ཨེ་རན་རྡུལ་མཚོན་ཐད་གྲོས་མོལ།

གཟའ་ལྷག་པའི་ཉིན་ཨེ་རག་གི་རྒྱལ་སར་རྒྱལ་ཁབ་ཁག་ཅིག་གི་མཐོ་རིམ་དཔོན་རིགས་དང་། ཨེ་རན་གཞུང་གི་སྐུ་ཚབ་བར་ཨེ་རན་རྡུལ་མཚོན་ལས་གཞིའི་ཐད་གྲོས་མོལ་བྱས་འདུག

ཁ་སང་ཕྱི་ཚེས་ ༢༣ ཉིན་ཨེ་རག་གི་རྒྱལ་ས་བྷག་ཌ་ཌི་ (Baghdad) ནང་ཨ་རི་དང་ཧྥ་རན་སི། རཱ་ཤི་ཡ། རྒྱ་ནག དབྱིན་ཇི་བཅས་འཛམ་གླིང་མཉམ་འབྲེལ་རྒྱལ་ཚོགས་ཀྱི་གཏན་འཇགས་ཚོགས་མི་རྒྱལ་ཁབ་ ༥ དང་། འཇར་མན་བཅས་ཀྱི་འཐུས་མིས་ཨེ་རན་གཞུང་གི་སྐུ་ཚབ་དང་མཉམ་དུ་ཨེ་རན་གྱི་རྡུལ་མཚོན་བཟོ་སྐྲུན་ལས་གཞིའི་ཐད་གྲོས་མོལ་བྱས་འདུག  

གྲོས་མོལ་ལྷན་ཚོགས་སྐབས་རྒྱལ་ཁབ་ ༦ གི་འཐུས་མི་ཚོས་ཨེ་རན་གཞུང་གིས་རྡུལ་མཚོན་བཟོ་སྐྲུན་ལས་གཞི་རྒྱ་སྐྱེད་བྱེད་བཞིན་པ་མཚམས་འཇོག་བྱ་དགོས་པ་དང་། གལ་སྲིད་ཨེ་རན་གཞུང་གིས་བརྗོད་པ་ལྟར་རྡུལ་ཕྲན་བཟོ་ལས་དེ་དག་སྤྱི་ཚོགས་བདེ་རྩ་དང་ཡུལ་གྱི་འཛུགས་སྐྲུན་ཡར་རྒྱས་ཆེད་བེད་སྤྱོད་གཏོང་གིན་པ་བདེན་ཚེ། འཕྲལ་དུ་རྒྱལ་ཚོགས་རྡུལ་མཚོན་ལྟ་ཞིབ་ཚན་པའི་རྟོག་ཞིབ་པ་ཨེ་རན་གྱི་རྡུལ་ཕྲན་བཟོ་ལས་སྡེ་ཚན་ཁག་ནང་ཡོང་བཅུག་སྟེ་ཞིབ་འཇུག་ར་སྤྲོད་བྱ་དགོས། དེ་ལྟར་མ་བྱས་ཚེ་གྲོས་མོལ་བྱེད་མཁན་རྒྱལ་ཁབ་དྲུག་གཙོས་རྒྱལ་སྤྱིའི་སྲིད་གཞུང་དང་ཚོགས་སྡེ་ཁག་གིས་ཨེ་རན་སྟེང་ཚོང་འབྲེལ་དང་ཕྱི་འབྲེལ་ཐད་ཕྱོགས་ཡོངས་ནས་འགོད་རྐྱེན་ནུས་ཤུགས་ཆེ་རུ་གཏོང་རྒྱུའི་ཉེན་བརྡ་བཏང་ཡོད་འདུག

ཨེ་རན་གྱི་ཕྱི་འབྲེལ་དཔལ་འབྱོར་བརྒྱ་ཆ་ ༨༠ རྡོ་སྣུམ་ཕྱིར་ཚོང་ལ་བརྟེན་ཡོད་སྟབས། ད་ཆར་རྒྱལ་ཚོགས་དང་ཡུ་རོབ་མཐུན་ཚོགས། ཨ་རི་སོགས་ཀྱིས་ཨེ་རན་གྱི་རྡོ་སྣུམ་ནང་འདྲེན་བྱ་རྒྱུ་དང་། རྡུལ་མཚོན་བཟོ་སྐྲུན་ལ་མཁོ་བའི་རྒྱུ་ཆ་ཚོང་སྒྱུར་བྱ་རྒྱུ་བཅས་མཚམས་འཇོག་གིས་འགོག་རྐྱེན་སྤྲད་ཡོད་པ་རེད།

གསར་འགོད་པ། བནྡེ་སྐྱབས།