ཝེན་ཇ་པའོ་ལགས། ཁྱེད་ཀྱི་བཅོས་བསྒྱུར་ཟེར་བ་ལག་ལེན་མེད་པའི་འབོད་སྒྲ་ཙམ་ཞིག་ཡིན་ནམ།

རྒྱ་ནག་གི་མཐོ་རིམ་མི་སྣའི་ཁྲོད་ནས་རང་དབང་དང་ཆབ་སྲིད་བཅོས་བསྒྱུར་ཐད་སྐད་ཆ་མང་ཤོས་དང་ཤུགས་ཆེ་ཤོས་ཤོད་མཁན་ནི་སྲིད་བློན་ཝེན་ཇ་པའོ་ཁོ་ན་ཡིན། འོན་ཀྱང་དཔྱད་ཞིབ་པ་ཚོས་རྒྱ་ནག་གི་འགྱུར་ལྡོག་སྤྱི་དང་ལྷག་དོན་ལོ་ངོ་དུ་མའི་རིང་སྔ་རྗེས་སུ་ཆབ་སྲིད་བཅོས་བསྒྱུར་ཐད་སྐད་ཆ་ཤུགས་ཆེ་ཤོས་ཤོད་མཁན་སྲིད་བློན་ཝེན་གྱི་བྱ་སྤྱོད་ལ་གཅིག་མཐུན་གྱི་སྡོམ་ཚིག་ཅིག་ད་ལྟ་ཡང་རྒྱག་ཐུབ་མེད། ཝེན་རང་ཉིད་ཀྱིས་ཀྱང་དོན་གནད་འདི་ཤེས་ཚོར་བྱུང་ཡོད་པ་ཡིན་ནམ། གང་ལྟར་ཉེ་ཆར་རྒྱལ་ཡོངས་འཐུས་མི་ཚོགས་ཆེན་གྱི་མཇུག་སྡོམ་གསར་འགོད་གསལ་བསྒྲགས་སྐབས། “ངས་བྱས་པའི་ལས་དོན་ལ་ཡིད་རང་བྱ་མཁན་གྱི་མི་སྣ་ཡང་ཡོང་ངེས་ཤིང་། སྐྱོན་བརྗོད་བྱ་མཁན་ཡང་ཡོང་ངེས། འོན་ཀྱང་དོན་དངོས་ནི་ལོ་རྒྱུས་ཀྱིས་ཁ་གྲགས་པར་འགྱུར་ངེས།” ཞེས་རང་ཉིད་དཀར་ནག་གང་དུ་གཏོགས་མིན་ལོ་རྒྱུས་ཀྱིས་དཔང་པོ་བྱ་རྒྱུ་ཡིན་པ་བཤད་འདུག

གཅིག ཆབ་སྲིད་བཅོས་བསྒྱུར་སྐོར་གྱི་ཝེན་གྱི་སྐད་ཆ་ནི་ལྷག་བསམ་རྣམ་དག་དང་འབྱུང་འགྱུར་རྒྱ་ནག་གི་མདུན་ལམ་ལ་འགན་འཁུར་གྱི་འདུ་ཤེས་ཤུགས་དྲག་ཅིག་གིས་ཤོད་བཞིན་ཡོད་པ་དངོས་ཡོད་ཡིན་མོད། འོན་ཀྱང་ཆབ་སྲིད་ཅུས་ཀྱི་རྒྱུན་ལས་གཙོས་པའི་མཐོ་རིམ་མི་སྣའི་ཁྲོད་ནས་དགོས་ངེས་ཀྱི་རྒྱབ་སྐྱོར་མ་ཐོབ་སྟབས། ད་ལྟ་ཁོ་པ་ལོ་ན་ཡང་རྒས་པར་གྱུར་ཅིང་། སྲིད་སྟེགས་ལས་བུད་ལ་ཉེ་བར་སོང་འབྱུང་འགྱུར་འཕྲད་སྲིད་པའི་ཉེན་ཁར་འཛེམས་མེད་ཀྱིས་རང་གི་ལྟ་ཚུལ་དང་གནས་བབ་ལོ་རྒྱུས་ཀྱི་ཐོག་ནས་གཙང་བཟོ་བྱ་ཆེད་བློ་ཁོག་ཆེན་པོས་གསལ་སྟོན་བྱེད་ཀྱིན་ཡོད་པར་འདོད།

ཚོད་དཔག་འདིར་རྒྱུ་མཚན་ཧ་ཅང་ཆེན་པོ་ཡོད། ཆབ་སྲིད་བཅོས་བསྒྱུར་སྐོར་གྱི་གྲགས་ཅན་གྱི་སྐད་ཆ་ཅིག་ནི་སྤྱི་ལོ་ ༢༠༡༠ སྤྱི་ཟླ་ ༡༠ ཚེས་ ༣ ཉིན་ཨ་རིའི་སི་ཨན་ཨན་བརྙན་འཕྲིན་གྱི་བཅར་འདྲིའི་སྐབས་བཤད་ཡོད། དེ་ཡང་སྐབས་དེ་དུས་ཁོ་པས། “མང་གཙོ་དང་རང་དབང་ལ་ཕྱོགས་པའི་མི་མང་གི་དགོས་འདུན་ནི་འགོག་ཐབས་མེད་པ་ཞིག་ཡིན།” ཞེས་བཤད། ང་ཚོས་དོ་སྣང་བྱ་དགོས་པ་ནི་བཅར་འདྲི་དངོས་གཞིའི་ལན་འདེབས་འདི་ཙམ་མ་རེད། བཅར་འདྲི་འགོ་འཛུགས་མ་བྱས་པའི་སྔོན་དེར་ཝེན་གྱིས་རྒྱུན་ལྡན་མིན་པའི་སྐད་ཆ་ཞིག་ནན་ཏན་གྱིས་བཤད་ཡོད། དེ་ཡང་ཝེན་གྱིས། “ང་ཚོའི་བཅར་འདྲི་འགོ་འཛུགས་མ་བྱས་པའི་སྔོན། ངས་ཁྱེད་ཀྱི་དྲི་བ་ཡོངས་རྫོགས་ལ་རང་གི་སེམས་ཀྱི་གཏིང་རིམ་ནས་ཐོན་པའི་ཚིག་དག་སྤྱད་དེ་དྲང་པོ་དྲང་བཞག་གི་ལན་བརྒྱབ་རྒྱུ་ཡིན་པ་ཤེས་སུ་འཇུག་འདོད་བྱུང་།” ཞེས་གསལ་བཤད་ནན་པོ་བྱས། སྐད་ཆ་འདིས་ག་རེ་སྟོན་གྱི་ཡོད་དམ། ངས་བསམ་ན་རྒྱ་ནག་གི་དབང་འཛིན་པ་ཚོར་གོམས་ལོབ་ཏུ་གྱུར་ཟིན་པའི་འཆར་ཅན་གྱི་སྐྱག་རྫུན་དེ་ལྟ་བུ་ཞིག་མིན་པར་ཐེངས་འདི་ནི་དོན་དངོས་རིགས་ཤིག་གང་ཐུབ་ཀྱིས་དྲང་པོ་བྱས་ཏེ་བཤད་རྒྱུའི་བཟོ་ལྟ་བསྟན་པ་ཡིན་སྙམ། ད་དུང་བཅར་འདྲི་འདི་ཉིད་དུས་ཡུན་གང་འཚམ་བར་རྒྱ་ནག་གི་བརྒྱུད་ལམ་ཁག་ཏུ་འགོག་སྡོམ་ཀྱང་བྱས་ཡོད་པ་རེད།

