རང་ལུས་མེར་བསྲེགས་ནི་འཐབ་རྩོད་ཀྱི་ཐབས་ལམ་ཞིག་ལས་རེ་ཆད་ཀྱི་བྱ་སྤྱོད་ཅིག་མ་རེད།

ཉེ་ཆར་ཧྥ་རན་སིའི་གསར་འགོད་པ་ཨུ་སུ་ལཱ་ལགས་མདོ་སྨད་རེབ་གོང་སོགས་སུ་བསྐྱོད་དེ། བོད་ནང་རང་ལུས་མེར་བསྲེགས་མུ་མཐུད་འབྱུང་བཞིན་པའི་རྒྱུ་རྐྱེན་དང་དམིགས་ཡུལ་སོགས་ཀྱི་ཐད། བོད་ནང་གི་ས་གནས་མང་ཚོགས་དང་དགེ་རྒན། རྩོམ་པ་པོ་སོགས་ལ་བཅར་འདྲི་བྱས་ཏེ་བོད་ནང་གི་དངོས་ཡོད་གནས་སྟངས་རྒྱུས་ལོན་བྱས་འདུག 

ཉེ་ཆར་ཧྥ་རན་སིའི་༼ལྟ་ཞིབ་གསར་བ༽ཞེས་པའི་དུས་དེབ་ཀྱི་གསར་འགོད་པ་ཨུ་སུ་ལཱ་ལགས། བོད་མདོ་སྨད་རེབ་གོང་དང་ཟི་ལིང་སོགས་སུ་བསྐྱོད་དེ་བོད་ནང་གི་གནས་ཚུལ་རྒྱུས་ལོན་བྱུང་པ་ལྟར་ན། རང་ལུས་མེར་བསྲེགས་གནས་སྟངས་སྔར་ལས་ཇེ་མང་དུ་སོང་བ་དང་བསྟུན་ནས། རྒྱ་གཞུང་གིས་བཀག་སྡོམ་དྲག་གནོན་བྱེད་ཤུགས་ཀྱང་ཉིན་རེ་བཞིན་ཆེ་རུ་བཏང་ཡོད་པ་དང་།  ཕྱིའི་རྒྱལ་ཁབ་ཀྱི་གསར་འགོད་པ་རྣམས་བོད་ཀྱི་ས་ཁུལ་དང་རྒྱང་ཐག་སྤྱི་ལེ་ ༡༠༠ ལྷག་གིས་ཆོད་པའི་ས་མཚམས་སུ་བཀག་འགོག་བྱས་ཡོད་པ་མ་ཟད། རྒྱ་ནག་ནང་ཁུལ་གྱི་གསར་ཁང་དག་གིས་ཀྱང་གཞུང་འབྲེལ་ཞིན་ཧྭ་གསར་ཁང་གི་གནས་ཚུལ་ཁོ་ན་བརྒྱུད་འགོད་བྱེད་དགོས་ཀྱི་ཡོད་འདུག དེ་བཞིན། བོད་ནང་གི་དྲ་རྒྱ་ཡོངས་རྫོགས་ལ་བཀག་སྡོམ་ནན་མོ་དང་། ལག་ཁྱེར་ཁ་པར་ལའང་གསང་ཉན་ལྟ་རྟོག་བྱེད་ཀྱིན་ཡོད་སྟབས། བོད་མི་ཚོས་གསར་འགོད་པར་སྐད་ཆ་བཤད་སྐབས། རྒྱ་གཞུང་གིས་གསང་ཉན་བྱ་རྒྱུར་དོགས་ཏེ་སོ་སོའི་ལག་ཁྱེར་ཁ་པར་སྒོ་རྒྱག་པ་དང་། བོད་མི་རེ་འགས་ལག་ཁྱེར་ཁ་པར་གྱི་གློག་རྫས་ཕྱིར་བཏོན་རྗེས་ད་གཟོད་གསར་འགོད་པར་བོད་ནང་གི་གནས་སྟངས་བརྗོད་ཀྱི་ཡོད་འདུག 

