གྲྭ་བ་ཞིག་དམར་གསོད་བཏང་།

ཉེ་ཆར་ལྷ་ས་གྲོང་ཁྱེར་གྱི་ཞིབ་བཤེར་ས་ཚིགས་ཤིག་ཏུ། ཨ་མདོ་ཐེ་བོ་ནས་ཡིན་པའི་གྲྭ་བ་ཞིག་ལ་རྒྱ་དམག་གིས་མེ་མདའ་བརྒྱབ་སྟེ་དམར་གསོད་བཏང་ཡོད་འདུག

དེ་རིང་བོད་ནས་གནས་ཚུལ་མཁོ་སྤྲོད་གནང་བ་ལྟར་ན། ཉེ་ཆར་ཨ་མདོ་ཀན་ལྷོ་ཁུལ་ཐེ་བོ་ནས་ཡིན་པའི་གྲྭ་བ་ཞིག་ལ་ལྷ་ས་གྲོང་ཁྱེར་གྱི་ས་ཚིགས་ཁ་ཤས་ནས་ཞིབ་བཤེར་ཡང་ཡང་བྱས་སྟབས། གྲྭ་བ་དེ་སུན་སྣང་སྐྱེས་ཏེ་ “ནག་ཉེས་གང་ཡང་མེད་མཁན་ཞིག་ལ་འདི་འདྲའི་ཞིབ་བཤེར་ཡང་ཡང་བྱེད་དོན་ཅི་ཡིན” ཞེས་བརྗོད་དེ་དམག་མི་ཞིག་དང་ཁ་ཚོད་ཤོར་སྐབས། དམག་མི་དེས་འདུག་ཚོད་མ་ཟིན་ན་གསོད་རྒྱུ་ཡིན་ཞེས་འཇིགས་སྐུལ་བྱས་པར། གྲྭ་བ་དེ་ཁོང་ཁྲོ་ལངས་ཏེ་ཁྱེད་ལ་བློ་ཁོག་ཡོད་ན་ང་ད་གསོད་ཅིག་ཟེར་ནས་བྲང་ཁ་ཕྱིར་བསྟན་པར། དེ་མ་ཐག་རྒྱ་དམག་དེས་མེ་མདའ་བརྒྱབ་ཡོད་ཅིང་། སྐབས་དེར་ཁོང་ལ་རོགས་པ་གཉིས་ཡོད་པ་དེས་སྨན་ཁང་དུ་བསྐྱལ་ཡོད་ཀྱང་། མེ་མདས་གློ་རྩ་བྲེག་ཡོད་སྟབས་མྱུར་སྐྱོབ་མ་ཐུབ་པར་འདས་གྲོངས་སུ་ཕྱིན་ཡོད་འདུག གྲྭ་བ་དེའི་མིང་དང་དུས་ཚེས་གསལ་བོ་ཤེས་མ་སོང་ཟེར།