བཅོས་བསྒྱུར་སྐོར་གྱི་སྐད་ཆ་གྲགས་ཅན་ཅིག་ནི་ཉེ་དུས་རྒྱ་ནག་མི་དམངས་འཐུས་མི་ཚོགས་ཆེན་གྱི་གསར་འགོད་གསལ་བསྒྲགས་སྐབས་རེད། སྐབས་དེ་དུས་ཁོ་པས་བཅོས་བསྒྱུར་གླེང་སྐབས་དགོས་མཁོ་ཙམ་གྱི་ངོ་བོའི་ཆ་ནས་མིན་པར། ད་ལྟའི་རྒྱ་ནག་ལ་མཚོན་ན་འགྲོ་ལམ་གཅིག་རང་ལས་མེད་པའི་ཛ་དྲག་གི་གདམ་ཁའི་རང་བཞིན་ནས་གླེང་འདུག དེ་ཡང་ཁོ་པས་གདམ་ཀའི་མཐའ་གཞན་བཀག་ཡོད་པ་སྟེ། སྤྱི་ཚོགས་རིང་ལུགས་ཀྱི་ལམ་ཆེན་དུ་ཕྱིར་ལོག་མི་རུང་བ་དང་ད་ལྟའི་གནས་བབ་ལ་གནས་མི་རུང་བ་གཉིས་ལ་ནན་ཏན་གྱིས་གླེང་ཡོད། ཁོ་པས་རྒྱ་ནག་གིས་ཆབ་སྲིད་བཅོས་བསྒྱུར་དང་ལེན་མ་བྱས་ཕྱིན་གདམ་ཀའི་ལམ་ཁ་འདི་གཉིས་ལས་མེད་པ་མཐོང་གི་ཡོད་པ་འདྲ།                                                “གྲུབ་འབྲས་ལྡན་པའི་ཆབ་སྲིད་ཀྱི་བཅོས་བསྒྱུར་མ་བྱུང་ཕྱིན། རྒྱ་ནག་ནང་རིག་གནས་གསར་བརྗེ་ལྟ་བུའི་ལོ་རྒྱུས་ཀྱི་ཆག་སྒོ་དག་བསྐྱར་དུ་འབྱུང་ངེས།” ཞེས་གནའ་བོའི་ལམ་ཁ་རྙིང་པར་ཞུགས་མི་རུང་བའི་ཉེན་བརྡ་བཏང་ཞིང་། ལག་ལེན་གྱི་ཐོག་ནས་ཀྱང་ཁྲུང་ཆིང་གྲོང་ཁྱེར་གྱི་སྤྱི་ཁྱབ་པ་པའོ་ཞི་ལའེ་ཆབ་སྲིད་ཀྱི་གར་སྟེགས་ནས་བྲོ་གར་འཁྲུགས་པོ་འཁྲབ་ཁ་མ་ནས་ཕྱིར་འབུད་བཏང་པ་རེད།

ཝེན་གྱིས་ད་ལྟའི་གནས་བབ་ལ་བསྡད་པ་ཡིན་ན་ཉེན་ཁ་ཧ་ཅང་ཆེན་པོ་ཞིག་མཐོང་གི་ཡོད། དེ་ཡང་ཁོ་པས། “དཔལ་འབྱོར་ཡར་རྒྱས་མུ་མཐུད་ནས་འགྲོ་བ་དང་མཉམ་དུ་དབུལ་ཕྱུག་གི་ཧེ་བག་དང་ལྐོག་ཟའི་དཀའ་ངལ་འབྲལ་མེད་དུ་ཡོང་གི་རེད། ལྐོག་ཟ་དང་དབུལ་ཕྱུག་བར་ཁྱད་ཀྱི་དཀའ་ངལ་ནི་དཔལ་འབྱོར་དང་ཆབ་སྲིད་ཀྱི་བཅོས་བསྒྱུར་ཁོ་ནས་མ་གཏོགས་སེལ་ཐུབ་ཀྱི་མ་རེད།” ཅེས་བཤད། 

ལྐོག་ཟ་དང་དབུལ་ཕྱུག་གི་བར་ཁྱད་ནི་རྒྱལ་ཁབ་ཅིག་ལ་མཚོན་ན་ཆབ་སྲིད་དང་དཔལ་འབྱོར། འཕྲོད་བསྟེན་དང་ཤེས་རིག་དར་འཕེལ་སོགས་དོན་དག་མང་ས་ནས་འགལ་རྐྱེན་ཆེས་ཆེ་བའི་དཀའ་ངལ་ཞིག་ཡིན། ཉེ་དུས་རྒྱ་གར་གྱི་ལོ་རྒྱུས་སྨྲ་བ་ར་མ་ཅནྡྲ་གོ་ཝས་ཀྱང་། རྒྱ་གར་ནམ་ཡང་སྟོབས་ཆེན་གྱི་རྒྱལ་ཁབ་ཅིག་ཏུ་འགྱུར་མི་ཐུབ་པའི་རྒྱུ་རྐྱེན་ཁག་ལྔ་བགྲངས་ཡོད་པའི་གྲས་སུ། ལྐོག་ཟ་དང་དབུལ་ཕྱུག་གི་བར་ཁྱད་གཉིས་ཀྱང་བགྲངས་འདུག

