ས་མཚམས་གཙང་མ་འབྱེད་དགོས།

གནས་ཚུལ་བཏང་འབྱོར་བྱུང་བ་ལྟར་ན། དབུ་མའི་ལམ་མི་མང་ལས་འགུལ་ཁང་གི་ཚོགས་ཆེན་ཐེངས་གསུམ་པའི་གྲོས་ཆོད་ནང་། བཙན་བྱོལ་བོད་མིའི་ལས་ཟུར་དང་ལས་ཐོག་གནད་ཡོད་མི་སྣ་སྐོར་ཞིག་ས་གནས་ཁག་ནང་ཆེད་དུ་གདན་འདྲེན་གྱིས་མི་མང་ལ་དབུ་མའི་ལམ་གྱི་གོ་རྟོགས་སྤེལ་རྒྱུ་གསལ་བ་ལྟར། ཟླ་འདིའི་ཕྱི་ཚེས་ ༡༧ ཉིན་ནས་མགོ་འཛུགས་ཀྱིས་བཀའ་ཟུར་སྤྱི་འཐུས་ཐུབ་བསྟན་ལུང་རིགས་ལགས་ས་གནས་ཁག་ཅིག་ནང་སྐོར་སྐྱོད་གནང་བཞིན་ཡོད་འདུག་ལ། ཕྱི་ཚེས་ ༢༠ ཉིན་མན་སྤར་ཕན་བདེ་གླིང་གཞིས་ཆགས་སུ་འབྱོར་ཏེ། ས་གནས་གྲོས་ཚོགས་འཐུས་མིའི་ཚོགས་ཁང་དུ་སེར་སྐྱ་མི་མང་ལ་བཀའ་སློབ་གནང་ཡོད་འདུག

སྐབས་དེར་བཀའ་ཟུར་དང་མདོ་སྨད་སྤྱི་འཐུས་ལས་ཐོག་ཐུབ་བསྟན་ལུང་རིགས་ལགས་ཀྱིས་དབུ་མའི་ལམ་གྱི་ནང་དོན་ཁག་གི་ཐད་གསལ་བཤད་དཔེ་མཚོན་དང་བཅས་བོད་ཀྱི་དོན་ལྔ་སྣོད་དྲུག་ལྟ་བུའི་སྐད་ཡིག་རིག་གནས་སོགས་ཉམས་པ་ཡིན་ན། ང་ཚོའི་འཐབ་རྩོད་དང་ང་ཚོ་འཇིག་རྟེན་འདིར་གསོན་གནས་བྱེད་པ་ལའང་ཕན་རླབས་མེད་སྟབས། དབུ་མའི་ལམ་ནས་དངོས་ཡོད་དང་མཐུན་པའི་བོད་ཀྱི་འཚོ་གནས་ཐག་གཅོད་བྱ་ཕྱོགས་རྒྱ་ནག་གཞུང་ལ་ཕུལ་བའི་རང་སྐྱོང་གི་༼ བསམ་འཆར ༽ནང་དུའང་གནད་དོན་དེ་རྣམས་གསལ་ཞིང་གསལ་བ་འཁོད་ཡོད་པ་སོགས་གསུངས།

