རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་དྲུག་པ་དེ། ཕྱི་ཟླ་ ༤ ཚེས་ ༢༧ ནས་ ༢༩ བར་ཁེ་ན་ཌའི་གྲོང་ཁྱེར་ཨོ་ཊཱ་ཝ་ནང་འཚོགས་རྒྱུ་ཡིན་འདུག
རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་ལས་ཁུངས་དང་། ཁེ་ན་ཌ་གྲོས་ཚོགས་བོད་དོན་རྒྱབ་སྐྱོར་ཚོགས་པ། བོད་མི་མང་སྤྱི་འཐུས་ལྷན་ཚོགས་བཅས་ཐུན་མོང་གི་གོ་སྒྲིག་འོག ཕྱི་ཟླ་ ༤ ཚེས་ ༢༧ ནས་ ༢༩ ཉིན་བར་ཁེ་ན་ཌའི་གྲོང་ཁྱེར་ཨོ་ཊཱ་ཝ་ (Ottawa) ནང་། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་དྲུག་པ་དེ་འཚོགས་རྒྱུ་ཡིན་པ་དང་། ཐེངས་འདིའི་ཚོགས་ཆེན་ཐོག་འཛམ་གླིང་རྒྱལ་ཁབ་ ༣༠ ཙམ་ནས་གྲོས་ཚོགས་འཐུས་མི་ ༥༠ ལྷག་དང་། དབུས་བོད་མིའི་སྒྲིག་འཛུགས་ཀྱི་བཀའ་ཁྲི་བློ་བཟང་གེ་མཆོག་དང་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག སྤྱི་འཐུས་ཚོགས་གཙོ་བགྲེས་གཞོན་རྣམ་གཉིས་ཀྱི་གཙོས་སྤྱི་འཐུས་བཅུ་གྲངས་ཤིག་དང་། ཕྱོགས་མཐའ་ནས་ཕེབས་པའི་བོད་རིགས་ཚོགས་བཅར་བ་ ༦༠ བཅས་ཁྱོན་མི་ ༡༡༠ ལྷག་འདུ་འཛོམས་གནང་རྒྱུ་དང་། ཐེངས་འདིའི་ཚོགས་ཆེན་སྐབས་༸གོང་ས་མཆོག་ཀྱང་ཆིབས་བསྒྱུར་བསྐྱངས་རྒྱུ་ཡིན་འདུག
ད་ཐེངས་ཀྱི་ཚོགས་ཆེན་སྐབས་ཚོགས་ཐེངས་བརྒྱད་ལ་ཆ་བགོས་ཏེ་བརྗོད་གཞི་གཙོ་བོ་ ༦ གི་ཐོག་གྲོས་བསྡུར་གནང་རྒྱུ་ཡིན་ལ། དེ་དག་ལས་དང་པོ། སའི་གོ་ལའི་སྣེ་གསུམ་པ་ཡིན་པའི་བོད་ཀྱི་ཁོར་ཡུག་གནས་སྟངས་དང་དེའི་ཤུགས་རྐྱེན། གཉིས་པ། ད་ལྟའི་གནས་སྐབས་སུ་བོད་མིར་འཕྲད་བཞིན་པའི་དཀའ་ངལ་ལ་གདོང་ལེན་བྱེད་ཕྱོགས། གསུམ་པ། བོད་ཐོག་འཛིན་པའི་རྒྱ་གཞུང་གི་སྲིད་བྱུས་དང་། མ་འོངས་རྒྱ་ནག་གི་མགོ་ཁྲིད་བརྗེ་བསྒྱུར་དང་བོད་ཀྱི་གནས་བབ།