ད་དུང་ཝེན་གྱིས་ཆབ་སྲིད་བཅོས་བསྒྱུར་མ་བྱས་ཚེ་ལྐོག་ཟ་དང་དབུལ་ཕྱུག་བར་ཁྱད་སོགས་ཀྱི་དཀའ་ངལ་འཕྲད་རྒྱུ་ཙམ་མིན་པར། ད་ལྟའི་ཆར་ཚད་མཐོན་པོས་གོང་འཕེལ་དུ་འགྲོ་བཞིན་པའི་དཔལ་འབྱོར་གྱི་གནས་བབ་ཀྱང་འཕེལ་ཁ་རྫོགས་མི་ཐུབ་པ་དང་། ད་སྐབས་ཐོབ་ཟིན་པའི་དཔལ་འབྱོར་གྱི་སྟོབས་ཤུགས་ཁག་ཀྱང་ཉམས་རྒུད་དུ་འགྲོ་སྲིད་པའི་ཉེན་བརྡ་བཏང་ཡོད། དེ་ཡང་ཁོ་པས། “གྲུབ་འབྲས་ལྡན་པའི་ཆབ་སྲིད་ཀྱི་བཅོས་བསྒྱུར་ཞིག་མ་བྱུང་ཕྱིན། རྒྱ་ནག་ལ་འཕེལ་ཁ་ཡོངས་སུ་རྫོགས་པའི་དཔལ་འབྱོར་གྱི་བཅོས་བསྒྱུར་ཞིག་ཡོང་མི་སྲིད་ཅིང་། འཐོབ་ཟིན་པའི་དཔལ་འབྱོར་འཕེལ་རྒྱས་ཀྱི་གནས་བབ་དེ་ཡང་བརླག་སྲིད།” ཅེས་བཤད་ཡོད།                                                                                            གང་ལྟར་ཝེན་གྱིས། “ལེགས་ལམ་ཞིག་རྩ་བ་ནས་མེད་པའི་ཆ་ནས་ནམ་ཡང་འདི་མུར་སྡོད་པའམ་ཕྱིར་ལོག་བྱེད་པ་གཏན་ནས་མི་རུང་། བཅོས་བསྒྱུར་ནི་མདུན་བསྐྱོད་བྱ་རྒྱུ་ཁོ་ན་ཡིན།” ཞེས་སེམས་ཐག་ཆོད་པོས་བཤད།   རྒྱ་ནག་གཙུག་ལག་སློབ་གྲྭ་ཆེན་མོའི་ཆབ་སྲིད་ཚན་རིག་དང་ཁྲིམས་ལུགས་སྡེ་ཁག་གི་འགན་འཛིན་གཞོན་པ་མཱ་ཧུའེ་སྡེ་ཡིས། “སྲིད་བློན་ཝེན་གྱིས་སྐད་ཆས་ཆོད་སེམས་བླ་མེད་ཅིག་སྟོན་གྱི་འདུག་ཅིང་། ཁོང་གིས་སྤྱི་ཚོགས་དང་མི་རྣམས་ཀྱིས་འགྱུར་ལྡོག་རིགས་ཤིག་འདྲེན་དགོས་པར་སྐུལ་སློང་གནང་གི་འདུག” ཅེས་གདེངས་འཇོག་བྱས་འདུག ཡང་ཨེ་ཤི་ཡའི་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གྱི་འགན་འཛིན་ང་ཕོད་འཇིགས་མེད་ཀྱིས། “ཝེན་གྱིས་བར་སྐབས་ལོ་ངོ་མང་པོའི་རིང་ཆབ་སྲིད་བཅོས་བསྒྱུར་སྐོར་སྐད་ཆ་མང་དག་བཤད་ཡོད་ཅིང་དེང་སང་ཤོད་ཤུགས་ཆེ་རུ་གཏོང་བཞིན་ཡོད། འོན་ཀྱང་ཁོ་པར་ཆབ་སྲིད་བཅོས་བསྒྱུར་སྐོར་གྱི་འབོད་སྐུལ་ཙམ་ལས་བཅོས་བསྒྱུར་ག་རེ་གཏོང་དགོས་པ་དང་ཇི་ལྟར་གཏོང་དགོས་པའི་ཞིབ་ཕྲའི་འཆར་གཞི་ཅི་ཡང་མི་འདུག འདིས་ག་རེ་སྟོན་གྱི་ཡོད་རེད་ཟེར་ན། ཝེན་རང་ཉིད་ལ་ཆབ་སྲིད་བཅོས་བསྒྱུར་གཏོང་རྒྱུར་ལྷག་བསམ་རྣམ་དག་གི་འདུན་མོས་ཆེན་པོ་ཡོད་པ་གསལ་པོ་ཡིན་ཡང་། མི་གཞན་གྱི་རྒྱབ་སྐྱོར་ཇི་ཙམ་ཡོད་པ་དང་ཁོ་ཚོ་ནང་ཁུལ་དུ་གནད་དོན་དེ་ཚོའི་སྐོར་མི་མཐུན་པའི་འཐབ་རྩོད་ཤུགས་ཆེན་པོ་ཞིག་མེད་དམ་བསམ་པ་ཞིག་འདུག” ཅེས་དབྱེ་ཞིབ་གནང་ཡོད།

གཉིས་པ། ཝེན་ནི་འཁྲབ་སྟོན་པ་ཞིག་ཡིན་པས་ཁོས་བཤད་པའི་སྐད་ཆར་བདེན་ཆ་ཅི་ཡང་མེད་ཅིང་། འཁྲབ་སྟོན་དེ་ཡང་ཧུའུ་ཡི་བཀོད་འདོམས་འོག་འཁྲབ་ཀྱི་ཡོད། དེ་ཡང་དམར་ཤོག་གི་ཚོགས་མི་དང་རྒྱལ་ཡོངས་ཀྱི་མི་སེར་ཁྲོད་རང་དབང་དང་བཅོས་བསྒྱུར་ལ་དགའ་མོས་དང་རྒྱབ་སྐྱོར་བྱ་མཁན་ཇི་ཙམ་ཡོད་མེད་རྟོག་ཞིབ་སོགས་ཀྱི་ཆེད་དུ་འཁྲབ་སྟོན་བྱེད་ཀྱིན་ཡོད་པར་འདོད།

