ཕྱི་ལོ་ ༢༠༠༡ ལོར་ཕྲན་རྒྱ་གར་ངྷ་རམ་ས་ལར་འབྱོར་བ་ཡིན། སྐབས་དེ་དག་ཏུ་ལོ་རེ་བཞིན་བོད་ནས་སྐྱབས་བཅོལ་དུ་འབྱོར་བཞིན་པའི་བོད་མི་རྒན་དར་གཞོན་གསུམ་སྟོང་ཕྲག་འགའ་བརྒལ་གྱིན་ཡོད། བལ་ཡུལ་དང་ལྡི་ལི། ངྷ་ས་བཅས་ཀྱི་སྣེ་ལེན་ཁང་སོ་སོ་ནམ་རྒྱུན་ལས་བྲེལ་གྱི་ཀློང་ན་ཁོམ་གི་མེད། བོད་ཁྱིམ་སློབ་གྲྭ་ཁག་དང་གདན་ས་སེ་འབྲས་དགའ་གསུམ་གཙོས་དགོན་སྡེ་ཁག་ཏུའང་སློབ་གཉེར་བ་འཚང་ཁ་ཤིག་ཤིག་ངང་ཡོང་གིན་ཡོད། ངྷ་ས་ནི་གསར་འབྱོར་བ་བརྒྱ་ཕར་འགྲོ་དང་སྟོང་ཚུར་ཡོང་གི་གནས་མལ་ལྟ་བུ་ཡིན་ལ། སློབ་གྲྭ་ནས་ཐོན་པ་དང་གྲྭ་ས་ནས་བུད་པ། བོད་ནས་ཡོང་སྟེ་འདིར་གཏན་སྡོད་བྱས་པ་སོགས་ཀྱི་གསར་འབྱོར་བ་ཆེས་མང་བའི་གྲོང་ཁྱེར་ཞིག་ཀྱང་ཡིན། ཡིན་ནའང་། ལོ་མང་བོའི་སྐད་ཆ་མ་རེད། ན་ནིང་དང་ད་ལོའི་སྐད་ཆ་རེད། ན་ནིང་ད་དུང་ངྷ་ས་ནས་སྔར་ལྟར་གསར་འབྱོར་བ་བརྒྱ་ཕར་འགྲོ་དང་སྟོང་ཚུར་ཡོང་རེད། གསར་འབྱོར་བ་རྫོགས་ཀྱིན་པའི་སྣང་ཚུལ་སུ་གཅིག་ལའང་བྱུང་མྱོང་ཡོད་རྒྱུ་མ་རེད། ད་ལོར་དེ་ལྟར་མ་རེད། མིག་གིས་བལྟས་བལྟས་རིག་ལ་ངྷ་སའི་སྲང་གི་གསར་འབྱོར་བ་རྫོགས་ཀྱིན་འདུག མང་མང་གིས་གླེང་འགོ་བརྩམས་སོང་།
དེང་སྐབས་ང་ལྟ་བུའི་གསར་འབྱོར་བ་ཚོ་གཅིག་གཅིག་ལ་ཐུག་དུས་གསར་འབྱོར་བ་རྫོགས་ཀྱིན་པའི་སྐོར་ཡང་ཡང་གླེང་གིན་འདུག རེ་འགས་ད་དུང་ “གསར་འབྱོར་བ་རྫོགས་ཀྱིན་ཡོད་དུས་གསར་འབྱོར་བའི་ལས་དབང་སྐྱུར་མོ་མཇུག་བསྡུ་གིན་ཡོད་པས་ད་ནི་འགྲིག་འདུག་” ཟེར། ངོ་མ་དེ་ལྟར་ཟེར། ཁོང་ཚོས་ད་དུང་མུ་མཐུད་དེ་བཤད་དོན། “གསར་འབྱོར་བ་ངྷ་ས་ནས་བསྡད་ནས་ཅི་ཞིག་བྱ་དགོས་པ་རེད། ས་ཞིང་ནི་སྟེར་རྒྱུ་མ་རེད། བདག་པོ་ནི་རྒྱག་གི་མ་རེད། དེ་ལས་གང་དུ་འགྲོ་ས་ཡོད་ན་སོང་ན་ཡག་གི་རེད། མ་མཐར་ཡང་རང་མགོ་ཐོན་འགྲོ་གི་རེད་” ཟེར།
འདི་ལྟར་ངྷ་སའི་གསར་འབྱོར་བ་ངོ་མ་ཉིན་རེ་ལས་ཉིན་རེར་ཇེ་ཉུང་དུ་འགྲོ་གིན་འདུག དེ་ཡང་ལོས་ཡིན། ན་ནིང་གཞེས་ནིང་ངྷ་ས་ན་འཁྱམ་ཉུལ་བྱེད་ཀྱིན་པའི་གསར་འབྱོར་བ་ཁྱུ་ཞིག་སྐོར་ཁག་དང་སྐོར་ཁག་བྱས་ཏེ་ཡུ་རོབ་གླིང་ལ་བུད་སོང་། ན་ནིང་གཞེས་ནིང་ངྷ་ས་ནས་ཉིན་ཕུད་ན་མཚན་འཁྱོལ་དཀའ་བའི་གསར་འབྱོར་བ་ཉམ་ཐག་མང་བོ་དེང་སྐབས་བོད་ནང་དུ་ལོག་འགྲོ་གིན་འདུག ལྷག་པར་དུ་ད་ལོའི་དུས་འཁོར་དབང་ཆེན་རྗེས་ནས་ཉུང་མཐར་ཡང་བརྒྱ་སྐོར་འགའ་སོང་རབས་བཤད་ཀྱིན་འདུག ན་ནིང་རྒྱ་ནག་གཞུང་ཚབ་ཁང་གི་སྒོ་འགྲམ་དུ་ཞོགས་པ་ཆུ་ཚོད་ ༢ ཡས་མས་ནས་ཡར་ལངས་ཏེ་བང་བསྒྲིགས་པར་འགྲོ་དགོས་ཀྱི་ཡོད་འདུག དེ་ནི་གསར་འབྱོར་བ་ངྷ་ས་དང་འབྲལ་བཞིན་པའི་ངང་ཚུལ་རེད། གསར་འབྱོར་བ་ངྷ་ནས་ཆུ་བོ་བཞིན་བཞུར་གྱིན་པའི་ངང་ཚུལ་རེད།
ཉིས་སྟོང་བརྒྱད་ལོའི་ས་བྱི་ཞི་རྒོལ་ཆེན་མོའི་རྗེས་ནས་བཟུང་གསར་འབྱོར་བ་ཚུར་སྐྱབས་བཅོལ་དུ་ཡོང་བའི་བགྲོད་ལམ་བཀག་པ་རེད། རྒྱ་ནག་གིས་ཤར་ཁུམ་བུའི་ལ་ཆེན་ནས་འགྲམ་གྱི་ཟམ་པ་ཚུན་དུ་དམག་མི་བརྒྱ་བཀྲམ་སྟོང་བཀྲམ་གྱིས་གསར་འབྱོར་བ་ཙི་གུ་འདྲ་ཞིག་ཀྱང་ཐར་ས་མེད་པ་བྱས་སོང་། དེ་དུས་ནས་སྣེ་ལེན་ཁང་ཁག་གི་ལས་བྱེད་ཚོ་ “ལས་མེད་ལས་བྱེད་” ལྟ་བུར་གྱུར་ཡོད། བོད་ཁྱིམ་སློབ་གྲྭ་ཁག་ཏུའང་སློབ་ཕྲུག་གི་ཡོང་ཁུངས་ཆད་ཅིང་ཉལ་ཁང་དང་འཛིན་ཁང་སྟོང་པ་ཡང་ཇེ་མང་དུ་འགྲོ་གིན་ཡོད། སྔོན་ཆད་ལྟར་འཚང་ཁ་ཤིག་ཤིག་བྱ་དགོས་ཀྱི་མེད། གདན་ས་ཁག་ཏུའང་གྲྭ་རྒྱུན་གྱིས་སྟོང་སྲིད་པའི་འཇིགས་སྣང་བསླེབས་ཟིན་པ་དང་ཧི་མ་ལ་ཡའི་རི་རྒྱུད་ཀྱི་སློབ་མ་བསྡུ་འགོ་བརྩམས་ཟིན།
འདི་ལྟར་མུ་མཐུད་དེ་སོང་ན་གསར་འབྱོར་བ་དངོས་གནས་ཚར་རྒྱུ་རེད། རྒྱ་ནག་གིས་ཕྱི་སྡོད་བོད་མི་ཕྱིར་ནང་རྒྱལ་དུ་འགུག་པའི་བྱེད་ཐབས་གསར་བ་ལག་བསྟར་བྱས་པ་དང་གོ་སྐབས་དེ་བཟུང་ནས་ཕྱིར་བོད་ནང་དུ་སོང་ནས་གཏན་འདུག་བྱེད་མཁན་དང་། གཉེན་འཕྲད་དུ་སོང་དང་འགྲོ་གིན་པའི་གསར་འབྱོར་བའི་གྲངས་ཀ་དངོས་གནས་ཉུང་ཉུང་མ་རེད།
