་སྤྱི་བའི་དོན་ལས་དོན་སྒྲུབ་དགོས་གསུངས་པ་བཞིན་སྐུ་སྒེར་ཡིག་ཚང་དང་ཀརྨ་པ་བླ་བྲང་དང་ཚོང་པ་ཆེ་ཁག་གིས་རྒྱུ་ལ་སེར་སྣ་མི་བྱ་བ་བོད་མི་རིགས་ཀྱི་ཆོས་རིགས་དང་རིག་གཞུང་སྐད་ཡིག་གཅེས་ཉར་ཐོག་ལ་རྒྱུ་གཏོང་སློབ་གྲྭ་དང་གྲྭ་ས་ཁག་ནས་མི་གཏོང་དེ་འདྲའི་ནུས་པ་མཉམ་རུབ་ཐོག་ནས་ལས་ཀ་བྱ་ན་དེ་དགོངས་ཚུལ་འདི་སྒྲུབ་ཐུབ་པར་རེད།
གཞན་ཚིག་སྐམ་པོས་གང་ཡང་བྱ་ཐུབ་པ་མ་རེད་དོན་ལག་ལེན་ཐོག་ལ་བབ་དགོས་བ་རེད།
ལྷ་མོ་འཁྲབ་གཞུང་ནི་བོད་ཀྱི་ཐུན་མོང་མ་ཡིན་པའི་འཁྲབ་རྩལ་ཡིན་པ་ནི་འཛམ་བུ་གླིང་ཀུན་གྱིས་མཁྱེན་བཞིན་པ་མ་ཟད། གོང་ས་མཆོག་གིས་ཀྱང་དུས་རྟག་ཏུ་གསུངས་བཞིན་ཡོད། བྱས་ཙང་། བོད་ཀྱི་ཐུན་མིན་གྱི་ཁྱད་ཆོས་གཅེས་ཉར་དང་དེང་དུས་དང་མཐུན་པའི་འགྱུར་བ་གཏོང་དགོས་པ་ནི་བོད་མི་ཀུན་གྱིས་འགན་ཞིག་ཡིན། བྱས་ཙང་ཀརྨ་པ་མཆོག་གིས་གསུངས་པ་དེ་དེ་བཞིན་ནོ་ཟེར་རྒྱུ་ཡིན།
རྒྱལ་དབང་ཀརྨ་པ་མཆོག་གིས་ད་ལྟའི་དུས་འདིར་བོད་ཀྱི་གནས་སྟངས་དེ་ཧ་ཅང་ཛ་དྲག་གི་སྐབས་ཤིག་ཆགས་ཡོད་ཅེས་དང་། ཡང་ང་ཚོའི་བོད་རིགས་སྤུན་ཟླ་མང་པོ་ཞིག་གིས་གཅེས་པའི་སྲོག་དང་རྩ་ཆེ་བའི་ཚེ་སྲོག་བློས་གཏོང་བྱས་ཏེ། རང་རིགས་ཀྱི་ཆོས་དང་རིག་གནས་སྲུང་སྐྱོབ་ཆེད་ལས་འགུལ་མེ་འབར་བཞིན་པའི་སྐབས་སུ་ང་ཚོ་རང་དབང་ལུང་པའི་ནང་ཡོད་པའི་བོད་པ་མི་རེ་ངོ་རེས་ནས་ཀྱང་བསྐྱར་དུ་བསམ་མནོ་གཏོང་དགོས་སྐོར་གསུངས་པ་དེ་ཡི་རང་དང་བསྔགས་བརྗོད་ཡོད་ལ། མ་ཟད་བཀའ་སྤྱི་ལས་བྱེད་རྣམས་ཀྱི་སེམས་ལ་དེ་འདྲ་མང་པོ་མིན་ཐེངས་མ་རེ་གཉིས་ཙམ་སྐྱེ་བའི་སྐབས་ཅིག་ཨི་ཡོད་ན་ཞེས་དྲན་གྱིན་འདུག