ཉེ་ཆར་གསུམ་བཅུའི་དུས་དྲན་ཉིན་རྒྱ་རིགས་ཁག་ཅིག་གིས་༸གོང་ས་མཆོག་ལ་མཇལ་ཁ་དང་གཅར་འདྲི་ཞུ་སྐབས་༸གོང་ས་མཆོག་ནས། “ད་ནངས་སྔ་དྲོ་གསུང་བཤད་༼གྲོས་ཚོགས་ཀྱི་གསུང་བཤད་ལ་གོའམ་སྙམ། རྒྱུ་མཚན་ནི་གྲོས་ཚོགས་གསུང་བཤད་ནང་། རྒྱ་ནག་གི་སྲིད་བློན་ཝུན་ཅ་པའོ་ཡིས་གཞན་གྱི་ཚེ་སྲོག་དང་རྒྱུ་ནོར་ལ་གནོད་རྐྱེན་ཏིལ་འབྲུ་ཙམ་ཡང་བཟོས་མེད་པའི་བློས་བཏང་དེ་རིགས་འཇིགས་སྐུལ་རིང་ལུགས་པར་བརྩི་གི་ཡོད་ཅེས་བསྒྲགས་པ་ནི་འབྲེལ་མེད་འཁྱོག་བཤད་ཀྱིས་དོན་དངོས་སྦ་འགེབས་དང་གཡོལ་ཐབས་ཀྱི་བཤད་སྟངས་ཤིག་ལས་མ་འདས།ཞེས་བཀོད་ཡོད།༽ ནང་གི་སྐད་ཆ་དེ་གོ་རྗེས་ཝེན་ཇ་པའོ་ཡིས་དེ་སྔ་མང་གཙོ་དང་རང་དབང་ཟེར་ནས་བཤད་པ་དེ་ཚོ་སྐྱག་རྫུན་མིན་ནམ་སྙམ་པའི་དྭོགས་པ་བྱུང་།” ཞེས་གསུངས། 

སྤྱི་ཟླ་དང་པོའི་ནང་ཨ་རིར་ཕྱིན་པའི་རྒྱ་རིགས་རྩོམ་འབྲི་བ་ཡུ་ཇི་ཡིས་ཀྱང་། ཝེན་གྱི་ཁ་བཤད་དང་ལག་ལེན་མཐུན་གྱི་མེད་ཅེས་སྐྱོན་བརྗོད་བྱས།   ཏན་ཏན་རྒྱུ་མཚན་ཡོད་སྲིད། ད་ལྟ་བར་ཝེན་གྱིས་བཅོས་བསྒྱུར་སྐོར་གྱི་འབོད་སྒྲ་ཙམ་ཞིག་བསྒྲགས་པ་ལས་དོན་དམ་ལག་ལེན་ཐོག་གི་བྱས་འབྲས་གང་ཡང་སྟོན་དུ་མེད་པ་རེད། འོན་ཀྱང་། དབུས་སྤྱི་ཚོགས་རིང་ལུགས་སྒྲིག་འཛུགས་ཀྱི་ཆབ་སྲིད་ཚན་རིག་སྡེ་ཁག་གི་འགན་འཛིན་ཝེང་གིས། “ཆབ་སྲིད་ནང་། བཤད་པ་དེ་ག་ལག་བསྟར་ཡིན།” ཞེས་ཝེན་ལ་རྒྱབ་སྐྱོར་བྱས་འདུག གང་ལྟར་ཡང་དམར་ཤོག་ཚོགས་མི་སྤྱི་དང་ཆབ་སྲིད་ཅུས་ཀྱི་རྒྱུན་ལས་མི་དགུའི་ནང་རང་དབང་དང་མང་གཙོར་འདུན་མོས་ཡོད་པའི་མི་སྣ་གཅིག་ཀྱང་མེད་ཅེས་ཐག་གཅོད་བྱ་རྒྱུ་ཡང་ཅུང་ཁག་པོ་རེད།

རྒྱལ་ཡོངས་འཐུས་ཚོགས་ཀྱི་གསར་འགོད་གསལ་བསྒྲགས་སྐབས་ཧྥ་རན་སིའི་གསར་འགོད་པ་ཞིག་གིས་ད་ལྟའི་བོད་ནང་གི་གནས་བབ་དང་འབྲེལ་བའི་སྐོར་དྲི་བ་ཞིག་བཏོན་པར། ཝེན་གྱིས། “ལོ་ཆུང་བོད་མི་དེ་ཚོར་ཁག་མེད། ང་ཚོ་ཁོང་ཚོར་སེམས་འཚབ་ཧ་ཅང་ཆེན་པོ་ཡོད།” ཅེས་ལན་བཏབས། ཨེ་ཤ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གྱི་འགན་འཛིན་ང་ཕོད་འཇིགས་མེད་ལགས་ཀྱིས། “སེམས་འཚབ་ཧ་ཅང་ཆེ་ཟེར་བའི་ཝེན་གྱི་སྐད་ཆ་འདིར་སྙིང་རྗེ་དང་སེམས་འཁུར་གྱི་ཚོར་བ་ཡོད་པའི་ནང་དོན་ལྡན་འདུག” ཅེས་ཝེན་གྱིས་བོད་དོན་ལ་སེམས་འཁུར་བྱེད་ཀྱི་ཡོད་པ་ལྟ་བུའི་སྒྲུབ་ཕྱོགས་ནས་དཔྱད་གླེང་བྱས། 

