ཉེ་ཆར་ལྷ་ས་གྲོང་ཁྱེར་གྱི་ཞིབ་བཤེར་ས་ཚིགས་ཤིག་ཏུ། ཨ་མདོ་ཐེ་བོ་ནས་ཡིན་པའི་གྲྭ་བ་ཞིག་ལ་རྒྱ་དམག་གིས་མེ་མདའ་བརྒྱབ་སྟེ་དམར་གསོད་བཏང་ཡོད་འདུག
དེ་རིང་བོད་ནས་གནས་ཚུལ་མཁོ་སྤྲོད་གནང་བ་ལྟར་ན། ཉེ་ཆར་ཨ་མདོ་ཀན་ལྷོ་ཁུལ་ཐེ་བོ་ནས་ཡིན་པའི་གྲྭ་བ་ཞིག་ལ་ལྷ་ས་གྲོང་ཁྱེར་གྱི་ས་ཚིགས་ཁ་ཤས་ནས་ཞིབ་བཤེར་ཡང་ཡང་བྱས་སྟབས། གྲྭ་བ་དེ་སུན་སྣང་སྐྱེས་ཏེ་ “ནག་ཉེས་གང་ཡང་མེད་མཁན་ཞིག་ལ་འདི་འདྲའི་ཞིབ་བཤེར་ཡང་ཡང་བྱེད་དོན་ཅི་ཡིན” ཞེས་བརྗོད་དེ་དམག་མི་ཞིག་དང་ཁ་ཚོད་ཤོར་སྐབས། དམག་མི་དེས་འདུག་ཚོད་མ་ཟིན་ན་གསོད་རྒྱུ་ཡིན་ཞེས་འཇིགས་སྐུལ་བྱས་པར། གྲྭ་བ་དེ་ཁོང་ཁྲོ་ལངས་ཏེ་ཁྱེད་ལ་བློ་ཁོག་ཡོད་ན་ང་ད་གསོད་ཅིག་ཟེར་ནས་བྲང་ཁ་ཕྱིར་བསྟན་པར། དེ་མ་ཐག་རྒྱ་དམག་དེས་མེ་མདའ་བརྒྱབ་ཡོད་ཅིང་། སྐབས་དེར་ཁོང་ལ་རོགས་པ་གཉིས་ཡོད་པ་དེས་སྨན་ཁང་དུ་བསྐྱལ་ཡོད་ཀྱང་། མེ་མདས་གློ་རྩ་བྲེག་ཡོད་སྟབས་མྱུར་སྐྱོབ་མ་ཐུབ་པར་འདས་གྲོངས་སུ་ཕྱིན་ཡོད་འདུག གྲྭ་བ་དེའི་མིང་དང་དུས་ཚེས་གསལ་བོ་ཤེས་མ་སོང་ཟེར།
གནས་ཚུལ་མཁོ་སྤྲོད་པས་བརྗོད་དོན། “ ང་རང་དེང་སྐབས་ཨ་མདོའི་གྲོང་ཁྱེར(་་་་་་་་་)ན་ཚོང་ལས་གཉེར་གྱི་ཡོད། ཁ་སང་ང་དང་ཕ་ཡུལ་གཅིག་པའི་གྲྭ་བ་ཞིག་གིས་འདི་གར་རྒྱ་ཆས་གྱོན་ནས་འགྲོ་བཞིན་ཡོད་པ་མཐོང་སོང་། ངས་ཁོང་ལ་ཁ་བརྡ་བྱས་པར། ཁོ་རང་ལྷ་ས་ནས་རྒྱ་གཞུང་གིས་འཛིན་བཟུང་གིས་ཕྱིར་ས་གནས་སུ་བསྐྱལ་ཏེ་དུས་ཚོད་དེའི་སྔོན་ཏག་ཏག་ལ་བཏང་འདུག ཁོ་བདུན་ཕྲག་འགའི་སྔོན་ལྷ་སར་འབྱོར་ཏེ་ཉིན་ཤས་ལ་མ་ཕྱིན་པར་རྒྱ་དམག་གིས་འཛིན་བཟུང་བྱས་ཏེ། ཉིན་འགར་བཀག་བསྐྱིལ་བྱས་མཐར་ཕྱིར་ས་གནས་སུ་བསྐྱལ་བ་ཞིག་རེད། ཁོ་རང་གིས་ད་དུང་བློ་ཕམ་པ་ཞིག་ལ་ང་ད་ཐེངས་ལྷ་སའི་ཇོ་ཁང་དང་ར་མོ་ཆེ་གཉིས་ལ་མ་གཏོག་མཇལ་མ་ཐུབ་ཐལ། ངའི་ཅ་དངོས་མང་པོ་ཞིག་ལྷ་སར་ལྷག་ཡོད་སྟབས་ཕྱིར་ལྷ་སར་ཐེངས་གཅིག་མི་འགྲོ་ཐབས་མེད་ཆགས་སོང་ཟེར” ཅེས་བརྗོད་སོང་།
