དམངས་གཙོའི་ལྷན་ཚོགས།

ཁ་སང་ཕྱི་ཚེས་ ༡༥ ཉིན་ཝ་ཤིན་ཊོན་དུ་རྒྱ་ནག་དང་ཁུ་བྷ། སེ་རི་ཡཱ། འབར་མ་སོགས་ཚུད་པའི་འཛམ་གླིང་ཡུལ་གྲུ་ཁག་གི་ཤེས་ཡོན་པ་དང་དམངས་གཙོ་དོན་གཉེར་པ་ཁག་ཅིག་ལྷན་འཛོམས་ཀྱིས། འཛམ་གླིང་ནང་དམངས་གཙོ་ལེགས་བཅོས་བྱ་ཕྱོགས་ཐད་བགྲོ་གླེང་ལྷན་ཚོགས་ཞིག་ཚོགས་ཡོད་ཅིང་། ལྷན་ཚོགས་ཐོག་ཨ་རིའི་སྲིད་འཛིན་ཟུར་པ་བྷུ་ཤཱི་ (Gorge W. Bush) ཡིས་ཨུ་རུ་སུ་དམར་པོའི་གཞུང་འཐོར་བཤིག་ཏུ་ཕྱིན་པའི་རྗེས་ནས་འཛམ་གླིང་ནང་དམངས་གཙོ་བཅོས་སྒྱུར་གྱི་རླབས་རྒྱུན་ཆེ་རུ་ཕྱིན་པ་དང་། འདས་པའི་ལོ་འགའི་རིང་ནས་བཟུང་དཀྱིལ་ཤར་ཡུལ་གྲུ་དང་ཨ་ཧྥི་རི་ཀ  ཨེ་ཤ་ཡ་བཅས་ཀྱི་ནང་དམངས་གཙོ་བཅོས་སྒྱུར་གྱི་ཚ་རླབས་ཆེ་ཆེར་འཕྱུར་བཞིན་པ་བཅས་ནི། སྲིད་དབང་སྒེར་སྤྱོད་པའི་ལས་དབང་ལ་མཐའ་ཡོད་པ་དང་། གཉའ་གནོན་མྱོང་མཁན་མང་ཚོགས་ཀྱི་བཟོད་སྒོམ་ལ་ཚད་ཡོད་པ་བཅས་ཀྱི་ཆོས་ཉིད་ལས་བྱུང་བ་ཞིག་ཡིན་སྐོར་བརྗོད་ཡོད་པ་མ་ཟད། ཁོང་གིས་ “ ཨ་རིས་གསར་བརྗེ་མང་ཚོགས་དང་མགོ་ཁྲིད་ཚོར་རྒྱབ་སྐྱོར་གྱི་རྣམ་འགྱུར་སྟོན་གྱི་ཡོད་ཀྱང་། སྐད་ཆ་དྲང་པོར་བཤད་ན། འདི་ལྟ་བུའི་ཨ་རིའི་ཕྱི་འབྲེལ་སྲིད་ཇུས་དེ་ཕུགས་རྒྱང་རིང་པོའི་ཐོག་བཤད་ན་ཁ་ཞེ་གཉིས་མེད་ཅིག་མ་རེད་ ” ཅེས་སོ་སོའི་འཐད་རྩོད་ལ་རང་ཉིད་ཀྱིས་ནུས་ཤུགས་འདོན་དགོས་པའི་སྐུལ་མ་བཏང་ཡོད་འདུག

ཉིན་དེའི་ལྷན་ཚོགས་སྟེང་ ༡༩༨༩ ལོའི་རྒྱ་ནག་གི་དྲུག་བཞིའི་དོན་རྐྱེན་ཁྲོད་མཉམ་ཞུགས་བྱེད་མཁན་ (སྐབས་དེའི་སློབ་མ) རྒྱ་རིགས་དམངས་གཙོ་དོན་གཉེར་བ་ཤཱེ་ཆུག་ཧྥུ་ (Xiqiu Fu)  དང་། ཁུ་བྷ་ (Cuba) དམར་པོའི་གཞུང་གིས་འཛིན་བཟུང་བཙོན་འཇུག་བྱས་མྱོང་པའི་དམངས་གཙོ་དོན་གཉེར་བ་ནོར་མན་ཌོ་ (Normando Hernandez) བཅས་དང་། དེ་བཞིན། སེ་རི་ཡའི་སྲིད་དབང་སྒེར་སྤྱོད་པ་བྷག་ཤར་ལ་ཐེར་འདོན་བྱས་པར་གཞུང་གིས་ ༢༠༠༥ ལོར་ཕྱིར་ཕུད་བཏང་པའི་དམངས་གཙོ་དོན་གཉེར་པ་ཨམ་མར་ (Ammar Abdulhamid) སོགས་མཉམ་ཞུགས་ཀྱིས་བགྲོ་གླེང་བྱས་ཡོད་པ་མ་ཟད།  འབར་མའི་དམངས་གཙོ་དོན་གཉེར་བ་ལྕམ་ཨང་སན་སུའུ་ཀེ་ཡིས་སི་ཀེབ་ (skype) བརྒྱུད་དེ་ “ ཁྱེད་ཚོ་བསླེབ་འདོད་ས་དེར་བསླེབ་ངེས་རེད། མུ་མཐུད་མདུད་བསྐྱོད་བྱོས་ ” ཞེས་བརྗོད་ཡོད་འདུག

གསར་འགོད་པ། བནྡེ་སྐྱབས།