རང་སྲོག་འཚོ་ཆེད་རང་གཅིན་འཐུང་པ།

ཨ་རིའི་སློབ་མ་ཞིག་ཉལ་ཐའི་ཉེས་མིང་འོག་བཙོན་འཇུག་བྱས་རྗེས། ཉིན་ ༥ རིང་བཟའ་བཏུང་མ་རག་པར་བརྟེན་རང་གཅིན་འཐུང་སྟེ་སྲོག་འཚོ་ཐབས་བྱས་ཡོད་འདུག

ཟླ་སྔོན་མའི་ཚེས་ ༢༡ ཉིན་ཨ་རིའི་ཁཱ་ལེ་ཧྥོ་ནེ་ཡའི་སན་ཌེ་གྷོ་(San Diego) མཐོ་སློབ་ཀྱི་རང་ལོ་ ༢༣ ཅན་གྱི་སློབ་བུ་ཆཱོན་(Daniel Chong) དང་། གཞན་ཁག་ཅིག་བཅས་མི་ ༩ ཉལ་ཐའི་ནག་ཚོང་གི་དོགས་གཞིའི་འོག་འཇུ་བཟུང་བྱས་འདུག  ཆཱོན་ལ་ཉེན་རྟོག་པས་འདྲི་གཅོད་བྱས་རྗེས་བཙོན་ཁང་ཆུང་ཆུང་ཞིག་ནང་བཅུག་སྟེ། བཟའ་བཏུང་གང་ཡང་མ་སྤྲད་པར་ཉིན་ ༥ རིང་བཙོན་ཁང་དུ་ལྷག་སྟབས། ཁོས་ལྟོགས་སྐོམ་གྱིས་མ་བཟོད་པར་རང་གཅིན་འཐུང་སྟེ་སྲོག་འཚོ་ཐབས་བྱས་ཡོད་འདུག

ཆཱོན་བཙོན་ཁང་ནང་བཀག་སྐྱིལ་གྱིས་ཉིན་ ༥ འགོར་མཚམས་བཙོན་ཁང་གི་མི་སྣས་གཞི་ནས་ཤེས་རྟོག་བྱུང་ཡོད་པ་དང་། སྐབས་དེར་ཆཱོན་མགོ་ཡུ་འཁོར་ཏེ་ཐང་ལ་འགྱེད་ཡོད་འདུག སྐབས་དེར་འཕྲལ་དུ་ཁོང་སྨན་ཁང་དུ་བསྐྱལ་ཏེ་མྱུར་སྐྱོབ་བྱས་ཡོད་ཀྱང་།  སྨན་པས་ཁོང་གི་མཁལ་མ་འཕྲོ་བརླག་ཏུ་ཕྱིན་ཡོད་པར་བརྗོད་འདུག

ཁ་སང་ཚེས་ ༢ ཉིན་ཨ་རིའི་ཉལ་ཐ་དོ་དམ་ལས་ཁུངས་(Drug Enforcement Administration) ཀྱི་འགན་འཛིན་ཝེ་ལེམ་(William Sherman) གྱིས། ཆཱོན་ལ་བཟའ་བཏུང་མ་རག་པར་ཉིན་ ༥ རིང་བཙོན་ཁང་དུ་སྣང་མེད་ཐོག་ལྷག་པ་དེ་ནི། ཁོ་རང་ཉིད་ཀྱིས་གཤམ་འོག་གི་ལས་བྱེད་ཚོར་བཀོད་འདོམས་ཡག་པོ་མ་ཐུབ་པའི་ནོར་འཁྲུལ་ཡིན་པའི་ངོས་ལེན་དང་ཆཱོན་ལ་དགོངས་དག་ཞུས་པ་དང་། ད་ལྟའི་ཆར་གནད་དོན་དེའི་རྒྱུ་རྐྱེན་ཐད་ཞིབ་བཤེར་བྱེད་བཞིན་ཡོད་འདུག

ཆཱོན་གྱིས་གསར་འགོད་པའི་བཅར་འདྲིའི་སྐབས། “འཛིན་བཟུང་བྱས་པའི་ཉིན་མོ་དེར་ཉེན་རྟོག་པས་འདྲི་གཅོད་བྱས་རྗེས། ང་མགྱོགས་པོ་ནང་དུ་ལོག་ཆོག་གི་རེད་ཟེར། ང་བཙོན་ཁང་ནང་བཅུག་རྗེས་ལྟ་རྟོག་བྱེད་མཁན་གཅིག་ཀྱང་བསླེབས་མ་བྱུང་། ངས་སྐད་ག་ཚོད་བརྒྱབ་ཀྱང་ཁ་ཡ་བྱེད་མཁན་མི་འདུག ”ཅེས་བརྗོད་འདུག

ད་ཆར་ཆཱོན་གྱི་ཁྲིམས་རྩོད་པ་ཨ་ཊོ་ནའེ་ཡིས།ནག་ཉེས་མེད་པའི་མི་ཞིག་འདི་ལྟར་བཙོན་འཇུག་བྱས་པ་དང་། ལྷག་པར་དུ་བཟའ་བཏུང་གང་ཡང་མ་སྤྲད་པར་མ་ཟད། བཙོན་པའི་བདེ་སྡུག་ལ་སྣང་མེད་ཀྱིས་ཉིན་ ༥ རིང་བཙོན་ཁང་དུ་བཅུག་སྟབས། བཙོན་པས་རང་ཉིད་ཀྱི་སྲོག་འཚོལ་ཐབས་སུ་རང་གཅིན་འཐུང་དགོས་བྱུང་པའི་གནད་དོན་དེ་ནི། རྒྱལ་སྤྱི་དང་ཨ་རིའི་ཁྲིམས་ལུགས་ལ་འགལ་ཡོད་པའི་གཏུག་བཤེར་བྱས་ཡོད་པ་མ་ཟད། ཆཱོན་ལ་གུན་གསབ་ཨ་སྒོར་ས་ཡ་ ༢༠ སྤྲོད་དགོས་པའི་ཁྲིམས་གཏུག་བྱས་འདུག

གསར་འགོད་པ། བནྡེ་སྐྱབས།