ཧྥ་རན་སེའི་བོད་རིགས་ཚོགས་པ།

ཧྥ་རན་སིའི་བོད་རིགས་ཚོགས་པའི་རྒྱུན་ལས་གསར་འདེམས་དང་འབྲེལ་བའི་གནས་ཚུལ།

བོད་རིགས་ཚོགས་པའི་རྒྱུན་ལས་གསར་འདེམས་བྱ་བར་མང་ཚོགས་ལ་སྔོན་ཚུད་བསལ་བློའི་གྲ་སྒྲིག་དང།  འོས་མི་གང་བཟང་ཐོན་པར་ཕན་ན་བསམ་སྟེ། བོད་ལུགས་ལོ་སར་གྱི་ཆོས་ཕྱོགས་མཛད་སྒོའི་སྐབས་སུ་མང་ཚོགས་ལ་གསལ་བསྒྲགས་བྱས་པ་དང། དེའི་ཐད་མི་མང་འདུ་འཛོམས་གྱིས་བགྲོ་གླེང་ཟབ་རྒྱས་ཐེངས་གཉིས་གོ་སྒྲིག་བྱས་མཐར། ཕྱི་ལོ་ ༢༠༡༢ ལོའི་ཟླ་ ༥ པའི་ཚེས་ ༡༣ ཉིན་ཧྥ་རན་སིའི་རྒྱལ་ས་ཕ་རེ་སིར་གནས་བཞུགས་བོད་མི་ཉིས་བརྒྱ་ལྔ་བཅུ་ལྷག་འཛོམས་ཏེ། དངོས་སུ་འོས་འདེམས་བྱེད་སྐབས། ས་གནས་སྐུ་ཚབ་དོན་གཅོད་ལས་ཁང་གི་དྲུང་ཡིག་སྐུ་ངོ་ཚེ་རིང་དོན་འགྲུབ་ལགས་འོས་འདེམས་ཟུར་དཔང་དུ་གདན་འདྲེན་ཞུས་ཐོག ས་གནས་མང་ཚོགས་ཁྲོད་ནས་འོས་བསྡུ་ཚོགས་ཆུང་ཟུར་འཛུགས་བཅས་ཏེ། མང་ཚོགས་ཀྱིས་དམངས་གཙོའི་ཐོབ་ཐང་ལོངས་སུ་སྤྱད་དེ་འདེམས་པའི་འོས་གྲངས་མཐོ་ཤོས་དང། དེ་སྔའི་བོད་རིགས་ཚོགས་པའི་ཚོགས་གཙོ་ཟུར་བ་ཐུབ་བསྟན་རྒྱ་མཚོ་ལགས་ལ་འོས་གྲངས ༡༣༩ ཐོབ་སྟེ་འོས་གྲངས་མཐོ་ཤོས་དང། དེ་ནས་རིམ་བཞིན་རྒྱུན་ལས་གསར་རྙིང་བཅོ་ལྔ་རྩེ་བཏོགས་བྱས། དེ་དག་ལས་རྒྱུན་ལས་རྙིང་པ། ཉི་མ་ཆོས་སྒྲོན་ལགས་དང། ཤེས་རིག་འགན་འཛིན་མགོན་པོ་བཀྲ་ཤིས་ལགས་དང་དངུལ་གཉེར་ཨ་ནེ་མིག་དམར་ལགས་བཅས་ལ་འོས་ཐོབ་ཀྱང་དགོངས་པ་ཞུས། ཐུབ་བསྟན་རྒྱ་མཚོ་ལགས་དང། བསྟན་འཛིན་ཀླུ་གྲུབ་ལགས། འཕྲིན་ལས་རྣམ་རྒྱལ་ལགས་གསུམ་ཧྥ་རན་སེའི་བོད་རིགས་ཚོགས་པའི་རྒྱུན་ལས་སུ་བསྟུད་མར་སྐབས་བཞིའི་རིང་འོས་འདེམས་བྱུང་ཐོག་ ༢༠༠༣ ནས་ལོ་དགུའི་རིང་དང་བླངས་ཀྱིས་སྤྱི་ཚོགས་ཞབས་འདེགས་ཞུས་ཟིན་པ་དང། ད་ཆ་བསྐྱར་དུ་ལོ་གསུམ་རིང་རྒྱུན་ལས་སུ་འོས་འདེམས་བྱུང་བ་ནི་ཁོང་གསུམ་གྱི་སྐབས་ལྔ་པ་ཆགས་ཡོད།

