བསྟན་འཛིན་ཤེས་རབ།
བོད་ཀྱི་ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་མ་བུ་གསུམ་ལ་བལ་ཡུལ་གྱི་མཐའ་མཚམས་དམག་མིས་བཅར་རྡུང་བཏང་ཞིང་། ཨ་མ་ལྡོམ་པོ་སྐྱིད་ལ་རྨས་སྐྱོན་ཚབས་ཆེན་ཕོག་སྟེ་གྷོ་ར་པོར་དུ་སྨན་བཅོས་བྱེད་བཞིན་པའི་སྐབས་འདིར། དེ་རིང་ཞོགས་པའི་ཆུ་ཚོད་གཉིས་དང་ཕྱེད་ཙམ་སྟེང་ཚེ་བརྟན་རྡོ་རྗེ་ལགས་ཁོང་ཅག་སྡོད་གནས་ནས་གར་སོང་ཆ་མེད་དུ་གྱུར་འདུག ཞོགས་པའི་ཆུ་ཚོད་ལྔ་བ་ཙམ་ལ་ཁོང་མ་བུ་གསུམ་ལ་སྐྱེལ་མ་ཞུ་མཁན་དག་གིས་ཚོར་ཞིང་། ཁོང་མ་སྨད་དང་བཅས་པས་གང་སར་བཙལ་ཡང་ཚེ་བརྟན་རྡོ་རྗེའི་གྲིབ་མ་ཙམ་ཡང་མ་རྙེད།
ཁོང་ཚོས་ཚེ་བརྟན་རྡོ་རྗེ་ས་མཚམས་ཕྱོགས་སུ་བསྐྱོད་ཡོད་པར་ཚོད་དཔག་གིས། སྐྱེལ་མ་ཞུ་མཁན་གཉིས་རྒྱ་བལ་ས་མཚམས་ཕྱོགས་སུ་རྗེས་འདེད་དུ་བསྐྱོད། འོན་ཀྱང་སྟབས་མ་ལེགས་པར་ལམ་བར་དུ་རླངས་འཁོར་འགྲེ་ལྡོག་ཤོར་བས་དུས་ཐོག་ཏུ་ཁོང་གི་རྗེས་ཆོད་མ་ཐུབ། རང་རེའི་གཞུང་དམངས་ལ་རེ་འབོད་ཞིག་ཞུ་རྒྱུ་ཡོད་པ་ནི། གཞུང་དང་གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་ཡོངས་ཀྱིས་ནུས་ཤུགས་བཏོན་ཏེ། རང་རེའི་བདེན་དོན་འཐབ་རྩོད་པ་ཚེ་བརྟན་རྡོ་རྗེའི་ལམ་བར་ལ་གེགས་དང་རྐྱེན་ངན་མི་འབྱུང་བའི་འབད་བརྩོན་གནང་རྒྱུ་དང་། གློག་བརྙན་བཟོ་བསྐྲུན་པ་ཁོང་གི་རྗེས་འདེད་བྱས་ཏེ། བོད་ཀྱི་དངོས་ཡོད་ཀྱི་དཔའ་བོའི་སྣང་བརྙན་དང་འཐབ་རྩོད་ཀྱི་བརྒྱུད་རིམ་བརྙན་གཟུགས་སུ་ཕབ་ཐུབ་པ་བྱེད་དགོས།
ང་ཚོ་ཚང་མས་ཤེས་གསལ་ལྟར། བོད་མི་རྣམས་ཀྱི་སྟེང་བལ་དམག་ལ་ཁྲིམས་དང་འགྲིག་ལམ་མེད་ཅིང་གདུག་རྩུབ་ཆེ་བ། དེའི་སྟེང་ཞི་བའི་འཐབ་རྩོད་པ་ཁོང་ལ་དཔུང་རོགས་སོགས་ཅི་ཡང་མེད་པར་ཁེར་འགྲོ་གནང་བཞིན་ཡོད་པས། གལ་སྲིད་ང་ཚོའི་བདེན་དོན་བརྩོན་ལེན་པ་ཁོང་ལ་གནས་ཚུལ་ཞིག་ལྷག་པ་ཡིན་ན་དེ་ནི་ང་ཚོའི་བླ་ན་མེད་པའི་གྱོང་གུད་ཅིག་རེད།