ད་ཨ་མདོའི་གྲོང་གསེབ་ནས་ང་སྡོད་སའི་གངས་སྐྱིད་གཡས་གཡོན་ཁུལ་དུ་སྐད་ཆ་གསར་བ་ཞིག་གོ་ཡོང་བ་ནི། རྒྱ་གར་ཡུལ་མི་ཁང་པ་གླ་མཁན་དག་གི་དཀའ་ངལ་རེད། སྔོན་ཆད་ང་བསྡད་མྱོང་བའི་ཁང་བདག་ཨ་མ་ཞིག་གིས་ཉེ་ཆར་ང་ལ་སྔོན་ཆད་ཁྱོད་རང་བསྡད་མྱོང་བའི་ཁང་པ་གཉིས་ཀ་སྟོང་པ་ཡིན། ནང་དུ་འདུག་མཁན་རེག་གི་འདུག་གམ་ཟེར་ནས་ཐེངས་འགར་དྲིས་པས། ངས་ཀྱང་ད་རེག་གི་མ་རེད། ངྷ་ས་ནས་གསར་འབྱོར་བ་ཉུང་དུ་འགྲོ་བཞིན་པ་དང་ལྷག་པར་དུ་གངས་སྐྱིད་ཁུལ་དུ་ལས་ཤག་གསར་རྒྱག་བྱས་དང་བྱེད་བཞིན་ཡོད་སྐོར་སོགས་བཤད་པ་ཡིན། ངའི་ཡུལ་གྲོགས་འགས་བཤད་ན་ཨ་མདོའི་གྲོང་གསེབ་ཏུའང་ཁང་པ་མང་བོ་སྟོང་པ་ཆགས་ཡོང་གི་འདུག་ལ། དེང་སྐབས་ཁང་གླའང་མར་ལྷུང་གིན་འདུག་ཟེར།
གསར་འབྱོར་བ་རྫོགས་ཀྱིན་པ་འདི་ཡག་རྟགས་ཤིག་ཡིན་མིན་མི་ཤེས། དཔེར་ན་བཙན་བྱོལ་བོད་མིའི་མ་འོངས་པའི་མི་ལོ་ལྔ་བཅུའི་ལས་འཆར་ནང་དུ་གསར་འབྱོར་བར་ཁང་པ་སྤྲོད་པ་དང་ས་ཞིང་སྤྲོད་པ། གཞིས་ཆགས་སུ་འཇུག་པ། ཤེས་ཡོན་པར་ལས་ཀ་སྤྲོད་པ་སོགས་ཀྱི་མཐུན་རྐྱེན་སྦྱོར་རྒྱུའི་ལས་འཆར་ཡོད་མེད་མི་ཤེས་ཏེ། (བཀའ་ཁྲི་ཟུར་བས་དེ་སྔོན་གསར་འབྱོར་བ་ཚོ་ཕྱིར་བོད་ནང་དུ་སོང་སྟེ་རང་ས་སྲུང་དགོས་ཚུལ་གྱི་བཀའ་སློབ་ཕེབས་མྱོང་།) རྒྱ་ནག་གིས་ཕྱི་སྡོད་བོད་མི་ཕྱིར་རྒྱལ་ནང་དུ་ལོག་པར་སྣེ་ལེན་བཟང་བོ་དང་རྒྱལ་ནང་དུ་གཏན་སྡོད་བྱེད་པར་དགའ་བསུ་བྱེད་ཀྱིན་ཡོད། འདི་གཉིས་ལས་གསར་འབྱོར་བ་ཚོ་བཙན་བྱོལ་ལ་རེ་བཞག་ཆེན་པོ་མེད་པ་ཁག་མེད་ལ། འདིས་ངྷ་ས་དང་པེ་ཅིན་གཉིས་ཀྱིས་འཕྲལ་ཕུགས་ཀྱི་སྲིད་ཇུས་འཛིན་སྟངས་ཤིག་ལྷང་ལ་འབུད་ཀྱིན་འདུག་ཨང་།
ངས་རྣ་ལམ་དུ་བྲག་ཆ་ལྟར་ཡང་ཡང་འཁོར་བའི་དོན་དག་ཅིག་སྟེ། བཀའ་ཁྲི་གསར་བ་བཀའ་ཁྲིའི་འོས་མིར་བཞེངས་སྐབས་ཁོང་གིས་གསར་འབྱོར་བ་རྣམས་ཀྱི་ཁྲོད་དུ་ཤེས་ཡོན་ཅན་མང་བོ་ཡོད་པ་ཤེས་ཀྱི་ཡོད་ལ། གོ་སྐབས་འཐོབ་ཀྱི་མེད་པའང་ཤེས་ཀྱི་ཡོད། གལ་སྲིད་མ་འོངས་པར་ཁོང་བཀའ་བློན་ཁྲི་པར་བཞེངས་ཐུབ་པ་བྱུང་ཚེ་གསར་འབྱོར་ཤེས་ཡོན་ཅན་དེ་འདྲར་ཉམས་ཞིབ་སོགས་ཀྱི་ས་མིག་སྤྲོད་རྒྱུ་ཡིན་གསུངས་ཡོད། ཡིན་ནའང་། ཉེ་ཆར་གསར་དུ་བཙུགས་པའི་ཉམས་ཞིབ་སྡེ་ཚན་དུ་སྲང་གི་གསར་འབྱོར་བ་ཤེས་ཡོན་ཅན་ཞིག་བསྒྲུགས་མེད་པ་ཡོངས་གྲགས་ཡིན་ལ། འདས་པའི་ཟླ་ངོ་འདི་ཚོར་གསར་འབྱོར་བ་ཤེས་ཡོན་ཅན་རྩད་གཅོད་དང་ལས་ཀ་སྤྲད་མེད་པའང་ཡོངས་གྲགས་ཡིན།
གང་ལྟར། ད་ལྟ་ངྷ་སའི་གསར་འབྱོར་བ་རྫོགས་ཀྱིན་འདུག སྔོན་ཆད་ང་མེག་གྷན་དུ་སོང་ཐེངས་རེ་རེ་བཞིན་རང་དང་འདྲ་བའི་གསར་འབྱོར་བ་སྡོམ་པོ་མང་ཐག་ཆོད་ལ་ཐུག་གི་ཡོད་ལ། སྲང་བར་ནས་ཐུག་ན་གཅིག་གིས་གཅིག་ལ་ཁྱོད་ལ་དུས་ཚོད་ཡོད་དམ། ཇ་ཞིག་འཐུང་གི་འགྲོ་ཟེར་བའི་སྲོལ་ཞིག་ཡོད། དེ་དུས་ཞོགས་པ་ནས་དགོང་མོ་བར་གྱི་དུས་ཚོད་གང་འདྲ་ཞིག་ལ་མེག་གྷན་དུ་འབྱོར་ཡང་ཇ་ཞིག་འཐུང་རོགས་མི་རེག་པའི་དཀའ་ངལ་མེད་མོད། དེང་སྐབས་ཇ་འཐུང་རོགས་ཞིག་ཀྱང་ཚོད་ཚོད་ལ་རེག་གི་མི་འདུག
“རྒྱ་ནག་གཞུང་ཚབ་ཁང་ལ་ཐོ་བརྒྱབས་ཏེ་བསྒུགས་ནས་བསྡད་ཡོད། ཡི་གེ་རེག་སོང་ན་ཡུལ་ལ་ (ཕ་ཡུལ་ཞེས་པའི་བསྡུས་མིང་ངམ་ཨམ་སྐད) འགྲོ་གི་ཡིན། ད་ངྷ་རམ་ས་ལར་བསུན་སོང་ཟིག” ཙོང་ཁ་ཟ་ཁང་གི་ཐོག་ཁ་ནས་གྲོགས་པོ་ཞིག་དང་མཉམ་དུ་ཇ་འཐུང་ནས་སྡོད་སྐབས་སྐད་ཆ་འདི་ལྟ་བུ་ཞིག་ཐོས། བལྟས་ཚོད་ལ་སྐྲ་ལོ་དམར་སེར་བཟོས་པའི་གསར་བུ་ཞིག་ངྷ་རམ་ས་ལར་བསུན་པ་ཡིན་ནམ་གསར་འབྱོར་གྱི་སྐྱ་ཟད་སྔོ་སྡུག་གི་ལས་དབང་སྐྱུར་མོར་ཞེན་པ་ལོག་པ་ཡིན་མིན་མ་ངེས་ཀྱང་། གང་ལྟར་མུ་མཐུད་དེ་ངྷ་རམ་ས་ལར་སྡོད་འདོད་མེད་པ་ཐག་གིས་ཆོད་འདུག
ང་ལ་སེམས་ཁྲལ་ཞིག་ཡོད་པ་ནི་ངྷ་སའི་གསར་འབྱོར་ཚོ་ཕྱིར་ཕ་ཡུལ་དུ་ལོག་སྐབས་བསུན་སྣང་ཙམ་མིན་པར་རེ་ཐག་ཆད་དེ་ལོག་གིན་མེད་དམ་སྙམ་པ་དེ་ཡིན་ལ། འབྱུང་འགྱུར་བའི་མི་ལོ་ལྔ་བཅུའི་ལས་འཆར་ནང་དུའང་གསར་འབྱོར་བའི་ལས་དབང་ནི་རྟོགས་སུ་མེད་པའི་གབ་ཚིག་ཅིག་དང་གཉིས་སུ་མེད་ཨང་།
གཙོ་བོ་གཞན་གྱིས་བྲིས་པའི་རྩོམ་ཡིག་ལ་སྒེར་གྱི་བསམ་ཚུལ་ལེགས་པོ་ཡོད་མེད་ལ་མ་ལྟོས་པར་མཆན་འགྲེལ་བརྒྱབ་པ་དེ་ནི་བཟང་ཕྱོགས་ཀྱི་རྣམ་པ་ཞིག་མཐོང་གི་ཡོད། གང་ཡིན་ཟེར་ན། རང་གི་འབྲི་རྩལ་ཡར་རྒྱས་འགྲོ་ཡ་དང་།
