བོད་དོན་འཐབ་རྩོད་དང་ལྷག་པར་བོད་མེ་རུ་སྦར་སྟངས་ལ་འགྲེལ་བ་ཡང་དག་ཅིག་རྒྱག་རྒྱུ་དང་། ཡང་ན་དེ་འདྲའི་སྙིང་སྟོབས་ཤིག་ཇི་ལྟར་མངོན་གྱུར་བྱེད་ཐུབ་པའི་རྒྱུ་མཚན་ནི་བོད་མི་རིགས་ཀྱི་སེམས་ཁམས་གཤིས་སྤྱོད་ལ་ནང་རྒྱུས་ཡོད་མཁན་ཞིག་གིས་བཤད་ཤེས་པ་ལས། མཁས་པ་ཡིན་ཟེར་མཁན་དང་ཞིབ་འཇུག་པ་ཡིན་ཟེར་མཁན་གཞན་ཞིག་གིས་གསར་འགྱུར་ཙམ་ལ་གཞི་བཅོལ་ནས་བསྡོམས་རྒྱག་ཐུབ་པ་ཞིག་མིན་ལ། ལྷག་པར་དུ་བོད་མིའི་ཚེ་སྲོག་སྲེག་སྦྱོར་གྱི་ལས་འགུལ་བླ་ན་མེད་པ་འདི་ཆོས་ལུགས་ཀྱི་སྟོབས་ཤུགས་ཙམ་ལ་སྒྲོག་པ་དང་། ཆབ་སྲིད་ཀྱི་ཕུད་རྒྱག་ཆིག་རྐྱང་ལ་སྦྱོར་བ་དག་ནི་གནད་དུ་མ་ཐིེངས་པའི་འོལ་ཚོད་ཀྱི་དཔྱད་པ་ཙམ་དུ་འགྱུར་ཡོང་།
བོད་མེ་རུ་སྦར་སྟངས་འདིའི་སྒང་ནས་ཆབ་སྲིད་ཀྱི་དཀའ་རྙོག་ཙམ་མ་ཡིན་པར་བོད་མི་རིགས་ཀྱི་བསམ་བློའི་ཆ་དང་། མི་གཤིས་ཀྱི་ཆ། སྙིང་སྟོབས་ཀྱི་ཆ་སོགས་གནད་ཀ་མང་བོ་ཞིག་མཐོང་ཐུབ་ལ། མདོ་དབུས་ཁམས་གསུམ་གྱི་བོད་མི་རྣམས་ཀྱི་འཚོ་བའི་གོམས་ཕྱོགས་དང་དགའ་ཁ་འཁྱེར་ཕྱོགས་སོགས་ཀྱི་གཤིས་ཀ་དང་བསྡུར་ཏེ་བོད་དོན་འཐབ་རྩོད་ཀྱི་རླབས་ལ་བལྟས་ཚེ། དོན་དག་མང་བོ་ཞིག་ལ་གསལ་བཤད་དང་འབྱུང་འགྱུར་གྱི་བོད་དོན་འཐབ་རྩོད་ཀྱི་ཕྱོགས་ལ་ཡང་ཚོད་དཔག་གང་འཚམ་ཞིག་བྱེད་ཐུབ་པར་འདོད། དོན་ཀྱི་གནད་ཀ་གཞན་ཞིག་གི་སྒང་ནས་བལྟས་ན། བོད་ནང་དུ་བྱུང་དང་འབྱུང་བཞིན་པའི་ངོ་རྒོལ་གྱི་ལས་འགུལ་ཆེ་ཕྲ་ཆུང་གསུམ་པོ་གཞིས་ལུས་སྤུན་ཟླ་ཚོས་རང་ཉིད་ཀྱིས་ཐག་གཅོད་དང་། རང་གི་མི་གཤིས་ཀྱིས་ཐག་གཅོད་བྱས་པ་ཤ་སྟག་ཡིན་པ་ལས་དེའི་ལྟག་རྒྱབ་ན་བརྒྱུད་སྐུལ་བྱེད་མཁན་གྱི་མིང་ཙམ་ཡང་མེད་པ་གསལ་བོར་ཆགས་ཐུབ་པ་འདུག
བོད་མི་རིགས་ཀྱི་མི་གཤིས་ལ་ནང་རྒྱུས་ཡོད་མཁན་གྱི་བོད་མི་ཚོས་དོན་གནད་འདི་གླེང་ཐུབ་ན་ལྷག་ཏུ་གནད་ལ་ཐིངས་བ་ཞིག་ཡོང་རེ་ཆེ་བས། གཤམ་ནས་ལོ་རྒྱུས་ཁྲོད་དུ་ངོས་འཛིན་བྱས་པའི་བོད་རིགས་སོ་སོའི་མི་གཤིས་དང་། རང་ཉིད་འདི་དག་ལ་འགྲོགས་འདྲིས་ཡོད་པའི་ཉམས་མྱོང་། བོད་དོན་འཐབ་རྩོད་ཀྱི་རླབས་མི་འདྲ་བ་དག་ལ་གཞི་བཅོལ་ནས་རང་གི་དྲན་སྟངས་ཤིག་གླེང་འདོད་པ་ཡིན་ན། འདི་ལ་ཀློག་པ་པོ་རྣམ་པས་ཀྱང་ལྷག་པ་འཕྲི་བ་དང་ཆད་པ་སྣོན་པ་ནོར་བ་བཅོས་པ་སོགས་ཀྱི་བགྱི་བ་ལྷུ་རུ་ལེན་རོགས་ཟེར་གྱི་ཡིན།
ལོ་རྒྱུས་ཀྱིས་བོད་མི་རིགས་ལ་མདོ་དབུས་ཁམས་གསུམ་ཞེས་རྣམ་པ་གསུམ་དུ་བཀར་ཡོད་ཅིང་། དོན་དངོས་སུ་ཡང་བོད་རིགས་འདི་གསུམ་ལ་མི་གཤིས་ཀྱི་ཆ་ནས་མི་འདྲ་ས་ཆེན་པོ་ཡོད་པ་དང་། མི་གཤིས་མི་འདྲ་བ་གསུམ་ལ་བརྟེན་ནས་བོད་དོན་འཐབ་རྩོད་ཀྱི་རླབས་མི་འདྲ་བ་གསུམ་འཕྱུར་ཡོང་གི་ཡོད་པ་དེ་འདྲ་རེད། དབུས་གཙང་གི་མི་རིགས་ནི་བསྟུན་མཁས་པོ་དང་། ཇུས་བཟང་པོ། སྤྱང་གྲུང་ཅན་གྱི་མི་རིགས་ཤིག་རེད། ཁོང་ཚོ་ནི་སྤྱང་གྲུང་གི་མི་གཤིས་འདི་བརྒྱུད་ནས་དགྲ་ལ་དགྲ་ལན་དང་གཉེན་ལ་གཉེན་ལན་སྤྲོད་མཁན་ཞིག་ཡིན་པས། རང་གི་ཐུན་མིན་གྱི་མི་གཤིས་འདིའི་སྟེང་ནས་བོད་དོན་འཐབ་རྩོད་ཀྱི་ཁྲོད་ལ་ཞུགས་ཡོད། སྔོན་ཆད་ང་ལྷ་སར་སྡོད་སྐབས་སུ་དངོས་སུ་མཐོང་ཐོས་བྱུང་བ་ཞིག་ལ། ལྷ་ས་ནི་བོད་ས་གཞན་ལས་དམ་དྲག་ཆེ་ཞིང་ལྷ་ས་བ་ཚོས་ཀྱང་ཕྱི་ཚུལ་ནས་རྒྱའི་སྲིད་ཇུས་ལ་ངོ་རྒོལ་བྱེད་ཀི་མེད་ལ། ལྡོག་སྟེ་དགའ་བསུ་ཡོད་པའི་རྣམ་འགྱུར་ཡང་མཐོང་རྒྱུ་འདུག འོན་ཀྱང་། དོན་དུ་ཁོང་ཚོའི་སེམས་ཀྱི་དཀར་ས་དེ་གཞན་ཞིག་ལ་གཏད་འདུག