བསམ་བློ་བསྐྱར་དུ་གཏོངས་ཟེར་བ་ནི་མིི་ལོ་ལྔ་བཅུ་ནང་གི་ཆབ་སྲིད་ཀྱི་གྲུབ་འབྲས་ཚང་མ་ཕྱོགས་སྡོམ་བྱ་ནས་དེང་སང་ཛ་དྲག་གི་རང་ལུས་མེར་བསྲེགས་ཀྱི་ངོ་བོ་དེ་གང་འདྲ་འགྱུར་མིན་དེ་བསམ་བློ་ཡང་བསྐྱར་གཏོང་ནས་བསྐྱར་ཞིབ་བྱ་དགོས་ཟེར་བའི་གོ་དོན་ཡིན་སྙམ།
༸དཔལ་རྒྱལ་དབང་ཀརྨ་པ་སྐུ་ཕྲེང་བཅུ་བདུན་པ་མཆོག་གིས་”དུས་ཚོད་འདིར་བསམ་བློ་ཡང་བསྐྱར་གཏོང་དགོས་པ་ཞིག་དང་སེམས་ཤུགས་སྐྱེད་དགོས་པའི་དུས་ཚོད་ཅིག་བསླེབས་ཡོད་པ་རེད་བསམ་གྱི་ཡོད།”ཅེས་བཀའ་སློབ་ནན་མོ་ཞིག་བརྩལ་བ་འདི་ནི་ངེས་དོན་གྱི་བཀའ་ཞིག་ཡིན་ལ། དམིགས་བསལ་གྱི་གོ་དོན་ཞིག་ཡོད། བཀའ་སློབ་དེའི་ཆེད་དུ་བྱ་བའི་གདུལ་བྱ་འདི་རེད་ཅེས་མཛུབ་མོ་ཕྱི་ལ་འཛུགས་མི་དགོས་པར་རང་ཉིད་ཀྱི་བྲང་གཞུང་ན་གཏོད་རྒྱུ་དེ་ནི་གཞུང་དམངས་གཉིས་ཀ་དང་། ལྷག་དོན་ཆབ་སྲིད་ཀྱི་སྣེ་ཁྲིད་པ་དག་གི་ཐུགས་གསན་མཛོད། བསམ་བློ་ཡང་སྐྱར་དང། མཛོ་ར་ཡང་བཀུག་ཅིག་མེད་ན་འདི་དང་འདི་ལྟ་བུའི་ལམ་བུ་ནི་འཇིགས་རུང་གི་གཡུལ་ས་ཞིག་ཏུ་འགྱུར་བཞིན་ཡོད་པ་སོགས་མངོན་གསལ་རེད།
མི་རིགས་ཀྱི་རིག་གཞུང་སྲུང་སྐྱོབ་བྱེད་པར་ཁ་བཤད་ཙམ་གྱིས་མི་ཕན་པ་བདེན་པ་ཡིན། ཡིན་རུང་མི་ཕལ་བ་ཞིག་གིས་ཁ་བཤད་ནི་ཁ་བཤད་ཙམ་ལས་མ་འདས་པས། དེ་ལ་ལག་ལེན་གྱི་དོན་ཚང་བཀའ་ཡང་། ༧དཔལ་རྒྱལ་དབང་ཀརྨ་པ་ལྟ་བུ་སྐྱེས་ཆེན་ཚོས་བཀའ་སློབ་འདི་ནི་ལས་འགུལ་རང་ཡིན་པ་རེད། དེས་ན་དྲ་གྲོགས་རྣམ་པས་དབྱེ་གསལ་འདི་ཤེས་དགོས་པ་དང་། ༧དཔལ་རྒྱལ་དབང་ཀརྨ་པ་ལ་བཀའ་སློབ་ཟབ་རྒྱས་ཕེབས་བཀའ་དྲིན་ཆེ་ཞུས་པ་ཡིན།།
