སྲིད་བློན་ཝུན་ཇ་པོའོ་ཡིས་ནག་ཉེས་ངོས་ལེན་བྱས་པ།

 ས་འོད་ཀྱིས།

༡༩༤༩ ལོར་དམར་ལུགས་པས་རྒྱ་ནག་དང་རིམ་གྱིས་བོད་སོག་ཡུ་གུར་བཅས་ལ་དབང་བསྒྱུར་པ་ནས་མི་ལོ་བཅུའི་ནང་ལོག་སྤྱོད་པར་བསྙད་བཏགས་པའི་གོ་མིན་ཏང་དང་བོད་ཀྱི་སྲིད་འབྱོར་རིག་གསུམ་གྱི་འགྲོ་ལུགས་བཅས་རྩ་མེད་གཙང་དག་བྱས། དེ་ནི་གཅིག་གཅོད་གཅིག་སྡུད་རིང་ལུགས་པའི་མཚོན་རྟགས་སུ་ཟད་ཅིང་། ཕྱོགས་གཞན་ཞིག་ནས་འཛམ་གླིང་སྤྱིའི་འགྲོས་ལུགས་ལྟར་བློ་འགུག་གོ་སྐོན་སོགས་ཞི་བའི་ཐབས་ལམ་མི་སྤྱོད་པར་དམར་ལུགས་ལས་ཐ་དད་པའི་ལྟ་ཚུལ་འཛིན་མཁན་རྣམས་དམར་གསོད་དང་བཙོན་འཇུག་གི་ལམ་ནས་མེད་པར་བཟོས་པས་དྲག་སྤྱོད་པའི་རྨང་གཞི་བཏང་། ༡༩༦༢ ལོ་ནས་གུང་ཁྲན་དམར་གཞུང་གཏིང་ཚུགས་པ་དང་ཆབས་ཅིག་མའོ་སོགས་ཀྱིས་ནང་ཁུལ་དབང་ཆའི་འཐབ་རྩོད་བརྒྱུད་མུར་བྱས་པ་ལས་བོད་རྒྱ་སོག་གུར་མི་མང་ཡ་ས་མང་བོའི་རང་སྲོག་ཤོར་དགོས་བྱུང་། དོན་དངོས་ལོ་རྒྱུས་ཀྱི་ནག་ཉེས་འདི་ལྟར་བསགས་པའི་དམར་ལུགས་པའི་བྱེད་བབ་འདི་ནི། ཀྲོའོ་ཙི་ཡང་དང་སྐུ་ཞབས་ཝུན་ཇ་ལ་མཚོན་ན། འགྲོ་མི་གྲངས་མེད་ཀྱི་ཚེ་སྲོག་འཕྲོག་མཁན་གྱི་རྗེས་བསྐྱོངས་བྱེད་རྒྱུར་བློ་འཚབ་སྐྱེས་སུ་བཅུག་ཡོད་སྲིད། ༡༩༨༠ ལོ་ནས་མི་རིགས་ཆེན་པོ་བཞིའི་རང་རང་གི་སྲོལ་རྒྱུན་རིག་གཞུང་ཆོས་དང་བཅས་པར་སྤྱོད་ཆོག་པའི་སྒོ་མོ་འབྱེད་ནའང་ཆབ་སྲིད་ཀྱི་དམ་དྲག་སྔར་བཞིན་དུ་བྱས། ལོ་རབས་བརྒྱད་ཅུའི་ནང་རྒྱ་ནག་གུང་ཁྲན་གྱིས་རང་གི་བྱས་ཉེས་ངོས་ལེན་བྱེད་ཁུལ་གྱིས་མི་མང་ལ་བོང་ལྤགས་གྱོན་པའི་སྤྱང་ཀིའི་རྣམ་འགྱུར་བསྟན་ནས་མི་མང་གི་བསམ་བློ་ཅུང་ཟད་བདེར་བབ་མོད་དེ། སྤྱང་ཀི་ནི་དུས་ནམ་ཡང་ཤ་ལ་དགའ་ཞིང་ཁྲག་ལ་རྔམ་པའི་འཚོ་གནས་ལ་བརྟེན་པར་སོང་། ཕྱི་མདོག་ཙམ་གྱིས་དེ་ཙམ་ཁྱད་པར་འགྲོ་མི་སྲིད་པ་ཡིན། དེའི་ཕྱིར་རྒྱ་བོད་མི་མང་གིས་ཡིད་ཆེས་རྩ་བ་ནས་བྱེད་ཕོད་ཀྱི་མེད་པ་རེད། སྐུ་ཞབས་ཝུན་ལགས་ཀྱང་འགྲོ་མི་གྲངས་མེད་ཀྱི་ནང་དུ་ཐེ་བས་རང་དང་དམར་ལུགས་པའི