དག་ཆའི་དཀའ་ངལ་སེལ་བའི་ཐབས་ལམ་རྨད་དུ་བྱུང་བ། བོད་ཡིག་གི་ཁྲོམ་ར་རྒྱ་ཆེ་རུ་འགྲོ་བ་སོགས་ཀྱི་ཐད་ནས་ཕན་པ་རྒྱ་ཆེན་པོ་ཞིག་འདུག་སྙམ།
ཡིན་ན་ཡང་། ཁ་ཤས་ཀྱི་དྲ་ཚིགས་འདི་བེད་སྤྱོད་ལོགས་པར་བཏང་སྟེ་གསར་རྙིང་གི་དབྱེ་འབྱེད་དང་། མཁས་དབང་ལ་དམན་ཚིག་གིས་གསོད་ཐབས་བྱ་བའི་ལས་ངན་བསགས་པའི་བྱེད་ཐབས་བེད་སྤྱོད་བཏང་ཡ་འདི་ནི་ཧ་ཅང་གི་ཐབས་སྐྱོ་བོ་རེད་བསམ་གྱི་འདུག
དེ་བས་ཕན་སེམས་ཀྱི་ཀུན་ནས་སླང་སྟེ་རྡོག་རྩ་ཆིག་སྒྲིལ་དང་། གསར་རྙིང་དཔུང་པ་མཉམ་འདེགས་བྱེད་ཐུབ་པའི་ཕྱོགས་ལ་གོམ་གང་མདུན་སྤོས་བྱེད་པའི་མན་ངག་འདྲ་ཡོད་ན་སྨྱུག་རྩེ་ནས་འདི་རུ་བྱོ་ན་ཡག་པོ་འདུག་སྙམ་པའི་སེམས་ཚོར་གསོན་པོ་ཞིག་རང་དབང་མེད་པར་ལྕེ་རྩེ་རུ་འཁོར་ཡོང་གི་འདུག
གཙོ་བོ་ནང་གི་གཙོ་བོ་ནི། གསར་བ་དང་རྙིང་པའི་ཐད་ཀྱི་གླེང་སློང་བྱེད་པའི་ཁོར་ཡུག་འདི་མ་རེད་བསམ་གྱིན་ཡོད་ལ། དེ་ནི་རྩོད་དགོས་པའི་གནད་དོན་ཞིག་མཐོང་གི་མི་འདུག ང་ཚོསངེས་པར་དུ་དོ་སྣང་སྤྲོད་དགོས་པའི་ས་མིག་དེ་ནི། སྔོན་ཡོང་རྗེས་དྲན་གྱི་བསམ་བློ་བེད་སྤྱོད་ལེགས་པར་བཏང་སྟེ་མ་འོངས་བོད་མིའི་མདུན་ལམ་གྱི་ཁ་ཕྱོགས་གང་ལ་གཏད་དགོས་མིན་གྱི་ཐད་ལ་བསམ་ཚུལ་འདྲ་མིན་སྣ་ཚོགས་སྤེལ་ཐུབ་པ་ཡིན་ན་ཅི་འདྲའི་མི་བཟང་ངམ།
ད་ནིང་ནས་ང་ཚོ་ཤི་རྒྱུ་མགོ་ཙུགས་ཚར་སོང་། བོད་གཞུང་གི་བཀའ་བློན་ནང་བོད་ཡིག་ཁུང་འཁྱོར་བའི་མི་སྣ་ཡང་མེད་པ་ལ་བསྟན་ནས་ང་ཚོ་ཤི་རྒྱུར་མགོ་ཙུགས་ཚར་བ་རེད་ད།
བཙན་བྱོལ་སྤྱི་ཚོགས་ནང་དུ་གསར་རྙིང་དབར་གྱི་འགལ་ཟླ་བཟོ་མཁན་བརྒྱུད་ལམ་ཁྱབ་ཆེ་ཤོས་ནི། དུས་བབ་དང་ཁ་བརྡ་དྲ་ཚིགས་གཉིས་རེད་འདུག །དཔྱད་རྩོམ་དང་མཆན་གང་སྤེལ་བ་ཡིན་ན་ཡང་། ཡང་ན་གཞིས་ཆགས་པས་མི་འགྲིག་པ། ཡང་ན་བཙན་བྱོལ་བོད་གཞུང་གི་གཞུང་ཞབས་ཀྱིས་མི་འགྲིག་པ་སོགས་ཤ་སྟག་རེད་འདུག །བྱས་ཙང་འགལ་ཟླ་རིགས་མ་བཟོ་ན་ཡག་གི་རེད།
གསར་འབྱོར་སྐོར་བཤད་དུས་་་གསར་འབྱོར་ཚོའི་སེམས་པ་ན་ཚ་ལྕི་མོ་ཞིག་གིས་བཟུང་བཞིན་འདུག་མ་ཐུབ་པའི་སྣང་ཚུལ་ཁྱད་པར་བ་ཞིག་བསྟན་གྱི་འདུག་་་་
ཨ་རིག་ལགས། ཇི་སྲིད་བོད་མིའི་བླ་ན་མེད་པའི་སྐྱབས་མགོན་ཏྰ་ལའི་བླ་མ་མཆོག་སྐུ་འཚོ་བཞིན་བཞེངས་པའི་རིང་དེ་སྲིད་དུ་གསར་འབྱོར་བ་ཚོ་ཆུ་ཆད་པ་ལྟར་རྫོགས་འགྲོ་བ་དེ་འདྲའི་གནས་སྟངས་ཞིག་ཡོང་གི་མ་རེད།
ཡིན་ནའང་སྐྱབས་མགོན་རིན་པོ་སྐུ་མ་བཞུགས་པའི་དུས་དེ་ནས་བཟུང་རྡ་སར་གསར་འབྱོར་ཙམ་མ་ཟད་བོད་མི་རིམ་བཞིན་རྩ་རྫོགས་སུ་འགྲོ་རྒྱུ་ཡིན་པ་དེ་སྨོས་མེད་རེད།
གསར་འབྱོར་ཉུང་དུ་འགྲོ་བཞིན་པ་དང་། གཞིས་ཆགས་ཕྱི་རྒྱལ་དུ་འགྲོ་བའི་ན་ཚ་འདི་རིགས་བཀའ་ཁྲིས་བཅོས་ཐབས་གཏན་ནས་མེད་པའི་སྤྱི་ཚོགས་ཀྱི་ནད་རྙིང་ཞིག་ཆགས་ཡོད། གསར་འབྱོར་ཉུང་དུ་འགྲོ་བའི་གནས་སྟངས་དེ་གཙོ་བོ་བོད་ནང་གིས་བོད་མི་ཚོས་རྒྱ་ནག་གཞུང་ལ་ངོ་རྒོལ་བྱས་པར་བརྟེན་ད་ལྟའི་ཆར་ས་མཚམས་ཡོངས་རྫོགས་དམ་བསྒྲགས་ཆེན་པོས་དམག་མིས་བལྟ་སྲུང་བྱས་པའི་རྒྱུ་རྐྱེན་གཙོ་ཆེ་བ་དེ་རེད།
གཞིས་ཆགས་ཕྱི་རྒྱལ་དུ་འགྲོ་བ་དེ་བཙན་བྱོལ་གཞུང་གི་འགོ་ཁྲིད་རྙིང་གྲས་ཚོ་དང་། བོད་གཞུང་གི་སྲིད་བོད་མི་ཕྱི་རྒྱལ་དུ་གཏོང་བའི་སྲིད་ཇུས་བཟུང་བ་ནས་བཟུང་ན་ཚ་འདི་སྤྱི་ཚོགས་ཧྲིལ་པོར་ཁྱབ་པ་རེད།
དེ་གཉིས་ལ་བཅོས་ཐབས་ཞིག་རྩ་བ་ནས་མེད་པར་ད་དུང་སྡུག་ཏུ་སྡུག་ཏུ་འགྲོ་རྒྱུར་ཐེ་ཚོམ་ཁྱོན་ནས་མེད། གཅིག་བྱས་ན་འདི་བོད་ཤི་བའི་སྔ་ལྱས་ངན་པ་ཞིག་ཡིན་སྲིད།
སེམས་ཁྲལ་མེད་པའི་སེམས་ཁྲལ་ལྷག་མ་ཞིག་གིས་བཟི་རུ་མ་འཇུག་རོགས་ཞུ་རྒྱུ་ཡིན།
རྡ་སར་གསར་འབྱོར་བ་རྫོགས་གྲབ་འདུག་ཅེས་པའི་ཚིག་འདི་ནི་དེ་ཙམ་གྱིས་ཡག་པོ་ཞིག་མཐོང་མ་སོང་།
བོད་མའི་རྩ་འཛུགས་མ་འཐོར་ན། གསར་འབྱོར་རྫོགས་ན་སྐྱོན་གང་ཡོད། ཡིན་ན་ཡང་། རྡ་སར་གསར་འབྱོར་རྫོགས་གྲབ་འདུག་ཅེས་པའི་གཏམ་དེ་ནི་མིག་རྒྱང་མེད་པའི་ལབ་གླེང་ཞིག་རེད་བསམ་གྱིན་ཡོད།
སྤྱིར་བཏང་གི་བསམ་བློ་ཞིག་ཐོངས་དང་། རྡ་ས་ན་གསར་འབྱོར་རྒན་གཞོན་བར་གསུམ་གྲངས་ལས་འདས་པ་ཞིག་གིས་ཁེངས་ནས་བསྡད་ཡོད།
