སྣར་སྐྱིད་ངག་དབང་དོན་གྲུབ་ཀྱི་ཧོལ་རྒྱུག་མཐིལ་བརྟོལ། དང་པོ།

བྲག་གཞིས་བསྟན་འཛིན་ཕན་བདེ།

འཚོ་བ་བླ་ནས་སྦྱར་བའི་བཀའ་དྲིན་གྱི་ཞོ་ཤས་རིང་དུ་གནས་པ་སྐུ་ངོ་སྣར་སྐྱིད་ངག་དབང་དོན་གྲུབ་ལགས་ནས་ཉེ་བའི་ཆར་ལོ་རྒྱུས་དང་འབྲེལ་བའི་གནད་དོན་ཞིག་གི་ཐོག་གླེང་ཕྱོགས་ཡོད་པའི་དེབ་ཆུང་ཞིག་བྲིས་ཏེ་ཐོན་ཡོད་སྐོར་གྱི་སྐད་ཆ་གོ་ཐོས་བྱུང་ཡང་། དེབ་དེ་ཉིད་གུས་པར་ལག་སོན་མ་བྱུང་ཞིང་ཐབས་ཤེས་ཀྱི་འབད་བརྩོན་ཡང་བྱས་མེད། འོན་ཀྱང་ཉིན་ཤས་གོང་དེབ་ཆུང་དེ་ཉིད་རྩོལ་མེད་ངང་ནས་གུས་པའི་ལག་ཏུ་འབྱོར་བྱུང་བས་མིག་ཉུལ་ཐེངས་གཅིག་བྱས་པ་ཡིན། དེབ་ཆུང་དེར་སྤྱིའི་ཆ་ནས་དབྱིན་ཡིག་ཤོག་གྲངས་དང་པོ་ནས་དྲུག་བཅུ་རེ་བཞིའི་བར་འདུག་ཀྱང་། ཁོང་གི་སེམས་གཏིང་ནས་བཤད་འདོད་པའི་སྐད་ཆ་དེ་ཤོག་གྲངས་ཉི་ཤུ་རྩ་གཉིས་ནས་རྫོགས་པར་བརྟེན་ལྷག་མ་རྣམས་དཔེ་དེབ་ཀྱི་ཁ་བྱང་དང་འབྲེལ་མེད་ཀྱི་ཡིག་རྫོབ་མང་པོ་ལྷུ་བསྒྲིགས་ཀྱིས་རྫོགས་པར་བྱས་འདུག

སྐུ་ངོ་སྣར་སྐྱིད་ཀྱི་ཆོས་རབ་ཏུ་རྣམ་འབྱེད་ཀྱི་ཤེས་རབ་ལས་འཁྲུངས་པའི་དོན་དམ་པའི་གནས་ལུགས་ཀྱིས་སྟོང་ཞིང་ཀུན་རྫོབ་པའི་སྒྱུ་ཡིས་མཛེས་པར་བྱས་པའི་༼དངོས་དོན་མིན་པའི་གསལ་བཤད་བསྐྱར་གསལ ༽ཞེས་རྩོམ་བྱང་དུ་བཀོད་པའི་རྩོམ་ཡིག་འདིའི་མགོ་མཇུག་བར་གསུམ་གྱི་བརྗོད་བྱའི་ཉིང་ཁུ་ནི་༸གོང་ས་གོང་མའི་མཛད་པར་དག་ཐེར་ཡིན་ཁུལ་གྱིས་དོན་དམ་དུ་༸གོང་ས་བཅུ་བཞི་པ་ཆེན་པོར་ཟུར་ཟ་བྱ་རྒྱུ་དེ་རང་རེད་འདུག་པ་མ་གཏོགས། དེ་ལས་ལྷག་པའི་སྐུ་ངོ་རང་ངོས་ནས་གསུངས་པའི་ལོ་རྒྱུས་མ་དག་རྒྱུན་འབྱམས་སུ་འགྲོ་ཉེན་འགོག་ཐབས་དང་། དངོས་དོན་མིན་པའི་གསལ་བཤད་ཀྱི་རིགས་གང་ཡང་རེད་མི་འདུག