གངས་ལྷ་མེ་ཏོག་གི་གསར་བརྗེ་ཇི་ལྟར་འབྱུང་ཐུབ་ཀྱི་རེད།

ཨ་རབ་ཀྱི་དཔྱིད་ཀའི་སྣང་ཚུལ་གླེང་ཚེ་བོད་མི་རྣམས་ཀྱིས་ཕྱིར་བཀྱེད་བྱེད་རྒྱུ་ཡིན་པའི་ཚོར་བ་ང་ལ་སྔ་ས་ནས་བྱུང་སོང་། གང་ཡིན་ཟེར་ན། བོད་ཀྱི་རྩོམ་པ་པོ་རྣམས་ཀྱིས་བོད་ཀྱི་སྤྱི་ཚོགས་དང་བོད་མིའི་སེམས་ཁམས་སུ་གང་ཡོད་པའི་ཟུར་སྣེ་རེ་ཟུང་ལ་འཇུས་ཏེ་འཁང་ར་བྱེད་པ་ལས། བོད་ཀྱི་སྤྱི་ཚོགས་དང་བོད་མིའི་སེམས་ཁམས་སུ་འགྱུར་བ་གཏོང་དགོས་ངེས་ཀྱི་ཚོར་བ་ཙམ་ཡང་སྤྲོད་ཐུབ་ཀྱི་མེད།

“རང་སྲིད་རང་སྐྱོང་ལ་ངེས་ཤེས་ལྡན་པའི་མི་རྣམས་ཀྱིས་མི་སྒེར་གྱི་འཚོ་གནས་ཐབས་ལམ་བསྐྲུན་ཚུལ་དང་། ཆེན་པོ་བྱས་ན་རང་བཙན་དང་མི་རིགས་རང་སྐྱོང་ལ་ངེས་ཤེས་ལྡན་པར་འཇུག་ཐུབ་”པའི་བསམ་ཚུལ་དེ་ནི་ནུབ་ཕྱོགས་ཀྱི་སྤྱི་ཚོགས་དང་། ཐ་ན་དཀྱིལ་ཤར་ཨེ་ཤ་ཡའི་ནང་དུའང་ཕལ་ཆེ་བར་དགོས་མཁོ་མེད་པ་རེད།  དེའི་རྐྱེན་གྱིས་ང་ཚོའི་སྤྱི་ཚོགས་སུ་ཚེ་སྲོག་གཅིག་གིས་སྣེ་ཁྲིད་པའི་གངས་ལྷ་མེ་ཏོག་གི་གསར་བརྗེ་མ་བྱུང་བའི་རྒྱུ་མཚན་འདྲེན་རྒྱུ་ནི་ཕྱིར་བོད་ཀྱི་སྤྱི་ཚོགས་ལ་འཁང་ར་བྱེད་རྒྱུའི་ཆེད་དུ་ཡིན་མི་སྲིད།  ཅིའི་ཕྱིར་གངས་ལྷ་མེ་ཏོག་གི་གསར་བརྗེ་མ་བྱུང་བའི་འགན་འཁུར་དེ་བོད་ཀྱི་སྤྱི་ཚོགས་དང་། ཆོས་ལུགས། གོམས་སྲོལ་སོགས་གང་ལའང་མེད་པར་ང་ཚོ་རང་ཉིད་ལ་ཡོད་པ་ཡིན། གནས་ལུགས་འདི་ཧ་ཅང་ལས་སླ་བོ་ཡིན་ཏེ། གལ་སྲིད་དེ་ལྟ་བུའི་གེགས་རྐྱེན་ཞིག་ཡོད་པ་ཡིན་ན་བོད་མི་ཡོངས་ཀྱིས་རྒྱབ་ནས་གཡུག་བཞག་པའི་གདོན་མའི་པགས་རྩག་ལ་བཅངས་བའི་འདུ་ཤེས་དང་། ཆོས་ལུགས་དང་གོམས་སྲོལ་གྱི་འདུ་ཤེས་བར་མ་འདྲ་བ་ཅི་ཞིག་ཡོད་དམ། འདི་ལྟ་བུའི་གནས་ལུགས་འགལ་ཟླར་ཚོར་ཚེ་ང་ཚོས་མི་སྒེར་གྱི་གསར་བརྗེ་ཕྲན་བུའི་རིགས་ཀྱང་ཡོང་ཐབས་མེད་པ་ངོས་ལེན་བྱེད་དགོས།  དེ་ནི་ཧ་ཅང་བློ་ཆུང་ཞིག་མ་རེད་དམ།