དེ་བས་ན། རང་རེའི་གཞུང་འབྲེལ་ཡིན་མིན་གྱི་ཚོགས་སྡེ་ཁག་ཡོངས་ཀྱིས་ནུས་ཤུགས་ཅི་ཡོད་བཏོན་ཏེ། རྒྱལ་སྤྱིའི་སྤྱི་ཚོགས་དང་མཉམ་འབྲེལ་རྒྱལ་ཚོགས། རྒྱ་གར་སྲིད་གཞུང་དང་མི་མང་། ལྷག་དོན་རྒྱ་གར་དང་བལ་ཡུལ་གྱི་འགྲོ་བ་མིའི་ཐོབ་ཐང་ཚོགས་སྡེ་ཁག་ལ་རེ་འབོད་དང་སྙན་ཞུ་ཕུལ་ཏེ་བལ་དམག་གི་གདུག་རྩུབ་ཀྱི་བྱ་སྤྱོད་ལ་ཚོད་འཛིན་བྱེད་དུ་འཇུག་དགོས། འདི་ལྟར་བྱེད་པ་ནི་ཚེ་བརྟན་རྡོ་རྗེ་ཁོང་མི་གཅིག་ལ་རྒྱབ་སྐྱོར་བྱས་པ་ཙམ་མ་ཡིན་པར་རང་རེའི་སྤྱི་དོན་དང་བདེན་དོན་ལ་ནུས་པ་འབུལ་སྟངས་ཤིག་ཡིན།
ད་སྔ་ང་ཚོས་ཤེས་གསལ་ལྟར་ན། རྒྱལ་སྤྱིའི་སྟེང་གི་ཆེས་ཕུལ་དུ་བྱུང་བའི་གློག་བརྙན་གྲགས་ཆེན་རིགས་ནི། དངོས་ཡོད་ལོ་རྒྱུས་ཀྱི་རྒྱབ་ལྗོངས་སྟུག་ཅིང་གསོན་ཉམས་ལྡན་པ་ཞིག་ཡིན་པ་དང་། བདེན་པ་དང་རང་དབང་རྩོད་ལེན་བྱེད་པའི་ལོ་རྒྱུས་ཀྱི་གློག་བརྙན་ནི་རྒྱལ་ཁབ་དང་སྤྱི་ཚོགས་གང་ནས་ཀྱང་ཆེས་དགའ་བསུ་ཐོབ་ཅིང་བསྟོད་བསྔགས་བྱེད་པ་དང་འགྲིམ་རྒྱུག་ཆེ་བ་ཞིག་རེད།
ད་ལྟའི་ང་ཚོའི་ལོ་རྒྱུས་ནང་རང་ཉིད་ཀྱི་ཁྱིམ་དང་ཚེ་སྲོག་ཡོད་ཚད་བློས་བཏང་སྟེ་དཀའ་སྡུག་ཚད་མེད་ཀྱིས་རྒྱུན་རིང་ལ་བདེན་དོན་དང་རང་དབང་བརྩོན་ལེན་བྱེད་པའི་འཐབ་རྩོད་འབྱུང་བཞིན་པ་དག་ནི། གློག་བརྙན་བཟོ་མཁན་ཞིག་ལ་མཚོན་ན་ཆེས་ཐོབ་པར་དཀའ་བའི་གོ་སྐབས་ཤིག་ཡིན་པས། རང་རེའི་གློག་བརྙན་བཟོ་མཁན་རྣམས་ཀྱིས་གོ་སྐབས་འདི་མ་འཆོར་བ་གནང་རོགས།
