ཟླ་འདིའི་ཕྱི་ཚེས་ ༢ ཉིན་ལྷོ་སོག་པོའི་ནང་ས་གནས་སོག་རིགས་ཡུལ་མི་བརྒྱ་ཕྲག་འགས་ངོ་རྒོལ་བྱས་ཏེ། སོ་སོའི་ས་ཆའི་བདག་དབང་རྩོན་ལེན་བྱས་ཡོད་པ་རེད།
ཟླ་འདིའི་ཕྱི་ཚེས་ ༢ ཉིན། ལྷོ་སོག་པོ་(ནང་སོག)ཐུན་ལའེ་གྲོང་ཁྱེར་ནའེ་མཱན་ས་ཁུལ་གྱིི་མེན་རན་སུ་མུའུ་ཞིན་ལུང་ཀྲོ་ནགས་ལས་སྡེ་ཁག་གིས་ས་སློག་འཕྲུལ་འཁོར་མང་པོ་བཏང་སྟེ། ཐའུ་ལིས་ཀུ་ཀཱ་ཋ་སྡེ་བའི་ས་ཆ་ཡོངས་རྫོགས་སློག་མགོ་བརྩམས་ཏེ། ཁྲིམས་འགལ་གྱི་ཐོག་ནས་སྡེ་བ་དེའི་ས་ཆ་བཙན་འཕྲོག་བྱ་རྩིས་བྱས་ཡོད་སྟབས། ས་གནས་སོག་རིགས་མི་མང་བརྒྱ་ཕྲག་འགའ་འདུ་འཛོམས་ཀྱིས་ངོ་རྒོལ་བྱས་ཡོད་པ་དང་། སྐབས་དེར་ནའེ་མཱན་ས་ཁུལ་ཉེན་རྟོག་ལས་ཁུངས་ཀྱིས་དམག་མི་ ༨༠ ལྷག་དང་། དམག་མིས་རླངས་འཁོར་ ༣༠ ཙམ་བཏང་སྟེ་ས་གནས་སོག་རིགས་མང་ཚོགས་ལ་གང་བྱུང་དྲག་གནོན་གཅར་རྡུང་བྱས་པར་མ་ཟད། སོག་རིགས་ཡུལ་མི་ ༢༢ འཇུ་བཟུང་དང་། ཡུལ་མི་ ༥ ལ་རྨས་སྐྱོན་ཚབ་ཆེན་བཟོས་ཡོད་འདུག
ངོ་རྒོལ་ཁྲོད་ཞུགས་མཁན་སོག་རིགས་ཡུལ་མི་ཋིན་ཧྥུ་ལཱང་གིས་ལྷོ་སོག་པོའི་འགྲོ་བ་མིའི་ཐོབ་ཐང་བརྡ་འཕྲིན་སྟི་གནས་ཁང་ལ་གནས་ཚུལ་བརྗོད་པ་ལྟར་ན། ས་གནས་སོག་རིགས་མང་ཚོགས་ཀྱིས་ཞིན་ལུང་ཀྲོ་ནགས་ལས་སྡེ་ཁག་གིས་ཁྲིམས་འགལ་ཐོག་ས་གནས་ཡུལ་མིའི་ས་ཆ་མུའུ་ཁྲི་ ༦ ལྷག་བཙན་འཕྲོག་བྱས་པར་ངོ་རྒོལ་བྱས་པ་ཞིག་ཡིན་འདུག་ལ། ལོ་སྔོན་ནས་བཟུང་ནགས་ལས་སྡེ་ཁག་གིས་ནགས་ཚལ་ར་བར་ལྟ་རྟོག་བྱ་མི་དགོས་པ་བཟོས་ཏེ། ཁྲིམས་མཐུན་གྱི་ཁེ་དབང་ཡོད་པའི་ས་གནས་ཡུལ་མིར་ཕྱིར་སྤྲོད་བྱས་ཡོད་ཀྱང་། འདི་ལོ་ནས་ཁོ་ཚོས་ཡང་བསྐྱར་ཡུལ་མིའི་ས་ཆ་བཙན་བཟུང་བྱེད་མགོ་བརྩམས་ཡོད་འདུག
