༼རྒྱ་གར་གྱི་སྲིད་བློན་དང་པོ་ཇོ་ཝ་ཧ་ལ་ནེ་རུས་རང་གི་བུ་མོ་རྒྱ་གར་གྱི་བུད་མེད་སྲིད་བློན་དང་པོ་ཨིན་དྷ་ར་གྷན་དྷིར་སྤྲིངས་པའི་འཕྲིན།༽
ཇོ་ཝ་ཧ་ལ་ནེ་རུས་བརྩམས། ནོར་བསམ་གྱིས་བསྒྱུར།
༢༽ སྔ་མོའི་ལོ་རྒྱུས་གང་འདྲ་བྱས་ཏེ་བྲིས་སམ།
ངའི་འཕྲིན་ཡིག་སྔོན་མའི་ནང་ངས་ཁྱེད་ལ་སའི་གོ་ལའི་ལོ་རྒྱུས་རང་བྱུང་ཁམས་ཀྱི་དཔེ་དེབ་ལས་སྦྱོང་དགོས་ཞེས་ནན་བརྗོད་བྱས་ཡོད་ལ། ཁྱེད་ཀྱི་གཡས་གཡོན་ལ་མཐོང་ཆོས་སུ་གྱུར་བའི་རི་དང་། བྲག་རྡོ། ལུང་གཤོངས། གཙང་པོ། མཚོ། མེ་རི་ཚང་མ་དཔེ་དེབ་དེའི་ནང་ཚུད་ཡོད། ང་ཚོ་ཚང་མའི་མདུན་དུ་དཔེ་དེབ་དེ་ཡོད་ཀྱང་ང་ཚོ་རེ་ཟུང་གིས་མ་གཏོགས་དཔེ་དེབ་དེ་ལ་དོ་སྣང་སྤྲད་པའམ་ཀློག་ཐབས་བྱེད་ཀྱི་མེད། གལ་ཏེ་ང་ཚོས་ཀློག་ཐབས་དང་ཤེས་ཐབས་བྱས་ཚེ་དེ་ལས་ང་ཚོའི་བློ་ངོར་འཕྲོད་པའི་ལོ་རྒྱུས་ག་ཚོད་ཤེས་ཐུབ་བམ། རྡོའི་ཤོག་བུའི་སྟེང་གི་སྒྲུང་རྣམས་ལྷ་སྒྲུང་ལས་ཀྱང་སྙན་པ་ཡོད་ངེས།
རང་བྱུང་ཁམས་ཀྱི་དཔེ་དེབ་བཀླགས་རྗེས་ང་ཚོས་འདས་པའི་དུས་ཡུན་ནང་སའི་གོ་ལའི་སྟེང་འགྲོ་བ་མི་དང་སྲོག་ཆགས་མེད་པའི་དུས་སྐབས་ཤེས་ཐུབ་ལ། ཐོག་མར་སྲོག་ཆགས་ཇི་ལྟར་བྱུང་བ་དང་དེ་རྗེས་རིམ་བཞིན་སྲོག་ཆགས་མང་པོ་བྱུང་བ་ཡང་མཐོང་ཐུབ། དེ་བཞིན་སྐྱེས་པ་དང་བུད་མེད་བྱུང་ཡོད་ཀྱང་ད་ལྟའི་འགྲོ་བ་མི་རིགས་ཀྱི་ཕོ་མོ་དང་མི་འདྲ་བར་ཁྱད་པར་ཡོད། ཁོང་ཚོ་ནི་དྲག་རྩུབ་ཅན་གྱི་ཀླ་ཀློ་ལྟ་བུ་ཡོད་པ་མ་ཟད་དུད་འགྲོ་སེམས་ཅན་དང་ཁྱད་པར་ཆེན་པོ་མེད། རིམ་པས་ཁོང་ཚོ་མཉམ་འཛོམས་བྱུང་ནས་ཉམས་མྱོང་གསོག་སྒྲུབ་དང་། རྣམ་དཔྱོད་བེད་སྤྱོད་བྱེད་མགོ་བརྩམས་པར་བརྟེན་བསམ་པའི་སྟོབས་ཤུགས་ཆེ་རུ་ཕྱིན་ཏེ། དུད་འགྲོ་སེམས་ཅན་དང་མི་འདྲ་བའི་ཁྱད་པར་ཆེན་པོ་བྱུང་པ་རེད། ཁོང་ཚོ་སྟོབས་ཆེན་དང་གཏུམ་དྲག་ཅན་ཆགས་པའི་རྒྱུ་ངོ་མ་ནི་རྣམ་དཔྱོད་དེ་རེད། དེང་སྐབས་ཁྱེད་ཀྱིས་མཐོང་གསལ་ལྟར་མི་ཆུང་ཆུང་ཞིག་གིས་ཤིན་ཏུ་ཆེ་བའི་གླང་པོ་ཆེ་ཞིག་གི་སྟེང་དུ་བསྡད་ཐུབ་པ་མ་ཟད། ཁོ་རང་གི་འདོད་པ་བཞིན་བཀོལ་སྤྱོད་བྱེད་ཐུབ་ཀྱི་ཡོད། གླང་པོ་ཆེ་ནི་གཟུགས་ཕུང་ཆེ་ལ་སྟོབས་ཤུགས་ལྡན་པ་ཞིག་ཡིན་ཡང་ཁོ་རང་ལས་སྟོབས་ཤུགས་ཧ་ཅང་ཆུང་བའི་རྫི་བོ་དེས་རྣམ་དཔྱོད་བེད་སྤྱོད་བྱེད་ཤེས་པར་བརྟེན་གླང་ཆེན་གྱི་མཇིང་པའི་སྟེང་བསྡད་དེ། རང་ཉིད་སྦྱིན་བདག་དང་གླང་ཆེན་གཡོག་པོ་བཞིན་བཀོལ་སྤྱོད་བྱེད་ཀྱི་ཡོད། བསམ་བློ་གཏོང་ཤུགས་ཆེ་རུ་ཕྱིན་པ་དང་ལྷན་དུ་མི་ནི་རྣམ་རིག་སྤྱང་གྲུང་ཅན་དུ་གྱུར་ཏེ་མེ་བཟོས་པ་དང་། ཞིང་རྨོས་ནས་ལོ་ཏོག་འདེབས་པ། གྱོན་གོས་དང་ཁང་པ་བརྩིགས་པ་སོགས་གསར་གཏོད་མང་པོ་བྱས་པ་རེད། སྐྱེས་པ་དང་བུད་མེད་མཉམ་སྡོད་བྱས་པ་ལ་བརྟེན་ནས་གྲོང་ཁྱེར་ཐོག་མ་བྱུང་ཡོད་ལ། གྲོང་ཁྱེར་མ་བྱུང་སྔོན་ལ་འགྲོ་བ་མི་རྣམས་ས་ཕྱོགས་གཅིག་ནས་གཞན་དུ་འགྲུལ་བསྐྱོད་བྱས་ཏེ་སྡོད་གུར་འདྲ་མིན་ནང་འཚོ་སྡོད་བྱེད་ཀྱི་ཡོད། སྐབས་དེ་དུས་ཁོང་ཚོས་ས་ཞིང་ལས་ཟས་རིགས་གང་འདྲ་བྱས་ཏེ་འབྱུང་གི་ཡོད་མེད་ཤེས་རྟོགས་ཐུབ་མེད་སྟབས། འབྲས་དང་བག་ལེབ་བཟོ་བྱེད་ཀྱི་གྲོ་ཡང་མེད། ཁོང་ཚོར་ཚལ་རིགས་མེད་ལ་ད་ལྟ་ཁྱེད་ཀྱིས་ཟ་བཞིན་པའི