རྒྱ་ནག་གཞུང་འབྲེལ་མི་མང་ཉིན་རེའི་ཚགས་པར་སྟེང་གནས་ཚུལ་སྤེལ་བ་ལྟར་ན། ང་ཕོད་ངག་དབང་འཇིགས་མེད་ཀྱི་སྐུ་ཟླ་ང་ཕོད་ཚེ་བརྟན་སྒྲོལ་དཀར་ལགས་སུ་སྙུང་གཞི་ཞིག་གི་དབང་གིས་ཕྱི་ཟླ་ ༥ ཚེས་ ༢༤ ཉིན་གྱི་ཕྱི་དྲོའི་ཆུ་ཚོད་ ༧།༢༥ སྟེང་པེ་ཅིན་དུ་སྐུ་གྲོངས་ཡོད་ཅིང་། ཁོང་མོ་ད་ཆར་དགུང་ལོ་ ༩༧ ཡིན་འདུག
ཕྱི་ཚེས་ ༢༨ ཉིན་པེ་ཅིན་གསར་བརྗེའི་སྤྱི་བའི་བང་སོའི་ཚོགས་ཁང་དུ་མྱ་ངན་མཛད་སྒོ་གཟབ་རྒྱས་ཤིག་ཚོགས་ཏེ། རྒྱ་ནག་གི་རྒྱལ་དར་གྱིས་གཡོག་པའི་ཁོ་མོའི་སྐུ་ཕུང་མདུན་དུ། རྒྱ་ནག་གི་སྲིད་འཛིན་ཧུའུ་ཅིན་ཐའོ་དང་སྲིད་བློན་ཝུན་ཅ་པའོ། ཝུའུ་པང་གོ ཅ་ཆེ་ལིན། ཞི་ཆེན་ཕིན། ཧི་ཀའོ་ཆང་། ཀྲུག་ཡུང་ཁཱང་། ལི་ཁྲང་ཁྲོན་བཅས་རྒྱ་ནག་གཞུང་གི་ཆེས་མཐོའི་མགོ་ཁྲིད་རྣམ་པས་སྣེ་དྲངས་ཏེ། མྱ་ངན་གྱི་མེ་ཏོག་སྒྲོན་འབུལ་དང་འདས་པོའི་ནང་མིར་སེམས་གསོ་བྱས་ཡོད་སྐོར་བཀོད་འདུག
རྒྱ་གཞུང་གི་གསར་འགྱུར་ནང་། “བློ་མཐུན་ང་ཕོད་ཚེ་བརྟན་སྒྲོལ་དཀར་ལགས་ཀྱིས་ཏང་གི་མགོ་ཁྲིད་དང་ལེན་ཞུས་ཤིང་། གསར་བརྗེའི་ལས་དོན་ནང་ཧུར་ཐག་གིས་ཞུགས་ཏེ། བོད་ཞི་བའི་བཅིངས་འགྲོལ་གྱི་ཐོག་མའི་དུས་སུ་བཙན་རྒྱལ་རིང་ལུགས་ལ་ངོ་རྒོལ་བྱས་ཏེ་རྒྱལ་གཅེས་ལངས་ཕྱོགས་མཐའ་འཁྱོངས་དང་། “གྲོས་མཐུན་དོན་ཚན་བཅུ་བདུན” ལ་བརྩི་བཀུར་མཐའ་གཅིག་ཏུ་གནང་ཡོད། དེ་བཞིན། ལྷ་སའི་ཟིང་ཆའི་དོན་རྐྱེན་དང་པཎ་ཆེན་རིན་པོ་ཆེའི་ཡང་སྲིད་ངོས་འཛིན། ལྷ་སའི་ “3.14” རྡུང་གཅོག་འཕྲོག་བསྲེཊ་གཏུམ་སྤྱོད་སོཊ་ལ་རྣམ་འགྱུར་བརྟན་པོ་དང་། ལངས་ཕྱོགས་རྒྱུན་འཁྱོངས་གནང་ཡོད་པ་མ་ཟད། ཏཱ་ལའི་རུ་ཚོགས་དང་རྒྱལ་སྤྱིའི་ཐོག་གི་ཀྲུང་གོར་ངོ་རྒོལ་བྱེད་མཁན། ནང་ཁུལ་གྱི་ཁ་བྲལ་བྱེད་སྤྱོད་སོགས་ལ་སུན་འབྱིན་དགག་རྒྱག་གནང་ཡོད” ཅེས་བཀོད་འདུག
