ཁྲི་གཡུང་དྲུང་ལགས་ཀྱིས་འདི་གར་གནས་ཚུལ་བཏང་འབྱོར་ལ། ཁ་སང་ཕྱི་ཚེས་ ༢༩ ཉིན་བོད་མདོ་སྨད་ཀྱི་བྱང་བྱ་དུར་དགའ་མལ་དགོན་ཆེན་དུ་ཞང་ཞུང་སྨར་ཆུང་གི་ཡིག་གཟུགས་རྒྱལ་སྤྱིའི་གཅིག་གྱུར་ཨང་རྟགས་ཐོག་འགྲེམ་སྤེལ་སྒོ་འབྱེད་མཛད་ཚོགས་ཡོད་འདུག
གནས་ཚུལ་ནང་བཀོད་དོན། “ཚོགས་ཐོག་ཏུ་བྱང་བྱ་དུར་དགའ་མལ་དགོན་ཆེན་གྱི་མཁན་པོ་ཤེས་རབ་གཡུང་དྲུང་དབང་རྒྱལ་རིན་པོ་ཆེ་དང་དཔོན་སློབ་ཤེས་རབ་མཐར་ཕྱིན་མཆོག་གཙོས་པའི་ཟིང་ཆུ་ཁོག་གི་དགོན་སྡེ་ལྕགས་མདུད་དགོན་གྱི་དབུ་བླ་ཟླ་བ་རྒྱལ་མཚན་དང་། རིན་སྤུངས་དགོན་གྱི་མཆོག་སྤྲུལ་བླ་མ། ཤར་སྣང་ཞིག་དགོན་གྱི་མཆོག་སྤྲུལ་ཤེས་རབ་འོད་ཟེར་རྒྱལ་མཚན། སྐྱང་ཚང་དགོན་གྱི་དབུ་བླ་གཡུང་དྲུང་དགེ་ལེགས་མཐར་ཕྱིན་སོགས་དབུ་བླ་དང་མཁན་པོ་དགེ་བཤེས་སྤྲུལ་སྐུ་ ༢༠ ལྷག་ལྷན་འཛོམས་ཀྱིས་ཞང་ཞུང་སྨར་གྱི་ཡིག་གཟུགས་མཉེན་ཆས་༼ཧི་མ་ལ་ཡའི་བོན༽དྲ་ཚིགས་སུ་ནང་འཇུག་བྱེད་པའི་ཚོགས་འདུ་འཚོགས་པ་དང་། དང་ཐོག་དགའ་མལ་དགོན་གྱི་མཁན་སློབ་རྣམ་གཉིས་ནས་ཞང་ཞུང་སྨར་ཆུང་ཡིག་གཟུགས་བཀྲམ་པའི་རྟེན་འབྲེལ་གྱི་དར་ཡོལ་དབུ་འབྱེད་གནང་བ་དང་། དེ་ནས་ཡིག་གཟུགས་བཟོ་སྐྲུན་གྱི་འགན་འཛིན་པ་ཨ་དཔལ་བཟང་དང་རིན་སྤུངས་ཚུལ་བསྟན་གཉིས་ནས་ཡིག་གཟུགས་རྩིས་འཁོར་དུ་བཅུག་པའི་ལས་རིམ་ངོ་སྤྲོད་དང་དམིགས་ཡུལ་སོགས་མཚམས་སྦྱོར་བྱས། ” ཡོད་འདུག
མུ་མཐུད་དོན། ” དེ་ནས་མཁན་ཆེན་རིན་པོ་ཆེ་ནས་སྨར་ཡིག་རྩིས་འཁོར་དུ་བཅུག་པ་འདིས་སྤྱིར་བོད་མི་རིགས་ཀྱི་རིག་གནས་སྤྱི་དང་ཁྱད་པར་དུ་གཡུང་དྲུང་བོན་བསྟན་ལ་ཕན་འབྲས་གང་ལེགས་ཐོན་ཡོད་པ་སོགས་ཀྱི་བཀའ་སློབ་བསྩལ་བ་དང་། མཁན་སློབ་གཉིས་དང་དགོན་ཁག་སོ་སོའི་བླ་སྤྲུལ་དག་གིས་བཟོ་སྐྲུན་པ་གཉིས་ལ་བཀྲ་ཤིས་ཁ་བཏགས་སྒྲོན་འབུལ་དང་། སྨར་ཡིག་རྩིས་འཁོར་དུ་བཅུག་པའི་ཕན་འབྲས་སྐོར་ལ་བཀའ་སློབ་དང་བགྲོ་གླེང་གནང་ཡོད་འདུག” ཅེས་སོགས་བཀོད་འདུག
