རྒྱལ་གཅེས་དཔའ་པོ་རྟ་མགྲིན་ཐར་ལགས་སྐུ་མ་གྲོངས་གོང་རང་ཁྱིམ་དུ་ཞལ་ཆེམས་ཞིག་བཞག་ཡོད་འདུག
རྨ་མགུར་སངས་རྒྱམ་ལགས་ཀྱིས་ཀ་སྦུག་ནས་གནས་ཚུལ་བཏང་འབྱོར་ལ། ཀ་སྦུག་ས་གནས་བུད་མེད་དང་གཞོན་ནུ་གཉིས་ཀྱི་གོ་སྒྲིག་འོག ཟླ་འདིའི་ཕྱི་ཚེས་ ༡༧ གྱི་དགོང་མོར་ཀ་སྦུག་ས་གནས་སུ་བོད་རིགས་སེར་སྐྱ་མི་དམངས་ ༡༠༠ ལྷག་འདུ་འཛོམས་བྱས་ཏེ། ཉེ་ལམ་འདས་གྲོངས་སུ་ཕྱིན་པའི་རྒྱལ་གཅེས་དཔའ་བོ་རྟ་མགྲིན་ཐར་ལགས་སུ་གདུང་སེམས་མཉམ་སྐྱེད་མཚོན་ཆེད་མར་མེ་ཁྲོམ་སྐོར་ཞིག་གནང་ཡོད་འདུག་ལ། རྒྱལ་གཅེས་པ་རྟ་མགྲིན་ཐར་ལགས་ཀྱིས་སྐུ་ལུས་མེར་བསྲེཊ་མ་བཏང་གོང་རང་ཁྱིམ་དུ་ཞལ་ཆེམས་ཤིག་བཞག་ཡོད་འདུག
ཁོང་གི་ཞལ་ཆེམས་དེའི་ནང་དུ། “ བླ་མ་ཡི་དམ་དཀོན་མཆོག་གསུམ་ལ་སྐྱབས་སུ་མཆིའོ།འཛམ་གླིང་ལ་ཞི་བདེ་ཡོང་བའི་རེ་བ་དང་། ༸རྒྱལ་དབང་རིན་པོ་ཆེ་རང་ཡུལ་དུ་ཕེབས་པའི་རེ་འདུན།བོད་རྒྱལ་ཁབ་ཀྱིས་རང་ས་ཟིན་པའི་དོན་དུ་རང་ལུས་མེ་མཆོད་དུ་འབུལ་རྒྱུ་ཡིན།” ཞེས་འཁོད་འདུག་ལ།རང་ལུས་མེར་བསྲེགས་ཀྱི་གནས་ཚུལ་དེ་བྱུང་འཕྲལ་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་གཉིས་ཀྱིས་ཛ་དྲག་ཐོག་གསར་འགོད་གསལ་བསྒྲགས་སྤེལ་ཡོད་ལ།དེ་བཞིན་བཞུགས་སྒར་ངྷ་ས་དང་ནོར་གླིང་། རྡེར་རྡུན་སོགས་ཀྱི་ནང་དུའང་མར་མེ་ཁྲོམ་སྐོར་གནང་ཡོད་འདུག
རང་ལོ་ ༦༤ ཡིན་པའི་རྒྱལ་གཅེས་དཔའ་བོ་མཁན་རྟ་མགྲིན་ཐར་ལགས་ནི། མཚོ་སྔོན་ཞིང་ཆེན་རྨ་ལྷོ་ཁུལ་གཅན་ཚ་རྫོང་གཅན་ཚ་ཐང་ཞང་ལོ་བ་སྡེ་བ་ནས་ཡིན་ཞིང་། རང་ལོ་ ༥༤ ཡིན་པའི་བཟའ་ཟླ་ཆོས་མོ་ཐར་དང་ཁོང་གཉིས་ལ་ཕྲུ་གུ་གསུམ་ཡོད་པ་ལས།རང་ལོ་ ༣༣ ཡིན་པའི་བུ་ཆེ་བ་རྟ་མགྲིན་སྐྱབས་ཀྱིས་ཁྱིམ་གཞིས་ཟུར་དུ་བཟུང་ཡོད་ལ། རང་ལོ་ ༢༨ ཡིན་པའི་རྡོ་རྗེ་འཚོ་ཁྱིམ་ཚང་གི་གཞི་འཛིན་ཡིན་འདུག རང་ལོ་ ༢༠ ཡིན་པའི་བུ་ཆུང་བ་ཝུན་ཁྲང་རྡོ་རྗེས་གཅན་ཚ་རྫོང་མི་རིགས་སློབ་འབྲིང་དུ་སློབ་གཉེར་བྱེད་ཀྱི་ཡོད་འདུག ལོ་ཤས་གོང་རྒྱ་གཞུང་གིས་འབྲོག་པ་གྲོང་ཁྱེར་ཅན་དུ་བསྒྱུར་བའི་སྲིད་ཇུས་ལག་བསྟར་བྱེད་སྐབས་གཅན་ཚ་ཐང་ནས་རྫོང་གི་ཉེ་འགྲམ་དུ་གཞིས་སྤོ་བྱས་ཏེ། ནམ་རྒྱུན་རྫོང་ཐོག་ཏུ་ཡོད་པའི་མ་ཎི་འཁོར་ཁང་དུ་སྐོར་བ་བྱེད་པ་དང་མཉམ་དུ་རྫོང་ཐོག་ཏུ་སློབ་གྲྭར་འགྲོ་བཞིན་པའི་ཚ་བོར་ལྟ་སྐྱོང་བྱེད་བཞིན་བསྡད་ཡོད་འདུག
