དེ་རིང་གངས་སྐྱིད་སྤྱི་ཐབ་ཚོགས་ཁང་དུ་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གིས་མཐོ་སློབ་འགྲིམ་བཞིན་པའི་བོད་རིགས་སློབ་མ་ཚོར་༼ དེང་གི་ན་གཞོན་དང་མ་འོངས་མགོ་ཁྲིད། ༽ཅེས་པའི་ཉིན་དགུའི་རིང་གི་ཟབ་སྦྱོང་ཐེངས་བཅུ་གཅིག་པ་མགོ་འཛུགས་བྱས་ཡོད།
ཐེངས་འདིའི་བོད་རིགས་མཐོ་རིམ་སློབ་མའི་ཟབ་སྦྱོང་ཁྲོད་ས་གནས་ ༩ མཐོ་སློབ་དང་གཙུག་ལག་སློབ་གྲྭ་ཁག་གི་སློབ་མ་ ༦༠ ལྷག་ཅིག་མཉམ་ཞུགས་བྱས་ཡོད་པ་དང་། ཟབ་སྦྱོང་སྐབས་བཙན་བྱོལ་བོད་མིའི་སྒྲིག་འཛུགས་ཀྱི་ལས་ཁུངས་ཁག་སོ་སོར་སློབ་མ་རྣམས་ལྟ་སྐོར་དུ་ཁྲིད་དེ་ལས་དོན་རིགས་ངོ་སྤྲོད། དེ་བཞིན་མི་སྣ་ཁག་གདན་ཞུས་ཀྱིས་གནད་དོན་འདྲ་མིན་ཐོག་གཏམ་བཤད་དང་དྲི་བ་དྲིས་ལན་སོགས་བརྒྱུད། རྒྱ་གར་གྱི་མཐོ་སློབ་འགྲིམ་བཞིན་པའི་བོད་རིགས་སློབ་མ་ཚོར་བཙན་བྱོལ་བོད་མིའི་སྒྲིག་འཛུགས་དང་ལས་ཁུངས་ཁག བོད་ནང་གི་གནས་སྟངས། རྒྱལ་སྤྱིའི་སྟེང་གི་བོད་ཀྱི་གནས་བབ་སོགས་ཀྱི་སྐོར་ལ་རྒྱུས་ལོན་དང་ཤེས་རྟོགས་ཡོང་ཐབས་བྱ་རྒྱུ་དེ་རེད།
ཟབ་སྦྱོང་དབུ་འབྱེད་ཐོག་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་ངེས་སྟོན་པ་སྤྱི་འཐུས་ཆོས་སྐྱོང་དབང་ཕྱུག་ལགས་ཀྱིས། བོད་ཀྱི་སྲིད་བྱུས་ཉམས་ཞིབ་ཁང་གི་ལས་དོན་བྱེད་ཕྱོགས་དང་། བཙན་བྱོལ་བོད་མིའི་སྤྱི་ཚོགས་ཁྲོད་དམངས་གཙོའི་ལྟ་གྲུབ་དང་སྒྲིག་འཛུགས། ལམ་ལུགས་བཅས་གོང་འཕེར་གཏོང་རྒྱུའི་དམིགས་ཡུལ་འོག ལས་གཞི་རིགས་སྣ་ཚོགས་སྤེལ་བཞིན་པ་སོགས་ངོ་སྤྲོད་དང་། མཐོ་སློབ་ཁག་ཏུ་སྐྱོད་བཞིན་པའི་སློབ་མ་རྣམས་ཀྱིས་སློབ་ཚན་འདྲ་མིན་སྟེང་སློབ་སྦྱོང་བྱེད་ཀྱི་ཡོད་སྟབས། གོ་སྐབས་འདི་བརྒྱུད་བཙན་བྱོལ་བོད་མིའི་སྒྲིག་འཛུགས་ཀྱི་ལས་ཁུངས་ཁག་དང་སྤྱི་ཚོགས་ནང་གི་ལས་སྣེ་གང་འདྲ་ཞིག་གི་སྟེང་སོ་སོས་ལས་དོན་བསྒྲུབ་རྒྱུར་ངོ་འཕྲོད་