བཀའ་ཁྲི་ཕྱོགས་སྐྱོད།

ཡར་ཀླུང་ལྷ་རྗེས་འདི་ན་ལྟོས།

གླེན་དང་རྨོངས་པ་གཉིས་ཡིན་སྐབས།།
དུད་འགྲོ་ལུས་དང་ཁྱད་ཅི་ཡོད།།
བཟང་ངན་དོན་ལ་ལྐུགས་དྲགས་ན།།
མི་ཡི་གྲལ་དུ་ཅི་ལ་ཚུད།

ལྕེ་ཡི་དབང་པོ་ཉམས་དྲགས་ན།།
སྐྱུག་དང་སྦྲང་རྩི་རོ་ཅི་འབྱེད།།
ལོ་ན་བགྲེས་པར་ཆེ་དྲགས་ན།།
ཆོས་དང་འཇིག་རྟེན་ཅི་ནས་བསྒྲུབ།།

ཤེས་ཡོན་རྣམ་དཔྱད་དབེན་དྲགས་ན།།
སྒོ་ཕྱུགས་ཟོག་དང་ཁྱད་ཅི་ཡོད།།
དོན་མེད་བབ་ཅོལ་མང་དྲགས་ན།།
ཁྱི་འཁྱམ་ཟུག་དང་ཅི་མི་མཚུངས།།

ཀོ་ལོང་བུད་ཤིང་བསྲེགས་དྲགས་ན།།
ཁང་བཟང་ཞལ་ངོར་དྲེག་པ་ཙམ།།
ཕྲག་དོག་རི་བོ་རྡོལ་དྲགས་ན།།
བདེན་པའི་རྒྱ་ལམ་བཅད་པ་ལ།།

མ་རིག་ཉོན་མོངས་འཕེལ་དྲགས་ན།།
སྡུག་པའི་འཁོར་བ་ཅི་མི་འཁོར།།
བརླ་རླིག་ཟ་འཕྲུག་ཆེ་དྲགས་ན།།
སྲིང་མའི་འགྲམ་དུ་ཁྲེལ་ཡོད་དཀོན།།

བོད་མི་ལྡོག་རྩ་སྒྲིལ་དྲགས་ན།།
རྒྱ་ནག་སོ་པ་སྐྲག་སྔངས་རྒྱུ།།
བློ་བཟང་སེ་གེས་འཇོན་དྲགས་པས།།
མི་འཇོག་ཕྱོགས་གཏོགས་མ་ལྕེབས་ཙམ།།

སྲིད་སྐྱོང་ཁྲི་པ་བསྐྱོད་དྲགས་ན།།
ཕྱི་འབྲེལ་དབེན་པོ་སྙིང་རླུང་འབར།།
བོད་དོན་ལས་ལ་གྲུབ་བཟང་ན།།
ནུས་མེད་སྐྱེ་བོ་རྔོ་ནད་འབྱུང་།།

སྲིད་སྐྱོང་གཟི་བརྗིད་ཆེ་བ་འདིས།།
མདོག་ངན་མི་ཡི་ཕྲག་དོག་རྒྱུ།།
བཀའ་ཁྲིའི་སྨྲ་སྒོ་ལེགས་དྲགས་ཏེ།།
འཆལ་གཏམ་བྱེད་པོའི་འཛེར་སྐད་ཅིག།

ཕྱི་མིས་བརྩི་ཐང་ལེགས་པ་དེས།
རླུང་རྟ་ཉམས་པོའི་ཞེ་སྔང་སྤེལ།།
གནད་ཡོད་མི་སྣ་མཇལ་འཕྲད་རེས།།
དེ་སྔོན་མཁྲེགས་འཛིན་ཀླད་ནད་སྦྱར།།

སྲིད་ཚབ་གོ་རྟོགས་ཆེ་བ་དེས།།
ཁྲོན་གནས་སྦལ་པ་ངལ་བ་ཙམ།།
ཆབ་སྲིད་ཁྲིམས་ལུགས་མཁྱེན་རྒྱ་ཡིས།།
བྱིས་སྒྲུང་སྨྲ་པོར་ངོ་ཚ་སྟེར།།