་མགོ་གཙོ་གཞན་གྱི་བྱེད་སྤྱོད་དང་། ཐལ་སྤྱོད། དྲག་སྤྱོད། ཇག་སྤྱོད་བཅས་ཀྱིས་དུས་ནམ་ཡང་ཁོངས་མི་ཆོད་པར་མ་ཟད། ཕྱི་གས་ཙམ་གྱིས་སུ་ལའང་མགོ་སྐོར་འཐེབ་ཏུ་འཇུག་མི་ནུས་པའི་དངོས་མཐོང་གི་ཉམས་མྱོང་མང་བས། དྲག་སྤྱོད་སྲིད་གཞུང་སྟེ་དམར་ལུགས་སྒེར་གཅོད་པའི་སྟེགས་བུའི་སྟེང་དུ་བསྡད་ཐེངས་རེར་ཡིད་བློ་གཡོ་བསྐྱམས་བྱས་ཡོད། གལ་ཏེ་དེ་ལྟར་བྱུང་མེད་པ་ཡིན་ན་དམར་སྟེགས་ལ་གྱེས་གཏམ་གྱིས་དམར་ལུགས་བསྡུ་གསོག་བྱ་དགོས་པར་བརྗོད་མི་སྲིད་པས་སོ།།

དུས་རབས་སྔོན་མའི་ལོ་རབས་བཞི་བཅུ་བའི་འཇུག་ནས་ལྔ་བཅུ་ནང་སྟེ། ༡༩༥༩ ཙམ་ལ་དམར་གཞུང་གིས་ཡོངས་ཁྱབ་སྒོས་བོད་ཤར་ཕྱོགས་ནས་བཙན་གནོན་གྱི་མགོ་བརྩམས། ༡༩༥༩ ལོར་བོད་ས་ཡོངས་རྫོགས་བཙན་གནོན་བྱས་པའི་ལོ་འདི་ཚོའི་རིང་ལ། བོད་མི་ས་ཡ་གཅིག་ལྷག་ཙམ་དམར་གསོད་བཏང་། འོན་ཀྱང་དམར་ལུགས་དྲག་སྤྱོད་པས་བཅིངས་གྲོལ་དམག་ནི་བོད་མི་མང་ལ་རོགས་སྐྱོར་བྱེད་ཏུ་ཡོང་བ་ཡིན་ཞེས་ཁ་ལག་གོ་ལྡོག་གི་སྐད་ཆ་བཤད་ཡོད། སྐུ་ཞབས་ཝུན་ལགས་ཀྱིས་བློ་ཕམ་དང་བཅས་ཏེ་བོད་མི་དམར་གསོད་ཀྱི་དུས་སྐབས་དེར་མྱ་ངན་དང་གདུང་སེམས་གྱི་སྒོ་ནས་དྲན་གསོ་བྱས་པ་སྟེ། དྲག་སྤྱོད་པའི་ལམ་ལུགས་བསྒྱུར་བཅོས་དགོས་ཞེས་པ་ལས་གོ་ནུས་པ་ཞིག་ཡིན་པས་སོ།། ཁོང་གིས་མི་ལོ་དྲུག་ཅུའི་རིང་གི་ཕྱིའི་ཡར་རྒྱས་གྱི་གནས་སྟངས་ལ་བརྩི་ནོར་མ་འཐེབ་པར་ངོས་འཛིན་བྱས་པའི་གཏམ་བ རྗོད་སྤེལ་ཡོད་ནའང་། དཔྱད་བརྗོད་པ་རྣམས་ཀྱིས་ཝུན་གྱི་གྱེས་གཏམ་ནི་རང་ཉིད་ལོ་རྒྱུས་སྟེང་གི་མི་ནག་ཅིག་ཏུ་གྱུར་ཟིན་པ་དེ་དཀར་འདོན་ཡོང་བའི་ཕྱིར་དུ་ཡིན་ཞེས་བརྗོད་ཀྱིན་ཡོད་ཀྱང་། དྲག་སྤྱོད་སྲིད་གཞུང་གིས་བཞེངས་བསྐྲུན་བྱས་པའི་ལག་དམར་ཞིག་གི་ངོས་ནས་བཤད་ན། སྐུ་ཞབས་ཝུན་གྱིས་འཛམ་གླིང་རང་བཞིན་གྱི་ལག་རྩལ་དྲ་འཕྲིན་གྱི་དུས་རབས་འདིར།  མི་ལོ་དྲུག་ཅུའི་དྲག་སྤྱོད་ཐལ་སྤྱོད་ཁོ་ནས་རྒྱུན་འཁྱོངས་བྱ་མི་ནུས་པའི་གནས་སྟངས་མཐོང་སྟེ། དམར་ལུགས་དྲག་སྤྱོད་པའི་སྲིད་སྟེགས་སྟེང་དུ་དམར་མཆོད་ཀྱི་ལས་བྱ་དགོས་པ་ནི་མངོན་པར་མི་གསལ་བའི་ཁྲིམས་ལུགས་སུ་གཏན་འཁེལ་ཟིན་པས། མི་ལོ་བཅུའི་རིང་ལ་སྡུག་སྦྱོང་གཏོང་མཁན་དང་མྱོང་མཁན་གཉིས་ཀྱི་ཚོར་བ་མྱོང་བ་ལས་བྱ་ཐབས་ཟད་པར་བརྗོད་ཆོག་གོ།

