སིམ་ལ་གཏན་སློབ་ལོ་ ༥༠ སོན་པའི་མཛད་སྒོ།

གཟའ་མིག་དམར་ཉིན་སིམ་ལ་གཏན་སློབ་བཙུགས་ནས་མི་ལོ་ ༥༠ འཁོར་བའི་མཛད་སྒོ་ཚོགས་ཏེ། བཀའ་ཁྲི་བློ་བཟང་སེང་གེ་མཆོག་གིས་དུས་དྲན་དང་འབྲེལ་བའི་གཏམ་བཤད་སྤེལ་ཡོད།

ཟླ་འདིའི་ཕྱི་ཚེས་ ༦ ཉིན་ཧི་མ་ཅལ་མངའ་སྡེའི་སིམ་ལ་གཏན་སློབ་དབུ་བརྙེས་ཏེ་ཁྱོན་མི་ལོ་ ༥༠ ཧྲིལ་པོ་འཁོར་བའི་དུས་དྲན་མཛད་སྒོ་གཟབ་རྒྱས་ཤིག་ཚོགས་ཡོད་ཅིང་། མཛད་སྒོའི་སྐུ་མགྲོན་དུ་དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་གིས་གཙོས་ཤེས་རིག་དྲུང་ཆེ་དངོས་གྲུབ་ཚེ་རིང་ལགས་དང་། ནང་སྲིད་དྲུང་ཆེ་བསོད་ནམས་སྟོབས་རྒྱལ། སྤྱི་འཐུས་ཀརྨ་ཆོས་འཕེལ་དང་ཡེ་ཤེས་ཕུན་ཚོགས་བཅས་དང་། རྒྱ་གར་ཕྱོགས་ནས་སིམ་ལ་གཏན་སློབ་སློབ་གཙོ་སྐུ་ཞབས་ཨེ་ཨེ་སི་རཱ་བ་ཌ་ (AS Rawat) གཙོས་སློབ་གྲྭའི་དགེ་ལས་དང་སློབ་ཟུར། དེ་བཞིན་འབྲེལ་ཡོད་མི་སྣ་ཁག་ཅིག་བཅས་ཁྱོན་མི་བརྒྱ་ཕྲག་ཁ་ཤས་ཕེབས་ཡོད་འདུག

མཛད་སྒོའི་སྟེང་བཀའ་ཁྲི་བློ་བཟང་སེང་གེ་མཆོག་གིས་སིམ་ལ་གཏན་སློབ་ནི་བཙན་བྱོལ་བོད་མིའི་སློབ་གྲྭ་ཁག་གི་ནང་ཆེས་ཐོག་མའི་སློབ་གྲྭའི་གྲས་ཡིན་པ་མ་ཟད། སློབ་གྲྭའི་དེའི་ནང་སློབ་མཐར་ཕྱིན་པའི་སློབ་མ་མང་དག་ཅིག་གིས་ད་ཆར་བཙན་བྱོལ་བོད་མིའི་སྒྲིག་འཛུགས་དང་། རྒྱལ་སྤྱིའི་སྡིངས་ཆའི་ཐོག་ལས་དོན་སྣ་ཚོགས་སྒྲུབ་བཞིན་ཡོད་སྐོར་དང་། སྐབས་བཅུ་བཞི་པའི་བཀའ་ཤག་གིས་བོད་མིའི་ཤེས་ཡོན་ཧ་ཅང་གལ་ཆེན་དུ་འཛིན་གྱི་ཡོད་སྟབས། སློབ་གྲྭའི་དགེ་རྒན་དང་ལས་བྱེད་ཚོས་སློབ་མའི་ཤེས་ཡོན་ཐོག་སྔར་ལས་འབད་བརྩོན་གནང་དགོས་པའི་སྐུལ་མ་བཅས་གནང་ཡོད་ལ། དེའི་རྗེས་བཀའ་ཁྲི་མཆོག་གིས་སློབ་གྲྭའི་སློབ་ཕྲུག་ལེགས་གྲས་ཁག་ཅིག་ལ་གཟེངས་རྟགས་ཀྱང་གནང་ཡོད་འདུག

