འཁྲུངས་སྐར་གྱི་དམ་བཅའ།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༦༠ སྟེང་གི་རྩོམ་སྒྲིག་པའི་གཏམ།

ཁྱོད་ཀྱི་འཁྲུངས་སྐར་ལ་དགའ་སྤྲོ་དང་སྐྱོ་གདུང་ཟུང་འབྲེལ་གྱི་རྟེན་འབྲེལ་ཞུ། ཁྱེད་ཀྱི་འཁྲུངས་སྐར་ལ་རེ་ལྟོས་དང་གནོང་འགྱོད་ལྷན་གཅིག་གི་བསངས་གསོལ་གཏོང་། ཁྱེད་ཀྱི་འཁྲུངས་སྐར་ལ་བློ་སྤོབས་དང་འཇིགས་སྣང་ཉིས་འདྲེས་ཀྱི་སྐོར་བྲོ་འཁྲབ། ད་ལོ་ཕྱི་ལུགས་ལྟར་རྩིས་ན་ཁྱེད་ཉིད་དགུང་གྲངས་ ༧༧ ལ་ཕེབས་པ་རེད། ད་བར་ཁྱེད་ཀྱི་འཁྲུངས་སྐར་ཐེངས་ ༥༣ ཙམ་བཙན་བྱོལ་ནས་གཏོང་དགོས་བྱུང་ཡོད། ཁྱེད་ཀྱིས་ང་ཚོ་དང་ལྷན་དུ་མི་ཡུལ་ནས་སྤྲང་འཁྱམས་ཀྱི་འཚོ་བ་རོལ་ནས་མི་ལོ་ང་གསུམ་ཕྱིན་སོང་། ད་དུང་ཐེངས་ཅི་ཙམ་ལ་ཁྱེད་ཀྱི་འཁྲུངས་སྐར་ང་ཚོས་མི་ཡུལ་ནས་གོ་སྒྲིག་ཞུ་དགོས་སམ། ད་ལོ་ནི་ཁྱེད་ཀྱི་ཆབ་སྲིད་ཐུགས་འགན་སྤྱི་གཞུང་ལ་བཞག་སྟེ་འཁྲུངས་སྐར་རོལ་ཐེངས་དང་པོ་དེ་ཡིན་ལ། བཙན་བྱོལ་ནས་འཁྲུངས་སྐར་རོལ་ཐེངས་མཐའ་མ་དེ་ཡང་ཡིན་པར་ཤོག

༸གོང་ས་མཆོག་གིས་སྐྱེས་སྐར་དང་ལོ་གསར་སོགས་ལ་དམིགས་བསལ་མི་མཛད་ཅིང་། བོད་མི་ཚོར་ཡང་ཐེངས་ཁ་ཤས་ལ་འཁྲུངས་སྐར་ལ་དགའ་སྟོན་བྱེད་པ་ལས། སྒེར་སོ་སོའི་ངོས་ནས་དམ་བཅའ་གནང་དགོས་པ་མང་པོ་ཞིག་ཡོད་པ་དྲན་སྐུལ་མཛད་ཡོད། ༡༩༩༥ ལོར་༧གོང་ས་མཆོག་དགུང་གྲངས་དྲུག་ཅུ་བཞེས་པའི་འཁྲུངས་སྐར་ཐོག ང་རང་སྒེར་ངོས་ནས་སྐྱེས་སྐར་དང་ལོ་གསར་སོགས་དམིགས་བསལ་ཞིག་ཏུ་རྩི་གི་མེད། ཉི་མ་རེ་རེ་བཞིན་ཉི་མ་གསར་པ་དང་སྐྱེས་སྐར་དུ་ངོས་འཛིན་གྱིས་ལུས་ངག་ཡིད་གསུམ་ནས་མགོ་འཛུགས་གསར་པ་བྱེད་ཀྱི་ཡོད་གསུངས་ཡོད། ད་ལོ་ཡང་བསྐྱར་འཛམ་གླིང་ཐོག་སྐྱེས་སྐར་གལ་ཆེན་དུ་བརྩི་སྲོལ་ཡོད་ཀྱང་། བོད་པ་ཚོས་གལ་ཆེན་དུ་མི་བརྩི་ལ། ཁོང་སྒེར་ངོས་ནས་ཀྱང་གལ་ཆེན་པོར་གང་ཡང་བརྩི་གི་མེད། ཞོཊ་པ་ཡར་ལངས་པ་དང་ཉི་མ་གསར་པ་རེ་འཆར་ཏེ་སྐྱེས་སྐར་རེ་ཆཊ་ཀྱི་ཡོད། གལ་ཆེ་ཤོས་དེ་ང་རང་གིས་ཉིན་རེའི་མི་ཚེ་དེ་མི་གཞན་ལ་ཕན་ཐོཊ་པ་ཞིག་དང་། གལ་སྲིད་ཕན་མ་ཐོཊ་ཀྱང་གཞན་ལ་གནོད་མི་སྐྱེལ་བའི་དམ་བཅའ་འཇོག་གི་ཡོད་ཅེས་གསུངས།