ཟི་ལིང་གྲོང་ཁྱེར་དུ་གནས་བཞུགས་བོད་ནང་གི་རྩོམ་པ་པོ་ཞིག་ལ་གསར་འགོད་པས་བཅར་འདྲི་བྱས་པར། ཁོང་གིས་ “ བོད་མིའི་རང་ལུས་མེར་བསྲེགས་ཀྱི་ལས་འགུལ་འདི་མ་འོངས་པར་ཞི་འཇགས་སུ་འགྲོ་མི་སྲིད་པར་མུ་མཐུད་འབྱུང་རྒྱུ་ཡིན་པར་ང་ལ་ཡིད་ཆེས་བརྟན་པོ་ཡོད། དེར་མ་ཟད་མ་འོངས་པར་སློབ་མ་དང་། དགེ་རྒན། གཞུང་ཞབས་ལས་བྱེད་བཅས་ཀྱི་ཁྲོད་དུའང་རང་ལུས་མེར་བསྲེགས་ཀྱི་རླབས་རྒྱུན་དེ་ཁྱབ་ངེས་རེད། ངས་ལྟས་ན་རྒྱུ་མཚན་གཙོ་བོ་ནི། ད་ལྟའི་ཆར་བོད་མི་ཚོས་ངོ་རྒོལ་གྱི་ཐབས་ལམ་གཅིག་པུ་དེ་འདི་རང་རེད། བོད་མི་ཚོར་ངོ་རྒོལ་སྐད་འབོད་བྱེད་འཇུག་གི་ཡོད་པ་མ་རེད། ཡིག་ངག་གང་རུང་ནས་སོ་སོའི་དགོས་འདུན་གླེང་འཇུག་གི་ཡོད་པ་མ་རེད། ཉེ་ཆར་རྒྱ་གཞུང་གིས་ཉུང་མཐར་བོད་མི་ཤེས་ལྡན་པ་དང་སྒྱུ་རྩལ་བ་ ༧༠ ལྷག་བཙོན་འཇུག་བྱས་ཡོད་པ་རེད། དེར་བརྟེན། རང་ལུས་མེར་བསྲེགས་ནི་འཐབ་རྩོད་ཀྱི་ཐབས་ལམ་ཞིག་ཡིན་པ་ལས། རེ་ཆད་ཡིད་མུག་གི་བྱ་སྤྱོད་ཅིག་མ་རེད།” བཅས་བརྗོད་དེ། ༢༠༠༨ ལོར་བོད་ས་ཡོངས་སུ་ཞི་རྒོལ་ལས་འགུལ་བྱུང་བའི་རྗེས། བོད་མི་ཚོས་རང་དབང་གི་ཆེད་དུ་བློས་གཏོང་ཆེན་པོ་ཞིག་གནང་དགོས་པ་ཤེས་རྟོག་བྱུང་ཡོད་པ་དང་། ཡིན་ནའང་། ༸གོང་ས་མཆོག་གིས་དུས་རྒྱུན་དྲག་པའི་བྱ་སྤྱོད་ལ་ངོ་རྒོལ་གནང་གི་ཡོད་སྟབས། བོད་མི་ཚོས་ནམ་ཡང་དྲག་པོའི་ངོ་རྒོལ་གྱི་ལངས་ཕྱོགས་འཛིན་གྱི་མེད་ལ། བོད་མི་ཚོས་ཆེས་ཆེ་བའི་རེ་འདུན་ནི་ཉིན་ཞིག་༸གོང་ས་མཆོག་ཕྱིར་བོད་ནང་ཕེབས་ཐུབ་རྒྱུ་དེ་ཡིན་སྐོར་གསལ་བཤད་གནང་ཡོད་འདུག 

ད་ལྟའི་བར་སྔ་ཕྱིར་བོད་མི་ ༣༠ ལྷག་གིས་རང་ལུས་མེར་བསྲེགས་ཡོད་ཀྱང་། མཉམ་འབྲེལ་རྒྱལ་ཚོགས་གཙོས་འཛམ་གླིང་རྒྱལ་ཁབ་དག་གིས་ཁ་ཡོད་ལག་ཡོད་ཀྱི་འགན་ལེན་རྣམ་འགྱུར་ཅིག་བྱུང་མེད་པའི་ཐད། བོད་ནང་གི་རྩོམ་པ་པོས།  “དེ་སྔོན་བོད་མི་རེ་འགས་མི་ ༡༥ ཙམ་གྱིས་རང་ལུས་མེར་བསྲེགས་བཏང་ཚེ། མཉམ་འབྲེལ་རྒྱལ་ཚོགས་དང་རྒྱལ་སྤྱིའི་ཐོག་དོ་སྣང་དང་འགན་ལེན་གྱི་ནུས་པ་ཞིག་ཡོང་ཐུབ་པའི་ཚོད་རྩིས་གནང་གི་ཡོད་པ་རེད། དེ་རྗེས་མི་ ༢༠ རང་ལུས་མེར་བསྲེགས་བཏང་རྗེས་རྒྱལ་སྤྱིའི་རྣམ་འགྱུར་ཅིག་ཡོང་རྒྱུར་རེ་བ་བཅངས་པ་རེད། ད་ལྟ་རང་ལུས་མེར་བསྲེགས་གཏོང་མཁན་ ༣༠ བརྒལ་ཚར་བ་རེད། ཡིན་ནའང་། ད་དུང་རྒྱལ་སྤྱིའི་སྤྱི་ཚོགས་ཀྱིས་འགན་ལེན་གྱི་རྣམ་འགྱུར་གསལ་བོ་ཞིག་བསྟན་ཡོད་པ་མ་རེད། ད་ལྟ་བོད་ནང་མི་རེ་འགས་རྒྱ་གར་གྱི་བླ་ན་མེད་པའི་རྒྱལ་གཅེས་དཔའ་བོ་གྷན་དྷི་མཆོག་གི་འཐབ་རྩོད་ཀྱི་ཉམས་མྱོང་ལོ་རྒྱུས་གཞིར་བཞག་ཐོག བོད་མི་རང་ལུས་མེར་བསྲེགས་གཏོང་མཁན་སྟོང་ཕྲག་ ༢ བརྒལ་བ་ཡིན་ན། ད་གཟོད་རྒྱལ་སྤྱིའི་ཐོག་བོད་མིའི་ལས་འགུལ་འདིར་ནུས་པ་ཞིག་འཐོན་སྲིད་པར་གླེང་གི་ཡོད་པ་རེད།” ཅེས་བརྗོད་འདུག