གནས་ཚུལ་མཁོ་སྤྲོད་པས་མུ་མཐུད་དུ་བརྗོད་དོན། “ དེ་མིན། རྒན་པོ་ཞིག་ཀྱང་རྒྱ་གཞུང་གིས་ལྷ་ས་ནས་འདིར་བསྐྱལ་འདུག རྒན་པོ་དེས་ལབ་པ་ལྟར་ན། ཁོ་རང་ལྷ་སར་གནས་མཇལ་དུ་ཕྱིན་པ་ཞིག་ཡིན་ཡང་། ལྷ་སར་འབྱོར་མ་ཐག་རྒྱ་དམག་གིས་འཛིན་བཟུང་བྱས་ཏེ་བཀག་བསྐྱིལ་ཁང་ཞིག་ཏུ་བསྐྱལ་ཡོད་པ་དང་། བཀག་བསྐྱིལ་ཁང་དེར་བོད་པ་རྐྱང་རྐྱང་ཆིག་སྟོང་ལས་བརྒལ་བ་ཞིག་འཛིན་བཟུང་བྱས་ཡོད་འདུག དེ་ནས་ཉིན་འགའི་རྗེས་གནས་ལུགས་རྒྱུ་མཚན་གཅིག་ཀྱང་ཤོད་ས་མེད་པར་ཕྱིར་ས་གནས་སུ་བསྐྱལ་ཡོད་སྐོར་ལབ་སོང” ཞེས་བརྗོད་དེ། དེང་སྐབས་ལྷ་ས་གྲོང་ཁྱེར་གྱི་ས་ཚིགས་གང་ས་གང་དུ་རྒྱ་གཞུང་གི་ཉེན་རྟོག་པ་དང་དམག་མིས་ཞིབ་བཤེར་ནན་མོ་བྱེད་ཀྱི་ཡོད་པ་དང་། ལྷ་སའི་རླངས་འཁོར་འབབ་ཚིགས་དང་མེ་འཁོར་འབབ་ཚིགས་སོགས་སུ་ཁམས་དང་ཨ་མདོའི་ཕྱོགས་ནས་ཡོང་མཁན་རྣམས་ལ་ཞིབ་བཤེར་འདྲི་རྩད་དང་། དུས་ཚོད་ངེས་མེད་དུ་བཀག་བསྐྱིལ། གནས་ལུགས་རྒྱུ་མཚན་ཚིག་གཅིག་ཀྱང་བཤད་དབང་མེད་པར་ཁུངས་སོ་སོར་ཕྱིར་སློག་སོགས་བྱེད་ཀྱིན་ཡོད་སྐོར་ངོ་སྤྲོད་གནང་སོང་།
གསར་འགོད་པ། དོན་འགྲུབ་བཀྲ་ཤིས།
མི་སྒེར་གྱི་མི་གཞིའི་ཆ་ནས་གང་མང་གླེང་དགོས་དོན་མི་འདུག གཞི་རྩ་དེ་དོན་དག་དང་བརྗོད་དོན་གྱི་ཐད་ནས་གླེང་རོགས། ང་རང་ལ་མཚོན་ན་ཡང་། ཤར་ཕྱོགས་ཁུག་རྟའི་མཆན་དོན་དེ་ཐད་མོས་མཐུན་ཆེན་པོ་ཡོད། བོད་མི་མང་གི་ཚབ་མཚོན་གཞུང་གི་ངོས་ནས་རང་རེའི་བོད་དོན་ཐད་ཚད་ལྡན་གྱི་ཞིབ་འཇུག་ཅིག་བྱེད་ཐུབ་ཀྱི་མེད་པ་དེ་མངོན་གསལ་རེད། དེ་ལ་བརྟེན་ནས་བོད་དོན་ཅི་ཡང་ལེགས་འགྲུབ་ཡོང་གི་མེད་པ་རེད།