མཁའ་ལྡིང་གཤོག་རྩལ་ངོམ་དུས་སུ།།
ཞ་འཐེང་མགྲོན་པོ་ངལ་བཞིན་འདུར།།
སྤྱི་ཚོགས་མཐོང་རྒྱ་ལྡན་དུས་སུ།།
ལུང་ཁུག་མི་རྣམས་ཁ་གདངས་བལྟས།།

ཤེས་འཇོན་ལྡན་པོ་སྒྲུག་པ་དེར།།
ལས་མེད་མི་ཡི་སྲོག་རླུང་འཕར།།
འཚམས་འདྲི་གཟིགས་སྐོར་ཕེབས་དུས་སུ།།
མི་འཁྱམ་འགའ་ཞིག་སྨྱོ་མཚམས་ཁད།།

ད་དུང་བཀའ་ཁྲི་མཆོག་ཨའོ་སི་ཁྲོ་ལི་ཡའི་ཁྲོང་འཁྱེར་ཆེ་ཆོས་དང་བོད་མི་མང་ཤོས་གནས་སྡོད་བྱ་ཡུལ་གྲོང་འཁྱེར་སྲི་ཎི་ཁུལ་དུ་འཕེབས་རྒྱུ་ཡིན་ལ་དེར་ས་གནས་བོད་རིགས་དང་བོད་དོན་རྒྱབ་སྐྱོར་བ་ཚོར་མཇལ་འཕྲད་དང་བཀའ་སློབ་གནང་རྒྱུ་ཡིན་འདུག།

བཀའ་ཁྲི་མཆོག་གི་མཛད་འཕྲིན་ལེགས་པར་འགྲུབ་པའི་སྨོན་འདུན།

བློ་་སེང་ལགས་ཁྱོད་ནི་དོན་དངོས་ཀྱི་སེང་གེ་རེད།་།
བློ་སེང་ལགས་ཁྱོད་ནི་གངས་རེའི་བདག་པོ་རེད།་།
བློ་སེང་ལགས་གངས་ལྗོང་ནི་ཁྱོད་ཀྱི་ཕ་ས་རེད།་།
བློ་སེང་ལགས་ཁྱོད་ནི་ང་ཚོའི་དབུ་ཁྲིད་རེད།།

བློ་སེང་ལགས་ཁྱོད་ནི་བཙན་པོའི་གདུང་རྒྱུད་རེད།།
བློ་སེང་ལགས་ཁྱོད་ནི་ལོ་རྒྱུས་ཀྱི་བདག་པོ་རེད།།
བློ་སེང་ལགས་རང་དབང་ནི་ཁྱོད་ཀྱི་རྩ་དོན་རེད།།
བློ་སེང་ལགས་ཁྱོད་ནི་ང་ཚོའི་དབུ་ཁྲིད་རེད།།

བློ་སེང་ལགས་ཁྱོད་ནི་དེང་རབས་ཀྱི་གངས་ཕྲུག་རེད།།
བློ་སེང་གེ་ལགས་འཛམ་གླིང་ནི་ཁྱོད་ཀྱི་གར་སྟེགས་རེད།།
བློ་སེང་ལགས་ཆབ་སྲིད་ནི་ཁྱོད་ཀྱི་ཁྲབ་གཞུང་རེད།།
བློ་སེང་ལགས་ཁྱོད་ནི་ང་ཚོའི་དབུ་ཁྲིད་རེད།།

བློ་སེང་ལགས་འཛམ་གླིང་ནི་ཁྱོད་ཀྱི་གཡུལ་ས་རེད།།
བློ་སེང་ལགས་ཤེས་ཡོན་ནི་ཁྱོད་ཀྱི་ལག་ཆ་རེད།།
བློ་སེང་ལགས་དར་ཆ་ནི་ཁྱོད་ཀྱི་བླ་སྲོག་རེད་།།
བློ་སེང་ལགས་ཁྱོད་ནི་ང་ཚོའི་དབུ་ཁྲིད་རེད།།