ཕྱི་ཟླ་ ༣ ཚེས་ ༡༦ ཉིན་རེབ་གོང་ཐུན་རིན་རྫོང་དུ་བོད་མི་སྟོང་ཕྲག་བརྒལ་བའི་ངོ་རྒོལ་ལས་འགུལ་སྤེལ་ཡོད་པ་ལྟར། ཡུལ་དེའི་གྲྭ་བ་ཞིག་གིས་གསར་འགོད་པ་ཨུ་སུ་ལཱ་ལགས་སུ་ངོ་རྒོལ་ལས་འགུལ་བྱུང་རྐྱེན་ནི། རྒྱ་གཞུང་གིས་དགོན་པའི་ནང་ཆོས་ལུགས་བྱེད་སྒོར་བཀག་སྡོམ་དང་། བོད་མི་སྐྱ་སེར་ཚང་མར་སོ་སོའི་རྩ་བའི་བླ་མ་༸གོང་ས་མཆོག་ལ་མཇལ་བའི་སྐལ་བ་མེད་པར་བཟོས་པའི་རྐྱེན་གྱིས་ཡིན་ལ། ཐེངས་འདིའི་ངོ་རྒོལ་སྐབས་བོད་མི་མང་པོར་རྨས་སྐྱོན་ཕོག་ཡོད་པ་བརྗོད་འདུག གསར་འགོད་པས་ཐུན་རིན་རྫོང་གི་དགེ་རྒན་ཞིག་ལ་བཅར་འདྲི་བྱས་པར། དགེ་རྒན་གྱིས་ “ ས་ཁུལ་གཞན་དང་བསྡུར་ཏེ་བལྟས་ས་ལྟོས་འཇོག་གི་ཐོག་ནས་བཤད་ན། ཐུན་རིན་རྫོང་ས་གནས་དཔོན་རིགས་ཚོས་བོད་མིའི་བསམ་ཚུལ་ལ་དོ་སྣང་ཕྲན་ཙམ་གནང་གི་འདུག དྲག་གནོན་གྱི་གནས་སྟངས་ཀྱང་ས་ཁུལ་གཞན་དང་བསྡུར་ན་དོགས་ཙམ་གུ་ཡངས་པོ་འདུག   ཡིན་ནའང་། བོད་ཡིག་སློབ་ཁྲིད་ཐད་སྔར་ལས་ལྷག་པར་བཀག་སྡོམ་ནན་མོ་བྱེད་བཞིན་པ་དང་། རྒྱ་མི་གནས་སྤོར་བྱེད་ཤུགས་སྔར་ལས་ཇེ་མང་དུ་གཏོང་གི་འདུག  མུ་མཐུད་འདི་ལྟར་ཕྱིན་ཚེ་བོད་མི་རིགས་འདི་འཇིགས་རྟེན་ས་སྒང་འདིར་རྩ་མེད་བཟོ་རྒྱུ་ཉག་གཅིག་རེད། དངོས་ཡོད་གནས་སྟངས་འདི་དག་གིས་བོད་མི་རྣམས་ཀྱིས་རང་ལུས་མེར་བསྲེགས་གཏོང་དགོས་པའི་རྒྱུ་མཚན་ཐད་ད་དུང་འགྲེལ་བརྗོད་བྱེད་ཐུབ་ཀྱི་མེད་པ་རེད་དམ།” ཅེས་དོགས་འདྲི་དང་ལྷན་དུ་བོད་མི་རྣམས་ཀྱིས་རང་ལུས་མེར་བསྲེགས་གཏོང་བཞིན་པའི་རྒྱུ་རྐྱེན་གསལ་བརྗོད་གནང་ཡོད་འདུག  

