རྒྱ་གཞུང་གིས་དེང་སྐབས་ཨ་མདོ་འབོ་ར་དགོན་པའི་དགེ་འདུན་པ་ཚོར་རྒྱལ་གཅེས་སློབ་གསོ་སྤེལ་གྱི་ཡོད་པའི་སྐོར་དང་། དེ་སྔ་འབོ་ར་དགོན་གྲོང་གཉིས་ཀྱིས་ངོ་རྒོལ་བྱས་སྐབས་ཀྱི་པར་གསར་པ་ཁག་ཅིག་བཅས་འབྱོར་ཡོད།
དེ་རིང་རྒྱ་གར་ལྷོ་ཕྱོགས་འབྲས་སྤུངས་དགོན་པའི་གྲྭ་བསོད་ནམས་ལགས་ཀྱིས་བོད་ཨ་མདོ་འབོ་ར་དགོན་པའི་དགེ་འདུན་པ་ཚོར་རྒྱ་གཞུང་གིས་ཉིན་ལྟར་རྒྱལ་གཅེས་སློབ་གསོ་སྤེལ་གྱི་ཡོད་པ་དང་། ད་ལོའི་ཕྱི་ཟླ་ ༣ པའི་ནང་འབོ་ར་དགོན་གྲོང་གཉིས་ཀྱི་མི་མང་ཚོས་རྒྱ་གཞུང་ལ་ངོ་རྒོལ་གནང་སྐབས་ཀྱི་པར་གསར་པ་སྐོར་ཞིག་བཅས་བཏང་འབྱོར་བྱུང་སོང་།
གནས་ཚུལ་ནང་། ད་ལྟའི་ཆར་དེ་སྔོན་ཕྱི་ཟླ་ ༣ ཚེས་ ༢༠ ཉིན་རྒྱ་གཞུང་གིས་འཛིན་བཟུང་བྱས་པའི་གྲྭ་བ་ ༤༠ ལ་ཉིན་ལྟར། སྔ་དྲོའི་ཆུ་ཚོད་ ༩། ༣༠ ནས་ ༡༡ བར་དང་། ཕྱི་དྲོའི་ཆུ་ཚོད་ ༣།༣༠ ནས་ ༥ བར། དེ་བཞིན། གྲྭ་བ་རྒན་གྲས་ཚོར་བདུན་རེའི་ནང་ཐེངས་རེ་དང་། དར་མ་ཚོར་བདུན་རེར་ཐེངས་གཉིས་རེ། དེ་མིན་གྲྭ་བ་གཞན་དག་ལ་བདུན་རེར་ཐེངས་གསུམ་རེ་བཅས་རྒྱལ་གཅེས་ཆོས་གཅེས་ཟེར་བའི་སློབ་གསོ་སྤེལ་ཏེ་དགོན་པར་དམ་དྲག་ཆེན་པོ་བྱེད་ཀྱི་ཡོད་པ་དང་། ཕྱི་ཟླ་ ༤ ཚེས་ ༧ ཉིན་རྒྱ་གཞུང་གི་ཉེན་རྟོག་མི་སྣ་དགོན་པར་ཡོང་སྟེ་རང་ལོ་ ༢༠ ཡིན་པ་ཚ་ངུ་ཐང་སྡེ་བའི་གྲྭ་དཀོན་མཆོག་རྒྱ་མཚོ་འཛིན་བཟུང་བཙན་འཁྲིད་བྱས་རྗེས་ད་ཆར་གར་ཡོད་ཅི་ཆགས་ཀྱི་གནས་སྟངས་ཤེས་རྟོགས་མེད་པ་ཆགས་ཡོད་འདུག
