༧གཡུང་དྲུང་བོན་གྱི་སྐོར་བགྲོ་གླེང་ཐེངས་ ༡༢ པའི་སྐབས་ཀྱི་དཔྱད་གླེང་གི་མ་ཟིན།
སློབ་དཔོན་སློབ་དགེ་པདྨ་དགྲ་འདུལ།
བོད་མི་རིགས་རང་ཉིད་ཀྱི་ཤེས་རིགས་དང་རིག་གཞུང། ཡུལ་སྲོལ་གོམས་གཤིས་སོགས་བརྟན་ཚུགས་ཀྱི་ལོ་རྒྱུས་རང་རྐྱ་ཐུབ་དང་མི་ཐུབ་ཡི་གེ་ལ་རག་ལས་ཡོད་པར་བརྟེན། བོད་ཀྱི་ཡི་གེའི་འབྱུང་གཞིར་ཕྱི་མིག་རྒྱང་རིང་པོས་ལུང་རིགས་ཟུང་འབྲེལ་གྱི་སྒོ་ནས་དཔྱད་གཞིགས་མཐིལ་ཕྱིན་པ་ཞིག་བྱུང་ན་དགེ་མཚན་ཆེ་བར་མཐོང་། སྤྱིར་དུས་རབས་བདུན་པའི་སྔོན་སྡེ་སྲིད་སངས་རྒྱས་རྒྱ་མཚོས་མཛད་པའི་གསོ་རིག་སྨན་གྱི་ཁོག་འབུགས་ལས་སྤྱིར་ཀླ་ཀློ་ལ་སོགས་པ་ཁོས་བུ་རེ་གཉིས་ལས་ཕལ་ ཆེ་བ་མི་རིགས་ཡིན་ནོ་ཅོག་ལ་རང་རང་གི་ཡི་གེ་རེ་ཡོད་པར་གྲགས་ཤིང་མངོན་སུམ་ དུའང་སྣང་། འོན་ཀྱང་བོད་ཡུལ་འདིར་གནམ་རི་སྲོང་བཙན་ཡན་དུ་ཡི་གེ་མེད་པར་འདོད་པ་ལྟར་ན་ཞེས་མ་རངས་པའི་ཚིག་གསུངས་ཡོད། རྒྱ་གར་དང་རྒྱ་ནག་སོགས་ཁྱིམ་མཚེས་རྒྱལ་ཁབ་ཁག་ལ་ཡི་གེ་དར་ནས་ཡུན་རིང་ཕྱིན་པ་མ་ཟད་དུས་རབས་བདུན་པའི་ནང་རྒྱ་གར་ནང་ཉུང་མཐར་ཡིག་རིགས་མི་འདྲ་བ་ཉི་ཤུ་རྩ་གཅིག་ཙམ་ཡོད་པ་ཐོན་མིའི་ཞལ་ལུང་དུ་དཔེ་རྙིང་ཞིག་གི་ལུང་དྲངས་འདུག
བོད་ཀྱི་རྒྱལ་པོ་ཐོག་མ་གཉའ་ཁྲི་བཙན་པོའི་སྐབས་བོད་ལ་རྒྱུ་མཚན་ཉིད་ཀྱི་བོན་ཐོག་མར་དར་བ་དང་། གཉའ་ཁྲི་བཙན་པོའི་སྲས་མུ་ཁྲི་བཙན་པོའི་སྐུ་དུས་སུ་སྟག་གཟིག་དང་ཞང་ཞུང་ནས་མཁས་པ་བརྒྱ་རྩ་བརྒྱད་གདན་དྲངས་ནས་བོད་དུ་བོན་གྱི་འདུ་གནས་ཆེན་པོ་བཞི་བཅུ་རྩ་ལྔ་བཙུགས་ནས་གཡུང་དྲུང་བོན་གྱི་རྒྱུ་མཚན་ཉིད་ཀྱི་ཐེག་པའི་སྐོར། འབྲས་བུ་གསང་སྔགས་ཀྱི་ཐེག་པའི་སྐོར། བླ་ན་མེད་པ་རྫོགས་པ་ཆེན་པོའི་སྐོར་བཅས་ཐེག་པ་རིམ་པ་དགུའི་གཞུང་སོགས་དར་རྒྱས་ཆེ་བར་བྱུང་པ་བོན་གྱི་ཡིག་ཚང་ཁག་ལས་གསལ། དེ་བཞིན་བོད་ཀྱི་གསོ་བ་རིག་པའི་ཁུངས་གཏུགས་ས་གཏིང་རིང་ཤོས་ནི་སྟོན་པ་གཤེན་རབ་མི་བོ་ཆེའི་སྐུའི་གདུང་སྲས་བརྒྱད་ཀྱི་ནང་ནས་རྒན་གྲས་དཔྱད་བུ་ཁྲི་ཤེས་ཞེས་པ་དེ་ཡིན་པ་བོད་ཀྱི་སྨན་གྱི་ལོ་རྒྱུས་ནང་གསལ་གྱི་ཡོད་པ་དང་། བོད་ཀྱི་རྩིས་རིག་པའི་ཁུངས་གཏུགས་ས་ཐོག་མ་ཡང་བོན་ཡིན་པ་མཁས་དབང་ནམ་མཁའི་ནོར་བུས་གཟི་ཡི་ཕྲེང་བའི་ནང་གསུངས་འདུག དེ་ལྟར་ན། ཡི་གེ་མེད་ན་ལོ་རྒྱུས་དེ་དག་རྒྱུན་རིང་གནས་ཐུབ་ཐབས་བྲལ།
མཁས་དབང་དུང་དཀར་བློ་བཟང་འཕྲིན་ལས་ཀྱིས་རྒྱལ་པོ་སྲོང་བཙན་སྒམ་པོའི་གོང་དུ་བོད་ལ་བོན་པོའི་ཆོས་ལུགས་དར་ཁྱབ་ཆེན་པོ་བྱུང་ཡོད་སྟབས། ཡི་གེ་མེད་ཟེར་བ་དངོས་ཡོད་གནས་ཚུལ་དང་མི་མཐུན་ཞིང་ཐོན་མིས་ན་ག་རའི་ཡི་གེར་དཔེར་བྱས་ནས་ཡིག་གཟུགས་གསར་གཏོད་བྱས་པ་ཡིན་ཞེས་པ་ནི་དེའི་གོང་དུ་བོད་ས་གནས་ཡོངས་ལ་སྤྱི་ཁྱབ་དུ་སྤྱོད་པའི་ཡི་གེ་མེད་པ་བཅས་ཀྱི་དོན་ཡིན་པ་མ་གཏོགས་དེའི་གོང་དུ་ཡི་གེ་གཏན་ནས་མེད་པ་དང་། ཐོན་མིས་རྒྱ་གར་གྱི་ཡི་གེར་དཔེ་བྱས་ནས་བོད་ཡིག་བཟོས་པ་ཡིན་ཞེས་པའི་གོ་དོན་མིན། རྒྱུ་མཚན་ནི། ཡི་གེ་ཡོད་པའི་མི་རིགས་གང་འདྲ་ཞིག་ཡིན་རུང་རང་ཉིད་ཀྱི་སྐད་ཡིག་ལ་གཞིར་བཟུང་ནས་བཟོས་པ་ཡིན་པ་ལྟར་བོད་ཡིག་ཀྱང་དེ་ལྟར་རེད་ཅེས་གསུངས།