ཋིན་ཧྥུ་ལཱང་གིས་ངོ་སྤྲོད་བྱས་པ་ལྟར་ན། འདས་པའི་ཟླ་འགའི་ནང་ཐའུ་ལིས་ཀུ་ཀཱ་ཋ་སོག་རིགས་ཡུལ་མི་དག་གིས་སོ་སོའི་ས་ཆའི་བདག་དབང་སྲུང་ཆེད། མ་སྐུལ་དང་བླངས་ཀྱི་ཐོག་མཉམ་རུབ་རྩ་འཛུགས་བཙུགས་ཏེ་ས་གནས་གྲོང་ཁྱེར་སྲིད་གཞུང་དང་། ལྷོ་སོག་པོ་(ནང་སོག)རང་སྐྱོང་ལྗོངས་སྲིད་གཞུང་བཅས་ལ་ཐེངས་མང་པོར་ཞུ་གཏུགས་བྱས་ཀྱང་། ས་གནས་རྒྱ་གཞུང་གིས་ཁོ་ཚོའི་རེ་སྐུལ་ལྟར་དཀའ་ངལ་སེལ་ཐབས་ཀྱི་རོགས་ཕན་བརྡ་ལན་གང་ཡང་སྤྲད་མེད་པ་རེད། འདི་ལོའི་ཕྱི་ཟླ་ ༣ པར་ས་གནས་ཡུལ་མི་རྣམས་ཀྱིས་འཐུས་མི་ ༤ པེ་ཅིན་ལ་ཆེད་གཏོང་གིས་ཞུ་གཏུགས་བྱས་པར། ནའེ་མཱན་ས་ཁུལ་སྲིད་གཞུང་གིས་པེ་ཅིན་དུ་ས་གནས་ཉེན་རྟོག་པ་མངགས་ཏེ་ཞུ་གཏུགས་པ་རྣམས་འཇུ་བཟུང་གིས་ཕྱིར་བཙན་འཁྲིད་བྱས་ཡོད་འདུག ཡུལ་མི་ཋིན་ཧྥུ་ལཱང་གིས་ “ས་ཁུལ་མགོ་ཁྲིད་ཚོས་ང་ཚོའི་དཀའ་ངལ་གནད་དོན་སེལ་རྒྱུ་ཕར་ཞོག དེ་ལས་ལྡོག་སྟེ་ས་གནས་ཡུལ་མི་རྣམས་འཇུ་བཟུང་བཙོན་འཇུག་དང་། འཇིགས་སྐུལ་དྲག་གནོན་སྣ་ཚོགས་བྱེད་བཞིན་འདུག” ཅེས་བརྗོད་འདུག
ལྷོ་སོག་པོའི་འགྲོ་བ་མིའི་ཐོབ་ཐང་བརྡ་འཕྲིན་སྟི་གནས་ཀྱིས་འགན་འཛིན་ཨུན་ཁྲི་པ་ཐའུ་ལགས་ཀྱིས། སོག་པོ་མང་ཚོགས་ཀྱིས་ཞི་བའི་ངོ་རྒོལ་གྱི་ལམ་ནས་སོ་སོའི་ལུང་པའི་བདག་དབང་དང་། སོག་པོ་མི་རིགས་ཀྱི་བརྩི་མཐོང་། ཁེ་དབང་བཅས་སྲུང་སྐྱོབ་བྱས་པར། རྒྱ་གཞུང་གིས་གདུག་སྤྱོད་དྲག་གནོན་བྱས་ཏེ་སོག་པོ་མི་རིགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་ཚུལ་གསལ་བཤད་དང་། ཁོང་གིས་ “ སོག་པོ་མི་རིགས་ལ་སོ་སོའི་ལུང་པའི་ནང་གཞི་རྩའི་འཚོ་གནས་ཀྱི་ཁེ་དབང་ཙམ་ཡང་འགན་སྲུང་ཡོད་པ་མ་རེད། ང་ཚོས་རྒྱལ་སྤྱིའི་སྤྱི་ཚོགས་ཀྱིས་སོག་པོ་མི་རིགས་ཀྱི་ད་ལྟའི་འགྲོ་བ་མིའི་ཐོབ་ཐང་གནས་སྟངས་ཐད་དོ་སྣང་གནང་རྒྱུར་འབོད་སྐུལ་ཞུ་བཞིན་ཡོད།” ཅེས་བརྗོད་འདུག
