ཁ་སང་གཟའ་ཕུར་བའི་ཉིན་བཞུགས་སྒར་ཐེན་ཆེན་གཙུག་ལག་ཁང་གི་སྒོ་འགྲམ་དུ། སུ་ཇཱ་བོད་ཁྱིམ་སློབ་གྲྭའི་སློབ་ཕྲུག་ ༡༦༠ ཙམ་གྱིས་ཟས་བཅད་ངོ་རྒོལ་གྱི་ལས་འགུལ་ཞིག་སྤེལ་ཏེ། གཞིས་བཞུགས་བོད་མི་ཚོར་གདུང་སེམས་མཉམ་སྐྱེད་གནང་སོང་།
ཕྱི་ཟླ་ ༥ ཚེས་ ༣༡ ཉིན་གྱི་ཞོགས་པར་བཞུགས་སྒར་དྷ་སའི་ཐེག་ཆེན་གཙུག་ལག་ཁང་གི་སྒོ་འགྲམ་དུ། སུ་ཇཱ་བོད་ཁྱིམ་སློབ་གྲྭའི་སློབ་ཕྲུག་ ༡༦༠ ཙམ་གྱིས་སློབ་མའི་རང་རྟོགས་ཞེས་པའི་ལས་འགུལ་ཞིག་སྤེལ་ཏེ། ཉིན་གཅིག་རིང་ཟས་བཅད་ངོ་རྒོལ་གནང་ཡོད་པ་དང་། ལས་འགུལ་ནང་མཉམ་ཞུགས་གནང་མཁན་ཆུང་ཤོས་ལོ་ ༡༣ དང་ཆེ་ཤོས་ལོ་ ༢༢ ཡིན་འདུག ལས་འགུལ་སྐབས་བོད་ནང་རང་ལུས་མེར་བསྲེགས་ཀྱིས་འདས་གྲོངས་སུ་ཕྱིན་པའི་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་མཚོན་ཆེད། སློབ་ཕྲུག་ ༤༠ ལྷག་གིས་སྐྲ་བཞར་ཏེ་མགོ་རིལ་བཟོས་ཡོད་པ་མ་ཟད། བཙན་གནོན་དབང་སྒྱུར་འོག་གི་བོད་མིའི་དཀའ་སྡུག་དང་ན་ཟུག་རྣམས་སྙན་ངག་གི་ལམ་ནས་གྱེར་འདོན་དང་། རྒྱ་གཞུང་གིས་བོད་མི་ཚོར་བཙོན་འཇུག་མནར་གཅོད་གཏོང་བཞིན་བའི་སྣང་བརྙན་འཁྲབ་སྟོན། དེ་བཞིན། ལས་འགུལ་དང་སྟབས་བསྟུན་༼སློབ་མའི་རང་རྟོགས༽ཞེས་པའི་ཚགས་པར་ཞིག་འགྲེམས་སྤེལ་བྱས་ཏེ། རྩོམ་ཡིག་གི་ལམ་ནས་བོད་ནང་གི་ཛ་དྲག་གནས་སྟངས་གསལ་འདོན་དང་གཞིས་བཞུགས་བོད་མིར་གདུང་སེམས་མཉམ་སྐྱེད་གནང་ཡོད་པ་རེད།
སུ་ཇཱ་བོད་ཁྱིམ་སློབ་མའི་ལས་འགུལ་དེ་ནི། འཛིན་རིམ་བཅུ་པའི་སློབ་ཕྲུག་རྣམས་ཀྱིས་གོ་སྒྲིག་སྣེ་ཁྲིད་གནང་བ་ཞིག་ཡིན་པ་དང་། འདས་པའི་ཕྱི་ཟླ་ ༤ བའི་ནང་དུའང་འཛིན་རིམ་བཅུ་བའི་སློབ་ཕྲུག་ཚོས་གོ་སྒྲིག་འོག བོད་ནང་གི་ཛ་དྲག་གནས་སྟངས་ཐད་གདུང་སེམས་མཉམ་སྐྱེད་མཚོན་ཆེད། སློབ་གྲྭའི་ནང་སློབ་ཕྲུག་བུ་རྣམས་ཀྱིས་སྐྲ་བཞར་ཏེ་མགོ་རིལ་བཟོ་བའི་ལས་འགུལ་ཞིག་སྤེལ་ཡོད་པ་མ་ཟད། ཉེ་ཆར་ལྡི་ལིར་ཟས་བཅད་ངོ་རྒོལ་གྱི་ལས་འཆར་ཞིག་སྒྲིག་ཡོད་ཀྱང་། གནམ་གཤིས་དང་མཐུན་རྐྱེན་དཀའ་ངལ་གྱི་རྐྱེན་པས་བསྐྱོད་མ་ཐུབ་པར་བརྟེན། ཉིན་བཅུའི་དབྱར་ཁའི་གུང་གསེང་གི་དུས་ཡུན་སྤྱད་དེ་སློབ་ཕྲུག་རང་ངོས་ནས་རང་རྟོགས་ལས་འགུལ་འདི་སྤེལ་བ་ཞིག་ཡིན་འདུག
