བོད་ཡིག་བོད་སྐད་ཐོག་ཤུཊ་རྒྱོབ།

༧གོང་ས་མཆོག་བྷེལ་ཇམ་ཁུལ་དུ་ཆིབས་བསྒྱུར་སྐབས་ཕྱི་རྒྱལ་གྱི་ཆོས་ཚོགས་ཚོས་ཆོས་ཕྱོཊ་གཅིག་པུ་མིན་པར་བོད་པའི་སྐད་ཡིག་རིག་གནས་སྤྱི་ལ་དོ་སྣང་སྤྲོད་དགོས་སྐོར་གསུངས་འདུག

ལྷག་པ་ཚེ་རིང་ལགས་ཀྱིས་ས་གནས་ནས་འདི་གར་གནས་ཚུལ་བཏང་འབྱོར་བྱུང་བ་ལྟར་ན། ༧གོང་ས་མཆོག་ཕྱི་ཚེས་ ༢༣ ཉིན་བྷེལ་ཇམ་གྱི་རྒྱལ་ས་བྷར་སིལ་གནམ་ཐང་དུ་ཞབས་སོར་བཀོད་སྐབས། སྦར་སལ་སྐུ་ཆབ་དོན་གཅོད་དང་༧གོང་ས་མཆོག་གི་དམིགས་བསལ་སྐུ་ཚབ་སྐལ་བཟང་རྒྱན་མཚན་ལགས། དེ་བཞིན། བླ་མ་ཀ་ཏག་རིན་པོ་ཆེ་དང་ས་གནས་རྫོང་དཔོན། བྷེལ་ཇམ་བོད་རིགས་ཚོགས་གཙོ་སོགས་ཀྱིས་ཕེབས་བསུ་ཞུས་ཡོད་འདུག

ཕྱི་ཚེས་ ༢༤ ཉིན་གྱི་སྔ་དྲོར་བྷེལ་ཇམ་ཁུལ་སྡོད་བོད་མི་དང་ཁྱིམ་མཚེས་རྒྱལ་ཁབ་ཧོ་ལན་དང་ཧྤ་རན་སི་ནས་ཕེབས་པའི་བོད་མི། དེ་བཞིན། བྷེལ་ཇམ་ནང་གི་བོད་ཀྱི་གྲོགས་པོ་ཚོགས་པ་དང་བོད་དོན་རྒྱབ་སྐྱོར་བ། སོག་པོ། བལ་པོ། འབྲུག་པ་སོགས་མི་མང་ ༢༤༠༠ ལྷག་ལ་བཀའ་སློབ་དང་སངས་རྒྱས་ཆོས་ཚོགས་མའི་ཆོས་འགྲེལ་ཡང་གནང་ཡོད་འདུག

༧གོང་ས་མཆོག་གིས་མི་མང་ཚོར་བཀའ་བསྩལ་དོན། “ང་ཚོ་བོད་ལ་ད་ལྟ་ཛ་དྲག་གྱི་གནས་སྐབས་དེར་བོད་མི་སྤྱི་བོ་གནམ་བསྟན་ཡོངས་ཀྱིས་བོད་བསྟན་སྲིད་སྤྱི་ལ་སེམས་འཁུར་ལེན་དགོས་ངེས་རེད་ལ། ཁྱོད་ཚོ་ས་གནས་གང་དང་གང་དུ་གནས་ཀྱང་རང་ཉིད་བོད་པ་ཡིན་བསམ་པའི་འདུ་ཤེས་མ་རྗེད་པའི་ཐོག་སེམས་འཁུར་བླངས་ཏེ། ལས་དོན་སྒྲུབ་ཀྱི་ཡོད་པ་དེར་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། ད་དུང་ཡང་སོ་སོའི་ཤ་ཁྲག་རུས་གསུམ་མ་དོར་བར་དུ་བོད་མི་ཞིག་ལ་གནས་རྒྱུ་རེད། དེར་བརྟེན་བོད་ཀྱི་གནས་ཚུལ་ནམ་ཡང་རྗེད་རྒྱུ་མེད། བོད་མི་རིགས་ནི་ལོ་རྒྱུས་ཡུལ་རིང་ཡོད་ལ་བོད་ཡིག་ལ་ཆ་མཚོན་ན་འཛམ་གླིང་གི་ལོ་རྒྱུས་སྟེང་རྙིང་ཤོས་ཀྱི་གྲས་ཤིག་ལ་བརྩི་བཞིན་ཡོད།