སྔར་ལོའི་ཕྱི་ཟླ་ ༥ ནང་སོག་རིག་འབྲོག་པ་མའོ་རི་ཀཱན་རླངས་འཁོར་འོག་བརྫིས་ཏེ་དམར་གསོད་བཏང་བ་ལ་བརྟེན་ནས། འདས་པའི་ལོ་ངོ་ ༣༠ ནང་ལྷོ་སོག་པོའི་ནང་སྔར་བྱུང་མ་མྱོང་བའི་གཞི་རྒྱ་ཆེས་ཆེ་བའི་ངོ་རྒོལ་ལས་འགུལ་བྱུང་ཡོད་པ་རེད། ད་ལྟ་ལྷོ་སོག་པོའི་ནང་སོག་རིགས་མི་གྲངས་ཁྲི་ ༢༤༠༠ ཡོད་པ་དང་། སོག་རིགས་ཡུལ་མི་ཚོར་སོ་སོའི་ལུང་པའི་ས་ཁྱོན་གྱི་བརྒྱ་ཆ་ ༢༠ ཙམ་མ་གཏོགས་བདག་གི་མེད་པ་རེད།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
སོགས་པོ་སྔོན་མ་སྐྱེས་གྲགས་ན་རྗེས་མ་ཤི་ཐུབ་ཟེར་བ་དེ་རེད་། ཁོང་ཚོ་ལས་བོད་པ་ད་དུང་གསོན་དབུག་ཆད་མེད་།
(སྔར་ལོའི་ཕྱི་ཟླ་ ༥ ནང་སོག་རིག་འབྲོག་པ་མའོ་རི་ཀཱན་རླངས་འཁོར་འོག་བརྫིས་ཏེ་དམར་གསོད་བཏང་བ་ལ་བརྟེན་ནས། འདས་པའི་ལོ་ངོ་ ༣༠ ནང་ལྷོ་སོག་པོའི་ནང་སྔར་བྱུང་མ་མྱོང་བའི་གཞི་རྒྱ་ཆེས་ཆེ་བའི་ངོ་རྒོལ་ལས་འགུལ་བྱུང་ཡོད་པ་རེད།) མའོ་ཀཱན་རི་བསད་པར་བརྟེན་ནང་སོག་གི་རྩྭ་ཏང་སྟེང་དུ་སོག་པོ་ཚོས་རྒྱའི་དབང་འཛིན་ཡིད་མ་རངས་པའི་ངོ་རྒོལ་ཤུགས་ཆེར་བྱས་པ་དང་། ཕྱིར་ཀྱང་ཕྱི་ནང་གི་སོག་རིགས་ཚོས་ངོ་རྒོལ་ཁྲོམ་སྐོར་སྐད་འབོད་བྱས་པ་རེད།
ཞེས་པ་འདི་སྐད་ཆ་གསལ་བོ་རེད་འདུག དྲི་བ་དེ་གང་ནས་སླེབས་སོང་བ་རེད་དམ་ཨ་རིག་ལགས། ཧེ་ཧེ་ཧེ
ལྟ་ཚོད་ཀྱིས་མཚོ་སྔོན་པོའི་འབྲོག་པ་ཏག་ཏག་ལས་སོག་པོའི་བཟོ་ལྟ་ཞིག་མེད་ཀ