ང་ཕོད་ཚེ་བརྟན་སྒྲོལ་དཀར་ལགས་ནི་ཕྱི་ལོ་ ༡༩༡༥ ལོའི་ཕྱི་ཟླ་ ༩ པར་ལྷ་སའི་གཡུ་ཐོག་ཁྱིམ་རྒྱུད་དུ་སྐྱེས་ཤིང་། ༡༩༥༣ ལོའི་ཕྱི་ཟླ་ ༣ པའི་ནང་ལྷ་ས་གྲོང་ཁྱེར་རྒྱལ་གཅེས་བུད་མེད་མཐུན་འབྲེལ་ལྷན་ཚོགས་ཀྱི་རྒྱུན་ལས་དང་ ༡༩༥༤ ལོར་ཚོགས་གཙོ། ༡༩༥༩ ལོར་བོད་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁང་གི་ཨུ་ཡོན་དང་རྒྱལ་ཡོངས་སྲིད་གྲོས་ཀྱི་ཨུ་ཡོན། ༡༩༧༨ ལོ་ནས་བཟུང་རྒྱལ་ཡོངས་བུད་མེད་མཉམ་འབྲེལ་ལྷན་ཚོགས་ཀྱི་ཚོགས་གཙོ་གཞོན་པ་བཅས་གནང་ཡོད་ཅིང་། ༢༠༠༣ ལོར་ལས་འཁྱུར་ངལ་གསོ་བྱས་ཡོད་འདུག
གསར་འགོད་པ། དོན་འགྲུབ་བཀྲ་ཤིས།
སྐུ་གཟེགས་དམ་པ་ང་ཕོད་ངག་དབང་འཐིགས་མེད་མཆོག་དང་ཁོང་གི་སྐུ་ཟླ་ང་ཕོད་ཚེ་བརྟན་སྒྲོལ་དཀར་ལགས་རྣམ་གཉིས་ད་ཆ་སྐུ་གྲོངས་པར་མྱ་ངན་མ་ཞུ་ཀ་མེད་ཆགས་སོང་།
སྔ་གཞུང་ས་དགའ་ལྡན་ཕོ་བྲང་གི་སྲི་ཞུ་མཁན་གྱི་མི་འདི་ཚོའི་དཔར་རིས་མཇལ་བ་ཙམ་གྱིས་སྐྱེ་བོ་གཞན་ལས་ཆེས་བསོད་ནམས་དང་གཟི་བརྗིད་ལྡན་པ་ཞིག་རང་བཞིན་གྱིས་མངོན་བཞིན་འདུག
ཆབ་སྲིད་པའི་ཐོག་ནས་བརྗོད་ན། སུན་ཙེའི་དམག་སྟོན་བསྟན་བཅོས་ལྟར། རང་གཞན་གཉིས་ཀའི་ཚུལ་རྟོགས་ན། ལན་བརྒྱར་འཐབ་ཀྱང་ཕམ་མི་འགྱུར། ཟེར་བ་དེ་ག་རེད། མི་འདིའི་ཚོའི་ཀླད་པ་དེ་ཚོ་ལས་སླ་པོ་ཆགས་མེད་པ་དུས་རབས་གཅིག་ནང་གསལ་སྟོན་བྱས་པ་རེད།
རྒྱ་བོད་གཉིས་ཀས་མྱ་ངན་ཞུས་པ་ལྟར་ངས་ཀྱང་མྱ་ངན་དང་སྨོན་ལམ་ཞུ།།
བོད་མི་རིགས་ཀྱི་རྒྱལ་ཚོང་བ་དེ་ཚོ་གཅིག་ཤི་ན་དགའ་དགོས་པའི་གནས་ཚུལ་རེད། ད་དུང་བྱམས་པ་ཕུན་ཚོགས་དང་ཀུན་མཁྱེན་བླ་མ་འཇམ་བཞད་སོགས་ཤི་རྒྱུ་མི་འདུག་ཨ།
གང་ཟག་བྱེ་བྲག་སུ་འདྲ་ཞིག་ཡིན་རང་ཉིད་གསང་རྟོགས་མཁན་རང་ཉིད་ཡིན། རྣམ་ཤེས་གང་དུ་འཕོ་མིན་སུ་ཤེས། ཨོྃ་མཊིམེ་ཧཱུྃ།
མ་ནི་ཁས་མི་ལན་མཁན་ཞིག་ལ་མ་ནི་བཏོན་ནས་ཅི་ཞིག་ཕན།
ཚེ་བརྟན་ཞེས་བ་དོན་དང་མཐུན། ངན་པ་འདྲེར་མི་དགོས། གྱོང་བོ་ཁྱིས་མི་ཟ་ཞེས་བ་བདེན་ས་རེད། གང་ལྟར་མི་བོ་ཞིག་ལ་བཟང་བཤད་དང་ངན་བཤད་གང་ཡང་བྱེད་དགོས་དོན་མི་འདུག
དབང་དང་ངན་གྲགས་དེ་ཙམ་ཡོད་ཀྱང་ང་ཕོད་ཀྱིས་སྐྱེས་སྨན་མཛེས་མ་ཞིག་ཉར་མ་ཐུབ་པར་བལྟས་ན་ཡང་སྡར་མ་ཞིག་ཡིན་པ་ཤེས་ཐུབ་ཀི གང་ལྟར་ཁོ་མོ་ཡང་ལོ་རྒྱུས་ཐོག་གི་ནག་ཟས་ནག་ཆུ་འཐུང་མཁན་དུ་སྐྱེས་པ་རེད་མོད། བོད་རིགས་ཤིག་ཡིན་པས་ཆ་ནས་ཡིག་དྲུག་ཚར་གཅིག་སྙིང་རྗེས་འདོན་འདོད་བྱུང་། ཨོྃ་མ་ཎི་པདྨེ་ཧཱུཾ།