གསར་འབྱོར་བ་ལས་སླ་བོ་རྫོགས་འགྲོ་བ་ཞིག་ག་ལ་ཡིན། ད་དུང་ཁྱེད་ཅག་གིས་མིག་གཡང་དང་། སྐོར་གཡང་ཞིབམོ་རེ་བྱས་ན་མི་ལེགས་སམ།
ཚོད་ཚོད་ལ་སྐད་ཆ་རེ་བཤད་སྡད་པ་ཡིན་ན། མགོ་ཁུངས་མེད་པའི་ཆུ་བོ་ལྟ་བུ་ཆགས་ཡོང་། ད་དུང་དེ་དང་འབྲེལ་ནས་ཁ་ཤས་ཀྱིས་གླིང་གཞི་གསར་བ་ཞིག་གིས་འགོ་བཙུགས་ཡོང་གི་འདུག
ཧ་ཅང་གི་ཐབས་སྐྱོ་བོ་རེད་བསམ་གྱིན་ཡོད། གསར་འབྱོར་ཉུང་འགྲོ་བའི་སེམས་ཁྲལ་ཁ་ལ་འཁྱེར་ནས་གཞིས་ཆགས་དང་གསར་འབྱོར་ཞེས་པའི་རྙོགས་གཏམ་མང་ཙམ་བཤད་པ་ཡིན་ན༎ སློབ་སྦྱོང་ཅན་ཞིག་གི་བཤད་རྒྱུའི་སྐད་ཆ་ཞིག་རེད་དམ།
མཆན་འགྲེལ་རྒྱག་དགོས་ན་འང་། སྔོན་མཇུག་པརགསུམ་བསམ་བློ་རེ་བཏང་སྟེ་ཁ་དང་ལག་པ་གཉིས་འགུལ་སྤྱོད་བྱས་པ་ཡིན་མི་ལེགས་སམ། ཁ་ནས་གང་འཐོན་བཤད་ན་ཤེས་ཡོན་པོ་ཞིག་གི་འགྲོ་སྟངས་མ་ཆགས་པ་དང་།
རང་གཅེས་འཛིན་གྱི་བློ་ཤུགས་ཆེ་བའི་རྟགས་ཤིག་ཀྱང་རེད་བསམ་གྱིན་འདུག འགྲིགས་མིན་མ་ཤེས།
ཨ་རིག་ལགས་ཁྱེད་ཀྱིས་གསུང་པ་དེ་བདེན་པ་རེད།
༼ངས་རྣ་ལམ་དུ་བྲག་ཆ་ལྟར་ཡང་ཡང་འཁོར་བའི་དོན་དག་ཅིག་སྟེ། བཀའ་ཁྲི་གསར་བ་བཀའ་ཁྲིའི་འོས་མིར་བཞེངས་སྐབས་ཁོང་གིས་གསར་འབྱོར་བ་རྣམས་ཀྱི་ཁྲོད་དུ་ཤེས་ཡོན་ཅན་མང་བོ་ཡོད་པ་ཤེས་ཀྱི་ཡོད་ལ། གོ་སྐབས་འཐོབ་ཀྱི་མེད་པའང་ཤེས་ཀྱི་ཡོད། གལ་སྲིད་མ་འོངས་པར་ཁོང་བཀའ་བློན་ཁྲི་པར་བཞེངས་ཐུབ་པ་བྱུང་ཚེ་གསར་འབྱོར་ཤེས་ཡོན་ཅན་དེ་འདྲར་ཉམས་ཞིབ་སོགས་ཀྱི་ས་མིག་སྤྲོད་རྒྱུ་ཡིན་གསུངས་ཡོད། ཡིན་ནའང་། ཉེ་ཆར་གསར་དུ་བཙུགས་པའི་ཉམས་ཞིབ་སྡེ་ཚན་དུ་སྲང་གི་གསར་འབྱོར་བ་ཤེས་ཡོན་ཅན་ཞིག་བསྒྲུགས་མེད་པ་ཡོངས་གྲགས་ཡིན་ལ། འདས་པའི་ཟླ་ངོ་འདི་ཚོར་གསར་འབྱོར་བ་ཤེས་ཡོན་ཅན་རྩད་གཅོད་དང་ལས་ཀ་སྤྲད་མེད་པའང་ཡོངས་གྲགས་ཡིན།༽
རྡ་སའི་སྲང་ལམ་གི་གསར་འབྱོར་དེ་ཚོ་ནི།གསར་འབྱོར་གྱི་གད་རྙིག་རེད།དེ་རྫོགས་སོང་ན་བློ་ཕམ་བྱེད་དགོས་དོན་མི་འདུག།མི་འདི་ཚོས་ཅི་བཤད་ཀྱི་ཡོད་རེད།རང་ངན་ནི་རོགས་གི་ལན།རྒྱུ་མེད་ནོ་དཔོན་གི་ལན།ཧིན་་
བཙན་བྱོལ་བོད་གཞུང་དང་དེའི་ལས་སྣེ།གཞན་གཞིས་ཆགས་རྣམས་ཀྱིས་གསར་འབྱོར་གྱི་བཀའ་དྲིན་དེ་ཡིད་ལ་དྲན་དགོས། མི་དཀྱུས་མ་ཞིག་ཡིན་ན་ཡང་བོད་ནས་ཡོང་དུས་དེ་ཆབ་སྲིད་ཀྱི་སྒང་ནས་རིན་ཐང་ཆེན་པོ་ཡིན། སྤྱིར་གཞིས་བྱེས་གཉིས་ཀྱི་འབྲེལ་བ་ནི་ཆུ་དང་འོ་མ་འདྲེས་པ་ཡིན་ཡང་།འདིར་ཕྱོགས་ནས་རྦད་དེ་སྣང་མེད་ལྟ་བུས་གསརའབྱོར་ཚོའི་མདུན་ལམ་དང་ནུས་པར་བརྩི་བཀུར་མ་བྱས་ཚེ།རྗེས་མར་གཞིས་ལུས་མི་མང་གི་ངོ་གདོང་ལ་བལྟ་མི་ཐུབ་པའི་ཚད་ལ་ལྷུང་མི་སྲིད་པ་མིན་ལ།གཞིས་ལུས་མི་མང་གི་འདིར་ཕྱོགས་ལ་རེ་བ་མ་བྱེད་ཚེ་རྩོད་བསྡད་བོད་དོན་ལ་རྩ་ནས་རེ་བ་མེད་པ་མངོན་གསལ་དོད་པོ་རེད།
རེ་བ་ཅན་གྱི་ཨ་རིག་ཞི་ལིས། ད་ཐེངས་བརྗོད་གཞི་དགོས་ངེས་ཅན་ཞིག་གཞིར་བཟུང་ནས། རང་ཉིད་ཀྱི་ཚོར་སྣང་ཐན་ཐུན་ཙམ་མ་ཡིན་པར། སྤྱིར་བཏང་གི་གནད་སྒོ་ཞིག་གླེང་བར་དགའ་བསུ་དང་རྒྱབ་སྐྱོར་ཞུ།
བོད་ནས་གསར་དུ་ཡོང་མཁན་ཚོའི་མདུན་ལྗོངས་དེ་སྐྱ་ཐང་ཐང་ཡིན་པ་དེ། ས་རིས་ཐང་གསལ་རེད་ལ། ད་རུང་། ཤེས་ཚད་དང་འཚམ་པའི་ལས་གནས་རེའང་སྤྲད་སྲོལ་མེད་པ་ཡོངས་གྲགས་ཀྱི་གནས་ཚུལ་ཞིག་རེད།
གོ་སྐབས་འདི། རྒྱ་གཞུང་གིས་འཇུས་ནས། མེས་རྒྱལ་ནང་ཁུལ་དུ་ཕེབས་པར་དགའ་བསུ་དང་འབྲེལ་ནས། རྒྱ་གཞུང་གི་ཁྱབ་ཁོངས་སུ་གཏོགས་པའི་མི་སེར་ལག་འཁྱེར་སྤྲད་དེ་ཡར་ཡོང་ལས་མར་འགྲོ་སླ་བའི་སྲིད་བྱུས་འདི་མངོན་གསལ་དོད་པོར་བཟུང་བ་རེད།
འོན་ཀྱང་། སྐྱབས་བཅོལ་བོད་གཞུང་གིས་སྲིད་བྱུས་དེར་ཁ་གཏད་གཅོག་རྒྱུའི་ཚབ་ཏུ་མཐུན་རྐྱེན་མང་པོ་ཞིག་བསྐྲུན་པའི་རྣམ་འགྱུར་བསྟན་པ་རེད། དེའང་། བོད་ནང་དུ་བསྐྱོད་པར་སྐུལ་འདེད་གནང་བ་ལ། མཐུན་རྐྱེན་ཡང་གང་ལེགས་སྤྱར་གྱིན་པ་གསལ་བོ་མ་རེད་དམ།
ད་ནི། སུ་ཞིག་གིས་འཐབ་རྩོད་བྱེད་ཀྱི་རེད་དམ་ཞེས་པའི་དྲི་བ་རང་ཤུགས་ཀྱིས་འཁོར་ཡོང་གི་འདུག གང་ཡིན་ཟེར་ན། བོད་ཀྱི་རིག་གནས་སེམས་སྟོབས་དང་ངོས་འཛིན། ལག་ལེན་སོགས་ལ་རྒྱུས་མངའ་ཆེ་བ་བོད་ནས་ཕེབས་མཁན་ཚོར་ཆེ་བ་མ་ཡིན་ནམ།
རེད་དེང་སང་དྷ་སར་བོད་པ་ཡོང་མཁན་མེད་པ་དང་། དགོན་པར་གྲྭ་པ་ཡོང་མཁན་མེད་པ། སློབ་གྲྭར་ཕྲུ་གུ་ཡོང་མཁན་མེད་པ། བོད་མི་རྣམས་ཀྱིས་བོད་ཡིག་མ་སྦྱང་པ། ཕྱི་རྒྱལ་གྱི་ཡུལ་སྲོལ་ལ་དགའ་ཞེན་བྱེད་པ། དགོན་པ་ཁག་ཏུ་ཧི་མ་ལ་ཡ་གྲྭ་ཆུང་རྣམས་བསུ་སྟེ་དགོས་པའི་སློབ་སྦྱོང་ཅུང་ཟད་ཙམ་ཡང་མ་སྤྲད་པར་། ཞལ་འདེབས་སློང་སའི་ལག་ཆ་བྱེད་བཞིན་ཡོད། ལྟོས་དང་དགོན་པ་ཆུང་ཚགས་རིགས་ཡིན་
རྩོམ་ཡིག་འདི་ཁ་སང་ངའི་ཟིན་བྲིས་ནས་འདིར་བཀོད་འདུག་པ་མཐོང་སྟེ། ང་རང་ཉིད་ཀྱིས་ཀྱང་མགོ་ནས་མཇུག་བར་ཐེངས་ཤིག་བསྐྱར་ཀློག་བྱས་པ་ཡིན། རྒྱུ་མཚན་རང་གི་ཟིན་བྲིས་ཤིག་མདུན་ངོས་ཀྱི་རྩོམ་དུ་གྱུར་དུས་དེ་ལ་འགན་ཆེ་ཆུང་གི་ཁྱད་པར་ཡོད་པས་ཡིན། དཔེར་ན། ཀླུ་མཁར་བྱམས་ཀྱིས་གླེང་འདུག་པ་ལྟར་རེད།
ཡིན་ནའང་། དེ་ནས་ད་བར་དུ་ལྟ་ཐུབ་མ་སོང་། ད་ལྟ་ལྟ་དུས་མཆན་མང་བོ་སྤེལ་འདུག གང་ལྟར་ང་ཙམ་མིན་པར་འདི་ལ་དོ་སྣང་བྱེད་མཁན་མང་དུ་འདུག་སྙམ་ཏེ། མ་འོངས་པར་སུས་འདིའི་སྐོར་ལ་དཔྱད་བརྗོད་སྤེལ་གྱིན་ཡོད་ཀྱང་། གནས་ལུགས་དང་རྒྱུ་མཚན་ལྡན་པའི་དཔྱད་བརྗོད་སྤེལ་རྒྱུར་རེ་བ་ཡིན། དེ་མིན་སྟོང་བཤད་དང་རྒྱགས་གཏམ། ཡང་ན་གཞི་མེད་སྐྱོན་བརྗོད་རིགས་ཀྱིས་སུལའང་མི་ཕན། ལྷག་པར་དུ་ངས་གནས་བབ་ཅིག་གླེང་བ་ལས་གཞུང་ཕྱོགས་ལ་མཐའ་གཅིག་ཏུ་སྐྱོན་རྒྱག་གི་མེད། རྒྱུ་མཚན་ཡོད་དེ་གནས་བབ་གང་ཞིག་ཡིན་རུང་རྒྱུ་རྐྱེན་སྣ་མང་ཡོད་པས་ཡིན།
སྐབས་སུ་དེ་ཙམ་བྱེད། གཞུག་ནས་འདིའི་སྐོར་ལ་དུས་ཚོད་ཀྱིས་ལྕོགས་ཚད་ལྟར་ཞིབ་འབྲི་རེ་བྱ་ཐུབ་ཚེ། ཚོད་ལྟ་བྱེད།
གུས་བཅས། ཨ་རིག་གིས།
ཧ་ཧ་རྩོམ་ཡིག་དེ་མ་ཀློག་གོང་ནས་མཆན་བུ་མང་ཉུང་ལ་ལྟས་པས་བཙན་བྱོལ་གྱི་བཀའ་སྙོག་ཞིག་ཡིན་པ་ལམ་སེང་ཤེས་སོང་། བཙན་བྱོལ་ནང་གི་སྨྱུག་ཐོགས་པ་རྣམས་ནི་བཙན་བྱོལ་བོད་གཞུང་ལ་དུང་ཞེན་ཆེ་བ་ཞིག་ཡིན་ནམ། བསྟན་དགྲ་རྒྱ་མི་དམར་པོར་དུང་ཞེན་ཆེ་བ་ཞིག་ཡིན་ང་ནི་ཐེ་ཚོམ་སྐྱེས་ཀྱིས་འདུག གང་ལྟར་ཡང་བཙན་བྱོལ་གཞུང་ལ་ཞ་དང་ཞོར་ལ་སྐྱོན་བརྗོད་ཡོད་པའི་རྩོམ་ཡིག་ཞིག་ཡིན་ཚེ་དེའི་མཆན་ཞབས་སུ་སྐྱག་པར་འབུང་བ་འཁོར་བ་ལྟར་མཆན་བུ་ཚང་ཁ་ཤིག་ཤིག་དང་། རྒྱ་དམར་ལ་སྐྱོན་བརྗོད་པའི་རྩོམ་ཡིག་ཞིག་ཡིན་ཚེ་དེའི་མཆན་ཞབས་སྟོང་པ་ཡིན་པ་མཐོང་དུས་ཡང་རྙིང་ང་ཚོའི་ཐབས་བརྩོད་བྱ་ཡུལ་གང་ཞིག་ཡིན་པ་སོམ་ཉིའི་ཡུལ་དུ་གྱུར། རེད་དེ་ད་ཡིན་ན་བསམ་བློ་གཏོང་བཏང་ཤེས་ཡས་མིན་འདུག
སྐུ་ཞབས་ཀླུ་ལགས་ཀྱི་འཕུད་འཐེན་ཟེར་བའི་གོ་དོན་བཞིན་རྡ་ས་ལ་ཆབ་སྲིད་འདིས་མི་རིགས་ཤིག་གསོན་ལམ་ནས་འཆི་ལམ་དུ་བསྐྱལ་ཡོད་པ་མངོན་གསལ་རེད། ང་ཡང་གནས་ཚུལ་འདིས་ན་ཟུག་ལ་བཟོད་བསྒོམས་བྱ་ནས་ཡོད།
རེད་ཡ། འགྱུར་མེད་ཀྱི་གླེང་སྟངས་ཡག་པོ་འདུག འོན་དེ་རྩོམ་འདི་འདྲ་ཞིག་འབྲི་ཕྱིན། བསམ་ཚུལ་ལས་ཀྱང་གྲངས་རྩིས་ཀྱི་ཐོག་ནས་ཡོང་ཐུབ་རྒྱུ་ན་བཟང་གི དཔེར་ན། ལོ་འདི་དག་གི་རིང་ལ་སྣེ་ལེན་ཁང་དུ་གསར་འབྱོར་སླེབས་པའི་གྲངས་འབོར་དང་། རྒྱ་གར་དང་བལ་ཡུལ་གྱི་རྒྱ་མིའི་གཞུང་ཚབ་ཁང་ནང་ཐོ་འགོད་བྱས་ནས་ཕར་ལོག་མཁན་དང་། ལོག་ནས་ཚུར་ཡོང་མཁན་གྱི་རོབ་རྩིས་ཤིག ཡང་འདི་ནས་བསྡོད་མ་ཐུབ་པར་ཕར་ལོག་མཁན་ཚོར་བོད་ནང་གི་མང་ཚོགས་ནས་སྤྱི་ཡོངས་ཀྱི་ལྟ་སྟངས་ལ་སོགས་པ།
སྤྱིར་ཡུལ་མི་གནས་སྤོར་དང་འབྲེལ་བའི་གཞུང་ལུགས་རང་བཞིན་གྱི་བཞེད་པ་སྣ་ཚོགས་ཡོད་ལ། དེའི་ནང་རྒྱུག་ཆེ་བའི་རིག་ལམ་ཞིག་ནི(འཕུད་འཐེན་སྨྲ་བ)ཡིན་པ་དང་། དེའི་གོ་དོན་ནི་སྐྱེ་བོ་གང་ཞིག་གནས་ཡུལ་ནས་འདུག་མ་ཐུབ་པར་ཕར་འཕུད་བརྒྱག་གཏོང་མཁན་གྱི་རྒྱུ་ཚོགས་གང་དང་གང་ཡིན་པ། དེ་བཞིན་གནས་སྤོར་ཡུལ་དེར་བློ་ཁ་དྲངས་བའམ་བློ་ཁ་འཐེན་བྱེད་ཀྱི་རྒྱུ་ཚཽགས་གང་དང་གང་ཡོད་པ། ཡང་འཕུད་བྱེད་དང་འཐེན་བྱེད་གཉིས་ཀྱི་ཤུགས་གང་ཆེ་བ་སོགས་རེད།
གནས་ཚུལ་འདི་དག་གི་ཐད་འགྱུར་མེད་སོགས་ན་གཞོན་ཧུར་བརྩོན་ཅན་ཚོས་ཤུགས་བརྒྱག་རོགས་་་་་་
ཨ་རིག་གི་ཡིག་རྩལ་ལ་མངོན་པར་བསྟོད་དོ།།
ནང་དོན་ཐད་མཐའ་གཅིག་ཏུ་ཕྱོགས་གཅིག་ཏུ་ལྷུངས་ཤིང་སྤྱི་སྦོམ་ཙམ་ཞིག་ལས། ཞིབ་ཕྲའི་གསར་འབྱོར་བར་མ་སྟེར་བའི་གནད་དོན་ཐེར་འདོན་མེད་པ་འདིས།