དེར་བརྟེན་ཕྲན་ནས་རྩོམ་ཡིག་འདི་ཞིབ་ཏུ་བཀླགས་ཏེ་བསམ་སྐབས་སྒོ་ཁྱི་རྒྱགས་ན་བདག་པོར་ངར་ཞེས་པའི་དཔེ་ལྟར་སྐུ་ངོ་མཆོག་ནས་༸གོང་ས་༸སྐྱབས་མགོན་ཆེན་པོའི་དབུ་ཐོག་ཏུ་བཀལ་བའི་ལོ་རྒྱུས་ཀྱི་དངོས་དོན་ལ་ཧོལ་རྒྱུག་བཏང་སོང་ཞེས་པའི་རྫུན་ཆེན་གྱི་ཞྭ་ཆེན་པོ་ཞིག་གཡོག་པ་དེར་གསལ་བཤད་ཅིག་མ་བྱས་ཐབས་མེད་དུ་གྱུར་སོང་།

སུ་ཞིག་གིས་བཤད་པ་དེ་ཉིད་བདེན་པ་ཡིན་ན་སུ་ལ་དམིགས་ནས་བཤད་ཀྱང་བཤད་པ་བདེན་པར་སོང་དེ་ལ་གསལ་བཤད་བྱ་དགོས་གང་ཡང་མ་མཐོང་། འོན་ཀྱང་། ཨ་བུ་ཧྲལ་པོས། འཁྱོག་པོས་དྲང་པོ་འཁྱོག་པོར་མཐོང་དུས་འདིར། །ཞེས་གསུངས་པ་བཞིན་ལོ་རྒྱུས་ཁ་ལ་འཁྱེར། སེམས་ངན་ཁོག་ཏུ་བཅུག རྫུན་གཏམ་རང་གིས་བཤད། རྫུན་ཁག་གཞན་ལ་དཀྲི་བའི་བྱ་སྤྱོད་འདི་རིགས་ཐོན་ཚེ་ལོ་རྒྱུས་ལ་དག་ཐེར་ཆེད་བདེན་རྫུན་ཤན་འབྱེད་བྱེད་རྒྱུ་ནི་གལ་ཆེན་དུ་བསམས་ནས་སྐུ་ངོའི་མདུན་དུ་ལངས་ཏེ་སྨྱུག་ཁ་མ་རྡར་ཐབས་མེད་དུ་གྱུར་སོང་། སྐུ་ངོ་སྣར་སྐྱིད་ཀྱིས། “བོད་ཀྱི་རྒྱལ་རབས་ལོ་རྒྱུས་ཚིག་གནད་ཅིག །མ་དག་བརྒྱུད་འཇགས་ཡོང་ཉེན་འགོགས་ཐབས་སུ། །དངོས་དོན་མིན་པའི་གསལ་བཤད་བསྐྱར་གསལ་ཐོག །ཧོལ་རྒྱུགས་འབྱུང་ཁུངས་འཚོལ་ཞིབ་གླེང་སློང་བྱ།།” ཞེས་པའི་ཚིག་བཅད་དམ་དུམ་ཞིག་ནས་མགོ་བཙུགས་ཤིང་། དོན་དུ་ཡོངས་འཛིན་ཕུར་ལྕོག་སྤྲུལ་སྐུས་མཛད་པའི་རྒྱལ་དབང་བཅུ་གསུམ་པ་ཆེན་པོའི་མཛད་རྣམ་རིན་ཆེན་ཕྲེང་བའི་ནང་རྒྱ་ནག་ཏུ་གོང་མ་ཡུམ་སྲས་མཇལ་བར་ཕེབས་སྐོར་འཁོད་པ་དེ་ཉིད་རྩ་བ་ནས་བདེན་པ་མིན་ཞེས་འབྲེལ་ཡོད་ལོ་རྒྱུས་ཀྱི་ཚིག་གནད་འདི་ཉིད་ལ་དག་ཐེར་བྱ་རྒྱུའི་རྣམ་འགྱུར་སྟོན་ཁུལ་བྱས་འདུག་ཀྱང་། གལ་ཆེན་དོན་ཆེན་དུ་བསམ་ན་ལོ་རྒྱུས་ཀྱི་ཚིག་གནད་ལ་དག་པ་སྟེར་པའི་སྒྲུབ་བྱེད་ཞིབ་ཅིང་ཕྲ་བ་འགོད་དགོས་ཀྱང་མ་བཀོད་པར་སྒྲུབ་བྱེད་དམ་དུམ་འགའ་ཤས་ཀྱིས་འགྲིགས་པར་བྱས་པ་དང་། མཐའ་མཇུག་ཏུ་གོང་གསལ་ལོ་རྒྱུས་དང་འབྲེལ་བའི་ཚིག་གནད་དེ་ཉིད་རྩེ་འགག་གི་འགག་དེབ་ནང་ནོར་འཛོལ་བྱུང་སྐོར་སྐུ་ངོ་ཀུན་བཟང་རྩེ་དང་རང་ཉིད་བར་གྱི་བཀའ་མོལ་ཡིན་ཞེས་པའི་ཚོད་དཔག་གི་སྐད་ཆ་འགའ་ཤས་ཀྱིས་མཇུག་རྫོགས་པ་བྱས་ཡོད་པར་གཞིགས་ན། སྐུ་ངོ་སྣར་སྐྱིད་མཆོག་གི་དག་ཐེར་གནང་ས་གཙོ་བོ་འདི་ཉིད་ཡིན་མིན་ལ་ཐེ་ཚོམ་ཡོང་གི་འདུག ད་དུང་སྐུ་ངོ་ཀུན་བཟང་རྩེ་དང་ཁོང་གི་བར་བྱུང་བའི་བཀའ་མོལ་ལ་བསམ་གཞིགས་བྱས་ན་སྐུ་ངོ་སྣར་སྐྱིད་རང་ཉིད་ནས་གོང་གསལ་ལོ་རྒྱུས་ཀྱི་ནོར་འཛོལ་དེ་དུས་ནས་མཁྱེན་གྱི་ཡོད་འདུག་ཀྱང་ད་བར་ངང་སྒུག་བྱེད་དགོས་དོན་གང་ཡིན་ནམ། ཞེས་པའི་དྲི་བ་ཞིག་ཀྱང་ངང་གིས་ཐོན་ཡོང་གི་འདུག

དེས་ན་སྐོར་བ་གང་ནས་བྱས་ཀྱང་སླེབས་ས་བག་ལེབ་ཚོང་སའི་སྒོ་འགྲམ་རེད་ཅེས་པའི་དཔེ་ལྟར། སྐུ་ངོ་སྣར་སྐྱིད་ཀྱིས་ཡར་སྐོར་མར་སྐོར་གང་ནས་བྱས་ཀྱང་འབབ་ས་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ནས་ཕྱི་ལོ་ ༢༠༡༡ ཟླ་ ༣ ཚེས་ ༡༡ ཉིན་བོད་མི་མང་སྤྱི་འཐུས་ལྷན་ཚོགས་སུ་བསྩལ་བའི་གསུང་འཕྲིན་དེ་རང་རེད་འདུག གསུང་འཕྲིན་རིན་པོ་ཆེའི་ནང་ “༧རྒྱལ་དབང་སྐུ་ཕྲེང་བཅུ་གསུམ་པས་ཆབ་སྲིད་ཀྱི་མངའ་དབང་བཞེས་པ་ནས་རིང་པོར་མ་སོང་བར་འགལ་རྐྱེན་དབང་གིས་སོག་ཡུལ་དང་། རྒྱ་ནག རྒྱ་གར་ཕྱོགས་སུ་ཕེབས་དགོས་བྱུང་སྟེ” ཞེས་སོགས་ཕེབས་པར་གསུང་འཕྲིན་རིན་པོ་ཆེའི་ནང་འགལ་རྐྱེན་དབང་གིས་སོག་ཡུལ་དང་རྒྱ་ནག་ཏུ་ཕེབས་འཁོད་པ་འདི་ཉིད་གོང་གསལ་ཕུར་ལྕོག་སྤྲུལ་སྐུས་མཛད་པའི་སྐུ་གོང་མའི་མཛད་རྣམ་ནང་གོང་མ་ཡུམ་སྲས་མཇལ་བར་ཕེབས་ཚུལ་གསུངས་པའི་མ་དག་པའི་ལོ་རྒྱུས་ལ་གཞི་བཅོལ་ཡོད་ཅིང་། དེ་ཉིད་ཧོལ་རྒྱུག་ཡིན་པར་སྙད། སྐུ་ངོ་མཆོག་ནས་ན་ཡམ་དུ་དོགས་པ་མེད་པའི་དོགས་པ་མདུན་དུ་བསུས་པ་ནི་ཕྱོགས་སྔ་ནམ་མ་ལང་སྔོན་ནས་དགག་པའི་ཉི་མ་ཤར་བའི་དཔེ་དོན་དུ་སོང་འདུག སྐུ་ངོ་མཆོག་བློ་རྩེ་ནང་དུ་ཕྱོགས་ཏེ་དགོངས་པ་བཞེས་དང་། གསུང་འཕྲིན་རིན་པོ་ཆེའི་ནང་འགལ་རྐྱེན་དབང་གིས་སོག་ཡུལ་དང་། རྒྱ་ནག རྒྱ་གར་བཅས་སུ་ཕེབས་དགོས་བྱུང་བར་གསུངས་པ་བཞིན་༸གོང་ས་བཅུ་གསུམ་པ་ཆེན་པོ་མཆོག་འགལ་རྐྱེན་དབང་གིས་སོག་ཡུལ་དང་། རྒྱ་ནག རྒྱ་གར་བཅས་སུ་ཕེབས་དགོས་བྱུང་བ་བོད་ཀྱི་ལོ་རྒྱུས་ཡིག་ཆ་ཚང་མའི་ནང་འཁོད་ཡོད་པའི་དོན་དངོས་ཤིག་རེད། དང་པོ། རྒྱ་གར་དབྱིན་གཞུང་གི་འགལ་རྐྱེན་དབང་གིས་སོག་ཡུལ་དུ་ཕེབས་དགོས་བྱུང་བ་དང་། གཉིས་པ། རྒྱ་སོག་གཉིས་ཀའི་འགལ་རྐྱེན་དབང་གིས་པེ་ཅིང་དུ་ཕེབས་དགོས་བྱུང་བ། གསུམ་པ། རྒྱ་ཕྱོགས་ཀྱི་འགལ་རྐྱེན་དབང་གིས་རྒྱ་གར་དུ་ཕེབས་དགོས་བྱུང་ཡོད་པ་བཅས་ལོ་རྒྱུས་ནང་གསལ་ཡོད། གསུང་ཚིག་འདི་ཉིད་༸གོང་ས་བཅུ་གསུམ་པའི་མཛད་རྣམ་ནང་གོང་མ་ཡུམ་སྲས་མཇལ་བར་ཕེབས་ཚུལ་འཁོད་པ་དེར་གཞི་བཅོལ་ཡོད་ཚུལ་གསུངས་པ་ནི་སྐུ་ངོ་མཆོག་གི་མཁས་རློམ་རྟོག་བཟོ་འབའ་ཞིག་ལས་གསུང་འཕྲིན་རིན་པོ་ཆེའི་ཚིག་དོན་གང་གི་ཆ་ནས་བསམས་ཀྱང་འདི་འདྲའི་གོ་བ་འདུག་སྙམ་པའི་དོག་པ་མཁས་བླུན་སུ་གང་ལ་ཡང་ཡོང་མི་སྲིད་པ་ལོང་བས་བལྟས་ཀྱང་ཁམས་གསུམ་གྱི་དཔེ་དོན་དུ་མ་སོང་ངམ། དེས་ན་སྐུ་ངོ་མཆོག་ནས་སྐབས་འདིར་༸གོང་ས་མཆོག་གིས་ཧོལ་རྒྱུག་ཤོར་འདུག་ཅེས་སྐད་གསང་ཐོན་པོས་བརྗོད་འདུག་ཀྱང་དོན་དུ་ཧོལ་རྒྱུག་ཤོར་མཁན་ནི་སྐུ་ངོ་རང་ཉིད་ཡིན་པ་གནག་རྫིས་ཀྱང་རྟོགས་ཐུབ་པ་འདུག

ཡང་སྐུ་ངོ་མཆོག་ནས་དེབ་ཆུང་ནང་ “གོང་ས་བཅུ་གསུམ་པའི་ཆུ་སྤྲེལ་ཞལ་གདམས་ནང་རྒྱ་སོག་ཡུལ་གྲུ་བརྒྱུད་པེ་ཅིང་དུ་ཕེབས་ནས་གོང་མ་ཡུམ་སྲས་མཇལ་གནང་སྐོར་འཁོད་པ་དེ་ནི་སྔ་ཕྱིའི་ཡོང་རྐྱེན་ཕྱོགས་བསྡོམས་སུ་འགོད་གནང་མཛད་པ་དང” ཞེས་གསུངས་ཏེ་ཞལ་གདམས་ཀྱི་ཚིག་དོན་ལ་དག་ཐེར་གནང་འདུག་པ་བཞིན་ངས་ཀྱང་འདི་ནས་གསུང་འཕྲིན་རིན་པོ་ཆེའི་ནང་ “འགལ་རྐྱེན་དབང་གིས་སོག་ཡུལ་དང་རྒྱ་ནག་རྒྱ་གར་བཅས་སུ་ཕེབས་དགོས་བྱུང་སྟེ” ཞེས་གསུངས་གནང་མཛད་པ་ནི་སྔ་ཕྱིའི་ཡོང་རྐྱེན་ཕྱོགས་བསྡོམས་སུ་འགོད་གནང་མཛད་པ་ཡིན་ཞེས་མགོ་སྙོམས་བྱ་རྒྱུ་ཡིན། ད་དུང་ང་ལ་དོགས་པ་གཞན་ཞིག་ཡོད་པ་ནི་སྐབས་འདིར་སྐུ་གོང་མའི་མཛད་པར་དག་ཐེར་གནང་གི་ཡོད་ཁུལ་འདི་ཉིད་༸གོང་ས་བཅུ་གསུམ་པ་སྐུ་སྒེར་ལ་དག་ཐེར་བྱེད་ཀྱི་ཡོད་དམ། ཡང་ན་བོད་ཀྱི་ལོ་རྒྱུས་སྤྱི་ལ་དག་ཐེར་བྱེད་ཀྱི་ཡོད། དང་པོ་ལྟར་ན་སྐུ་ངོ་ཞྭ་སྒབ་པའི་རྒྱལ་རབས་ཤེས་དཔར་གླེགས་བམ་གཉིས་པའི་ཤོག་གྲངས་ ༣༠༨ ནང་ཆུ་སྤྲེལ་ཞལ་གདམས་ནང་གསལ། “རང་ལ་ཆོས་སྲིད་གང་ཐད་ནས་མྱོང་གོམས་ཤེས་ཡོན་དམན་ཡང་། ལྷ་སྡེ་མི་སྡེའི་སྤྱི་ཞུས་དང་། གནམ་བསྐོས་༸གོང་མ་ཆེན་པོའི་བཀའ་ལུང་སྤྱི་བོར་ནོད་པས་ཁུར་དུ་བླངས་ཏེ” ཞེས་དང་། “འཕྲལ་ཕུག་བདེ་སྡུག་ལྷོངས་ངེས་ཞུ་བར་ངལ་བ་ཁྱད་སད་ཀྱིས་བྱང་འགྲིམས་རྒྱ་སོག་ཡུལ་གྲུ་བརྒྱུད་པེ་ཅིན་གསེར་གྱི་རྒྱལ་ཁབ་ཆེན་པོར་༸གོང་མ་ཡུམ་སྲས་མཇལ་འཕྲད་བཀུར་བཟོས་བདག་རྐྱེན་ཚད་མེད་པ་གནང་ཡང” ཞེས་སོགས་ཀྱི་གསུང་ཚིག་ལ་གོ་བ་གང་འདྲ་ཡོད་མེད་ཀྱི་འགྲེལ་བརྗོད་ངེས་ཤེས་རྙེད་པ་ཞིབ་གསལ་དགོས་གལ་ཆེ་བ་འདུག་གོ། གཉིས་པ་ལྟར་ན། ཕུར་ལྕོག་སྤྲུལ་པའི་སྐུས་མཛད་པའི་༸སྐུ་གོང་མའི་མཛད་རྣམ་རིན་ཆེན་ཕྲེང་བ་ཝ་ཎ་པར་ཁང་དུ་བསྐྲུན་པ་འཁྲུངས་རབས་པོད་ལྔ་པའི་ཤོག་གྲངས་ ༢༨༣  ནང་གསལ། “ རེ་ཞིག་པེ་ཅིང་གསེར་གྱི་རྒྱལ་ཁབ་ཆེན་པོར་བྱོན་ནས་གནམ་གྱི་ལྷའི་གོང་མ་ཡུམ་སྲས་མཇལ་ཕྲད་ཐོག”  ཅེས་དང་། ཤོག་གྲངས་ ༢༨༤ ནང་གསལ་༸རྒྱལ་དབང་འཕྲིན་ལས་རྒྱ་མཚོར་སློབ་དཔོན་ཆེན་པོ་པདྨ་འབྱུང་གནས་དངོས་སུ་ཞལ་གཟིགས་ཀྱིས་ལུང་བསྟན་བསྩལ་བའི་ལུང་འདྲེན་ནང་། “རྒྱལ་བོ་མཐར་འཁྱམས་མཐའ་དམག་བོད་ལ་འོང་། །བོད་རྒྱལ་ཁྱོད་ནི་རྒྱ་ཡི་ཡུལ་དུ་འགྲོ། །རྒྱ་ནག་རྒྱལ་པོས་རྒྱ་དམག་བོད་དུ་གཏོང་།།”ཞེས་དང་། གཏེར་སྟོན་པདྨ་གླིང་པས་བསམ་ཡས་མཆིམས་ཕུ་ནས་སྤྱན་དྲངས་པའི་གཏེར་ལུང་མུན་སེལ་སྒྲོན་མེ་ལས། “སོ་ལྔ་བར་དུ་པེ་ཅིང་རྒྱལ་རྩར་བཞུགས།།” ཞེས་དང་། ཤོག་ ༢༨༧ ནང་གསལ། “རང་ཕྱོགས་ནས་ཐོག་མར་གོང་མ་ཆེན་པོའི་བཀའ་དོན་སྤྱི་ཁུར་གྱིས་ཞི་གཏམ་རང་ལ་འགྲིགས་ཐབས་གཙོ་འདོན་བགྱིས་ཀྱང་” ཞེས་དང་། ཤོག་ ༣༠༩ ནང་ “པེ་ཅིང་རྒྱལ་ཁབ་ཕྱོགས་སུ་སྐུ་ཕྱག་དགུ་ཕྲུགས་དང་། གནམ་སྐྱོང་ཡུམ་སྲས་གཉིས་ལ་ཐུགས་རྗེ་ཆེ་ཞུའི་ཆབ་ཤོག་ཁ་བཏགས་ནང་མཛོད་སེར་པོ” ཞེས་སོགས་འདི་འདྲའི་གསུང་ཚིག་༸གོང་ས་བདུན་པ་དང་། ལྔ་པ་སོགས་ཀྱི་མཛད་རྣམ་ནང་མང་དུ་ཡོད། དེས་ན་འདི་དག་ལ་དག་ཐེར་ཞིབ་གསལ་གནང་ཐུབ་ན་བོད་ཀྱི་ལོ་རྒྱུས་ལ་འོད་སྣང་འཕྲོ་ངེས་ཡིན།

ངས་གཟབ་ནན་གྱིས་ཞུ་དགོས་པ་ཞིག་ལ་སྐུ་ངོ་ཉིད་ནས་རྒྱ་ཕྱོགས་ཡ་ཧན་ཀྲང་གིས་བྲིས་པའི་མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་༼ ཏཱ་ལའི་བླ་མའི་རྣམ་ཐར། ༽ཞེས་པའི་དེབ་ལས་ལུང་དྲངས་གཙིགས་འཛིན་གནང་འདུག་པར་དགོངས་ཕྱོགས་གཞན་འདྲ་ཡོད་ན་མ་གཏོགས་དགོངས་པ་ཟབ་བཞེས་གནང་དགོས། སྐུ་ངོའི་དེབ་ཆུང་དེའི་ནང་ཡ་ཧན་ཀྲང་གི་དེབ་ཤོག་གྲངས་ ༥༥༨ ནས་ ༥༦༥ བར་དོན་དུ་མན་ཇུའི་བློན་ཆེན་ཚོའི་གཡོ་བྱུས་ལས་༸གོང་ས་མཆོག་ཉིད་ལ་པེ་ཅིང་དུ་ཕེབས་རྒྱུའི་དགོངས་བཞེད་མེད་ངེས་ཀྱི་དོན་དངོས་གསལ་པོ་འཁོད་འདུག་ཅེས་གསུངས་འདུག་ཀྱང་། དུམ་ཚན་དེའི་ནང་གི་བརྗོད་དོན་དེ་དག་སྐུ་ངོས་གསུངས་པ་བཞིན་བདེན་པར་གཞི་འཛིན་མཆོག་པའི་སྐད་ཆ་འདི་འདུག་སྙམ་པ་མེད། དུམ་ཚན་དེའི