་ཁ་ཟས་དེ་དག་ཀྱང་ཁོང་ཚོས་ཤེས་རྟོགས་ཐུབ་མེད། ཕལ་ཆེར་འགྲོ་བ་མིས་བཟའ་རུང་བའི་སྐོགས་མཁྲིགས་ཤིང་འབྲས་དང་། དེ་མིན་ཤིང་འབྲས་རིགས་བཟའ་བཞིན་ཡོད་ཀྱང་། ཁོང་ཚོ་ཕལ་ཆེ་བས་རང་ཉིད་ཀྱིས་རི་དྭགས་རྔོན་པའི་ཤ་ཟ་ཡི་ཡོད།
གྲོང་ཁྱེར་འཕེལ་རྒྱས་འགྲོ་བ་དང་ལྷན་དུ་མི་ཚོས་ཡིད་དབང་འཕྲོག་པའི་སྒྱུ་རྩལ་མང་པོ་ཤེས་པ་མ་ཟད། ཡི་གེ་འབྲི་སྟངས་ཀྱང་ཤེས་ཡོད། འོན་ཀྱང་དུས་ཡུན་རིང་པོར་ཡི་གེ་འབྲི་སའི་ཤོག་བུ་མེད་པས་བུ་ཇ་པ་ཏ་ར་ཞེས་པའི་ (bhojpatra) ཤིང་གི་ཤུན་ལྤགས་སྟེང་ཡི་གེ་འབྲི་ཡི་ཡོད། ངའི་བསམ་པར་དབྱིན་སྐད་ཐོག་དེར་ཤིང་སྟག་པ་ཟེར་གྱི་ཡོད། ད་དུང་ཁོང་ཚོས་ལོ་མའི་སྦར་མཐིལ་སྟེང་ལ་ཡང་ཡི་གེ་བྲིས་པ་ཡོད། ཕྱིས་སུ་ཤོག་བུ་བྱུང་ནས་ཡི་གེ་འབྲི་རྒྱུར་ལས་སླ་རུ་དཔར་བསྐྲུན་ཁང་མེད་པས་དེང་སང་ནང་བཞིན་དཔེ་དེབ་སྟོང་ཕྲག་མང་པོ་དཔར་བསྐྲུན་བྱེད་ཐུབ་ཀྱི་མེད། དེབ་ཐེངས་གཅིག་འབྲི་བར་ལག་བཤུས་བྱེད་དགོས་སྟབས། ཁྱོད་རང་དཔེ་དེབ་ཚོང་ཁང་ལ་ཐད་ཀར་དེབ་ཉོ་བར་འགྲོ་རྒྱུ་མེད་པར་སྔོན་ཚུད་ནས་དེབ་དེའི་ངོ་བཤུས་བཟོ་རྒྱུ་མངགས་དགོས་ལ་དུས་ཡུན་རིང་པོ་གཏོང་དགོས། དེང་སྐབས་ང་ཚོའི་དཔེ་མཛོད་ཁང་དུ་སྐབས་དེ་དུས་མི་ཚོས་ལག་བྲིས་བྱས་པའི་ཡིག་གཟུགས་སྙིང་རྗེ་བོ་དེ་དག་མཐོང་རྒྱུ་ཡོད་ལ་རྒྱ་གར་ནང་དམིགས་བསལ་ལེགས་སྦྱར་སྐད་ཡིག་དང་། པར་ཤན། ཨུར་དྷུ་སོགས་ཀྱི་ནང་བྲིས་པའི་དཔེ་དེབ་མང་པོ་ཡོད་པ་དེ་དག་གི་ཤོག་ངོས་ཟུར་དུ་མེ་ཏོག་དང་རི་མོ་བྲིས་ཡོད།