སྐབས་དེར་ཤེས་རིག་དྲུང་ཆེ་དངོས་གྲུབ་རྡོ་རྗེ་ལགས་ཀྱིས། ཁོ་རང་ཉིད་སིམ་ལ་གཏན་སློབ་ཀྱི་སློབ་ཟུར་ཞིག་ཡིན་པའི་ཆ་ནས། སློབ་གྲྭའི་ལྔ་བཅུའི་དུས་དྲན་སྲུང་གཙི་གནང་ཐུབ་པ་དེར་དགའ་སྤྲོ་ཆེན་པོ་སྐྱེས་ཡོད་སྐོར་དང་། སིམ་ལ་གཏན་སློབ་ཀྱི་སློབ་གྲྭའི་གནས་སྟངས་ལ་གཟིགས་ཏེ། བཀའ་ཤག་སྐབས་བཅུ་བཞི་པས་སློབ་གྲྭ་དེར་རོགས་དངུལ་ཧིན་སྒོར་ ༡༢༠༠༠༠ ཙམ་སྤྲད་ཡོད་སྟབས། འཛིན་སྐྱོང་གིོས་སྒོར་མོ་དེ་དག་སློབ་མའི་ཤེས་ཡོན་མཐུན་རྐྱེན་དུ་སྦྱོིར་ཐུབ་པའི་རེ་བ་ཡོད་སྐོར་བརྗོད་འདུག

ཧི་མ་ཅལ་མངའ་སྡེའི་རྒྱལ་སར་གསར་འཛུགས་བྱས་པའི་སིམ་ལ་གཏན་སློབ་ནི། ༸གོང་ས་མཆོག་གི་ལམ་སྟོན་ལྟར་ཕྱི་ལོ་ ༡༩༦༡ ཟླ་ ༣ ཚེས་ ༡ ཉིན་གསར་འཛུགས་གནང་བའི་བཙན་བྱོལ་བོད་མིའི་སློབ་གྲྭ་ཐོག་མ་གཉིས་པ་ཡིན་ལ། སློབ་གྲྭ་དེ་ ༡༩༦༢ ལོའི་ཟླ་ ༥ ཚེས་ ༥ ཉིན་རྒྱ་གར་དབུས་གཞུང་བོད་སློབ་འཛིན་སྐྱོང་འོག་བཅུག་སྟེ། ༢༠༡༢  ཟླ་ ༥ ཚེས་ ༥ བར་ཁྱོན་མི་ལོ་ལྔ་བཅུ་ཧྲིལ་པོ་ཕྱིན་ཡོད་ལ། འདས་པའི་མི་ལོ་༥༠ རིང་སློབ་གྲྭ་དེར་སློབ་མ་གྲངས་ ༦༨༡༦ སློབ་ཐོན་བྱུང་ཡོད་འདུག

སིམ་ལ་གཏན་སློབ་ཀྱི་མི་ལོ་ལྔ་བཅུའི་དུས་དྲན་སྟེང་༸གོང་ས་མཆོག་གིས་ཀྱང་ཆེད་དུ་གསུང་འཕྲིན་ཞིག་བསྩལ་ཏེ། སིམ་ལ་གཏན་སློབ་བཙུགས་པ་དེས་བཙན་བྱོལ་བོད་མིའི་ཤེས་ཡོན་ཐོག་གྲུབ་འབྲས་གང་འཚམ་ཞིག་བྱུང་ཡོད་པ་དང་། གྲུབ་འབྲས་དེ་དག་གཙོ་བོ་རྒྱ་གར་གཞུང་གི་བཀའ་དྲིན་ལ་བརྟེན་ནས་བྱུང་བ་ཞིག་ཡིན་སྐོར་གསུངས་འདུག