རྒྱ་གཞུང་གིས་ཁམས་ལི་ཐང་ས་ཁུལ་གྱི་བོད་མི་སྒྱུ་རྩལ་བ་ཨ་ངྷ་ལགས་ལ་མཚོན་ཆ་ལྐོག་ཉར་བྱས་ཡོད་པའི་ཉེས་མིང་འོག་ལོ་གསུམ་གྱི་ཁྲིམས་ཐག་བཅད་འདུག
དགེ་ལུགས་སྤྱི་འཐུས་ཨ་ཀྲུག་ཚེ་བརྟན་ལགས་ཀྱིས་གསར་ལམ་དུ་གནས་ཚུལ་མཁོ་སྤྲོད་བྱས་པ་ལྟར་ན། འདི་ལོའི་ཕྱི་ཟླ་ཕྱི་ཟླ་ ༢ པའི་ནང་རྒྱ་གཞུང་དམིགས་བསལ་དྲག་ཆས་ཉེན་རྟོག་པས་ཁམས་ལི་ཐང་ས་ཁུལ་གྱི་ཁ་ཤགས་སྒྱུ་རྩལ་པ་ཨ་ངྷ་ལགས་འཛིན་བཟུང་བཙན་འཁྲིད་བྱས་ཏེ་གར་སོང་ཆ་མེད་དུ་གྱུར་ཡོད་པ་ལྟར། ཟླ་སྔོན་མའི་ཕྱི་ཚེས་ ༢༩ ཉིན་དཀར་མཛེས་བོད་རིགས་རང་སྐྱོང་ཁུལ་ཐོག་ལི་ཐང་རྫོང་མི་དམངས་ཁྲིམས་ཁང་གིས་ཁོང་གི་ནང་མིར་བརྡ་ཡིག་ཅིག་འབྱོར་ཡོད་པའི་ནང་། ཨ་ངྷ་ལགས་ལ་མཚོན་ཆ་ལྐོག་ཉར་བྱས་པའི་ཉེས་མིང་འོག་ལོ་ ༣ གྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པའི་སྐོར་བཀོད་ཡོད་འདུག
སྤྱི་འཐུས་ཨ་ཀྲུག་ཚེ་བརྟན་ལགས་ཀྱིས་བརྗོད་དོན་ལྟར་ན། འདི་ལོའི་ཕྱི་ཟླ་ ༢ པའི་ནང་ཁོང་འཛིན་བཟུང་བྱས་རྗེས། ཁོང་གི་ནང་མི་ལི་ཐང་རྫོང་ཉེན་རྟོག་ལས་ཁུངས་སུ་ཕྱིན་སྟེ། ཁོང་འཛིན་བཟུང་བྱེད་དགོས་པའི་རྒྱུ་མཚན་དང་ནག་ཉེས་ཅི་ཡིན་དྲིས་སྐབས། ཉེན་རྟོག་པས་ཨ་ངྷ་ལགས་ལ་ཆབ་སྲིད་ཀྱི་ནག་ཉེས་ཡོད་ཚུལ་དང་། ཁོང་འཛིན་བཟུང་བྱེད་རྒྱུ་དེ་གོང་རིམ་གྱི་བཀའ་ཡིན་ཚུལ་བརྗོད་ཡོད་འདུག
ཉེ་སྔོན་ནང་མིར་ཁྲིམས་གཅོད་བརྡ་ཡིག་འབྱོར་རྗེས་གཉེན་འབྲེལ་ཁག་ཅིག་ལི་ཐང་རྫོང་དུ་ཡང་བསྐྱར་ཐུག་འཕྲད་དུ་ཕྱིན་སྐབས། ཨ་ངྷ་ལགས་ཀྱིས་ཁོང་གིས་མེ་མདའ་དང་འགད་རྫས་ལྐོག་ཉར་བྱས་མེད་ཀྱང་། ཉེན་རྟོག་མི་སྣས་ཁོང་ལ་གཅར་རྡུང་མནར་གཅོད་ཚད་མེད་བཏང་སྟེ། ངོས་ལེན་དང་མཚན་རྟགས་མི་བཀོད་ཐབས་མེད་བྱུང་ཡོད་སྐོར་བརྗོད་ཡོད་པ་མ་ཟད། བཙོན་ཁང་ནང་ཁོང་ལ་གཅར་རྡུང་ཚད་མེད་བཏང་སྟེ། གཟུགས་པོའི་གནས་སྟངས་ཧ་ཅང་སྐྱོ་བོ་ཆགས་ཡོད་འདུག
གསར་འགོད་པ། དོན་གོ
ཇི་འདྲའི་རྒྱ་ངན་ཚང་འདི། ད་འདུག་གི་ཞིག་མི་འཇུག་གི
རྒྱ་ནག་གི་གཡོ་སྒྱུ་དེ་སྔར་ནས་ད་བར་རྒྱུན་ལྡན་གྱི་བཙན་ཤེད་ཀྱི་ཆབ་སྲིད་ཅིག་རེད། ཁག་འདྲ་མིན་ལ་བཞག་སྟེ་པཎ་ཆེན་རིན་པོ་ཆེ་དང་ཨ་ལགས་གུང་ཐང་རིན་པོ་ཆེ་གསེར་རྟ་མཁན་པོ་འཇིགས་མེད་ཕུན་ཚོགས་གཙོས་བོད་མི་འབུམ་ཕྲག་མང་པོ་ས་འོག་ལ་བསྐྱལ་ཚར་བ་རེད། ད་དུང་ཡང་མིག་མཐོང་ལག་ཟིན་དུ་ཡོད་པའི་སྤྲུལ་སྐུ་བསྟན་འཛིན་བདེ་ལེགས་སྐུ་འཁོར་དང་གཙོས་པའི་བོད་མི་མི་ཉུང་བར་ཉེས་མེད་ཉེས་འཛུགས་དང་སྐྱོན་མེད་སྐྱོན་འཛུགས་བྱས་དང་བྱེད་མུས་རེད། དེའི་སྐོར་ལ་དྲང་པོར་བཤད་ཕོད་མ་ཕོད་ཀྱི་ཁྱད་པ་ཙམ་ལས་མགོ་རག་སྡེ་དང་བྱམས་པ་ཕུན་ཚོགས་ནས་བཟུང་བོད་མི་སྤྱི་བོ་གནམ་བསྟན་ཚང་མས་མ་ཤེས་མ་རྟོགས་མཁན་གཅིག་ཀྱང་མེད།