མ་ཎི་བཀའ་འབུམ། བོད་ལྗོངས་མི་དམངས་དཔེ་སྐྲུན་ཁང་གི་པར་མ་པོད་ཕྲེང་༡༣༥ དང་། སྡེ་དགེའི་པར་མ་ཨེ་པོད་ལས་རྒྱལ་པོ་ལྷ་ཐོ་ཐོ་རི་གཉན་བཙན་སྐུ་མཁར་ཡུམ་བུ་བླ་སྒང་གི་རྩེ་ན་བཞུགས་པའི་དུས་སུ། གསེར་གྱི་གའུ་ཁ་སྦྱར་གྱི་ནང་དུ་ཤེལ་གྱི་མཆོད་རྟེན་ཁྲུ་གང་བ་གཅིག གསེར་གྱི་གླེགས་བམ་ལ་བེེཌཱུརྱ་ཞུན་མས་བོད་ཡིག་ཐོག་ཏུ་བྲིས་པའི་མདོ་ཟ་མ་ཏོག་བཀོད་པ་དང་། སྤང་ཀོང་ཕྱག་རྒྱ་པ་དང་རྟེན་འབྲེལ་བཅུ་གཉིས་ཀྱི་མདོ། དགེ་བ་བཅུའི་མདོ་དང་བཅས་བཅུག་སྟེ་ཉི་མའི་འོད་ཟེར་དང་འགྲོགས་ཏེ་ཕོ་བྲང་གི་སྟེང་དུ་བབས་པ་དང་ད་སྟེ་དུས་རབས་ལྔ་ནས་འདིའི་དོན་ཤེས་པར་འགྱུར་རོ་ཞེས་ནམ་མཁའ་ནས་སྒྲ་བྱུང་ངོ་ཞེས་གསུངས་པ་ལྟར་ན་རྒྱལ་པོ་ལྷ་ཐོ་ཐོ་རི་གཉན་བཙན་གྱི་སྐུ་དུས་སུ་ཡི་གེ་ཡོད་པ་རྟོགས་ཐུབ།
གཉའ་ཁྲི་བཙན་པོ་ནས་གནམ་རི་སྲོང་བཙན་ཡན་རྒྱལ་རབས་སོ་གཉིས་ཀྱི་མཚན་དང་མཛད་རྗེས། གཉའ་ཁྲི་གོང་གི་ལོ་རྒྱུས་ཁག་ཅིག་ཏུན་ཧོང་གི་དཔེ་མཛོད་ནས་ཐོན་པའི་ཡིག་རྙིང་དང་། བཀའ་ཐང་སྡེ་ལྔ་སོགས་ལས་འཁོད་ཡོད་པ་ འདི་དག་ཡི་གེ་མེད་ན་ཇི་ལྟར་གནས་ཐུབ། མཁས་དབང་ནམ་མཁའི་ནོར་བུས་མཛད་པའི་གཟི་ཡི་ཕྲེང་པ་ལས། ང་ཚོ་རང་གི་ནང་མིའི་ལོ་རྒྱུས་དཔེ་ཐོག་ཏུ་བཀོད་པ་ཞིག་མེད་ཕྱིན་ཆད་མི་རབས་གཉིས་གསུམ་གྱི་གོང་དུ་ང་ཚོའི་མེས་པོ་གང་འདྲ་བྱུང་ཡོད་པའི་གནས་ཚུལ་སུ་ཞིག་ལའང་བཤད་ཡག་མེད་པ་མངོན་སུམ་ཚད་གྲུབ་ཡིན་ཙང་། གནའ་དུས་ཀྱི་ བོད་མི་དེ་ཚོས་རྒྱལ་རབས་སུམ་ཅུ་སོ་གཉིས་རིང་གི་ལོ་རྒྱུས་བློ་འཛིན་ཐུབ་པའི་རྒྱུ་མཚན་གང་ཡང་ཡོད་མ་རེད། བྱས་ཙང་ཆོས་རྒྱལ་སྲོང་བཙན་སྒམ་པོའི་གོང་དུ་བོད་ལ་ཡི་གེ་མེད་པའི་ལོ་རྒྱུས་དེ་ཚོ་ཡང་དག་པ་དང་ཚུལ་མཐུན་ཞིག་མ་ཡིན་པ་གསལ་བོར་སྟོན་གྱི་ཡོད་རེད་ཅེས་དང་། ཐོན་སམ་བྷོ་ཊས་རྒྱ་གར་གྱི་ཡི་གེ་ལས་དཔེར་བླངས་ནས་བོད་ཀྱི་ཡིག་གཟུགས་སྟབས་བདེར་བཅོས་གནང་བ་དང་། སངས་རྒྱས་པའི་ཆོས་ཀྱི་ཁུངས་དེ་རྒྱ་གར་ལ་གཏུག་དགོས་པ་ནི་ཚད་ལྡན་ཚུལ་མཐུན་ཞིག་ཡིན། ཡིན་ན་ཡང་ཆོས་ལ་ཕུགས་གཏད་དྲག་ནས་མི་རིགས་རང་གི་ཤེས་རིག་གི་ཁུངས་མེད་པར་བྱས་ན་འགྲིག་ཐབས་རྩ་བ་ནས་ཡོད་མ་རེད་ཅེས་གསུངས།