རིན་སྤུངས་ཚུལ་ཁྲིམས་བསྟན་འཛིན་ལགས་ཀྱིས་ཞང་ཞུང་སྨར་གྱི་ཡིག་གཟུགས་མཉེན་ཆས་སྐོར་ངོ་སྤྲོད་གནང་བར། ཞང་ཞུང་སྨར་གྱི་ཡིག་གཟུགས་ནི་དེང་གི་བོད་ཀྱི་ཡིག་གཟུགས་དབུ་ཅན་དང་དབུ་མེད་ཀྱི་ཡིག་གཟུགས་མ་བྱུང་བའི་ཡར་སྔོན་ནས་ཡོད་པའི་ཞང་བོད་ཐུན་མོང་གིས་བེད་སྤྱོད་གཏོང་བཞིན་པའི་ཡིག་གཟུགས་ཤིག་ཡིན་པར་གནའ་དེང་གི་མཁས་དབང་གང་མང་ཞིག་གིས་གསུངས་དང་གསུང་བཞིན་ཡོད་པ་དང་། ཞང་ཞུང་སྨར་ཡིག་ནི་ཉུང་མཐའ་ཡང་ལོ་ངོ་ ༡༤༠༠ ཡར་སྔོན་གྱི་ལོ་རྒྱུས་ལྡན་པའི་ཡིག་རྙིང་ཞིག་ཡིན་པ་དང་། ཁྱད་པར་དུ་དེང་འཛམ་བུ་གླིང་དུ་འོད་ལྷང་ལྷང་དུ་འཚེར་བཞིན་པའི་བོད་རང་གི་ཐུན་མོང་མ་ཡིན་པའི་ཤེས་རིག་གི་བྱུང་ཁུངས་ནི་ཞང་ཞུང་གི་ཤེས་རིག་ཡིན་པ་ཀུན་གྱིས་མཁྱེན་ས་ལྟར་རེད་ལ།
ཞང་ཞུང་སྨར་ཡིག་ནི་བོད་ཡིག་དབུ་ཅན་དབུ་མེད་ཀྱི་ཕྱི་མོ་ཡིན་པ་ཡང་ཚད་ལྡན་གྱི་ལོ་རྒྱུས་དག་དང་མཁས་དབང་རྣམ་པའི་གསུང་ལས་གསལ་བོར་བཀོད་ཡོད། དེ་ཕྱིར་ང་ཚོས་ཀྱང་རང་གིས་ནུས་ཚོད་དང་བསྟུན་ནས་བོད་ཀྱི་རིག་གནས་འདི་ཉིད་དར་སྤེལ་དང་རྒྱུད་འཛིན་སོགས་ཀྱི་ཆེད་དུ་དམིགས་ཏེ་དུས་རབས་དང་མཐུན་པའི་སྒོ་ནས་བོད་ཡིག་གི་ཕྱི་མོ་ཞང་ཞུང་སྨར་གྱི་ཡིག་གཟུགས་འདི་ཉིད་རྩིས་འཁོར་དུ་བཅུག་པའི་ལས་འགན་དེ་འཕྲག་ཏུ་བླངས་པ་ཡིན།
སྤྱིར་བཏང་ཞང་ཞུང་སྨར་ཆུང་ལ་ཡང་བྲིས་རྒྱུན་མི་འདྲ་བ་རེ་གཉིས་འདུག་མོད་ཀྱང་ང་ཚོས་ཆེད་དུ་བོན་བརྒྱ་དགེ་ལེགས་ལྷུན་གྲུབ་རྒྱ་མཚོ་མཆོག་དང་སྐྱང་སྤྲུལ་དྲི་མེད་འོད་ཟེར་རིན་པོ་ཆེ་དང་། བྱང་བྱ་དུར་དགའ་མལ་དགོན་ཆེན་གྱི་མཁན་ཆེན་ཤེས་རབ་གཡུང་དྲུང་དབང་རྒྱལ་སོགས་ལ་བཀའ་འདྲི་ཡང་ཡང་ཞུས་ཏེ་ཡིག་གཟུགས་འདི་ཉིད་གཏན་ཁེལ་བྱས་ཏེ་ཡིག་གཟུགས་པ་ཤར་སྟེང་བསམ་གཏན་རྒྱ་མཚོ་ལགས་ཀྱིས་ཡིག་འབྲུ་དགུ་བརྒྱ་ལྷག་བྲིས་པ་དང་། སྤྲུལ་བའི་སྐུ་མཆོག་དམ་པ་ལི་ཤུ་གཤེན་རྒྱལ་བསྟན་འཛིན་རིན་པོ་ཆེ་ནས་ཡིག་གཟུགས་མཉེན་ཆས་བཟོ་སྐྲུན་གྱི་འགྲོ་སོང་གནང་ནས་ངེད་གཡུང་དྲུང་བོན་དང་འབྲེལ་བའི་དཔྱད་གླེང་ལོ་དེབ༼མུ་ཁྲི་བཙན་པོ ༽རྩོམ་སྒྲིག་ཁང་ནས་བཟོས་པ་ཡིན་ལ། ཡིག་གཟུགས་གཏག་ཆས་ཐབས་རྒྱལ་སྤྱིའི་བོད་ཡིག་ཡིག་གཟུགས་མཉེན་ཆས་ཧི་མ་ལ་ཡ་རང་ཡིན། ཞེས་སོགས་བརྗོད་འདུག ཅེས་འགྲེལ་བཤད་སྐྱོན་འདུག