བོད་ཀྱི་སྐད་ཡིག་དེ་ཡང་རྒྱལ་ཁབ་གཞན་ནས་ཚུར་བཤུས་པ་ཞིག་མ་ཡིན་པར་སོ་སོ་རང་ཉིད་ཀྱི་ས་ནས་དར་བ་དང་། མི་རིགས་རང་ཉིད་ཀྱི་རང་མགོ་ཐོན་པའི་སྐད་ཡིག་ཞིག་ཡིན། མ་ཟད་ས་བབས་ཀྱི་ཆ་ནས་ཀྱང་དམིགས་བསལ་ཞིག་ཆགས་ཡོད། དེར་བརྟེན་རང་ཉིད་བོད་པ་ཞིག་ཡིན་བསམ་ནས་སྤོབ་པ་ལྡན་པ་ཞིག་དགོས། འོན་ཀྱང་སྤོབས་པ་ལྡན་པ་ཟེར་དུས་ང་རྒྱལ་དང་གཞན་ལ་མཐོང་ཆུང་བྱས་པ་མ་ཡིན་པར། ཡ་རབས་དང་ཉམས་ཆུང་བྱེད་རྒྱུ་གལ་ཆེན་པོ་རེད། བོད་པའི་གནད་དོན་དེ་བདེན་དོན་ཞིག་ཡིན་པས་རྒྱ་མི་རིགས་བློ་གཟུར་བོར་གནས་པ་ཐམས་བཅད་ཀྱི་བོད་པར་རྒྱབ་སྐྱོར་བྱེད་ཀྱི་ཡོད། ང་ཚོའི་འཐབ་རྩོད་དེ་རང་རྒྱལ་གཞན་ཕམ་མ་ཡིན་པར་འཕྲལ་དུ་ཡང་རྒྱ་བོད་གཉིས་ཀར་ཕན་ཐོགས་ཡོད་པ་ཞིག་ཡིན” ཅེས་གསུངས་འདུག

ཁོང་གིས་མུ་མཐུད་དུ་གསུངས་དོན “ བོད་པ་ཚོས་ཡུལ་ཆུ་འཐུང་ན་ཡུལ་ཁྲིམས་འཁུར་ཞེས་པ་ལྟར། བྷེལ་ཇམ་གྱི་ཡུལ་མི་དང་གཅིག་མཚུངས་ཀྱི་ཡ་རབས་དང་། ཁྲིམས་མཐུན་གྱི་ལས་ཀ་བྱེད་རྒྱུ་མ་གཏོགས་རང་ཉིད་ལ་དཀའ་ངལ་འཕྲད་ན་བདེ་སྡུག་ཞུ་དགོས་པ་ལས་ཁྲིམས་འགལ་གྱི་ལས་ཀ་བྱས་ན་ཡག་པོ་མེད། སོ་སོའི་ཡ་རབས་ཀྱི་ལྟ་བ་དང་སྤྱོད་པ་ཞིག་ཡོད་པ་དེ་ཉམས་རྒྱུ་མེད། བར་སྐབས་ཤིག་བོད་པའི་ནང་རིམ་བཞིན་མ་རབས་ཐ་ཤལ་གྱི་ལས་ཀ་བྱེད་མཁན་མང་དུ་འགྲོ་ཡི་ཡོད་པ་གོ་ཐོས་བྱུང་། ད་ལྟ་འཛམ་གླིང་སྟེང་བོད་པར་རིན་ཐང་ཆེན་པོ་བརྩི་བཞིན་པ་དེ་བོད་པར་རྒྱུ་ཡོད་པ་དང་། བོད་པར་ཤེས་ཡོན་ཡག་པོ་ཡོད་པའི་རྐྱེན་གྱི་མ་ཡིན་པར། བོད་པ་ནི་ཡ་རབ་དང་དྲང་བདེན། སེམས་པ་བཟང་པོ་ཡོད་པའི་རྐྱེན་གྱིས་རེད། དེ་དག་མེད་པ་ཆགས་ན་ང་ཚོའི་རིན་ཐང་ཡང་བརླག་པ་རེད” ཅེས་གསུངས་འདུག

