ངྷ་ཤོད་བོད་ཁྱིམ་སློབ་གྲྭའི་སློབ་ཕྲུག་ཚོས་ ༼བོད་ལྗོངས་ང་ཚོའི་ཕ་ཡུལ ༽ཞེས་པའི་བྱ་འགུལ་དང་སྟབས་བསྟུན་ཏེ། མཉམ་འབྲེལ་རྒྱལ་ཚོགས་དྲུང་ཆེ་དང་རྒྱ་ནག་སྲིད་འཛིན། འཛམ་གླིང་རྒྱལ་ཁབ་ཁག་ལྔའི་དབུ་ཁྲིད་བཅས་ལ་རེ་འདུན་ཞུ་ཡིག་ཕུལ་འདུག
ལོ་ལྟར་བོད་ཁྱིམ་ཁྱབ་ཁོངས་སློབ་གྲྭ་ཁག་ཏུ་སློབ་ཕྲུག་རྣམས་ལ་བོད་ཀྱི་རིག་གཞུང་དང་ཡུལ་སྲོལ་གོམས་གཤིས་ངོ་སྤྲོད་ཆེད་ཟླ་གཅིག་རིང་ ༼ བོད་ལྗོངས་ང་ཚོའི་ཕ་ཡུལ ༽ ཞེས་པའི་བྱ་འགུལ་ཞིག་སྤེལ་བཞིན་པ་ལྟར། ཕྱི་ཟླ་ ༤ ཚེས་ ༥ ཉིན་ནས་བཟུང་ངྷ་ཤོད་བོད་ཁྱིམ་སློབ་གྲྭས་འདི་ལོའི་བྱ་འགུལ་གྱི་བརྗོད་གཞི་གཙོ་བོར། བོད་ཕྱི་ནང་གཉིས་སུ་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་ལོ་རྒྱུས་དང་ཁ་ཆེམས་ཡི་གེ་ངོ་སྤྲོད་གནང་ཡོད་པ་དང་། དེ་རིང་ཕྱི་ཚེས་ ༥ ཉིན་དེ་བྱ་འགུལ་གྱི་ཉིན་མཐའ་མར་འཛིན་རིམ་དྲུག་པ་ཡན་གྱི་སློབ་མ་ཚོས་རྒྱལ་གཅེས་དཔའ་བོ་དཔའ་མོ་དག་གི་ལོ་རྒྱུས་དང་ཁ་ཆེམས་སློབ་སྦྱོང་བརྒྱུད། སོ་སོ་རང་ཉིད་ལ་བྱུང་བའི་སེམས་ཚོར་དང་རྩོམ་ཡིག་སྒྲོགས་སྦྱང་། རྒྱལ་ཞེན་གྱི་གླུ་གཞས་དང་གཏམ་བརྗོད་འཁྲབ་སྟོན། རི་མོ་འགྲེམས་སྟོན། རང་ངོས་ཀྱི་དམ་འབུལ་དང་མཚན་རྟགས་བསྡུ་རུབ་བཅས་གནང་སྟེ། སློབ་མའི་མཚན་རྟགས་དང་མཉམ་དུ་མཉམ་འབྲེལ་རྒྱལ་ཚོགས་དྲུང་ཆེ་བྷེ་ཀེ་མོན་དང་རྒྱ་ནག་སྲིད་འཛིན་ཧུའུ་ཅིན་ཐའོ་གཉིས་ལ་ཞུ་ཡིག་རེ་ཕུལ་ཡོད་པ་མ་ཟད། མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ཚོགས་པ་དང་རྒྱལ་ཁབ་ཁག་ལྔའི་སྲིད་བློན་གྱི་མིང་ཐོག་ལའང་ཞུ་འབོད་ཡི་གེ་ཕུལ་ཡོད་པ་རེད།
༼བོད་ལྗོངས་ང་ཚོའི་ཕ་ཡུལ༽ཞེས་པའི་བྱ་འགུལ་དེ་ནི། བོད་ཕྲུག་ཁྱིམ་སྡེའི་དམིགས་ཡུལ་བཞིའི་ཁྲོད་ཀྱི་གཅིག་ཡིན་ཞིང་། བྱ་འགུལ་འདིའི་དམིགས་ཡུལ་གཙོ་བོ་ནི་བོད་པའི་སློབ་ཕྲུག་རྣམས་ལ་བོད་ཀྱི་རིག་གཞུང་དང་ཡུལ་སྲོལ་གོམས་གཤིས་རྒྱུན་འཛིན་ཡོང་ཐབས་ཡིན་པ་དང་། འདི་ལོར་ངྷ་ཤོད་བོད་ཁྱིམ་སློབ་གྲྭས་སློབ་མ་ཚོར་བོད་ཕྱི་ནང་གཉིས་སུ་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་ལོ་རྒྱུས་དང་ཁ་ཆེམས་སྐོར་བདམས་ཏེ་ངོ་སྤྲོད་གནང་དགོས་དོན་ཡང་། ༢༠༠༩ ལོ་ནས་བཟུང་བོད་ཕྱི་ནང་གཉིས་སུ་བོད་རིགས་སྤུན་ཟླ་མང་པོས་རང་གི་རྒྱལ་ཁབ་དང་སྐད་ཡིག་རིག་གཞུང་སྲུང་སྐྱོབ་ཆེད་རང་ལུས་མེར་བསྲེགས་བཏང་སྟེ། སོ་སོའི་རྙེད་དཀའ་བའི་ཚེ་སྲོག་བློས་བཏང་གནང་ཡོད་སྟབས། བཙན་བྱོལ་ནང་ཡོད་པའི་བོད་མི་ཚོས་བག་མེད་སྣང་མེད་དུ་མི་འཇོག་པར། རང་ནུས་ཡོད་རྒུས་རྒྱལ་གཅེས་པ་ཁོང་ཚོར་རྒྱབ་སྐྱོར་བྱ་རྒྱུ་དང་། སློབ་མ་ཚོའི་ངོས་ནས་ཀྱང་རྒྱལ་གཅེས་པ་དག་གི་ཁ་ཆེམས་སློབ་སྦྱོང་དང་འབྲེལ་ཏེ། རང་སྐྱོན་ལེགས་བཅོས་དང་ཁས་ལེན་དམ་བཅའ་འབུལ་ཡོང་ཆེད་གོ་སྒྲིག་ཞུས་པ་ཞིག་ཡིན་འདུག
དེ་རིང་ཉིན་མཐའ་མར་ཉིན་འཛིན་རིམ་བཅུ་བ་བུམ་པའི་སློབ་མ་ཚོས། འཛིན་རིམ་དྲུག་པ་ནས་བཅུ་བའི་བར་གྱི་སློབ་མ་ ༤༨༠ ལྷག་གི་མཚན་རྟགས་བསྡུ་རུབ་དང་མཉམ་དུ། རྒྱ་ནག་སྲིད་འཛིན་ཧུའུ་ཅིན་ཐའོ་ལ་བོད་ནང་ཆོས་དད་རང་དབང་དང་འགྲོ་བ་མིའི་ཐོབ་ཐང་གནས་སྟངས་དང་། དེ་བཞིན། བོད་ནང་བོད་མི་མང་པོས་རང་ལུས་མེར་བསྲེགས་གཏོང་དགོས་པའི་རྒྱུ་མཚན་གཙོ་བོ་༸གོང་ས་མཆོག་བོད་ནང་གདན་འདྲེན་ཞུ་རྒྱུ་དེ་ཡིན་སྟབས། དེའི་ཐོག་བསམ་ཞིབ་བྱ་དགོས་པའི་ཞུ་ཡིག་ཅིག་དང་། མཉམ་འབྲེལ་རྒྱལ་ཚོགས་དྲུང་ཆེ་བྷེམ་ཁེ་མོན་མཆོག་ལ་སློབ་མ་ ༩༠ ལྷག་གི་སྦྲགས་འཛིན་ (post card) དང་མཉམ་དུ། མཉམ་འབྲེལ་རྒྱལ་ཚོགས་ཀྱིས་བོད་ཕྱི་ནང་གཉིས་ཀྱི་བོད་མིའི་རེ་འབོད་ལ་ཞིབ་འཇུག་དང་བཅས་རྒྱབ་སྐྱོར་ཡོང་བའི་ཞུ་ཡིག་ཅིག་ཕུལ་ཡོད་ལ། དེ་བཞིན། བོད་ནང་གི་འགྲོ་བ་མིའི་ཐོབ་ཐང་གནས་སྟངས་ཐད་གཟིགས་རྟོགས་ཡོང་ཆེད། འཛིན་རིམ་དགུ་བའི་སློབ་མ་ཚོས་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ཚོགས་པར་ཞུ་ཡིག་ཅིག་དང་། འཛིན་རིམ་བརྒྱད་པའི་སློབ་མ་རྣམས་ཀྱིས་མཉམ་འབྲེལ་རྒྱལ་ཚོགས་དང་ཨ་རིའི་སྲིད་འཛིན། རྒྱ་ནག་སྲིད་འཛིན། དབྱིན་ལན་སྲིད་བློན། རྒྱ་གར་སྲིད་བློན་བཅས་ལ། བོད་ནང་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། སྐད་ཡིག་སྲུང་སྐྱོབ་ཀྱི་ཐོབ་ཐང་རྣམས་རྒྱ་ནག་གཞུང་གིས་རྩིས་མེད་ལྡོག་རོལ་གཏོང་བཞིན་པའི་སྙན་ཞུ་ཞིག་བཅས་སྦྲགས་ཁང་བརྒྱུད་ཕུལ་ཡོད་འདུག