གཞན་ཐེངས་འདིར། སྟོན་པ་རྒྱལ་བ་གཤེན་རབ་མི་བོ་ཆེ་ཀུན་ལས་རྣམ་པར་རྒྱལ་བའི་བཀའ་ཚད་མ་ཀླུ་འབུམ་དཀར་ནག་ཁྲ་གསུམ་བསྡུས་པའི་པོད་དེ་ཚར་གྲངས་ཆིག་སྟོང་དང་མདོ་འདུས་པ་རིན་པོ་ཆེའི་བཀའ་ཚད་མ་སོགས་གཡུང་དྲུང་བོན་དང་འབྲེལ་བའི་དཔེ་ཆ་མང་པོ་ཞིག་ཀྱང་ཞང་ཞུང་སྨར་ཡིག་གི་ལམ་ནས་དཔར་སྐྲུན་འགྲེམས་སྤེལ་གནང་ཡོད་འདུག་ཅིང་། དེ་ནི་ཞང་ཞུང་སྨར་ཡིག་ཐོག་དཔེ་ཆ་དཔར་སྐྲུན་བྱས་པ་ཐོག་མ་དེ་ཆགས་ཡོད་འདུག
གསར་འགོད་པ། དོན་འགྲུབ་བཀྲ་ཤིས།
ཀརྨ་ཟེར་བའི་མིང་འདི་འདྲ་རྟག་པར་ཁ་བརྡའི་ནང་དུ་རྙོག་ཁྲ་སློང་གི་འདུག
བཀའ་རྒྱུད་པའི་ཞབས་འདྲེན་པ་རང་རེད།
ཀརྨ་ཞེས་པ་ནི་ལས་དང། དེས་ན་སྔར་ཀྱང་ལས་ངན་པས་རྟག་ཏུ་གཞན་ལ་འགྲན་སེམས་འཕྲག་དོག་ཅན་དུ་སྐྱེས། ཕྱིས་སུའང་འཕྲག་དོག་འཕྲང་རོང་དོག་པོའི་གནས་དང་བུད་མེད་ཀྱི་མངལ་གནས་སུ་སྐྱེ་བར་ཐེ་ཚོམ་མི་འདུག
ཨཱོྃ་མ་ཏྲི་མུ་ཡེ་ས་ལེ་འདུ།
རྟག་ཏུ་འགྲོ་ལ་གཟིགས་པའི་སྐྱབས་གནས་མཐུས།
ཀརྨ་ལས་ངན་ལུས་རྒྱ་ཞིག་མ་ཐག
འཁོར་བའི་ལས་ཟད་མཇའ་འོད་ལམ་བཞུགས་ནས།
བདེ་བ་ཅན་གྱི་ཞིང་དུ་སྐྱེ་བར་ཤོག
རང་ཅག་གངས་ཅན་པའི་ཕ་ཤུལ་བུས་འཛིན་པ་བོན་པོ་ཚང་ལ་སྨར་ཡིག་འདི་འདྲ་ཞིག་ཡོད་པར་བཀྲ་ཤིས་བདེ་ལེགས་ཡོད།འོན་ཀྱང་ད་སྔ་སྨར་ཡིག་ཐོག་ནས་གནའ་དཔེ་དུམ་པ་གཅིག་ཡང་འགྲེམ་རྒྱུ་མེད་པ་དེར་སྙིང་ནས་བློ་ཕམ་ཡོད་་་་
བོན་པོ་འདི་ཚོ་ངོ་མ་ཡ་མཚན་རེད། བོད་པ་བླུན་རྒན་དག་གིས་ཅི་ཙམ་གཏོར་བརླག་དང་དམའ་འབེབས་བྱས་རུང་། བོན་པོ་དག་རང་རྐང་ཐོག་ལང་རྐྱང་རེད། བོད་པའི་ནང་ཆོས་པ་དག་གིས་རྫུན་བཤད་བཤད་ནས་མཐར་ཐུག་ན་བོན་པོ་མ་གཏོག་ལོས་རྒྱུས་ཀྱི་ཁུངས་འདེད་ས་མེད་པ་འདི་ནི། བོད་པའི་ནང་པ་དག་གི་རྫུན་རྐུབ་རྡོལ་བཞིན་པའི་རྟགས་རེད།
ཞང་ཡིག་གིས་བོན་ཆོས་ལ་ཕན་པའི་ངེས་པ་གང་ཡང་ཡོད་མ་རེད། དུས་ཚོད་བེད་མེད་ལ་མ་གཏོང་ན་ལེགས།
ཡང་་་་བོད་དུ་མུ་གེའི་སྒང་ལ་ཟླ་ལྷག་ཅིག་བྱུང་ཐལ། དངོས་གནས་དེ་འདྲ་ཡིན་ན་ད་ལྟ་ཡོད་པའི་བོན་གྱི་བཀའ་འགྱུར་གྱི་ཡི་གེ་རྣམས་ཞང་ཞུང་སྨར་ཡིག་ཏུ་འབོད་པའི་ཡིག་གཟུགས་སུ་ཅིའི་ཕྱིར་མེད་སོང་བ་རེད་དམ།