ཀཱི་ལུང་ཐུབ་བཟང་།
དད་དམ་གྱི་རང་མདངས་གཅིག་ཏུ་གྱུར་བའི་ཆོས་གྲོགས་ཚོར་བསམ་ཚུལ་ཁ་ཤས་ཞུ་འདོད་བྱུང་། དུས་ཀྱི་གོམ་སྟབས་ནི་རི་གཟར་གྱི་འབབ་ཆུ་བཞིན་འགྲོ་བ་དང་ཆབས་ཅིག དེར་གནས་པའི་འགྲོ་བ་མིའི་འདུ་ཤེས་ཀྱི་འཕེལ་རིམ་ལའང་འགྱུར་བ་ཤུགས་ཆེན་ཕྱིན་ཏེ། སྔོན་ཆད་རྟ་ལམ་ཉིན་གཅིག་ཙམ་གྱི་གནས་ཚུལ་གོ་རྟོགས་ལས་དེ་རིང་འཛམ་གླིང་ཤར་ནུབ་ཀྱི་འཕྲིན་གསར་གོ་སླ་ཞིང་རྟོགས་མྱུར་བའི་བརྡ་འཕྲིན་དུས་རབས་ཀྱིས་ས་ལྒང་ཆུང་དུ་བཏང་བའི་དུས་ཚོད་ཅིག་ལ་སླེབས་ཡོད་པ་མཁྱེན་གསལ་རེད།
དུས་གཉན་འདི་འདྲ་བ་ཞིག་གི་སྐབས་ལ་སྤྱོད་ངན་ཐམས་ཅད་རྒྱ་ཡན་དུ་བཏང་སྟེ། མ་གོ་མ་ཐོས་ཟོལ་གྱིས་འདུག་པ་ནི་འགན་འཁྲི་མེད་པའི་བྱ་སྤྱོད་དམ་རང་མགོ་རང་གཅོག་གི་ལས་ཤིག་ཡིན་སྟབས། འགན་འཁྲི་ནི་མི་རེ་ངོ་རེའི་ཕྲག་ཏུ་ཡོད་པ་བཞིན་གནད་དོན་འགའི་ཐད་དུ་བསམ་བློ་ཞིག་བཏང་རྒྱུ་བྱུང་། ཚོར་ཤུགས་རྣོ་བའི་གོ་ལའི་ཁྱིམ་ཚང་འདིའི་འགྲོ་བར་འབྲེལ་འདྲིས་བྱེད་དགོས་ན་དེ་དག་གི་འདུ་ཤེས་ལ་བརྩི་བཀུར་དང་དགའ་ཕྱོགས་ལ་བསྟུན་མཁས་བྱེད་དགོས་པ་སྨོས་མེད་རེད།
དངོས་པོའི་དཔལ་ཡོན་ཁོ་ནས་འགྲོ་བ་མིའི་འཚོལ་སྙེགས་ཀྱི་རྨི་ལམ་དེ་དུས་ནམ་ཡང་མི་འགྲུབ་པར། དྲང་བདེན་དང་ཞི་བདེ། ཆོག་ཤེས། བཟོད་སྒོམ་སོགས་ཀྱི་འབྱུང་ཁུང་ནང་བསྟན་རིག་གཞུང་ཡིན་པའི་ཡིད་ཆེས་ཡོད་ན། བསྟན་པ་རྣམ་དག་འཛིན་སྐྱོང་ཁྱབ་སྤེལ་གྱིས་སེམས་ཅན་ཀུན་ལ་བླ་ན་མེད་པའི་ཞབས་འདེགས་ཞུ་རྒྱུ་ནི་དེར་ཞུགས་པའི་སྐྱེ་བོ་རེ་རེ་བཞིན་དང་བླངས་ཀྱི་འགན་འཁྲི་ཆགས་ཡོད་པ་ཤེས་དགོས། འདི་ཡན་ནི་རྩོམ་ཡིག་འདིའི་གླེང་གཞི་ཡིན།