བཀའ་ཟུར་མཆོག་གིས་གསུངས་དོན” ང་ཚོ་བཀའ་ཤག་སྐབས་བཅུ་གཉིས་དང་བཅུ་གསུམ་པའི་སྐབས་སུ་གཞུང་འབྲེལ་མ་ཡིན་པའི་ཚོགས་པའི་ལས་དོན་དང་ཚོགས་འདུ་ལ་འགྲོ་ཡི་མིན་ཞེས་ཐག་བཅད་པ་རེད། དབུ་མའི་ལམ་མི་མང་ལས་འགུལ་ཁང་གི་ཚོགས་འདུ་ལ་ཤོག་གསུངས་དུས་བཅར་བསྡད་པ་རེད། དེ་ལྟ་བུའི་སྲིད་བྱུས་འཛིན་དགོས་པའི་རྒྱུ་མཚན་གང་རེད་ཟེར་ན། དབུ་མའི་ལམ་མི་མང་ལས་འགུལ་ཁང་གི་དམིགས་ཡུལ་དང་ལས་དོན་ཚང་མ་གཞུང་དང་གཅིག་པ་ཆགས་བསྡད་ཡོད་པ་རེད། དེ་མིན་ལངས་ཕྱོགས་ཁ་ཁ་ཡིན་པ་དེ་འདྲ་ལ་འགྲོ་ཡི་ཡོད་པ་མ་རེད། ལངས་ཕྱོགས་ཁ་ཁ་ཆགས་ཀྱི་ཡོད་པ་རེད། ལངས་ཕྱོགས་ཁ་ཁ་ཡིན་དུས་བཅར་པ་ཡིན་ན་ཉ་ཉུང་མཉམ་བསྲེས་ཆགས་ཀྱི་ཡོད་སྟབས། དེར་ལངས་ཕྱོགས་དང་ལྟ་བ་ལོགས་སུ་མེད་པ་ལྟ་བུ་ཞིག་རང་བཞིན་གྱིས་ངོས་འཛིན་གནང་གི་རེད། དེ་ཡིན་དུས་ལངས་ཕྱོགས་ལྟ་བའི་ས་མཚམས་གཙང་མ་འབྱེད་ཐུབ་པ། གཉིས་ནས་རྒྱ་ནག་གཞུང་ནས་བལྟ་བའི་སྐབས་སུའང་གཙང་མ་ཞིག་མཐོང་ཐུབ་པ། ལབ་ཡ་མེད་པ་ཞིག་ཆགས་དགོས་ཀྱི་ཡོད་པ་རེད། ད་ལྟ་རྒྱ་ནག་གཞུང་གིས་བལྟ་སྐབས་ཉ་ཉུང་མཉམ་བསྲེས་ལྟ་བུར་མཐོང་གི་ཡོད་སྟབས། ༧གོང་ས་མཆོག་གིས་ཞལ་ཞེ་གཉིས་མེད་ཀྱིས་མིང་དོན་མཚུངས་པའི་རང་སྐྱོང་རྩོད་ཀྱི་ཡོད་པ་དང། གཞུང་ནས་རྒྱ་ནག་གཞུང་ལ་༼བསམ་འཆར ༽སྤྲད་པ་ཡིན་ནའང་། ད་དུང་ཕྱེད་རང་བཙན་དང་རྣམ་པ་འགྱུར་བའི་རང་བཙན་སོགས་ལབ་བསྡད་ཡོད་པ་རེད། དེར་བརྟེན། དབུ་མའི་ལམ་ལ་ཡིད་ཆེས་བརྟན་པོ་ཡོད་མཁན་ཞིག་ཡིན་ན་རང་རང་སོ་སོ་མཉམ་ཞུགས་གནང་སའི་ལས་འགུལ་རྣམས་མ་ནོར་བ་བྱ་དགོས་པ་རེད“ཅེས་སོགས་གསུངས་ཡོད་འདུག  

མཇུག་མཐར། དབུ་མའི་ལམ་ལས་འགུལ་ཁང་གི་རིག་གཞུང་འགན་འཛིན་བློ་བཟང་ཆོས་འབྱོར་གྱིས་གསུང་རྒྱུར” ང་ཚོ་དབུ་མའི་ལམ་མི་མང་ལས་འགུལ་ཁང་གི་དམིགས་ཡུལ་དབུ་མའི་ལམ་ལ་རྒྱབ་སྐྱོར་བྱེད་མཁན་གྱི་གྲངས་ཀ་མང་དུ་གཏོང་བ་སོགས་ཡེ་ཤུའི་ཆོས་སྤེལ་མཁན་ཚོའི་ལས་དོན་དེ་འདྲ་མིན་པར། དབུ་མའི་ལམ་གྱིས་འཇིག་རྟེན་སྤྱི་ཡོངས་དང་བོད་ཀྱི་རྩ་དོན་ཐད་ནུས་བ་འདོན་ཕྱོགས་རང་དབང་གིས་ཤེས་རྟོགས་ཚད་མཐོར་སླེབས་པ་ཡིན་ན། མི་མང་ལ་ད་དུང་སྔར་ལས་ལྷག་པའི་ཡང་དག་པའི་ལངས་ཕྱོགས་འཛིན་རྒྱུའི་རང་ཚུགས་བརྟན་པོར་ཆགས་ངེས་པས། མི་མང་གོ་རྟོགས་ཐད་ལ་སྲི་ཞུ་སྒྲུབ་རྒྱུ་དེ་ཡིན་“ཞེས་གསུངས་བྱུང་།  

ཉིན་རྒྱབ་མན་སྤར་ས་གནས་གཞིས་མགོ་དང་གཞིས་ལས་ཁང་གི་ལས་བྱེད། ས་གནས་འཐུས་ཚོགས་ཀྱི་ཚོགས་གཙོ་དང་ཚོགས་མི་གཞན་ཡང་བརྒྱ་དཔོན་བཅས་གནད་ཡོད་མི་སྣར་ཟུར་མཇལ་གྱིས་ད་ལྟའི་བོད་ཀྱི་གནས་སྟངས་དང་། དབུ་མའི་ལམ་ནས་བོད་ཀྱི་བདེན་མཐའ་སེལ་ཕྱོགས་བཅས་ལ་གྲོས་བསྡུར་དང་དྲི་བ་དྲིས་ལན་གནང་ཡོད་འདུག