པའི་སྒོ་ནས་མུ་མཐུད་སློབ་སྦྱོང་བྱ་རྒྱུ། གོ་སྒྲིག་པའི་ངོས་ནས་ཟབ་སྦྱོང་འདི་ཧ་ཅང་གལ་ཆེན་པོར་རྩི་བཞིན་ཡོད་པ་ནང་བཞིན་སློབ་མ་ཚོས་ཀྱང་གོ་སྐབས་དམ་འཛིན་དང་དོ་སྣང་ཆེན་པོ་བྱ་དགོས་པ། ཕྱི་ལོགས་ནས་མང་པོ་ཞིག་གིས་ལྟ་བསྡད་ཡོད་སྟབས། སློབ་མ་ཚོས་རང་ཉིད་བོད་མི་ཞིག་ཡིན་པ་དང་། བཙན་བྱོལ་ནང་འཚར་ལོངས་བྱུང་མཁན་ཡིན་པ། མཐོ་སློབ་འགྲིམ་བཞིན་པའི་བོད་རིགས་སློབ་མ་རྐྱང་ཡིན་པ་བཅས་སེམས་ལ་བཟུང་སྟེ། མཐའ་ན་གོན་པ་གྱོན་སྟངས་ནས་སོ་སོའི་བྱ་སྤྱོད་ལ་གཟབ་ནན་བྱ་རྒྱུ་བཅས་ཀྱི་སྐོར་ལ་ལམ་སྟོན་དང་རེ་སྐུལ་གནང་སོང་།
དེ་རིང་གི་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་ཕྱོགས་མཐའ་ཁག་ནས་ཟབ་སྦྱོང་དུ་ཡོང་མཁན་སློབ་མ་ཚོར། ༡༩༥༩ ལོ་དང་དེའི་རྗེས། བཙན་བྱོལ་དུ་བསླེབས་རྗེས་ཀྱི་འགྱུར་པ་ཅི་ཕྱིན། བོད་ཀྱི་སྐད་ཡིག་རིགས་གཞུང་། རྒྱལ་སྤྱིའི་ནང་གི་བོད་ཀྱི་གནས་བབ། རྒྱ་ནག་གི་གནས་སྟངས། ད་ལྟའི་བོད་ནང་གི་ཛ་དྲག་གནས་སྟངས་སོགས་ཤེས་རྟོགས་བྱ་རྒྱུ། སློབ་མ་རྣམས་ཀྱིས་སོ་སོའི་སྤྱོད་ལམ་དང་ཤེས་ཡོན་གཉིས་ཡག་པོ་བཟོས་ཐོག སྤྱི་ཚོགས་ལ་དགོས་ཕན་བསྒྲུབ་ཐུབ་པ་ཞིག་གི་སྟེང་གཞན་གྱིས་བརྩི་བཀུར་འཐོབ་པའི་མི་ཞིག་བྱ་རྒྱུ། མི་དེ་འདྲ་ཞིག་ཡོང་རྒྱུར་སྤྱི་ཚོགས་ནང་སོ་སོར་ཡིད་ཆེས་འཕེལ་ཐུབ་པ་བཟོ་རྒྱུ་དང་། ཡིད་ཆེས་ཟེར་པ་དེ་ཉིན་གཅིག་གཉིས་ནང་བསྐྲུན་ཐུབ་པ་ཞིག་མིན་སྟབས་དུས་རྒྱུན་ནས་གཟབ་ནན་བྱ་དགོས་པ། བོད་ནང་གི་ཛ་དྲག་གནས་སྟངས་དེར་སེམས་ཁུར་གྱིས་སློབ་མོ་ཚོས་སློབ་སྦྱོང་ལ་འགན་འཁུར་དགོས་རྒྱུ། ལྷག་པར་དུ་བོད་པའི་སྐད་ཡིག་གི་ཤེས་ཚད་ཡར་རྒྱས་དང་རིག་གཞུང་ལ་དོ་སྣང་བྱ་རྒྱུ་སོགས་ཀྱི་ཐད་གསུང་བཤད་གནང་སོང་།
གནས་ཚུལ་རྒྱས་པ་ཚེས་ ༣༡ ཉིན་གྱི་བོད་ཀྱི་དུས་བབ་ཚགས་ཤོག་སྟེང་འདོན་རྒྱུ་ཡིན།
གསར་འགོད་པ། བནྡེ་སྐྱབས།