མཐའ་མར་ཨ་མ་ལྡོམ་པོ་སྐྱིད་ལགས་དང་སྲིང་མོ་ལྷ་མོ་སྐྱིད་རྣམ་གཉིས་ལ་རེ་བ་ཞིག་ཞུ་འདོད་པ་ནི། ཁྱེད་མ་བུ་ཚོའི་ལྷག་བསམ་དང་སྙིང་སྟོབས་ལ་སྙིང་ཐག་པ་ནས་གུས་བརྩི་ཞུ་བ་དང་ཆབས་ཅིག རྒྱལ་ཁབ་དང་མི་རིགས་ཤིག་གི་འཐབ་རྩོད་ནི་དུས་ཡུན་གཅིག་གི་ནང་ལ་འགྲུབ་འགྲོ་བ་ཞིག་མིན་པ་དང་། ང་ཚོ་བོད་ལ་མཚོན་ན་ཆེས་རྩ་ཆེ་བ་ནི་མི་དང་ཚེ་སྲོག་ཡིན་པས། རྣམ་པ་གཉིས་ཀྱིས་ད་ལྟའི་དུས་ཚོད་འདིའི་ནང་ལས་འགུལ་མཚམས་འཇོག་གིས་བུ་མོ་སློབ་གྲྭར་བསྐྱོད་དེ་ཤེས་རིག་སྦྱོང་རྒྱུ་དང་། མ་འོངས་པར་བོད་ཀྱི་བདེན་པའི་འཐབ་རྩོད་ཀྱི་སྣེ་ཁྲིད་མཁན་ཞིག་ཆགས་ཐུབ་པར་འབད་པ་གནང་རོགས་ཞུ་རྒྱུ་ཡིན།
བོད་རྒྱལ་ལོ། །བདེན་དོན་བརྩོན་ལེན་པ་མ་བུ་གསུམ་རྒྱལ་ལོ། །
༢༠༡༢།༠༥།༡༤ ཞོགས་པར།
ཚེ་རྡོར་གྱི་ལས་འགུལ་དེ་ཆབ་སྲིད་པ་ཁ་ཤས་ཀྱི་ལག་འོག་ལ་ཤོར་ནས་སྟག་གི་མགོ་བོ་དེ་་་་་་དེ་རིང་བྱི་བའི་རྔ་མ་ལྟར་ཆགས་སོང་ཨ་ཁ་ཁ།
བསྟན་འཛིན་ཤེས་རབ་ལགས་ཀྱི་གཏམ་འདི་ཧ་ཅང་གི་རིན་ཐང་ལྡན། བལ་དམག་སྡུག་རྩུབ་ཅན་གྱིས་རྒྱལ་ཞེན་པ་འདིའི་སྐུ་སྲོག་ལ་ཉེན་ཁ་བཟོ་ངེས་པས་ཅིས་ཀྱང་ང་ཚོས་སྲུང་སྐྱོབ་བྱེད་ཐབས་ལྟ་དགོས། མ་དང་བུ་མོ་གཉིས་ཚོགས་སྡེ་ཁག་དང་གཞུང་དམངས་ཚང་མས་ལྟ་སྐྱོང་གནང་དགོས། དེ་དང་ཆབ་གཅིག་ཁོང་གི་ཤ་ནས་ཆད་པའི་ཕྲུ་གུ་གཉིས་ཀྱི་མདུན་ལམ་ལ་འགན་སྲུང་གང་ཐུབ་ལྟ་དགོས། གལ་སྲིད་བོད་རིགས་ལྟ་བུ་ཁོའི་མཉམ་དུ་འགྲོ་མི་ཐུབ་འདྲ་བྱུང་ན་བལ་པོའི་མི་སེར་གླས་ཏེ་ཁོའི་གནས་སྟངས་རྒྱུས་ལོན་ཐབས་བྱེད་དགོས། གང་ལྟར་རྒྱལ་ཞེན་པ་འདི་བོར་བརླག་མ་སོང་བའི་ཐབས་ཤེས་གང་ཐུབ་གནང་དགོས། གལ་སྲིད་བོར་བརླག་ཏུ་སོང་ན་ས་ཕྱོགས་གང་དུ་འཚོལ། ཚུལ་ཇི་ལྟར་འཚོལ། ཁ་མཆུ་སུ་ལ་རྒྱག ཆུ་མ་ཡོང་གོང་ནས་རྐ། རྐྱེན་མ་ཡོང་གོང་ནས་རིམ་གྲོ་ཟེར་བ་ལྟར་ཅིས་ཀྱང་གྲ་སྒྲིག་གང་ལེགས་གནང་རོགས།