འདི་ལོའི་ཕྱི་ཟླ་ ༣ ཚེས་ ༢༠ ཉིན་འབོ་ར་དགོན་པའི་གྲྭ་མང་གིས་༧གོང་ས་མཆོག་གི་སྐུ་པར་དང་བོད་ཀྱི་རྒྱལ་དར་ཁྱེར་ཏེ་ས་གནས་སྲིད་གཞུང་གི་སྒོ་དང་སྲང་ལམ་སོགས་ནས། “༧གོང་ས་མཆོག་ཕྱིར་བོད་དུ་ཕེབས་འཇུག་དགོས། བོད་པར་འགྲོ་བ་མིའི་རང་དབང་སྤྲོད་དགོས། མི་རིགས་དབྱེ་འབྱེད་སྲིད་ཇུས་མཚམས་འཇོག་དགོས” ཞེས་སོགས་ཀྱི་སྐད་འབོད་རྒྱག་བཞིན་ས་གནས་ཞང་སྲིད་གཞུང་མདུན་དུ་ཕྱིན་ཡོད་པ་དང་། ཉིན་དེའི་དགོང་མོ་ཁུལ་དང་རྫོང་གི་དམག་མི་འབོར་ཆེན་བསླེབས་ཏེ་དགོན་པའི་ནང་འཇབ་རྒྱུག་གིས། དགེ་འདུན་པ་ ༤༠ ཙམ་འཛིན་བཟུང་བཙན་ཁྲིད་བྱས་ཡོད་པ་རེད།
གནས་ཚུལ་དེ་བྱུང་མ་ཐག་འབོ་ར་དགོན་པའི་གྲྭ་མང་ཚོས་འཛིན་བཟུང་བྱས་ཟིན་པ་དག་ཀློད་གྲོལ་གཏོང་དགོས་ཞེས་ངོ་རྒོལ་སྔར་བས་ཤུགས་ཆེ་རུ་ཕྱིན་ཡོད་སྟབས། དགོན་པའི་དོ་དམ་མི་སྣ་དང་དགོན་བདག་རྒྱལ་མཁན་པོ་གྲགས་པ་རྒྱལ་མཚན་བཅས་ཀྱིས་བར་འདུམ་འོག་འཛིན་བཟུང་བྱས་ཟིན་པའི་གྲྭ་བ་རྣམས་ཕྱིར་ཀློད་གྲོལ་བཏང་ཡོད་ཀྱང་། ཕྱི་ཚེས་ ༢༣ ཉིན་ས་གནས་གཞན་གྱི་བདེ་སྲུང་མི་སྣས་ས་གནས་སྲིད་གཞུང་དང་དགོན་པའི་དོ་དམ་མི་སྣར་བརྡ་ལན་གང་ཡང་མ་སྤྲད་པར་གློ་བུར་དུ་དགོན་པར་གསང་སྟབས་ཀྱིས་འཛུལ་ཏེ། སླར་ཡང་རང་ལོ་ ༣༠ ཡིན་པའི་ཀད་ཀྱ་སྡེ་བའི་གྲྭ་སངས་རྒྱས་རྒྱ་མཚོ་དང་། རང་ལོ་ ༢༣ ཡིན་པའི་གོའུ་བརྡ་སྡེ་བའི་གྲྭ་སྐལ་བཟང་བློ་གྲོས། རང་ལོ་ ༢༠ ཡིན་པ་ལུང་ཀྱོག་འགབ་མའི་གྲྭ་དགེ་འདུན་བསོད་ནམས། རང་ལོ་ ༢༢ ཡིན་པ་སྒྲོག་གོང་མའི་གྲྭ་བཀྲ་ཤིས་རྒྱ་མཚོ་བཅས་གྲྭ་བ་ ༤ འཛིན་བཟུང་བྱས་ཡོད་འདུག
གྲྭ་བ་དེ་བཞི་བོར་བཙོན་ཁང་ནང་ཟླ་གཅིག་རིང་གཅར་རྡུང་མནར་གཅོད་སྣ་ཚོགས་བཏང་རྗེས་ཀློད་གྲོལ་བཏང་ཡོད་པ་དང་། ཐོག་མའི་འཛིན་བཟུང་དང་རྗེས་སུ་ཀློད་གྲོལ་སྐབས་བཅས་ལ་ཁོང་ཅག་གི་མགོར་རས་ཁུག་ནག་པོས་བཏུམ་ཏེ་ཁྲིད་ཡོད་སྟབས། ས་གནས་གང་ཞིག་ཏུ་ཁྲིད་དེ་བཙོན་ཁང་གང་ཞིག་ཏུ་མནར་གཅོད་མྱངས་བ་ཤེས་རྟོགས་ཐུབ་ཡོད་མི་འདུག རྗེས་སུ་ཁོང་ཅག་ཀློད་གྲོལ་བཏང་ཡང་རྒྱ་གཞུང་གིས་མུ་མཐུད་དོ་དམ་ལྟ་རྟོག་ནན་མོའི་འོག་གནས་ཡོད་འདུག