ཆོས་རྒྱལ་སྲོང་བཙན་སྒམ་པོ་དགུང་ལོ་བཅུ་གསུམ་ལ་བཞེས་པའི་སྐབས་རྒྱལ་སྲིད་གསར་དུ་སྐྱོང་བ་དགའ་སྟོན་གྱི་སྐབས་རྒྱ་གར་དང་། རྒྱ་ནག ཁ་ཆེ། སུམ་པ་སོགས་ལ་སྐྱེས་ལན་འཕྲིན་ལན་ལ་རྒྱལ་ཁབ་དེ་དང་དེའི་ཡི་གེ་ལྟར་འབྲི་བའམ་ངག་འཕྲིན་ཙམ་ལས་བསྐུར་རྒྱུ་མ་བྱུང་ཞེས་གསུངས་འདུག་པ་འདིས་སྐབས་དེ་དུས་བོད་ལ་ཡིག་སྣ་མི་འདྲ་བ་ཤེས་མཁན་ཡང་ཡོད་པ་དང་། ཁྱིམ་མཚེས་རྒྱལ་ཁབ་ཀུན་ལ་ཡི་གེའི་ལམ་ལུགས་ཡོད་པར་བོད་ལ་སྤྱི་ཁྱབ་ཏུ་སྤྱོད་པའི་ཡི་གེ་མེད་ཀྱང་ཡེ་གེ་ཡོད་དགོས། ཞྭ་སྒབ་པ་དབང་ཕྱུག་བདེ་ལྡན་གྱིས་ཐོན་མི་རྒྱ་གར་དུ་ཡི་གེ་སློབ་པར་མ་བྱོན་པའི་གོང་བལ་ཡུལ་དང་རྒྱ་ནག་ནས་བཙུན་མོ་ཁབ་ཏུ་བཞེས་སྐབས་བཀའ་ཤོག་གི་སྒྲོན་བུ་རེ་གནང་བའི་ལོ་རྒྱུས་ཡོད་པར་གཞིགས་ན་ཐོན་མིས་ད་ལྟའི་ཡི་གེ་འདི་མ་མཛད་པའི་གོང་བོད་ལ་ཡི་གེ་ཡོད་དགོས་ཚུལ་གསུངས་ཡོད།
ཐོན་མི་རྒྱ་གར་དུ་ཕེབས་པའི་དུས་དེ་ཙ་ན་ལཉྫ་ལྷའི་ཡི་གེ ཝ་རྟུ་ཀླུའི་ཡི་གེ ནཱ་ག་ར་མིའི་ཡི་གེ་ཞེས་གྲགས་པ་རྣམས་ཡོད་པ་ལས། ལཉྫར་ དཔེར་བྱས་ནས་དབུ་ཅན་དང་། ཝརྟུ་ལ་དཔེ་བྱས་ནས་དབུ་མེད་དང་། ནཱ་ག་ར་ལ་དཔེར་བྱས་ནས་ལན་ཝར་འབྲི་ཚེགས་ལས་སྟབས་བདེར་བྱས་ཞེས་པ་འདི་ནི་སྤྱིར་བཏང་མཁས་པ་ཡོངས་སུ་གྲགས་པའི་གཏམ་ ཡིན། ལན་ཝར་ནི་ཁ་ཆེའི་ཡི་གེ་ཡིན་པ་ཐོན་མིའི་ཞལ་ལུང་དུ་གསལ། སྔོན་རྒྱ་གར་གྱི་ཡི་གེ་ལཉྫ་ནི་རཉྫ་ཞེས་པ་དེ་ཡིན་པ་དང་ཝརྟུ་ནི་ངོས་འཛིན་བྱེད་དཀའ།
དེབ་ཐེར་རྫོགས་ལྡན་གཞོན་ནུའི་དགའ་སྟོན་སོགས་སུ་བོད་སྐད་ཀྱི་གཅིག་དང་ཆོས་སོགས་ལ་རྒྱ་གར་གྱི་ཡི་གེ་ཨེ་ཀ དྷརྨ་སོགས་སུ་བརྗོད་པས་རྒྱ་གར་གྱི་ཡི་གེར་ཅ་ཆ་སོགས་མི་དགོས་པ་འདིར་བསྣན་ཞེས་གསུངས། བོད་ཡིག་ཏུ་ཅ་ཆ་སོགས་བསྣན་པའི་རྒྱུ་མཚན་དུ་གཅིག་དང་ཆོས་སོགས་ལ་རྒྱ་གར་གྱི་ཡི་གེ་ཨེ་ཀ། དྷརྨ་སོགས་སུ་བརྗོད་པ་འདི་རྒྱུ་མཚན་གཙོ་བོ་ག་ལ་ཡིན། རྒྱུ་མཚན་གཙོ་བོ་ནི་བོད་ཡིག་མ་བཟོས་པའི་གོང་ནས་བོད་རང་ལ་གཅིག་དང་ཆོས་སོགས་ཀྱི་མིང་གི་གཞིར་གྱུར་བའི་ཅ་དང་ཆའི་སྐད་ཀྱི་གདངས་ཡོད་པ་ལ་གདངས་དེ་དང་མཐུན་པའི་ཡི་གེ་རྒྱ་གར་ཡུལ་དབུས་པས་འདོན་པའི་གསལ་བྱེད་སོ་བཞིའི་གྲས་མེད་པ་འདི་ལ་ཐུག་གོ་ཞེས་གསུངས།
ཡིག་བཤད་མཁས་པའི་ཁ་རྒྱན་སོགས་སུ་ཞང་ཞུང་ནས་འོངས། ཟ་ཧོར་དུ་འགྲོ། ཇ་ཉོ་རུ་འགྲོ། ཅི་ཆ་ཞེས་པ་ལས་ཞ་ཟ་འ་ཅ་ཆ་ཇ་སྣོན་དགོས་པར་དགོངས་ནས་སྟོད་དུ་ཅ་ཆ་ཇ་གསུམ་དང་། སྨད་དུ་ཞ་ཟ་འ་གསུམ་བསྣན་ཞེས་བཀོད། མར་པ་ལོ་ཙའི་སྐུ་དུས་སུ་བྲིས་པའི་ཡིག་རྙིང་ཞིག་ཏུ། ཞ་ཟ་འ་ཅ་ཆ་ཇ་དྲུག་ཡུལ་དྲུག་གི་མིང་གི་ཟུར་ལས་རྙེད་པར་བཤད་ཅེས་ཚེ་བརྟན་ཞབས་དྲུང་གིས་ཐོན་མིའི་ཞལ་ལུང་དུ་གསུངས་འདུག ཡི་གེ་དྲུག་གསར་དུ་བཟོས་ཚུལ་ལ་བརྟག་ན། སྐབས་དེའི་རྒྱ་གར་གྱི་ཡུལ་སྐད་ནང་ཅི་ནི། ཅྭར། ཆཏརི། ཆོ་ཊྭ་སོགས་ཅ་དང་ཆར་གྲུབ་པའི་ཡི་གེ་དུ་མ་ཞིག་ཡོད་པར་བརྟེན་ཅ་ཆ་ཇ་ལས་ཙ་ཚ་ཛ་མེད་པ་མ་ཟད་ག་ཇ་ད་བ་རྣམས་ཀྱི་སྒྲ་གདངས་ཡང་རྒྱ་གར་གྱི་ཡི་གེའི་གདངས་དང་་མི་མཐུན་པ་སྣང་།