གྲོང་ཁྱེར་འཕེལ་རྒྱས་སུ་ཕྱིན་པ་དང་བསྟུན་རིམ་བཞིན་ཡུལ་ལུང་དང་རྒྱལ་ཁབ་ཀྱི་ངོ་བོ་ཆགས་རྗེས་འགྲོ་བ་མི་རྣམས་ཡུལ་ལུང་གཅིག་ནང་ཕན་ཚུན་ཉེ་འཁྲིས་སུ་གནས་ཐུབ་པ་བྱུང་བས་གཅིག་ངོ་གཅིག་གིས་ཤེས་ཐུབ་པ་བྱུང་ཡོད་ཀྱང་ཁོང་ཚོའི་བསམ་པར་རང་ཉིད་ཡུལ་ལུང་གཞན་གྱི་མི་ལས་ཡོད་སྙམ་པའི་ཧ་ཅང་གླེན་ལྐུགས་ཀྱི་བྱེད་སྟངས་ཐོག་ཕན་ཚུན་འཁྲུག་འཛིང་བྱེད་ཀྱི་ཡོད། སྐབས་དེ་དུས་ཀྱི་མི་ཚོས་ཕན་ཚུན་འཁྲུག་འཛིང་དང་གསོད་རེས་བྱེད་རྒྱུ་ནི་འགྲོ་བ་མིའི་རིགས་ཀྱི་བྱ་སྤྱོད་ལས་ཆེས་ལྐུགས་རྟགས་ཚ་ཤོས་ཡིན་པ་ཤེས་ཀྱི་མེད་པ་མ་ཟད། དེང་སང་གི་མི་ཚོས་ཀྱང་ཤེས་རྟོགས་ཐུབ་ཀྱི་མེད། དམག་འཁྲུག་ནི་སུ་གང་ལའང་ཕན་ཐོགས་མེད་པའི་བྱ་སྤྱོད་ཅིག་རེད།
སྔོན་གྱི་གྲོང་ཁྱེར་དང་ཡུལ་ལུང་སྐོར་གྱི་ལོ་རྒྱུས་བརྟག་ཞིབ་བྱ་ཆེད་དཔེ་དེབ་ཡོད་ཀྱང་གྲངས་ཧ་ཅང་ཉུང་ཉུང་རེད། རྒྱལ་པོ་དང་གོང་མ་ཚོས་རྒྱལ་སྲིད་སྐྱོང་རིང་རྡོ་ལེབ་དང་རྡོ་རིང་སྟེང་ལ་ཡི་གེ་བྲིས་ཡོད་པ་དེ་དག་གིས་ང་ཚོར་ཕན་ཐོགས་བྱེད་ཐུབ། དཔེ་དེབ་ཀྱི་ཤོག་བུ་རུལ་བ་དང་མུག་པས་ཟས་ནས་ཡུན་རིང་གནས་མི་ཐུབ་ཀྱང་རྡོ་ནི་དེ་ལས་ཡུན་རིང་བ་གནས་ཐུབ་ཀྱི་ཡོད། ཁྱེད་ཀྱིས་ཨ་ལ་ཧ་བྷ་ཀྲེའི་རྒྱལ་ཁང་ནས་ཨ་ཤོ་ཀའི་རྡོ་རིང་མཐོང་བ་ཕལ་ཆེར་དྲན་སྲིད། ཨ་ཤོ་ཀ་ནི་ལོ་ངོ་བརྒྱ་ཕྲག་མང་པོའི་སྔོན་གྱི་རྒྱ་གར་གྱི་རླབས་ཆེན་གྱི་རྒྱལ་པོ་ཡིན་པ་དང་། རྡོ་དེའི་སྟེང་ལ་ཁོང་གིས་གསལ་བསྒྲགས་ཤིག་བྲིས་གནང་ཡོད། གལ་ཏེ་ཁྱེད་རང་ལག་ནོ (Lucknow) གྱི་འགྲེམས་སྟོན་ཁང་དུ་བསྐྱོད་ན་རྡོ་ལེབ་སྟེང་ལ་ཡི་གེ་རྐོས་ཡོད་པ་མང་པོ་མཐོང་རྒྱུ་ཡོད།