ཁོང་ཚོ་བོད་དོན་དང་འབྲེལ་བའི་གནས་ཚུལ་ཚང་མར་དོ་སྣང་ཆེ་ལ་དེ་ལྟར་ཤེས་རྟོགས་ཀྱང་ལྡན། ལྷ་སའི་སྤོ་བོ་རྨོ་མོ་ཚོའི་སྨོན་ལམ་ཚུན་ཆད་ནས་༧གོ་ས་མཆོག་སྐུ་ཚེ་བརྟན་པ་དང་བོད་གཞིས་བྱེས་ལྷན་འཛོམས་ལ་སྨོན་པའི་རེ་བ་དང་ངང་སྒུག་ནི་གཞན་ལས་ཀྱང་ཟབ་མོ་ཡོད་ལ། དབུས་པ་ཚོས་༧གོང་ས་མཆོག་གི་འཁྲུངས་སྐར་དང་། ཞི་བདེའི་གཟེངས་རྟགས་བཞེས་ཉིན། གསུམ་བཅུའི་དུས་དྲན་སོགས་དུས་ཚིགས་གལ་ཆེན་རྣམས་སུ་རྟག་པར་བོད་ཆས་གྱོན་པ་དང་། བསངས་གཏོང་བ་སོགས་མངོན་པ་མི་གསལ་བའི་སྟེང་ནས་བོད་དོན་ལ་སྙེག་གི་འདུག རྒྱ་གཞུང་གི་ཉེན་རྟོག་པ་སྟོང་ཕྲག་མང་བོས་ཉིན་མཚན་མེད་པར་ཉི་མ་ལྷ་ས་སྲུང་བསྡད་ཡོད་པར་མ་ཟད། བོད་མི་ཚོའི་སེམས་ཁམས་འགུགས་ཐབས་ཀྱི་གཡོ་ཇུས་མཐའ་ཡས་པ་ཞིག་འཐེན་གྱིན་ཡོད་མོད། ཁོང་ཚོས་བོད་དབུས་ཀྱི་མི་མང་གི་བློ་ཁ་གང་ལ་ཕྱོགས་ཡོད་མེད་ཤེས་ཀྱི་མེད་ལ་དེ་དག་གི་སེམས་ཁམས་ལ་ཁ་ལོ་དེ་ལས་ཀྱང་བསྒྱུར་ཐུབ་མེད།
ཉིས་སྟོང་བརྒྱད་ལོར་ལྷ་ས་གཙུག་ལག་ཁང་དུ་གསར་འགོད་པའི་མིག་སྔུན་ལ། རྒྱ་གཞུང་གིས་ཡིད་ཆེས་བློ་འགེལ་བྱས་ནས་གྲྭ་བ་འགའ་འཁྲིད་ཡོང་བ་དེ་ཚོས་གནད་འགག་ལ་ཐུག་དུས་ག་རེ་བྱེད་མིན་དང་། དོན་དམ་པར་ཁོ་ཚོའི་སེམས་ལ་ཅི་ཞིག་ཉར་བསྡད་ཡོད་མེད་གསལ་བོར་ཆགས་པ་རེད། སྐབས་དེར་རྒྱ་གཞུང་ནི་ངོ་ཚ་བའི་སྒང་ལ་མགོ་འཐོམས་པ་རེད། དབུས་ཀྱི་བོད་རིགས་རྣམས་མདོ་ཁམས་ཕྱོགས་ཀྱི་བོད་མི་ལྟར་སྐད་བརྒྱབས་ནས་གདོང་ལ་མཆོངས་མི་ཡོང་བར་ཐབས་ཇུས་གཞན་ཞིག་གི་སྟེང་ནས་བོད་དོན་སྒྲུབ་སྟངས་དེས། རྒྱ་གཞུང་གིས་དྲག་སྡོམ་བྱེད་པར་ཆེས་ཁག་པོར་གྱུར་ཡོད་ལ། རྣམ་འགྱུར་འདི་འདྲའི་སྒང་ལ་རྒྱ་གཞུང་གི་གདུག་རྩུབ་ཀྱི་སྲིད་ཇུས་ཀྱང་ཐང་ཆད་ཡོད། དེས་མི་ཚད་ཉེ་ཆར་ཕྱི་ལོགས་སུ་འབྱོར་བའི་ཉིས་སྟོང་བརྒྱད་ལོར་ལྷ་སར་བོད་མི་ཚོ་གང་བྱུང་ལ་བཙན་ཁྲིད་བྱས་ཚུལ་གྱི་བརྙན་འཕྲིན་ཐུང་ངུ་དེའི་ཡོང་ཁོངས་ཀྱང་ཚོད་དཔག་མི་ཐུབ་ས་གང་ཡང་མེད། བརྙན་འཕྲིན་དེ་ཉེན་རྟོག་པ་འམ་དེ་དང་མཉམ་འགྲོ་བྱེད་མཁན་ཞིག་གིས་བླངས་འདུག་པས་ལུས་རྒྱ་གཞུང་གི་ལས་ཁུངས་ནང་དུ་སྡོད་དགོས་བྱུང་ཡང་། སེམས་བསམ་པ་རང་མི་རིགས་ཀྱི་ཕྱོགས་སུ་ཀ་ལངས་ལངས་ཡིན་པའི་བོད་རིགས་ལས་བྱེད་པ་ཚོའི་ལག་ནས་ཡོང་བ་གསལ་བོ་རེད། གནས་སྟངས་འདི་འདྲར་བརྟེན་ནས་ཉེ་ཆར་རྒྱ་གཞུང་གིས་དབུས་གཙང་ཕྱོགས་ཀྱི་བོད་རིགས་ལས་བྱེད་པ་ཚོར་གཟས་པའི་སྒྲིག་ཁྲིམས་མི་འདྲ་བ་མང་བོ་བཟོས་ཏེ་དོགས་ཟོན་ཆེན་པོ་བྱེད་ཀྱི་ཡོད་འདུག མདོར་ན། དབུས་གཙང་མི་རིགས་ལ་མདོ་ཁམས་ཀྱི་མི་གཤིས་དང་མི་འདྲ་བའི་སྤྱང་གྲུང་གི་མི་གཤིས་རང་ཆས་སུ་མངའ་བ་དང་། མི་གཤིས་དེའི་ཐག་གཅོད་ལྟར་ཁོང་ཚོའི་བོད་དོན་འཐབ་རྩོད་ཁྲོད་ཀྱི་རྣམ་འགྱུར་འཛིན་སྟངས་ཀྱང་མི་འདྲ་བ་ཞིག་ཡིན་པ་གསལ་བོ་རེད་འདུག
ཨ་མདོའི་མི་རིགས་ནི་ཚོར་བ་རྣོན་པོ་ཅན་དང་། བདེན་སྐྱོང་གི་སྙིང་སྟོབས་ཅན། བློ་རིག་བཀྲ་བའི་མི་རིགས་ཤིག་རེད། ལྷག་ཏུ་ཁོང་ཚོའི་ཚོར་རྟོག་གི་བསམ་བློ་ནི་གཞན་ལས་རྣོ་ཞིང་དབལ་ཚ་བ་ཞིག་ཡིན་པས། བླ་ན་མེད་པའི་ཚོར་རྟོག་གི་བསམ་བློ་དེ་ལ་བརྟེན་ནས་རིགས་ཞེན་དང་བདེན་སྐྱོང་གི་བསམ་བློ་ཐམས་ཅད་ལག་ལེན་གྱི་ཁྲོད་དུ་ཚུར་སྣང་བྱེད་ཀྱི་འདུག་ལ། ཁོང་ཅག་ནི་མི་གཤིས་འདིས་བཏེགས་ཏེ་བོད་ཀྱི་རྩོམ་རིག་དང་འཐབ་རྩོད་གཉིས་ཀྱི་ཁྲོད་ན་གཞན་ལས་འབུར་དུ་ཐོན་ཡོད་པ་ཞིག་ཀྱང་རེད། ལོ་འདི་གར་སྨྱུ་གུ་བཟུང་ནས་གཉའ་གནོན་སྲིད་གཞུང་གི་གདོང་ཐད་ལ་ཚེ་སྲོག་བློས་བཏང་གིས་བུད་པའི་བོད་ཀྱི་ཤེས་ཡོན་པ་མང་ཤོས་དེ་ཨ་མདོ་ནས་བྱུང་ཡོད། ངས་བལྟ་དུས་བོད་ཀྱི་ལོ་རྒྱུས་ཁྲོད་དུ་ལྟོས་འཇོག་གིས་ཤེས་ཡོན་པ་དང་། སྙན་ངག་པ་སོགས་གྲངས་ཀ་དང་སྤུས་ཀ་གཉིས་འཛོམས་ཀྱི་དཔུང་ཁག་ཆེན་པོ་ཞིག་ཨ་མདོ་ནས་འཚར་ལོངས་བྱུང་ཞིང་། ལེགས་འགྲུབ་བྱུང་ཐུབ་པའི་རྩ་བའི་རྒྱུ་རྐྱེན་ཆེ་ཤོས་དེ་འདི་རེད་བསམ་གི་ཡོད་ལ། ཚོར་སྐྱེན་གྱི་མི་གཤིས་འདི་ལ་བརྟེན་ནས་ཁོང་ཚོའི་བོད་དོན་འཐབ་རྩོད་ཁྲོད་ཀྱི་རྣམ་འགྱུར་ཀྱང་བོད་རིགས་སྤུན་ཟླ་གཞན་དག་དང་མི་འདྲ་ས་ཆེན་པོ་ཞིག་འདུག་བསམ་གྱི་ཡོད། ལོ་འདི་གར་གཅིག་ཤོར་གཉིས་ཤོར་གྱིས་ཚེ་སྲོག་སྲེག་སྦྱོར་བྱེད་པའི་ལས་འགུལ་བློ་ཡུལ་དུ་མི་ཤོང་བ་དེ་གཙོ་བོ་ཨ་མདོའི་ཕྱོགས་ནས་བྱུང་དོན་དང་། དེ་ཡང་ལོ་ན་ཉི་ཤུ་ཟིན་མ་ཟིན་གྱི་གྲྭ་ཕྲུག་ཚོའི་ཁྲོད་ནས་མང་དུ་བྱུང་དོན་ནི་ཚོར་རྟོག་གི་བསམ་བློ་དེ་ལ་བརྟེན་ནས། འདི་ལྟ་བུའི་བླ་ན་མེད་ལ་གོང་ན་མེད་པའི་སྙིང་སྟོབས་ཤིག་མངོན་གྱུར་བྱ་ཐུབ་སོང་བ་རེད་བསམ་གྱི་ཡོད།
དེ་ཡང་ཁ་ཇེ་གསལ་དུ་བཏང་ནས་བཤད་ན། བདེན་དོན་ཀྱི་ཆེད་དུ་རང་སྲོག་རང་གཅོད་བྱེད་པ་དེ་ཨ་མདོའི་ཕྱོགས་ལ་གསར་བ་ཞིག་མིན་ཏེ། ༡༩༨༥ ལ་དཔལ་དོན་གྲུབ་རྒྱལ་དང་ཉེས་སྟོང་བརྒྱད་ལ་གཅན་ཚ་ནས་སློབ་ཕྲུག་གཡུང་ལྷུན་འགྲུབ་གཉིས་ཀྱིས་ཀྱང་རང་སྲོག་བདེན་དོན་དུ་བསྔོས་པ་རེད། འོན་ཀྱང་། ཉེ་བའི་ལོ་ནས་རང་སྲོག་སྲེག་སྦྱོར་བྱེད་པའི་རླབས་གསར་བ་ཞིག་གཙོ་བོ་ཨ་མདོ་རྔ་པའི་གཙོས་པའི་མདོ་སྨད་ཕྱོགས་ནས་འཕྱུར་ཞིང་། དེ་ད་ལྟ་མུ་མཐུད་དེ་འགྲོ་བཞིན་ཡོད་པ་དང་བོད་ཡུལ་གང་སར་ཁྱབ་བཞིན་ཡོད་པ་འདི་རེད། གོང་སྨྲོས་ཀྱི་རང་སྲོག་རང་དོར་གྱི་རླབས་ཆེ་བའི་ལས་འགུལ་སྔ་ཕྱི་ཀུན་པོར་རྒྱུ་རྐྱེན་སྣ་ཚོགས་པ་ཞིག་ཡོད་པའི་ནང་གི་ཐུན་མོང་དང་གཙོ་བོ་གཅིག་དེ། ཨ་མདོའི་མི་རིགས་འདི་ལ་ཚོར་རྟོག་གི་ཤེས་རབ་གཞན་ལས་མཆོག་ཏུ་གྱུར་བ་ཞིག་ཡོད་པ་དེ་རེད། རང་སྲེག་གི་ལས་འགུལ་འདི་བོད་མི་གཞོན་སྐྱེས་ཚོའི་ཁྲོད་ལ་ཤུགས་ཆེན་པོ་བྱུང་དོན་ཀྱང་དེ་ག་རང་རེད། ནུབ་ཕྱོགས་ཀྱི་མཁས་པ་ཚོས་སྤྱི་བསྡོམས་བརྒྱབ་པ་ལྟར་གཞོན་རབས་པ་ནི་ཚོར་སྣང་གི་རང་བཞིན་ཅན་ཡིན་པས་རེད། གཞོན་རབས་པས་རང་གི་ཚོར་རྟོག་ལ་བརྟེན་ནས་གསར་བཏོད་དང་། གཏོར་བཤིག ཐོལ་བརྒལ་སོགས་བྱེད་ཐུབ་ལ། ཐ་ན་རང་གི་ཚེ་སྲོག་ཀྱང་གཏོར་བརླག་བྱེད་ཕོད་པ་ནི་གཞོན་རབས་པའི་གཤིས་ཀ་རེད། མདོར་ན། ཚོར་རྟོག་གི་ཤེས་རབ་གང་དུ་བདོག་པའི་གནས་སུ་བླ་ན་མེད་པའི་གསར་བཏོད་དང་། བྱ་དཀའ་བའི་རླབས་ཆེན་གྱི་ལས་དོན་ཡོད་པ་ཡིན་པས་བོད་ནང་དང་ལྷག་པར་ཨ་མདོའི་ཕྱོགས་ཀྱི་རང་སྲོག་རང་དོར་གྱི་བྱ་དཀའ་བའི་ལས་འགུལ་འདི་ཡང་དེ་ལྟར་བྱུང་བ་ཡིན་ནོ།།
ཁམས་མི་རིགས་ནི་བློ་ཁོག་ཆེ་ཞིང་། བློ་རྩ་བརྟན་པ། ཡིད་རྟོན་རུང་བ། རྒོལ་འཛིང་ལ་མཁས་པའི་མི་རིགས་ཤིག་རེད། གླིང་སྒྲུང་ནང་གི་དཔའ་རྟུལ་སུམ་ཅུའི་མི་གཤིས་ཀྱང་འདི་ལ་གཞི་བཅོལ་ནས་བཀོད་འབྲི་བྱས་པ་ཞིག་དང་མཚུངས་ཤིང་། སྔོན་ཆད་དཔའ་བོ་ལ་རིན་ཐང་ཆེ་དུས་དང་གཡུལ་འཁྲུག་གིས་ལོ་རྒྱུས་བསྐྲུན་པའི་དུས་སྐབས་ལ། བོད་དམངས་ཁྲོད་དུ་མི་རིགས་འདི་ལ“མྱིའི་ཆོལ་ཁ”ཞེས་ཡོངས་སུ་གྲགས་ཡོད། དེ་ཡང་དཔའ་འཛིང་ལ་མཁས་པ། སྒམ་རླིང་ལྡན་པ་སོགས་སྐབས་དེའི་མིའི་ཚད་གཞི་དང་རིན་ཐང་མང་དག་ཅིག་མི་རིགས་འདིའི་མི་གཤིས་ཀྱི་སྒང་དུ་འཛོམས་ཡོིད་པས་བོད་མདོ་དབུས་ཁམས་གསུམ་གྱི་ནང་ནས། ཁམས་མི་རིགས་ལ་མྱིའི་ཆོལ་ཁ་ཞེས་གདེང་འཇོག་གམ་ངོས་འཛིན་བྱས་པ་ཞིག་ཡིན་སྣང་འཆར། བོད་ལ་ཐོག་མར་རྒྱ་དམར་གྱིས་བཙན་འཛུལ་བྱེད་སྐབས་སུ་རྒྱ་རྒན་མོ་ཙེ་ཏུང་གིས་ཀྱང་ཁམས་པ་ཚོར་གླགས་འཁེལ་ན་དེ་ནས་བོད་དབང་སྒྱུར་བྱ་རྒྱུ་ལས་སླ་བོ་ཡིན་རབས་བཤད་མྱོང་སྐད་འདུག གང་ལྟར་ངས་བཤད་འདོད་པ་ནི། ཁམས་མི་རིགས་ལ་རྒོལ་འཛིང་གི་མི་གཤིས་ཆེན་པོ་ཡོད་པ་དང་མི་གཤིས་དེ་ལ་བརྟེན་ནས་བོད་དོན་འཐབ་རྩོད་ཁྲོད་ཀྱི་ཁོང་ཚོའི་རྣམ་འགྱུར་དང་གྲུབ་འབྲས་ཀྱང་བོད་རིགས་སྤུན་ཟླ་གཞན་དག་དང་མི་འདྲ་བ་ཞིག་རེད། ཁོང་ཚོས་རང་གི་རྒོལ་འཛིང་གི་མི་གཤིས་དེ་ལ་བརྟེན་ནས་ལྔ་བཅུ་ང་དགུ་ཡས་མས་སུ་གུང་བྲན་ཏང་གི་དམར་དམག་ལ་ཁ་གཏད་བཅག་ཅིང་། ལྷག་པར་དུ་ཆུ་བཞི་སྒང་དྲུག་གི་བསྟན་སྲུང་དང་བླང་དམག་དཔུང་གིས་༧་གོང་ས་མཆོག་གིས་དབུས་པའི་བོད་སྡེ་བ་གཞུང་རྒྱ་གར་ལ་གདན་འདྲེན་ཞུས་པ་རེད། འདི་ནི་ཁམས་མི་རིགས་ཀྱི་རང་གི་མི་གཤིས་ཀྱི་ཐག་གཅོད་ལྟར་བོད་དོན་འཐབ་རྩོད་བྱེད་སྟངས་དང་། བོད་དོན་འཐབ་རྩོད་ཁྲོད་ཀྱི་རྣམ་འགྱུར། བོད་དོན་འཐབ་རྩོད་ལ་བཞག་པའི་གྲུབ་འབྲས་བཅས་རེད།
