ཟླ་འདིའི་ཕྱི་ཚེས་ ༡༤ ནས་དུས་ཡུན་ཟླ་ཕྱེད་རིང་༸གོང་ས་མཆོག་གིས་ཡུ་རོབ་རྒྱལ་ཁབ་ ༣ ནང་ཆིབས་བསྒྱུར་གྱིས། མང་ཚོགས་ལ་བཀའ་སློིབ་དང་། ཁུལ་དེའི་ཆབ་སྲིད་དང་ཆོས་ལུཊ་མི་སྣར་མཇལ་འཕྲད་གནང་རྒྱུ་རེད།
ཟླ་འདིའི་ཕྱི་ཚེས་ ༡༤ ནས་དུས་ཡུན་ཟླ་ཕྱེད་ཙམ་གྱི་རིང་༸གོང་ས་མཆོག་དབྱིན་ཡུལ་དང་སཱི་ཁོ་ཊི་ལན་ཌི། ཨི་ཊ་ལི་བཅས་ཀྱི་ནང་མཛད་འཕྲིན་ཁག་བསྐྱང་རྒྱུ་ཡིན་པ་ལྟར། ཟླ་འདིའི་ཕྱི་ཚེས་ ༡༤ ཉིན་༸གོང་ས་མཆོག་བཞུཊ་སྒར་ནས་ཆིབས་ཐོན་གྱིས་མཁའ་ལམ་བརྒྱུད་དབྱིན་ཇིའི་རྒྱལ་ས་ལོན་ཊོན་དུ་འབྱོར་རྒྱུ་ཡིན་འདུག་ལ། ཚེས་ ༡༥ ཉིན་ལོན་ཊོན་ཚོང་ལས་སྡེ་ཚོགས་ཀྱི་ཚོགས་མི་ཚོར་བཟང་སྤྱོད་ཐོག་བཀའ་སློབ་བསྩལ་རྒྱུ་ཡིན་འདུག་ལ། སྐབས་དེར་གསར་འགོད་གསལ་བསྒྲགས་ཤིག་ཀྱང་བསྐྱང་རྒྱུ་ཡིན་འདུག
ཚེས་༡༦ཉིན་མེན་ཆེ་སི་ཊིར་(Manchester Arena) ནང་གཞོན་སྐྱེས་ཚོར་༼འཁུར་བླངས་ཏེ་མི་བཟང་པོ་ཆགས་ཐབས་༽ཞེས་པའི་བརྗོད་གཞིའི་སྟེང་བཀའ་སློབ་དང་། གཞོན་སྐྱེས་ཁག་ཅིག་ལ་བྱམས་བརྩེའི་གཟེངས་རྟགས་བསྩལ་རྒྱུ། ཚེས་༡༧ནས་༡༨ཉིན་བར་ཁུལ་དེའི་རྩེད་ཐང་དུ་མང་ཚོགས་ལ་བཀའ་ཆོས་བསྩལ་རྒྱུ། ཚེས་༡༩ཉིན་ཝེ་སི་མེན་སི་ཊར་གཙུག་ལག་སློབ་གྲྭའི་ (University of Westminster) ནང་མང་གཙོའི་རིན་ཐང་ཞེས་པའི་བརྗོད་གཞིའི་ཐོག་བཀའ་སློབ་དང་། རཱོ་ཡཱ་ཨལ་བྷ་ཊི་ཚོགས་ཁང་དུ་༼འགྱུར་བ་ངོ་མ་དེ་སེམས་ནས་ཡོང་དགོས་༽ཞེས་པའི་བརྗོད་གཞིའི་བཀའ་སློབ། ཚེས་༢༠ཉིན་ལོན་ཊོན་དཔལ་འབྱོར་དང་ཚན་རིག་སློབ་གྲྭའི་ཚོགས་ཁང་དུ། མང་ཚོགས་ལ་བཟོད་སྒོམ་བསྟེན་ཕྱོགས་ཐོག་བཀའ་སློབ་དང་། བོད་ས་མ་ཤོར་གོང་བོད་ལ་བསྐྱོད་མྱོང་བའི་མི་སྣ་ཁག་ཅིག་གི་ནང་མིར་མཇལ་འཕྲད་བཅས་གནང་རྒྱུ་ཡིན་འདུག
ཉིན་དེར་དབྱིན་ཇིའི་གྲོས་ཚོགས་འོག་མའི་ཚོགས་གཙོ་མཆོག་གིས་༸གོང་ས་མཆོག་གྲོས་ཚོགས་ནང་གདན་ཞུས་ཀྱིས་ཉིན་གུང་གསོལ་ཚིགས་འདེགས་འབུལ་ཞུ་རྒྱུ་ཡིན་པ་མ་ཟད། སྐབས་དེར་༸གོང་ས་མཆོག་གིས་གྲོས་ཚོགས་འཐུས་མི་བརྒྱ་ཙམ་ལ་བོད་དོན་སྐོར་བཀའ་སློབ་བསྩལ་རྒྱུ་དང་། ཞོར་དུ་ས་གནས་བོད་པ་དང་སོག་པོ། བལ་ཡུལ་ནང་པ་བཅས་ལ་བཀའ་སློབ་བསྩལ་རྒྱུ་ཡིན་འདུག
ཚེས་ ༢༢ ནས་ ༢༣ ཉིན་བར་སི་ཁོ་ཊི་ལན་ཌའི་ཨི་ཌིན་སྦག་ (Edinburgh) ལེག་ཅར་(Lecture) དུས་དྲན་སྟེང་། ཆོས་དང་མ་འདྲེས་པའི་འཛམ་གླིང་ཧྲིལ་པོའི་ཀུན་སྤྱོད་ཞེས་པའི་བརྗོད་གཞིའི་བཀའ་སློབ་དང་། ཡུལ་དེའི་ཆབ་སྲིད་པ་དང་ཆོས་ལུགས་མི་སྣར་མཇལ་འཕྲད། ཚེས་༢༣ཉིན་ཡུལ་དེའི་ཨིན་ཝར་ནེ་སི་ (Inverness) ས་གནས་སུ་མང་ཚོགས་ལ་མི་བཟང་པོ་ཡོང་ཐབས་སྐོར་བཀའ་སློིབ། ཚེས་ ༢༧ ནས་ ༢༨ ཉིན་བར་ཨི་ཊ་ལིའི་གྲོང་ཁྱེར་ (Milano) ནང་མང་ཚོགས་ལ་རྗེ་ཙོང་ཁ་པ་ཆེན་པོས་མཛད་པའི་༼ལམ་གཙོ་རྣམ་གསུམ་༽བཀའ་ཁྲིད་དང་། ཆོས་ལུགས་ལ་མ་བརྟེན་པར་བདེ་སྐྱིད་འཚོལ་ཐབས་ཞེས་པའི་བརྗོད་གཞིའི་ཐོག་བཀའ་སློབ་བཅས་བསྩལ་རྒྱུ་ཡིན་འདུག
གསར་འགོད་པ། དཔལ་ལྡན།