ཐེངས་འདིའི་བྱ་འགུལ་གྱི་བརྗོད་གཞི་དང་འབྲེལ་ཏེ་སློབ་མ་ཁག་ཅིག་ལ་བསམ་ཚུལ་བསྡུ་ལེན་བྱས་སྐབས། སློབ་མ་བསྟན་འཛིན་སྐལ་ལྡན་ལགས་ཀྱིས། “ ད་ལྟའི་བར་༼བོད་ལྗོངས་ང་ཚོའི་ཕ་ཡུལ༽ཞེས་པའི་བྱ་འགུལ་གྱི་བརྗོད་གཞི་རྣམས་ཡུལ་སྲོལ་གོམས་གཤིས་ཀྱི་སྐོར་རེད། ད་རེབ་བརྗོད་གཞི་འདི་འདྲ་ཞིག་བདམས་པ་དང་སློབ་མ་རྣམས་ཀྱིས་རྩོམ་ཡིག་དང་རི་མོ་བྲིས་པ། རང་ངོས་ནས་དམ་བཅའ་ཕུལ་སོགས་བྱས་ཡོད་སྟབས། སྔར་དང་མི་འདྲ་བའི་སེམས་ཚོར་ཞིག་སྐྱེས་ཡོང་གི་འདུག ལྷག་པར་དུ་རྒྱ་གཞུང་གི་དམ་དྲག་འོག་བོད་ཕྱི་ནང་གཉིས་སུ་བོད་མི་ ༣༩ ཡིས་རང་ལུས་མེར་བསྲེགས་གཏོང་དགོས་བྱུང་བར་བློ་ཕམ་ཆེན་པོ་ཡོང་གི་འདུག མ་འོངས་པར་སློབ་མ་ཚོའི་ངོས་ནས་སློབ་སྦྱོང་གི་ཞོར་དུ་སོ་སོའི་མི་རིགས་ཀྱི་འཐབ་རྩོད་དང་འབྲེལ་བའི་གནས་ཚུལ་ཤེས་རྟོགས་བྱ་རྒྱུ་ཧ་ཅང་གལ་ཆེན་པོ་རེད། ང་ཚོ་སོ་སོའི་ངོས་ནས་རང་ལུས་མེར་བསྲེགས་གཏོང་མི་ཐུབ་ཀྱང་། ང་ལ་མཚོན་ན་གནས་ཚུལ་འདིའི་རིགས་ཐོས་རྗེས་སློབ་སྦྱོང་ལ་འབད་བརྩོན་བྱ་རྒྱུའི་ཐད་སེམས་ཤུགས་བསླེབས་རྒྱུར་དམིགས་བསལ་ཕན་ཐོགས་ཆེན་པོ་འདུག ” ཅེས་བརྗོད་བྱུང་།
སློབ་མ་བསྟན་འཛིན་གསལ་སྒྲོན་གྱིས། “ བོད་ནང་ང་ཚོའི་ཤ་ཁྲག་གཅིག་པའི་སྤུན་ཟླ་ཚོས་རང་ལུས་མེར་བསྲེགས་བཏང་སྟེ། ཧ་ཅང་ཛ་དྲག་དང་ཚབས་ཆེའི་གནས་སྟངས་ཤིག་གི་འོག་ལྷག་ཡོད་པ་རེད། གནས་ཚུལ་དེ་འཛམ་གླིང་ཡོངས་ལ་ཁྱབ་བསྒྲགས་བྱ་དགོས་ན་ཐོག་མར་སོ་སོས་ཤེས་རྒྱུ་གལ་ཆེན་པོ་རེད། ད་རེབ་ཀྱི་གོ་སྐབས་འདི་བརྒྱུད་དེ་ང་རང་གིས་དཔའ་བོ་དཔའ་མོ་རྣམས་ཀྱི་ལོ་རྒྱུས་གསལ་བོ་ཤེས་སོང་བ་མ་ཟད། ཁོང་རྣམ་པའི་ལོ་རྒྱུས་དང་ཞལ་ཆེམས་ཁག་ལ་སློབ་སྦྱོང་བྱེད་སྐབས་སེམས་ལ་ན་ཟུག་སྐྱེས་ཀྱི་འདུག