ད་ལྟའི་ནང་ཁུལ་ལྷིང་འཇགས་རྒྱལ་ཞེན་གྱི་མདུད་པའི་དམ་ཚིག་འཕྱུག་རྩར་གྱུར་བར་སེམས་འཚབ་བྱས་སོ།།
ཡི་གེ་བ་ལགས་ཡིད་གཟབ་གནང་དགོས་པར་ཚོར།
དེ་དེ་བཞིན་ནོ། དེའི་གནད་འགག་ནི་བཙན་བྱོལ་ཚང་ཀི་མ་འཇོན་པ་མ་ཡིན་ནོ། གང་ཟག་གཅིག་གི་མ་འཇོན་པའི་གནད་འགག་ཅིག མིང་གི་ཐོག་མར་ཽ་ན་རོ་ཡོད་ས་དང་རྗེས་སུ་་་་།ཚག་ཤད་ཡོད་ས་ཞིག་ལ་ངོས་འཛིན་བྱེད་ཀྱིན་ཡོད།
རང་ཉིད་འདུག་ས་དང་རྒྱུས་ཡོད་སའི་རིགས་ལ་སྙུག་རྩེ་གཏད་པ་ལེགས། ལྷག་པར་ད་ཐེངས་བརྗོད་གཞི་གཅིག་གཏན་འཁེལ་བྱས་ཏེ་་མགོ་ནས་མཇུག་བར་དུ་མ་འཐོར་བར་གླེང་བ་དེ་རྩོམ་ཡིག་འདིའི་བཅུད་ལྟ་བུ་རེད།
གསར་འབྱོར་བ་བཙན་བྱོལ་སྤྱི་ཚོགས་ནང་དུ་ཉུང་དུ་ཕྱིན་པ་ནི་བདེན་པ་རེད། འོན་ཀྱང་དེའི་རྒྱུ་མཚན་ལ་ཞིབ་འཇུག་བྱ་དགོས་པ་ཡིན། ངས་བལྟས་ན་ཕྱི་ལོ་དགུ་བཅུའི་རྗེས་སུབོད་ནང་དུ་པར་འགྲོ་ཚུར་འོང་གི་་སྒོ་དབྱེ་བྱས་པ་ནས་བཟུང་བོད་ནས་ལམ་ཡིག་ཡོད་པ་དང་མེད་པ་ཅི་རིགས་ནས་གསར་འབྱོར་མང་དག་གཅིག་འབྱོར་ཡོད། དེ་དག་ལས་བོད་ལ་ཕྱིར་ལོག་མཁན་ནི་བརྒྱ་ཆ་ཉི་ཤུ་ཙམ་རེད། དེ་མིན་མང་ཆེ་བ་ནི་རྒྱ་གར་ནང་དང་ཕྱི་རྒྱལ་དུ་སླེབས་ཚར་བ་རེད། ད་དུང་འདས་པའི་ལོ་ཤས་ནང་དུ་ཞིབ་འཇུག་ཞིག་བྱས་པ་ཡིན་ན་ཡུ་རོབ་ཕྱོགས་སུ་བསྐྱོད་མཁན་བརྒྱ་ཆ་དགུ་བཅུ་ནི་གསར་འབྱོར་བ་རེད། ཁོང་ཚོ་ནི་བཙན་བྱོལ་བོད་གཞུང་གིས་བལྟ་རྟོགས་མ་བྱེད་པའི་རྐྱེན་གྱིས་ཐོན་པ་དང་། སློབ་གྲྭ་དང་གདན་ས་ཁག་གིས་བལྟ་རྟོགས་ཀྱིས་མ་འདང་བའི་རྐྱེན་གྱིས་དེ་བས་ཀྱང་མིན། འོ་ན། གང་ལགས་ཞེ་ན། དེང་སང་བོད་ནང་དུ་ཆ་སྙོམས་དཔལ་འབྱོར་ཆེན་པོ་ཡིན་པ་དང་། དེར་མ་ཟད། སློབ་སྦྱོང་དང་ནང་ཆོས་ཀྱི་ཤེས་ཡོན་ཡོད་པ་ལས་དཔལ་འབྱོར་ཆེ་བ་བྱུང་ན་བློ་བདེ་བ་དང་སྤྱི་ཚོགས་ཁྲོད་དུ་ཆེ་མཐོང་ཆེ་བ་འཇོག་གི་ཡོད་པས་རེད་འདུག་སྙམ།
ཨ་རིག་ལགས་ཀྱིས་”ང་ལ་སེམས་ཁྲལ་ཞིག་ཡོད་པ་ནི་ངྷ་སའི་གསར་འབྱོར་ཚོ་ཕྱིར་ཕ་ཡུལ་དུ་ལོག་སྐབས་བསུན་སྣང་ཙམ་མིན་པར་རེ་ཐག་ཆད་དེ་ལོག་གིན་མེད་དམ་སྙམ་པ་དེ་ཡིན་ལ།” ཞེས་པའི་ཚིག་དུམ་འདིར་དོན་ཆེན་པོ་ཡོད་པས་ཚང་མས་འདང་རྒྱག་དགོས་སོ།
༄༅། ། རྡ་སར་གསར་འབྱོར་ཉུང་འགྲོ་རྒྱུ་འདི་མི་ཡག་རྒྱུ་མི་འདུག སྔར་བོད་ནང་ན་འབྲེལ་བ་དེ་ཙམ་མེད་སྐོར་གསར་འབྱོར་ཚོས་ང་རྡ་ས་ན་ཡོད་ཅེས་མར་བོད་ཡུལ་དུ་ནང་མི་རྣམས་ལ་སྨྲས་ཚེ། ནང་མི་ཚོ་ཧ་ཅང་དགའ་ནས་ཡག་པོ་རེད། སྐྱབས་མགོན་རིན་པོ་ཆེ་བཞུག་ཡོད་ས་དེ་རེད་པ་ཅེས་གླིང་ཀྱིན་ཡོད། དེ་སང་བོད་ནང་ནས་རྡ་སའི་ལོ་རྒྱུས་གསལ་ཐག་ཆོད་པ་གོ་རྗེས། རང་གི་ནང་མི་ག་འདྲ་ཞིག་ཡིན་ནའང་རྡ་སར་བསྡད་ཡོད་ཅེས་ཐོས་ཚེ་སེམས་པ་ཧ་ཅང་སྐྱོ་བཞིན་པ་རེད། བོད་ནང་ལ་རྡ་ས་ཟེར་བ་དེ་བུ་བསྡད་ན་མདོ་མེད་སྐྱག་འཁྱམས་བྱེད་ས། བུ་མོ་བསྡད་ལུགས་མེད་སྨད་བཙོང་བྱེད་ས། གྲྭ་བ་བསྡད་ན་བདུན་ཕྲག་གཅིག་ནས་སྲུང་སྡོམ་བོར་ས་ཞེས་གྲགས་ཡོད་འདུག
གསར་འབྱོར་རྫོགས་སོང་ན་བཙན་བྱོལ་བོད་མིས་བསྒྲིགས་མཛུགས་གི་དབང་འཛིན་པ་དང་ཉེ་འཁོར་གྱི་སྐུ་དྲག་རིང་ལུགས་པ་དག་དགའ་ནས་གད་མོ་ཤོར་གི་རེད། ཉོན་དང་ཉེ་སྔོན་༧་གོང་ས་མཆོག་སྐུའི་གཅུང་པོ་མངའ་རིས་རིན་པོ་ཆེ་ཟེར་བ་དེའི་བྱང་ཨ་རི་ཁ་ལི་ཧྥོར་ནི་ཡ་ལ་གསུང་བཤད་ཞིག་ནང་བདུན་བཅུ་དོན་དགུ་ནང་ལོགས་འོང་མཁན་ཚོ་ལ་དོགས་ཟོན་བྱེད་དགོས་གང་ཡིན་ཟེར་ན་བོད་ཡིག་ཤེས་གི་འདུག དེའི་ནང་ཕྲ་མ་མང་པོ་བཤད་གི་འདུག་གསུང་སོང་། ཡིན་ཡང་ཁོང་ཚོས་འཛམ་གླིང་སྒང་ལ་ཞལ་འདེབས་བསླང་བའི་ལགས་ངར་ཡང་ཐུང་རུ་འགྲོ་ཉེན་ཆེ། དོག་ཟོན་བྱོས།
དགོན་པ་ལ་གྲྭ་པ་རྫོགས་གྲབ།
སློབ་གྲྭ་རུ་སློབ་མ་རྫོགས་གྲབ།
གཞིས་ཆགས་སུ་ན་གཞོན་རྫོགས་གྲབ་དང་རྡ་ས་རུ་གསར་འབྱོར་རྫོགས་གྲབ་ཡིན་པ་དེ་སྔ་ས་ནས་ཤེས་ཀྱི་ཡོད།
ད་དུང་ས་དགེ་བཀའ་རྙིང་གི་དགོན་པ་ཡོངས་ཀྱི་ནང་དུ་གྲྭ་པ་མི་རྫོགས་པའི་རིག་པ་གསར་པ་ཞིག་རག་པ་དེ་ཨ་རུ་ཎ་ཅལ་དང་བལ་ཡུལ་སོགས་ནས་ཉམ་ཐག་གི་ཕྲུག་གུ་མང་པོ་ཞིག་ཚ་ཚ་འུར་འུར་དུ་བསྡུ་རུབ་བྱ་བཞིན་པ་རེད། གསར་འབྱོར་མང་པོ་ཞིག་རྒྱ་གར་ལ་རེ་ཐག་ཆད་ནས་སེམས་ཕམ་ངང་བོད་དུ་ལོག་གི་ཡོད་པ མངོན་གསལ་རེད། ལྡི་ལི་རྒྱ་ནག་གཞུང་ཚབ་བདུན་ཕྲག་རེ་ལ་ཐེང་གཉིས་རེ་སྒོ་ཕྱེ་བཞིན་ཡོད།