སྔོན་མདོ་སྨད་སྤྱི་ཟུར་བསྟན་འཛིན་མགོན་པོས་ཟམ་གདོང་ཅི་བཤད་ཀྱང་མཐའ་གཅིག་ཏུ་ངོ་རྒོལ་ཡོད་ཅེས་བཤད་མྱོང་། སྤྱིར་ཟམ་གདོང་བླ་མས་གང་བཤད་ཐམས་ཅད་ནོར་འཁྲུལ་མིན་པས་ཁོས་བཤད་པར་ནོར་འཁྲུལ་ཆེ་ནའང་ཁོ་ཟམ་གདོང་བླ་མའི་ཆབ་སྲིད་ཀྱི་ལྟ་གྲུབ་ལ་མོས་པ་མེད་མཁན་ཞིག་ཡིན་སྟབས་ཁ་ཁོགས་མཚུངས་པའི་གཏམ་འདི་བཤད་པ་རེད། ཤར་ཕྱོགས་ཁུག་རྟས་སྒེར་འཁོན་གཞིར་བཞག་ནས་སྐབས་རེ་བཀའ་ཤག་ལ་རེ་བ་ཡོད་ཚུལ་གྱི་གཡོ་རྒྱུའི་ཚིག་ཕྲེང་ཁ་ཤས་དང་སྒྲུབ་བྱ་གཙོ་བོ་བཀའ་ཤག་འདིར་གོད་ཆག་ཆེན་པོ་ཞིག་བྱུང་ན་ཅི་མ་རུང་། དེ་ཡོང་ཐབས་ལ་ངས་ཟ་དང་ཟུར་ནས་ལས་དོན་ཇི་འདྲ་ཞིག་བསྒྲུབ་དགོས་སམ་ལྟ་བུ་ཁོང་གི་མངོན་འདོད་དུ་སོང་འདུག་པ་ནི་ཐོག་མཐའ་བར་གསུམ་དུ་ཁོས་སྤེལ་བའི་རྩོམ་ཡིག་དག་ལས་ངམ་ངམ་ཤུགས་ཤུགས་ཀྱིས་མངོན་བཞིན་འདུག གང་ལྟར་བསྟན་མགོན་གྱིས་ཟམ་གདོང་ལ་ལྟ་བ་འདི་ཁ་ཁོག་མཚུངས་ཤིང་གཅིག་ཤོས་ཀྱིས་བློ་སེང་ལ་ལྟ་བ་ནི་ཁ་ཁོག་མི་མཚུངས་སོ། གང་ལྟར་ཤར་ཁུག་འདི་བོད་ནས་དང་པོར་སླེབས་སྐབས་མི་གཞི་ཅན་ཞིག་དང་ལྒལ་ཚུགས་ཡོད་པ་ཞིག་ཡིན་ཀྱང་རིམ་བཞིན་འདི་ལྟར་འགྱུར་བ་འདི་སུས་གཡོ་འོག་ཏུ་ཚུད་པ་ཡིན། འགལ་རྐྱེན་ཅི་ཞིག་འཕྲད་ཡོད། སེམས་སྐྱོ་དགོས་པ་ཞིག་རེད།
ད་ཡིན་ན་བོད་མི་རྣམས་ཀྱི་གཟབ་ཙམ་མ་བྱ་ན། རྒྱ་མི་ས་གནས་སོ་སོའི་ཉེན་རྟོག་པ་རྣམས་ཀྱི་སོ་སོར་གོ་གནས་དང་ཐོབ་ཐང་རགས་པའི་ཆེད་དུ། བོད་མི་གང་བྱུང་ལ་ཁྲིམས་ཐག་བཅད་པ་དང་། འཇུ་བཟུངས་བྱས་པ། དོན་མེད་མེ་མདའ་འཕེན་ནས་སྲོག་བཅད་པ། སྒེར་གྱི་དགྲ་ཤ་ལེན་པ་སོགས་བྱས་པ་ནི། སོ་སོར་དབུས་ཀྲུང་དབྱང་སྲིད་གཞུང་ལ་གསོལ་རས་ཐོབ་པའི་ཕྱིར་དུ་རེད་གདའ།།
ཨ་ཁ།ལག་དམར་དེ་རང་རིགས་རྒྱལ་བཙོང་བ་ཞིག་་ཀྱང་སྲིད།སྔོན་མ་ཡང་ས་མཚམས་ནས་ཨ་ནེ་བསད་མཁན་དེ་བོད་སྐད་བཤད་ཅིག་རེད་ཟེར་བ་དེ་ཡང་དྲན་སོང།
དེང་སང་མདོ་སྟོད་སྨད་གང་སར་གྲྭ་པ་རྣམས་ལ་ཉེས་པ་ཆེན་པོ་མེད་ཀྱང་། ཉེན་རྟོག་པས་ཉེན་པ་ཆེན་པོ་བཟོས་ཏེ་བཙོན་འཇུག་བྱས་པ་དང་། ཁྲིམས་ཐག་བཅད་པ། དོན་མེད་མི་ལ་ཉེན་སྡུག་བྱས་པ་སོགས་ནི་སོ་སོར་གོ་གནས་ཐོབ་པའི་ཆེད་དུ་རེད་འདུག རྫོང་དེ་ལ་ཉེན་པ་མེད་ཀྱང་ཉེན་ཁ་ཆེན་པོ་ཡོད་པའི་ཀྲུང་དབྱང་དབུས་གཞུང་ལ་སྙན་ཞུ་ཕུལ་ན། རྫོང་གི་ལས་བྱེད་རྣམས་ལ་གསོལ་རས་དང་གོ་གནས་ཡག་པོ་རག་པའི་གཏམ་གསར་འདུག
