ཕན་མ་ཐོག་ན་གནོད་མི་བསྐྱེལ་བ་དེ་ངའི་དམ་བཅའ་ཡིན།

་་་་་་ངས་འགྲོ་བ་འདྲ་མཉམ་དང་བོད་མི་རིགས་ཀྱི་ཁེ་དབང་རྩོད་ཀྱི་ཡོད།

བོད་མི་རིགས་ཀྱི་རང་དབང་དང་ཞི་བདེའི་ཆེད་དུ་ངའི་མི་ཚེ་ནང་དུ་དཀར་ཐིགས་ཙམ་ཞིག་འཇོག་ཐུབ་སོང་བ་ཡིན་ན། ང་རང་ལ་མི་ངན་དང་ཁྲེལ་མེད། ནག་ཅན། མི་རིགས་ཤིག་གི་ཉེས་ཅན་པ། མི་ཁ་དང་འཕྱ་དམོད་གང་ཞིག་བྱས་ཀྱང་། ང་རང་སྒེར་ངོས་ནས་དེ་ལ་སྡང་སེམས་དང་འཁོན་ལན་གཏན་ནས་མེད་པ་མ་ཟད། སེམས་ཁོང་རུས་པའི་གཏིང་ནས་བློ་འགྱོད་སྤུ་ཙམ་མེད། ནམ་ཞིག་ང་རང་ས་སྒང་འདི་དང་ཁ་གྱེས་ནས་སོང་རྗེས་སུ། བོད་མི་ཆེས་མི་ཉུང་བ་ཞིག་གིས་ངས་བོད་མི་རིགས་ཀྱི་ཞི་བདེ་དང་རང་དབང་། ༧གོང་ས་མཆོག་བོད་དུ་གདན་འདྲེན་བྱེད་པའི་ཆེད་དུ་སོང་ཟིན་པའི་ལེའུ་དེ་ལ་ཕྱིར་དྲན་རེ་བྱེད་མཁན་བྱུང་ན་དེ་གས་འཐུས་པ་ཡིན། གཞན་ང་རང་སྒེར་ལ་འཇིག་རྟེན་འདི་ན་མི་སུ་ལའང་འཁོན་ལན་དང་འགྲན་སེམས། ཞེ་སྡང་སོགས་གཏན་ནས་མེད་པར་ཞི་བའི་འཐབ་རྩོད་ཁོ་ནའི་ལམ་ཕྲན་ལས་རྒྱལ་བར་ཡིད་ཆེས་ཀྱི་སྨྱོས་པ་ཁོ་ན་ལས་གཞན་ཅི་ཡང་མེད་པ་རིགས་སུ་སྐྱེ་བའི་སྙིང་གི་སྤུན་ཟླ་ཡོངས་ལ་གདམས་པའི་ཆེས་ཐ་མའི་བསྒྲགས་ཚིག་ལགས།