ཟླ་འདིའི་ཕྱི་ཚེས་ ༡༤ ཉིན་རྔ་པ་རྫོང་གི་ལས་བྱེད་ཁག་ཅིག་གིས། དམག་མི་རླངས་འཁོར་བཅུ་གྲངས་ཤིག་ཁྲིད་ཡོང་སྟེ། རྔ་སྟོད་ཨ་འདུས་སྡེ་བའི་མི་མང་ལ་གཅར་རྡུང་དྲག་གནོན་བྱས་འདུག
ཟླ་འདིའི་ཕྱི་ཚེས་ ༡༤ ཉིན་རྔ་པ་རྫོང་ཐོག་ནས་ཡོང་བའི་ལས་བྱེད་ཁག་ཅིག་གིས། རྔ་སྟོད་ཨ་འདུས་སྡེ་བའི་ནང་ཉིན་དེའི་ཕྱི་དྲོའི་དུས་ཚོད་ ༢ སྟེང་སྡེ་མི་ཡོངས་རྫོགས་ཚོགས་འདུ་འཚོགས་དགོས་ཚུལ་བསྒྲགས་ཏེ་མི་མང་བསྡུ་སྐོང་བྱས་རྗེས། མི་མང་གི་མདུན་སར་དེ་སྔོན་མི་མང་ལ་རོགས་སྐྱོར་གྱི་དངུལ་ལྐོག་བཟའ་བྱས་པའི་དོགས་གཞི་ཅན་གྱི་མི་སྣ་གཉིས་ཡོད་པ་དེར། མི་མང་གི་མདུན་ནས་བྱ་དགའ་སྤྲད་དེ་སྟོད་ར་བྱས་ཡོད་པ་དང་། སྐབས་དེར་མི་མང་གིས་མ་དགའ་བའི་རྣམས་འགྱུར་ཤུགས་ཆེན་པོ་བསྟན་པར། རྫོང་ཐོག་གི་ལས་བྱེད་ཚོས་མཉམ་འཁྲིད་བྱས་ཡོང་པའི་དྲག་ཆས་ཉེན་རྟོག་པ་རླངས་འཁོར་བཅུ་ཡས་མས་ཤིག་གིས། མི་མང་ལ་གང་བྱུང་གཅར་རྡུང་དྲག་པོ་བཏང་སྟེ་མི་བརྒྱ་ལྷག་ལ་ཤིག་ལ་རྨས་སྐྱོན་བཟོས་པ་མ་ཟད། སྡེ་མི་སློབ་དཔོན་སྐྱབས་སོགས་མི་འགས་ཤས་ལ་རྨས་སྐྱོན་ཚབ་ཆེན་ཕོག་སྟེ་རྔ་པ་རྫོང་སྨན་ཁང་དུ་བསྐྱལ་དགོས་བྱུང་ཡོད་འདུག དེ་བཞིན་རྒྱལ་སྡེའི་ཚོ་གསུམ་སྡེ་བའི་མཚམས་ཆེན་དང་། ཚེ་ནོར། བསྟན་འཛིན་ཚེ་རིང་སོགས་མི་ཉི་ཤུ་ཙམ་འཛིན་བཟུང་བཙན་ཁྲིད་བྱས་ཏེ། ད་ཆ་གང་དུ་བཀག་ཉར་བྱས་ཡོད་མེད་ཀྱི་གནས་ཚུལ་ཅི་ཡང་ཤེས་རྟོགས་ཐུབ་མེད་པ་རེད།
གནས་ཚུལ་མཁོ་སྤྲོད་པས་གནས་ཚུལ་དེའི་འབྱུང་རྐྱེན་སྐོར་རྒྱུས་ལོན་བྱུང་པ་ལྟར་ན། རྔ་སྟོད་ཨ་འདུས་སྡེ་བ་ཁག་ཐུན་མོང་ལ་དབང་བའི་༼འོ་མའི་ལུས་༽ཞེས་པའི་ས་ཆ་ཞིག་ཡོད་པ་དང་། ས་ཆ་དེ་ནི་ཨ་འདུས་སྡེ་བ་ཁག་མ་ཎི་དང་སྙུང་གནས་སོགས་ཀྱི་སྐབས་ལྷན་ཚོགས་གནང་ས་དང་། བླ་མ་དང་དགེ་བཤེས་སོགས་སྡེ་བའི་ནང་དུ་ཕེབས་སྐབས་ཆོས་ཞུ་བ་འཛོམས་ས། དེ་བཞིན་ནས་སྟོན་དང་དུས་སྟོན་སོགས་སྤྲོ་སྐྱིད་གཏོང་ས་བཅས་ཡིན་ཡང་། ༢༠༠༨ ལོའི་རྗེས་སུ་རྒྱ་གཞུང་གིས་ས་ཆ་དེར་རྒན་གསོ་ཁང་རྒྱག་དགོས་ཚུལ་བཤད་དེ་བཙན་འཕྲོག་བྱས་ཡོད་པ་དང་། སྐབས་དེར་མང་ཚོགས་ཀྱིས་དེ་འདོད་མོས་མེད་པའི་རྒྱུ་མཚན་དང་རེ་སྐུལ་ཞུས་ཀྱང་ཕན་འབྲས་གང་ཡང་བྱུང་མེད་འདུག རྗེས་སུ་རྒྱ་གཞུང་གིས་ས་ཆ་དེར་དམག་སྒར་ཆེན་པོ་ཞིག་བརྒྱབ་སྟེ། ད་སྐབས་དམག་མི་དང་དྲག་ཆས་ཉེན་རྟོག་པ་སོགས་རྒྱུན་སྡོད་བྱས་ཡོད་འདུག