དེ་རིང་ང་ཚོས་དམ་བཅའ་ཞིག་འཇོག་དགོས། ༧གོང་ས་མཆོག་དགུང་གྲངས་ ༧༨ ལ་ཕེབས་པའི་འཁྲུངས་སྐར་དེ་བོད་ཀྱི་རྒྱལ་ས་ལྷ་ས་ནས་གཏོང་ཐུབ་པ་བྱ་རྒྱུའི་དམ་བཅའ་འཇོག་དགོས། གཞུང་དང་མི་མང་། མི་སྒེར་སོ་སོའི་སྙིང་ལ་འཇོག་དགོས། དུས་རབས་ཕྱེད་ལྷག་ཕྱིན་པའི་བོད་དོན་བརྒས་འཁོགས་རྒྱལ་སྤྱིའི་སྟེང་ནས་ཡལ་ཉེན་འདུག ལོ་རྒན་དོན་བདུན་བཞེས་པའི་ཡིད་བཞིན་ནོར་བུ་བོད་མིའི་ལག་ནས་འཆོར་ཉེན་འདུག ང་ཚོས་རང་དབང་ལུང་པར་ཁྱེད་ཀྱི་འཁྲུངས་སྐར་སྤྲོ་དགས་རོལ་ཏེ་ལོ་ཟླ་འཁྱོལ་ཡང་། བོད་ནང་རང་ལུས་རིན་ཆེན་མེ་རུ་བསྒྲོན་ཏེ་ཁྱོད་ཉིད་དྲན་པའི་འབོད་སྒྲ་བར་མཚམས་ཆད་ཀྱི་མེད། ཁྱོད་ཀྱི་འཁྲུངས་སྐར་སྲུང་གཙིའི་བསངས་དུད་དང་དྲག་ཆས་དམག་གི་མཚོན་ཁའི་མེ་ལྕེ་མཉམ་དུ་མཆེད་པའི་ཉིན་མཚན་འཁྱོལ་གྱི་མེད།

སྐྱེ་པ་ཡོད་ཚད་འཆི་བའི་སྡོང་རྩ་ན་གྲིབ་བསིལ་བསྟེན་ཞིང་། དར་བ་ཡོད་ཚད་རྒུད་པའི་བྲག་སྐྱིབས་ན་རྐང་མལ་གསོ་ཟེར་བ་བཞིན། ལོ་རེའི་འཁྲུངས་སྐར་ཉིན་གྱི་ཞོགས་པའི་སྐྱ་རེངས་དང་པོ་དེས་བོད་མི་སྤྱི་བྱིངས་ལ་ཚ་འདྲི་སློང་གི་ཡོད། འཇིགས་སྣང་སྐུལ་གྱི་ཡོད། “ཉིན་མོར་བྱེད་པས་ཀྱང་སྐྱ་རེངས་མོག་པོ་དེ་ཕར་ལ་བསྐྲད་མཐར་མུན་ནག་གི་མཚན་མོ་རིང་བོ་རེ་ཚུར་དྲུད་ནས་འོང་པས་ན། ད་ནི་འོད་སྣང་གི་བསླུ་བྲིད་ལའང་ཡིད་ཆེས་བྲལ་སོང་” ཞེས་སྐྱེས་སྐར་ལ་དགའ་བ་སྒོམ་རིན་མེད་པར་སྐྱེས་པའི་མཐའ་རུ་འཆི་བ་ཞིག་ཀྱང་མཆོང་ནས་ཡོང་གི་ཡོད་པ་དང་། ཞོགས་པའི་སྐྱ་རེངས་འཆར་བར་ཡང་དུང་བ་སྐྱེས་རིན་མེད་པར་ཉིན་མོའི་སྣེ་རུ་རྔམ་ནག་གི་མཚན་མོ་ཞིག་ཀྱང་དྲུད་ནས་ཡོང་གི་ཡོད། དད་པ་དག་སྣང་ཅན་གྱི་བོད་མི་རེ་ཟུང་གིས་ཁྱེད་ཉིད་སྐྱེ་རྒ་ན་འཆིའི་སྡུག་བསྔལ་ལས་ཡོངས་སུ་གྲོལ་བ་མངོན་སུམ་དུ་མཐོང་ཡོད་སྲིད་ཀྱང་ང་དང་ང་འདྲའི་གང་ཟག་དག་གིས་བཟོད་ཐབས་མི་འདུག སྒུག་ལོང་མི་འདུག ང་ཚོས་༧གོང་ས་མཆོག་གི་འཁྲུངས་སྐར་རྒྱལ་ས་ལྷ་སར་གཏོང་ཐུབ་པར་དམ་བཅའ་འཇོག་དགོས།