གནས་ཚུལ་མཁོ་སྤྲོད་པས་བརྗོད་དོན། “ ང་རང་དེང་སྐབས་ཨ་མདོའི་གྲོང་ཁྱེར(་་་་་་་་་)ན་ཚོང་ལས་གཉེར་གྱི་ཡོད། ཁ་སང་ང་དང་ཕ་ཡུལ་གཅིག་པའི་གྲྭ་བ་ཞིག་གིས་འདི་གར་རྒྱ་ཆས་གྱོན་ནས་འགྲོ་བཞིན་ཡོད་པ་མཐོང་སོང་། ངས་ཁོང་ལ་ཁ་བརྡ་བྱས་པར། ཁོ་རང་ལྷ་ས་ནས་རྒྱ་གཞུང་གིས་འཛིན་བཟུང་གིས་ཕྱིར་ས་གནས་སུ་བསྐྱལ་ཏེ་དུས་ཚོད་དེའི་སྔོན་ཏག་ཏག་ལ་བཏང་འདུག ཁོ་བདུན་ཕྲག་འགའི་སྔོན་ལྷ་སར་འབྱོར་ཏེ་ཉིན་ཤས་ལ་མ་ཕྱིན་པར་རྒྱ་དམག་གིས་འཛིན་བཟུང་བྱས་ཏེ། ཉིན་འགར་བཀག་བསྐྱིལ་བྱས་མཐར་ཕྱིར་ས་གནས་སུ་བསྐྱལ་བ་ཞིག་རེད། ཁོ་རང་གིས་ད་དུང་བློ་ཕམ་པ་ཞིག་ལ་ང་ད་ཐེངས་ལྷ་སའི་ཇོ་ཁང་དང་ར་མོ་ཆེ་གཉིས་ལ་མ་གཏོག་མཇལ་མ་ཐུབ་ཐལ། ངའི་ཅ་དངོས་མང་པོ་ཞིག་ལྷ་སར་ལྷག་ཡོད་སྟབས་ཕྱིར་ལྷ་སར་ཐེངས་གཅིག་མི་འགྲོ་ཐབས་མེད་ཆགས་སོང་ཟེར” ཅེས་བརྗོད་སོང་།  

གནས་ཚུལ་མཁོ་སྤྲོད་པས་མུ་མཐུད་དུ་བརྗོད་དོན། “ དེ་མིན། རྒན་པོ་ཞིག་ཀྱང་རྒྱ་གཞུང་གིས་ལྷ་ས་ནས་འདིར་བསྐྱལ་འདུག རྒན་པོ་དེས་ལབ་པ་ལྟར་ན། ཁོ་རང་ལྷ་སར་གནས་མཇལ་དུ་ཕྱིན་པ་ཞིག་ཡིན་ཡང་། ལྷ་སར་འབྱོར་མ་ཐག་རྒྱ་དམག་གིས་འཛིན་བཟུང་བྱས་ཏེ་བཀག་བསྐྱིལ་ཁང་ཞིག་ཏུ་བསྐྱལ་ཡོད་པ་དང་། བཀག་བསྐྱིལ་ཁང་དེར་བོད་པ་རྐྱང་རྐྱང་ཆིག་སྟོང་ལས་བརྒལ་བ་ཞིག་འཛིན་བཟུང་བྱས་ཡོད་འདུག དེ་ནས་ཉིན་འགའི་རྗེས་གནས་ལུགས་རྒྱུ་མཚན་གཅིག་ཀྱང་ཤོད་ས་མེད་པར་ཕྱིར་ས་གནས་སུ་བསྐྱལ་ཡོད་སྐོར་ལབ་སོང” ཞེས་བརྗོད་དེ། དེང་སྐབས་ལྷ་ས་གྲོང་ཁྱེར་གྱི་ས་ཚིགས་གང་ས་གང་དུ་རྒྱ་གཞུང་གི་ཉེན་རྟོག་པ་དང་དམག་མིས་ཞིབ་བཤེར་ནན་མོ་བྱེད་ཀྱི་ཡོད་པ་དང་། ལྷ་སའི་རླངས་འཁོར་འབབ་ཚིགས་དང་མེ་འཁོར་འབབ་ཚིགས་སོགས་སུ་ཁམས་དང་ཨ་མདོའི་ཕྱོགས་ནས་ཡོང་མཁན་རྣམས་ལ་ཞིབ་བཤེར་འདྲི་རྩད་དང་། དུས་ཚོད་ངེས་མེད་དུ་བཀག་བསྐྱིལ། གནས་ལུགས་རྒྱུ་མཚན་ཚིག་གཅིག་ཀྱང་བཤད་དབང་མེད་པར་ཁུངས་སོ་སོར་ཕྱིར་སློག་སོགས་བྱེད་ཀྱིན་ཡོད་སྐོར་ངོ་སྤྲོད་གནང་སོང་།

གསར་འགོད་པ། དོན་འགྲུབ་བཀྲ་ཤིས།