་་་་་་་ང་རང་ཆུང་དུས་ནས་གཉོར་སྐྱོང་བྱས་པའི་དྲིན་ཆེན་ཨ་མྱེས་འདས་པ་ཁ་པར་ལས་ཐོས་རྗེས།
ཆུང་ནས་སྐྱོང་བའི་དྲིན་ཆེན་ཨ་མྱེས་ལགས།།
དེ་རིང་བདག་ནི་གཞན་ཡུལ་ཁྲིམས་འོག་ན།།
རང་དབང་བྲལ་བའི་ཁང་ཆུང་ཞིག་གི་ནང་།།
མི་རིགས་བདེ་སྡུག་ཆེད་དུ་བསྡད་ཡོད་ཀྱང་།།
ཁ་པར་ཐོན་ཐལ་ཟེར་བའི་གླུ་སྐད་དེས།།
ང་རང་གློ་བུར་ཉལ་ཁྲིའི་སྒང་ནས་བླངས།།
ཨང་གྲངས་སྟེང་ལ་བལྟས་དུས་ཕ་ལོ་རེད།།
ཕ་ལོའི་གསུང་སྐད་ནམ་རྒྱུན་ཅུང་འདྲ་ཡང་།།
ཚིག་གི་དོན་སྙིང་རྒྱུན་དང་མི་འདྲ་བར།།
ཨ་མྱེས་ཁ་སང་གྲོངས་འདུག་ཟེར་བ་དང་།།
འཆི་བའི་གོ་རིམ་ཧ་ཅང་སྟབས་བདེ་ཟེར།།
མི་ནི་མི་བསྡོད་འཆི་བ་གཏན་འཁེལ་ཡིན།།
འཆི་ཁར་ཉེ་དུའི་བསྐོར་བ་བོད་མིའི་སྲོལ།།
འོན་ཀྱང་ང་དང་བཅས་པའི་ཁྱེད་ཀྱི་བུ།།
ང་ཡི་ཕ་ལོ་ངེད་ཅག་ཁྱེད་འགྲམ་མེད།།
དེ་ལྟར་བསམ་ནས་ཁྱེད་རང་སྐྱོ་ཡོད་ངེས།།
འོན་ཀྱང་ང་ཚོ་ཕྱི་རོལ་ཡུལ་གནས་ཀྱང་།།
སེམས་ཀྱི་སྨོན་འདུན་ཁྱེད་དང་ལྷན་དུ་ཡོད།།
ཁྱེད་ཉིད་བཞུད་པའི་འགྲོ་ལུགས་ཡག་གི་ཟེར།།
ནད་དང་གཟེར་གྱི་མང་བོ་མ་འཚེ་སྐད།།
ཁྱེད་ཀྱིས་ཁ་ཆེམས་ཡག་པོ་བཞག་འདུག་སྐད།།
དེ་དག་རེ་རེ་ཐོས་པའི་རྗེས་ཀྱི་ངས།།
དྲིན་ཆེན་ཕ་ལོར་སེམས་གསོའི་ཕྲན་པུ་བྱས།།
འཇིག་རྟེན་སྲིད་པའི་འགྲོ་ལུགས་ཅུང་ཙམ་ཞུས།།
འགྲོ་བ་མི་ཡི་ཚེ་ཚད་ལོངས་པ་དེར།།
སེམས་སྡུག་བྱེད་ཀྱང་སྙིང་བོ་མེད་པ་ཡིས།།
ང་རང་གནས་སར་གཞན་དབང་ཆེ་ན་ཡང་།།
ཁྱེད་ཀྱི་རྣམ་ཤེས་དག་ཞིང་འགྲོ་བའི་ཆེད།།
སེམས་ཀྱི་སྨོན་ལམ་སྐྱབས་གནས་ཀུན་འདུས་མཆོག།
གངས་ཅན་༧ལྷ་སྐལ་འཕགས་མཆོག་སྙིང་རྗེ་ཅན།།
དེ་ཡི་མཚན་ནས་འབོད་བཞིན་སྨོན་ལམ་འདེབས།།
སྔོན་བསགས་ལས་ཀྱི་ཁྱིམ་གཅིག་ཉེ་དུར་སྐྱེ།།
ད་ནི་དེ་ཡི་ལས་འཕྲོ་རྫོགས་གྱུར་ནས།།
ཁྱེད་ཉིད་མི་རྣམས་འཇིགས་སའི་གནས་ཡུལ་དེར།།
ཕྱི་མའི་རྒྱལ་ཁམས་འགྲིམ་འགོ་བཙུགས་པ་དང་།།
ཚེ་འདིས་ཅི་བསགས་རང་གིས་ཁུར་ནས་བཞུད།།
དེ་འཐུས་ཡོད་ཚད་ཁྱོད་ཉིད་གཅིག་བུར་དབང་།།
ང་ཡིས་ཁྱེད་ཀྱི་རྣམ་ཤེས་བར་དོ་ནས།།
ངན་སོང་མེད་པར་ཐར་བའི་ལམ་སྣེ་ཞིག།
ཟིན་པར་འཇམས་པའི་དབྱངས་ལ་གསོལ་བ་འདེབས།།
སླར་ཡང་གངས་རིའི་ལྗོངས་སུ་ཆོས་ལྡན་གྱི་ཁྱིམ་ཚང་ཞིག་ལ་སྐྱེ་བ་ཡག་པོ་ཞིག་ལེན་ཐུབ་པར་སྨོན་ལམ་འདེབས།
ཨོྃ་མཎིཔདྨེ་ཧཱུྃ། དག་ཞིང་དུ་སྐྱེ་བར་སྨོན་་་་་་གདུང་སེམས་མཉམ་སྐྱེད་ཡོད་་་