བློ་བཟང་ཆོས་འབྱོར་གྱི་བསམ་ཚུལ་འདི་སྔ་བར་ཕྱི་གསུམ་དུ་བོད་མིའི་རྩ་དོན་རྩོད་ཡག་གི་བསམ་ཚུལ་ཞིག་ནམ་ཡང་མ་རེད། རྩ་དོན་རྩོད་བར་དང་པོ་དགྲ་གྲོགས་ངོ་ཤེས་དགོས། གཉིས་པ་ཆབ་སྲིད་གོ་རྟོགས་གང་འཚམ་ཞིག་དགོས། གསུམ་པ་དོན་ཆེན་སྒྲུབ་པར་བློས་གཏོང་ཆེ་ཙམ་དགོས། བཞི་པ་རང་འདོད་ཀྱིས་སྤྱི་ཚོགས་བདེ་དོན་ཕོག་ཐུག་གཏོང་མི་ཉན། ལྔ་པ་རང་ཉིད་ལྷག་བསམ་ཡོད་ན་སྤྱི་ཚོགས་ཕན་བདེ་མང་ཙམ་སྐྲུན་དགོས། མ་གཏོགས་སྤྱི་ལ་དབང་བའི་ཕན་བདེ་ལ་ཟུར་ཟ་དང་གནོད་སྐྱོན་གཏོན་མི་ཉན་བས་དེ་ལུགས་དགོངས་ལམ་སྟི་བ་ཞུ།
སྔོན་ཕྱག་མཛོད་མདོ་སྔགས་ཀྱིས་བཀའ་ཁྲིར་རེ་སྐུལ་བྱས་པ་དེ་གསར་འགྱུར་འདི་བཀླགས་ནས་ངའི་ཡིད་ལ་དྲན་སོང། དངོས་གནས་བོད་ནང་མངོན་གསལ་མ་ཡིན་པར་བོད་མི་མང་པོ་ཞིག་གི་ཚེ་སྲོག་ཤོར་བཞིན་པ་དག་ལ་དབུས་བོད་མིའི་སྒྲིག་འཛུགས་རང་གི་ངོས་ནས་ཚད་ལྡན་གྱི་ཞིབ་འཇུག་ཅིག་བྱ་མ་ཐུབ་ཚེ། བཙན་བྱོལ་བོད་མིའི་བོད་ཀྱི་བདེན་དོན་འཐབ་རྩོད་ནང་དྲི་བ་མང་པོ་ཞིག་རང་བཞིན་གྱིས་སླེབས་སྲིད་པ་དང། མ་འོངས་པའི་འཐབ་རྩོད་ཁ་འཐོར་མི་འགྲོ་ཆེད་དམར་གསོད་འདི་དང་འདི་འདྲ་བ་དག་ལ་གང་མགྱོགས་རང་གཞུང་ནས་ཁ་ཡོད་ལག་ཡོད་ཀྱི་ནུས་བ་ཐོན་པའི་ཐབས་ལམ་ཞིག་འཚོལ་དགོས་ཀྱི་འདུག་ལ། དེ་ནི་བཙན་བྱོལ་སྒྲིག་འཛུགས་རང་གི་ལོ་རྒྱུས་ལ་ཐེབས་པའི་དྲི་རྟགས་ཤིག་ཀྱང་ཆགས་ཡོད་པ་རེད།
འབུ་གྲོ་མ་ཞིག་རིན་ཐང་མི་བརྩི་བའི་བྱེད་བབས་འདི་དག་སེམས་ཧ་ཅང་སྐྱོ་དགོས་པ་ཞིག་རེད། ད་ང་ཚོ་ལ་ཐབས་ལམ་ཅི་ཞིག་ཡོད་དམ། མེ་མདའ་རྒྱག་མཁན་དེ་བོད་རིགས་ཡིན་ནམ་རྒྱ་རིགས་ཡིན། བོད་རིགས་ཞབས་འདྲེན་པ་ཞིག་མིན་པའི་རེ་བ་ཡོད།