ཕྱི་ལོ་ ༢༠༡༢ ལོའི་ཟླ་ ༥ པའི་ཚེས་ ༢༦ ཉིན་ཧྥ་རན་སེའིོ་བོད་རིགས་ཚོགས་པའི་རྒྱུན་ལས་གསར་རྙིང་ཚང་འཛོམས་ཀྱིས་རྒྱུན་ལས་གསར་བའི་ལས་གནས་གཏན་ཁེལ་བྱས་པ་ནི།

༡༽ ཚོགས་གཙོ་ནི་བོད་རིགས་ཚོགས་པའི་སྔར་སྲོལ་ལྟར་འོས་གྲངས་རྩེ་བཏོགས་བྱས་ཏེ་ཐུབ་བསྟན་རྒྱ་མཚོ་ལགས་ཚོགས་གཙོར་མང་མོས་ཀྱིས་གཏན་འཁེལ་བྱུང།

༢༽ ཚོགས་གཙོ་ཐུབ་བསྟན་རྒྱ་མཚོ་ལགས་ཀྱིས་འོས་གྲངས་མཐོ་དམན་ལྟར་འཕྲིན་ལས་རྣམ་རྒྱལ་ལགས་ཚོགས་གཞོན་དུ་བསྐོ་བཞག་དང།

༣༽ བསྟན་འཛིན་ཀླུ་གྲུབ་ལགས་དྲུང་ཆེ་དང་དཔལ་ཡོན་སློབ་གྲྭའི་ཤེས་ཡོན་འགན་འཛིན།

༤༽ འཇམ་དབྱངས་བཟང་པོ་ལགས་རྩིས་པ།

༥༽ ཐུབ་བསྟན་དར་རྒྱས་ལགས་དངུལ་གཉེར།

༦༽སྐལ་བཟང་ཚེ་རིང་ལགས་དྲ་རྒྱ་དང་གསར་འགོད་སོགས་དྲིལ་བསྒྲགས་པ།

༧༽ བསྟན་འཛིན་དཔལ་ལྡན་ལགས་དཔྱ་ཁྲལ་ལག་དེབ་གྱི་འགན་འཁུར་བ།

༨༽ཟློས་དགེ་བློ་བཟང་ལགས་དང་ཉི་མ་ཆོས་འཕེལ་ལགས་གཉིས་ཟློས་གར་ཞབས་གཞས་སྣེ་ཁྲིད་པ།

༩༽གནམ་ལྷ་ཚེ་རིང་ལགས་དཔལ་ཡོན་སློབ་གྲྭའི་དགེ་རྒན་དང་ཚོགས་འདུ་ཆེ་ཆུང་སྐབས་ཀྱི་བོད་ཡིག་གི་ཚིག་ཐོ་འགོད་མཁན་དུ་བསྐོས།

༡༠༽ཚེ་དབྱངས་སི་ལི་ལགས་ཚོགས་སྡེ་ཁག་དང་དམིགས་བསལ་འབྲེལ་མཐུད་པ།

༡༡༽ བློ་བཟང་ཉི་མ་ལགས་ཆོས་ཕྱོགས་དང་འབྲེལ་བའི་འགན་འཁུར་བ།

ཟླ་ ༥ པའི་ཚེས་ ༢༧ ཉིན་ས་གནས་བོད་རིགས་མང་ཚོགས་ཚོགས་འདུ་བསྡུས་ཏེ་རྒྱུན་ལས་གསར་རྙིང་རྩེས་སྤྲོད་རྩིས་ལེན་དང། རྒྱུན་ལས་གསར་རྙིང་བར་བཀྲ་ཤིས་རྟེན་འབྲེལ་མཚོན་པའི་ལྷ་དར་སྒྲོན་པའི་རྗེས། རྒྱུན་ལས་གསར་བའི་ལས་གནས་ཅི་ཡིན་མང་ཚོགས་ངོ་སྤྲོད་དང་རྒྱུན་ལས་རང་ངོས་ལོ་གསུམ་གྱི་རིང་ལ་ལས་འགན་དེ་ཇི་ལྟར་བསྒྲུབ་རྒྱུ་ཡིན་པའི་སྐོར་ལ་ངོ་སྤྲོད་གསལ་བཤད་མདོར་ཙམ་བྱས་པ་བཅས་ཚོགས་འདུ་མཇུག་སོང་བ་བཅས་སོ།