ང་ཚོས་རྒྱལ་ཁབ་འདྲ་མིན་གྱི་ལོ་རྒྱུས་ལ་སློབ་སྦྱོང་བྱས་ཚེ་ཡུ་རོབ་ཁུལ་དུ་གདོད་མའི་ཚོ་པས་ཁེངས་ནས་ཡོད་སྐབས་རྒྱ་ནག་དང་ཨི་ཇིབ་ནང་རླབས་ཆེན་གྱི་བྱ་བཞག་བསྐྲུན་ཟིན་ཡོད་པ་ཤེས་ཚོར་ཐུབ་ལ། ད་དུང་ང་ཚོས་ར་མ་ཡ་ན་དང་། མཧཱ་བྷ་ར་ཏ་(Ramayana and Mahabharata)གཉིས་འབྲི་བའི་དུས་སྐབས་སུ་རྒྱ་གར་ནི་སྟོབས་འབྱོར་མངའ་ཐང་རྒྱས་པའི་རྒྱལ་ཁབ་ཅིག་ཡིན་པ་ཤེས་ཐུབ། ད་ལྟ་ང་ཚོའི་རྒྱལ་ཁབ་འདི་ཕྱིའི་རྒྱལ་ཁབ་ཀྱི་དབང་བསྒྱུར་འོག་ཚུད་དེ་རང་དབང་བྲལ་ཞིང་ཤིན་ཏུ་སྐྱོ་བའི་ངང་གནས་ཡོད། འོན་ཀྱང་ང་ཚོས་འབད་བརྩོན་བྱས་ཚེ་གནས་སྟངས་དེའི་ཐོག་རྟག་ཏུ་མི་གནས་པར་ང་ཚོའི་རྒྱལ་ཁབ་ལ་རང་དབང་བསྐྱར་དུ་ཐོབ་པ་དང་། དབུལ་ཕོངས་ཀྱི་གནས་ནས་གྲོལ་ཏེ་ཡུ་རོབ་རྒྱལ་ཁབ་གཞན་ལྟར་བདེ་སྐྱིད་ལྡན་པ་བཟོ་ཐུབ།
ངའི་འཕྲིན་ཡིག་རྗེས་མའི་ནང་ངས་ཡིད་དབང་འཕྲོག་པའི་སའི་གོ་ལའི་ལོ་རྒྱུས་ཐོག་མ་ནས་བརྗོད་ཀྱི་ཡིན་་་་་་་་་་
༌༌༌༌༌༌༌༌༌༌༌༌༌༌༌༌༌༌༌༌༌མུ་འགོད།
བསྒྱུར་མཁན་གྱི་གསལ་བཤད།
གུས་པར་ཤེས་ཡོན་གི་ཆུ་ཚད་དམན་རུང་། རང་རེའི་བོད་ཡིག་ནང་མཐོང་དཀོན་པའི་བྱིས་སྒྲུང་དང་། བྱིས་པའི་སེམས་ཁམས་དང་མཐུན་པའི་ཤེས་བྱ་རིག་གནས་ཁག་སྐད་ཡིག་གཞན་ནས་བོད་བསྒྱུར་བྱས་ཚེ་ཕན་ཐོགས་ཆེན་པོ་ཡོང་ངེས་སྙམ་ནས་ད་བར་ལས་ཞོར་དུས་ཚོད་བེད་སྤྱད་ནས་བྱིས་པའི་ཆེད་དེབ་བརྒྱད་ཙམ་བོད་བསྒྱུར་བྱས་ཁོངས་སུ་ད་ལན་གྱི་ཕས་བུ་མོར་སྤྲིངས་པའི་འཕྲིན་ཞེས་པ་དེ་ཡང་གཅིག་ཡིན། དེབ་དེ་བོད་བསྒྱུར་བྱས་ནས་དུས་ཚོད་ཅུང་ཟད་སོང་ཟིན་ཀྱང་ད་བར་ལས