མཁས་དབང་དགེ་འདུན་ཆོས་འཕེལ་གྱིས་ཐོན་མི་དང་མཉམ་པའི་གུཔ་ཏའི་རྒྱལ་རྒྱུད་རྒྱལ་པོ་ཧརཤ་དང་། ཀུམཱར་གུཔ་ཏ་སོགས་ཀྱི་དུས་སུ་བྱུང་བའི་ཟངས་ཀྱི་གླེགས་བམ་དང་རྡོ་རིང་གི་ཡི་གེ་རྣམས་བོད་ཡིག་དང་འདྲ་ཆེ་ཞིང་ཅུང་ཟད་རྒྱང་ནས་བལྟས་ན་ལག་མི་མཁས་པ་ཞིག་གིས་བོད་ཡིག་བྲིས་པ་འདྲ་ཡོད་ཟེར་བ་དང་ཞང་ཞུང་གི་ཡི་གེ་སྨར་ཆེ་ཆུང་ལ་བལྟས་ན་དེ་ནི་ལག་མི་བདེ་བ་ཞིག་གིས་བོད་ཡིག་བྲིས་པ་རེད་ཟེར་གཉིས་ལ་ཡང་བསམ་བློ་གཏོང་དགོས་པ་ཞིག་འདུག་གསུངས་པར་དཔྱད་བསྡུར་བྱས་ན་ཞང་ཞུང་གི་ཡི་གེ་སྨར་ཆེ་ཆུང་གཉིས་གུབ་ཊའི་སྐབས་ཀྱི་རྒྱ་གར་གྱི་ཡི་གེ་ལས་འདྲ་ཆེ་ཞིང་། བོད་ཡིག་གི་དབུ་ཅན་དང་དབུ་མེད་གཉིས་ཀྱང་ཞིབ་ཏུ་བརྟག་ཚེ། དབུ་ཅན་དེ་ཉིད་མགྱོགས་པར་བྲིས་པ་ལས་རང་བཞིན་གྱིས་དབུ་མེད་ཀྱི་རྣམ་པ་བྱུང་བ་ལུང་དང་རིག་པས་སྒྲུབ་མི་དགོས་ཏེ། དཔེར་ན། ཀ་ཁ་ག་ང་། ཀ་ཁ་ག་ང་། ཀ་ཁ་ག་ང་། ཀ་སྡེ་གཅིག་པུའི་སྟེང་ ནས་ཤེས་སླ།
བོན་གྱི་བསྟན་འབྱུང་དང་ལོ་རྒྱུས་རྣམས་སུ་བོད་ཡིག་གི་ཐོག་མའི་འབྱུང་ཁུངས་ནི་ཞང་ཞུང་གི་སྨར་ཡིག་ཡིན་པ་གསུངས་ཡོད། དེ་ཡང་མདོ་དྲི་མེད་གཟི་བརྗིད་ལས། ཡི་གེ་སུམ་ཅུས་བོན་གྱིས་ཁོག་ཡང་ཕུབ།། མགོ་ཡིས་ལམ་དྲང་ཤད་ཀྱིས་མདོར་ཡང་བཅད།། ཚེག་གིས་བར་ཕྱེ་མི་འཁྲུགས་གསལ་བར་སྙོམས། གུག་འགྲེང་ན་རོ་ཞབས་ཀྱུ་ཡ་སྟ་ཡིས།། སྐབས་སྦྱོར་དོན་དུ་ཡན་ལག་རྒྱས་པར་བཏགས།། ཞེས་པས་དང་པོ་དག་པ་ལྷའི་ཡི་གེ་སྟག་གཟིག་སྤུང་ཡིག་ཏུ་བསྒྱུར། དེ་ཞང་ཞུང་གི་ཡིག་རྒན་དུ་བསྒྱུར། དེ་ལ་སྨར་ཆེ་ཆུང་དུ་བསྒྱུར། དེ་ནས་བོད་ཡིག་ཏུ་བསྒྱུར། ཞེས་གསུངས་པ་དང་། དེ་བཞིན་མདོ་གཟེར་མིག་དང་། མ་རྒྱུད་སྐྱེ་མེད་ཐིག་ལེ། མདོ་ཕྲན། མཁའ་འགྲོ་རིན་ཆེན་འཕྲེང་རྒྱུད། མཛད་པ་དྲུག་ཅུའི་མདོ་སོགས་ལས་ཡི་གེའི་རྣམ་གཞག་རྒྱས་པར་བསྟན་ཡོད།
ཀན་སུའུ་ཏྭང་ཁྲེང་རྫོང་དུ་བོད་པའི་དུད་ཚང་ཁག་གཅིག་ཏུ་བསྡུ་ཉར་བྱས་པའི་གནའ་བོའི་བོན་གྱི་ཡིག་མཛོད་ཅེས་པའི་དེབ་ཕྲེང་སུམ་ཅུ་ཐམ་པ་ཅན་ཞིག་ཀན་སུའུ་རིག་གནས་དཔེ་སྐྲུན་ཁང་ནས་པར་དུ་བསྐྲུན་ཡོད་པའི་གནས་ཚུལ་ཐོན་འདུག དཔེ་རྙིང་དེ་དག་ལན་ཀྲུའུ་ནུབ་བྱང་མི་རིགས་སློབ་ཆེན་ཞིབ་འཇུག་ཁང་ནས་བརྟག་དཔྱད་ཞིབ་འཇུག་བྱས་སྐབས་དུས་རབས་དང་ལྔ་པ་དང་དྲུག་པ་སྔོན་གྱི་བོན་གཞུང་གསལ་བཤད་བྱེད་ཐུབ་པའི་ཡིག་རིགས་ཤིག་ཡིན་པ་གསལ་འདུག དེ་བཞིན་ཀན་སུའུ་ཞིང་ཆེན་གྱི་ཏྭང་ཁྲེང་རྫོང་དུ་དུས་རབས་ལྔ་པ་དང་། དྲུག་པའི་སྐབས་ཀྱི་ཞང་ཞུང་སྨར་ཡིག་ཅན་གྱི་གདོད་མའི་བོན་གྱི་དཔེ་ཆ་རྙིང་པ་རྙེད་པ་ཏྭང་ཁྲེང་རྫོང་སྲིད་གཞུང་གིས་ཚན་རིག་ཞིབ་ལས་ཁུངས་དང་མཉམ་འབྲེལ་བྱས་ནས་རྟོག་ཞིབ་ཐེངས་བཞི་བྱས་པ་མཚོ་སྔོན་པོ་དྲ་བ་ནས་བསྒྲགས་འདུག་པར་གཞིགས་ན་དུས་རབས་བདུན་པའི་གོང་བོད་ལ་ཡི་གེ་ཡོད་པ་གསལ་བོ་རེད།
གཞོན་སྐྱེས་ཚང་མས་བློ་གྲོས་ཀྱི་སྤྱན་ཡངས་པོའི་སྒོ་ནས་གངས་ལྗོངས་ཤེས་རིག་གི་གཞི་མ་ཡི་གེའི་བྱུང་བ་འདི་གལ་ཆེན་དུ་བསམ་སྟེ་ཞིབ་འཇུག་བྱ་དགོས་གལ་ཆེ་བར་མཐོང་། ཕྲན་རང་ཀླད་པའི་ཆུ་ཚད་དམན་པའི་རྐྱེན་གྱིས་འདིའི་ནང་སྐྱོན་དང་ནོར་འཁྲུལ་ཇི་སྙེད་ཅིག་མཆིས་པ་ཀློག་པོ་རྣམས་ཀྱིས་ལེགས་སྤེལ་ཉེས་འགོག་གི་དགོངས་འཆར་བཀའ་སློབ་ཡོང་བ་ཞུ་རྒྱུ་བཅས།
