ཨེ་ཤ་ཡ་རང་དབང་རླུང་འཕྲིན་ཁང་ལ་བོད་ནས་ཁུངས་ལྡན་གནས་ཚུལ་མཁོ་སྤྲོད་བྱས་པ་ལྟར་ན། རྒྱ་ནག་གཞུང་གིས་འདི་ལོའི་ཕྱི་ཟླ་ ༢ པའི་ཚེས་ ༨ ཉིན་ཁམས་ནང་ཆེན་དུ་ བོད་མི་ཚོས་རྒྱ་ནག་གཞུང་ལ་ཞི་བའི་ངོ་རྒོལ་བྱེད་སྐབས་ཀྱི་མི་སྣ་གཙོ་བོ་ཡིན་པའི་ཉེས་མིང་བཀལ་ཏེ། ཁམས་ནང་ཆེན་གྱི་ཚོང་པ་བསྟན་འཛིན་དང་། ཚོང་པ་གཞན་གཅིག་བཅས་བོད་མི་གཉིས་ལ་ལོ་གཉིས་རེའི་དུས་བཀག་བཙོན་འཇུག་གི་ཁྲིམས་ཐག་བཅད་དེ་མཚོ་སྔོན་ཞིང་ཆེན་ཟི་ལིང་གྲོང་ཁྱེར་ཉེ་འཁྲིས་ཀྱི་བཙོན་ཁང་ཞིག་ཏུ་བཙོན་འཇུག་བཀག་ཉར་བྱས་འདུག
འདི་ལོའི་ཕྱི་ཟླ་ ༢ པའི་ཚེས་ ༨ ཉིན་ཡུལ་ཤུལ་ནང་ཆེན་རྫོང་གི་བོད་མི་ ༥༠༠༠ ལྷག་རྫོང་ཐོག་ཏུ་འཛོམས་ཏེ། ཞལ་འདོན་སྐྱོར་བ་དང་དགོན་པར་བསྐོར་བ་རྒྱག་པ། རྒྱལ་བའི་ཞབས་བརྟན་འདོན་པ་སོགས་བྱས་ཏེ། ༸གོང་ས་མཆོག་སྐུ་ཚེ་ཞབས་པད་བརྟན་པ་དང་བོད་ལ་རང་དབང་དགོས་ཞེས་སྐད་འབོད་བྱེད་སྐབས་བོད་མི་འཛིན་བཟུང་གི་གནས་ཚུལ་བྱུང་མེད་ཀྱང་། ཕྱི་ཟླ་ ༢ པའི་ཚེས་ ༢༢ ཉིན་ཚོང་པ་བསྟན་འཛིན་དང་ཚོང་པ་གཞན་ཞིག་ལས་འགུལ་སྐབས་ཀྱི་མི་སྣ་གཙོ་བོ་ཡིན་པའི་ཉེས་མིང་འོག ཁྲིན་ཏུའུ་གནམ་ཐང་དང་ས་གནས་གཞན་ཞིག་བཅས་ནས་སྔ་ཕྱིར་འཛིན་བཟུང་བྱས་ཡོད་པ་མ་ཟད། གནས་ཚུལ་དེར་རྐྱེན་བྱས་ཏེ་ས་གནས་ཀྱི་ལས་བྱེད་ཁག་ཅིག་བཅས་འཛིན་བཟུང་བཀག་ཉར་བྱས་པ་དང་། ས་གནས་བོད་མི་ ༣༠༠ ལྷག་ལ་རྫོང་སྤྱི་བདེ་ལས་ཁུངས་སུ་ཡོང་སྟེ་རང་སྐྱོན་ངོས་ལེན་བྱེད་དགོས་པའི་བརྡ་ཐོ་སོགས་སྤྲད་དེ་བོད་མི་ཚོར་འཇིགས་སྐུལ་དང་དམ་དྲག་བྱས་ཡོད་འདུག
དེང་སང་བོད་ནང་གི་བོད་མི་ཚོའི་དཀའ་ངལ་ཆེ་ཤོས་དེ་འདི་རེད། ལས་འགུལ་མ་སྤེལ་བ་དང་དེའི་ཁོངས་སུ་མ་ཞུགས་པ་ཡིན་ན་བོད་མི་རིགས་ཀྱི་ལ་རྒྱ་མེད་པ་དང་། བོད་མི་རིགས་ལྷག་བསམ་མེད་པ། མི་རིགས་ལ་རིགས་ཞེན་མེད་པ་སོགས་སྡེ་ཕྱི་གི་མིའི་མིག་ལ་མི་རན་པ་དང་། ནང་ན་ཟླའི་འཕྱ་དམོན་བྱེད་པ་སོགས་འདུག་བཟོད་མི་བདེ་བ་ཡོང་གི
ཡང་སྔོན་ཐོན་བྱེད་པ་དང་འགོ་ཁྲིད་དེ་ལས་འགུལ་སྤེལ་བ་ཡིན་ན་བོད་མི་རིགས་ལ་ཤ་ཞེན་ཆེ་ཞིང་དཔའ་སྤོབས་ཆེ་བ་སོགས་བསྟོད་བྱས་ཀྱང་། ཆེས་མཐའ་མའི་མཐའ་མ་དེར་སྣུམ་གྱིས་ཟིན་པ་བཞིན་ཁྱིམ་རེ་དང་མི་རེ་བྱས་ནས་དེད་ཡོང་ན། ཁྲག་དང་སྣག་བསགས་བཙོང་བའི་རིན་འབབ་སྒོར་རྡོག་འགའ་བཙལ་ཡོད་པ་རྣམས། རང་སྐྱོན་ངེས་ལེན་བྱེད་དགོས་ཟེར་ནས་ཆད་པ་སྒོར་༥༠༠༠ ནས་ཁྲི་བར་ཁྱེར་འགྲོ་གི་རེད། ༼ཧིན་སྒོར་འབུམ་ལོང་ལ་ཁད་པ་རེད།༽