ལུང་པ་གཞན་ལའང་དཔའ་བོ་མང་པོ་ཡོད་ཀྱང་། ང་ཚོ་བོད་ཀྱི་དཔའ་བོ་དཔའ་མོ་རྣམས་ཀྱི་སྙིང་སྟོབས་དེ་ནི་འགྲན་ཟླ་མེད་པ་ཞིག་རེད་བསམ་བྱུང་། མ་འོངས་པར་སློབ་མ་ཚོས་ཁོང་རྣམ་པའི་ཁ་ཆེམས་ཤེས་རྟོགས་བརྒྱུད། སོ་སོ་བོད་པ་ཞིག་དང་རང་བཙན་མེད་པའི་རྒྱལ་ཁབ་ཅིག་གི་སློབ་མ་ཞིག་ཡིན་པ་ཤེས་པར་བྱས་ཏེ། དམིགས་བསལ་བོད་ཡིག་ཐོག་ཤུགས་རྒྱག་རྒྱུ་དང་། སོ་སོའི་རིག་གཞུང་དང་སྐད་ཡིག་སྲུང་སྐྱོབ་བྱ་རྒྱུ། བོད་སྐད་གཙང་མ་བཤད་རྒྱུ་ཧ་ཅང་གལ་ཆེན་པོ་རེད་བསམ་གྱི་འདུག ” ཅེས་བརྗོད་བྱུང་།
སློབ་མ་བསྟན་འཛིན་ནོར་འཛོམས་ཀྱིས། “ ད་རེབ་ཀྱི་བྱ་འགུལ་འདི་ལོ་སྔོན་མ་དག་དང་བསྡུར་ན་ཡག་པོ་འདུག གང་ཡིན་ཞེ་ན། ད་རེབ་ཀྱི་བྱ་འགུལ་འདིའི་ཐོག་ནས་སློབ་མ་ཚོས་རྒྱལ་ཞེན་གྱི་གླུ་གཞས་དང་གཏམ་བརྗོད། སོ་སོའི་བྲིས་པའི་རྩོམ་ཡིག་སྒྲོགས་སྦྱང་བྱས་ཏེ། སོ་སོའི་སེམས་ཚོར་བརྗོད་པ་དང་སེམས་ཤུགས་སྤར་ཡོད་ལ། བྱ་འགུལ་འདི་བརྒྱུད་དེ་བོད་ནང་གི་ཛ་དྲག་གནས་སྟངས་དང་བོད་མི་མང་པོ་ཞིག་གིས་མེར་བསྲེགས་བཏང་བའི་གནས་ཚུལ་གསལ་བོ་ཤེས་བྱུང་། ཡིན་ནའང་། ང་རང་གི་ངོས་ནས་གཞོན་སྐྱེས་མང་པོ་ཞིག་གིས་རང་ལུས་མེར་བསྲེགས་གཏོང་པ་ལས་མུ་མཐུད་ཚེ་སྲོག་འཚོ་བསྡོད་གནང་ཐུབ་པ་ཡིན་ན་ཡག་པོ་འདུག་བསམ། ཚེ་སྲོག་འཚོ་སྡོད་བྱས་པ་ཡིན་ན་མ་འོངས་པར་སོ་སོའི་དུས་སྐབས་ལ་བསླེབས་ཚེ་ལས་འགུལ་སྤེལ་རྒྱུའི་གོ་སྐབས་རེག་གི་རེད་བསམ་གྱི་འདུག ”ཅེས་བརྗོད་བྱུང་།
གསར་འགོད་པ། དོན་གོ
རེད་ད་ བོད་ལྗོངས་ང་ཚོའི་ཕ་ཡུལ་རེད། སོན་རྩའི་ཆེད་བཏབ་པའི་བློ་གསར་བ་རྣམས་ད་རང་ནུས་ག་ཡོད་ཀྱིས་ཤེས་ཡོན་པ་འདབ་ཆགས་ཤོག་པ་གཉིས་ལྡན་ལ་འབད་པ་བྱེད་དགོས་པའི་དུས་ལ་བབ་ཤག། སློབ་སྦྱོང་ཡིག་ཚད་ཐུབ་ཙམ་ཞིག་བྱས། ་དེ་ནས་དངུལ་དམར་གསོག་སར་རྒྱུགས་འགྲོ་བའི་ལམ་ངན་དང་། མིག་ལྟོས་བག་ཆགས་ཡོངས་སུ་དོར་དགོས་ རང་ལ་རང་དབང་བྱུང་ཚེ་དངུལ་དམར་ང་ཚོས་བསྐྲུན་ཆོག་པ་རེད། ༧ མགོན་ཡིན་བཞིན་ནོར་བུས་སློབ་ཕྲུག་ཚོར་གནང་བའི་བཀའ་སློབ་དེ་ཁྱེད་ཚོ་ལ་ལམ་སྟོན་ནམ ལུང་བསྟན་་ལྷད་མེད་རེད ལམ་དེར་བསྐྱོད་རོགས་ཞུ།། ད་ལམ་གང་བྱུང་གི་ཅི་མི་ཕན་ནོ།།།