༧གོང་ས་མཆོག་གིས་བོད་པའི་སྐད་ཡིག་རིག་གཞུང་སྐོར་ལ་གསུངས་དོན། “ལྷག་དོན་མི་རིགས་ཟུར་གསལ་ཡིན་མིན་དེ་ཡང་མི་རིགས་དེའི་སྐད་ཡིག་ཐོག་ནས་ཡོང་གི་ཡོད་པས་བོད་ཀྱི་སྐད་ཡིག་དེ་གལ་ཆེན་པོ་རེད། ནང་པའི་ཆོས་ལེགས་སྦྱར་ནང་ཇི་མ་ཇི་བཞིན་ཕབ་ཐུབ་མཁན་ཡང་བོད་ཡིག་ཁོ་ན་ལས་མེད། དེར་བརྟེན་བོད་རིགས་གཞོན་སྐྱེས་ཚོས་བོད་སྐད་བོད་ཡིག་ལ་དོ་སྣང་བྱེད་རྒྱུ་དེ་ཤིན་ཏུ་གལ་ཆེན་པོ་རེད། འདི་གར་ཡོད་པའི་ཆོས་ཚོགས་དང་ཚོགས་པ་ཚོས་ཀྱང་སློབ་གྲྭའི་གུང་གསེང་དང་བསྟུན་ནས་བོད་ཀྱི་སྐད་ཡིག་དང་ནང་ཆོས་ངོ་སྤྲོད་ཀྱི་ལས་རིམ་ཡོད་པ་དེར་བསྔགས་བརྗོད་ཡོད། དེ་གར་ཆོས་ཚོགས་བཙུགས་ནས་ས་གནས་དེ་གའི་བོད་པ་མེད་ན་མ་གཏོགས་ཡོད་ན་བོད་པ་ཚོར་རང་གི་ཆོས་དང་རིག་གཞུང་ཉམས་པ་སླར་གསོ་དང་། མི་ཉམས་གོང་འཕེལ་གྱི་ལས་དོན་ངེས་པར་དུ་སྒྲུབ་དགོས། དེ་འདྲ་བྱུང་ན་ཡེ་ཤུའི་ཆོས་དར་ཁྱབ་ཆེ་བའི་ལུང་པའི་ནང་ནང་ཆོས་ཀྱི་བཙན་འཛུལ་བྱེད་པ་ལྟ་བུ་མ་ཡིན་པར་དེ་གར་ཡོད་པའི་བོད་མི་ཚོར་རང་མི་རིགས་ཀྱི་རིག་གཞུང་སྲུང་སྐྱོབ་བྱེད་ཀྱི་ཡོད་ཅེས་བརྗོད་ན། ཕྱི་གླིང་པ་ཚོར་ཡང་འགྲེལ་བཤད་རྒྱག་སྐབས་འགྲེལ་ཆགས་པོ་ཡོད།

མ་འོངས་པར་ཕྱི་རྒྱལ་ལ་ཡོད་པའི་ཆོས་ཚོགས་ཁག་ནས་ཆོས་ཕྱོགས་རྐྱང་པ་མ་ཡིན་པར་བོད་ཀྱི་རིག་གནས་སྤྱི་ལ་སློབ་གཉེར་བྱ་རྒྱུ་ཡོད་པ་ཞིག་བྱུང་ན་མི་མང་པོ་ཞིག་ལ་ཕན་ཐོགས་ཡོད་ངེས་རེད། ཞབས་བརྟན་གཅིག་པུ་མ་ཡིན་པར་ནང་དོན་རིག་པས་མིའི་སེམས་ལ་བདེ་སྐྱིད་བསྐྲུན་པ་དང་། གསོ་བ་རིག་པས་མིའི་ལུས་ལ་བདེ་སྐྱིད་བསྐྲུན་ཐུབ་པ་ཞིག་བྱུང་ན་ཤིན་ཏུ་ཡག་པོ་ཡོད་པས་རིན་པོ་ཆེ་ཁྱེད་ཀྱི་དགོངས་པར་བཅངས་དགོས། མདོ་དོན་རྙིང་པོ་བོད་པའི་ཕྲུ་གུ་ཞིག་ཡིན་ན་བོད་སྐད་ཤེས་པ་དང་། བོད་པའི་རིག་གནས་གང་དང་གང་ཡོད་པ་ཞིབ་ཕྲ་མ་ཤེས་ཀྱང་ཆ་ཙམ་ཤེས་རྒྱུ་གལ་ཆེན་པོ་རེད། ཁ་ནས་བོད་པ་ཡིན་བརྗོད་ནས་བོད་པའི་གནས་ཚུལ་མ་ཤེས་ན་ཞབས་འདྲེན་རེད” ཅེས་བཀའ་སློབ་གནང་ཡོད་འདུག

ཉིན་དེའི་ཕྱི་དྲོར་ཡོན་ཏན་གླིང་ཆོས་ཚོགས་ཀྱི་འདུ་ཁང་གསར་པ་དབུ་འབྱེད་དང་། ཆོས་ཚོགས་གནས་ཡུལ་ཧུད་གྲོང་སྡེའི་སྤྱི་ཁྱབ་དང་ཆབ་སྲིད་ཚོགས་པ་ཁག་གི་མི་སྣ་མཇལ་འཕྲད་དང་བཀའ་སློབ་གནང་ཡོད་འདུག་ལ། གྲོང་སྡེའི་སྤྱི་ཁྱབ་མཆོག་གིས་༧གོང་ས་མཆོག་ལ་ཧུད་གྲོང་སྡེའི་ཆེས་མཐོའི་མི་སེར་གྱི་ཕྱག་འཁྱེར་ཡང་འབུལ་ལམ་ཞུས་ཡོད་འདུག