བསྟན་འཛིན་ཤེས་རབ་ལགས་ཀྱིས་བཏོན་པའི་བསམ་ཚུལ་དེ་ནི་དངོས་ནས་ཡག་པོ་འདུག འོན་ཀྱང་ཡིད་སྐྱོ་དགོས་པ་ཞིག་ལ་ བོད་ནང་གི་གནས་ཚུལ་གསར་བ་རེ་མ་བྱུང་བར་དུ་རང་རེའི་གཞུང་དང་ཚོགས་པ་ཁག་གིས་རྒྱབ་སྐྱོར་ཡོད་མེད་དང་། འགྲིག་མ་འགྲིག་བཤད་པ་ལས་དོན་དངོས་སུ་ལག་བསྟར་བྱེད་རྒྱུ་ནི་ཉིན་མོའི་སྐར་མ་བཞིན་དཀོན། བྱས་ཙང་ད་རེའི་སྔར་བྱུང་མ་མྱོངས་བའི་གླིང་ཚའི་དཔའ་བོ་མ་བུ་གསུམ་ལ་རྒྱབ་སྐྱོར་བྱེད་རྒྱུ་ནི་རང་རེའི་བོད་མི་ས་ཡ་དྲུག་གི་བདེ་སྡུག་མཚོན་པས་ངེས་པར་ཏུ་རྒྱབ་སྐྱོར་ཡོད་པར་ཞུ
ཁྱོད་ཀྱི་ཨ་མས་རྒྱ་ནག་གི་སྲིད་འཛིན་ཧུའུ་ཅིན་ཐོ་ཡི་སེམས་དེ་ལྕགས་དང་རྡོ་ཡིས་གྲུབ་མེད་ན་ཞེས་བཤད་པ་ལྟར་ཁྱོད་ཀྱི་སེམས་དེ་ཡང་ལྕགས་དང་རྡོ་ཡིས་གྲུབ་མེད་ན་ལོ་ན་ལྔ་བཅུ་རྒལ་བའི་དྲིན་ཆེན་མ་ལོ་དང་སྲིང་མོ་གཉིས་ཡང་མ་བསྐྱུར་རོགས་གནང་།
མཉམ་དུ་ཁྲིད་རོགས་གནང་། ཁྱོད་ཀྱི་འཆི་གསོན་གྱི་མཐའ་མ་ཟད་བར་དང་འཐབ་རྩོད་ཀྱི་མཇུག་མ་རྫོགས་བར་ཨ་མ་དང་སྲིང་མོ་མཉམ་དུ་ཁྲིད་རོགས།
གླིང་ཚ་ཚེ་བརྟན་རྡོ་རྗེའི་སེམས་ཁམས་སུ་ཆེས་བཟོད་མི་ཐུབ་པ་དང་འགོག་མི་ཐུབ་པའི་ཚོར་བ་རྣོན་པོ་ཞིག་གིས་རང་ཉིད་ཀྱིས་བོད་མི་རིགས་དང་རྒྱལ་ཁབ་ལ་བཅིངས་བའི་བརྩེ་སེམས་དེ་བོད་པ་ཚོའི་མིག་མདུན་དུ་བཤམས་པ་རེད།
འོན་ཀྱང་འཇིག་རྟེན་གྱི་ཨ་མའི་ཉིན་མོར་དེར་ཁོས་ཅིའི་ཕྱིར་རང་ཉིད་ཀྱི་དྲིན་ཆེན་ཨ་མ་དེ་བསྐྱུར་ནས་གང་ལ་ཕྱིན་པ་རེད།
ཚེ་རྡོར་ལགས་ཁྱོད་ཀྱི་སེམས་ཁམས་དེ་དྭངས་བོ་ཞིག་དང་ཁྱོའི་སེམས་ངོག་ནས་ཁྱོད་ཀྱི་ཨ་མའི་སྡུག་བསྔལ་དེ་ཚོར་གྱིས་ཡོད་ན་ལན་ཅིག་ཕྱིར་ཕེབས་རོགས་གནང་། བུ་རྒོད་པོ། བྲེལ་བ་མ་བྱེད་རོགས། ཁྱོད་ཀྱིས་འཐབ་རྩོད་དེ་མུ་མཐུད་ནས་སྤེལ་ཆོག། ཨ་མ་དང་སྲིང་མོའི་ཕྱོགས་སུ་ཡང་ལན་གཅིག་གཟིགས་རོགས།