གཞན། འབོ་ར་དགོན་གྲོང་མི་མང་གིས་འདི་ལོའི་རྒྱ་ལོའི་ལོ་གསར་མ་བཏང་པར་བོད་ལོ་སྲུང་བརྩི་བྱས་པ། དགོན་པའི་བཅོ་ལྔའི་མེ་ཏོག་མཆོད་པའི་ནང་༧གོང་ས་མཆོག་གི་སྐུ་པར་བཞག་པ་བཅས་སོ་སོར་རྒྱ་གཞུང་གིས་དཀའ་ངལ་རིམ་པར་སྤྲད་ཡོད་པ་དང་། ཞིང་ལས་གཙོ་བོར་གྱུར་པའི་འབོ་རའི་ས་གནས་མི་མང་ཚོར་ཞིང་ལ་འབྲུ་རིགས་འདེབས་མ་བཅུག་པར་རྩྭ་འདེབས་དགོས་པའི་བཙན་བཀའ་བཏང་ཡོད་པ་སོགས་ཀྱི་གནས་ཚུལ་བྱུང་དང་འབྱུང་མུས་ཡིན་འདུག
གསར་འགོད་པ། བནྡེ་སྐྱབས།
བཀའ་དྲིན་ཆེ།
བོད་ནི་བོད་ཀྱི་ཡིན་ལ། རང་གི་རྒྱལ་ཁབ་རང་གིས་བདག་པོ་རྒྱག་དགོས་པ་ལས།
རང་གི་རྒྱལ་ཁབ་མི་རིགས་གཞན་ཞིག་གིས་ང་ཚོ་ལ་སྤྲད་མི་སྲིད་པའི་གནས་ལུགས་ཤིས་པའི་མི་བུ་རང་ཚུགས་ཅན་ཚོ་ལ་གུས་བརྩི་ཞུ།
སེམས་གཏིང་ནས་ཞུ།་ཁ་ཞེ་གཉིས་མེད་ཀྱིས་ཞུ།
ཐོག་མར་འབོ་ར་དགོན་པའི་དགེ་འདུན་པ་རྣམས་ལ་ལན་བརྒྱར་ཕྱག་འཚལ། ཁྱེད་རྣམས་ཀྱིས་བློས་གཏོང་དང་སྙིང་སྟོབས་ལ་རྗེས་སུ་ཡི་རང་ཞུའོ།།
ལྷག་བསམ་རྣམ་པར་དག་པའི་བོད་དར་འཕྱར། སྙིང་སྟོབས་སླུ་བ་མེད་པས་བདེན་སྐད་སྒྲོག། བྱམས་དང་སྙིང་རྗེས་ཀླ་ཀློ་ཕ་མཐར་སྐྲོད། གངས་ཅན་བོད་ལ་རང་བཙན་ཐོབ་པར་ཤོག།
འབོ་ར་ས་ཆ་འདི་ངོ་མ་དཔའ་བོའི་ས་ཆ་རེད་འདུག ས་བྱི་ཞི་རྒོལ་སྐབས་གཟེངས་སུ་ཐོན་པའི་ལས་གུལ་ཞིག་སྤེལ་སོང་། དེའི་རྗེས་ནས་ལས་འགུལ་བསྟུད་མར་མུ་མཐུད་དུ་བྱུང་སོང་། ད་ལྟ་ཡིན་ན་ཡང་ལས་འགུས་སྤེལ་གྱི་འདུག ངོ་མ་དགའ་བསུ་ཞུ་ཡ།