༡༩༥༨ ལོར་དམར་གཞུང་གིས་མི་མང་སྤྱི་ཁང་ཆེན་མོ་གསར་འཛུགས་ཀྱི་རླབས་རྒྱུན་བོད་དུ་ལྷགས་སྟེ། བོད་རང་བཙན་ཤོར་བ་ནས་མུ་གེ་དང་ནད་ཡམས་ཀྱི་མགོ་བརྩམས་ཤིང་། མི་ལོ་གསུམ་གྱི་རིང་བོད་དུ་རྩྭ་ཟ་དགོས་ཐུག་པ་དང་རྒྱ་ནག་ནང་མིས་མི་ཤ་ཟ་དགོས་ཐུག་པའི་མུ་གེའི་ལོ་རྒྱུས་དེ་བསླངས། མུ་གེའི་ལོ་རྒྱུས་དང་མི་ཤ་ཟ་བའི་བྱེད་ཐབས་ད་དུང་ཡང་དྲག་སྤྱོད་སྲིད་གཞུང་གི་ལག་བསྟར་བྱེད་བཞིན་མཆིས་པས་སྐུ་ཞབས་ཝུན་ཇ་པོའུ་ཡིས་གཞན་གྱི་ཚེ་སྲོག་གིས་རང་ཉིད་སྲུང་སྐྱོབས་བྱེད་པའི་ལམ་ལུགས་འཛིན་དགོས་བྱུང་མོད། ཡིན་ནའང་ཁོང་གི་གྱེས་གཏམ་གྱིས་དྲག་སྤྱོད་དང་སྲིད་དབང་སྒེར་འཛིན་ལམ་ལུགས་འདི་དུས་རབས་ཉེར་གཅིག་པའི་ནང་དུ་མི་འཚམ་པར་སྟོན་ཐབས་བྱས་ཡོད།

༡༩༦༢ ལོ་ནས་རྙིང་དོར་གསར་ལེན་ཏེ་རིག་གནས་གསར་བརྗེའི་ལས་འགུལ་གྱིས་བོད་ཀྱི་རྩ་ཆེའི་རིག་གཞུང་གི་ངོ་བོ་རྣམས་ཤུལ་མེད་དུ་གཏོར་བ་དང་བརྐུ་འཕྲོག་གི་མགོ་བརྩམས། དུས་དེ་ཙམ་ནས་དེ་རིང་བར་བོད་མི་ས་ཡ་གཅིག་ལྷག་བཅས་ཁྱོན་སྡོམ་ས་ཡ་གསུམ་ཡས་མས་ཙམ་གྱི་རང་སྲོག་འཕྲོག དེར་བརྟེན་ཧེ་ཐི་ལེ་དང་མའོ་ཙེ་ཏུང་གཉིས་ནི་འཛམ་གླིང་ལོ་རྒྱུས་ཐོག་གི་དྲག་སྤྱོད་དང་མི་མང་དམར་གསོད་བྱེད་མཁན་གྱི་སྡིག་ཅན་དེ་ཡིན་པར་ངོས་འཛིན་བྱེད་ཀྱིན་ཡོད་པར་མ་ཟད། སྤྱང་ཀི་ལྟ་བུའི་མའོ་ཡིས་རྒྱ་བོད་ཀྱི་གནའ་བོའི་ཤུལ་བཞག་རིག་གནས་ཡོད་ཚད་རྩ་མེད་བཏང་སྟེ་རིག་གནས་གསར་བར་བརྗེ་བ་སྟེ། རྒྱ་བོད་མི་མང་ལ་ཕས་བུ་དང་བུ་མོ་གསོད་རྡུང་གཅར་གསུམ་བྱེད་པར་བསྐུལ་བ་དང་། བུས་རང་གི་ཕ་མ་གཉེན་ཉེ་ལ་དེ་ལྟར་འཐབ་རྩོད་བྱེད་དགོས་པའི་བཙན་དབང་བཏང་སྟེ་ཡ་ང་ཞིང་སྐྱི་ཡ་བའི་དམྱལ་བ་མངོན་སུམ་བཞིན་དུ་བསྒྱུར། འདི་ནི་གུང་ཁྲན་ཏང་གིས་རྙིང་པ་གཏོར་ནས་གསར་བ་བསྐྲུན་པའི་རིག་གནས་ངོ་མ་དེ་ཡིན། སྐུ་ཞབས་ཝུན་ཇ་ཡིས་གལ་ཏེ་མི་ལོ་དྲུག་ཅུའི་རིང་དྲག་སྤྱོད་ཀྱི་བྱེད་ཐབས་འདི་བཞིན་སྤྱད་དེ་མུ་མཐུད་ཕྱིན་པ་ཡིན་ན་རིག་གསར་སྐབས་ཀྱི་གནས་སྟངས་ངན་པ་དེ་ལྷགས་པར་བཤད་ཡོད། ཁོང་གིས་རིག་གསར་གྱི་གོད་ཆག་ལ་ངོས་ལེན་བྱས་ནའང་རང་གིས་མི་ལོ་བཅུའི་དྲག་སྤྱོད་རྣམས་ཞི་བར་བསྒྱུར་ཐབས་བྱས་པ་རེད། འདི་ནི་གུང་ཁྲན་དྲག་སྤྱོད་པའི་ངན་གཤིས་འཇགས་པའི་རྟགས་མཚན་ཞིག་ཡིན། དུས་ནམ་ཡང་རང་སྐྱོན་ངོས་ལེན་མི་བྱེད་པའི་དམར་གཞུང་གི་མགོ་གཙོ་ཞིག་ལ་མཚོན་ན་གྱེས་གཏམ་འདི་ནི་རང་སྲོག་དང་བརྗེ་མོ་བྱས་པའི་སྐད་ཆ་ཞིག་ཆགས་ཡོད་ལ། བོད་བཙན་པོའི་སྙིང་སྟོབས་མེ་རུ་འབར་བར་དངངས་སྐྲག་དང་ཁོང་ཁྲོས་སྐད་ངན་ཡང་ཤོར་ཡོད་པ་སྟེ། ཁོང་གིས་རང་ལུས་མེར་བསྲེགས་ཀྱི་ཞི་རྒོལ་ལ་དྲག་སྤྱོད་ལས་འགུལ་ཡིན་རབས་དང་། ༸གོང་ས་མཆོག་དང་བོད་དབུས་གཞུང་གིས་བརྒྱུད་བསྐུལ་བྱས་པར་བརྗོད་ཡོད། ཁོང་གི་གཏམ་བརྗོད་འདི་དང་གྱེས་གཏམ་གཉིས་ཞིབ་བསྡུར་གྱིས་ཤེས་པ་ནི་རང་ཉིད་མི་ནག་ཡིན་པའི་དངོས་ཡོད་སྦ་འདོད་ཡོད་པར་ཚོད་དཔག་ཐུབ་པ་ཞིག་ཡིན། ཕྱོགས་གཞན་ཞིག་ནས་བསམ་ན་ཁོང་ཡང་རྒྱ ་ནག་གི་ལོ་རྒྱུས་ཤེས་པའི་རྒྱ་མི་ཞིག་ཡིན་པའི་ངོས་ནས། སོག་མན་སྐབས་དང་རིག་གསར་བཅས་ཀྱི་རྒྱ་ནག་དམར་གསོད་དང་མཚུངས་པའི་བོད་མི་དམར་གསོད་ལ་སེམས་འཚེབ་དང་གནོང་འགྱོད་བྱེད་ཁུལ་བྱས་པར་བཤད་ཆོག དུས་རབས་ཉེར་གཅིག་པའི་ནང་དྲག་སྤྱོད་སྲིད་གཞུང་གིས་སྔོན་ཐོན་དང་ཡར་རྒྱས་ཀྱི་ཁ་གཡང་སྒྲོགས་ནས་མི་མང་ལ་ཡར་རྒྱས་ཀྱི་ལོངས་སྤྱོད་ཡོངས་སུ་བཀག་ཅིང་། སྒེར་གཅོད་རི ང་ལུགས་ཀྱི་རྫུན་དང་གཡོ་སྒྱུའི་འཁྲབ་སྟོན་ལ་མི་འདོད་བཞིན་དུ་ལྟ་དགོས་པར་བཙན་བསྐུལ་བྱེད་པ་དང་ཆབས་ཅིག་ཏུ། སྐུ་ཞབས་ཝུན་ལགས་ཀྱི་གྱེས་གཏམ་གྱིས་གསོན་ཤུགས་ཤོར་ཟིན་པའི་དྲག་སྤྱོད་སྲིད་གཞུང་གི་ནང་ཁྲོལ་ཕྱིར་མངོན་བྱས། ༡༩༤༩ ལོ་ནས་༡༩༨༠ བར་སྟེ་མི་ལོ་སུམ་བཅུའི་དཀའ་སྡུག་གི་དུས་ཚོད་དེ། རོ་བརྩིགས་ཁྲག་བཞུར་གྱི་དོན་རྐྱེན་བསླངས་པའི་དུས་རབས་དང་པོ་དང་། ༡༩༨༡ ལོ་ནས་ ༢༠༡༢ བར་སྟེ་མངོན་གསལ་མ་ཡིན་པའི་སྒོ་ནས་དམར་གསོད་དུས་རབས་གཉིས་པའི་སྐབས་སུ། གུང་ཁྲན་སྒེར་གཅོད་ལམ་ལུགས་བསྒྱུར་བཅོས་དགོས་པར་བཤད་པ་ནི་སྐུ་ཞབས་ཝུན་ཙམ་མ་ཡིན་ནའང་། ཝུན་གྱིས་དྲག་སྤྱོད་སྲིད་གཞུང་གི་ལས་དུས་རྫོགས་པ་དང་དུས་མཚུངས་སུ་དམར་ལུགས་པའི་ལྟ་བ་ལས་ཀྱང་ལོག་པར་མཚོན་ཐབས་བྱས་ཡོད། དེ་བས་ཀྱང་ཁོང་གིས་སྐྱོ་ཉམས་དོད་པས་དྲག་སྤྱོད་སྲིད་གཞུང་བསྒྱུར་བཅོས་དགོས་པའི་གྱེས་གཏམ་གྱིས་སྲིད་འཛིན་ཧོ་ཅིིན་ཐོ་ནི་གཏུམ་སྤྱོད་དང་དྲག་སྤྱོད་ལ་འབྱོངས་ཤིང་ཡ་ང་སྙིང་རྗེ་མེད་པར་རྒྱ་བོད་སོག་གུར་མི་མང་དམར་གསོད་བྱས་དང་བྱ་བར་ཅི་མི་སྙམ་པའི་“མ་ཧྥེ་ཡ་”དེ་ཡིན་པར་མཚོན་ཡོད་ལ། དུས་རབས་ཉེར་གཅིག་པའི་མའོ་དང་ཧེ་ཐི་ལེ། སི་ཏ་ལེན་བཅས་ཀྱི་ངོ་ཚབ་མཚོན་པར་བསྟན་ཏེ་རང་ཉིད་དྲག་སྤྱོད་ལམ་ལུགས་དང་ཁ་གྱེས་ཡོད།

༡༩༧༩ ལོ་སྟེ་འདི་ཙམ་ནས་གུང་ཁྲན་གྱི་སྲིད་ཇུས་ཅུང་ཙམ་གུ་ཡངས་པའི་རྣམ་པ་བསྟན་ནའང་སྨྲ་བརྗོད་རང་དབང་སོགས་འགྲོ་མིའི་གཞི་རྩའི་རང་དབང་སྤུ་ཙམ་མེད་པར་སྨྲ་མི་ཤེས་པའི་དུད་འགྲོ་དང་མཚུངས་པར་བསྡོད་དགོས་བྱུང་། རྒྱུ་མཚན་དེ་དག་ལ་བརྟེན་ནས་རྒྱ་བོད་མི་མང་གིས་གུང་ཁྲན་དམར་གཞུང་ལ་གཏན་དུ་ཡིད་ཆེས་མ་ནུས་པ་ཡིན་འདུག་ལ། དེ་བས་ཀྱང་ལོ་ངོ་སྟོང་ཕྲག་གི་ལོ་རྒྱུས་ཁྱད་ཆོས་ལྡན་པའི་བོད་རང་གི་འགྲོ་ལུགས་ལྟར་ཏེ། གཞུང་ས་དགའ་ལྡན་ཕོ་བྲང་བ་ཆེན་མོས་དབུ་ཁྲིད་པའི་རང་གཞུང་དབུ་ལྷན་བཙན་བྱོལ་དུ་གྱར་བ་སྟེ། རྒྱ་གར་རྡ་སར་གནས་འཆའ་བའི་བོད་གཞུང་ལ་རེ་བ་དང་ཡིད་ཆེས་སྔར་བཞིན་བརྟན་པོར་གྱུར་ཅིང་། སླར་ཡང་༸གོང་ས་སྐུ་འཁོར་གདན་འདྲེན་གྱིས་བོད་རང་དབང་ཆེད་བཙན་རྒོལ་གྱི་ལས་འགུལ་མཚམས་བཞག་མྱོང་མེད། ཕྱི་རྒོལ་དང་དམར་གསོད་ཀྱི་བྱུང་རབས་སྨྲ་བཟོད་བྲལ་བའི་དངོས་བྱུང་ལ་འཛམ་གླིང་མི་མང་ཧོན་ཐོར་ཏེ་རྟག་ཏུ་ཅི་ཕྱིར་ཞི་རྒོལ་ཙམ་བྱས་པར