རྒྱ་མི་ཁྲི་ ༡༣ གནས་སྤོར་བྱ་འཆར།

རྒྱ་ནག་གཞུང་གིས་གྲོང་ཁྱེར་གསར་རྒྱག་གི་ལས་གཞིར་ཁ་གཡར་ཏེ་འབའ་རྫོང་དུ་རྒྱ་མི་ཁྲི་བཅུ་གསུམ་ལྷག་གནས་སྤོར་བྱ་འཆར་ཡོད་འདུག

རྒྱ་ནག་གཞུང་གིས་ལོ་ཤས་སྔོན་ནས་མཚོ་སྔོན་གྱི་རྨ་ལྷོ་དང་མཚོ་ལྷོ། མགོ་ལོག མཚོ་བྱང་དང་མཚོ་ཤར་བཅས་ཀྱི་འབྲོག་ཁུལ་ཏུ་གྲོང་ཁྱེར་གསར་རྒྱག་གི་ལས་གཞི་མགོ་འཛུགས་བྱས་ཏེ། རྒྱ་མི་ཁྲི་ཕྲག་མང་པོ་གནས་སྦོར་བྱེད་ཀྱིན་ཡོད་པའི་གནས་ཚུལ་ཐོན་ཡོད་པ་ལྟར། ཟླ་སྔོན་མའི་ཕྱི་ཚེས་  ༢༥ ཡས་མས་སུ་མཚོ་ལྷོ་འབའ་རྫོང་གསེར་ཐང་དང་བྲག་དམར། གསེར་འོད། རྨ་ཆུ། གུ་དཀར་སྡེ་བ་བཅས་སུ་རྒྱ་གཞུང་གི་ལས་བྱེད་མི་སྣ་ཡོང་སྟེ་ཚོགས་འདུ་བསྡུ་བསྐོང་གིས། གསེར་ཐང་དང་བྲག་དམར། གསེར་འོད་བཅས་སྡེ་བ་གསུམ་གྱི་ས་ཆའི་བརྒྱ་ཆའི་ ༦༠%  གཞུང་བཞེས་བཏང་ཡོད་པ་དང་། ཕྱུགས་ཟོག་གི་བརྒྱ་ཆའི་ ༥༤% ལོ་འདིའི་ནང་རྩ་མེད་བཟོ་དགོས་པ། གཞུང་བཞེས་བཏང་ཟིན་པའི་ས་ཆའི་སྟེང་ཕྱུགས་ཟོག་གཅིག་ཀྱང་བཏང་མི་ཆོག་པའི་སྐོར་སོགས་ཁྱབ་བསྒྲགས་བྱས་ཡོད་འདུག

ཉེ་ལམ་འབའ་རྫོང་གཞོལ་མ་ཤང་འོག་ཏུ་ཡོད་པའི་སྡེ་བ་ལྔའི་ནང་ཚོགས་འདུ་བསྡུ་སྐོང་བྱེད་སྐབས་མང་ཚོགས་ཀྱིས་མི་འདོད་པའི་རྣམ་འགྱུར་བསྟན་ཏེ། ལས་བྱེད་རྣམས་ཕྱིར་རྫོང་ཐོག་ཏུ་ལོག་བཅུག་ཡོད་ཀྱང་། གཞོལ་མ་ཤང་ཐོག་ཏུ་གློག་འདོན་ཆུ་མཛོད་གསར་རྒྱག་དང་འབྲེལ་ཏེ་རྒྱ་མི་ཁྲི་ ༣ གནས་སྤོར་བྱ་རྒྱུ་དང་། མགར་རྩེ་གོང་མ་དང་རྒྱང་ཐག་སྤྱི་ལེ་ ༥ ནས་ ༨ ཡོད་པའི་མཚམས་སུ་ཡང་གློག་འདོན་ཆུ་མཛོད་ཆེན་པོ་ཞིག་འཛུགས་བསྐྲུན་དང་འབྲེལ་ཏེ་རྒྱ་མི་ཁྲི་ ༡༠ བསྡོམས་ས་གནས་དེ་དག་ཏུ་རྒྱ་མི་ཁྲི་ ༡༣ གནས་སྤོར་བྱས་ཏེ་གྲོང་ཁྱེར་གསར་རྒྱག་གི་ལས་གཞི་སྤེལ་རྒྱུ་ཡིན་པའི་ཁྱབ་བསྒྲགས་བྱས་ཡོད་པ་མ་ཟད། དུ་དུང་རྒྱ་གཞུང་གི་ལས་བྱེད་ཚོས་མི་མང་ལ། མ་འོངས་པར་ས་གནས་དེ་དག་ནང་གྲོང་ཁྱེར་ཆགས་པ་ཡིན་ན། མི་མང་གིས་ཕྱུགས་ཟོག་འཚོ་ཞོར་དུ་བཤས་རྭ་བཙུགས་ཏེ་འཚོལ་ཐབས་བཙལ་ཆོག་སྐོར་སོགས་བཤད་ཡོད་འདུག