མདོ་མེད་གྲྭ་རྐྱང་འཁྱམ་པོ་ཞིག་བསྟན་པ་གང་གི་གྲྭལ་མཐར་སྐྱེས་ས་དེ་གསང་ཆེན་སྔ་འགྱུར་རྙིང་མའི་ཆོས་རྒྱུད་འདི་ཡིན་པས་དེར་འདུ་ཤེས་བཟང་བོའི་བསམ་འཆར་ནི། སྤྱིར་ལམ་བསླབ་པ་གསུམ་གྱི་ཉམས་ལེན་དང་ལུང་སྡེ་སྣོད་གསུམ་ལ་འཆད་ཉན་གནང་པའི་མཁན་སྤྲུལ་བླ་སློབ་དགེ་འདུན་སོགས་བསམ་གྱིས་མི་ཁྱབ་པ་མངོན་པར་སྟོད་པའི་གནས་སུ་ བཞུགས་ཡོད་པ་ནི་སྨོས་མ་དགོས་སོ།།
འོན་ཀྱང་ཆོས་ཟབ་ས་ན་ནག་པོའི་བདུད་ཀྱང་ཟབ་ཟེར་བ་བཞིན་དེ་དང་མཉམ་དུ་བསྟན་པ་འཛིན་པ་ལས་བསྟན་བཤིག་མང་བའི་དུས་སྐབས་ཤིག་ལ་འཁེལ་ཡོད་པ་ནི་སུས་ཀྱང་སྙོན་དུ་མེད། མ་གཞི་བོད་རྒྱུད་ནང་བསྟན་ཆོས་བརྒྱུད་ཚོར་གཅིག་གྱུར་གྱི་སྒྲིག་གཞི་དེ་ཙམ་མེད་ལ། རྙིང་མ་པ་ནི་དེ་ལས་ཀྱང་སྒྲིག་འཛུགས་ཀྱི་ཚད་གཞི་ཅུང་དམའ་བའི་ཆོས་རྒྱུད་ཅིག་རེད། ང་རང་གི་རྨོངས་བློར་འཆར་སྣང་ལྟར་ན་ཆོས་རྒྱུད་འདིས་སྒྱུར་བཅོས་བྱེད་དགོས་པའི་གནད་དོན་མང་པོ་ཞིག་ཡོད་ལ་དེའི་ནང་ནས་ཁག་གཅིག་ཞུས་ན།
༼ ༡ ༽སྔ་འགྱུར་བའི་ཡང་སྲིད་ངོས་འཛིན་ལམ་ལུགས་ལ་བསྒྱུར་བཅོས་བྱས་ཏེ། གཅིག་གྱུར་ངོས་འཛིན་ཁྲི་འདོན་གྱི་ཐབས་ལམ་བཙལ་ཏེ་རང་ཉིད་ཀྱིས་རང་ཉིད་ངོས་འཛིན་བྱེད་པ་དང་བླ་དཔོན་སྦྱིན་བདག་གི་འཛུམ་རིས་བརྒྱུད་དེ་ཡང་སྤྲུལ་ངོས་འཛིན་བྱེད་པ། ཡང་སྤྲུལ་ཡོད་བཞིན་ཡང་སྤྲུལ་གཞན་ངོས་འཛིན་བྱེད་པ། དེ་བཞིན་ཉེ་ཁོར་གྱི་བརྩི་བཀུར་ཅུང་ཟད་ཡོད་པའི་མི་གྲོངས་ཚད་ལ་ཡང་སྲིད་འཚོལ་བ་སོགས་སྲོལ་ངན་འདི་རིགས་ལ་སྟངས་འཛིན་བྱེད་ཐུབ་དགོས།
༼ ༢ ༽ དགོན་པ་བདག་གཉེར་གྱི་རྩ་བའི་ཁ་ཕྱོགས་ལ་ཆོས་དང་མཐུན་པའི་འགྱུར་བ་བཏང་ནས་བསྟན་པའི་སྙིང་པོ་བཤད་སྒྲུབ་གཉིས་པོ་བྱས་ཏེ། དགོན་པ་འཛིན་སྐྱོང་ཚོང་ལས་སུ་སྒྱུར་བཞིན་པའི་རང་སྣང་གང་དྲན་གྱི་སྤྱོད་ངན་ཡ་ང་བ་ཁག་དང་ཆོས་ལུགས་ཀྱི་བྱེད་སྒོ་གོམ་སྲོལ་ཙམ་གྱི་རྒྱུན་འཛིན་པར་བྱེད་པ་མཇུལ་སྒྲིལ་བྱ་དགོས།