རང་གི་ཁེ་ཕན་དང་། མི་ཡི་དྲང་བདེན་སྲུང་རྒྱུ་ནི་འགན་ཁུར་དང་ཁྲལ་ཙམ་མ་རེད། སོང་ཙང་། དངོས་གནས་དྲང་གནས་ཡི་རང་ཡོད།
“སྔར་ལོའི་ཕྱི་ཟླ་ ༥ ནང་སོག་རིག་འབྲོག་པ་མའོ་རི་ཀཱན་རླངས་འཁོར་འོག་བརྫུས་ཏེ་དམར་གསོད་བཏང་རྗེས། འདས་པའི་ལོ་ངོ་ ༣༠ ནང་” འདི་མ་ཤེས་ཐལ།
སོག་རིགས་ཚོ་ཡང་ཡར་ལོངས་ཤོག ངར་ཤོག རང་གི་ཁེ་དབང་རྩོད་ཤོག
དྲི་ལན་དུས་ལྟར་གནང་བར་བཀའ་དྲིན་ཆེ།
ད་བྱས་དུས་ 内蒙古མ་ཡིན་པར་南蒙古 ཞེས་བྲིས་ན་ད་གཟོད་ས་གནས་མི་དམངས་ཀྱི་འདོད་པ་དང་མཐུན་ཞིང་དོན་ལ་ཡང་གནས་པ་ཡིན་པ་འདྲ། བསྐྱར་དུ་བཀའ་དྲིན་ཆེ་ཞུའོ།།
ནང་སོག་ནི་རྒྱ་གཞུང་གི་འདོགས་སྟངས་ཤིག་རེད། དཔེར་ན། བོད་ལ་ཞིས་ཙང་ཞེས་བརྗོད་པ་ལྟ་བུ་རེད། ལྷོ་སོག་ནི་ཆེན་པོ་ཧོར་གྱི་ཡུལ་ཏེ་སོག་རིགས་སྤྱི་ལ་ཁྱབ་པའི་ས་ཁྱོན་གྱི་ལྷོ་ཕྱོགས་ལ་གོ་བ་དང་། ད་ལྟའི་རྒྱ་ནག་གི་དབང་སྒྱུར་འོག་ཡོད་པའི་སོག་པོའི་ས་ཁུལ་རེད། རྒྱ་ཡིག་ནང་”ནན་མཱིན་ཀོ”རུ་འབོད་ཀྱིན་ཡོད་ལ། སོག་པོའི་བདག་དབང་འཐབ་རྩོད་པ་ཚང་མས་འདི་ལྟར་འབོད་པ་ལས། རྒྱ་གཞུང་གི་འབོད་སྟངས་དེ་སྤྱོད་ཀྱིན་མེད་སྟབས། འདིར་གསར་འགྱུར་ནང་དུའང་དེ་ལྟར་བཀོད་པ་ཡིན།
ད་འགྲིག་གི་འདུག
བོད་དང་ཤིན་ཅང་ཡུ་གུར་མི་རིགས་ཀྱིས་རྒྱ་དམར་གྱི་སྲིད་ཇུས་ལ་ངོ་རྒོལ་བྱས་ནས་མི་སྲོག་རྒྱུ་གསུམ་མང་པོར་ཤོར་ཡོད་པ་རེད། ད་ནི་ནང་སོག་ཚོས་ཀྱང་རྒྱའི་སྲིད་ཇུས་ལ་མི་འདོད་པའི་རྣམ་འགྱུར་ཤུགས་ཆེ་ཙམ་བསྟན་ན་རེད། ཙང་མ་དཔུང་གདེངས་གཅིག་ཏུ་སྦྲེལ་ནས།
ནང་སོག་ལ་ལྷོ་སོག་ཟེར་བའི་ཐ་སྙད་འདི་ང་ལ་མཚོན་ན་གསར་པ་ཞིག་རེད། འདི་ལ་རྒྱ་ཡིག་ནང་དུ་ཇི་ལྟར་བྲསི་འདུག་གམ།