གསར་འགོད་པ་ཨུ་སུ་ལཱ་ལགས་རང་ལུས་མེར་བསྲེགས་ཀྱིས་འདས་གྲོངས་སུ་ཕྱིན་པའི་བསོད་ནམས་དར་རྒྱས་ལགས་ཀྱི་ཁྱིམ་དུ་ཕྱིན་ཏེ་གནས་ཚུལ་རྒྱུས་ལོན་བྱུང་པ་ལྟར་ན། རྒྱལ་གཅེས་དཔའ་བོ་ཁོང་གི་ཁང་ཁྱིམ་རྩིག་ལྡེབས་སུ་༸གོང་ས་མཆོག་གི་སྐུ་པར་ཞིག་བཤམས་ཡོད་པ་དང་། སྟེགས་བུ་ཆུང་ཆུང་ཞིག་གི་སྟེང་དུ་རྗེས་དྲན་ཆེད་དཔའ་བོ་ཁོང་གི་སྐུ་པར་ཞིག་བཞག་ཡོད་འདུག ཉེ་འཁོར་གྲོང་སྡེ་ཁག་གི་ཡུལ་མི་རྣམས་ཀྱིས་ཇ་དང་མར། སྒོར་མོ་སོགས་ཕུལ་ཏེ་དཔའ་བོ་ཁོང་གི་ནང་མིར་སེམས་གསོ་དང་། དཔའ་བོའི་སྐུ་པར་མདུན་དུ་མྱང་ངན་གུས་ཕྱག་འབུལ་བཞིན་ཡོད་འདུག རྒྱལ་གཅེས་དཔའ་པོ་ཁོང་གི་ཤུལ་དུ་བྱིས་པ་ ༤ ཡོད་པ་དང་། ཁོང་གི་ཆུང་མར་ཡང་ནད་གཞི་ལྕིད་མོ་ཞིག་བྱུང་སྟེ་གཟུགས་པོའི་གནས་སྟངས་སྐྱོ་བོ་ཆགས་ཡོད་འདུག གྲོང་སྡེ་དེའི་ལོ་ངོ་བཞི་བཅུར་སོན་པའི་ཡུལ་མི་ཞིག་གིས་རྒྱལ་གཅེས་དཔའ་བོ་བསོད་ནམས་དར་རྒྱས་ལགས་ནི་འབྱོར་ལྡན་ཞིག་མིན་ཡང་། ཁོང་ནི་ནང་པའི་ཆོས་ལ་དད་པ་དང་ཡིད་ཆེས་བརྟན་པོ་ཡོད་མཁན་ཞིག་ཡིན་པ་བརྗོད་ཡོད་པ་རེད། ཡིན་ནའང་། རང་ལུས་མེར་བསྲེགས་གཏོང་དགོས་པའི་རྒྱུ་རྐྱེན་སྐོར་དྲིས་སྐབས། ས་གནས་ཡུལ་མི་ཚོས་རྒྱ་གཞུང་གི་གསང་མྱུལ་ལ་ཧ་ཅང་འཛེམས་དོགས་ཀྱིས་ལེན་འདེབས་ཅི་ཡང་གནང་མེད་པ་རེད།  

གཞན་ཡང་། གསར་འགོད་པ་ཨུ་སུ་ལཱ་ལགས་ཀྱིས་བོད་ནང་གི་གནས་སྟངས་སྐོར་བརྗོད་དོན། རྒྱ་གཞུང་གིས་རང་ལུས་མེར་སྲེག་ནི་རྒྱལ་ཁབ་ཕྱི་ལོག་གི་མི་སྣས་བརྒྱུད་སྐུལ་བྱས་པ་ཞིག་ཡིན་ཚུལ་བརྗོད་དེ། ཁོ་ཚོའི་ནང་མི་རྣམས་ཀྱང་དོགས་ཡོད་མི་སྣར་ངོས་འཛིན་གྱིས་འཇུ་བཟུང་བཀག་ཉར་བྱེད་ཀྱིན་ཡོད་པ་དང་། ད་ལྟའི་བར་རང་ལུས་མེར་སྲེག་བསྟུད་མར་བྱུང་བའི་རྔ་པ་ས་ཁུལ་དུ། རྒྱ་དམག་གིས་བོད་མིའི་ཐོག་ལག་བསྟར་བྱེད་བཞིན་པའི་སྲིད་བྱུས་དེ་ནི། རིག་གནས་གསར་བརྗེ་དུས་སྐབས་དང་གཅིག་པ་གཅིག་རྐྱང་ཆགས་ཡོད་སྟབས། རྒྱ་གཞུང་གི་དྲག་གནོན་སྲིད་བྱུས་དེ་མཚམས་འཇོག་ཡོང་ཆེད་བོད་མི་ཚོས་གཅིག་རྗེས་གཉིས་མཐུད་ཀྱིས་རང་ལུས་མེར་བསྲེགས་གཏོང་བཞིན་པར་བརྗོད་འདུག