སྤྱིར་ད་ལྟ་བར་དུ་བོད་ཡུལ་བྱིངས་སུ་འཚེ་མེད་ཞི་བའི་རྣམ་པ་འབའ་ཞིག་གི་སྟེང་ནས་རྒྱ་གཞུང་ལ་ངོ་རྒོལ་བྱེད་མུས་ཡིན་ཡང་། ཁམས་ཕྱོགས་སུ་ཉིས་སྟོང་བརྒྱད་ནས་ད་བར་འབར་གས་ཀྱི་དོན་རྐྱེན་ཆུང་ཆུང་རེ་ཐེངས་དུ་མར་བྱུང་ཡོད། གསར་འགྱུར་དུ་ཐོན་གསལ་ལྟར་ན་སྨར་ཁམས་ནས་དོན་རྐྱེན་དེ་འདྲ་ཐེངས་དགུ་ལ་བྱུང་ཞིང་། འདམ་ཁོག་ཏུ་ཐེངས་གཉིས། ཇོན་འདའ་རུ་ཐེངས་གཅིག ཆབ་མདོར་ཐེངས་གཅིག སྡེ་དགེ་རུ་ཐེངས་གཅིག་བཅས་བྱུང་སྐད་འདུག འོན་ཀྱང་། ད་ལྟ་བར་དུ་༧གོང་ས་མཆོག་ལ་མཚན་དམོད་བྱེད་པར་ངོ་རྒོལ་ཆེད་བརྙན་འཕྲིན་གྱི་འཕྲུལ་ཆས་ཨ་མ་གཏོར་བ་དང་། རྒྱལ་གཅེས་ཆོས་གཅེས་ཀྱི་ལས་འགུལ་སྤེལ་སའི་ཏང་ཡོན་ཚོགས་ཁང་། དེ་བཞིན་དམག་དཔུང་གི་རླངས་འཁོར་སོགས་གཏོར་བ་མ་གཏོགས་མིའི་ཚེ་སྲོག་ལ་འཚེ་བ་བྱེད་པའི་སྦྱོར་བ་བརྩམས་ཡོད་པ་མ་རེད། དེས་མི་ཚད་ཁམས་ཕྱོགས་ཀྱི་ས་ཆ་མང་བོ་ཞིག་ནས་ཉེན་རྟོག་པའི་རླངས་འཁོར་མེར་བསྲེགས་པ་དང་། ཉེན་རྟོག་པ་དང་འཁྲུག་འཛིང་བྱུང་བའི་གནས་ཚུལ་ཀྱང་མང་བོ་བྱུང་འདུག རྒྱ་གཞུང་གི་རྣམ་འགྱུར་ཡག་ཏུ་མ་ཕྱིན་པ་དང་བོད་མིའི་གནས་སྟངས་སྡུག་པོ་འདི་མུ་མཐུད་དེ་ཕྱིན་ཚེ། མི་རིགས་འདིས་རང་གི་མི་གཤིས་དང་འཚམས་པའི་ལས་ཀ་བློ་ཡུལ་དུ་མི་ཤོང་བ་ཞིག་བྱེད་མི་སྲིད་པ་ཁྱོན་ནས་མ་རེད་ལ། འབྱུང་འགྱུར་ཁམས་ཕྱོགས་ནས་བོད་དོན་འཐབ་རྩོད་ཀྱི་རྣམ་པ་གཞན་དུ་འགྱུར་ཞིང་དེ་ནས་བོད་ཡུལ་བྱིངས་ལ་རྒྱ་ཁྱབ་ཏུ་འགྲོ་མི་སྲིད་པ་གཏན་ནས་མ་རེད། ཕྱོགས་གཅིག་ནས་བལྟས་ན་དེ་འདྲའི་ས་བོན་ཙམ་ད་ལྟ་ནས་ཡོད་པ་གོང་སྨྲོས་ལྟར་རེད། སྤྱིར་བོད་མི་རིགས་ཟེར་བ་འདི་ཤི་རྒྱུར་སྐྲག་མཁན་གྱི་སྡར་མའི་མི་རིགས་དེ་འདྲ་མ་རེད། ལྷག་ཏུ་ཁམས་མི་རིགས་ལ་སྐུ་མཁྱེན་ང་ཚོར་རང་དབང་སྤྲོད་རོགས་ཟེར་ནས་གཉོམ་སྐད་རྒྱག་པའི་མི་གཤིས་དེ་འདྲ་མེད་པའི་སྒང་ལ། ཁྱོད་ཀྱིས་ངའི་སྤུན་ཟླ་ཚོ་དམར་གསོད་བཏང་ན་ངས་ཁྱོད་ལ་དགྲ་ཤ་རྩོད་རྒྱུ་ཡིན་ཟེར་ནས་ཐད་ཀར་རྒོལ་འཛིང་བྱེད་པའི་མི་གཤིས་དང་བློ་ཁོག་གཉིས་ཀ་ཡོད་པའི་མི་རིགས་ཤིག་རེད།
མཇུག་གཏམ།
འབྱུང་འགྱུར་གྱི་བོད་དོན་འཐབ་རྩོད་ཁྲོད་ནས་བོད་མིའི་སྤྱང་གྲུང་གི་མི་གཤིས་ཀྱིས་རྒྱ་རྒན་ཚོ་འུ་ཐུག་གི་འཇུག་རྒྱུ་རེད། འཚོལ་རྟོག་གི་མི་གཤིས་ཀྱིས་འཛམ་གླིང་ཧང་སངས་གི་འཇུག་རྒྱུ་རེད། རྒོལ་འཛིང་གི་མི་གཤིས་ཀྱིས་པེ་ཅན་ལ་དངངས་སྐྲག་ཤོར་དུ་འཇུག་རྒྱུ་རེད། འཐབ་རྩོད་ཁྲོད་ཀྱི་མི་གཤིས་དང་རྣམ་འགྱུར་མི་འདྲ་བ་འདི་གསུལ་ལ་ཡག་བཙོག་དང་མཆོག་དམན་གྱི་ཁྱེད་པར་གང་ཡང་མེད་པར། བོད་དོན་འཐབ་རྩོད་ལ་མེད་དུ་མི་རུང་བའི་ངོ་ལོག་གི་སྙིང་སྟོབས་མི་འདྲ་བ་གསུམ་ཡིན་པས། བདག་ཅག་གིས་སྙིང་ཐག་པ་ནས་བཀུར་བར་འོས་པའི་གནས་རེད། བོད་ཀྱི་མི་རབས་གསར་བ་ཚོའི་རིགས་ཞེན་དང་སྙིང་སྟོབས་ལ་བལྟས་ཡོང་ན། ལོ་རྒྱུས་ཀྱི་བདེན་པ་བློས་བཏང་ནས་ཁྱིམ་ཚང་གཞན་ཞིག་ནས་བདེ་བདེ་སྐྱིད་སྐྱིད་ཀྱིས་འཚོ་བའི་དུས་ཤིག་འབྱུང་མི་སྲིད་པ་ཇེ་གསལ་ནས་ཇེ་གསལ་རེད་པས། དོན་དངོས་འདི་བོད་མི་དང་རྒྱ་མི། ད་དུང་འཛམ་གླིང་གི་མི་ཐམས་ཅད་ཀྱི་མིག་སྔུན་ལ་དྲང་ཐད་ཀྱིས་འཇོག་རྒྱུ་ནི་གཡོལ་དུ་མེད་པའི་བདག་ཅག་གི་འོས་འགན་རེད་ཅེས་ཐལ་ལོ།།