ཕྱི་ལོ་ ༢༠༡༢ ཟླ་ ༦ ཚེས་ ༥ ཉིན།
ཐོན་མིའི་ཡར་སྔོན་དུ་བོད་ལ་ཡི་གེ་ཡོད་མེད་ཀྱང་མི་ཤེས་པའི་དྲ་འབུ་འདི་ཚོ་སྙིང་རེ་རྗེ།
བོད་ལ་ཡོད་ཚད་བོན་གྱི་ཡིན།
བོན་ལ་ཡོད་ཚད་བོད་ཀྱི་ཡིན།
བོན་གྱི་ཡོད་ཚད་ཆོས་ཡིན་ན།
བོན་པོ་ནང་པ་མིན་ཞེས་གཏམ།
ཆོས་པ་ནང་མིན་སྒྲུབ་མིན་ནམ།
སྔ་ཕྱིའི་གཏམ་ལ་གཟབ་པར་གྱིས།
རྒྱ་གར་མ་ཧེ་བོད་ལ་སླེབས།
ད་དུང་ལྷ་གཡག་ལྷ་འབྲི་སོགས།
མ་ཧེ་ཡིན་ཞེས་ཧམ་པ་ཆེ།
དུས་རབས་བདུན་པའི་སྔོན་དུ་བོད་ཡིག་ཡོད་པ་ཡིན་ན་བོད་པ་ལ་ཡི་གེ་ཡོད་པ་རེད་བསམ། དེ་བོན་པོ་ཚོས་ཡོད་པ་སྟོན་ཐུབ་པ་དེ་བོད་པའི་རྒྱན་རེད། རྒྱ་དཀར་ནག་ཚང་མས་ཡི་གེ་བཀོལ་སྤྱོད་བྱེད་བཞྀན་པའི་སྐབས་བོད་པ་ལ་སྤྲེའུ་རྔ་མ་སྐྱེས་བསྡད་པ་དང་བོད་ཆཱུ་ཡི་གང་བསྡད་པའི་ལོ་རྒྱུས་དེ་ཚོ་དུས་ཚོད་རྫོགས་པར་བསམ། སངས་རྒྱས་ཐུབ་པས་རྒྱ་གར་དུ་ཆོས་འཁོར་བསྐོར་བཞྀན་པའི་སྐབས་བོད་ཀྱི་ལུང་པ་ཆུ་མ་གཏོགས་མེད་པ་དང་། སངས་རྒྱས་ཀྱི་སློབ་མ་བྱང་ཆུབ་སེམས་པ་སྤྱན་རས་གཟིགས་ཀྱིས་སྨོན་ལམ་བཏབ་སྟེ་ཁ་བ་ཅན་གྱི་མཚོ་བྲི་ནས། ང་ཡི་བསྟན་པ་ཚུགས་པ་ཤོག་གསུང་པ་དེ་ཚོ་ལ་དགོངས་གཞི་དགོས་གཞན་ཞིག་ཡོད་རྒྱུ་རེད། དེ་མིན་ལོ་རྒྱུས་དེ་དྲང་དོན་ཁོ་ནར་འགྲེལ་ན་འཛམ་གླིང་མི་མང་སུས་ཀྱང་ཁས་ལེན་དཀའ་བར་གྱུར། དེ་དག་ང་ཚོས་ལྐུགས་པ་ཨུ་ཚུགས་ཀྱིས་དེ་རང་ཡིན་དགོས་བསམ་ན་དངོས་དོན་དང་མི་མཐུན་པར་གྱུར་ཡོད། གནའ་མི་བོད་ཀྱི་གཏམ་དཔེ་ཞྀག་ཡོད་རེད། གླེན་པས་རྡོ་བསྲེགས་སྤང་པ་ནང་བཞྀན་ཟེར་བ་དེ་འདྲ་བྱེད་མི་རུང་། གླེན་པས་ཁོ་རང་གི་ལག་པ་འཚེགས་ཏེ་ས་ར་ར་དང་། སུ་རུ་རུ་ཟེར་གྱི་ཡོད་པ་ཧ་མ་གོ་ནས་། ཁྱེད་རང་ས་ར་ར་དང་། སུ་རུ་རུ་ཅི་ཟེར་ན་ངས་མི་གཏོང་ཐག་ཆོད་ཡིན་ཟེར་བ་ལྟར་རེད། དེ་བཞྀན་མངོན་པ་མཛོད་ཀྱི་ནང་དུ་རི་རྒྱལ་ལྷུན་པོ་ཟེར་བ་དེ་ཚོ་ལ་དགོངས་པ་བཞེས་དགོས་པ་སྐྱབས་མགོན་རིན་པོ་ཆེས་གསུང་ཡོད་རེད། དངོས་དོན་དང་འཚམས་ན་དེ་དོན་ཁས་བླངས་ན་ངོ་ཚ་དགོས་དོན་མེད། དེ་མིན་རྫུནརྒྱབ་རྫུན་ལངས་ཇི་ལྟར་བྱས་ཀྱང་ཕན་ཐོག་མེད་པར་སེམས། དེང་དུས་ཚན་རིག་གི་ཐོག་ནས་མི་ལོ་སུམ་སྟོང་བདུན་བརྒྱ་སྔོན་གྱི་བོད་ཡིག་རྡོ་རིང་གངས་རིན་པོ་ཆེའི་ཕྱོགས་རགས་ཡོད་པ་བོད་ཀྱི་སྤྱི་ཚོགས་ཚན་རིག་ཁང་དུ་བཤམས་སྟོན་བྱས་ཡོད། དེ་དོན་དངོས་དོན་གྱིས་ཁ་གྲགས་པ་ཡིན་ཙམ་དེ་ནི་ཇི་ལྟར་བྱས་ཀྱང་སྦས་བསྐུང་བྱ་ཐབས་བྲལ།
བོད་ལ་ཡོད་ཚད་བོན་ལ་གཏུག བོན་ལ་ཡོད་ཚད་ཆོས་ལ་རྐུས། ཆོས་ལ་ཡོད་ཚད་གཞན་ལ་གཡར། ད་ཡིན་ན་དཔེ་སྐྱ་སེང་པོ་རེད་འདུག་ག
ཨ་བུ་ལོ་ལོ། དུས་རབས་བདུན་པའི་སྔོན་དུ་བོད་ལ་བོད་ཡིག་ཅིག་ཡོད་ནི་མ་རེད། མོ་གཤམ་གྱི་བུ་མེད་ན། དེའི་འགྱིང་བག་མེད་པ་ནང་བཞིན་རེད། གཤོབ་མ་བཤད། ལོ་ལོ།
