མའོ་ནི་རྒྱ་དམར་པོའི་ཡབ་ཆེན་ཡིན་ཞེས་སྒོ་དམར་པོའི་ཡང་སྟེང་ལ་བཀལ་ཡོད་ལ།རོ་དམར་པོ་དེའང་ཤེལ་གྱི་སྒམ་ནང་ལ་བཅུག་སྟེ་ལྷ་མེད་པའི་ཏང་གི་སྐུ་རྟེན་དུ་ཉར་ཡོད། ཏང་གི་ཡབ་ཆེན་དང་སྐུ་རྟེན་དེས་ཆོས་ལུགས་ཡོད་ཚད་ནག་པོ་དུག་ཏུ་བསྒྲགས་ཏེ་ཏང་གི་དམ་བཅར་བྲིས་ཡོད་སྟབས། ཅཱང་གིས་ཀྱང་ཏང་གི་ཡབ་ཆེན་གྱི་ངག་བཅོལ་ལྟར། ཆོས་འཁོར་རྩ་རླུང་གི་ནག་པོ་དུག་རླངས་དེ་ཏང་གི་གནམ་འོག་ནས་འཇོམས་པར་བྱེད་ཆེད་དུ། གསོད་འབྲེག་གཏུབ་གསུམ་ལ་ཡ་ང་བྲལ་ཞིང་། ཁྲིམས་སྒྲིག་གནས་ལུགས་ཀྱི་སྒྲོམ་ལ་མི་ཤོངས་པའི་ཏང་གི་རྐུབ་སྟེགས་མཐོན་པོ་ཞིག་ཆེད་བཟོ་བྱས་ཏེ། ཏང་གི་མིག་ནང་གི་ནག་པོ་དུག་གི་རྩ་རླུང་པ་ཚོའི་དོན་སྙིང་ལྐོག་མར་འབྱིན་པ་དང་། ཤ་ཁྲག་ཚལ་བུར་གཏུབ་རྐྱང་བྱེད་དགོས་པའི་དམར་པོ་ཁྲག་གི་རུ་དར་ཞིག་བསྒྲེངས་ཡོད།
ཡིན་ནའང་། རྒྱ་དམར་པོས་པཎ་ཆེན་སྐུ་ཕྲེང་བཅུ་པ་མཆོག་བོད་པའི་བླ་སྲོག་འཛིན་པའི་དུག་སྡོང་ཞིག་ཏུ་ཚོར་ཏེ། ཏང་གི་ཉི་མའི་སྒྲིབ་གཡོགས་འོག་སྨན་རྫས་དུག་གི་ལག་པ་བརྐྱངས་ཏེ་སྐུ་བཀྲོངས་རྗེས། རྒྱ་དམར་པོས་བོད་ཀྱི་གཟན་དམར་པོའི་འོག་རྫུ་འཕྲུལ་དུག་གི་ཆོ་འཕྲུལ་ཞིག་སྟོན་རྩིས་ཀྱི་རྨི་ལམ་བཏང་ཡོད། དེ་ནི་ཁོ་ཚོས་དུག་ཏུ་སྒྲོག་པའི་བོད་པའི་ཆོས་ལ་རྒྱང་བཀྱེད་ཀྱིས་མདའ་ཆར་མཚོན་གྱིས་སོ་ཁ་ཁོ་ནས་འབུར་འཇོམས་མི་ཐུབ་པ་རྟོགས་ཏེ། གནའ་སྔ་མོར་ཆོ་ལོ་དང་ཏཱ་ཡང་གིས་ཆོ་འཕྲུལ་སྐུལ་ཏེ་མི་ཆེན་བླ་ཆེན་ཚོའི་གློ་སྙིང་མཆིན་གསུམ་བསླུས་ཤིང་། ཡོན་བདག་གི་དར་སྐུད་དང་བཅིངས་བཀྲོལ་གྱི་ཁ་གཡང་ཁྲོད་བོད་པའི་དབང་ཐང་ཡོད་ཚད་ཁྱེར་བའི་བྱུང་པ་ལྟར། དམར་པོ་གཟན་གྱི་ཤུབ་ནང་ལ་འཛུལ་ཏེ་བོད་པའི་དད་པ་དང་རྣམ་ཤེས་གཏིང་ནས་བཀོག་ཐབས་བྱ་རྩིས་རེད།
ཉེ་ཆར་ལ་མོའི་ཚུར་རྒྱབ་ཀྱི་དྷ་ས་ན་ཟན་སྒྲིལ་དཀྲུགས་ཏེ་མི་ལོ་ ༡༧ ལ་བོར་སོང་པའི་བཙོན་འོག་གི་པཎ་ཆེན་ཆུང་སྲིད་འཚོལ་བའི་གདུང་དབྱངས་གྱེར་བཞིན་ཡོད་ལ། ལ་མོའི་ཕར་རྒྱབ་ཀྱི་པེ་ཅིན་གཞུང་གིས་གསེར་བུམ་ནང་བཟོས་པའི་པཎ་ཆེན་འཛམ་གླིང་སྒང་གཟིགས་མོར་འདེད་བཞིན་ཡོད། འཁྲབ་སྟེགས་སྟེང་གི་སྐད་ཆ་རེ་རེ་ནི་ཏང་གིས་གཏུབ་ཅིང་བྲེགས་ཏེ་སྔར་ནས་སོ་ཕག་ལྟར་སྒྲིག་ཡོད་པ་སྨྲ་མི་དགོས་མོད། ཤ་དར་ཁྲག་དར་གྱི་པཎ་ཆེན་དེའི་ངག་སྒོ་བརྒྱུད་ཕྱིར་བུད་པའི་རང་བྱུང་ཁོར་ཡུག་གི་གལ་གནད་དང་། སེམས་ཀྱི་ཚན་རིག་གི་ནང་ཆོས། འཛམ་གླིང་ཞི་བདེ་ཡི་འབོད་པ་ཞེས་པའི་ཁ་རླངས་འདི་དག་གིས། ས་སྒང་རིལ་མོ་འདིའི་སྒང་མི་ལོ་དྲུག་ཅུར་ངལ་བ་སྐྱོན་ཏེ་ནང་པའི་ཆོས་ལ་སྔར་མེད་ཀྱི་གར་སྟེགས་བསྐྲུན་མཁན་༸གོང་ས་མཆོག་གི་སྣང་བརྙན་དང་ཤུགས་རྐྱེན་དེ། མ་འོངས་པའི་ལོ་ཉི་ཤུ་དང་སུམ་ཅུའི་རྗེས་ལ་ག་ལེར་གཟན་གྱི་མཐུ་འོག་ནས་བརྐུ་སེམས་ཀྱི་དམར་པོ་ཏང་གི་རྨི་ལམ་དེའི་ཤིན་ལྐོགས་ཕྱིར་མངོན་བཞིན་པའི་རྣམ་པ་ཞིག་ངང་ངམ་ཤུགས་ཀྱིས་སྤྲད་འོང་གི་འདུག
རྒྱ་དམར་པོ་གཟན་དམར་པོའི་འོག་འཛུལ་ཏེ་བརྐུ་ལ་ཆས་བཞིན་པའི་གོམ་སྟབས་འདིས། དད་པ་དང་དག་སྣང་འོག་གཉིད་དུ་ཡུར་རྒྱུར་གོམས་པའི་བོད་མི་ཚོར་རལ་གྲི་སོ་གཉིས་མ་ཞིག་གི་རྨི་ལྟས་བསྟན་ཡོད་དོ།།