ཡང་དེང་སང་ཨ་རིར་བཞུགས་པའི་བོད་རྒྱའི་ཉམས་ཞིབ་པ་ཀུན་དགའ་བཀྲ་ཤིས་ལགས་ཀྱིས། “ལོ་ཆུང་བོད་མི་ཚོར་ཁག་མེད་ཅེས་པས། ཁོང་ཚོར་ཁག་མེད་པ་རེད། ཕྱི་ཕྱོགས་ནས་བརྒྱུད་བསྐུལ་བྱེད་ཀྱི་ཡོད་པ་རེད་ཅེས་བསྟན་གྱི་ཡོད།” ཟེར་ནས་དགག་ཕྱོགས་ཀྱི་ལྟ་སྟངས་བཟུང་ཡོད།  

འདི་དང་མཚུངས་པར་ཟླ་བ་ ༣ ཚེས་ ༡༥ ཉིན་རྒྱ་གར་གྱི་དུས་བབ་ཅེས་པའི་གསར་ཤོག་ནང་དུ་ཡང་། [རྒྱ་ནག་སྲིད་བློན་གྱིས་བོད་མིའི་རང་སྲོག་གཅོད་པའི་རྒྱབ་ལོགས་སུ་ཏཱ་ལའི་བླ་མ་ཡོད་ཅེས་ཟེར།]ཞེས་པའི་འགོ་བརྗོད་ལྡན་པའི་འཐུས་ཚོགས་གསར་འགོད་གསལ་བསྒྲགས་སྐབས་ཝེན་གྱིས་བོད་དོན་ཐད་ཅི་བཤད་སྐོར་གྱི་གསར་འགྱུར་སྤེལ་འདུག   དོན་དངོས་ཝེན་གྱིས་མེར་སྲེག་ལས་འགུལ་གྱི་རྒྱབ་ལོགས་སུ་༸གོང་ས་མཆོག་ཡོད་ཅེས་མངོན་གསལ་དོད་པོས་བཤད་པ་བྱུང་མེད་ཀྱང་། ཁོ་པའི་གཏམ་བཤད་ལ་གོ་བ་ལེན་ཕྱོགས་ཀྱིས་གསར་འགྱུར་ནང་འདི་ལྟ་བུའི་གནས་ཚུལ་ཐོན་བཞིན་ཡོད་པ་རེད། 

འོ་ན་བོད་ནང་གི་མེར་སྲེག་གིས་འཆི་བཞིན་པའི་སྤུན་ཟླ་ཚོར་ཝེན་གྱིས་སེམས་འཁུར་དང་སྙིང་རྗེའི་ལྟ་སྟངས་འཛིན་གྱི་ཡོད་དམ། ཡོད་ན་གསུམ་དུས་གྲོས་ཚོགས་གསུང་འཕྲིན་ནང་བསྟན་པ་ལྟར་ཝེན་གྱིས་ཚེ་སྲོག་མེར་སྲེག་གི་ལས་འགུལ་སྤེལ་མཁན་རྣམས་འཇིགས་སྐུལ་རིང་ལུགས་པར་བརྩི་གི་ཡོད་ཅེས་བསྒྲགས་པ་དང་འགལ་གྱི་འདུག 

ཡང་སྙིང་ཝེན་གྱིས་རྒྱ་ནག་གི་འབྱུང་འགྱུར་ལ་སེམས་འཁུར་བྱེད་པ་ལྟར་བོད་ལ་སེམས་འཁུར་བྱེད་ཀྱི་ཡོད་དམ།

མི་དམངས་འཐུས་ཚོགས་ཀྱི་གསར་འགོད་གསལ་བསྒྲགས་སྐབས། ཝེན་གྱིས་དམིགས་བསལ་རྒྱལ་ཁབ་དང་ཏང་གི་འཛིན་སྐྱོང་གི་སྒྲོམ་གཞིར་བཅོས་བསྒྱུར་དགོས་སྐོར་བཤད། ཏང་གི་འཛིན་སྐྱོང་གི་སྒྲོམ་གཞི་འདི་ཉིད་འབྱུང་འགྱུར་རྒྱ་ནག་གི་རྒྱལ་ཁར་བར་ཆད་བྱེད་མཁན་ཞིག་ཏུ་འགྱུར་ཉེན་གཟིགས་ཀྱི་ཡོད་ན། བོད་ཁུལ་གྱི་འཛིན་སྐྱོང་ལས་དོན་ནི་དེ་བས་ཀྱང་རྒྱལ་ཁབ་ཀྱི་བདེ་འཇགས་ལ་ཉེན་ཁ་ཆེ་བའི་དོན་དག་ཅིག་ལ་ངོས་འཛིན་ཅིའི་ཕྱིར་བྱེད་ཐུབ་ཀྱི་མེད་པ་རེད། ༸གོང་ས་སྐྱབས་མགོན་ཆེན་པོས་ས་བྱི་ཞི་རྒོལ་ཆེན་མོ་ཡོང་རྐྱེན་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཁྲེན་ཀོན་ཆུས་ཀྱི་བྱེད་སྤྱོད་དང་ངེས་པར་འབྲེལ་ཡོད་པ་གསུངས་འདུག ད་ལྟའི་དམར་ཤོག་དྲུང་ཆེ་ཁོ་པ་ནི་ཁྲེན་ཀོན་ཆུས་ལས་དྲག་རྩུབ་ཆེ་བ་ལྟ་བུ་ཞིག་ཏུ་མངོན་གྱིན་ཡོད། དེས་ན་ས་བྱི་ཞི་རྒོལ་དང་། ལྕགས་ཡོས་མེ་མཆོད་ཀྱི་ལས་འགུལ་དག་བོད་ཁུལ་འཛིན་སྐྱོང་གི་སྒྲོམ་གཞིར་འཐུས་ཤོར་དང་སྐྱོན་ཆ་ཆེན་པོ་ཞིག་ལས་བྱུང་བ་ཡིན་ན། ཝེན་གྱིས་རྒྱ་ནག་དབུས་གཞུང་གི་འཛིན་སྐྱོང་སྒྲོམ་གཞིར་འགྱུར་ལྡོག་གཏོང་བའི་འདོད་འདུན་ཤུགས་དྲག་བཏོན་པ་ལྟར། བོད་ཁུལ་གྱི་འཛིན་སྐྱོང་ཐད་ལ་ཡང་གུ་ཡང་དང་རང་དབང་གི་བཅོས་བསྒྱུར་དགོས་པར་ཏན་ཏན་གླེང་དགོས་ངེས་རེད།  