དེ་ནས་ལོ་གཉིས་ནས་ལྔ། ཡང་ན་བཅུ་སོགས་དུས་ཡུན་མི་འདྲ་བའི་ཉེས་མེད་ཉེས་ཆད་བཅད་དེ་བཙོན་དུ་བཅུག་སོང་ནས། གྱོང་འདི་སུས་ཁུར་དགོས་པ་རེད། མི་སྒེར་བ་དེ་ཁོ་ནས་འཁུར་དགོས་པ་ལས་གཞན་སྡུག་མཉམ་འཁུར་བྱེད་ས་མི་འགྲོ་གི
འདི་ལྟར་བོད་ནང་གི་བོད་མི་མང་པོ་ཞིག་ལ་སྡུག་གི་ཐོག་ལ་སྡུག་འདི་འདྲ་མང་པོ་བརྩེགས་ནས་འཚོ་ན་འཚོ་མི་བདེ་ཞིང་འཆི་ན་འཆི་མི་རིད་པ་ཞིགས་ཆགས་པའི་དཀའ་སྡུག་ནི་ཆུ་བོའི་རྒྱུན་བཞིན་དུ་རེད། མདོར་བསྡུས་ནས་བཤད་ན་བོད་ནང་གི་བོད་མི་ཚོས་ལས་འགུལ་སྣ་ཚོགས་པ་སྤེལ་རྒྱུ་མང་དྲག་ནས་བཙན་བྱོལ་དུ་ཡོད་པའི་གཞུང་དང་ཚོགས་པ་སྒེར། མི་སྒེར་བ་སོ་སོ་ཚང་མ་དེང་སྐབས་ཚོར་བ་མེད་པ་འདྲ་ཞིག་ཆགས་འདུག དེ་ནས་བོད་ནང་དུ་མི་སུ་ཞིག་ལ་སྒོར་ཅིག་ཅིག་གིས་ཉེས་ཆད་བཅད་སོང་དང་། ལོ་གྲངས་ཅིག་ཅིག་ལ་བཙོན་དུ་བཅུག་སོང་བའི་གསར་གནས་རིམ་པར་སྤེལ་ཡང་གཞུང་དང་མི་སྒེར་ཚང་མར་ཚོར་བ་ཙམ་མི་འདུག་པ་མངོན་གྱུར་རེད། དེས་ན་ངས་འདི་ནས་སེམས་གཏིང་ནས་རེ་བ་ཉག་གཅིག་རང་ཞུ་འདོད་པ་ནི།་བོད་ནང་གི་བོད་མི་རྒན་དར་གཞོན་གསུམ་ཚོ། ད་ཁྱོད་ཚོས་དང་བླངས་གི་ལས་འགུལ་འདྲ་མིན་སྤེལ་རྒྱུ་དེ་མཚམས་འཇོག་རོགས། ཁྱོད་ཚོས་བྱས་པ་དག་གི་གྲུབ་འབྲས་ནི་འདི་ན་གནས་པའི་གཞུང་སྒེར་གྱི་ཚོགས་སྡེ་ཁག་གིས་འཕྲོག་རེས་བྱེད་པ་ལས་གཞན་འཛམ་གླིང་གི་ཡུལ་གྲུ་འདྲ་མིན་དང་གཞུང་སྒེར་སོགས་ལ་རེ་བ་དང་སྙན་ཞུ་འབུལ་བ་སོགས་ནི་ཧ་ཅང་ཉུང་ཉུང་དང་མེད་པར་སྣང་། དེ་བས་ང་ཚོ་ཕྱི་གཉིས་ན་འཚོ་བཞེས་ཀྱི་བོད་མི་ཚང་མས་བོད་རྒྱ་ཞི་མོལ་གྱི་ལམ་ནས་བོད་རྒྱའི་གནད་དོན་ཐག་གཅོད་པར་རེ་བས་སྒུག་ནས་འདུག་དང་ཚང་མར་ཁེ་གྱོང་མེད་པ་དེ་རེད་སྙམ།
བོད་ནང་གནས་ཚུལ་ཇེ་ཞན་ཇི་སྡུག་འགྲོ་བཞིན་ཡོད་པ་དངོས་ཡོད་ཡིན་པར་རང་ངོས་ནས་སྨོན་ལམ་ཙམ་དང་། རིག་གཞུང་འབྲེལ་བའི་རང་འཁྲིའི་ལས་ཀར་ལས་འབྲས་དཔང་ཕེར་བྱས་པའི་ཐོག་གཞན་ལ་ཕན་གང་ཐུབ་ཁྱབ་སྤེལ་གང་འཇོན་བྱེད་རྒྱུ་དེ་ལས་གཞན་བྱ་ཐབ་ཟད། ཡིན་ནའང་ང་ཚོ་བཙན་བྱོལ་བའི་གསར་འགྱུར་དང་། ཚགས་དཔར། ཚོགས་པ། ཆབ་སྲེད་པ་བཅས་ནས་བོད་ནང་བོད་མིའི་མིང་དང་། ས་གནས་སོགས་སུ་བྱུང་བཞིན་པའི་གནས་ཚུལ་དོ་ནན་གྱི་ཕྱིར་བསྒྲགས་གནང་དགོས་པ་ལས་གོ་ཐོས་ཙམ་ཁྱབ་བསྒྲགས་བྱས་ན་བོད་ནང་ཕན་ལས་གནོད་ཆེ་བ་ཡོང་ངེས་ཡིན་ན་ང་ཚོ་ཚང་མས་ཡིད་ཟབ་དགོས་གལ།