༼ ༣ ༽རྒྱལ་ཡོངས་ཆོས་ཁྲིམས་ལྷན་ཚོགས་འཛུགས་ཐུབ་པ་བྱས་ནས་རྒྱལ་ཕྱི་ནང་གང་སར་ནས་དད་ལྡན་རྣམས་ཀྱི་སེམས་ཁམས་དཀྲུགས་པའི་ཁྱིམ་པ་སུན་འབྱིན་གྱི་ལས་འདྲ་མིན་གྱིས་བསྟན་པའི་ཞབས་འདྲེན་བྱེད་མཁན་རིགས་གཙང་སེལ་བྱེད་པ་དང་། ཆེས་ཁ་ན་མ་ཐོ་བའི་ཁྱིམ་སུན་འབྱིན་པ་དག་ཐ་ན་རྒྱལ་ཡོངས་སྔ་འགྱུར་ཆོས་རྒྱུད་དེའི་སྒྲིག་འཛུགས་ཁྱབ་ཁོངས་ལས་ཕྱིར་བཏོན་ཁྱབ་བསྒྲགས་བྱེད་དགོས།
༼ ༤ ༽རྒྱལ་ཡོངས་སློབ་སྟོན་ལྷན་ཁང་འཛུགས་ཐུབ་བྱས་ཏེ་བསླབ་གཞི་གཅིག་གྱུར་དང་བསླབ་གཞི་དང་བསྟུན་པའི་མཚན་གནས་དང་། མཚན་གནས་གང་ཞིག་ཕྱིར་བསྡུ་བྱེད་རྒྱུ་ཡོད་པ་དང་མེད་པའི་ཁྱད་པར་སོགས་གཅིག་གྱུར་གསལ་ཁ་ལྡན་པ་གཏན་འབེབས་བྱེད་དགོས།
༼ ༥ ༽གྲྭ་བའི་སྡོམ་པ་ཉམ་ཚེ་སྔགས་པ་ཟེར་པའི་མིང་སྙན་པོ་དེ་བསྡུ་གསོག་རྒྱབ་སྟེ་ཁྱིམ་པ་སྔགས་པ་དང་ཁྱིམ་པ་ཕལ་བའི་དབྱེ་མཚམས་ཤེས་ཡོན་དང་ཀུན་སྤྱོད་གཉིས་ཀའི་སྒོ་ནས་ཁ་གསལ་བཟོ་པའི་མ་ཚད། རབ་བྱུང་རྣམས་ཀྱི་ནབས་བཟའ་བཞེས་ཕྱོགས་ལའང་ཅིག་གྱུར་གཏན་འབེབས་ཐད་ཐུགས་བསམ་བཞེས་དགོས།
༼ ༦ ༽ རྒྱལ་ཡོངས་རྙིང་མའི་དབུ་འཛིན་གྱི་འོས་ཆོས་དང་དབུ་འཛིན་དུ་ཕེབས་སྟངས། དེ་བཞིན་ཕྱགས་ལས་གནང་ཕྱོགས་དང་དབུ་འཛིན་ཁྲི་ཡུན་སོགས་ཁ་གསལ་གཏན་འབེབས་གནང་རྒྱུ།
༼ ༧ ༽སྔ་འགྱུར་རྒྱལ་ཡོངས་གྲོས་ཚོགས་ཆེན་མོ་ཞེས་པའི་བསྟན་འཛིན་གྱི་ཚོགས་སྡེ་ཞིག་འཛུགས་ཐུབ་ན་གོང་འཁོད་གནད་དོན་འདི་དག་དང་། འདི་ལས་གཞན་ཅི་ཡོད་ཐག་གཅོད་ཐུབ་པའི་གཞི་རྩའི་གོམ་པ་དང་པོ་ཡིན་པས། དུས་ཚོད་སྐར་ཆ་གཅིག་ཀྱང་ཕྱིར་འགྱངས་བྱ་མི་རུང་ལ་ཆེད་བརྗོད་འདིའི་བསྟན་དོན་གཙོ་བོ་དང་ཞུ་སྐུལ་གཙོ་བོ་ཡང་དེ་ཡིན།