སློབ་དཔོན་སློབ་དགེ་པདྨ་དགྲ་འདུལ་ཞེས་རིང་བོ་ཞིག་འབྲི་རྒྱུ་ལས་སློབ་དཔོན་པད་འདུལ་ཞེས་ན་ལེགས་པ་འདྲ། ཀུ་རེ་ཡིན། གསུངས་ཚང་མ་བཀླགས་ཟིན། ཐུགས་རྗེ་ཆེ། འོན་ཀྱང་། བློ་བསྐྱེད་གང་ཡང་ཐོབ་མ་སོང་།
བོད་ཡིག་གི་བྱུང་ཡུན་ཐུང་དུ་གཏོང་མཁན་ནི་བོན་མེད་པར་བཟོ་འདོད་པའི་སྔ་རབས་ཀྱི་མགོ་རིལ་ཁ་ཅིག་གོ
དུས་རབས་བདུན་པའི་སྔོན་དུ་བོད་ཡིག་མེད་ན་བོན་ཆོས་བོད་དུ་ཇི་ལྟར་དར། རིག་གནས་མེད་པའི་གཞུང་ལུགས་ཤིག་དང་གྲུབ་མཐའ་ཞིག་ཡོད་མི་སྲིད།
ཁྱེད་རང་ཚོས་ད་དུང་ལོ་ངོ་ཉིས་སྟོང་ཡན་དུ་བོད་ཡིག་ཡོད་ཚུལ་ཞིག་ལབ་ཀྱི་འདུག འོ་ན། བོད་ཀྱི་ནང་བ་ཚོ་རྫུན་ལབ་མཁན་མ་རེད་དམ། སྡོམ་པ་གང་དུ་ཡོད་དམ། སྟོན་པར་ངོ་ལོག་ཟིན་པ་མ་རེད་དམ། སྐུ་མཁྱེན་ཚང་མས་གསུང་རོགས་གནང་།
དུས་རབས་བདུན་པའི་སྔོན་དུ་ཡོད་པའི་ཡིག་རྙིང་རྙིང་དྲི་ཐུལ་ལེར་ཡོད་པ་ཞིག་ཕལ་ཆེར་སྟོན་རྒྱུ་དཀའ། དེ་ནི་འཇིག་རྟེན་ཅེས་པའི་གོ་དོན་གྱིས་གྲུབ། མ་ཟད་དུས་རབས་བརྒྱད་པའི་སྐབས་སུ་བྲིས་པའི་ཡིག་རྙིང་རྙིང་དྲི་ཐུལ་ལེར་ཅིག་སྟོན་རྒྱུ་ཡོད་དམ། མ་ཟད་ཉེ་འཆར་བོད་ནས་གསར་དུ་ཐོན་པའི་དུས་རབས་བཞི་པ་ལྔ་པའི་སྐབས་སུ་བྲིས་པའི་ཡིག་རྙིང་རེད་ཅེས་ཚན་རིག་པས་བརྟག་དཔྱད་བྱས་འབྲས་བྱུང་བའི་ཐག་ཆད་པའི་གཏམ་ཞིག་དྲ་རྒྱའི་ནང་དུ་ཐོན་ཡོད་འདུག་འོན་ཀྱང་དེ་མིག་སྔར་མ་མཐོང་བའི་བར་དུ་འདི་ཡིན་འདི་མིན་གྱིས་ཤོད་རྒྱུ་ཅང་མེད།
དེ་མིན་དུས་རབས་བདུན་པའི་ཡར་སྔོན་དུ་བརྩམས་པའི་བོན་གྱི་གདམས་ཁྲིད་མང་པོ་ཞིག་ད་ལྟ་བཞུགས་བཞིན་པ་དང་དེ་ལ་སྤྱོད་བཞིན་པ་ཡོད་པས་དེ་ཚོར་གཟིགས་རྟོག་འདྲ་གནང་ན་གང་འདྲ་འདུག
རང་ངོས་རྟག་འཛིན་བདག་འཛིན་ཅན་དེ་ཅུང་ལྷོད་ལ་བབས་ཏེ་གུ་ཡངས་ཞིང་ལྷོད་ལ་བབས་ཏེ་འདྲ་ཐང་གུས་བཀུར་གྱི་བསམ་བློ་ཞིག་གིས་སྟེང་ནས་གཟིགས་རྟོག་གནང་ན་བློ་བསྐྱེད་ཅིག་ཐོབ་ངེས།
མིན་ཤག་ཤག་བྱས་ཏེ་བསྡད་ན་ཐོབ་རྒྱུ་དེ་ལས་མེད།
ད་ཆ་འཇིག་རྟེན་མགོན་པོ་༸གོང་ས་༸་མཆོག་གིས་ཐུགས་དཔྱད་དང་དེ་བཞིན་བོད་ཀྱི་མཁས་དབང་མི་ཉུང་བ་ཞིག་ནས་དུས་རབས་བདུན་པའི་སྔོན་དུ་བོད་ཡིག་ཡོད་པ་ཐག་གིས་བཅད་ཚར་འདུག འོན་ཀྱང་ཁྱེད་ཚོའི་རིགས་ལ་དུས་རབས་བདུན་པའི་སྔོན་དུ་བོད་ཡིག་མེད་པའི་ཁུངས་བཙན་ཚན་རིག་དང་མཐུན་པའི་གཏམ་བཤད་རྩོམ་དེ་འདྲ་ཡོད་ན་རྒྱལ་སྤྱིའི་བོད་རིག་པའི་ཚོགས་འདུར་བཅར་ཏེ་སྒྲོག་སྦྱོང་གནང་ན་གང་འདྲ་འདུག་གམ། དེ་མིན་དྲ་འབུས་བཟི་བའི་དྲ་རྒྱ་འདི་འདྲའི་ནང་དུ་སྐད་ཆ་དེ་རིགས་བཤད་ན་ཅང་ཉན་མཁན་དང་ཆ་འཇོག་བྱེད་མི་དཀོན་སེ་རེད། ཤོད་མཁན་ཀྱང་དྲ་འབུ། ཉན་མཁན་ཀྱང་དྲ་འབུ་རྐྱང་རེད།
ཨེ་གོ་ཐལ