བཞི་པ། རིག་གཞུང་དང་ཆོས་དད་རང་དབང་། སྤྱི་ཚོགས་བརྟན་ལྷིང་བར་ཕན་ཚུན་གཅིག་ལ་གཅིག་བརྟེན་ཡིན་པ། ལྔ་པ། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་ལས་ཁུངས་ཀྱི་ལས་དོན་སྙན་གསན་དང་། ཚོགས་ཆུང་ཆ་བགོས་ཀྱིས་རྒྱལ་སྤྱིའི་གྲོས་ཚོཊ་འཐུས་མིའི་བོད་དོན་རྒྱབ་སྐྱོར་ཚོཊ་པའི་ལས་འགུལ་ཤུགས་ཆེ་རུ་གཏོང་ཐབས། དྲུག་པ། ཚོགས་ཆུང་ཆ་བགོས་ཐོག་མ་འོངས་ལས་འཆར་སྤེལ་ཕྱོགས་བཅས་ཡིན་ལ། ཉིན་མཐའ་མར་གྲོས་གཞི་ཁག་གཏན་འབེབས་གནང་རྒྱུ་ཡིན་འདུག
རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་དང་པོ་ ༡༩༩༤ ལོར་རྒྱ་གར་རྒྱལ་ས་ལྡི་ལིར་ཚོགས་ཡོད་པ་དང་། ཚོགས་ཆེན་གཉིས་པ་ ༡༩༩༥ ལོར་ལི་ཐུ་ནི་ཡཱ། གསུམ་པ་ ༡༩༩༧ ལོར་ཨ་རི། བཞི་པ་ ༢༠༠༥ ལོར་སོ་ཀོག་ལེཎ་ཊ་རྒྱལ་ས་ཨི་ཌན་སྦ་ར། ལྔ་པ་ཨི་ཊ་ལིའི་རྒྱལ་ས་རོམ་བཅས་སུ་ཚོགས་ཡོད།
གསར་འགོད་པ། དཔལ་ལྡན།
དོན་དག་གསུམ་གྱི་སྒང་བགྲོ་གླེང་ངེས་པར་དུ་བྱེད་དགོས་ཀྱི་འདུག
༡ ནུབ་ཕྱོགས་ཀྱི་གཞུང་འཛིན་པ་དང་གྲོས་ཚོགས་སྣེ་གཉིས་ཡིན་པས། གྲོས་ཚོགས་ཀྱིས་ཤུགས་ག་ཚད་བོད་དོན་སྒང་འདོན་ཐུབ་ན། དེ་ཙམ་གྱིས་བོད་ལ་ཕན་པར་མ་ཟད། ནུབ་ཕྱོགས་ལའང་ཕན་པས། བོད་མིའི་ངོས་ནས་གནད་དོན་འདི་གསལ་བཤད་བྱེད་རན་འདུག
༢ ནུབ་ཕྱོགས་ཀྱི་སྲིད་དོན་ཕྱུག་པོའི་དངུལ་ཤེད་འོག་ལྷུང་ཡོད་པས། ཕྱུག་པོ་དང་བསྟུན་པའི་ཐབས་ལམ་མཁས་པའམ། ཤེས་ཡོན་པའམ། ཡང་ན། དྲ་འབུ་ཚོས་ཀྱང་འདོན་འོས་པར་མ་ཟད། བོད་ཀྱི་འཐུས་མི་ཚོས་དེ་དོན་སྙན་བསྒྲོན་ཞུ་འོས་པ་ནི་སྨས་མ་དགོས་པ་ཞིག་རེད།
༣ སྤྱིར་ཕྱུག་པོ་ཚོས་དངུལ་ཤེས་འོག་རྒྱ་ནག་ལ་ཉམས་ཞིབ་ཡོད་སྨྲ་མཁན་ཚོས་སྐྱག་བཤད་རྒྱག་གི་ཡོད་པས། རྒྱ་ནག་གཞུང་ལ་གཡས་གཡོན་ཞིག་བགར་གྱི་ཡོད་ཀྱང་དོན་ལ་གཡས་གཡོན་གྱི་དབྱེ་བ་སྤུ་ཙམ་མེད་པའི་ཁར། རིག་གསར་ལ་ཁ་གཡར་ནས་རིག་གསར་གྱི་བྱེད་ཐབས་འོག་ཕན་ཚུན་ཤི་ལམ་དུ་འཇུག་གིན་ཡོད་ན། དེ་ལུགས་ཀྱི་འཇིག་སྣང་ཡང་སྐབས་འདིར་ཞུ་འོས་པ་ཞིག་རེད།
འདི་དག་པཱ་ལེ་བའི་བསམ་ཚུལ་ཡིན། མང་དྲགས་ན་མཁས་པ་ཚོར་ལས་ཀ་མེད་པས། གནས་སྐབས་འཇོག་གི་ཡིན།
གཏམ་བཟང་བའི་གནས་ཚུལ་རེད། ལེགས་པོ་འདུག མུ་མཐུད་ཤུགས་བསྐྱོན་རོགས་གནང་།
བོད་ནམ་ཡང་འཆི་མི་རུང་།