་དམར་གསོད་བྱ་དགོས་པ་རེད་ཅེས་དྲི་བ་འདྲི་དགོས་བྱུང་ཡོད། འོན་ཀྱང་བོད་ཙམ་དུ་མ་ཟད་ཀྱི་རྒྱ་ནག་མི་མང་ལའང་དེ་ལྟར་བྱས་ཡོད་དེ། དཔེར་ན། དྲུག་བཞིའི་བཙན་རྒོལ་ཆེན་མོ་ལྟ་བུས་མཚོན་ནུས་པ་ཞིག་རེད། སྐབས་དེར་སློབ་མ་རྣམས་ཀྱིས་ཞི་བའི་ངོ་རྒོལ་གནང་ནའ ང་དམར་གཞུང་དྲག་སྤྱོད་པས་ལྕགས་འཁྲབ་འཁོར་ལོ་དང་མེ་མདས་ཁྲག་དམར་གྱིས་ལམ་ཆེན་བཀབ་པ་བྱུང་ཡོད། མི་ལོ་ཉི་ཤུའི་རྗེས་སྟེ་ ༢༠༡༢ ལོར་སྐུ་ཞབས་ཝུན་ལགས་ཀྱིས་རང་གི་བྲང་ཁོག་ཏུ་ཡུན་རིང་སྦས་པའི་བསྒྱུར་བཅོས་གཏམ་བརྗོད་ཀྱིས་དྲུག་བཞིའི་དམར་གསོད་ཀྱིས་མཚོན་པའི་དྲག་སྤྱོད་ཀྱི་ཐལ་བར་བསྲེགས་པའི་མི་མང་གྲངས་མེད་ཀྱི་རྣམ་ཤེས་ལ་མཆོད་མེ་སྒྲོན་ཁུལ་བྱས་ཤིང་། དེ་སྔའི་མང་གཙོ་ལས་འགུལ་སྐབས་ཀྱི་དམར་གསོད་ཕྱིར་འཐེན་བྱས་པའི་སྐུ་ཞབས་ཀྲོའོ་ཙི་ཡང་ལ་དག་འབུལ་བྱས།

བསམ་མི་ཕོད་ཅིང་སྨྲ་མི་ནུས་པའི་དྲག་སྤྱོད་ཁོ་ནས་འཚོ་བའི་གུང་ཁྲན་ལ་ཅི་ཙམ་གྱིས་ཞི་བའི་ངོ་རྒོལ་བྱས་པ་ཡིན་ན། དེ་ཙམ་གྱིས་དྲག་སྤྱོད་པའི་མེ་མདའི་སོ་ཁ་ཐད་ཀར་གཏད་དེ་དམར་གསོད་བྱེད་རྐྱང་བྱས་པ་འདི་བསྒྱུར་བཅོས་མ་བྱས་ཕྱིན། ཁོག་ཏུ་མེ་འབར་ཡང་ཁར་དུ་བ་མ་ཐོན་ཞེས་པའི་དཔེ་ལྟར་རིག་གསར་དུས་རབས་ཀྱི་ངོ་བོ་དེ་དུས་རབས་ཉེར་གཅིག་པའི་ནང་དུ་ལྷགས་པ་དངོ ས་མཐོང་ལག་ཟིན་ཡིན་པས། དུས་རབས་ཉེར་གཅིག་པའི་ནང་དུའང་རང་གི་མི་མང་གསོད་རྡུང་གཅར་གསུམ་དང་བཙོན་མནར་དངངས་གསུམ་གྱིས་མི་ཚེ་བསྐྱལ་འཇུག་རྒྱུ་འདི་ངོ་ཚ་དགོས་པ་ཞིག་རེད། འོན་ཀྱང་གུང་ཁྲན་དམར་གཞུང་གིས་བསམ་ཤེས་དང་མཐུན་ལམ་སོགས་ཡ་རབས་ཀྱི་བྱ་སྤྱོད་ལྡན་པའི་སྒོ་ནས་དང་། ཡང་ན་ཁྲིམས་ལུགས་གཞིར་བཟུང་ཐོག་སྔར་ཡང་བོད་དོན་ཐད་ལས་དོན་སྒྲུབ་མྱོང་མེད་ལ། ད་ལྟ ་ཡང་དེ་བཞིན་དེ་བཞིན་དུ་འགྲོ་བཞིན་ཡོད་པར་མ་ཟད། བོད་ཀྱི་རིག་གཞུང་དང་ཆོས་ལུགས། སྲོལ་རྒྱུན། དད་མོས་བཅས་གཞི་རྩའི་འགྲོ་མིའི་ཐོབ་ཐང་ལ་བསམ་ཤེས་བྱེད་རྒྱུ་ལྟ་ཅི། བོད་ཀྱི་ཐུན་མོང་མ་ཡིན་པའི་རིག་ཁྱད་དག་ལ་ཁྱད་གསོད་དང་མཐོང་ཆུང་། དམའ་འབེབས་སོགས་སྔར་སོག་པོ་དང་མན་ཇུ། ཉིང་ཧོང་བཅས་ཀྱིས་རྒྱ་ནག་མི་མང་ལ་སྤྱད་པའི་ལོ་རྒྱུས་བཞིན་དུ་བྱས་པར་བརྟེན། བཙན་པོའི་བུ་རྒྱུད་དག་གིས་རང་གི་རིག་གཞུང་དང་ཆོས་ལུགས་ཀྱི་ནང་དོན་དང་འགལ་བར་མ་སོང་བའི་སྒོ་ནས་ཞི་རྒོལ་གྱི་མཐར་ཐུག་ཏུ་སོན་པའི་རང་སྲོག་མེ་རུ་སྒྲོན་པའི་ལས་འགུལ་གསར་བ་འདི་མི་རྩོམ་མཐུ་མེད་བྱུང་བ་རེད། ཞི་རྒོལ་གྱི་མར་མེ་ལ་དྲག་སྤྱོད་ཀྱི་མེ་མདའ་སྤྱད་པའི་བྱེད་བབ་འདིར་རྒྱ་བོད་མི་མང་ཙམ་དུ་མ་ཟད་རྒྱལ་སྤྱིའི་སྤྱི་ཚོགས་ཀྱིས་ཀྱང་གུང་ཁྲན་དམར་གཞུང་ནི་དུས་ར བས་ཉེར་གཅིག་པའི་གོ་ལའི་སྟེང་གི་སྤྱང་ཀི་དང་སྣང་བ་མུན་པར་མཐོང་བའི་འུག་པ་ལྟ་བུར་མཐོང་གིན་ཡོད་པར་མ་ཟད། དྲག་སྤྱོད་སྲིད་གཞུང་ལ་འཇིགས་སྣང་གིས་ལྟ་སྟངས་ངན་པ་བྱུང་བའི་ཁར་བོད་སྐྱོབས་ལས་འགུལ་སྣ་མང་སྤེལ་བཞིན་ཡོད་ལ། ང་ཚོས་མཐོང་གསལ་ལྟར་དམར་གཞུང་གི་བྱེད་བབ་འདི་དག་ནི་དཀྱིལ་ཤར་ཨ་རབ་ཀྱི་སྒེར་གཅོད་པ་དག་དང་མཚུངས་པར་ངོས་འཛིན་གསལ་བོ་བྱུང་ཡོད། དེ་བས་ཀྱང་མི་ལོ་དྲུག་ཅུའི་ལོ་རབས་འདི་དག་གི་ཁྲག་བཞུར་རོ་བརྩིག་གི་དོན་རྐྱེན་རྣམས་གཞན་འགེབ་སྟེ། ༸གོང་ས་མཆོག་དང་བོད་མིའི་སྒྲིག་འཛུགས་ཀྱི་སྟེང་དུ་འགེབ་ཐབས་བྱས་དང་བྱེད་བཞིན་མཆིས་པར་བཙན་བྱོལ་བོད་གཞུང་གིས་རྒོལ་ལན་བརྣག་ཐོག་བཙག་འཁེལ་ལྟར་བཏབ་ཡོད། འོན་ཀྱང་དྲག་སྤྱོད་སྲིད་གཞུང་ནི་དུས་རབས་ཉེར་གཅིག་པའི་འུག་པ་དེ་ཡིན་པས་ན། འུག་པའི་མིག་ལ་མུན་པ་རན་པ་ལས་སྣང་བ་མཐོང་ནུས་ཀྱི་དབང་བོ་ག་ལ་ལྡན་དེ། ཝུན་ཇ་པའོས་བསྒྱུར་བཅོས་དགོས་པའི་གྱེས་གཏམ་བསྒྲགས་པས་མཚོན་ནུས་པ་ཡིན། རྒྱུ་མཚན་ནི་དྲག་སྤྱོད་པས་རང་དབང་གི་སྣང་བ་མཐོང་གི་ཡོད་ན་དྲག་སྤྱོད་སྲིད་གཞུང་བསྒྱུར་བཅོས་དགོས་པར་བརྗོད་འོས་པ་ཞིག་ག་ལ་ཡིན་ཏེ། གུང་ཁྲན་ཏང་མུ་མཐུད་བརྟན་དགོས་པའི་གྱེས་གཏམ་བརྗོད་ངེས་པས་སོ། དེས་ན་དུས་རབས་ཉེར་གཅིག་པའི་ནང་འདིར་ལོ་ངོ་དྲུག་ཅུ་ལྷག་གི་དྲག་སྤྱོད་ཀྱི་བབ་སྟངས་འགྲོ་ས་ཡེ་ནས་མེད་པར་ཕྱོགས་ཡོངས་ནས་ངོས་ཟིན་ཐོབ་པའི་གྱེས་གཏམ་ཞིག་ཏུ་བརྗོད་ཆོག་པ་ཡིན་ནོ།།