གནད་དོན་གཞན་ཞིག་ནི་ང་ཚོས་མེར་བསྲེགས་གནང་མཁན་གྱི་ཚེ་སྲོག་གི་ནུས་པའི་ཐད་གླེང་སློང་བྱེད་ཀྱི་ཡོད། ལས་འགུལ་གྱིས་ནུས་པ་ཐོན་དཀའ་བའི་གནད་དོན་གླེང་བ་དེ་ཡིས་མེར་བསྲེགས་གནང་མཁན་གྱི་ཚེ་སྲོག་ལ་ནུས་པ་མེད་པར་བརྗོད་ཀྱི་ཡོད་པ་སུས་ཀྱང་ངོས་འཛིན་བྱེད་མི་ཐུབ། ནུས་པ་མེད་པའི་ལས་འགུལ་ཞིག་ཡོད་སྲིད་དམ། འོན་ཀྱང་། ནུས་པ་ཐོན་དང་མ་ཐོན་པའི་བསྡུར་ཚད་ཀྱི་ཚད་གཞི་ནི་ངས་བོད་མིའི་སེམས་ཤུགས་སྤར་བ་ཙམ་དང་ཕྱི་ཕྱོགས་ཀྱི་གླེང་སློང་ཙམ་གྱི་ངོར་འཇོག་འདོད་མེད་ཅིང་། དེས་གནད་དོན་གྱི་ངོ་བོ་སྟོན་པའམ་རྩ་བ་དང་ཉེ་བར་བཅར་གྱིན་པའི་སྣང་ཚུལ་སྟོན་ཐབས་མེད། འདི་ལྟ་བུའི་འཕེལ་ཕྱོགས་ནི་ཁ་ཚ་དགོས་གཏུགས་ཀྱི་གནད་དོན་ཞིག་ཀྱང་མིན་པ་འདྲ། སེམས་ཤུགས་སྤར་ཏེ་འུར་གྱིས་ཞོགས་ཡོང་པའི་ལས་འགུལ་གྱི་ཚ་རླབས་ཤིག་ཡོད་པ་ཡིན་ནའང་། དེ་ཡིས་”བོད་ཀྱི་གནད་དོན་”གསལ་འདོན་བྱེད་རྒྱུ་ཕལ་ཆེར་ཁག་པོ་ཡིན།  གང་ཡིན་ཟེར་ན་ལས་འགུལ་འདི་ལྟ་བུའི་ཁྲོད་དུ་”ཁོ་ཚོས་སྐད་འབོད་བྱེད་ཀྱི་འདུག  ང་ཡང་སོང་བ་ཡིན་”ལྟ་བུའི་སྐད་ཆ་ཡོང་སྲིད། སྐད་ཆ་འདིས་ཅི་ཞིག་མཚོན་ཐུབ་བམ། ངས་བསམ་ན་འདིས་ནི་ལས་འགུལ་དེ་རང་དོན་དང་འབྲེལ་བ་ཆགས་མ་ཐུབ་པ་མཚོན་ཡོད།

རྒྱབ་དཔུང་གི་ལས་འགུལ་ཧ་ཅང་ཉུང་བའམ་ཐ་ན་ཡོད་པ་ཙམ་གྱི་ང་ཚོའི་རྒྱལ་གཅེས་དཔའ་བོ་སུམ་ཅུ་སོ་གྲངས་ཀྱིས་རྒྱལ་སྤྱིའི་སྟེང་བོད་ལ་སྙིང་རྗེ་བྱེད་མཁན་དང་གདུང་སེམས་མཉམ་བསྐྱེད་བྱེད་མཁན་གྱི་གྲངས་ཀ་མཐོ་ཚད་ཅིག་ཏུ་བསྐྱལ་བའི་རྒྱལ་ཁ་ཐོབ་ཡོད་ནའང་།  ང་ཚོར་ཆབ་སྲིད་ཀྱི་སྟེང་ནས་རོགས་པ་བྱེད་མཁན་ཧ་ཅང་ཉུང་བ་དང་ཐ་ན་མེད་པ་རེད། འདི་ལྟ་བུའི་སྐབས་སུ་ངས་རྒྱ་གར་གྱི་རང་བཙན་འཐབ་རྩོད་ཀྱི་དབུ་ཁྲིད་ཨཅརྱ་ཀིར་པ་ལ་ནིས་སྐད་ཆ་ཞིག་སྟེ་”བོད་མི་ཚོས་རྒྱ་གར་གཞུང་གིས་བོད་རང་བཙན་གྱི་དོན་དུ་ལས་དོན་བྱེད་ཀྱི་རེད་བསམ་ཡོད་ན། དེ་ནི་ནོར་འཁྲུལ་རེད།”ཅེས་པ་བླ་ན་མེད་པའི་སློབ་སྟོན་དུ་དྲན་ཞིང་། རྒྱལ་ཁབ་གང་གིས་ཀྱང་བོད་ཀྱི་ཆེད་དུ་ཆབ་སྲིད་ཀྱི་ལས་དོན་བྱེད་མི་ཐུབ་པའི་རྒྱུ་མཚན་རྙེད་ཀྱི་འདུག དེས་རྐྱེན་གྱིས་རང་ལུས་མེར་བསྲེགས་ཀྱི་ནུས་པ་ཐོན་པ་དགོས་ཚེ། བོད་མི་བྱིངས་ངེས་ཤེས་ལྡན་པའི་རྒྱབ་དཔུང་གི་རྦ་རླབས་མེད་ཐབས་མེད་ཅིང་། “ཁོ་ཚོས་སྐད་འབོད་བྱེད་ཀྱི་འདུག  ང་ཡང་སོང་བ་ཡིན་”ལྟ་བུའི་བསམ་ཚུལ་རང་དོན་ཡིད་བྱེད་ཀྱིས་བཟློག་ཐུབ་དགོས་པ་རེད། བསམ་ཚུལ་འདི་དོར་བའི་བོད་ཀྱིས་ད་གཟོད་ཚེ་སྲོག་གཅིག་གིས་སྣེ་ཁྲིད་པའི་གངས་ལྷ་མེ་ཏོག་གི་གསར་བརྗེ་བསུ་ཐུབ་པ་དང་། ལས་འགུལ་ལ་སྒེར་བའི་སྣང་ཚུལ་དང་ཡ་བྲལ་གྱི་རྣམ་པ་དེའང་འཇའ་བཞིན་ཡལ་རྒྱུ་རེད།