མཆན་བུ་ཐམས་ཅད་ལས་ཏྲེ་ཧོར་བ་ཁྱེད་ཀྱི་མཆན་བུ་དེ་བསམ་རིན་ཡོད་པ་ཞིག་ལ་བསམ་མོད། སློབ་གཉེར་གྱི་བྲེལ་ཟིང་ཁྲོད་ནས་ཨ་ལན་ཞིག་ད་བར་འདེབས་མ་བཏུབ་པས་དགོངས་སེལ་ཞུ། རེད། ངས་རྐང་བཙུགས་ནས་ཆོལ་ཁ་ཞེས་པའི་སོག་སྐད་རུལ་དྲི་མ་འདི་བེད་སྤྱོད་བཏང་མེད། ངས་བལྟས་ན་ང་ཚོས་འདི་ལ་ཞེན་ཆགས་ཆེན་པོ་ཞིག་བྱེད་རིན་མི་འདུག་བསམ་གྱི་ཡོད། འོན་ཀྱང་། འུ་ཚང་གི་གྲོས་ཚོགས་ཀྱི་ལམ་ལུགས་འདི་ལ་བསྟུན་པ་དང་། རྒྱལ་གླུ་ཚུན་ཆད་ནང་དུ་ཡང་སོག་སྐད་འདི་ལ་གོ་ས་ཆེན་པོ་ཞིག་བཞག་འདུག མ་ཟད་བོད་པ་བཙན་བྱོལ་བ་རྒན་གཞོན་དར་གསུམ་གྱིས་འདི་ལ་ཞེན་ཆགས་དང་དགའ་ཞེན་བྱེད་སྟངས་ནི་བློ་ལ་མི་ཤོང་བ་ཞིག་རེད། མདོར་ན་སོག་སྐད་འདི་ཡོན་གོང་མའི་ཕྱོགས་ཀྱིས་བོད་ཡུལ་དུམ་བུ་་གསུམ་དང་ཚལ་བ་བརྒྱ་རུ་གཏོང་ཕྱིར་ཆེད་བཟོས་ཐ་སྙད་ཅིག་རེད་བསམ་ནས་བེད་སྤྱོད་བྱེད་སྙིང་སྤྲོ་ཡི་མེད། དེ་ལས་བོད་མདོ་དབུས་ཁམས་གསུམ་ཞེས་པའི་ཐ་སྙད་འདི་བོད་སྐད་གཤའ་མ་ཞིག་ཡི་པའི་སྒང་ལ་བོད་ཡུལ་གྱི་ཆགས་བབ་དང་བསྟུན་ནད་བཏགས་པའི་བརྡ་ཆད་སྙིང་རྗེ་བོ་དང་ལྷད་མེད་པ་ཅིག་རེད་པས་དེ་ལྟར་བཀོལ་བ་ཡིན། འོན་ཀྱང་། ལོ་རྒྱུས་ཀྱི་གནད་ཀ་གཞན་ཞིག་གླེང་སྐབས་སོག་སྐད་འདི་ལ་དོན་སྙིང་གཞན་ཞིག་ཡོད་སྲིད་ལ་དེ་ནི་ལོ་རྒྱུས་ཀྱི་ཁྲོད་ནས་གླེང་ན་མཛེས་པ་ལས། ཚོད་ཚོད་ལ་སོག་སྐད་འདིའི་རྗེས་སུ་རྒྱུག་དགོས་དོན་གང་ཡོད་པ་མ་རེད། གཞན་དབུས་སོགས་ཀྱི་མི་རིགས་ཞེས་བརྗོད་ཚེ་དེ་དག་སྐད་ཡིག་དང་རིག་གནས་མི་འདྲ་བའི་ཐ་དད་པའི་མི་རིགས་ཤིག་ལ་གོ་འགྲོ་ཚུལ་བརྗོད་པ་དེའི་སྐོར་ལ་བསམ་བློ་བཏང་བ་ཡིན་ཏེ། ཁམས་སོགས་ཀྱི་མི་རིགས་ཟེར་བ་ཞིག་ཡོད་པར་ཁས་བླངས་ཚར་བའི་གཞུག་ཏུ་འདི་ལ་འགལ་བ་མི་འདུག ཁམས་མི་རིགས་དང་། དབུས་མི་རིགས། ཨ་མདོའི་མི་རིགས་ཟེར་བ་ཞིག་མེད་ཅེས་ཁས་ལེན་རུང་ཚེ་ཁྱེད་ཀྱིས་བཤད་པ་ལྟར་ངས་ཐ་སྙད་བེད་སྤྱོད་བྱས་པ་ནོར་འདུག རྡོག་བསྒྲིལ་ནན་དེ་འདྲ་ཞིག་རེད་བསམ་སོང་།
གྲོགས་པོ་བྱམས་པ་རྒྱལ་མཚན་ཕེབས་པས་ཤུན་ཏུ་དགའ་ཡོད།
གྲོགས་པོ་ལགས། ཧ་ཅང་གནད་ལ་འཁེལ་བ་ཞིག་རེད། དྲ་གྲོགས་ཤིག་གི་བཤད་པ་ལྟར་རེད། ཆོལ་ཁ་རེ་རེའི་མཇུག་ཏུ་མི་རིགས་ཞེས་པ་ཞིག་སྦྱར་ཡོང་དུས་མི་རིགས་ཁ་ཁ་འདྲ་བོ་ཞིག་གི་གོ་བ་སྟེར་བས་བདེ་བོ་དེ་ཙམ་མི་འདུག ཡིན་ཡང་། དེའི་ཚབ་ཏུ་གཞན་ཅི་ཞིག་སྦྱོར་དགོས་པའང་ཤེས་མ་སོང་། རྩ་བའི་ཡག་པོ་འདུག་ལ། མུ་མཐུད་དུ་ཕྲིས།
སྤྱིར་རྫ་སྲས་ལགས་ཀྱི་རྩོམ་ཡིག་འདི་དོན་སྙིང་ཡོད་པ་མཐོང་སོང་ལ་རྒྱབ་སྐྱོར་ཀྱང་ཡོད། ཡིན་ནའང་ཡག་པའི་ཕྱོགས་དེ་ཟུར་དུ་བཞག་ནས་ཞུ་རྒྱུ་ཞིག་ལ། ཁྱོད་ཀྱིས་རྩོམ་ཡིག་གི་འགོ་མཇུག་བར་གསུམ་དུ་དབུས་མི་རིགས་དང་མདོ་དང་ཁམས་མི་རིགས་ཞེས་ཆོལ་ཁ་རེར་མི་རིགས་ཞེས་སྦྱར་ཏེ་ལོགས་སུ་བཀར་ནས་བྲིས་འདུག་པ་དེའི་ཐད་གསལ་བྱེད་ཅིག་ཞུ་འདོད་བྱུང་། ཆོལ་ཁ་ཞེས་པ་ནི་སྔོན་གྱི་དུས་སུ་སྲིད་འཛིན་མངའ་ཁུལ་ཁག་སྟབས་བདེའི་སྟངས་འཛིན་གྱི་ཆེད་དུ་ས་ཁོངས་ཀྱི་བཅད་བགོས་ཀྱི་བཏགས་མིང་ཙམ་རྒྱུན་འཇགས་སུ་སོང་བ་ཙམ་ལས་དོན་དུ་སྐད་དང་ཡི་གེ་ཆོས་དང་རིག་གཞུང་། རིགས་དང་རྒྱུད་པ་ཐམས་ཅད་བོད་མི་རིགས་ཆེན་པོའི་ཁོངས་སུ་གཏོགས་པའི་གཅིག་གྱུར་གྱི་རིགས་མཐུན་སྤུན་ཟླ་ཡིན་པ་ལས། འདི་གསུམ་ལ་ཐུན་མིན་གྱི་ཁྱད་ལྷག་མངོན་གསལ་ཅིའང་མེད་པར་མ་ཟད། ཡང་སྒོས་སུ་དབུས་དང་མདོ་དང་ཁམས་སོ་སོར་མི་རིགས་ཞེས་ནན་གྱིས་སྦྱར་ཡོད་པ་དེ་ཁྱོད་ཀྱིས་ཐ་སྙད་བཀོལ་སྟངས་ཐད་ཀྱི་ནོར་འཁྲུལ་ཆེན་པོ་ཞིག་ཏུ་སེམས། གཞན་རྒྱབ་སྐྱོར་ཡོད།
