ཉེ་ཆར་རྒྱ་ནག་ཡུན་ནན་ཀྲའོ་ཐུང་གྲོང་ཁྱེར་གྱི་དམར་ཤོག་རྒན་རབས་པ་ཁག་ཅིག་གིས་ཡོངས་ཁྱབ་སྙན་ཞུ་ཕུལ་ཏེ། ཀྲུག་ཡུང་ཁཱང་དང་ལིག་ཡོན་ཧྲན་གཉིས་གོ་གནས་ནས་དབབ་དགོས་པའི་འབོད་སྐུལ་ཞུས་འདུག
ཟླ་འདིའི་ཕྱི་ཚེས་ ༤ ཉིན་རྒྱ་ནག་ཡུན་ནན་ཀྲའོ་ཐུང་གྲོང་ཁྱེར་གྱི་དམར་ཤོག་རྒན་རབས་པ་མི་ ༡༦ གིས་རྒྱ་གཞུང་སྲིད་འཛིན་ཧུའུ་ཅིན་ཐའོ་གཙོས་མཐོ་རིམ་དཔོན་རིགས་ཚོར་དགོས་འདུན་དོན་ཚན་གཉིས་ཅན་གྱི་ཡོངས་ཁྱབ་སྙན་ཞུ་ཞིག་ཕུལ་ཏེ། ཀྲུག་ཡུང་ཁཱང་དང་ལིག་ཡོན་ཧྲན་གཉིས་གོ་གནས་ལས་དབབ་སྟེ་ཞིབ་བཤེར་བྱ་དགོས་པ་ནན་སྐུལ་དང་། སྲིད་བློན་ཝུན་གྱིས་སྔ་ཕྱིར་ཐེངས་མང་འབོད་སྐུལ་ཞུས་པ་ལྟར་རྒྱ་ནག་གི་ཆབ་སྲིད་སྒྲོམ་གཞིར་བཅོས་བསྒྱུར་གཏོང་དགོས་སྐོར་བརྗོད་དེ། ཡོངས་ཁྱབ་སྙན་ཞུ་དེའི་སྟེང་ཁོ་ཚོའི་མིང་དང་ཁ་པར་ཨང་གྲངས་བཅས་གསལ་བོར་བཀོད་ཡོད་པ་རེད།
དམར་ཤོག་རྒན་རབས་པ་དེ་ཚོས་བཏོན་པའི་དགོས་འདུན་དོན་ཚན་གཉིས་ནི། གཅིག ཀྲུག་ཡུང་ཁཱང་གི་དབུས་ཆབ་སྲིད་ལྷན་ཁང་གི་རྒྱུན་ལས་དང་ཁྲིམས་སྲིད་ལྷན་ཁང་གི་དྲུང་ཆེ་བཅས་ཀྱི་གོ་གནས་ཕྱིར་བསྡུ་བྱས་ཏེ། རྒྱ་གཞུང་དབུས་རྩ་འཛུགས་ཞིབ་བཤེར་སྡེ་ཁག་གིས་ཁོ་ལ་ཞིབ་བཤེར་བྱ་དགོས་པ། གཉིས། ལིག་ཡོན་ཧྲན་གྱི་རྒྱ་ནག་དབུས་དྲིལ་བསྒྲགས་སྡེ་ཁག་གི་མགོ་གཙོའི་གོ་གནས་ཕྱིར་བསྡུ་བྱས་ཏེ། སྐབས་བཅོ་བརྒྱད་པའི་ཆབ་སྲིད་ལྷན་ཁང་གི་རྒྱུན་ལས་གསར་བའི་ཁྲོད་འདེམས་སྒྲུག་བྱ་རྒྱུར་བཀག་འགོག་བྱ་དགོས་པ་བཅས་རེད།