ཁོ་མོ་ཚེ་རིང་པོ་འཚོ་གནས་ཐུབ་པ་རེད། མི་ཡུལ་གྱི་འཚོ་བ་སྤྱོད་པའི་དུས་ཚོད་རྫོགས་ཟིན་པ་རེད། དེ་ལ་མྱ་ངན་བྱས་ནས་དགོས་པ་མེད་པ་རེད། ཡིན་ནའང་ཁོ་མོ་དང་ཁོ་མོའི་བཟའ་ཟླ་གཉིས་ཀར་ཕྱི་མའི་ལམ་དུ་ཕེབས་སྐྱེལ་ཞུ་མཁན་དེ་སྐར་ལྔའི་དར་དམར་རེད་ལ་སྐར་ལྔའི་དར་དམར་ནི་ཁྲག་གིས་ཚོས་པའི་དར་དམར་ཞིག་རེད།
སྙིང་རྗེ།།། མེ་ཚེ་གང་པོ་རང་གི་ཁྱིམ་ཚང་ཙམ་གྱི་དོན་དུ་བོད་མི་མང་སྡུག་ལ་སྦྱར་བའི་རྒྱ་གཞུང་གི་ལངས་ཕྱོགས་ལ་མཐའ་གཅིག་ཏུ་མཉམ་ཞུགས་བྱེད་མཁན་ཞིག་མེད་པ་ཆགས་འདུག
དབུས་གཙང་དམ་པ་ཆོས་ཀྱི་ཆོལ་ཁའི་རྒྱ་གཅེས་བོད་གཅེས་དཔའ་བོ་དཔའ་མོ་རྣམས་ཀྱང་ཕྱི་མ་ངན་སོང་གི་གནས་ལ་འགྲོ་སྐབས། མཐའ་མའི་ཕེབས་སྐྱེལ་ཞུ་མཁན་ནི་མ་ཎི་འདོན་མཁན་གྱི་བོད་མི་ཚོ་ཡིན་པ་དེའང་ལོ་རྒྱུས་ཤིག་ཆགས་ཡོད་པས། ངས་མ་ཎི་འདོན་བཞིན་ཡོད།
རྒྱ་གཞུང་དམར་ཤོག་སྒེར་གཅོད་རྐང་འཛིན་དཔོན་རིགས་དག་གི་དོ་ཟླར་བཞག་སྟེ། པཱ་པའོ་ཧྲན་ནང་མེར་བསྲེགས་བྱས་ཡོད་པ་མ་དང་། ཏང་གི་སྐར་ལྔའི་དམར་གྱིས་བཏུམ་དེ་ཆེ་བསྟོད་མྱ་ངན་ཞུས་ཡོད་འདུག
འདི་ནི་བོད་པའི་བྱུང་རབས་ལོ་རྒྱུས་ནང་ཧ་ལམ་ཐོག་མ་ཆགས་མེད་འགྲོ། བོད་མི་ས་ཡ་དྲུག་གི་ནང་ནས་ང་དགུ་ལྟོགས་སྐོམ་གྱི་དྲི་མ་ཚོར་ཞིང་། རེ་དགུའི་རིག་གསར་གྱི་གྲིབ་མ་ཕོགས་མ་མྱོང་བར། བདེ་ཞིང་སྐྱིད་སྒོ་ནས་ཏང་གི་ཉི་འོད་འོག་མི་ཚེ་སྐྱིད་ལ་རོལ་ཞིང་། ཏང་གི་སྐར་ལྔའི་དར་དམར་གྱིས་བེམ་པོ་བཏུམ་སྟེ། ཏང་གི་གསར་རྗེ་བའི་དུར་ཁྲོད་པཱ་པོ་ཧྲན་ནས་མེ་ལ་བསྲེགས་ཏེ། མི་ཚེ་ཧྲིལ་བོ་ཏང་དང་མཉམ་དུ་བུད་སོང་བ་རེད།
བོད་པའི་ལོ་རྒྱུས་ནང་མགོ་མཇུག་བར་གསུམ་དུ་ཏང་མི་རྣལ་མ་ཆགས་ཤིང་། རྒྱ་དམར་ཏང་གི་བརྩེ་བ་ཐོབ་མྱོང་བའི་བོད་རིགས་ཀྱི་དཔེ་མཚོན་ཅིག་དགོས་ཚེ། འདི་བཟའ་བ་གཉིས་ལ་གཞན་སྲིད་ན་རྙེད་དུ་མེད་དོ།
ཨོྃ་མཊིམེ་ཧཱུྃ། དག་ཞིང་དུ་སྐྱེ་བར་སྨོན
མྱ་ངན་ཞུ།