འབྲེལ་ཡོད་སློབ་ཕྲུག་ཅིག་གིས་ཐེངས་འདིའི་ལས་འགུལ་སྐོར་ངོ་སྤྲོད་གནང་དོན། “བོད་ནང་རྒྱལ་གཅེས་དཔའ་བོ་དཔའ་མོ་མང་པོས་རང་ལུས་མེ་ལ་སྒྲོན་ཏེ་བོད་དོན་བདེན་པའི་འཐབ་རྩོད་གནང་བཞིན་པར་མ་ཟད། བོད་ནང་གི་ཤེས་ལྡན་པ་དང་དགེ་རྒན། སློབ་ཕྲུག་ཚོས་ཀྱང་བོད་པའི་སྐད་ཡིག་རིག་གནས་ཀྱི་བདག་དབང་རྩོད་ལེན་གནང་བཞིན་ཡོད་སྟབས། ང་ཚོ་སློབ་ཕྲུག་ཚོའི་ངོས་ནས་ཁོང་ཚོའི་རླབས་ཆེན་གྱི་ལས་འགུལ་དག་ལ་རྒྱབ་སྐྱོར་དང་། ང་ཚོའི་སེམས་པ་ནམ་ཡང་ཁོང་ཚོ་དང་མཉམ་དུ་ཡོད་པ་གསལ་སྟོན་བྱ་ཆེད་ལས་འགུལ་འདི་སྤེལ་བ་ཡིན། ” ཅེས་བརྗོད་དེ། ཕྱི་ཟླ་ ༥ ཚེས་ ༣༡ ཉིན་གྱི་ཞོགས་པ་ནས་མགོ་བཙུགས་ཏེ་ཉིན་གཅིག་རིང་ཟས་བཅད་ངོ་རྒོལ་དང་། ཕྱི་ཟླ་ ༦ ཚེས་ ༢ ཉིན་བཞུགས་སྒར་ཉེ་འཁྲིས་བོད་ཀྱི་འགྲེམས་སྟོན་ཁང་དུ་སློབ་ཕྲུག་རྣམས་ཀྱིས་བྲིས་པའི་བོད་དོན་དང་འབྲེལ་བའི་རི་མོ་འགྲེམས་སྟོན། ཕྱི་ཚེས་ ༣ ཉིན་གྱི་ཕྱི་དྲོ་མོག་གྷན་སྲང་བར་དུ་མར་མེ་ཁྲོམ་སྐོར་གྱི་ལས་འགུལ་ཞིག་སྤེལ་རྗེས། སློབ་ཕྲུག་རྣམས་ཐེག་ཆེན་ཆོས་གླིང་གཙུག་ལག་ཁང་དུ་འདུ་འཛོམས་ཐོག་༸རྒྱལ་བའི་ཞབས་བརྟན་གསོལ་འདེབས་གསོག་སྒྲུབ་ཀྱིས་མཚན་འཕུད་གནང་རྒྱུ་ཡིན་འདུག
སུ་ཇཱ་བོད་ཁྱིམ་སློབ་གྲྭའི་རང་རྟོགས་ལས་འགུལ་ཁྲོད། སྔ་རྗེས་ཐེངས་གཉིས་ལ་སྐྲ་བཞར་ཏེ་མགོ་རིལ་བཟོས་ཡོད་པའི་འཛིན་རིམ་བཅུ་བའི་སློབ་མ་ལྷ་མོ་ལགས་སུ་བཅར་འདྲི་བྱས་པར། ཁོ་མོས་ “ང་ཚོའི་ཕ་ཡུལ་ལ་མཚོན་ན། བུ་མོ་ཚོས་སོ་སོའི་ཁྱོ་ག་གྲོངས་པ་སོགས་ཐབས་ཟད་ཨུ་ཐུག་གི་གནས་སྟངས་ལ་གྱར་སྐབས། མྱ་ངན་མཚོན་ཆེད་སྐྲ་བཞར་ཏེ་མགོ་རིལ་བཟོ་ཡི་ཡོད་པ་རེད། ང་རང་གིས་མགོ་རིལ་བཟོ་དགོས་དོན་ནི། བོད་ནང་རྒྱལ་གཅེས་དཔའ་བོ་དཔའ་མོ་རྣམས་ཀྱིས་བོད་པའི་རྩ་དོན་ཆེད། སོ་སོའི་རྩ་ཆེའི་རིན་ཆེན་སྲོག་ཀྱང་བློས་གཏོང་གནང་བཞིན་ཡོད་སྟབས། རང་ཉིད་ཀྱང་བོད་པ་ཞིག་ཡིན་པའི་ཆ་ནས་སེམས་ཀྱིས་མ་བཟོད་པར་ཅི་བྱ་གཏོལ་མེད་དུ་གྱུར་ཏེ། སོ་སོའི་སྐྲ་བཞར་ཏེ་ཁོང་རྣམ་པའི་མཛད་རྗེས་ལ་རྒྱབ་སྐྱོར་དང་། སྐུ་སྲོག་ཤོར་མཁན་རྣམས་ལ་མྱ་ངན་མཚོན་ཆེད་ཡིན།” ཞེས་བརྗོད་སོང་།
ཐེངས་འདིའི་ལས་འགུལ་དང་འབྲེལ་བའི་༼སློབ་མའི་རང་རྟོགས༽ཚགས་པར་སྟེང་། སུ་ཇཱ་སློབ་གྲྭའི་འཛིན་གྲྭ་སོ་སོ་དང་སློབ་ཕྲུག་མི་སྒེར་བཅས་ཀྱིས་བཅད་ལྷུག་སྤེལ་གསུམ་གྱི་སྒོ་ནས་གདུང་སེམས་མཉམ་སྐྱེད་ཀྱི་རྩོམ་ཡིག་ ༢༠ ལྷག་འགྲེམས་སྤེལ་བྱས་ཡོད་པ་དང་། འཛིན་རིམ་བརྒྱད་པའི་སློབ་མ་ཡོངས་ཀྱིས་རང་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ། ༼གྱད་མི་དཔའ་བོ༽ཞེས་པའི་སྙན་རྩོམ་ཞིག་ཕུལ་ཡོད་པའི་ནང་། མེས་པོ་བཙན་པོའི་དཔའ་སྙིང་བྲང་ནས་བརྡར།། རིགས་ཞེན་ལ་རྒྱའི་དཔུང་རྡང་བོད་ནས་མཆེད།། མི་རིགས་ཤིག་གི་ཆགས་འཇིག་ཞེ་འཁོན་དེས།། རིགས་ཀྱི་འདུ་ཤེས་དམར་པོ་མེ་ལ་བསྟིམས།། སྙིང་སྟོབས་མེ་རླབས་གངས་རིའི་ཞིང་ནས་འཕྱུར།། བདེན་དོན་གླུ་སྒྲ་འཛམ་གླིང་ཧྲིལ་བོར་ཁྱབ།། ཚེ་སྲོག་མཆོད་མེར་ཕུལ་བའི་གྱད་མི་ཚོར།། བསྔགས་བརྗོད་མྱ་ངན་སྟོང་གི་རྗེས་དྲན་ཞུ།། ཞེས་བཀོད་འདུག
གསར་འགོད་པ། ཚེ་རིང་རྒྱལ།
ང་ཚོ་བོད་ཁ་བ་གངས་ཅན་པ་རྣམས་ཀྱི་ལས་དབང་ལ་ལྷ་སྡེ་མི་སྡེ་ཀུན་གྱིས་དོན་དམ་པའི་རྒྱབ་སྐྱོར་དང་གཞོགས་འདེགས་བྱེད་ཀྱི་མི་འདུག ཞི་བདེ་དང་དྲང་བདེན། ད་དུང་འགྲོ་བ་མིའི་ཐོབ་ཐང་ཞེས་པ་ཁ་ཙམ་ཚིག་ཙམ་རེད།།
མ་ཡུམ་སློབ་གྲྭའི་གཅེས་ཕྲུག་ཚོས་དུས་ལ་བབ་པའི་ལས་འགུལ་ཞིག་སྤེལ་བར་རྗེས་སུ་ཡི་རངས་ཞུ།
ཐུགས་རྗེ་ཆེ་་་་སློབ་ཕྲུག་ཚོ་་་་་བོད་མི་རིགས་ལ་དུང་བ་ཟབ་ན་སློབ་སྦྱོང་ལ་ཤུགས་སྣོན་རྒྱག་རོགས་་་་་