འཁྱོམས་པོས་བཤད་པ་ལ་མངོན་པར་བཀུར་ཏོ། མཆན་བུ་དེ་མཇུག་གཏམ་དུ་བསྣན་ཚེ་ཡག་ན་ཐང་གི སྤྱིར་བཤད་ན་ཡང་རྩོམ་ཡིག་འདིས་སྡུད་མ་བཏུབ་པའི་དོན་གནད་གང་མང་ཞིག་ཡོད་པ་དང་ཁ་སྣོན་བྱེད་དགོས་ཡག་མང་བོ་ཞིག་ཡོད་པ་དེ་བཞིན། ངས་ཀྱང་རྕོམ་ཡིག་འདིའི་ཐོག་མ་ཉིད་ནས་འབོད་སྐུལ་དང་རེ་བ་འདི་ལྟར་བྱས་ཡོད། ༼འདི་ལ་ཀློག་པ་པོ་རྣམ་པས་ཀྱང་ལྷག་པ་འཕྲི་བ་དང་ཆད་པ་སྣོན་པ་ནོར་བ་བཅོས་པ་སོགས་ཀྱི་བགྱི་བ་ལྷུ་རུ་ལེན་རོགས་ཟེར་གྱི་ཡིན།༽ འོན་ཏང་། རེ་བ་ནང་བཞིན་འགྲུབ་མ་སོང་།
རྫ་སྲས་ལགས་ཧ་ཅང་ཡག་པོ་བྲིས་འདུག་དེ་ག་རང་རེད།
ང་ལ་ཞུ་རྒྱུ་ཞིག་ཡོད་པ་ནི་ཁྱེད་ནས་ ཆབ་བྲག་ལ་བྲིས་པས་ལན་ལས།
(བོད་མི་རིགས་ནི་བོད་མི་རིགས་རང་གིས་འགྲེལ་ཤེས་པ་ལས་ཕྱི་རྒྱལ་མགོ་སེར་ཞིག་གམ། རྒྱ་རྒན་མི་ཤེལ་ཅན་ཞིག་གིས་རྒྱང་ལྟ་བྱས་ནས་འགྲེལ་ཤེས་པ་ཞིག་མིན།) ཞེས་པ་དེ་མཇུག་གི་གཏམ་ལ་ཁ་སྣོན་དུ་བྲིས་ན་དེ་ལས་ཡག་པ་འདུག
ཆབ་བྲག་ལགས་ཀྱིས་གསུངས་བ་ལྟར་རེད། ངས་ཀྱང་དེ་ལྟར་འདོད་ཀྱི་ཡོད། བོད་མི་རིགས་ནི་བོད་མི་རིགས་རང་གིས་འགྲེལ་ཤེས་པ་ལས་ཕྱི་རྒྱལ་མགོ་སེར་ཞིག་གམ། རྒྱ་རྒན་མི་ཤེལ་ཅན་ཞིག་གིས་རྒྱང་ལྟ་བྱས་ནས་འགྲེལ་ཤེས་པ་ཞིག་མིན། ང་ཚོས་བདེན་པ་ཟེར་བའི་བླ་ན་མེད་པ་དེ་གཞི་རྩར་བཟུང་ནས་རིགས་པའི་རྣམ་གྲངས་མཐའ་ཡས་པ་སྤྱད་དེ་བོད་རང་དབང་འཐབ་རྩོད་ཀྱི་རླབས་ལ་བལྟ་དགོས་གྱི་འདུག ཞིབ་འཇུག་བྱེད་དགོས་འདུག བཀའ་ཤག་གསར་བས་ས་བྱི་ཞི་རྒོལ་ལ་ཞིབ་འཇུག་བྱེད་རྒྱུ་ཡིན་སྐོར་བཤད་སོང་བས། དེ་ཡང་མགྱོགས་ཙམ་བྱེད་དགོས་ཚོད་རེད།
རྒྱུ་མཚན་འདི་རིགས་ཀྱིས་བདག་གིས་ཀྱང་༢༠༠༧ལོར། ང་བོད་ལ་ཡིད་ཆེས་ཡོད། ཅེས་པའི་རྩོམ་ཐུང་ཞིག་སྤེལ་ཡོད། ད་བར་དུ་ཡིད་ཆེས་དང་རེ་བའི་མེ་ལྕེ་ཤུགས་ཇེ་ཆེར་འགྲོ་བཞིན་ཡོད།
རང་གིས་རང་ལ་ཡིད་ཆེས་དང་རེ་བ་སྦར་དགོས་ལ། དེ་ཡང་རྒྱུ་མཚན་ནམ་གཏན་ཚིགས་ཤིག་གི་གཞི་རྟེན་ཡོད་དགོས། ང་ཚོས་འདི་ལྟར་རང་གི་མིག་གིས་རང་ཉིད་དང་རང་རིགས་མཐོང་རྒྱུ་ནི་ཧ་ཅང་གལ་ཆེན་རེད།
དྲ་རོགས་ལུང་རྟོགས་དང་། རྟུལ་ཕོད་གཉིས་ཕེབས་པས་དགའ་ཡོད། བསྟོད་བསྔགས་བྱས་པས་སྤྲོ་ཡོད། དུས་འདིར་བླ་ན་མེད་པའི་བོད་མིའི་སྙིང་སྟོབས་དང་ཆོད་སེམས་ལ་ཕྱོགས་ཡོངས་ནས་བལྟ་རྒྱུ་དེ་ཧ་ཅང་གལ་ཆེན་ཆགས་བསྡད་འདུག
ཁ་སྔོན་ཝང་ལེ་ཞུང་གིས་ཀྱང་བོད་མི་རིགས་ནི་རྒྱ་རིགས་ཀྱང་སྙིང་སྟོབས་ཆེ་བ་འདུག་ཅེས་ཁས་ལེན་བྱས་སོང་། དེ་འདྲ་ཞིག་ཡིན་སྲིད་ལ་མིན་ཀྱང་སྲིད། གང་ལྟར་བོད་དོན་འཐབ་རྩོད་ཀྱི་ལེའུ་འདི་ང་ཚོའི་མི་རིགས་ལ་མཚོན་ན་ཉམས་སད་ཐེངས་གཅིག་རེད། བོད་མི་རིགས་ཟེར་བ་དེ་གང་འདྲ་ཞིག་ཡིན་མིན་དེ་འདི་དང་འདྲའི་སྒང་ནས་ལྷིང་ལ་འབུད་ངེས། ལོ་རྒྱུས་ཀྱི་ཁྲོད་ནས་ལྷིང་ལ་འབུད་ངེས། ཇོས་ཞུ་མི་རིགས་དང་རྒྱ་གར་མི་རིགས་ཀྱི་སྙིང་རུས་ཀྱང་འདི་དང་འདྲའི་སྒང་ནས་འབུར་དུ་ཐོན་ཡོད།
རྫ་སྲས་ལགས། ངོ་མ་ཡག་པོ་བྲིས་འདུག་ངས་ཁ་སང་ཐེངས་གཅིག་བཀླགས་པ་ཡིན་སེམས་ལ་ཟུག་འགྲོ་ནི་ཞིག་དང་སྙིངས་སྟོབས་སློང་ཡོང་ནི་ཞིག་བྲིས་འདུག་ངོ་མ་བཀྲིན་ཆེ། རྒྱུ་མཚན། འུ་ཚོས་དུས་སྐབས་འདི་འདྲ་བ་ཞིག་ལ་བོད་མི་ཚོར་སྙིང་སྟོབས་སློང་བྱེད་དང་གཅིག་སྒྲིལ་བཟོ་བྱེད་ཀྱི་རྩོམ་ཡིག་འབྲི་གལ་ཆེ་ཡ། ཉིད་ཀྱི་སྔོན་མ་ཅིག་བྲིས་ཡོན་ནོ་ཡང་རྣོ་ངར་དང་དཔྱོད་ཤེས་ཀྱིས་ཟིན་ཡོད་པས་ང་དགའ་སའི་རྩོམ་ཞིག་རེད། དུས་དེ་ནས་བཟུང་ངས་ཉིད་ལ་དོན་སྣང་སྤྲོད་རྒྱུའི་འགོ་བཙུག་པ་ཡིན།
དོན་དངོས་དང་མཐུན་ཞིང་གཟུ་བོར་གནས་པའི་རྩོམ་ཡིག་ཅིག་བྲིས་འདུག ངོ་མ་བཟང་ཆ་ནས་བཤད་ན་དེ་འདྲ་ཞིག་རེད་འདོད་སོང་།