དེ་བཞིན། མི་མང་ལ་མགོ་སྐོར་ཆེད་ས་ཆ་དེའི་ཉེ་འཁོར་དུ་ཁང་ཆུང་མང་པོ་ཞིག་བརྒྱབ་སྟེ་མི་མང་ལ་རོགས་སྐྱོར་ཡིན་ཚུལ་བརྗོད་དེ་སྤྲད་ཡོད་པ་རྣམས་ཀྱང་། ལོ་སྔོན་མའི་ལོ་མཇུག་ཙམ་ནས་བཟུང་ཁང་པ་དེ་དག་ལ་རྒྱ་སྒོར་ཁྲི་བརྒྱད་ཀྱི་འགྲོ་སོང་བཏང་ཡོད་སྐོར་བརྗོད་དེ། རྒྱ་སྒོར་ཁྲི་གཅིག་རེ་བསྐྱེད་ཀ་དང་བཅས་པ་མི་ཚང་རེ་རེ་ནས་སྤྲོད་དགོས་པའི་བརྡ་ཁྱབ་བཏང་ཡོད་པར་བརྟེན། མི་མང་གིས་དེ་ནི་དང་ཐོག་ཚང་མ་རྒྱལ་ཁབ་ཀྱི་རོགས་རམ་ཡིན་ཚུལ་ཁོ་ན་བརྗོད་པ་ལས། སྒོར་མོ་དགོས་ཚུལ་ཚིག་གཅིག་ཀྱང་བཤད་མེད་པས། སྒོར་མོ་སྤྲོད་མི་ཐུབ་པའི་སྐོར་བརྗོད་དེ་རྔ་པ་རྫོང་སྲིད་གཞུང་ནས་རྔ་པ་རང་སྐྱོང་ཁུལ་སྲིད་གཞུང་བཅས་ལ་གཏུག་བཤེར་མང་པོ་བྱས་དང་བྱེད་བཞིན་པར་མ་ཟད། ཁང་པ་དེ་དག་གསར་རྒྱག་སྐབས་གྲོང་སྡེ་ལས་ཁུངས་ཀྱི་མི་གཉིས་ཀྱིས་སྤྱི་དངུལ་ལྐོག་བཟའ་བྱས་པའི་དོགས་པ་བྱུང་ཞིང་། མི་དེ་གཉིས་ལ་མི་མང་གིས་ལྟ་ཚུལ་མི་ལེགས་པ་འཛིན་བཞིན་ཡོད་འདུག ཡིན་ནའང་། རྒྱ་གཞུང་གིས་ཉིན་དེར་སྤྱི་དངུལ་ལྐོག་ཟ་བྱེད་མཁན་མི་དེ་གཉིས་ལ་མི་མང་གི་མདུན་ནས་བྱ་དགའ་སྤྲད་དེ་སྟོད་ར་བྱས་པར། མི་མང་གིས་རྒྱ་གཞུང་གི་བྱ་སྤྱོད་དེ་ནི་དྲང་བདེན་མ་རེད་ཅེས་རྣམ་འགྱུར་ཤུགས་ཆེན་པོ་བསྟན་པ་ཞིག་ཡིན་འདུག
གཞན་ཡང་། འདི་ལོའི་ཕྱི་ཟླ་ ༡ ནང་རྒྱ་གཞུང་གིས་རང་ལོ་ ༣༣ ཡིན་པའི་ཨ་འདུས་མཐའ་བའི་རོང་བ་ཚང་གི་ཚེ་རིང་བཀྲ་ཤིས་ལགས་ལོ་ ༣ དང་ཟླ་ ༦ གི་བཙོན་འཇུག་ཁྲིམས་ཐག་བཅད་ཡོད་པ་དང་། དེ་ཡང་ཁོང་ལོ་སྔོན་མའི་ཕྱི་ཟླ་ ༣ ཚེས་ ༡༦ ཉིན་རྒྱལ་གཅེས་དཔའ་བོ་བློ་བཟང་ཕུན་ཚོགས་ཀྱིས་རང་ལུས་མེར་སྲེག་གིས་ངོ་རྒོལ་གནང་སྐབས། མི་མང་གིས་ངོ་རྒོལ་ཁྲོམ་སྐོར་བྱས་པའི་གློག་བརྙན་ནང་ཐེབས་པར་བརྟེན། རྗེས་སུ་ཁོང་འཛིན་བཟུང་གིས་ཉེ་སྔོན་བར་ཐག་གཅོད་གང་ཡང་མ་བྱས་པར་བཀག་ཉར་བྱས་པ་ཞིག་ཡིན་འདུག
གནས་ཚུལ་མཁོ་སྤྲོད་པ་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཡིན།
མི་འཁྱག་ཁ་ནས་ཟེར་ཡང་།།གྲང་འདར་ལུས་ལ་རྒྱག་པའི་དཔེ་ལྟར་ཞེ་སྡང་དང་སྐྱོ་བ་དེ་དག་གིས་སེམས་པ་ཡར་ཡར་ལ་བཅག་ཡོང་གི་་་་
དངོས་གནས་འདུག་གི་མ་བཅུག་པ་རེད་མོད། ད་དུང་འདི་ཕྱོགས་ནས་འཇམ་ཐིང་གིེར་བསྡད་ཡོད་པ་རེད
ཁྲེལ་མེད་ཧམ་སེམས་ཅན་གྱི་མིའི་སྤྱོད་ངན་དེ།བསླུ་མེད་ཀྱི་ལས་འབྲས་དྲག་པོའི་འདའ་མོས་མྱུར་དུ་གཏོར་བ་ཤོགས།