སྲོང་བཙན་ཡར་སྔོན་གྱི་ཡི་གེ་ཞིག་འཐོབ་པར་ང་ཚོས་ཤིན་ཏུ་འབད་ནའང་། ཡིད་སྐྱོ་བ་ཞིག་ལ་སྒྲུང་ལྟ་བུ་ཞིག་ལས་ཅི་ཡང་མ་ཐོབ། སྔར་གྱི་ཁྲམ་བྱང་དང་རྡོ་རིང་། ཏུན་ཧོང་སོགས་ནས་ཀྱང་མ་བྱུང་། དེ་མ་བྱུང་བ་མ་ཟད་ཏུན་ཧོང་ཡིག་རྙིང་དུ་སྲོང་བཙན་ཡར་སྔོན་དུ་ཡི་གེ་མེད་ཚུལ་ཐག་བཅད་དེ་གསུངས་སོང་། དེ་བཞིན་དུ་རྒྱ་ནག་གི་ཐང་ཡིག་ཏུའང་དེ་ལྟར་གསུངས་འདུག གལ་སྲིད་ཡི་གེ་འདི་ཉིད་དུས་རབས་བརྒྱད་པའི་ཁྲི་སྲོང་ལྡེ་བཙན་གྱིས་ས་འོག་ཏུ་རིམ་པ་དགུ་རུ་བཅུག་པ་ཡིན་ནམ། དེ་ཡང་མི་སྲིད་དེ། དུས་སྐབས་དེའི་ཕྱིས་ཀྱི་གཏེར་སྟོན་པ་མང་པོས་བསྟུད་མར་རང་ཉིད་ཀྱི་གཞུང་ལུགས་ས་འོག་དང་བྲག་སྐྱིབས་ནས་འདོན་འགོ་ཚུགས་ཡོད། ཡིན་ནའང་། ད་དུང་ང་ཚོར་སྲོང་བཙན་ཡར་སྔོན་གྱི་ཡི་གེར་བཏབ་པའི་བརྩམས་ཆོས་ཤིག་ཐོབ་མ་བྱུང་། མ་ཐོབ་པ་འདིས་ཡོད་ཚད་མེད་པར་ངོས་འཛིན་དཀའ་ནའང་། རྨི་ལམ་ཞིག་མངོན་འགྱུར་འབྱུང་བར་རྒྱང་ཁད་གྱེས་པ་ནི་དངོས་ཡོད་ཚུལ་ཞིག་རེད།
དུས་རབས་བདུན་པའི་སྔོན་དུ་བོད་ལ་ཡི་གེ་ཡོད་པ་གསལ་བོ་རེད་ཟེར་ན། གསལ་བའི་རྒྱུ་མཚན་དེ་གོང་བཀོད་རྣམས་གཅིག་པུ་ཡིན་ནམ་ཡང་ན་གཞན་པ་ཡོད་ན་འགོད་རོགས་ཞུ། གོང་བཀོད་དེ་ཁོ་ན་ཡིན་ན་ཅི་ཡང་གསལ་ཐུབ་ཀྱི་མི་འདུག ཁྱབ་མེད་ཁོ་ན་རེད་འདུག ཨེ་བདེན་རིག་ལམ་པ་ཞིག་གིས་གཟིགས་དང་གོ་ངེས།
བོན་ལ་ཡོད་པ་ཐམས་ཅད་བོད་ལ་ཡོད་ཅེས་ན་སྐྱོན་ཆ་ཅི་འདུག་གམ།
དེ་ལ་སྡང་དགོས་དོན་ཅང་མ་མཐོང། བོན་པོ་ཚོས་བོད་ལ་ཡོད་ཅེས་ཤོད་པ་ལས། བོན་ལ་ཡོད་བོན་གྱི་ཡིན་ཟེར་གྱི་མི་འདུག་གཱ། འོ་ན་བོད་ཀྱི་ཡོད་ཚད་རྒྱ་གར་གྱི་ཡིན་ཞེས་བརྗོད་དགོས་སམ། གཅིག་བྱེད་ན་དེ་ལྟར་འདོད་དགོས་པའང་མཐོང། གང་ཡིན་ཟེར་ན་རྒྱ་གར་ནི་ང་ཚོའི་དགེ་རྒན་ཡིན། དགེ་ཕྲུག་ལ་ཡོད་པ་ཐམས་ཅད་དགེ་རྒན་ལ་བསྟེན་ནས་བྱུང་བས། དེ་ཡང་གཏན་ཚིགས་ཡང་དག་ཞིག་ཏུ་མཐོང།
བོད་ཁམས་འདི་ཡང་རྒྱ་གར་གྱི་ཡིན་ཟེར་ནའང་མ་ཆོག་པ་གང་ཡང་མེད། སྟོད་གངས་རིན་པོ་ཆེ་ཡང་རྒྱ་གར་གངས་རི་ཞེས་བོད་མི་ཚོས་བཤད་ཀྱི་འདུག དེ་ལྟར་ན་བོད་ཀྱི་ཐམས་ཅད་རྒྱ་གར་གྱི་ཡིན་ཟེར་ན་ང་ཚོར་གཏན་ཚིགས་རྒྱུ་མཚན་ཡང་དག་ཅིག་མི་འདུག་གམ།
དང་པོར་བོད་ཡིག་ནི་འཛམ་གླིང་གི་སྐད་ཡིག་རྣིང་ཤོས་བཅུ་གཉིས་སུ་ཡོད་པའི་ནང་ནས་གཅིག་ཆགས་ཡོད།
གཉིས་པར་ཐོན་མིས་བོད་ཡིག་གཏན་ལ་ཕབས།
གསུམ་པར་ཐོན་མིས་བོད་ཡིག་ལ་ལེགས་བཅོས་གནང།
བཞི་པར་ཐོན་མིས་བོད་ཡིག་གཏན་ལ་ཕབས་མེད་བོད་ཡིག་རང་བཙན་པ་རེད། སུམ་རྟགས་ཀྱི་སྐོར་འདི་རྒྱ་གར་ལ་དཔེ་བླངས་ནས་བསྒྱུར་བཅོས་བྱས།
ལྔ་པ་དྲུག་པ་བདུན་པ་ལས་སོགས་ནས་རིམ་གྱིས་མཐར་ཐོན་མི་མི་ཞིག་ཡིན་མིན་དང་་གླིང་འདིར་བྱུང་ཡོད་མེད་ཀྱི་ས་མཚམས་ལ་སླེབས།
སློབ་དཔན་ཐོན་མིའི་ཡར་སྔོན་དུའང་།བོད་ལ་ཡེ་གེ་ཡོད་པ་ཧ་ཅང་གསལ།ཡིན་ཡང་རྒྱལ་པོ་ལྷ་ཐོ་ཐོ་རིའི་སྐབས་སུ་གསུང་རབ་འགའ་བོད་དུ་བྱུང་དེ་དག་བོད་ཡིག་ཡིན་པས་རྒྱུ་མཚན་གསལ་བོ་ཞིག་དང་ཁུངས་ཡང་དག་ཅིག་ཡོད་དམ།