ཡུལ་གྲུ་ཀུན་ཏུ་ཡང་ཡང་བསྐྱོད།།
དཔོན་རིགས་ཕན་ཚུན་བཀའ་མོལ་གནང༌།།
མི་དབང་ཕན་ཚུན་ལག་སྦྲེལ་གནང༌། །
མི་དམངས་རྣམས་ལ་གོ་རྟོགས་སྤེལ༎
དུས་ཡུན་སྦྲང་བྱ་གཅིག་ཙམ་ནང༌༎
ཁྱོད་ཀྱི་ཕྱག་ལས་རླབས་ཆེན་གནང༌།།
ཁྱོད་ལ་ཡི་རང་བསྔགས་བརྗོད་ཡོད།།
མི་དབང་ལྷན་དུ་དཔུང་པ་མཉམ་གཤིས་དང་།།
མི་དབང་རྣམས་དང་བགྲོ་གླེང་གནང་བ་དང་།།
བསྔགས་བརྗོད་འོས་པའི་གནས་མིན་ནམ་ཅི༎
ཕོ་རབ་ཁྱོད་ཀྱི་བྱད་གཟུགས་་རབ་ཏུ་མཚར༎
ཕོ་རབ་ཁྱོད་ཀྱི་ཤེས་ཡོན་རྣམ་པར་བཀྲ་༎
ཕོ་རབ་ཁྱོད་ནི་ང་ཚོའི་དབུ་ཁྲད་རེད༎
བོད་མི་རྣམས་ཀྱིས་ཁྱོད་ལ་བལྟས༎
བོད་མི་རྣམས་ཀྱིས་ཁྱོད་ལ་གཉན།།
བོད་མིའི་རེ་བ་ཁྱོད་ལ་བཅོལ༎
ཁྱོད་ནི་དབུ་མིའི་དབུ་ཁྲིད་རེད༎
མཛད་འཕྲིན་རྒྱས་པའི་སྨོན་འདུན་ཞུ།