་འབྲེལ་དབང་གིས་ཞུ་དག་བྱེད་ཁོམས་མ་བྱུང་བས་སྙིང་ཉེ་བའི་རྒྱ་ཆེའི་ཀློག་པ་པོ་ཚོས་དགོངས་འཆར་ལྷུགས་རྩོལ་ཡོང་བ་ཞུ། དེབ་དེ་དཔར་བསྐྲུན་བྱ་རྒྱུར་བཀའ་འཁྲོལ་ཞུ་ཡིག་རྒྱལ་ས་ལྡི་ལིར་ཕུལ་ཟིན་པས་མགྱོགས་མྱུར་བཀའ་འཁྲོལ་ཐོབ་རེ་ཆེ་བས། དཔར་བསྐྲུན་བཀའ་འཁྲོལ་ཐོབ་མཚམས་ཞུ་དག་བྱས་ཏེ་དཔར་བསྐྲུན་བྱ་རྒྱུ་ཡིན། རྣམ་དཔྱོད་ཡངས་པའི་རྒྱ་ཆེའི་ཀློག་པ་པོདང་། མཆན་བུ་འདེབས་མཁན་ཚང་མར་ཐུགས་རྗེ་ཆེ་ཞུ་བ་དང་འབྲེལ། དམིགས་བསལ་བོད་ཀྱི་དུས་བབ་རྩོམ་སྒྲིག་པ་དོན་གྲུབ་བཀྲ་ཤིས་ལགས་སུ་ཐུགས་རྗེ་ཆེ་ཞུ་རྒྱུ་ཡིན།
ནོར་བུ་བསམ་གྲུབ་ལགས་ནས་རིན་ཐང་ཅན་གྱི་དཔེ་དེབ་དེ་འདྲ་ཞིག་བསྒྱུར་ཡོད་པ་ཤེས་དུས་དགའ་སྤོབས་ཆེན་པོ་བྱུང་སོང། དཔེ་དེབ་དེའི་རིགས་རྣམས་ང་རང་ཚོའི་བོད་ཀྱི་རིག་གནས་བང་མཛོད་ཀྱི་ནང་དུ་ཆེས་མཁོ་བའི་དཔེ་དེབ་ཅིག་ཡིན་ལ། ལྷག་པར་ཁོང་གིས་མ་འོངས་པའི་བོད་རིགས་ཕྲུ་གུ་རྣམས་ནས་བོད་ཀྱི་སྐད་ཡིག་ཐོག་དོ་སྣང་ཤུགས་ཆེ་ཡོང་ཐབས་སུ་བྱིས་སྒྲུང་བསྒྱུར་དང་སྒྱུར་བཞིན་ཡོད་པ་ལ་སྙིང་དབུས་ནས་ཐུགས་རྗེ་ཆེ་ཞུ་རྒྱུ་ཡིན།
བོད་མི་རིགས་ཀྱི་སྐད་ཡིག་དེ་གནས་དང་མི་གནས་དེ་མ་འོངས་པའི་བོད་རིགས་ཕྲུ་གུ་རྣམས་ཀྱི་ཇི་ཙམ་བཀོལ་སྤྱོད་བྱེད་མིན་ལ་རག་ལས་ཤིང། དེ་ལྟ་བུའི་བཀོལ་སྤྱོད་བྱེད་ཐུབ་རྒྱུའི་ཁོར་ཡུག་ཞིག་ཡོང་བ་ལ་ཕྲུ་གུ་རྣམས་ལ་བྱིས་སྒྲུང་ལ་སོགས་པའི་ཕྲུ་གུའི་དཔེ་དེབ་མང་པོ་ཞིག་བོད་ཀྱི་སྐད་ཡིག་གི་ནང་དུ་ཡོད་དགོས་པ་ཡིན། དེ་འདྲ་ཞིག་ཡོང་བ་ལ་ཤེས་ལྡན་རྣམས་ཀྱིས་བོད་བསྒྱུར་བྱེད་དགོས་པ་ཤིན་ཏུ་ནས་གལ་ཆེན་ཡིན།