༸གོང་ས་སྐྱབས་མགོན་ཆེན་པོ་དང་བཙན་བྱོལ་སྒྲིག་འཛུགས་ཀྱི་དགོས་འདུན་དང་འབྲེལ་བའི་སྐད་ཆ་བསླེབས་སྐབས། ཝེན་གྱི་བསམ་བློ་ནི་ཏང་མི་གཞན་ལྟར་ཧ་ཅང་མཁྲེགས་པོ་ཡིན་པའི་རྣམ་པ་མངོན་གྱི་ཡོད། ཉེ་ཆར་གསར་འགོད་གསལ་བསྒྲགས་སྐབས་སུ་ཡང་དེ་སྔོན་ ༢༠༡༠ ཟླ་བ་ ༡༠ ནང་ཨ་རིའི་བརྙན་འཕྲིན་གྱི་བཅར་འདྲིར་བཤད་པ་ལྟར། “རྒྱ་གར་ནང་ཡོད་པའི་བཙན་བྱོལ་བའི་གཞུང་དེར་དངོས་བརྒྱུད་ཅི་རིགས་ནས་ཏཱ་ལའི་བླ་མའི་ཐེ་བྱུས་ཡོད་མིན་ལ་མི་ལྟོས་པར། དེ་ནི་ཆོས་སྲིད་ཟུང་འབྲེལ་ཞིག་ཡིན་པ་དང་། དེའི་དམིགས་ཡུལ་ནི་བོད་དེ་མེས་རྒྱལ་ནས་ཁ་བྲལ་གཏོང་རྒྱུ་དེ་ཡིན་ཅིང་། དོན་དག་དེའི་ཐོག་ང་ཚོའི་རྩ་དོན་དང་ལང་ཕྱོགས་ནམ་ཡང་བརྟན་པོ་ཡིན།” ཅེས་བཤད། དེ་ལྟ་ན་ཡང་། ཝེན་གྱིས་བོད་མིའི་བསམ་བློའི་མགོན་སྐྱབས་བྱེད་པར་གུང་ཁྲན་ཏང་གིས་༸གོང་ས་སྐྱབས་མགོན་ཆེན་པོའི་ཚབ་ནམ་ཡང་བྱེད་མི་ཐུབ་པའི་རྟག་བརྟན་གྱི་གནས་ལུགས་དེ་གསལ་པོ་བྱས་ནས་རྟོགས་ཀྱི་ཡོད་དེ། ས་བྱི་ཞི་རྒོལ་སྐབས་༸གོང་ས་སྐྱབས་མགོན་ཆེན་པའི་ནུས་ཤུགས་བེད་སྤྱོད་དགོས་པའི་བསམ་ཚུལ་གླེང་ཡོད་པས་གསལ། 

ལོ་ངོ་བརྒྱ་ཕྲག་འགའི་བྱུང་རབས་ཁྲོད་ནས་དམ་པོར་སྦྲེལ་བའི་༸གོང་ས་སྐྱབས་མགོན་ཆེན་པོའི་མགོན་སྐྱབས་དང་བོད་མི་རིགས་ཀྱི་ཡིད་ཆེས་དད་འདུན་དབར་གྱི་འབྲེལ་བ་དེ་ཇི་ཙམ་རྟག་བརྟན་དང་གཏིང་ཟབ་ཡིན་པ་ཤེས་ཚོར་ཡོད་ན། ཅིའི་ཕྱིར་ཝེན་གྱིས་བོད་རིགས་འདུས་སྡོད་ཀྱི་ས་ཁུལ་ཁག་འཛིན་སྐྱོང་གཅིག་གི་སྒྲོམ་གཞིའི་འོག་མི་རིགས་ས་གནས་རང་སྐྱོང་གི་གནས་བབ་བསྐྲུན་རྒྱུར་ལྟ་ཚུལ་མཁྲེགས་པོ་འཛིན་གྱི་ཡོད་དམ། ཏང་གི་འཛིན་སྐྱོང་གི་སྒྲོམ་གཞིར་བཅོས་བསྒྱུར་དགོས་པའི་འབོད་སྒྲ་དེ་ཙམ་ཤུགས་ཆེན་པོས་བསྒྲགས་ཐུབ་སར་གདུག་རྩུབ་ཆེ་བའི་བོད་ཁུལ་གྱི་འཛིན་སྐྱོང་སྒྲོམ་གཞིར་བཅོས་བསྒྱུར་དགོས་པའི་༸གོང་ས་སྐྱབས་མགོན་ཆེན་པོ་དང་བོད་མིའི་སྒྲིག་འཛུགས་ཀྱི་དགོས་འདུན་ལ་ཅིའི་ཕྱིར་དང་ལེན་བྱ་ཐུབ་ཀྱི་མེད་པ་རེད།

དམིགས་བསལ་ས་བྱི་ཞི་རྒོལ་གྱི་རྗེས་ནས་རྒྱ་ནག་གཞུང་གིས་རྒྱ་བོད་མི་རིགས་དབར་འགལ་ཟླའི་སེམས་ཚོར་ཆེར་གཏོང་གི་ལས་དོན་ཁག་དངོས་བརྒྱུད་ཅི་རིགས་ནས་ཤུགས་ཆེར་སྤེལ་བའི་ངང་ཚུལ་ལ་བསམ་ན། གོང་གི་དྭོགས་པ་འདིར་རྒྱུ་མཚན་ཆེན་པོ་ཡོད། དེང་སང་ཏང་གི་མཐོ་རིམ་མི་སྣ་འགའ་ཞིག་གིས་བོད་མིའི་སྙིང་སྟོབས་དང་ཡར་ལངས་ཀྱི་སྟོབས་ཤུགས་རྩ་མེད་གཏོང་བའི་ཐབས་ལམ་དུ་རྒྱ་མི་རིགས་རྒྱབ་ལངས་སུ་དྲུད་ཡོང་གི་ཡོད་ཅིང་། བོད་ཡུལ་རྒྱའི་མི་སེར་སྤེལ་ཡུལ་དུ་བསྒྱུར་བཞིན་ཡོད། མདོར་ན་ལོ་ངོ་སྟོང་ཕྲག་གི་འཚོ་བ་དང་ལེགས་བྱང་གི་ཁྲོད་ནས་གཉུག་སེམས་དང་ལྷན་ཅིག་ཏུ་འདྲེས་པའི་‘ང་བོད་པ་ཡིན་’བསམ་པའི་ལྷན་སྐྱེས་ཀྱི་འདུ་ཤེས་དེ་ཡང་བརྗེ་བསྒྱུར་གྱིས་ ‘ང་རྒྱ་རིགས་ཡིན་’བསམ་པའི་འདུ་ཤེས་ཅན་ཞིག་ཏུ་བསྐྱེད་སྲིང་བྱ་དགོས་པའི་ཧམ་སེམས་འཆང་གི་ཡོད།

པའོ་ཞི་ལའེ་ཡིས་ཁྲུང་ཆིང་གི་མི་སེར་རྣམས་ལ་མའོ་ཡི་གླུ་གཞས་གཏོང་དུ་བཅུག་པ་ཙམ་རེད། བོད་ལྗོངས་ཀྱི་དམར་ཤོག་དྲུང་ཆེས་མའོ་ཡི་འདྲ་པར་སྟོན་པ་ཤཱཀྱ་ཐུབ་པའི་སྐུ་འདྲ་དང་མཉམ་དུ་དགོན་པའི་ནང་སྒྲིག་ཏུ་འཇུག་གི་ཡོད། པའོ་ཞི་ལའེ་ཡིས་འབྱོར་བདག་གི་རིགས་རྣམས་ལ་རྡུང་རྡེག་ཚ་ནན་བཏང་བ་ཙམ་རེད། བོད་ལྗོངས་ཀྱི་དམར་ཤོག་དྲུང་ཆེས་བོད་མི་འབྱོར་བདག་ཙམ་མིན་པར་ཤེས་ཡོན་ཅན་དང་། རྩོམ་འབྲི་བ། ཁོར་ཡུག་སྲུང་སྐྱོབ་པ། གཞས་པ། ཉམས་ཐག་ལྟ་སྐྱོང་བ་སོགས་ལ་རྡུང་རྡེག་ཚ་ནན་གཏོང་བ་ལས་བརྒལ་ཏེ་འགའ་ཞིག་དམར་གསོད་བཏང་ཞིང་། འགའ་ཞིག་གར་སོང་ཆ་མེད་དུ་བཏང་ཡོད། པའོ་ཞི་ལའེ་ཡིས་དབུལ་ཕྱུག་གི་བར་ཁྱད་ཕྱེ་ནས་རིས་བཅད་ཀྱི་ལས་འགུལ་སྤེལ་བ་ཙམ་རེད། དེ་ཡང་དཔལ་འབྱོར་ཆ་སྙོམ་གྱི་མའོ་ཡི་ལྟ་གྲུབ་ལ་གཞི་བཅོལ་ཡོད། བོད་ལྗོངས་ཀྱི་དམར་ཤོག་དྲུང་ཆེས་བོད་རྒྱ་མི་རིགས་ཀྱི་བར་ཁྱད་ཕྱེ་ནས་རིས་བཅད་ཀྱི་ལས་འགུལ་སྤེལ་གྱིན་ཡོད་ལ། དེ་ནི་གུང་ཁྲན་ཏང་གི་རྩ་ཁྲིམས་དང་མི་རིགས་ས་ཁོངས་རང་སྐྱོང་གི་བཅའ་ཁྲིམས་གཉིས་ཆ་དང་རྒྱབ་འགལ་དུ་སོང་བ་ཙམ་མིན་པར། སྤྱི་ཚོགས་རིང་ལུགས་ཀྱི་རིག་པའི་གཞུང་ལུགས་དང་འགལ་ཟླ་ཆགས་ཡོད། འོན་ཀྱང་པའོ་ཞི་ལའེ་ཡི་ཤུགས་རྐྱེན་དང་གོ་གནས་ལ་འཛེམ་གཟོན་མེད་པར་སྲིད་སྟེགས་ལས་ཕྱིར་འབུད་བཏང་ཞིང་། བོད་ལྗོངས་ཀྱི་དམར་ཤོག་དྲུང་ཆེ་ཚོར་དམིགས་བསལ་གྱི་གཟིགས་བཟོས་དང་བདག་རྐྱེན་གྱ་ནོམ་པ་སྦྱར་བ་ཙམ་མིན་པར། སྐབས་རེ་སྲིད་སྟེགས་ཀྱི་གོ་བབ་ཀྱང་མཐོ་རུ་གཏོང་གི་ཡོད། ཝེན་ཇ་པའོ་ཡིས་པའོ་ཞི་ལའེ་ཕྱིར་འབུད་གཏོང་ཐུབ་སར་བོད་ལྗོངས་ཀྱི་དམར་ཤོག་དྲུང་ཆེ་ཚོར་བཀའ་བཀྱོན་ཞིག་ཀྱང་ཅིའི་ཕྱིར་གཏོང་ཐུབ་ཀྱི་མེད་པ་རེད། ཐ་ན་ཁོང་ཚོའི་བྱེད་སྤྱོད་མ་མཐར་ཡང་ནོར་འཁྲུལ་གྱི་བྱེད་སྤྱོད་ཅིག་ཏུ་ཅིའི་ཕྱིར་བརྩི་གི་མེད་པ་ཡིན་ནམ།