འདི་ཆེན་པོའི་མཚན་འཆང་ག་གེ་མོས་གནང་སྦྱིན་གསོལ་རས་མི་སྩོལ་ལ་འབད་མེད་ལྷུན་གྲུབ་ཀྱིས་ནི་དེ་བས་ཀྱང་མི་འོང་། དེས་ན་ཤཱཀྱ་སེང་གེའི་བསྟན་པར་གོ་བ་རྙེད་ཀྱང་ལྷག་བསམ་ལྡན་པའི་དགེ་འདུན་པ་ཁག་གཅིག་གིས་རྩོད་ལེན་བྱེད་དགོས་པའི་དུས་ལ་བབ་ཡོད་པ་རེད།།
ཆོས་གྲོགས་ཚོ་ང་ཚོའི་ཕྱིར་མིག་གི་ཁྲོད་ན་བོད་སིལ་བུའི་དུས་རབས་ནི་བོད་ཀྱི་ཆོས་སྲིད་ཐམས་ཅད་ཉམས་ཆག་ཐོར་ཞིག་ཏུ་སོང་བའི་དུས་རབས་ཤིག་ཡིན་པར་ངོས་ཟིན་པ་བཞིན། ད་ལྟ་སྔ་འགྱུར་རྙིང་མ་པའི་ཆོས་རྒྱུད་འདི་ཆོས་རྒྱུད་སིལ་བུའི་དུས་རབས་ཤིག་ཡིན་པ་ངོ་ཤེས་དགོས་ལ་འདིའི་མཇུག་འབྲས་རྗེས་དཔོག་ཀྱང་བྱེད་ཐུབ་དགོས།། །།
ཕྱི་ལོ་༢༠༡༢།༠༦།༡༦ལའོ།
དངོས་གནས་ལྷག་བསམ་དང་སྙིང་སྟོབས་ཀྱི་མི་འདི་རིགས་ལ་རྒྱབ་སྐྱོར་བྱེད་རྒྱུའི་རེ་བ་ཡོད། ལྷག་ཏུ་ཁོང་གིས་གསུངས་གནང་བའི་༼བསྟན་པ་རྣམ་དག་འཛིན་སྐྱོང་ཁྱབ་སྤེལ་གྱིས་སེམས་ཅན་ཀུན་ལ་བླ་ན་མེད་པའི་ཞབས་འདེགས་ཞུ་རྒྱུ་ནི་དེར་ཞུགས་པའི་སྐྱེ་བོ་རེ་རེ་བཞིན་དང་བླངས་ཀྱི་འགན་འཁྲི་ཆགས་ཡོད་པ་ཤེས་དགོས།༽ གསུངས་པ་ལྟར།
སྟོང་ཆ་འགེང་རྒྱུ་དེ་མི་རེ་རེའི་འོས་འགན་རང་རེད།
དྲང་བདེན་གྱིས་བསླུས་པའི་མུ་ཏོ་བ་དང་ཡར་ཀླུང་ལྷ་རྗེ་གཉིས་ཀྱིས་དགོངས་ཚུལ་གསུངས་པར་ཐུགས་རྗེ་ཆེ་ཞུ།
དངོས་གནས་བདེན་པ་དང་། རྒྱུ་མཚན་རྣལ་མ་འདུག་ལ། དུས་ཀྱིས་དགོས་མཁོ་ཞིག་ཡང་ཡིན་པས་རྗེས་སུ་ཡིད་རང་ཡོད་ལ་ཤུགས་རྒྱབ། རིས་སུ་མེད་པའི་བླ་ཆེན་དང་། མི་ཆེན་དེ་ཚོས་རང་ཉིད་ཀྱིས་ཁེ་ཉེ་མི་བལྟོས་པར་སངས་རྒྱས་ཀྱིས་ལུང་རྟོགས་ཀྱིས་བསྟན་པར་དམིགས་ཏེ་གོང་གི་དོན་ཚན་དེ་ཚོར་བསམ་ཞིབ་བྱ་དགོས་ལ་བློ་སྟོབས་ཆེན་པོས་བསྒྱུར་བཅོས་ཡང་དགོས་པ་མཐོང།།
རྗེས་སུ་ཡི་རང་ཡོད། ཤུགས་རྒྱག་རོགས་གནོངས། ངས་ཀྱང་འདི་འདྲ་ཞིག་བསྒུགས་ནས་ཡོད། ལག་ལེན་བསྟར་ཐུབ་སོང་ན། ང་རང་ཉིད་རྩ་དགོངས་ཞུ་དགོས་ན་ཞུ་ངེས་ཡིན།