སྙན་ཞུ་དེའི་ནང་མའོ་ཙེ་ཏུང་གིས་རིག་གསར་ལས་འགུལ་སྤེལ་ཏེ་མི་མང་ཁྲི་ ༣༨༠༠ ལྟོགས་ཤི་ཐེབས་བཅུག་པ་དང་། ཤེས་ལྡན་པ་ཁྲི་ ༣༠༠ ལ་ཆབ་སྲིད་ཞྭ་མོ་གཡོགས་ཏེ་ཉེས་རྡུང་མནར་གཅོད་བཏང་བ་མ་ཟད། ལིག་ཧྲོ་ཆི་དང་ཕིན་ཏིག་ཧའེ། ཕིན་ཀྲིན། ཧི་ལུང་། ལའོ་རེའུ་ཆིན་སོགས་རྒྱ་ནག་གི་གསར་བརྗེ་རྒན་རབས་པ་མང་པོ་དམར་གསོད་བཏང་སྟེ། མའོ་སྒེར་གཅོད་རིང་ལུགས་པའི་དམར་ཤོག་དང་བཟོ་བའི་ཤོག་ཁག་བཙུགས་པ། མའོ་འདས་གྲོངས་སུ་ཕྱིན་རྗེས་ཀྱང་ཁོའི་གདོང་པར་ཐཱེན་ཨན་མཱེན་སྒོ་ཆེན་སྟེང་བཀལ་བ་དང་། ཁོའི་བེམ་པོ་མི་དམངས་ཚོགས་ཁང་ཆེན་མོའི་ནང་དུར་འཇུག་བཤམས་སྟོན་དུ་ཉར་བ་སོགས། མི་སྤྱོད་ལས་འདས་པའི་སྒེར་གཅོད་སྲིད་ཇུས་སྤེལ་པའི་ལོ་རྒྱུས་གསལ་འདོན་བྱས་ཡོད་པ་རེད།
དེ་བཞིན། སྙན་ཞུ་དེའི་ནང་། ཉེ་བའི་ལོ་འགའི་རིང་པའོ་ཞིས་ལའེ་དང་ཀྲུག་ཡུང་ཁཱང་སོགས་ཀྱིས་ལྐོག་གཡོ་ངན་ཇུས་སྣ་ཚོགས་སྒྲིག་སྟེ། ཁྲུང་ཆིན་གྲོང་ཁྱེར་ནི་རིག་གསར་ཐེངས་གཉིས་པ་བསྐྱར་སྤེལ་བྱ་སའི་རྟེན་གཞིར་བཟོས་ཤིང་། འགྲོ་གྲོན་རྒྱ་སྒོར་དུང་ཕྱུར་ ༢༧༠༠ ལྷག་བཏང་ནས་མའོ་ཡི་པར་རིས་དང་དྲིལ་བསྒྲགས་བྱ་འགུལ་སྤེལ་ཏེ། རྒྱལ་ཡོངས་སུ་དམར་པོའི་གླུ་གཞས་ལེན་པ་དང་བརྡ་ཁྱབ་འགྲེམས་པ་སོགས། མའོ་སྒེར་གཅོད་ལམ་ལུགས་དང་མའོ་ལྷ་མཆོད་རིང་ལུགས་ཀྱི་འདུ་ཤེས་སྤེལ་ཐབས་བྱས་པ་མ་ཟད། གསང་བའི་ཐོག་ནས་ཝུན་ཇ་པའོ་དང་ཞིས་ཅིན་ཕེན་གཉིས་ཀྱི་ནག་ཉེས་ཡིག་ཆ་བསྡུ་སྒྲུག་དང་། བརྟན་ལྷིང་ལ་ཁ་གཡར་ཏེ་དམག་ཆས་དབོར་འདྲེན་དང་། དམག་ཤུགས་འགྲེམས་འཇོག དམག་དཔུང་སྟངས་འཛིན་སོགས་བྱས་ཏེ་རྒྱལ་ཁབ་སྲིད་དབང་སྒེར་སྤྱོད་བྱ་འཆར་གྱི་ལྐོག་ཇུས་རྣམས་ཐེར་འདོན་བྱས་ཡོད་པ་རེད།
གསར་འགོད་པ། ཚེ་རིང་རྒྱལ།
གཏམ་བཟང་རྣ་བའི་བུ་རམ་རེད། །གུང་ཁྲན་མགོ་མཇུག་ལོག་པར་ཤོག །བོད་ཀྱི་བསྟན་པ་དར་བར་ཤོག གུང་བདུད་ད་ལྟར་ཤི་བར་ཤོག །