ཉེ་བའི་དུས་མི་རིང་བ་ཞིག་ལ་བོད་ཀྱི་སྲིད་སྐྱོང་མཁས་དབང་བློ་བཟང་སེང་གེ་མཆོག ཨ་སི་ཊུ་ལི་ཡའི་ནང་གཟིགས་སྐོར་ལ་ཕེབས་འཆར་ཡོད་འདུག དེ་ནི་ཁོང་སྒེར་གྱི་ལས་དོན་ཞིག་མ་ཡིན་པར་བོད་ཀྱི་སྒྲིག་འཛུགས་དང་ཐད་ཀར་འབྲེལ་བ་ཡོད་པ་དང། དེ་བས་བོད་ཀྱི་རྩ་དོན་སྤྱིའི་ཆ་ནས་འབྲེལ་བ་ཡོད་པ་ཞིག་རེད་ནན་གཏན་དུ་བརྗོད་མཆོག སྤྱིར་བོད་ཀྱི་རྩ་དོན་འདི་ཕྱིའི་འབྲེལ་བ་དང་ནང་གི་མཐུན་འབྲེལ་ཁོ་ན་ལ་བརྟེན་ནས་བསྒྲུབ་དགོས་ནའང་། དེ་སྔོན་འདས་པའི་སྐབས་སུ་བཙན་བྱོལ་བོད་མིའི་འཛིན་སྐྱོང་གི་བཀའ་ཁྲིའི་ཞབས་སྟེགས་ལ་འཁོད་པའི། བཀའ་ཁྲི་མང་དག་ཅིག་བྱུང་བ་རྣམས་ཀྱིས་ཕྱིའི་འབྲེལ་བ་དེ་ཙམ་དུ་འཇོན་མེད། གང་ཡིན་ཞེ་ན་རྒྱལ་སྤྱིའི་ཁོར་ཡུག་གི་འཕོ་འགྱུར་དང་ཆབ་སྲིད་ཀྱི་གནས་སྟབས། དཔལ་འབྱོར་གྱི་འགྲོ་ལུགས་སོགས་ལའང་ཆ་རྒྱས་དང་ཉམས་མྱོང་། གང་ཟག་རང་ཉིད་ལ་ཤེས་ཡོན་གྱི་ཆུ་ཚོད་དམའ་བ་དང་། ད་དུང་ཀླད་རྙིང་མཁྲེགས་འཛིན་གྱི་ལས་དོན་ཁོ་ན་ལ་ཞེན་ཆགས་ཆེ་སྟབས། ནང་ཁུལ་ལ་ཕན་མ་ཐོགས་ཕྱོགས་རིས་འདྲ་བྱས་ཏེ་ལས་དོན་ཆུང་ཚག་རེར་མགོ་འཁོར་ནས་བསྡད་སྟབས། ཕྱིའི་ཕྱོགས་སུ་འབྲེལ་བ་བྱ་རྒྱུ་ལ་དེ་ཙམ་དུ་གལ་འགངས་མ་ཤེས་པས་ནུས་པ་མ་ཐོན་པ་ཤ་སྟག་ཡིན། སྤྱིར་དུས་རབས་ཉེར་གཅིག་པའི་སྐབས་སུ་ཨ་ཚུགས་བརྒྱབ་སྟེ་ལས་ཁུངས་ཀྱི་ནང་སྦུག་ལ་འཛུལ་དྲགས་ན། ཕྱིའི་འཕེལ་རྒྱས་དང་འགྱུར་ལྡོག་མ་རྟོགས་པའི་དབང་གིས་ག་དུས་ཀྱང་རྗེས་ལུས་ཡིན། སྐབས་འདིར་མཁས་དབང་བློ་བཟང་སེང་གེ་མཆོག་ནི་གནས་ཚུལ་དེ་རྣམས་ལས་ཡོངས་སུ་གོ་ལྡོག་སྟེ། གོང་དུ་བཤད་པའི་གནས་ཚུལ་མཐའ་དག་ཤེས་མཁན་ཞིག་ཡིན་སྟབས་ཕྱིའི་འབྲེལ་བ་དེ་གལ་ཆེན་ཞིག་ཏུ་རྩིས་ཀྱིན་ཡོད། མ་ཟད་རྒྱལ་སྤྱིའི་སྤྱི་ཚོགས་ཀྱི་སྟེང་དུ་འདས་པའི་བཀའ་ཁྲི་གཞན་དང་མི་འདྲ་བའི། བརྩི་ཐང་དང་གདེང་འཇོག་ཆེན་པོ་བྱེད་པ་དེདག་ཁོང་རང་ཉིད་ཀྱི་ཤེས་ཡོན་དང་སྤྱི་ཚོགས་ཀྱི་གོ་རྟོགས་མཐོན་པོ་ཡོད་པ་དང་། དྲང་བདེན་དང་ལྷག་བསམ་གཡོ་བ་མེད་པའི་ལས་ཀ་བྱས་སྟབས་ཀུན་གྱིས་བརྩི་ཐང་དང་གུས་བཀུར་བྱེད་བཞིན་ཡོད། ད་ཐེངས་ཀྱི་སྐབས་སུ་ཕྱིར་བསྐྱོད་དེ་ཡང་བོད་དོན་དང་དམིགས་བསལ་གྱི་འབྲེལ་བ་ཡོད་པའི་ཨ་སི་ཊི་ལ་ཡའི་རྒྱལ་ཁབ་ཀྱི་ས་འཁོགས་མང་པོ་ཞིག་ལ། གཟིགས་སྐོར་ཕེབས་རྒྱུ་དེ་གོ་བདེ་པོ་བཤད་ན་བོད་ཀྱི་རྩ་དོན་ངོ་མ་ཞིག་ཡིན། མཐའ་འཇུག་གི་སྐད་ཆ་ཞིག་བཤད་ན་ཁོང་རང་བཀའ་ཁྲིའི་འོས་མི་སླེབས་པ་ནས་བཟུང་ད་ལྟའི་བར་བོད་ཀྱི་རྩ་དོན་ལ་མཐའ་གཅིག་ཏུ་ལྷག་བསམ་དང་དྲན་བདེན་གྱི་སྒོ་ནས་ལས་ཀ་བྱེད་མཁན་ཅུང་མང་དུ་འགྲོ་བཞིན་ཡོད།།