ཉི་མ་རེ་ལ་མི་ལྔ་བཅུ་ཡན་དང་བརྒྱ་མན་གྱིས་བོད་ལ་འགྲོ་རྒྱུ་ཐོ་འགོད་བྱ་བཞིན་འདུག
དེ་ཚོ་བརྒྱ་དགུ་བཅུ་གོ་དགུ་དེ་གསར་འབྱོར་ཡིན་པ་མངོན་གསལ་རེད།
གནས་ཚུལ་དེ་ཚོ་ལ་ཉམས་ཞིབ་བྱ་ནས་བཀའ་ཁྲི་གསར་པ་ལ་ཐབས་ལམ་འདྲ་གང་ཡོད་དམ།
གསར་འབྱོར་རྫོགས་ལ་ཉེ་ཡང་་་་་རང་བཙན་ལག་དེབ་ཀྱི་རིན་གོང་ཇེ་ཁུགས་རེད་་་་་་ཧི་མ་ལ་ཡའི་རི་རྒྱུད་ཀྱི་མི་སེལ་ཚོས་དེང་སང་རང་བཙན་ལག་དེབ་ལ་འབུམ་འགའ་ཤས་རེ་སྤྲད་ཀྱིན་འདུག་་་་་རིན་གོང་འཕར་གྱིན་པའི་རང་བཙན་ལག་དེབ་འདིས་བོད་གཞུང་གི་ལས་བྱེད་འགའ་ཕྱུག་པོ་བཟོས་ལོས་ཡོད་་་་་མུ་མཐུད་ཚོང་ལས་ལ་འབད་དགོས་པ་རེད་་་་་གཞན་པའི་ཚོང་ལས་རེ་འདུག་གམ་་་་་ཀིརྟིའི་སྒྲོལ་དཀར་ལྷ་མོ་སྙིང་རྗེ་རླུང་རྟ་མ་རྒྱུགས་པའམ་རྒྱབ་སྐྱོར་བྱེད་མཁན་མེད་པས་སམ་གང་ལྟར་སྒོར་མོ་ཉུང་ཉུང་ཞིག་གིས་མི་ཁ་ཆེན་པོ་ཞིག་ཉོས་པ་རེད་་་་་་སྒོར་མོ་མང་པོ་ཅན་ཚོས་མི་ཁ་འདི་འདྲ་མི་ཁུགས་པ་དེ་རླུང་རྟ་རེད་དམ་་་་་་སྦྱང་པོ་རེད་་་་ཨོ་རེད་་་་གསར་འབྱོར་ཚོ་རྫོགས་རྗེས་རང་བཙན་ལག་དེབ་དེས་ཀྱང་ཅི་བྱེད་གོང་ཁུགས་ན་བཙོང་ན་ཡག་ཤོས་རེད་་་་
དྷ་སའི་སྒྲིག་འཛུགས་ཀྱི་དཔལ་འབྱོར་འགྲོ་སོང་གཏོང་ས་གལ་ཆེ་ཤོས་དེ། བོད་མི་གསར་རྙིང་གང་ཡིན་ཡང་དཔལ་འབྱོར་གྱི་དཀའ་ངལ་ཕྲད་པ་དེ་ཚོ་ཡིན་པ་དེ་དུས་ནམ་ཡང་བརྗེད་མི་ཉན། ནོར་ལྷས་སྲུངས་འགྱུར་ཅིག
ཨ་རིག་འགྱུར་མེད་འདི་མཉམ་ཞིབ་པ་ཧ་ཅང་གི་ཚད་མཐོ་བོ་ཞིག་རེད་འདུག་ གང་ལྟར་གསར་འབྱོར་དང་སྙིང་འབྱོར་ཟེར་ནས་སྡུག་མཁན་མང་པོ་ཞིག་ཡོད་པ་རེད། དེ་དག་གིས་སྐད་ཆ་འདི་ཚོ་གོ་སོང་ན་དགའ་ཐག་ཆོད་ཀྱི་ཡོད་རེད་བསམ་གྱི་འདུག ཡིན་ན་ཡང་གསར་འབྱོར་བ་རྫོགས་དགོས་པའི་རྒྱུ་མཚན་དེ་གང་ལ་ཐུག་ཡོད་མེད་དེ་ཡག་པོ་ཤེས་དགོས་པ་དེ་ཡང་གལ་ཆེན་པོ་རེད། གལ་ཏེ་གསར་འབྱོར་བ་རྫོགས་ཀྱི་ཡོད་ན་ཡག་པོ་རེད་དམ་ཡང་ན་སྡུག་ཅག་རེད དེ་ཡང་བསམ་བློ་ཞིག་གཏོང་དགོས་ཀྱི་ཡོད་རེད། སྤྱིར་བཏང་གི་བཙན་འབྱོར་ནང་དུ་གསར་འབྱོར་བ་ཡོད་ན་དགའ་ཡི་ཡོད་རེད་མེད་ན་དགའ་ཡི་ཡོད་རེད་དེ་ཡང་བསམ་བློ་ཞིག་བཏང་དགོས་ཀྱི་འདུག
ཁྱོད་ཀྱིས་གསུངས་པ་བདེན་། གསར་འབྱོར་ཚོ་ལ་བོད་གཞུང་གི་རོགས་པ་གང་ཡང་བྱ་མི་ཐུབ་ཟེར་ནས་གསལ་པོ་གསུངས་སོང། ངས་རྫུན་བཤད་པ་རྩ་ནས་མིན།
དཔོན་པོ་ཡག་པོ་ངོ་ཤེས་སམ་དགའ་ཉེ་ཡོད་ན་མ་གཏོག་མདུན་ལམ་རག་ཐུབ་དཀའ། དེ་མེད་ན་ཤེས་ཡོན་ཅི་ཙམ་ཡོད་ཀྱང་རུལ་རྒྱུ་དང་སེམས་ཤུགས་ཅི་ཙམ་ཡོད་ཀྱང་འགྱོད་པའི་གཞི་མ་རང་ལས་མེད། དེ་ལས་ཡུལ་དུ་ལོག་ན་མ་མཐའ་ཡང་ནང་མི་དང་མཉམ་འཛོམས་ཡོང་གི་རེད་ལ་ནང་མི་སྤུན་མཆེདཚོ་ལ་སེམས་ཁྲེལ་ཡང་ཡོད་མ་རེད།
གསར་འབྱོར་རྣམས་བོད་དུ་ཕྱིར་འདེད་པ་ནི་བོད་གཞུང་གིས་སྲིད་བྱུས་ཤིག་ཏུ་བཟུང་སྟེ་ལོ་མང་སོང་ཡོད་ལ། རྡ་སའི་སྐུ་དྲག་ཚོས་གནས་ཚུལ་འདི་འདྲ་གོ་ན་སེམས་གཏིང་ནས་དགའ་བཞིན་ཡོད་ཚོད་རེད། དེ་སང་གནས་ཚུལ་གསར་པ་ཞིག་ལ་བོད་གཞུང་གིས་རྒྱལ་གཅེས་ཆོས་གཅེས་ཀྱི་ལས་འགུལ་སྤེལ་ཏེ་མི་ངན་རིགས་བཞི་ཚར་གཅོད་བྱ་རྒྱུ་ཡིན་ཟེར།འདིའི་རྗེས་སུ་ད་དུང་གྲལ་རིམ་འཐབ་རྩོད་ཡོང་གི་རེད་ལ། དེ་ཡང་གསར་འབྱོར་རྣམས་ཕྱིར་འདེད་པའི་སྲིད་བྱུས་ཤིག་ཏུ་ཅིས་མི་འགྲུབ།
གསར་འབྱོར་བ་རྫོགས་ཟེར་ན་མི་ཤེས་ཏེ། ཉུང་ངུ་ཞིག་ལས་མེད་པ་ནི་དངོས་བདེན་རེད། དེ་ལ་ནི་དོན་རྐྱེན་མང་ནི་རེད་འདོད་ཀི།
ཨ་རིག་གིས་དཀའ་ངལ་ངོ་མ་ཞིག་གླེང་འདུག དབུས་བོད་མིའི་སྒྲིག་འཛུགས་ཀྱིས་མཐོང་གི་ཡོད་མེད་མི་ཤེས་ཀྱང་། བོད་མིའི་སྒྲིག་འཛུགས་ལ་མཚོན་ན་འདི་ནི་ཚབས་ཆེའི་དཀའ་ངལ་ཞིག་རེད།
རྒྱུ་མཚན་གྲོགས་པོ་ནད་པས་གླེང་འདུག དེས་འཐུས་པར་བྱས། འོན་ཀྱང་དཀའ་ངལ་འདི། ས་ཁུག་ན་བསྡད་བསྡད་པས་གཞིས་ཆགས་ཚོས་མཐོང་གི་མེད། གངས་ཅན་སྐྱིད་ཤོང་གི་ན་གཞོན་དེ་ཚོས་ཀྱང་རིག་གི་མ་རེད།
བོད་མིའི་སྒྲིག་འཛུགས་ཀྱི་མཐོ་རིམ་ཚོས་རིག་ཡོད་ན་ཡང་། སྣང་ཆུང་གཏོང་གི་ཡོད། དཀའ་ངལ་འདི་དང་དེའི་མཇུག་འབྲས་མཐོང་མཁན་ངོ་མ་དེ། རྒྱ་ནག་གི་འཐབ་མཆོག་བཅོས་བསྒྱུར་པུ་ཡིན།