ཕ་ཡུལ། སེམས་ཀྱི་ཕ་ཡུལ། བརྩེ་བའི་ཕ་ཡུལ། དྲན་པའི་ཕ་ཡུལ། ནམ་ཡང་ཁྱེད་ཀྱི་པང་ནས་མེ་རི་ཞིག་མཆེད་ཡོང་གི མེ་རི་དེས་འཁྱག་སོབ་སོབ་ཀྱི་ང་ཡི་སེམས་པ་དྲོད་ཀྱི་སྦྱིན་པ་ཉུང་ཉུང་ཞིག་ག་ལ་ཡིན། ཁྱེད་ཚོའི་དཔའ་ངར་ལྡན་པའི་མདུན་སྐྱོད་ཀྱི་གོམས་སྒྲ་དེར་ངས་སེམས་ཀྱི་ཉན་ཞིང་ཡིད་ལ་ཤར་དུས་ང་ནི་མྱུར་བར་ཁྱེད་ཀྱི་པང་དུ་སླར་རེ་ལོག་འདོད།
ཁྱེད་ཚོ་དང་འབྲེལ་བའི་ལྕགས་སྒྲོག་དང་མེ་མདའ། ཉེས་རྡུང་དང་བཙོན་ཁང་ཟེར་བའི་དམྱལ་ཁམས་དེའི་ཁྲོད་ན་རང་དབང་དང་འོད་ཟེར་ཞིག་ཡོད་པ་མ་བརྗེད་རོགས།
བོད་དྲི་བྲོ་བའི་བོད་ལ་དགའ་བའི་མི་བུ་འདི་ཚོ་ནམ་ཡིན་ཡང་མི་རིགས་དང་ལ་རྒྱ་ཁོ་ན་ལས། ང་ཚོས་ལྟ་བུ་རང་དོན་དང་སྐྱིད་པོ་དག་དག་གི་བར་ན་འཚོ་ཀྱིན་མེད་ལ།
འདི་ཚོས་མི་རིགས་ཞིག་གི་བདེ་སྡུག་གླེང་གིན་ཡོད་ལ། འདི་ཚོས་ཀ་ཁ་སུམ་བཅུའི་བླ་སྲོག་བཟུང་ནས་ཡོད། དུས་རྒྱུན་རྡ་སའི་ཕྱི་ཚུལ་ཁོ་ན་ལས་ཕྱུག་པའི་གྲྭ་བ་དག་མཐོང་དུས་རང་བཞིན་ཀྱིས་རྣམ་རྟོགས་ཞིག་གམ་ཁྲོང་ཁྲོ་ཞིག་སེམས་ཀྱིས་གཏིང་ནས་ལངས་ཡོངས་ལ། ནམ་རྒྱུན་དབྱིན་ཇི་བུ་མོ་དག་དང་འབྲེལ་འགྲོས་བྱེད་བཞིན་པའི་གྲྭ་བ་དག་མཐོང་ཡོང་དུས་སེམས་ནང་རང་བཞིན་གྱིས་དྲི་བ་ཞིག་སླེབས་ཀྱིན་འདུག་ན་ཡང་།
བོད་ནང་དུ་མི་རིགས་ཁོ་ན་དང་རྒྱལ་ཁབ་ཁོ་ནའི་ཆེད་དུ་རང་སྲོག་དོར་བཞིན་པ་འམ་ཞེན་ཁོག་བཅས་བཞིན་པའི་དགེ་འདུན་པའི་སྡེ་དེ་མཐོང་འོངས་དུས། ངའི་ད་བཟོད་མི་རིགས་འདིའི་ཡོད་ཚད་ནི་དགེ་འདུན་པའི་སྡེ་ཁོ་ན་ལས་ང་ཚོས་ཅི་ཡང་འཇོན་གི་མེད་པ་མཐོང་གིན་འདུག་དེའི་རྐྱེན་ཀྱིས་ཁོ་བའི་ག་དུས་ཡིན་ཡང་མི་བུ་འདི་དག་ལ་སྙིང་ཁུངས་རུས་བའི་ནང་ནས་ཐུགས་རྗེ་ཆེ་ཞུ་གིན་ཡོད
གོང་གསལ་གནས་ཚུལ་སྐོར་ལ་ཞིབ་ཏུ་རྒྱུས་ལོན་གནང་འདོད་ཡོད་རིགས་ཚོས་གཤམ་གྱི་ཁ་པར་སྟེང་འབྲེལ་བ་གནང་རོགས། ༩༩༠༠༩༧༡༩༣༡