དེང་སང་ཨ་རིས་གཙོས་པའི་ནུབ་ཕྱོགས་ཀྱི་མང་གཙོའི་རྒྱལ་ཁབ་མང་པོ་ཞིག་ཏུ་དཔལ་འབྱོར་ཉམས་རྒུད་ཀྱི་དོན་རྐྱེན་ཞིག་བསྟུད་མར་འབྱུང་གི་ཡོད་ཅིང་། ཐག་ཉེ་ས་ནས་བཤད་ན་འཛམ་གླིང་ནང་མང་གཙོའི་རྒྱལ་ཁབ་ཆེ་ཤོས་གྲས་ཀྱི་རང་རེའི་གནས་ཚང་རྒྱལ་ཁབ་ལྟ་བུར་མཚོན་ན་དཔལ་འབྱོར་གྱི་འཕེལ་རྒྱས་ཙམ་མིན་པར་གཞི་རིམ་སྤྱི་ཚོགས་ཀྱི་ཁྱབ་ཁོངས་མང་སའི་ནང་དཀའ་ངལ་ཧ་ཅང་ཆེན་པོ་ཞིག་མངོན་གསལ་དང་ལྐོག་གྱུར་ཅི་རིགས་ནས་འཕྲད་བཞིན་ཡོད། ཤེས་ཡོན་དང་འཕྲོད་བསྟེན། ཡུལ་མིའི་དཔལ་འབྱོར་གནས་བབ་སོགས་རེད། ཤེས་ཡོན་གྱི་ཆ་ནས་བཤད་ན་རྒྱ་གར་ནང་ཡར་རྒྱས་མྱུར་པོ་འགྲོ་བཞིན་ཡོད་ཀྱང་། གཞོན་སྐྱེས་ཀྱི་བརྒྱ་ཆ་ ༧༤ ཙམ་གྱིས་མ་གཏོགས་ཡི་གེ་འབྲི་ཀློག་ཤེས་ཀྱི་མེད་ཅིང་། རྒྱ་ནག་ནང་བརྒྱ་ཆ་ ༩༤ འབྲི་ཀློག་ཤེས་ཀྱི་ཡོད། རྒྱ་གར་བའི་ཆ་སྙོམས་ཚེ་ཚད་ལོ་ ༦༤་༤ ཡིན་ཞིང་རྒྱ་ནག་པའི་ཆ་སྙོམ་ཚེ་ཚད་ལོ་ ༧༣་༥ ཡིན། རྒྱ་གར་དུ་བྱིས་པའི་ཆ་སྙོམས་འཆི་ཚད་སྟོང་ཚོ་གཅིག་ཁྲོད་ལྔ་བཅུ་ཡིན་ཞིང་། རྒྱ་ནག་ཏུ་སྟོང་ཚོ་གཅིག་ཁྲོད་བཅུ་བདུན་ལས་སོན་གྱི་མེད། འདི་ལ་སོགས་པའི་གཞི་རྩའི་སྤྱི་ཚོགས་ཀྱི་དགོས་མཁོ་འབྱོར་མིན་གྱིས་འཕྲོད་བསྟེན་དང་ཤེས་ཡོན་སོགས་ལ་ཧེ་བག་ཆེན་པོ་ཤོར་གྱི་ཡོད་པའི་གནས་བབ་རྒྱུ་མཚན་དུ་བཟུང་སྟེ། མང་གཙོའི་ལམ་སྲོལ་ནི་སྤྱི་ཚོགས་འཕེལ་རྒྱས་ཀྱི་བཀག་རྡོ་ཡིན་པའི་ལྟ་ཚུལ་ཤུགས་ཆེ་འདོན་མཁན་རྒྱ་ནག་སྤྱི་དང་ཏང་གི་འགོ་འཁྲིད་རིམ་པའི་ནང་ཡོང་བཞིན་ཡོད་པ་རེད། འདིས་རྒྱ་ནག་མང་གཙོར་ཕྱོགས་པར་འགོག་རྐྱེན་ཆེན་པོ་ཐེབས་བཞིན་ཡོད།  

བཀག་རྡོ་ཆེན་པོ་གཞན་ཞིག་ནི་ད་ལྟའི་ཏང་གི་སྒྲོམ་གཞིའི་ནང་ནས་སྙན་གྲགས་དང་རྒྱུ་འབྱོར། དབང་ཆ་དང་སྟོབས་ཤུགས་ཀྱི་ཁེ་ཕན་བླ་མེད་ཐོབ་དང་འཐོབ་བཞིན་པའི་དཔོན་ཁག་དང་འབྱོར་བདག་ཅན་རྣམས་ཡིན་ཏེ། ཆིང་ཧཱ་གཙུག་ལག་སློབ་གྲྭ་ཆེན་མོའི་སྤྱི་ཚོགས་ཚན་རིག་མཁས་དབང་སྐུ་ཞབས་སུན་ལི་པིང་གིས། “དམར་ཤོག་གི་ཁྱིམ་རྒྱུད་རྙིང་པ་ཁག་དང་འབྱོར་ཕྱུག་ཅན་གྱི་གཞུང་གཉེར་བཟོ་ཚོང་སྡེ་ཁག གཞུང་གཉེར་དངུལ་ཁང་མ་ལག་ཁག གཞི་རྒྱ་ཆེ་ལ་སྲ་བརྟན་དུ་གྱུར་པའི་གཞུང་སྲིད་པ་བཅས་ནི་བཅོས་བསྒྱུར་གྱི་བཀག་རྡོ་གཙོ་བོ་ཡིན།” ཅེས་དང་། “ཚན་པ་འདི་དག་དང་འབྲེལ་ཡོད་ཀྱི་སྒེར་སེམས་ཆེ་བའི་མི་སྣ་ཚོས་ཚད་མཐོ་བའི་བཅོས་བསྒྱུར་དང་ད་ལྟའི་གནས་བབ་ཉམས་རྒུད་དུ་འགྱུར་རྒྱུ་གཉིས་ཀ་འདོད་ཀྱི་མེད། རྒྱུ་མཚན་ནི་ཁོང་ཚོར་ད་ལྟའི་གནས་བབ་འདིའི་འོག་ནས་བླ་ན་མེད་པའི་ཁེ་ཕན་དག་ཐོབ་བཞིན་ཡོད་པ་རེད།” ཅེས་བཤད།

ད་ལྟའི་གུང་ཁྲན་ཏང་གི་སྒྲོམ་གཞི་གནས་བབ་འདི་འདྲ་ཞིག་གི་རྨང་གཞིའི་སྟེང་ནས་གྲུབ་ཡོད་པ་བདེན་ན། ཌི་ཌི་ཀིརྶ་ཊན་གྱིས། “ཚོགས་པ་གཅིག་གི་དབང་བསྒྱུར་གྱི་རྒྱལ་ཁབ་འདི་ཆག་གྲུམ་ཤོར་སླའི་རང་བཞིན་ཞིག་ལས་དོན་དམ་གྱི་མཁྲེགས་སྟོབས་ཅན་ཞིག་མིན།” ཞེས་བཤད་པ་དོན་ལ་གནས་པ་ལྟ་བུར་མཐོང་གི་འདུག