དྲ་རོགས་སྣང་རྒྱལ་ཤེར་དགེས་(ངོ་ལོག་གི་སྙིང་སྟོབས་མི་འདྲ་བ་གསུམ)ཞེས་པའི་ངོ་ལོག་གི་ཐ་སྙད་འདི་འུ་ཚང་གི་བྱེད་སྟངས་ལ་འབྱོར་བ་ཞིག་མ་རེད་སྙམ་གསུངས་སོང་། གཉའ་གནོན་སྲིད་གཞུང་གི་བྱ་སྤྱོད་ལ་མཐའ་གཅིག་ཏུ་ངོ་རྒོལ་བྱེད་པའི་ལས་འགུལ་འདི་ལ་ངོ་ལོག་གི་ཐ་སྙད་སྦྱར་ཀྱང་འགལ་བ་ཡོད་གྱི་མ་རེད་བསམ་གི གསར་བརྗེ་ངོ་ལོག་པ་ཟེར་ནས་རྒྱ་གཞུང་གིས་སྡིགས་ར་སྐུལ་བྱེད་བྱས་བྱས་ཀྱིས་ང་ཚོས་ངོ་ལོག་ཟེར་དུས་རྡུགས་ཆགས་འདྲ་ཞིག་ལ་གོ་འགྲོ་ཡི་ཡོད་ན་ཐང་ཏེ། ངོ་རྒོལ་ཟེར་བ་དང་ངོ་ལོག་ཟེར་བ་གཉིས་ཀྱི་སྔ་མ་ལ་ཤུགས་དང་ནུས་པ་ཆེ་བ་མེད་ན་ཆུང་བ་ཡོད་པ་མ་རེད་བསམ་གི ངོ་ལོག་ཟེར་བ་ངོ་རྒོལ་གྱི་སྔོན་འགྲོ་ལ་དགོས་པ་ཞིག་ཡིན་སྣང་འཆར། དཔེར་ན། ངོ་ལོག་ནས་རྒོལ་བ་བྱས་ཟེར་བ་ལྟ་བུ་རེད།
དྲ་རོགས་གནས་ཚང་དང་། བདེ་རྒྱལ། ཨ། གདོན་སྲས། གསེར་འབྲུག་སྡེར་ལྔ་སོགས་ཀྱི་ཡི་རངས་ལ་ཡི་རངས་་དང་བསྔགས་བརྗོད་ལ་དགའ་བསུ་ཞུ་རྒྱུ་ཡིན།
དྲ་གྲོགས་བོན་རྒྱ་དང་། གླག་སྨྱོན་གཉིས་ཕེབས་པས་སྙིང་ནས་དགའ་ཞིང་གླག་སྨྱོན་གྱི་དཔྱད་གཏམ་ལ་རེ་བས་བསྒུག་རྒྱུ་ཡིན། བོན་རྒྱ་ཚང་གིས་དེ་འདྲ་ཞིག་ད་ཕལ་ཆེར་ཡིན་ཁག་པོ་རེད་ཟེར་གི་འདུག རེད། གཅིག་བྱས་ན་དེ་འདྲ་ཞིག་གཏན་ནས་ཡིན་རྒྱུ་མ་རེད། འོན་ཀྱང་། ང་ཚོས་འདིའི་ཐད་ལ་རང་སོ་སོའི་རིགས་པ་སྤྲོས་རྒྱུ་དང་། དཔྱད་པ་གཏོང་རྒྱུ་དེ་གལ་ཆེན་པོ་འདུག བོད་ནང་གི་བླ་ན་མེད་པའི་ལས་འགུལ་དེ་ཚོ་གསར་འགྱུར་ཙམ་དུ་འགོད་པ་ལས། འདི་ལ་བསྐྱར་ཞིབ་སྣ་ཚོགས་དང་གདེང་འཇོག་འདྲ་མིན་གྱིས་སྔོག་འདོན་བྱེད་ཐུབ་གི་མེད་པ་དེ་ལ་ང་ནི་ཕངས་སེམས་སྐྱེ་བཞིན་ཡོད། སྤྱིར་དོན་རྐྱེན་ཆེ་ཕྲ་ཆུང་གསུམ་ག་རེ་ཡིན་ཀྱང་དེ་ལ་ཕྱི་ནང་གསང་གསུམ་གྱི་རྒྱུ་རྐྱེན་གྲངས་ཀྱིས་མི་ཆོད་པ་ཞིག་བདོག་པ་སྨྲོས་མེད་ཐོག ད་ལྟ་བར་དུ་བོད་དོན་འཐབ་རྩོད་གྱི་རྣམ་པ་སྣ་ཚོགས་པ་ཞིག་བྱུང་བ་དེ་ཚོ་ནི་རྒྱུ་རྐྱེན་མི་འདྲ་བ་སྣ་ཚོགས་ལ་བརྟེན་ནས་བྱུང་བ་ཞིག་ལ་ཁས་མ་བླངས་རང་བླངས་རེད་པས། ངས་བོད་ནང་གི་ངོ་རྒོལ་གྱི་རྣམ་པ་གཙོ་ཤོས་གསུམ་གཞི་ལ་བཟུང་ནས་དེ་དག་དེ་ལྟར་བྱུང་ཐུབ་པའི་རྒྱུ་རྐྱེན་ཀྱི་ཐད་ལ་བསམ་ཚུལ་བརྗོད་པ་ཡིན། བོད་མིའི་མི་གཤིས་དང་བོད་དོན་འཐབ་རྩོད་དབར་གྱི་འབྲེལ་བ་ཞིག་འཚོལ་ཁུལ་བྱས་པ་ཡིན། འོན་ཀྱང་། དེ་ལྟར་འབྱུང་ཐུབ་པའི་རྒྱུ་རྐྱེན་གཞན་ཡང་ཡོད་སྲིད་པས་ང་ཚོས་མུ་མཐུད་དེ་དཔྱད་པ་གཏོང་རྒྱུ་ན་ཡག་པོ་འདུག ང་ཚོས་ག་དུས་ཡིན་ན་དེའི་རྒྱུ་རྐྱེན་རྒྱ་གཞུང་གིས་བསྐྲུན་པ་རེད་ཟེར་ན། རྩ་བ་དེ་ནས་བྱུང་བ་བདེན་པ་རེད་དེ། གོང་དུ་བཤད་པ་ལྟར་དེ་ལྟར་བྱེད་ཐུབ་པའི་ཕྱི་ནང་གསང་གསུམ་གྱི་བྱེ་བྲག་གི་རྒྱུ་རྐྱེན་ཐམས་ཅད་སྣང་མེད་དུ་འཇོག་ཆོག་པ་ཞིག་མ་རེད།
དྲ་རོགས་ཁྲག་འཐུང་ཧེ་རུ་ཀས་ཚྭ་བ་ཚང་གི་<<ཕྱིར་རྟོག>>ཐེངས་དུ་མ་བཀླགས་ཡོད་པའི་ཚོར་སྣང་བྱུང་། བརྗོད་བྱ་ལ་དོན་དངོས་ཐོག་ངོས་ལེན་མེད། ཕྱོགས་ཞེན་ཆེ་དྲགས་འདུག་གསུངས་སོང་། ངས་ཚྭ་བ་ཚང་གི་ཕྱིར་རྟོག་ཀློག་རྒྱུ་མ་བྱུང་བས་གང་མྱུར་ཀློག་དགོས་བསམ་བསྡད་ཡོད། ཁོང་གི་བོད་ཡུལ་ཆོལ་གསུམ་ཞེས་པའི་རྩོམ་ཡིག་དེ་སྔོན་མ་ཞིག་ལ་འཛིན་གྲོགས་ཤིག་གི་ལག་ནས་མཐོང་ཙམ་བྱས་མྱོང་ལ་དེའི་བར་ཞིག་ནས་ཅུང་ཙམ་བཀླགས་པ་ཡིན་དེ་ཡང་གང་མྱུར་ཀློག་དགོས་བསམ་བསྡད་ཡོད། ཅི་རེད། ཚྭ་བ་ཚང་གི་རྩོམ་ཡིག་མ་ཀློག་ན་བོད་ཡུལ་ཆོལ་ཁ་གསུམ་གྱི་མི་གཤིས་དང་བསམ་བློ་ལ་དཔྱད་པ་གཏོང་ཤེས་མཁན་ཞིག་ཡོད་རྒྱུ་མ་རེད་བསམ་གི་འདུག་གེ ་་་བརྩེད་མོ་ཡིན།
ཨོ་རེད། ཁྱོས་བརྗོད་བྱ་ལ་ངོས་ལེན་མེད་ཕྱོགས་ཞེན་ཆེ་དྲགས་འདུག་ལབ་སོང་། རེད། ང་གང་ལ་ཕྱོགས་འདུག་གཡས་ལ་ཕྱོགས་འདུག་གམ་གཡོན་ལ། ཡང་ན་རྒྱབ་མདུན་གང་གང་རུང་ལ་ཕྱོགས་འདུག གསལ་བོར་ཤོད་རྒྱུ་ཨེ་ཡོད། ཡོད་ན་ཤོད་དང་ངས་ཁྱོད་ལ་ཉིན་མ་དཀར་ལ་མཆོད་མེ་དང་། གསལ་བའི་སྒང་ལ་འོད་སྣོན་ཆོག མ་གཞི་ཕྱོགས་ཞེན་ཅན་གྱི་མིག་ལམ་ལ་ཡོད་ཆད་ཕྱོགས་ཞེན་ཅན་ཡིན་པས་ཁྱོད་ཀྱང་དེ་འདྲ་ཞིག་ཡིན་སྣང་འཆར།