ནོར་བསམ་གྱི་ངོ་སྤྲོད་མདོར་བསྡུས།
ཁོང་ནི་བོད་ནས་གསར་དུ་འབྱོར་ནས་ལོ་ངོ་ཁ་ཤས་ཤིག་གི་ནང་དུ་སུ་ཇ་སློབ་གྲྭ་དང་དེ་ནས་ས་རཱ་མཐོ་སློབ་གཉིས་ཐོན་པ་དང། དེ་བཞིན་སྒྲིག་ཞུགས་མ་ཡིན་པའི་རྒྱ་གར་མཐོ་སློབ་ནས་སློབ་སྦྱོང་ཐོན་པ་ཞིག་རེད། ད་ལྟའི་ཆར་དབུས་བོད་མིའི་སྒྲིག་འཛུགས་ཀྱི་ནང་དུ་གཞུང་ཞབས་སྲི་ཞུ་བའི་བྱ་བ་བསྒྲུབ་བཞིན་ཡོད།
དྲ་གྲོགས་ཚོ། ཁྱོད་ཚོས་འོག་གི་ཚིག་དུམ་འདི་སྐད་གདངས་ཅུང་མཐོ་ལ་དབྱངས་འགྲོས་དང་བཅས་ཀློགས་དང་། ཅི་འདྲའི་ཡིད་མགུ་བའི་གཏམ་རྒྱུད་ཅིག་དང་། ཕ་བུའི་བར་གྱི་རླབས་ཆེ་བའི་གླེང་མོལ་ཞིག་རེད་ཨང་་་་་་ “མཧཱ་བྷ་ར་ཏ་(Ramayana and Mahabharata)གཉིས་འབྲི་བའི་དུས་སྐབས་སུ་རྒྱ་གར་ནི་སྟོབས་འབྱོར་མངའ་ཐང་རྒྱས་པའི་རྒྱལ་ཁབ་ཅིག་ཡིན་པ་ཤེས་ཐུབ། ད་ལྟ་ང་ཚོའི་རྒྱལ་ཁབ་འདི་ཕྱིའི་རྒྱལ་ཁབ་ཀྱི་དབང་བསྒྱུར་འོག་ཚུད་དེ་རང་དབང་བྲལ་ཞིང་ཤིན་ཏུ་སྐྱོ་བའི་ངང་གནས་ཡོད། འོན་ཀྱང་ང་ཚོས་འབད་བརྩོན་བྱས་ཚེ་གནས་སྟངས་དེའི་ཐོག་རྟག་ཏུ་མི་གནས་པར་ང་ཚོའི་རྒྱལ་ཁབ་ལ་རང་དབང་བསྐྱར་དུ་ཐོབ་པ་དང་། དབུལ་ཕོངས་ཀྱི་གནས་ནས་གྲོལ་ཏེ་ཡུ་རོབ་རྒྱལ་ཁབ་གཞན་ལྟར་བདེ་སྐྱིད་ལྡན་པ་བཟོ་ཐུབ”
བོད་ཀྱི་མཐུན་མོང་མ་ཡིན་པའི་ཚིག་སྦྱོར་གཞིར་བཞག་ནས་བསྒྱུར་བ་དེ་ཧ་ཅང་ཡག་པོ་རེད།
གང་མགྱོག་རྩོམ་ལྷག་རྣམས་དུས་བབས་དུ་བཀོད་ཐུབ་པའི་རེ་བ་ཡོད།
ནོར་བསམ་ལགས་སྙིང་ནས་གུས་འདུལ་ཞུ། མུ་མཐུད་དུ་བསྒྱུར་ཐུབ་པའི་རེ་བ་ཡོད་རང་རིགས་སྤྱི་ནང་ཕན་ཐོག་ཡོད་ངེས་རེད་