་ནང་ཡ་ཧན་ཀྲང་གིས་སྐད་ཆ་མང་པོ་ཞིག་ཡར་བཤད་མར་བཤད་བྱས་ཏེ་དོན་དུ་པཎ་ཆེན་རིན་པོ་ཆེས་གོང་མ་མཇལ་རྒྱུ་སྙན་འབུལ་ཞུས་པ་དང་། བཀའ་ཤག་ནས་པཎ་ཆེན་རིན་པོ་ཆེ་པེ་ཅིང་ཕྱོགས་སུ་མ་ཕེབས་པའི་སྔོན་དུ་༸གོང་ས་མཆོག་ལ་གོང་མས་མཇལ་ཁ་བསྩལ་གནང་ཡོང་བའི་སྙན་འབུལ་བྱུང་བ། པེ་ཅིང་སྲིད་གཞུང་ནས་གོང་མའི་མཇལ་ཁ་ཐོབ་རྒྱུར་བསམ་གཞིགས་ཡུན་རིང་བྱས་སྐོར་སོགས་བཤད་ནས་ལོ་རྒྱུས་ཀྱི་གཟུགས་བརྙན་ཡ་མ་གཟུགས་ཤིག་མངོན་ཐབས་ལ་འབད་པ་བྱས་ཡོད་པ་ལས་རང་རེར་སྨན་དུ་འགྲོ་བའི་ལོ་རྒྱུས་ཀྱི་གནད་དོན་གླེང་མེད་པས་སྐུ་ངོ་མཆོག་ནས་དུམ་ཚན་དེར་བསྐྱར་གཟིགས་དོ་ནན་གནང་དགོས།

ཡང་སྐྱར་སྐུ་ངོ་མཆོག་ནས་ཡ་ཧན་ཀྲང་གི་དེབ་ནས་ལུང་འདྲེན་གཉིས་པ་ཞིག་ཀྱང་གནང་ཡོད། སྐུ་ངོའི་དེབ་ཆུང་ཤོག་གྲངས་ ༦ ནང་། “ ཏཱ་ལའི་བླ་མ་སྐུ་འཕྲེང་བཅུ་གསུམ་པས་ཆིང་རྒྱལ་རབས་ཀྱི་གཞུང་ལ་རྒྱབ་རྟེན་བཅོལ་བ་དེ་རྦད་དེ་སྟོང་པ་ཆགས་སོང་དགོངས་ཏེ” ཞེས་སོགས་ཡ་ཧན་ཀྲང་གི་དེབ་ལས་ལུང་འདྲེན་གནང་ཡོད་པ་དེ་ནི་ཡ་ཧན་ཀྲང་གི་དེབ་གོང་གསལ་མཚོ་སྔོན་པར་མའི་ཤོག་གྲངས་ ༣༩༩ ནང་འཁོད་ཡོད། སྐད་ཆ་འདི་ཉིད་སྐུ་ངོ་སྐུ་སྒེར་ལ་གལ་ཆེན་ཆགས་ཡོད་པས། སྐུ་ངོ་མཆོག་གིས་ལྷུ་འདོན་གནང་ནས་ལུང་འདྲེན་གནང་ཡོད་ཀྱང་ཡ་ཧན་ཀྲང་གིས་སྐད་ཆ་འདི་འདྲ་ཞིག་བཤད་དགོས་པའི་སྔ་ཕྱིའི་ཡོང་རྐྱེན་ལ་དགོངས་པ་བཞེས་མ་ཐུབ་པར་ཡང་སྐྱར་ཧོལ་རྒྱུག་གཉིས་པ་ཞིག་ཤོར་ཡོད། དེབ་དེའི་ནང་ཏཱ་ལའི་བླ་མ་སྐུ་ཕྲེང་བཅུ་གསུམ་པས། ཞེས་པའི་ཚིག་དེའི་སྔ་ལོག་དེ་མ་ཐག་ཏུ་ད་རེས་དོན་ཚན་རེ་རེ་བཞིན་སུན་འབྱིན་བྱས་རྗེས། ཞེས་གསལ་ཡོད། འདི་ལྟར་འཁོད་དོན་ནི་ཡ་ཧན་ཀྲང་གི་དེབ་དེར་དབྱིན་ཇིས་བོད་ལ་བཙན་འཛུལ་བྱས་པའི་ཐོག་རོགས་རམ་དགོས་སྐོར་དོན་ཚན་བཅུ་ཅན་གྱི་སྙན་ཞུ་ཞིག་ཏཱ་ལའི་