མདོར་ན། འུ་ཅག་གིས་ཤེས་གསལ་ལྟར་འུག་པའི་དབང་བོ་ཅན་གྱི་དམར་གཞུང་གིས་ནི་དཀར་སྣང་ཀུན་ཁྱབ་ཀྱི་འགྲོ་མིའི་རང་དབང་འདིས། སྲིད་དབང་སྒེར་སྤྱོད་པའི་དབང་ཚད་ལ་ཐད་ཀར་རྒོལ་རྡུང་གི་ནད་མ་ཆོག་ནས། དྲག་སྤྱོད་པས་བོད་དུ་དྲག་སྤྱོད་དང་གཏུམ་སྤྱོད། ཇག་སྤྱོད་བཅས་ཀྱི་སྒོ་ནས་དམར་གསོད་དང་འདེམས་ཀ་མེད་པའི་མེར་བསྲེགས་རིམ་བྱུང་གི་དོན་རྐྱེན་རྣམས་བོད་གཞུང་ལ་འགེལ་གྱི་ཡོད་པ་རེད། བོད་གཞུང་གིས་རླུང་འཕྲིན་དང་ཚགས་ཤོག་སོགས་ཀྱི་སྟེང་དུ་གསལ་གསལ་ཐིང་ཐིང་གི་དགག་ལན་གནང་གིན་འདུག་མོད་དེ། དོན་དངོས་ལ་བོད་གཞུང་ལ་མེར་བསྲེགས་དགོས་པ་སོགས་ཀྱི་བརྒྱུད་བསྐུལ་ལངས་ཕྱོགས་རྩ་བ་ནས་མེད་དེ། དེ་ལྟར་ཡོད་པ་ཡིན་ན་ལམ་དབུ་མའི་ལྟ་གྲུབ་རྒྱུན་བསྐྱོངས་གནང་དོན་མེད་ལ། བཙན་པོའི་སྙིང་སྟོབས་མངོན་པའི་མེ་དཔུང་གི་འབར་རྒྱུན་གཅོད་པའི་དབང་ཚད་ནི་དེ་བས་ཀྱང་ཡོད་པ་མ་ཡིན་ཏེི། བཙན་པོའི་སྙིང་སྟོབས་སླར་ཡང་འོད་དམར་དུ་འབར་བའི་མེ་ལྕེ་རེ་རེ་ནི། བོད་གངས་ཅན་གྱི་ཞི་བདེ་དང་རང་དབང་ཙམ་དུ་མ་ཟད་ཀྱི། གླིང་ཆེན་ཨེ་ཤ་ཡའི་རང་དབང་གི་ཉི་མ་འདྲེན་པའི་སྐྱེ་རངས་རེ་རེ་ཡིན་པས་སོ། མི་ལོ་བཅུ་ཙམ་གྱི་ཉམས་མྱོང་གི་སྟེང་ནས་སྐུ་ཞབས་ཝུན་ལགས་ཀྱིས་ཀྱང་བོད་ཀྱི་མེ་ལྩེ་འབར་ཐེངས་རེ་རེའི་ནུས་ཁྱད་དང་ཁྱབ་ཚད་རྟོགས་ཏེ། གུང་ཁྲན་དམར་གཞུང་བསྒྱུར་བཅོས་དགོས་པའི་མཐའ་མཇུག་གི་ཁ་འཆམ་འཇོག་དགོས་བྱུང་བ་རེད་ལ། དེ་ལྟའི་ཁ་འཆམ་གྱིས་ནི་དྲག་སྤྱོད་སྲིད་གཞུང་ཕྱིར་ར་ཤི་ཡའི་འཁྱགས་རོམ་གྱི་གཏིང་རིམ་ལ་སྦ་དགོས་པའི་སྔོན་བརྡ་བཏང་བ་ཞིག་ཡིན། བརྒྱ་གོ་གཅིག་ཆོད་ཀྱི་ཝུན་གྱི་གཏམ་བཤད་འདིས་ནི་ཀྲོའུ་བེ་ཆོན་གྱིས་གཙོས་ཡེ་རྡོར་སོགས་ནི་རང་སའི་མུན་ནག་གི་ཁོར་ཡུག་ནང་ཤིན་ཏུ་གསལ་བར་རློམ་པའི་འུག་ཚོགས་ཀྱི་འཁྱོག་བརྗོད་བསྒྲགས་བྱེད་ཀྱི་རླུང་ཡན་ཙམ་དུ་བསྟན་པ་ཞིག་རེད།