༄༅། །གངས་ལྗོངས་ཆོས་ལྡན་གྱི་ཞིང་དུ་ནག་ཕྱོགས་ཀླ་ཀློའི་དཔུང་ཚོགས་ཀྱིས་བརྩེ་བ་དང་སྙིང་རྗེ་བྲལ་ཞིང། གདུག་རྩུབ་དང་དྲག་གནོན་ཁོ་ནས་བོད་མི་རྣམས་ཐོབ་ཐང་དང་ཞི་བདེ་ཡོངས་སུ་འཕྲོག་པ་མ་ཟད་སྨྲ་བརྗོད་ཀྱི་རང་དབང་ཙམ་ཡང་མེད་པའི་དབང་གིས། ད་ལྟའི་བར་བོད་བསྟན་སྲིད་མི་རིགས་ཀྱི་དོན་དུ་གཅེས་པའི་ལུས་སྲོག་ཚུན་ཆད་ཀྱང་ཞུགས་འབུལ་དུ་བཏབ་པ་རྣམས་དང། ཚེ་སྲོག་ཡོངས་སུ་ཤོར་བའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་དུ་སྤྱི་ལོ་ ༢༠༡༢ ཟླ་ ༠༤ ཚེས་ ༠༨ ཉིན་དཔལ་བཀའ་བརྒྱུད་ནང་བསྟན་མཐོ་རིམ་སློབ་གྲྭར། ཇི་ལྟར་གསོལ་བ་བཏབ་པ་བཞིན་སྒྲུབ་བརྒྱུད་བསྟན་པའི་མངའ་བདག་འབྲི་གུང་༸སྐྱབས་མགོན་རྡེ་རྗེ་འཆང་ཆེན་པོ་མཆོག་དབུ་བཞུགས་ཀྱིས་དགེ་འདུན་བརྒྱ་ཕྲག་བཞི་ལྷག་གིས། ཉིན་གཅིག་གི་རིང་སྣང་བ་མཐའ་ཡས་ཀྱི་དཀྱིལ་ཆོག་གསོག་སྒྲུབ་ཀྱི་སྒོ་ནས་བྱང་བུ་སྲེག་སྦྱོང་དང། འཕོ་བའི་གསལ་འདེབས་ཀྱིས་མཚོན་པའི་བསྔོ་སྨོན་རྒྱ་གང་ཆེ་ཞུས་ཤིང་ད་དུང་མུ་མཐུད་ནས་འདས་སོན་དེ་དག་གི་ཆེད་དུ་བསྔོ་སྨོན་ནང་མར་ཞུ་རྒྱུའི་འཆར་གཞི་ཡོད་བཞིན་པ་བཅས་ཀྱི་གནས་ཚུལ་དུ་བཀའ་བརྒྱུད་མཐོ་སློབ་རྒྱུན་ལས་ལས་ཁུངས་ནས།
སྤྱི་ལོ་ ༢༠༡༢ ཟླ་བ་ ༠༤ ཚེས་ ༠༩ ཉིན།