བླ་མས་གོང་མར་ཕུལ་ཡོད་ཀྱང་། ཆིངས་སྲིད་གཞུང་ནས་ཡ་ལན་མེད་པའི་ཐོག་ད་དུང་དོན་ཚན་རེ་རེ་བཞིན་སུན་འབྱིན་བྱས་ཡོད་ཚུལ་དང་། ཏཱ་ལའི་བླ་མ་ཆིངས་སྲིད་གཞུང་ལ་མི་དགའ་བར་གྱུར་ཡོད་ཀྱང་ད་དུང་ཐུགས་རེ་མཛད་ཚུལ་སོགས་ཀྱི་སྐད་ཆ་མང་པོ་ཞིག་བཤད་ཡོད་པས་སྐུ་ངོ་མཆོག་གི་བྱེད་ཐབས་འདི་ནི་བུ་བླུན་པོས་ཕ་ཡི་མགོ་བོ་བཅོམ་པའི་དཔེ་དོན་དུ་འགྲོ་ཉེན་ཡོད་པས་ལོ་རྒྱུས་ལ་ལག་པ་འཆང་འདོད་ན་ཏན་ཏན་ཏིག་ཏིག་བྱེད་དགོས་ཞེས་བྱིས་པས་རྒན་པོར་བསླབ་བྱ་ལན་གཅིག་མི་འབུལ་ཐབས་མེད་དུ་གྱུར་སོང་ངོ་།།

འདིར་གསལ་བཤད་བྱ་དགོས་པ་ཞིག་ལ་སྤྱིར་རང་ངོས་ནས་མང་པོ་བཤད་འདོད་མེད་མཁན་ཞིག་ཡིན་ཡང་སྐུ་ངོ་མཆོག་ནས་དེབ་པར་དུ་བསྐྲུན་པ་ཙམ་མ་ཟད། དེང་སྐབས་ཁོ་རང་གི་དེབ་དེ་བོད་ནང་ཁྱབ་ཚུལ་གྱི་ཁ་ཕོ་ཆེར་སྒྲོག་བྱེད་ཀྱི་ཡོད་སྐོར་གོ་ཐོས་བྱུང་བས་སྤྱིར་རྒྱ་ཕྱོགས་ནས་པར་དུ་བསྐྲུན་པའི་ཡ་ཧན་ཀྲང་གི་དེབ་ལས་ལུང་འདྲེན་གཙིགས་ཆེན་དུ་འཛིན་ཅིང་༸གོང་ས་༸སྐྱབས་མགོན་བཅུ་བཞི་པ་ཆེན་པོས་བོད་འབངས་སྐྱེ་དགུ་ཡོངས་ལ་བསྩལ་བའི་གསུང་འཕྲིན་རིན་པོ་ཆེའི་ཚིག་དོན་ལ་རང་གིས་ཚོད་དཔག་རྟོག་བཟོ་བྱས་ནས་བྲིས་པའི་དཔེ་དེབ་ཅིག་བོད་ནང་ཁྱབ་སྤེལ་བྱས་པར་དེ་ཙམ་ཡ་མཚན་སྐྱེ་གཞི་མེད་ཀྱང་། འདིའི་ཐོག་དོན་དངོས་གསལ་བཤད་ཐུང་ཙམ་ཞིག་མ་བྱས་ན་ངན་པ་ལང་ཤོར་དུ་འགྲོ་ཉེན་མི་འོས་པར་མཐོང་ནས་བྲིས་པ་ཡིན། སྐུ་ངོ་མཆོག་ནས་འདིའི་ཐོག་དགོངས་ཚུལ་ཞིབ་གསལ་ཡིག་ཐོག་ནས་གསུང་དགོས་པ་དགོངས་འཇགས་ཞུ།།

བདེན་པའི་ཉི་གཞོན་དྲི་མེད་དྭངས་མ་ཞིག །

ཧོལ་རྒྱུག་ར་ཧུའི་མགྲིན་པར་ཚུད་དོགས་ནས། །

རང་གི་ཤེས་རབ་མཚོན་གྱི་སྤུ་གྲི་འདི། །

ལན་གཅིག་མཐོ་ནས་མི་འཕྱར་ཀ་མེད་བྱུང་། །

ཕྱི་ལོ་ ༢༠༡༢ ཟླ་ ༧ ཚེས་ ༦ ཉིན་རང་ཤག་ཏུ་རྫོགས་པར་བྲིས།