ཐོན་མི་བཀའ་དྲིན་ཅན་གྱི་གོང་དུ་བོད་ལ་ཡི་གེ་ཡོད་པའི་དབང་དུ་བྱས་ན།
བོད་རིགས་ཞང་གཞུང་རྨར་ཡིག་དང་། རྒྱ་གར་ན་ག་རའི་ཡི་གེ་གཉིས་ཀ་ལ་གཞིར་བཞག་ནས་ཐོན་མི་མཆོག་གིས། གསར་བཅོས་་ཆེན་མོ་ཅིག་གནང་པ་ཡང་ཡིན་སྲིད།
རྒྱ་གར་ནས་ཀ་ཁ་ག་ངའི་སྒྲ་གདངས་གོ་རིམ་གཙོ་བོར་བསྟུན་པ་དང་། རྨར་ཡིག་ནས་ཀ་ཁ་ག་ངའི་ཡིག་གཟུགས་དང་། གཞན་ལ་མེད་པའི་བོད་ལ་སྔར་ཡོད་ཡི་གེ་ཙ་ཚ་ཛ་ཝ་ཞ་འ་རང་སོར་བཞག་ནས། རྒྱ་གར་ཡི་གེའི་སྲོལ་ལ་མེད་པའི། ཚེག་གིས་བར་ཕྱེ་མི་འཁྲུགས་གསལ་བར་སྙོམས། །གུག་འགྲེང་ན་རོ་ཞབས་ཀྱུ་ ཡ་སྟ་ཡིས། །སྐབས་སྦྱོར་དོན་དུ་ཡན་ལག་རྒྱས་པར་བཏགས། །གསུངས་པ་འདི་བདེན་པར་རྩིས་ན་གང་འདྲ་འདུག་གམ། ད་དུང་དཔྱད་པར་འཚལ། །ཐོན་མིའི་བསྟན་པ་ཡུན་བརྟན་ཤོག །
དྲ་བ་འདི་ནང་http://ti.gzznews.com/Html/LiShi/ShiLun/3357.htmlགཟིགས་དང་སྔོན་བོན་ཡིག་གཟུགས་ཐམས་ཅད་བཀོད་འདུག། ངས་དྲ་ངོས་སུ་སྤེལ་ཐབས་བྱས་ཀྱང་ཐུབ་མ་སོང་དོ་སྣང་ཡོད་མཁན་ཚོའི་གཟིགས་རོགསཞུ།
སྤྱིར་ཐོན་མིའི་ཡར་སྔོན་དུ་བོད་ལ་ཡི་གེ་མེད་པར་འདོད་མཁན་ཧ་ཅང་དཀོན་པོ་ཡིན་ལ། མེད་པར་འདོད་ན་དངོས་ཡོད་ཀྱི་ལོ་རྒྱུས་དང་ཡང་མཐུན་གྱི་མི་འདུག འོན་ཀྱང་། ཐོན་མིའི་ཡར་སྔོན་དུ་ཡི་གེ་ཡོད་པ་དེ་ཙམ་གྱིས་སྣང་བ་གནམ་ལ་འཕྱར་ཆོག་པ་ཞིག་ནི་གཏན་ནས་མིན།ཐོན་མིས་བོད་ཡིག་གསར་བཟོ་བྱས་པ་མིན་པའི་སྒྲུབ་བྱེད་དུ་འང་འགྲོ་གི་མ་རེད།ང་ཚོའི་གཞུང་ལུགས་ཆེན་པོ་དག་གི་ཁྲོད་དུ་ཤིང་རྟའི་སྲོལ་འབྱེད་ཀྱི་གོ་དོན་སོགས་འཇོག་དུས།རྣམ་པ་ཀུན་ཏུ་ན་སྔར་མེད་གསར་བ་ཞིག་གི་སྲོལ་ཡིན་མི་དགོས་པ་དེ་བཞིན་ཡིན།༢སྤྱིར་སྟོན་པ་གཤེན་རབ་ཟེར་བ་དེ་ག་དུས་ཞིག་ལ་བྱོན་པ་ཡིན་མིན་རང་གཞན་ཚང་མ་ལ་ནག་ཁུང་ཡིན་པས།དཔྱད་དགོས་རྒྱུ་ངོ་མ་ནི་དེ་ཡིན་པར་འདོད།ད་ལྟའི་བན་བོན་གཉིས་ཀྱིས་སོ་སོ་རང་རང་གི་སྟོན་པའི་བཀའ་ཡིན་ཟེར་སའིབཀའ་འགྱུར་སྐོར་ལ་གཅིག་བལྟས་ན།ཡང་ན་བན་དེ་ཚང་གིས་བོན་སྟོན་ལ་རྐུན་མ་བྱས་ཡོད་པ་དང་།ཡང་མིན་ན།བོན་གྱིས་ནང་པའི་སྟོན་པ་ལ་རྐུན་མ་བྱས་པ་གང་རུང་ལས་འོས་མེད།དོན་དངོས་གང་ཡིན་མི་བསམ་པར་སྙན་སྙན་འགྲིག་འགྲིག་ཅིག་བཤད་བསྡད་ན་དོན་སྙིང་ཅང་མི་འདུག འདི་སྐོར་ནས་མང་པོ་བཤད་རྒྱུ་ཡོད། འོན་ཀྱང་དེ་རིང་དེ་ཙམ་ཡིན།
ད་དུང་ཡང་དུས་རབས་བདུན་པའི་གོང་དུ་བོད་ཡིག་ཡོད་མེད་དང་། བོད་ཡིག་དེ་ཡང་བོན་གྱི་ཡིན་ཚུལ་གྱི་རྩོད་རྙོག་རྐྱང་རྐྱང་གླེང་ནས་སྡོད། བོན་ལ་མ་དགའ་བ་མིན་ཡང་བོད་ཀྱི་ཡོད་ཚད་བོན་ལ་གཏུག་དགོས་ན། དེ་ཡང་གནས་ལུགས་མེད་པའི་ཧམ་བཤད་རང་རེད་བསམ། བོན་ཚོས་འོལ་མོ་ལུང་དང་། ཞང་ཞུང་སོགས་སུ་འབོད་པ་དེ་ཚོའི་གནས་ཙམ་ཡང་གར་ཡོད་ཀྱི་ངོས་འཛིན་བྱ་ཐུབ་ཀྱི་མེད་པས། བོད་ཀྱི་རྩ་དོན་ཐད་ཕན་ཐོགས་མེད་པའི་རྩོད་རྙོག་དེ་ཚོ་གཡུག་བཞག་ན་རང་གཞན་གཉིས་ཀར་དགེ་མཚན་ཆེ་བར་མཐོང་།