གསར་འབྱོར་ཚོ་ཕ་ཡུལ་ལ་ལོག་ན་ཡག་པོ་རེད། འདིར་སྡད་ན་ངོ་མ་དོན་སྙིང་དེ་ཙམ་མི་འདུག་ལ། ཕྱི་རྒྱལ་ལ་སོང་ན་དེ་བས་ཀྱང་དོན་སྙིང་མེད་པ་རེད། དེ་བས་ཕ་ཡུལ་ལ་ལོག་སྟེ་རྒྱ་གཞུང་ལ་གང་ཐུབ་ཀྱི་ཞི་བའི་འཐབ་བརྩོད་རེ་དང་། བོད་རང་གི་ཆོས་དང་རིག་གཞུང་ལ་ཞབས་འདེག་རེ་ཨེ་འགྲུབ་བལྟས་ན་ཡག་ཤོས་རེད། འདི་ནས་འཚར་ལོང་བྱུང་དང་འབྱུང་བཞིན་པ་དག་ནི་བོད་རང་གི་སྐད་ཡིག་ཡག་པོ་མི་ཤེས་མཁན་དང་། ཆོས་དང་རིག་གཞུང་ལ་དོ་སྣང་མེད་མཁན་། མཐའ་ན་མི་རིགས་ཀྱི་ལར་རྒྱ་ཙམ་ཡང་མེད་མཁན་གྱི་ར་མ་ལུག་དག་དག་ཆགས་བཞིན་འདུག་ན་འདི་ཚོས་རང་གི་ལྟོ་གོས་བརྩལ་ཐུབ་ཙམ་ལས་བོད་མི་རིགས་ལ་ཕན་རྒྱུ་ཁག་པོ་རེད་འདུག
སེམས་ཁྲལ་མ་བྱེད་དང་སྐྱོན་ནི་མ་རེད། བོད་མ་རྫོགས་ན་རྡ་སར་གསར་འབྱོར་རྫོགས་ནི་མ་རེད། སེམས་ཁྲལ་ཆེན་པོ་དེ་དྲ་འབུ་ཚོའི་ནང་ན་རྒྱ་འདྲེ་ཡོད་པ་དེ་རེད། གཟབ་དགོས་སའང་འདི་རེད་སྙམ།
གསར་འབྱོར་ཉུང་དུ་འགྲོ་ཐུབ་ན་གཞིས་ཆགས་ཚོར་ཐོབ་ཐང་ཆེ་རུ་འགྲོ་ཐུབ་པའི་རེ་བ་ཡོད་པ་རེད། གསར་འབྱོར་ཉུང་དུ་འགྲོ་ཐུབ་ན་གདན་ས་དང་དགོན་སྡེ་ཁག་ཏུ་ཧི་མ་ལའི་རིགས་བརྒྱུད་ཀྱི་གྲྭ་བཙུན་རྣམས་ལ་ཐོབ་ཐང་ཆེ་རུ་འགྲོ་ཐུབ་པའི་རེ་བ་ཡོད་པ་རེད།
གསར་འབྱོར་ཉུང་དུ་འགྲོ་ཐུབ་ན་ཊི་སི་ཝི་བོད་ཁྱིམ་སློབ་གྲྭར་སོགས་ཀྱི་ནང་གཞིས་ཆགས་དང་ཐ་ན་རྒྱ་གར་གྱི་ཕྲུ་གུ་ཚོར་གོ་སྐབས་མང་དུ་འགྲོ་ཐུབ་པའི་རེ་་བ་ཡོད་པ་རེད། གསར་འབྱོར་ཉུང་དུ་འགྲོ་ཐུབ་ན་རྡ་སར་བོད་གཞུང་ལ་དཀའ་ངལ་ཆུང་དུ་འགྲོ་ཐུབ་པའི་རེ་བ་ཡོད་པ་རེད།
གསར་འབྱོར་ཉུང་དུ་འགྲོ་ཐུབ་ན་བཙན་བྱོལ་བོད་པའི་སྤྱི་ཚོགས་འདི་རིམ་བཞིན་ཡལ་འགྲོ་ཐུབ་པའི་རེ་བ་ཡོད་པ་རེད། གསར་འབྱོར་ཉུང་དུ་འགྲོ་ཐུབ་ན་གུན་ཁྲན་ཏང་གི་མངོན་འདོད་དང་རེ་བ་དེ་ཆེ་རུ་འགྲོ་ཐུབ་པའི་རེ་བ་ཡོད་པ་རེད།
གསར་འབྱོར་ཉུང་དུ་འགྲོ་ཐུབ་ན་རྒྱལ་སྤྱིའི་སྤྱི་ཚོགས་རོགས་དངུལ་ཉུང་དུ་འགྲོ་ཐུབ་པའི་རེ་བ་ཡོད་པ་རེད། གསར་འབྱོར་ཉུང་དུ་འགྲོ་ཐུབ་ན་གཞི་བྱེས་གཉིས་ཀྱི་འབྲེལ་ལམ་དེ་གྲིས་བཅད་པ་ལྟར་ཡོང་ཐུབ་པའི་རེ་བ་ཡོད་པ་རེད།
གསར་འབྱོར་ཉུང་དུ་འགྲོ་ཐུབ་ན་བོད་ནང་སྔར་ལས་ལྷག་པའི་རང་དབང་དང་། འགྲོ་བ་མིའི་ཐོབ་ཐང་ཡོད་པ་མཚོན་ཕྱིར་རྒྱ་ནག་གཞུང་གི་རེ་བ་རྒྱལ་སྤྱིའི་སྟེང་ཆེ་རུ་འགྲོ་ཐུབ་པའི་རེ་བ་ཡོད་པ་རེད།
གསར་འབྱོར་ཉུང་དུ་འགྲོ་ཐུབ་ན་གཞི་ཆགས་ཚོ་ཕྱི་རྒྱལ་གང་སར་གནས་སྤོ་ཐུབ་པའི་རེ་བ་ཡོད་པ་རེད། གསར་འབྱོར་ཉུང་དུ་འགྲོ་ཐུབ་ན་སྐྱབས་བཅོལ་བོད་མིའི་སྤྱི་ཚོགས་ཀྱི་མི་ཤུགས་དང་ནུས་ཤུགས་ཆུང་དུ་འགྲོ་ཐུབ་པའི་རེ་བ་ཡོད་པ་རེད།
མཐར་གཏུགས་ནས་བཤད་ན་དེ་ནི་གུ་ཁྲན་ཏང་གི་ལམ་ཕྱོགས་དང་མཐུན་པ་མ་ཟད་ཏང་གི་མངོན་འདོད་དང་སྲི་ཐུས་ཡིན་སྟབས། མ་འོངས་པར་ཏང་ལ་རྒྱལ་ཁ་རླབས་ཆེན་ཞིག་འཐོབ་མི་ཐུབ་པ་སུས་ཀྱང་བརྗོད་མི་ཐུབ།
པི་ཅིང་ཏངགི་རླུང་རྟ་དང་རྡ་སའི་སྒྲིག་འཛུགས་གཉིས་ཀྱི་རླུང་རྟ་ཆེ་ཆུང་རངལ་ཐུག་ཡོད། པི་ཅིང་ཏང་གི་ཚེ་སྲོག་དང་རྡ་སའི་ཏྰ་ལའི་བླ་མའི་ཚེ་རིང་ཐུང་གཉིས་ལ་ཐུག་ཡོད།
པི་ཅིང་ནས་སྲིད་ཤེས་ན་སྲིད་ཇུས་བེད་སྤྱད་དགོས་པའི་དུས་ཚོད་ཅིག་རེད་འདུག
རྡ་ས་ནས་རིགས་ལམ་ཤེས་ན་རིག་པ་བེད་སྤྱད་དགོས་པའི་དུས་ཚོད་ཅིག་རེད་འདུག
ཁག་མེད་་་་གསར་འབྱོར་བརྒྱ་ཆ་བརྒྱ་དགུ་བཅུས་རང་རྐང་མ་ཟིན་པར་དཀའ་ངལ་གྱི་ངང་དུ་བསྡད་ཡོད་་་་་་་འདི་ནི་ཕྱོགས་མང་པོ་ཞིག་ནས་སྤྲད་པའི་དཀའ་ངལ་ལས་བྱུང་བ་ཞིག་ཡིན་་་་་་གསར་འབྱོར་ཚོ་འདིར་ཐོན་དུས་སྐད་བརྡ་མ་འཕྲོད་པའི་དཀའ་ངལ་དང་་་འདིར་འདུག་ཆོག་པའི་ཡིག་ཆའི་དཀའ་ངལ་་་་་་་གཞུང་གིས་མཐོང་ཕྱོགས་དང་གཞིས་ཆགས་འབྱོར་ལྡན་ཚོས་ལྟ་སྟངས་སོགས་བརྒྱུད་རིམ་མང་པོ་ཞིག་གི་བར་ནས་འདུག་མི་ཐུབ་པའི་དཀའ་ངལ་མང་པོ་ཞིག་འཕྲེང་དུ་བསྟར་འདུག་པས་གསར་འབྱོར་མང་པོ་ཞིག་འུ་ཐུག་ནས་ཕྱིར་ཕ་ཡུལ་དུ་ལོག་གི་ཡོད་པ་རེད་་་་་་གསར་འབྱོར་གྱི་དཀའ་ངལ་ལ་ད་བར་བོད་གཞུང་གིས་ཁ་གཡང་སྙན་མོ་ཞིག་ལས་ལྟ་རྟོགས་ཡག་པོ་ཞིག་བྱས་མེད་པ་གསལ་ཐང་ཡིན་བས་ད་རྫོགས་ཀྱང་བྱ་ཐབས་མ་ཡོད་པ་རེད་་་་