དབུས་བོད་མིའི་སྒྲིག་འཛུགས་ཀྱིས་གཙོས་པའི་བཙན་བྱོལ་བོད་མི་འདུས་སྡོད་ཀྱི་རྒྱལ་ཁབ་དང་ས་གནས་ཁག་ཏུ་སྐུའི་འཁྲུངས་སྐར་ ༧༧ པ་དེ་ཟབ་རྒྱས་ངང་སྲུང་གཙི་ཞུ་བཞིན་པའི་སྐབས་འདིར། བོད་ནང་མགོ་ལོག་ཁུལ་གྱི་སྒྱུ་རྩལ་པ་ཁག་ཅིག་གིས་ཀྱང་ཆེད་དུ་རྡུང་ལེན་གསར་རྩོམ་དང་བརྙན་ཕབ་འགྲེལ་སྤེལ་གྱིས་ལམ་ནས་ད་ལོའི་སྐུའི་འཁྲུངས་འདི་སྲུང་གཙི་གནང་ཡོད་འདུག
བོད་ནས་ད་ལོའི་འཁྲུངས་སྐར་ཆེད་གསར་དུ་བརྙན་ཕབ་བྱས་པའི་རྡུང་ལེན་གཉིས་ནི། རྡུང་ལེན་པ་ལོ་ལོ་ལགས་ཀྱིས་༼ སེམས་ན་ཡོད།༽ཅེས་པ་དང་། རྡུང་ལེན་པ་ཚེ་རིང་རྡོ་རྗེ་ལགས་ཀྱི་༼ཁྲི་ལོར་ཤོགས།༽ཞེས་པ་གཉིས་ཡིན་ཞིང་། རྡུང་ལེན་དེ་གཉིས་ཀྱི་ཚིག་རྩོམ་མཁན་ནི་མགོ་ལོག་༼རྨ་ཡུལ་སེང་ཆེན་སྒྱུ་རྩལ་ཚོགས་པའི་༽མཆོད་རྟེན་ལགས་ཡིན་འདུག འདི་ག་གསར་འགོད་པས་ཆེད་དུ་བོད་ནང་ཁ་པར་བརྒྱུད་ནས་རྒྱུས་ལོན་བྱས་སྐབས། ཚིག་རྩོམ་མཁན་མཆོད་རྟེན་ལགས་ཀྱིས། “ རྡུང་ལེན་འདི་གཉིས་ཉིན་གཉིས་དང་གསུམ་གྱི་སྔོན་ཏག་ཏག་ལ་གསར་དུ་བརྙན་ཕབ་བྱས་པ་ཡིན། དེ་ཡང་ཆེད་དུ་ད་ལོའི་ཡིད་བཞིན་ནོར་བུའི་སྐུའི་འཁྲུངས་སྲུང་གཙིའི་ཆེད་གསར་རྩོམ་དང་བརྙན་ཕབ་འགྲེམ་སྤེལ་བྱས་པ་ཞིག་ཡིན” ཞེས་ངོ་སྤྲོད་གནང་བ་དང་། རྡུང་ལེན་དེ་གཉིས་གཞིས་ལུས་བོད་མི་ཡོངས་ཀྱིས་༧གོང་ས་ཡིད་བཞིན་ནོར་བུ་མཆོག་ལ་བཅངས་པའི་སེམས་འདུན་དང་ཡིད་སྨོན་མཚོན་བྱེད་ཙམ་ཡིན་ཟེར།
དེ་བཞིན། ད་ལྟ་རྒྱ་ནག་གཞུང་ལ་ངོ་རྒོལ་ཆེད་བོད་ནང་རང་སྲེག་ལས་འགུལ་རྒྱུན་མཐུད་ནས་བསྟུན་མར་བྱུང་བཞིན་པ་དང་། རྒྱ་ནག་གཞུང་གིས་ཀྱང་བོད་ས་ཡོངས་ལ་དམ་དྲག་ཤུགས་ཆེན་བྱེད་བཞིན་པ་མ་ཟད། རྒྱ་ནག་གཞུང་ལ་ཚོར་ཤུགས་ཆེ་བའི་སྐུའི་འཁྲུངས་སྐར་ལ་ཆེད་དུ་སྲུང་གཙི་བྱེད་སྐབས་མི་སྒེར་གྱི་བདེ་འཇགས་ལ་བསམ་བློ་བཏང་མིན་དྲིས་སྐབས། ཁོང་གིས། “དེ་ལ་བསམ་བློ་བཏང་མེད། ཡིད་བཞིན་ནོར་བུ་མཆོག་མགོ་ནག་བོད་པ་ཚང་མའི་སྐྱབས་གནས་ཉར་གཅིག་དེ་རེད། ཁོང་གི་སྐུའི་འཁྲུངས་སྐར་སྲུང་གཙི་ཞུ་རྒྱུ་དེ་བོད་པ་ཚང་མས་དགའ་བཞིན་དད་བཞིན་བྱེད་རྒྱུའི་ལས་ཀ་ཞིག་དང་། དེ་ཡང་བོད་པ་ཚོའི་རྒྱུན་ལྡན་དང་ཆོས་ཕྱོགས་ཀྱི་བྱེད་སྒོ་ཞིག་རེད། མ་ཟད་ད་ལོའི་རྡུང་ལེན་འདི་གཉིས་ནང་ཆབ་སྲིད་ཀྱི་ནང་དོན་གང་ཡང་འདྲེས་མེད། དེར་བརྟན་ང་ཚོས་རང་རང་གི་བདེ་འཇགས་ལ་དཀའ་ངལ་འཕྲད་མིན་ལ་བསལ་བློ་བཏང་མེད” ཅེས་བརྗོད་སོང་།
འདས་ལོར་ཡང་མགོ་ལོག་ཁུལ་གྱི་སྒྱུ་རྩལ་པ་ཁག་ཅིག་གིས་རྡུང་ལེན་བརྙན་ཕབ་ཀྱི་ལམ་སྐུའི་འཁྲུངས་སྐར་སྲུང་གཙི་གནང་ཡོད་པ་དང་། ད་ལོའི་རྡུང་ལེན་འདི་གཉིས་མཆོད་རྟེན་ལགས་ཀྱིས་བརྙན་ཕབ་གྲུབ་མཚམས་འགྲེལ་སྤེལ་ཆེད་ཧྥ་རན་སིར་བསྐུར་ཡོད་ཅིང་། ཧྥ་རན་སིའི་བོད་དོན་རྒྱབ་སྐྱོར་བ་གླིང་ལྷ་མོ་ལགས་ཀྱིས་ཕྱི་ཚེས་ ༣ ཉིན་ཡུ་ཊོབ་བརྒྱུད་འགྲེལ་སྤེལ་བྱས་ཡོད་འདུག
ཁྲི་ལོར་ཤོགས། http://www.youtube.com/watch?v=CGrBRf8jEuU&feature=youtu.be
སེམས་ན་ཡོད། http://www.youtube.com/watch?v=TFeKWibV_mQ&feature=youtu.be
ཧྥ་རན་སིའི་གསར་འགོད་པ་ཟླ་བ་ཚེ་རིང་།
དཔའ་རྒོད་ཚོ་ལ་བཀའ་དྲིན་ཞུ།
དཔལ་རྒོད་འདི་ཚོའི་སྙིང་སྟོབས་ལ་དངོས་གནས་རྗེ་སུ་ཡིས་རམ་ཡོད་
བོད་ནང་གི་སྙིང་སྟོབས་ཅན་གྱི་གླུ་བ་དང་གླུ་མ་རྣམས་ཀྱིས་སྙེས་པོ་དབྱངས་ཀྱི་རྒྱུད་དེ་བོད་པའི་གནས་སྟང་འབྲེལ་བཤད་རྒྱག་བཞིན་འདི་ཆེས་སྟོབས་ཤུགས་ཅན་གྱི་ལས་འགོལ་ཞིག་རེད་།་
འོན་ཀྱང་ཁོང་ཚོའི་བདེ་འཇག་ལ་སེམས་འཕྲལ་དེ་བས་ཇེ་ཆེ་རེད་ྲ
ཚོར་འདུ་གླུ་རུ་ལེན་མཁས་དཔའ་རྒོད་ཚོ།།
ཚེ་སྲོག་ཡལ་བར་བོར་བའི་དཔའ་རྒོད་ཚོ།།
རིགས་ཀྱི་དོན་ཆེན་སྒྲུབ་མཁས་དཔའ་རྒོད་ཚོ།།
དྲིན་ཅན་རྩ་བའི་བླ་མས་ཐུགས་རྗེས་སྐྱོངས།།