དྲ་གྲོགས་ལྷོ་ཕྱོགས་ཉི་ཟླས་བོད་མིའི་མི་གཤིས་དང་བོད་དོན་འཐབ་རྩོད་ཀྱི་རླབས་མི་འདྲ་བ་གསུམ་གླེང་བ་འདི་ཧ་ཅང་རྫིག་སོང་བ་དང་། འདི་ཕྱོགས་གཅིག་ཡིན་པས་མུ་མཐུད་དུ་ཕྱོགས་ཡོངས་སུ་གླེང་དགོས་པ་འདི་གནད་འགག་ཆེན་པོ་རེད་གསུངས་སོང་། ཉིད་ཀྱིས་མོལ་བ་ལྟར་ཧ་ཅང་རྫིག་པ་དང་བརྗིད་པ་ཞིག་ཡིན་པ་ནི་དེ་དེ་བཞིན་ནོ།། རྫིག་དྲགས་པ་ནི་ཡིན་དོགས་མེད། རེད། ཕྱོགས་ཡོངས་ལ་དཔྱད་རྒྱུ་གལ་ཆེན་རེད། འོན་ཀྱང་། འདི་ནས་གཅིག་ཤེས་ཀུན་གྲོལ་གྱི་རྒྱུ་རུ་འགྲོ་ངེས་ཀྱི་བོད་ཀྱི་མི་གཤིས་དང་བོད་དོན་འཐབ་རྩོད་དབར་གྱི་མདོ་རྩ་ཞིག་བརྗོད་ཁུལ་བྱས་པ་ཡིན། རིགས་པས་མ་ཆུམ་ས་ཡོད་ན་ཁ་སྣོན་གནང་རོགས།
བོན་རྒྱ་མགོ་རིལ་འདིས། ད་སོ་མར་ལོག་འགྲེལ་གཡག་འདྲ་བ་ཞིག་བྱས་འདུག ཨ་རོགས་བོན་རྒྱ། སྙིང་རྗེ་དང་སྙིང་སྟོབས་གཉིས་ལ་གནམ་སའི་ཁྱད་པར་ཡོད།
སྙིང་རྗེ་ནི་དམན་པར་བརྩེ་བས་ཀུན་ནས་བསླངས་ཏེ་གྲོལ་འདོད་ཀྱི་བློ་ཞིག་ལ་གོ་བ་རེད། སྙིང་སྟོབས་ནི། འཇིགས་སྐྲག་དང་མཐོ་དམན་གང་ལ་ཡང་ཞུམ་པ་མེད་པར། རྒོལ་བར་ཕོད་པའི་བློ་སྟོབས་ལ་གོ།
རྫ་སྲས་ལགས་ཀྱིས་གསུངས་པ་ལ་མངོན་པར་བསྟོད་དོ། དེ་དེ་བཞིན་ནོ།
བདེན་པ་རེད། བོད་པ་ཚོས་རང་ལ་ངེས་པར་ཐོབ་དགོས་པའི་རང་ཚོའི་འདོད་པ་གང་ཡིན་རྒྱ་གཞུང་ལ་ཞུ་བ་གང་མང་བྱས་པ་རེད། འོན་ཀྱང་མ་ཕན་པས་ཁྲོམས་བསྐོར་གང་མང་བྱས་པ་རེད།
དེར་ཡང་ཡ་མ་བྱས་པས་གཞི་རྒྱ་ཆེ་བའི་ས་བྱིྀ་ཞི་རྒོལ་བྱུང་། དེར་ཡང་གདུག་རྩིབ་ལོག་བཤད་ཀྱིས་རྩོམ་ཡིག་ངོ་རྒོལ་བྱང། དེར་ཡང་མནར་གཅོད་བཏང་བས་རང་སྲེག་བྱུང་བ་རེད། དེ་ལ་ཡང་ལོག་འགྲེལ་སྡུག་སྦྱོང་གཏོང་བཞིན་འདུག་པས་རང་རྐྱང་ཁེར་ཤིས་མ་ཕན་ཚེ། ཉམ་ཤི་སྡེབ་ཤི་མ་གཏོགས་ཡོང་རྒྱུ་གང་ཡང་མེད་ངེས་རེད་དོ།
བོད་མིའི་མི་གཤིས་དང་བོད་དོན་འཐབ་རྩོད་ཀྱི་རླབས་མི་འདྲ་བ་གསུམ་གླེང་བ་འདི་ཧ་ཅང་རྫིག་སོང་བ་འདྲ།
རྫ་སྲས་ཁྱེད་ཀྱིས་གླེང་བ་འདི་ཕྱོགས་གཅིག་ཡིན་པས་མུ་མཐུད་དུ་ཕྱོགས་ཡོངས་སུ་གླེང་དགོས་པ་འདི་གནད་འགག་ཆེན་པོ་རེད།
རྩོམ་རྩལ་བཟང་བས་གུས་པའི་དགའ་བསུ་གྲངས་མེད་ཞུ་བཞིན་ཡོད།
བལྟས་ཟིན། ཚྭ་བ་ཚང་གི་<<ཕྱིར་རྟོག>>ཐེངས་དུ་མ་བཀླགས་ཡོད་པའི་ཚོར་སྣང་བྱུང་། འོན་ཏང་སྐུ་ཉིད་འབྲི་རྩལ་གྱི་ཆ་ནས་ཡག་པོ་འདུག བརྗོད་བྱ་ལ་དོན་དངོས་ཐོག་ངོས་ལེན་མེད། ཕྱོགས་ཞེན་ཆེ་དྲགས་འདུག་བསམ་སོང་། ཁྲག་འཐུང་པས།
རྫ་སྲས་ལགས། བྲིས་པ་ཤིན་ཏུ་ལེགས། འོན་ཀྱང་(་ངོ་ལོག་གི་སྙིང་སྟོབས་མི་འདྲ་བ་གསུམ)ཞེས་པའི་ངོ་ལོག་གི་ཐ་སྙད་འདི་འུ་ཚང་གི་བྱེད་སྟངས་ལ་འབྱོར་བ་ཞིག་མ་རེད་སྙམ། ནོར་ཡོད་ན་དགོངས་དག་ཞུ།
དབུག་གཏོང་ལེན་ཐེངས་གཅིག་ཀྱང་མ་བྱས་པར་བཀླགས་ཟིན་ཏོ། གཟའ་མིག་དམར་གྱི་ཉིན་སྐྱར་དུ་ཞིབ་ཚགས་པོ་ཀློག་ནས་མཐར་དཔྱད་ལྟམ་ཞིག་སྤེལ་ན་ཐང་། གང་ལྟར་ཧ་ཅང་བདེན་པའི་རང་བཞིན་ཅན་གྱི་སྐད་ཆ་ཞིག་རེད་པས་རིན་ཐང་འདུག
རང་བློས་ཟིན་ཚོད་ཀྱིས་གང་ཡག་གང་དྲང་བྱས་འདུག་པས་དམིགས་བསལ་
བསམ་འཆར་མེད།
དབྱེ་ཞིབ་འདི་ནི་ཧ་ཅང་གིས་ཞིབ་འཇུག་ལྡན་པ་ཞིག་དང་གཟུ་བོར་གནས་པའི་གཏམ་ཞིག་ལགས་པས་ཤེས་ཡོན་པ་ཞིག་གི་རང་ཚུགས་དངོས་མ་དེ་ཐོན་འདུག་ཅེས་བརྗོད་འདོད་བྱུང་།
གང་ལྟར། རང་རིགས་རང་གིས་མིག་མཐོང་དང་ལག་སྙོབ་བྱེད་ཀྱི་ངོ་མ་གནད་དོན་རེད་སྙམ།།
ཆོལ་ཁ་གསུམ་པོ་སྙིང་སྟོབས་གསུམ་ལ་བསྒྱུར་འདུག དེ་ཡང་སྤྱང་གྲུང་སྙིང་སྟོབས། ཚོར་རྟོག་སྙིང་སྟོབས། རྒོལ་འཛིང་སྙིང་སྟོབས་མྱིང་སྙིང་རྗེ་རེ་བཏགས་ཡོད་ཀི ཡིན་ནའང་། དོན་དངོས་ལ་དེ་འདྲ་ཧ་ཅང་དཀའ་ཚོད་རེད་སྙམ།
ཏག་ཏག་ཅིག་བསྡད་ཡོད་མེད་མི་ཤེས་ཏེ། གསར་བ་ཞིག་གསུངས་འདུག་པས། ཡི་རངས་དང་གོང་བཀུར་གཉིས་ཆ་ཡོད། ད་འགྲེལ་བཤད་ཀྱང་གསར་བ་ཞིག་རྒྱག་རན་འཁེལ་འདུག