ཀརྨ་པ་མཁྱེན་ནོ།
ཀརྨ་པ་མཁྱེན་།
ཀརྨ་པ་མཁྱེན་ནོ།
ཀརྨ་མཁྱེན་ནོ།
ཁྱེད་ནི་བླ་མ།
ཁྱེད་ནི་ཡིད་དམ།
ཁྱེད་ནི་ཆོས་སྐྱོངས།
རྒྱལ་གཅེས་དཔའ་བོ་འཇམ་དཔལ་ཡེ་ཤེས་རང་ལུས་མེ་ལ་བསྲེགས་ནས་ད་ལྟ་རང་གྲོང་འདུག
འདི་བར་དོའི་འཇིགས་སྣང་ལས་གྲོལ་བའི་ཐུགས་སྨོན་གནང་རོགས།
ཀརྨ་མཁྱེན་ནོ།
བོད་མི་རིགས་ཀྱི་རིག་གནས་དང་གོམས་གཤིས་སོགས་ཡིག་ཐོག་དང་ངག་ཐོག་་རྐྱང་རྐྱང་གིས་ཡར་རྒྱས་གཏོང་དགོས་རབས་དང་རྒྱུན་འཛིན་གོང་སྤེལ་གཏོང་དགོས་རབས་བཤད་བསྡད་ན་གཏན་ནས་ཕན་ཀི དངོས་གནས་བཤད་ན་ད་ལག་ལེན་དུ་སྟེར་རྒྱུ་གཞན་ལས་ལྷག་མི་འདུག་བསམ།
རིག་གཞུང་ནི་ནམ་ཡང་མི་རིགས་དང་ཁ་འབྲལ་མི་རུང་ཞིང་། དེ་ཡང་སྐར་ཆ་ཙམ་ལའང་འཇོག་མི་རུང་བ་ཞིག་ཡིན། དཔེར་ན་ཆབ་སྲིད་ཀྱི་ལས་འགུལ་སྤེལ་ལོས་དགོས་ཀྱང་། དེ་དང་མཉམ་དུ་དུས་ཚིགས་དང་རིག་གཞུང་ཡང་འདོར་མི་ཉན་པ་རེད། དེ་ནི་མིའི་འཚོ་འདི་ནམ་ཡང་རྙོག་འཛིངས་དང་དཀའ་ངལ། ལོ་རྒྱུས་ལྡན་པ་ཞིག་ཡིན་པས་རེད།
ལྷ་མོ་ཚོགས་པའི་ནང་དུ་ཁམས་དང་ཨ་མདོའི་མི་ཞིག་གཏན་ནས་མེད་པ་ལྟ་བུ་རེད། འདི་ག་རེ་བྱས་ནས་རེད་དམ། ལྷ་མོ་ཚོགས་པས་བོད་བསྟན་སྲིད་ལ་ཕན་བཞག་པ་གང་འདུག་གམ། དེའི་རིག་གཞུང་འདི་མེད་ན་ཐབས་ཆག་འགྲོ་བ་གང་འདུག བོད་ཕྱི་ནང་གཉིས་ནས་རང་ལུས་མེར་བསྲེགས་ཀྱིས་ངོ་རྒོལ་བྱེད་ཀྱིན་ཡོད་པ་རེད། འོན་ཀྱང་ལྷ་མོ་ཚོགས་པས་གཞས་དང་ཞབས་བྲོ་བརྒྱབ་ནས་གནམ་འཕག་ས་ཡལ་རེད། ད་དུང་ལྷ་མོ་ཟེར་བ་འདི་ནི་གུང་ཁྲན་ཏང་གིས་ལྷ་ས་ལ་མཛད་སྒོ་ཞིག་མ་ཚོགས་ན་མ་གཏོགས་འཁྲབ་རྒྱུ་ཞིག་རེད་འདུག བསམ་རྣོ་ཐོངས།